“Oagradese rire Ñandejárape, ombojaʼo [pe pan] ha heʼi: ‘Kóva orrepresenta che rete, oñemeʼẽva penderehehápe. Pesegíkena pejapo kóva penemanduʼávo cherehe.’” (1 COR. 11:24, NM)

1, 2. ¿Mbaʼépa oikóne raʼe 1 de nisán mboyve?

UMI guárdia Jerusalengua ohecháma pe jasy raʼy. Pe Sanedrín oikuaávo upéva omondo opárupi umi mensahéro oanunsia hag̃ua oñepyrũmaha pe mes nisán. Umi apóstol oikuaa hiʼag̃uietemaha pe Páskua ha ohechakuaa Jesús og̃uahẽseha Jerusalénpe upe mboyve.

2 Upe jave Jesús ha ijapostolkuéra oĩ Peréape (Jordán mboypýri). Ha upérõ Jesús oho hína última ves Jerusalénpe (Mat. 19:1; 20:17, 29; Mar. 10:1, 32, 46). Ojekuaa rire arakaʼépa oñepyrũ pe mes de nisán, ojepapa vaʼerã 13 día ojejapo hag̃ua pe Páskua, hoʼátava 14 de nisán oike rire kuarahy.

3. ¿Mbaʼérepa opavave kristiánope ñaneinteresa vaʼerã pe Páskua fécha?

3 Pe Séna del Señór oñemoñepyrũ vaʼekue pe Páskua árape, ha ko áño 2014-pe hoʼáta el 14 de abril kuarahy oike rire. Upe ára ningo iñimportanteterei opavave kristiáno teépe g̃uarã ha avei umi oservisévape Ñandejárape. ¿Mbaʼérepa jaʼe upéva? Primera a los Corintios 11:23-25-pe heʼi: “Pe pyhare oñetraisionátarõ guare ñande Ruvicha Jesúspe, haʼe ojagarra peteĩ pan, ha oagradese rire Ñandejárape, ombojaʼo ha heʼi: ‘Kóva orrepresenta che rete, oñemeʼẽva penderehehápe. Pesegíkena pejapo kóva penemanduʼávo cherehe’. Osenamba rire haʼe ojagarra pe kópa ha ojapo avei upéicha” (NM).

4. a) ¿Mbaʼépa ikatu ñañeporandu ñapensávo pe Konmemorasión rehe? b) ¿Mbaʼéichapa ikatu jaikuaa mbaʼe féchapepa ojejapo vaʼerã káda áño pe Konmemorasión? (Ehecha pe rrekuádro  “Konmemorasión áño 2014-pegua”.)

4 Jesús omanda peteĩ mbaʼénte idisipulokuérape ofesteha hag̃ua káda áño: haʼe omano hague ára. Ha oime vaʼerã nde katuete rehose ko rreunión iñimportantetévape. Upévare iporã koʼág̃ama reñeporandu: “¿Mbaʼéichapa ajeprepara vaʼerã upearã? ¿Mbaʼe mbaʼépa ojejapóta upe atýpe? ¿Mbaʼépa ojeporúta upe  pyhare? ¿Mbaʼérepa iñimportánte pe Konmemorasión ha avei pe pan ha víno?”.

PE PAN HA VÍNO

5. ¿Mbaʼépa Jesús ojapouka ikatu hag̃uáicha ofesteha ijapostolkuérandi pe última Páskua?

5 Jesús omondórõ guare ijapostolkuérape oprepara hag̃ua pe lugár Paskuarã, ndeʼíri chupekuéra omyenyhẽ vaʼerãha adórnogui. Oiméne oipotánte raʼe upe lugár ipotĩ ha tuicha porã ijapa hag̃uáicha hikuái (elee Marcos 14:12-16). Avei okonsegi vaʼerã hikuái umi mbaʼe ojeʼútava upe pyharépe, por ehémplo pan ilevaduraʼỹva ha víno tínto. Omohuʼã rire pe Páskua, Jesús oñepyrũ oñeʼẽ pe pan ha vínore ha oiporu umíva orrepresenta hag̃ua peteĩ mbaʼe iñimportánteva.

6. a) Ofestehapa rire pe Páskua, ¿mbaʼépa heʼi vaʼekue Jesús pe pan rehe? b) ¿Mbaʼeichaguápa pe pan ojeporúva Konmemorasiónpe?

6 Apóstol Mateo oĩ vaʼekue avei upérõ, ha haʼe ohai: “Jesús ojagarra peteĩ pan ha oñemboʼe rire, ombojaʼo ha omeʼẽ idisipulokuérape heʼívo: ‘Kóina peʼu’” (Mat. 26:26, NM). Upe “pan” Jesús oiporu vaʼekue ndailevadúrai, ojeporuháicha avei Páskuape (Éx. 12:8; Deut. 16:3). Ojejapo arína de trígo ha ýguinte, noñemoĩri pype levadúra, juky, ni mbaʼeveichagua kondiménto. Ndorekói rupi levadúra, pe pan ndovúi, iséko ha ikatu oñembojaʼo porã. Koʼág̃arupi umi ansiáno ojerure jepi pe Konmemorasión mboyve ojeprepara hag̃ua pe pan. Upéva ojejapo vaʼerã arína de trígo integrál ha ýgui, ha oñemoĩ vaʼerã aseiteʼimi pe mbaʼyrúre oñembojy hag̃ua. (Noñekonsegíriramo arína de trígo, ikatu ojeporu avati kuʼi, arína de arrós, de seváda, térã ambue semíllagui.) Ikatu avei ojeporu matzá, peteĩ pan ndailevadúraiva opreparáva umi hudío, péro ndorekói vaʼerã málta, uévo ni sevói.

7. ¿Mbaʼeichagua vínopa oiporu vaʼekue Jesús, ha mbaʼeichaguápa ikatu ojeporu Konmemorasiónpe?

7 Upe rire Mateo heʼi: “[Jesús] ojagarra peteĩ kópa ha, oagradese rire Ñandejárape, omeʼẽ chupekuéra ha heʼi: ‘Kóina peʼu enterovete’” (Mat. 26:27, 28, NM). Jesús oiporu kuri víno tínto. (Upérõ ohasáma heta mése oñembyaty hague pe parrál,  upévare jaʼekuaa ndahaʼéi hague húgo de úva nofermentáiva la hoʼúva hikuái.) Ojejapórõ guare pe primera Páskua Egíptope, umi isrraelíta ndoʼúi vaʼekue víno, péro Jesús ndeʼíri ivaiha ojeʼu víno Páskuape. Haʼe oiporu vaʼekue víno ojapórõ guare pe Séna del Señór. Upéicha rupi kristianokuéra oiporu avei ojapo jave pe Konmemorasión. Péro, ¿mbaʼeichagua vínopa ojeporu vaʼerã? Jesús ruguýpe natekotevẽi oñemoĩ mbaʼeve ikatu hag̃uáicha ovaleve, upévare pe vínope orrepresentáva huguy ndovaléi oñemoĩ mbaʼevete, por ehémplo vrándi térã mbaʼeveichagua espésia. Ikatu ojeporu oimehaichagua víno tínto, kaséro térã ojejoguáva, tahaʼe vorgóña, veaujoláis térã kiánti.

MBAʼÉPA ORREPRESENTA PE PAN HA VÍNO

8. ¿Mbaʼérepa iñimportánte ñandéve g̃uarã pe pan ha víno orrepresentáva?

8 Pablo heʼi vaʼekue enterove kristiáno ogueromanduʼa vaʼerãha pe Séna del Señór, ndahaʼéi umi apóstol añónte. Umi ermáno Corintoguápe oskrivi: “Ñande Ruvicha chemboʼe haguéicha, upéicha che pomboʼe kuri: [...] [Jesús] ojagarra peteĩ pan, ha oagradese rire Ñandejárape, ombojaʼo ha heʼi: ‘Kóva orrepresenta che rete, oñemeʼẽva penderehehápe. Pesegíkena pejapo kóva penemanduʼávo cherehe’” (1 Cor. 11:23, 24, NM). Upévare koʼag̃aite peve ñande jajapo káda áño pe Konmemorasión ha iñimportánte ñandéve g̃uarã pe pan ha víno orrepresentáva.

9. ¿Mbaʼépa heta hénte oimoʼã oiko hague pe pan Jesús oiporu vaʼekuégui?

9 Heta hénte irrelihiósova opensa Jesús heʼi hague “Kóva hína che rete”. Upéicha rupi orovia hikuái pe pángui oikoha Jesús rete peteĩ milágro rupive. Péro upéva ndoikói vaʼekue. * Jesús oĩ kuri umi apóstol iñeʼẽrendúvandi ha avei upépe oĩ  pe pan ilevaduraʼỹva hoʼútava hikuái. Jaʼekuaa upéicharõ Jesús heʼíva orrepresentaha ambue mbaʼe. Ha jaikuaaháicha haʼe pyʼỹinte oporomboʼémi upéicha (Juan 2:19-21; 4:13, 14; 10:7; 15:1).

10. ¿Mbaʼépa orrepresenta pe pan ojeporúva Konmemorasiónpe?

10 Pe pan umi apóstol ohecháva ha hoʼu potaitéva orrepresenta Jesús rete. Peteĩ tiémpope umi kristiáno tee oimoʼã vaʼekue pe pan orrepresentaha umi unhídope, oñehenóiva avei la Bíbliape “Cristo rete”. ¿Mbaʼérepa opensa hikuái upéicha? Jaikuaaháicha, Jesús kangue noñemopẽi vaʼekue ni peteĩ hendápe, péro haʼe ombojaʼo pe pan heta hendápe. Upévare oñeimoʼã vaʼekue pe pan ndaikatuiha orrepresenta hete (Efes. 4:12; Rom. 12:4, 5; 1 Cor. 10:16, 17; 12:27). Péro ohasávo pe tiémpo umi kristiáno ohechakuaa pe pan orrepresentaha Jesús rete. La Biblia heʼi ‘Cristo ohasa asy hague yvypóraicha’ ha ojeklava chupe peteĩ yvyráre. Upéicharõ, ojejapo jave pe Séna del Señór pe pan orrepresenta Jesús rete ‘ogueraháva ijapére ñande pekádo’ (1 Ped. 2:21-24, NM; 4:1, NM; Juan 19:33-36; Heb. 10:5-7).

11, 12. a) ¿Mbaʼépa heʼi raʼe Jesús pe vínore? b) ¿Mbaʼépa orrepresenta pe víno ojeporúva Séna del Señórpe?

11 Jaikuaávo mbaʼépa orrepresenta pe pan ikatu ñantende porã Jesús heʼi vaʼekue pe vínore. La Biblia heʼi: “Osenamba rire haʼe ojagarra pe kópa ha ojapo avei upéicha heʼívo: ‘Ko kópa orrepresenta pe kompromíso pyahu ojejapóva che ruguy rupive’” (1 Cor. 11:25, NM). Buenas Nuevas para el Paraguay otradusi ko párte kóicha: “Ko kópa haʼe pe pákto pyahu che ruguy rupi”: ¿Ikatúpa jaʼe pe kópa reínte orrepresentaha pe kompromíso pyahu? Nahániri. Jesús heʼívo kópa oñeʼẽ kuri pe víno oĩvare pype. ¿Mbaʼépa heʼi raʼe orrepresentaha pe víno? Heʼi orrepresentaha huguy oñeñohẽtava sakrifísioramo.

12 Marcos kuatiañeʼẽme heʼi: “Kóva orrepresenta hína ‘che ruguy pe kompromíso pyahúpe g̃uarã’, oñeñohẽtava heta rehehápe” (Mar. 14:24, NM). Jesús ruguy oñeñohẽ “oñeperdona hag̃ua hetápe ipekádo” (Mat. 26:28, NM). Upévare ikatu jaʼe pe víno tínto orrepresentaha Jesús ruguy. Upéva rupi ikatu ñanesãso ñande pekádogui, “ñane rembiapo vai ikatu oñeperdona” (elee Efesios 1:7).

Umi apóstol hoʼu pe víno orrepresentáva Jesús ruguy oñeñohẽva ojejapo hag̃ua pe kompromíso pyahu (Ehecha párrafo 11 ha 12)

JAGUEROMANDUʼA JESÚS OMANO HAGUE ÁRA

13. ¿Mbaʼéichapa káda áño ojegueromanduʼa Cristo omano hague ára?

13 Oiméramo rehóta primera ves pe Konmemorasión ojapóvape testígo de Jehová, katuete rehecháta ojejapoha peteĩ lugár ipotĩ, iporãmíva ha oñeime porãtahápe. Upe jave oñemoĩ jepi yvoty oñeadorna hag̃ua pe lugár, péro ndojedekorái peteĩ fiestarãicha. Peteĩ ansiáno ikatupyrýva omombeʼúta mbaʼépa heʼi la Biblia ko rreunión iñimportantetévare. Avei oipytyvõta opavavépe ontende ha omombaʼe hag̃ua pe sakrifísio Jesús ojapo vaʼekue ñanderehehápe ikatu hag̃uáicha jaikove (elee Romanos 5:8-10). Avei omyesakãta la Biblia heʼíva umi mokõi esperánsa orekóvare kristianokuéra.

14. ¿Mbaʼeichagua esperánsarepa oñeñeʼẽ pe Konmemorasión diskúrsope?

14 Umi apóstol ha mbovymi kristiáno oreko esperánsa ogovernávo Cristo ndive yvágape (Luc. 12:32; 22:19, 20; Rev. 14:1). Péro hetaiteve kristiáno oreko esperánsa oikovévo opa ára g̃uarã ko yvy ape ári iporãitereítavape. Oiko vove upéva, ojejapóta Ñandejára rembipota ko Yvýpe ojejapoháicha yvágape. Ymaite guivéma ningo kristianokuéra ojerure upéva (Mat. 6:10). La Biblia omombeʼu mbaʼeichaitépa oiko  porãta ha ovyʼáta umi oikovétava opa árare (Is. 11:6-9; 35:5, 6; 65:21-23).

15, 16. ¿Mbaʼéichapa ojeporu pe pan pe Séna del Señórpe?

15 Opa potávo pe diskúrso, pe ermáno heʼíta og̃uahẽmaha pe óra ojejapo hag̃ua Jesús omanda vaʼekue ijapostolkuérape. Jaʼéma haguéicha, ojeporúta pan ilevaduraʼỹva ha víno tínto, ha oñemoĩta peteĩ mesápe pe diskursánte ypýpente. Haʼe oleéta la Bíbliagui Jesús heʼi vaʼekue omoñepyrũrõ guare pe Séna del Señór. Mateo kuatiañeʼẽme heʼi: “Jesús ojagarra peteĩ pan ha oñemboʼe rire, ombojaʼo ha omeʼẽ idisipulokuérape heʼívo: ‘Kóina peʼu. Kóva orrepresenta che rete’” (Mat. 26:26, NM). Jesús ombojaʼo pe pan ilevaduraʼỹva ha ombohasa ijapostolkuérape. Upévare, ág̃a ojejapo vove pe rreunión el 14 de abril, rehecháta plátope pe pan ilevaduraʼỹva oñembojaʼóva heta hendápe.

16 Ojejapoháicha jepi voi, ojeporúta heta pláto ikatu hag̃uáicha oñembohasa pe pan enterovévape. Ojejapóvo upéva, ndojesegimoʼãi mbaʼeveichagua rrituál. Ñepyrũrã ojejapóta peteĩ orasión ha upéi oñembohasáta umi pláto, opyta porãveháicha. Saʼi oĩ hoʼútava pe pan, ha heta kongregasiónpe ndaiporimoʼãi voi hoʼúva, oiko haguéicha ojejapórõ guare pe Konmemorasión 2013-pe.

17. ¿Mbaʼéichapa ojeporúta pe víno Konmemorasiónpe?

17 Upe rire oñeñeʼẽ jeýta Mateo heʼi vaʼekuére: “[Jesús] ojagarra peteĩ kópa ha, oagradese rire Ñandejárape, omeʼẽ chupekuéra ha heʼi: ‘Kóina peʼu enterovete; kóva orrepresenta hína che “ruguy pe kompromíso pyahúpe” g̃uarã, oñeñohẽtava oñeperdona hag̃ua hetápe ipekádo’” (Mat. 26:27, 28, NM). Péicha avei pe Konmemorasiónpe ojejapo jeýta peteĩ orasión ha oñembohasáta pe víno opavavépe.

18. ¿Mbaʼérepa iñimportantete ñaime pe Konmemorasiónpe, ndajaʼumoʼãiramo jepe pe pan ha víno?

18 Jesús ohechauka haguéicha, umi ohótava yvágape ogoverna hag̃ua hendive añoite ikatu hoʼu pe pan ha víno Konmemorasiónpe (elee Lucas 22:28-30; 2 Tim. 4:18). Upéva heʼise opavave lénto ñaimétava pe Séna del Señórpe ndajaʼumoʼãiha pe pan ni pe víno, upéicharõ jepe iñimportánte jaha upépe jahechauka hag̃ua ñamombaʼeha Jesús sakrifísio. Pe Konmemorasión aja jajepyʼamongeta vaʼerã umi mbaʼe porãita ikatúvare jahupyty Jesús ñandesalva haguére. ¿Mbaʼépa hína umíva? Jareko ningo esperánsa ñaimévo ‘pe aty guasúpe’ ohasátava ‘pe jehasa asy guasu’. Avei oikóta ñandehegui Ñandejára siérvo ‘ojohéiva ijao puku ha omomorotĩ vaʼekue pe Ovecharaʼy ruguýpe’ (Rev. 7:9, 14-17, NM).

19. ¿Mbaʼe mbaʼépa ikatu jajapo jajeprepara hag̃ua pe Konmemorasionrã, ha mbaʼéichapa ñañevenefisiavéta?

19 ¿Mbaʼe mbaʼépa ikatu jajapo jajeprepara hag̃ua pe Konmemorasionrã ojapótava testígo de Jehová opárupi ko yvy ape ári? Umi semána oiko mboyve pe aty, ñañepyrũtama ñainvita opa ikatúvape. Ha hiʼag̃uívo ohóvo upe día, jaleétama jahávo umi téxto vívliko omombeʼúva mbaʼépa ojapo Jesús ha mbaʼépa oiko rakaʼe umi fécha haʼe omano mboyve. Jajapóta ikatúva guive ani hag̃ua jafalta upe rreuniónpe. Ha upe díape ñag̃uahẽ vaʼerã voi porã, pe kántiko ha orasión mboyve. Péichamante jasaludáta umi og̃uahẽvape ha jaaprovechapaitéta pe rreunión. Opavave ñañevenefisiáta jaheka ha jaleéramo umi téxto ojeʼéva pe diskúrsope. Ha hiʼarive ñaiméramo upépe jahechaukáta ñamombaʼeha ñandepyʼaite guive Jesús sakrifísio ha jajapóta haʼe heʼi vaʼekue: “Pesegíkena pejapo kóva penemanduʼávo cherehe” (1 Cor. 11:24, NM).

^ párr. 9 Peteĩ mboʼehára alemán hérava Heinrich Meyer heʼi: “[Umi apóstol] ohecha Jesús rete oĩha gueteri kompletoite (oikove gueteri) ha huguy neʼĩraha gueteri oñeñohẽ. Upévare haʼekuéra nopensái [...] hoʼuha Cristo rete ni huguy. Jesús ndeʼíri vaʼekue peteĩ mbaʼe ijapostolkuéra ndaikatumoʼãiva ontende”.

^ párr. 52 Pe ekinóksio oiko dos vése káda áño, marzo ha septiémbrepe. Oiko jave upéva pe ára ha pe pyhare peteĩchaite ipuku, upéva heʼise 12 óra arakue ha 12 óra pyharekue.