Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Enero de 2014

Eservi Jehovápe og̃uahẽ mboyve umi ára ijetuʼúva

Eservi Jehovápe og̃uahẽ mboyve umi ára ijetuʼúva

“Nemanduʼákena nde Apohare rehe.” (ECL. 12:1, ÑÑB)

1, 2. a) ¿Mbaʼe konséhopa Jehová ohaika Salomónpe? b) ¿Mbaʼérepa upe konsého ointeresa vaʼerã avei umi ermáno orekóvape 50 áño ári?

JEHOVÁ ohaika rréi Salomónpe: “Nemanduʼákena nde Apohare rehe ne mitãrusu árape, og̃uahẽ mboyve umi ára naiporãiva”. ¿Arakaʼépa og̃uahẽ “umi ára naiporãiva”? Salomón oiporu umi ñeʼẽpoty ohechauka hag̃ua mbaʼépa ohasa umi ijedáva. Por ehémplo, haʼekuéra iporyryipa, hetymasosopa, hoʼa chuguikuéra hãi, ndohechaporãi ni nohenduporãvéi, iñakãrague morotĩmba ha ikarapã hikuái. ¡Ajépa nahiʼãiete og̃uahẽ koʼã tiémpo ñañepyrũ hag̃ua jaservi Jehovápe! (Elee Eclesiastés 12:1-5.)

2 Heta kristiáno orekóva 50 áño árima, imbarete porã gueteri. Ikatu oime iñakãrague morotĩ mimíma, péro ndohasái gueteri umi mbaʼe ijetuʼuetéva Salomón heʼi vaʼekue. Koʼã ermánope ikatu avei ideprovécho ko konsého oñemeʼẽ vaʼekue umi imitãvape: “Nemanduʼákena nde Apohare rehe”. ¿Mbaʼépa añetehápe heʼise ko konsého?

3. ¿Mbaʼépa heʼise ñanemanduʼa ñande Apoharére?

3 Oimérõ jepe heta áñorema jaservi Jehovápe, tekotevẽ jepi ñamboyke  tiémpo jajepyʼamongeta hag̃ua ñande Apohare rehe. Por ehémplo, jaguerohoryeterei Ñandejára kreasión. Haʼe ojapo opa mbaʼe oikovéva ha ikomplikadoitereíva ñantende hag̃ua. Omeʼẽ ñandéve umi mbaʼe neporãva ikatu hag̃uáicha javyʼa heta hendáicha. Jajesareko jave hembiapokuére, koʼýte jahecha mbaʼéichapa oporohayhu, iñarandu ha ipoderóso (Sal. 143:5). Péro jahecha vaʼerã avei mbaʼépa ohaʼarõ ñandehegui. Jajepyʼamongetávo péicha, katuete jaserviséta Jehovápe ñande pyʼaite guive jaikove aja pukukue jahechauka hag̃ua jaagradeseha chupe (Ecl. 12:13).

MBAʼE OPORTUNIDÁPA OREKO UMI IÑEXPERIENSIAVÉVA

4. ¿Mbaʼépa iporã oñeporandu umi kristiáno orekómava experiénsia, ha mbaʼérepa?

4 Oiméramo nanemitãvéima ha reguereko experiénsia heta mbaʼépe, iporã reñeporandu: “¿Mbaʼépa ikatu ajapove koʼág̃a, cheresãi ha chembarete aja gueteri?”. Reservi rupi Jehovápe heta áñorema, reguereko oportunida heta ermáno ndorekóiva. Por ehémplo, ikatu remboʼe mitãrusukuérape umi mbaʼe reaprende vaʼekue Jehovágui, ha remombarete ambue ermanokuérape remombeʼúvo umi mbaʼe rehasa vaʼekue nde servísiope. Rréi David ojerure vaʼekue Jehovápe tomeʼẽmi chupe peichagua oportunida. Haʼe ohai: “Nde, ore Ruete, chemboʼe vaʼekue chemitãrusu ára guive [...]. Chetujáma ningo ha che akãrague morotĩmbámarõ jepe, Nde, che Ruete, ani chereja rei, amombeʼu peve nde puʼaka ha ne mbaretekue che ñemoñarenguérape ha mayma ou vaʼerãme” (Sal. 71:17, 18, ÑÑB).

5. ¿Mbaʼéichapa umi ermáno ha ermána orekómava experiénsia ikatu oipytyvõ ótrope?

5 ¿Mbaʼéichapa ikatu reiporu umi mbaʼe reaprende vaʼekue heta áñore reipytyvõ hag̃ua ótrope? ¿Ikatu piko reinvita nde rógape umi ermáno imitãvape pekomparti hag̃ua oñondive ha peñomokyreʼỹ? ¿Ikatúpa resẽ hendivekuéra predikasiónpe ohecha hag̃ua hikuái mbaʼeichaitépa revyʼa reservívo Jehovápe? Elihú ningo heʼi vaʼekue: “Toñeʼẽ umi hetave mbaʼéma ohasa vaʼekue. Haʼekuéra tohechauka iñaranduha” (Job 32:7). Apóstol Pablo katu omokyreʼỹ umi ermána orekóvape experiénsia oipytyvõ hag̃ua umi kristiána imitãvévape, tahaʼe heʼíva térã iñehémplo rupive. Haʼe ohai vaʼekue: “Umi kuña ijedavéva [...] omboʼe vaʼerã [...] iporãva” (Tito 2:3).

NDE IKATU HÍNA REIPYTYVÕVE ÓTROPE

6. ¿Mbaʼérepa jaʼekuaa umi ermáno orekómava experiénsia tuicha oporopytyvõha?

6 Oiméramo nde reguerekóma experiénsia heta mbaʼépe, katuete reime reporopytyvõ hag̃uáicha. Oime vaʼerã nemanduʼa mbaʼéichapa repensa vaʼekue ojapo 30 térã 40 áño. Katuete rehechakuaáne koʼág̃a nearanduve ha reikuaaveha heta mbaʼe. Avei ndekatupyryve resegi hag̃ua umi konsého oĩva la Bíbliape ha reikuaa mbaʼéichapa reg̃uahẽta umi hénte korasõme repredika jave chupekuéra. Ha oiméramo nde peteĩ ansiáno, katuete reikuaáta mbaʼéichapa reipytyvõ vaʼerã umi ermáno ohóvape tape vaíre (Gál. 6:1). Ikatu reaprende raʼe remoakã hag̃ua umi tembiapo ojejapóva kongregasiónpe, umi aty guasuhápe térã oñemopuʼãhápe Salón del Reino. Ikatu avei reikuaa mbaʼépa ere vaʼerã umi doktórpe ani hag̃ua omoĩ tuguy ñane ermanokuérape. Ha oimérire ramónte rejevautisa, upe mboyve rehasáma avei heta mbaʼe. Por ehémplo, oiméramo nefamília, reikuaa mbaʼépa ideprovechove oñemongakuaa hag̃ua umi mitãme. Jahechaháicha, umi kristiáno ohasámava heta mbaʼe, ikatu tuicha oipytyvõ Jehová puévlope. Haʼekuéra ikatu omboʼe, ogia ha omombarete ermanokuérape (elee Job 12:12).

7. ¿Mbaʼe mbaʼépa ikatu omboʼe umi imitãvévape umi kristiáno orekóva experiénsia heta mbaʼépe?

7 ¿Mbaʼéichapa reiporukuaa ne experiénsia reporopytyvõ porãve hag̃ua? Por ehémplo, ikatu remboʼe umi imitãvévape  omoñepyrũ ha ojapokuaa hag̃ua estúdio vívliko. Ha oiméramo nde peteĩ ermána, reipytyvõkuaa umi sy imitãvape oñangareko porã hag̃ua imembykuérare ha omotenonde hag̃ua Jehová servísio. Oimérõ nde peteĩ ermáno, ikatu remboʼe umi mitãrusúpe ojapo hag̃ua diskúrso oporomokyreʼỹva ha opredikakuaa hag̃ua. Avei ikatu regueraha chupekuéra revisita jave umi kristiáno ijedávape, ohecha hag̃ua hikuái mbaʼéichapa remokyreʼỹ ha remombarete umi ermáno jerovia. Ikatu ningo koʼág̃a nanembaretevéima yma guaréicha, péro reguereko oportunida rembokatupyry hag̃ua umi imitãvévape. Ñandejára Ñeʼẽ heʼi: “Imitãva ningo iporã imbarete rupi ha umi itujáva katu iñakã morotĩ rupi” (Prov. 20:29, NM).

¿IKATÚPA RESERVI OÑEKOTEVẼVEHÁPE MARANDUHÁRA?

8. ¿Mbaʼépa ojapo Pablo imbareteha tiémpope gueteri?

8 Pablo oaprovechapaite vaʼekue pe tiémpo imbaretehápe gueteri oservi hag̃ua Jehovápe. Haʼe ningo heta áño ohasa asy oviahávo misionéroramo, ha ikatu kuri odesidi opytántema peteĩ hendápe Rómape, osẽ rire kárselgui amo áño 61 rupi (2 Cor. 11:23-27). Umi ermáno Romagua oime vaʼerã oipota raʼe Pablo opyta upépe opredika hag̃ua hendivekuéra. Péro haʼe ohecha oipytyvõ porãvetaha ohóramo oservi ambue lugárpe. Upévare oñepyrũ jey hembiapo misionéroramo Timoteo ha Tito ndive ha oviaha hikuái Éfeso ha Creta gotyo, ha amalisia ovisita avei Macedonia (1 Tim. 1:3; Tito 1:5). Ndajaikuaáiramo jepe og̃uahẽpa raʼe Espáñape, jaikuaa ohose hague upépe (Rom. 15:24, 28).

9. ¿Arakaʼépa oiméne Pedro ova raʼe ikatu hag̃uáicha oservi porãve Jehovápe? (Ehecha pe taʼanga oĩva iñepyrũme.)

9 Péicha avei apóstol Pedro ova vaʼekue peteĩ lugár ikatuhápe oporopytyvõ porãve, ha upérõ oime vaʼerã oguerekóma 50 áño ári. ¿Mbaʼérepa jaʼe upéva? Oimérire haʼe Jesús avegua, térã ijedave chugui, orekóne raʼe 50 áñorupi oĩrõ guare pe rreuniónpe Jerusalénpe umi ótro apóstol ndive, áño 49-pe (Hech. 15:7). Tiémpo rire, Pedro oho oiko Babilóniape oĩháme heta hudío, ha oime vaʼerã ova upépe opredika hag̃ua chupekuéra (Gál. 2:9). Haʼe oĩ vaʼekue upépe ohaírõ guare pe primera kárta espíritu sánto rupive áño 62-perupi (1 Ped. 5:13). Hetápe ijetuʼu ova hag̃ua peteĩ lugár ndoikuaáivape, péro Pedro nopensái ijedamaha ha ndaikatumoʼãiha oho oservi Jehovápe peteĩ lugár oñekotevẽvehápe.

10, 11. ¿Mbaʼépa ohupyty peteĩ matrimónio ova rupi oñekotevẽvehápe maranduhára?

10 Koʼág̃arupi avei heta ermáno orekóva 50 áño ári, ohecha isituasión okambiaha ha ikatuha oservi Jehovápe ambue hendáicha. Oĩ kristiáno ohóva oservi umi lugár oñekotevẽvehápe maranduhára. Por ehémplo, Robert ohai: “Che ha che rembireko roguerekórõ guare 55 áñorupi, rohechakuaa ikatuha rojapo hetave mbaʼe Jehová servísiope. Peteĩnte ningo ore família ha ndoikovéima orendive. Ore tuvakuéra katu omanombáma. Avei opyta oréve peteĩ erensiaʼimi. Ropensa ikatuha rovende ore róga ropaga hag̃ua rodevéva ha roñemantene hag̃ua ajehuvila peve. Ojeʼe oréve Bolíviape oĩha heta tapicha ostudiaséva la Biblia ha heta mbaʼe ivaratoveha upe tetãme. Upémarõ rova upépe. Ñepyrũrã ijetuʼu oréve rojepokuaa hag̃ua idiferenteterei rupi Estados Unídosgui. Péro Jehová heta orevendesi ohechávo roñehaʼãmbaiteha”.

11 Robert heʼi avei: “Koʼág̃a roñemeʼẽmbaite rombaʼapo hag̃ua kongregasiónpe. Heta persóna ostudia vaʼekue la Biblia orendive ojevautisáma. Por ehémplo oĩ peteĩ família imboriahumíva oikóva mombyryeterei peteĩ puévlope, ha ijetuʼúramo jepe chupekuéra, káda semána oviaha pe siuda peve ani hag̃ua ofalta rreunionhápe. ¡Rovyʼaite ningo rohechávo mbaʼéichapa oñakãrapuʼã hikuái Jehová servísiope ha pe mitãrusu ijypykuéva oservíma de prekursór!”.

 OÑEKOTEVẼ OÑEʼẼVA ÓTRO IDIÓMAPE

12, 13. Emombeʼu mbaʼéichapa peteĩ ermáno ojehuvila vaʼekue oservi oñekotevẽvehápe.

12 Umi ermáno oservíva umi kongregasión térã grúpope oñeñeʼẽhápe ótro idióma, ikatu tuicha oñevenefisia pe ehémplo omeʼẽvagui umi kristiáno ijedamievéva. Hiʼarive peichagua territóriope igustoiterei japredika. Por ehémplo, Brian omombeʼu: “Roiko ningo Gran Bretáñape ha koʼápe oñemeʼẽ pe huvilasión ojehupytývo 65 áño. Arekópe upe eda, che ha che rembireko ndaoreretiaʼevéi, haʼete ndorovyʼáiva. Ore familiakuéra ohopáma ógagui, ha ore territóriope ndaiporiguasuvéi ostudiaséva la Biblia. Upéi aikuaa peteĩ mitãrusu chínope, ojapóva hína peteĩ investigasión pe universida oĩvape ore siudápe. Ainvita chupe rreunionrã ha oho, upéi oñepyrũ ostudia la Biblia chendive. Tiémpo riremínte ogueru hendive Salónpe peteĩ ikompañéro. Dos semána haguépe ogueru jey ótro ojapóvape investigasión upe universidápe, ha upe rireve katu ótrope”.

13 Brian osegi omombeʼu: “Pe quinto investigadór oúva rreunionhápe ostudiaséma avei la Biblia, ha apensa: ‘Ndahaʼéi ningo areko haguére 65 áño ajehuvilámava Jehová servísiope’. Upémarõ aporandu che rembirekópe, imitãvéva chehegui dos áño, noaprendeséipa idióma chíno. Roñepyrũ rostudia upe idióma gravasión rupive. Upéva ojapóma 10 áño. Ropredikávo ambue idiómape haʼete oréve ku oremitã jeýva. Upe tiémpo guive rombostudiáma 112 chínope. Opavave lénto oho jepéma rreunionhápe ha peteĩva katu ojapóma iprekursorádo”.

Ikatu hína koʼág̃a rejapo hetave mbaʼe Jehová servísiope (Ehecha párrafo 12 ha 13)

EVYʼÁKENA UMI MBAʼE IKATÚVARE REJAPO

14. ¿Mbaʼérepa ovyʼa vaʼerã umi ermáno ijedamievéva, ha mbaʼéichapa ikatu omokyreʼỹ chupekuéra Pablo ehémplo?

14 Heta kristiáno orekóva 50 áño rasa oñepyrũ ojapo heta mbaʼe Ñandejára servísiope yma ndaikatúi vaʼekue ojapo. Péro oĩ avei umi ermáno ndaikatúiva ojapo upéva hasykatúgui, térã oñangareko rupi ituvakuéra ijedávare, ỹrõ orekógui ifamília odependéva hesekuéra. Oiméramo nde rehasa hína peichagua situasión, ani reñeñandu vai. Revyʼa  vaʼerã reikuaávo Jehová oguerohoryha pe servísio remeʼẽva chupe. Upévare, reñembyasy rangue umi mbaʼe ndaikatúivare rejapo, revyʼa vaʼerã pe ikatúvare rejapo. Epensamíntena apóstol Pablo rehe oiko vaʼekue. Haʼe ningo heta áñore oĩ préso peteĩ ógape ha upévare ndaikatúi ojapove umi viáhe misionál. Upéicharõ jepe, oaprovechapaite oĩ jave ovisitáva chupe oñeʼẽ hag̃ua Ñandejára Ñeʼẽre ha omombarete hag̃ua chupekuéra (Hech. 28:16, 30, 31).

15. ¿Mbaʼérepa ojeguerohoryeterei umi ermáno ha ermána ijedámavape?

15 Jehová omombaʼeterei avei pe servísio omeʼẽva chupe umi ermáno ha ermána ijedámava. Añetehápe ningo Salomón ohechauka vaʼekue heta mbaʼe ijetuʼuha ñandeeda vove. Péro upéva ndeʼiséi ñande Apohare ndoguerohoryiha umi ermáno ijedáva ojapóva hesehápe (Luc. 21:2-4). Ha umi kongregasiónpe katu opavave kristiáno omombaʼe koʼã ermánope ohechauka haguére heta áñorema iñeʼẽrenduha Jehovápe.

16. a) ¿Mbaʼe mbaʼépa oiméne Ana ndojapói ijeda rupi? b) ¿Mbaʼépa Ana ikatu vaʼekue ojapo oservívo Jehovápe?

16 La Biblia omombeʼu yma oĩ hague peteĩ kuñakarai hérava Ana, omombaʼeguasúva Jehovápe ijedáramo jepe. Jesús onasérõ guare, Ana viúdama vaʼekue ha oreko 84 áño, upéicha rupi oiméne ndaikatuvéima oservi Ñandejárape ótro ojapoháicha. Por ehémplo oime vaʼerã ni ndoikói chugui Jesús remimboʼe, ndojeporavói chupe oho hag̃ua yvágape, ni ndopredikáine raʼe pe marandu porã oñeʼẽva pe Rréinore. Upéicharõ jepe, haʼe omombaʼeterei upe ikatúva ojapo. La Biblia heʼi hese: “Arakaʼeve ndofaltáiva pe témplope. Upépe omombaʼeguasu Ñandejárape ára ha pyhare” (Luc. 2:36, 37). Pe saserdóte oikuaveʼẽ jave pe insiénso Ñandejárape káda pyhareve ha káda pyhare, katuete Ana oĩne upépe pe hénte apytépe ha oñemboʼe kirirĩháme, oiméne média órarupi. Ha ohechárõ guare Jesúspe “oñepyrũ [...] oñeʼẽ pe mitãre, entéro umi hénte ohaʼarõvape oñemosãso Jerusalén” (Luc. 2:38).

17. ¿Mbaʼéichapa ñaipytyvõkuaa umi ermáno hasykatúva ha ijedávape omombaʼeguasu hag̃ua Jehovápe ñanendive?

17 Koʼág̃arupi ñañatende vaʼerã noiméipa peteĩ ermáno hasýva térã ijedámava oikotevẽ hína oñepytyvõ chupe. Oĩ heta ohosetereíva voi rreunionhápe ha aty guasukuérape, péro isituasión nomeʼẽvéima rupi, oho sapyʼapyʼántema hikuái. Heta kongregasiónpe ojejapo jepi arréglo ikatu hag̃uáicha koʼã ermáno ohendu umi rreunión teléfono rupive. Péro heta vése ndaikatúi avei ojejapo koʼã mbaʼe. Tahaʼe haʼeháicha, koʼã ermáno hasykatúva térã ijedáva, ikatu gueteri omombaʼeguasu Ñandejárape ñanendive, ndohóiramo jepe rreuniónpe. ¿Mbaʼéichapa ojapo upéva? Por ehémplo, haʼekuéra ikatu oñemboʼe pe kongregasión oñakãrapuʼã hag̃ua (elee Salmo 92:13, 14).

18, 19. a) ¿Mbaʼéichapa umi ermáno ijedáva omokyreʼỹ opavave kristiánope? b) ¿Máva mávapa ikatu osegi ko konsého: “Nemanduʼákena nde Apohare rehe”?

18 Peẽ ermáno ha ermána pendeedámava, ikatu oime ni ndapehechakuaái hína mbaʼeichaitépa pemokyreʼỹ opavave kristiánope. Penemanduʼákena Ana heta áñore oho hague pe témplope. Haʼe ningo ni nopensái vaʼekue iñehémplo ñanemokyreʼỹtaha koʼag̃aite peve. La Bíbliape opytáma mbaʼeichaitépa haʼe ohayhu vaʼekue Jehovápe. Péicha avei, pe mborayhu peẽ pehechaukáva Jehováre opytáma umi ermáno korasõme. Ndareíri Ñandejára Ñeʼẽ heʼi: “Akãrague morotĩ ombojegua [umi ijedáva] akã, ha kóva ojejuhu hustísia rapépe” (Prov. 16:31, ÑÑB).

19 Opavave ningo jaikuaa moõ pevépa omeʼẽ ñande posivilida jaservi hag̃ua Jehovápe. Péro entéro umi ñanembaretéva gueteri nañanderesaráiri vaʼerã ko konséhogui: “Nemanduʼákena nde Apohare rehe ne mitãrusu árape, og̃uahẽ mboyve umi ára naiporãiva” (Ecl. 12:1, ÑÑB).