Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Diciembre de 2013

¿Jajesakrifikápa pe Rréino rehehápe?

¿Jajesakrifikápa pe Rréino rehehápe?

‘Ñandejára ohayhu upe vyʼapópe omeʼẽvape.’ (2 COR. 9:7, NM)

1. ¿Mbaʼe sakrifísiopa ojapo heta hénte, ha mbaʼérepa?

ENTEROVÉVANTE jajesakrifika umi mbaʼe ñaneinteresávare. Por ehémplo, umi sy ha túva oiporu itiémpo, ipláta ha imbaretekue ifamiliakuéra rehehápe. Heta mitãrusu ha mitãkuña orrepresentaséva hetãme umi Olimpiádape, káda día oiporu heta óra oñentrena hag̃ua, ohasa rangue tiémpo iñamigokuéra ndive ojediverti hag̃ua. Jesús voi ojesakrifika vaʼekue umi mbaʼe ointeresávare chupe. Haʼe ikatu kuri ipláta heta térã ifamília, péro upéva rangue ombaʼapo meme pe Rréino rehehápe (Mat. 4:17; Luc. 9:58). Idisipulokuérape g̃uarã pe Rréino iñimportanteterei vaʼekue avei, upévare omboyke heta mbaʼe ha ojesakrifika hikuái hesehápe (Mat. 4:18-22; 19:27). Opa koʼã mbaʼére, iporã ñañeporandu: “¿Mbaʼépa iñimportanteve chéve g̃uarã?”.

2. a) ¿Mbaʼe sakrifísiopa tekotevẽ ojapo opavave kristiáno? b) ¿Mbaʼeichagua sakrifísiopa ojapo avei ñane ermanokuéra?

2 Kristianokuéra ojapo vaʼerã heta sakrifísio oĩ porãséramo Jehová ndive. Por ehémplo, tekotevẽ omboyke tiémpo oñemboʼe ha olee hag̃ua la Biblia, ostudia hag̃ua hogayguakuérandi, oho hag̃ua rreunionhápe ha opredika hag̃ua (Jos. 1:8; Mat. 28:19, 20; Heb. 10:24, 25). * Añetehápe, ñañehaʼã rupi pe Rréino rehehápe ha Jehová ñanevendesígui, koʼág̃arupi ojepredikave ha hetave hénte oñemoag̃ui pe “montáña oĩháme Jehová róga” (Is. 2:2, NM). Oĩ avei ermáno oservíva Betélpe, oipytyvõva ojejapo hag̃ua Salón del Reino ha Salón de Asambléa, oorganisáva umi aty guasu ha oipytyvõva oiko jave desástre naturál. Jehová ndojeruréi ñandéve jajapo hag̃ua koʼã tembiapo ikatu hag̃uáicha jaikove opa ára g̃uarã, upéicharõ jepe  iñimportanteterei oñemotenonde hag̃ua Ñandejára Rréino.

3. a) ¿Mbaʼépa jahupyty jajapóvo sakrifísio Ñandejára Rréino rehehápe? b) ¿Mbaʼe mbaʼépa ñañeporandu vaʼerã?

3 Ñane tiémpope, koʼýte iñimportanteve ñambaʼapo Ñandejára Rréino rehehápe. Katuete ningo ñamombaʼeterei jahechávo oĩha heta hetave umi ojapóva sakrifísio ipyʼaite guive Jehovápe g̃uarã (elee  Salmo 54:6). Ñande avei javyʼaitereíta jajapóramo upéicha ñahaʼarõ aja Jehová ogueru Irréino (Deut. 16:15; Hech. 20:35). Káda uno ñañeporandu vaʼerã: “¿Ikatúpa ajesakrifikave pe Rréino rehehápe? ¿Mbaʼéichapa aiporu che tiémpo, che mbaʼerepy, che mbaretekue ha che katupyrykue? ¿Mbaʼe mbaʼépa akumpli vaʼerã?”. Jahechamína mbaʼépa ikatu ñaaprende umi sakrifísio ojapo vaʼekuégui umi isrraelíta. Upéva ñanepytyvõta vyʼápe jaservi hag̃ua Jehovápe.

UMI SAKRIFÍSIO OJEJAPO VAʼEKUE ISRAÉLPE

4. ¿Maʼerãpa ojapo vaʼekue sakrifísio umi isrraelíta?

4 Umi isrraelíta yma guare tekotevẽ vaʼekue ojapo sakrifísio ikatu hag̃uáicha oñeperdona chupekuéra ipekádo ha oĩ porã hag̃ua hikuái Jehová renondépe. Oĩ vaʼekue sakrifísio katuete ojejapo vaʼerã ha ambue katu ojejaposérõnte, térã voluntário (Lev. 23:37, 38). Por ehémplo, ojejaposérõ peteĩ sakrifísio voluntário, oñemeʼẽ vaʼerã pe mymba enteroite ikatu hag̃uáicha ojehapy. Oñeinaugurárõ guare pe témplo oñemopuʼã vaʼekue Salomón tiémpope, ojejapo hetaiterei sakrifísio (2 Crón. 7:4-6).

5. ¿Mbaʼéichapa Jehová ohechauka ontendeha umi imboriahúvape?

5 Jehová oikuaa vaʼekue naentéroi ikatuha ojapo sakrifísio peteĩchapa, upévare ojerure chupekuéra oikuaveʼẽ hag̃ua omeʼẽháicha iposivilida. Pe Léi heʼi vaʼekue oñekuaveʼẽ vaʼerãha mymba ha oñeñohẽ vaʼerãha huguy. Koʼã sakrifísio ningo “ohechaukánte umi mbaʼe porã oútava” Jesús rupive (Heb. 10:1-4, NM). Jehová imbaʼerechakuaa umi isrraelítandi ha upévare ndojopýi hendivekuéra. Por ehémplo, peteĩ isrraelíta ndaikatúiramo oikuaveʼẽ hymbakuéra apytégui pe sakrifisiorã operhudikátama rupi chupe, ikatúnte omeʼẽ mokõi tortóla hendaguépe. Upéicha, umi imboriahúva jepe vyʼápe omeʼẽ  isakrifísio (Lev. 1:3, 10, 14; 5:7). Jehová ningo oasepta chuguikuéra heta kláse animál, péro oĩ mokõi mbaʼe ojeruréva opavave ojapóvape umi sakrifísio voluntário.

6. ¿Mbaʼépa ojerure Jehová opavave ojapóvagui sakrifísio, ha mbaʼérepa iñimportantete koʼã mbaʼe?

6 Primero, pe ojapóva pe sakrifísio omeʼẽ vaʼerã pe iporãvéva ikatu hag̃uáicha “oñemoĩ porã” Ñandejárandi. Jehová oasepta umi mymba hesãivante (Lev. 22:18-20). Pe animál orekóramo peteĩ defékto, Jehová ndoaseptái pe sakrifísio. Segundo, pe omeʼẽva peteĩ sakrifisiorã, hekopotĩ vaʼerã pe Léi heʼiháicha. Oiméramo ikyʼa hína, ojapo raẽ vaʼerã sakrifísio ipekádore oñemoĩ porã hag̃ua Jehovándi (Lev. 5:5, 6, 15). Avei peteĩ persóna ikyʼáramo Jehová renondépe ha hoʼu pe sakrifísio de komunióngui, pe Léi heʼi omano vaʼerãha (Lev. 7:20, 21). Péro haʼe ipotĩramo ha pe sakrifísio omeʼẽtava ndorekói mbaʼeveichagua defékto, ovyʼáta ha ikonsiénsia potĩta (elee  1 Crónicas 29:9).

UMI SAKRIFÍSIO OJEJAPÓVA KOʼÁG̃ARUPI

7, 8. a) ¿Mbaʼéichapa oñeñandu heta ermáno ojapo jave sakrifísio pe Rréino rehehápe? b) ¿Mbaʼépa omeʼẽ vaʼerã Jehovápe káda ermáno?

7 Ñane tiémpope heta ermáno oñemeʼẽmbaite oservi hag̃ua Jehovápe, ha Jehová omombaʼeterei upéva. Avei koʼã ermáno oñeñandu porã oporopytyvõ haguére. Peteĩ ermáno ombaʼapo meméva ojejapo hag̃ua Salón del Reino ha avei oipytyvõva oiko jave umi desástre naturál, heʼi ndaikatuiha ni omombeʼupa mbaʼeichaitépa ombovyʼa chupe umi traváho ojapóva hapichakuéra rehehápe. Haʼe heʼi: “Avyʼaiterei ahechávo umi ermáno oagradese ha ijuruvy reiha opytávo oreko haguére peteĩ Salón pyahu, térã oñepytyvõ jave chupekuéra oiko rire peteĩ desástre naturál. Añandu ningo ideprovechoitereiha umi mbaʼe rojapo vaʼekue hesehapekuéra”.

Umi isrraelíta ojapo haguéicha, koʼág̃a avei ñande jajapo heta sakrifísio voluntário (Ehecha párrafo 4 ha 7 guive 13 peve)

8 Heta tiémporema Jehová organisasión ombaʼapo meme pe Rréino rehehápe. Áño 1904-pe ermáno Charles T. Russell oskrivi: “Enterove kristiáno ohechakuaa vaʼerã Ñandejára rupivénte jarekoha tiémpo, pláta ha hetave mbaʼe. Upévare káda uno jaiporu porã vaʼerã koʼã mbaʼe ñamombaʼeguasu hag̃ua chupe”. Jajapóramo sakrifísio Jehovápe, katuete jahupytýta heta vendisión, péro tekotevẽ avei ñañehaʼãmbaite (2 Sam. 24:21-24). Upévare iporã ñañeporandu: “¿Ikatúpa aiporu porãve che tiémpo, che pláta, che  mbaretekue ha che katupyrykue pe Rréino rehehápe?”.

Ermanokuéra ombaʼapóva Betélpe (Australia)

9. ¿Mbaʼépa ikatu ñaaprende Jesús heʼi vaʼekuégui Lucas 10:2-4-pe?

9 Ñane tiémpo. Heta ermáno ombaʼapo ikatu hag̃uáicha ojetradusi ha oñeimprimi ñane puvlikasionkuéra, oñemopuʼã hag̃ua Salón del Reino ha Salón de Asambléa, ha oñeorganisa hag̃ua umi aty guasu. Avei oĩ oipytyvõva ermanokuérape oiko haguépe desástre naturál, térã ojapóva ambue tembiapo iñimportánteva. Péro un día ningo oreko 24 órante. Upéicharõ, ¿mbaʼépa jajapo vaʼerã jaiporu porãve hag̃ua ñane tiémpo? Jesús omondórõ guare umi disípulope opredika hag̃ua, heʼi chupekuéra: “Ani pepyta tapére pesaluda hag̃ua avavépe” (Luc. 10:2-4, NM). ¿Mbaʼépa heʼise raʼe? Peteĩ karai arandu heʼi: “Umi oikóva Oriente gotyo ndojosaludái vaʼekue ñande jajosaludaháicha; haʼekuéra ndahaʼéi ojopopyhýnteva térã oñakãityʼimíva. Upéva rangue oñoañua heta, ojayvy, ha oĩ voi katu oñesũva. Ojejapo hag̃ua koʼã mbaʼe ojeporu heta tiémpo”. Jesús ningo nomboligái idisipulokuérape imaledukádo hag̃ua, síno haʼe oipota ohechakuaa hikuái saʼiha itiémpo ha oiporu porã vaʼerãha ojapo hag̃ua umi mbaʼe iñimportantevéva (Efes. 5:16). ¿Ikatúpa jasegi ko konsého ha jaiporuve ñane tiémpo pe Rréino rehehápe?

Maranduhára omeʼẽva ikontrivusión peteĩ Salón del Réinope Kéniape (África)

10, 11. a) ¿Mbaʼéichapa ojeporu umi kontrivusión oñemeʼẽva pe Rréino rehehápe? b) ¿Mbaʼéichapa ikatu ñanepytyvõ 1 Corintios 16:1, 2 heʼíva?

10 Ñande pláta. Oñekotevẽ heta pláta ojejapo hag̃ua umi tembiapo pe Rréino rehehápe. Por ehémplo, káda áño ojeporu millones de dólares oñemantene hag̃ua umi superintendénte viahántepe, umi prekursór espesiál ha misionérope. Áño 1999 guive, oñemopuʼãma mas de 24.500 Salón del Reino umi tetã imboriahúvape, ha oñekotevẽve amo 6.400 rupi. Avei káda mes oñeimprimi 100 millón rupi rrevísta Ñemañaha ha ¡Despertad! Opa koʼã mbaʼe oñemantene umi kontrivusión voluntária rupive.

11 Apóstol Pablo omeʼẽ vaʼekue peteĩ konsého ikatúva ideprovécho ñandéve ñameʼẽta jave ñane kontrivusión (elee  1 Corintios 16:1, 2). Ñandejára espíritu omomýi chupe heʼi hag̃ua umi ermáno Corintoguápe iporãha omboyke pláta ikatumiháicha pe primer día káda semána. Upéicha nohaʼarõmoʼãi hikuái pe último día ohecha hag̃ua mboýpa hemby chupekuéra. Koʼág̃a avei voi reheve jahecháma vaʼerã mboýpa ikatúta ñakontrivui káda uno (Luc. 21:1-4; Hech. 4:32-35). Jehová ningo omombaʼeterei ñandepojera haguére.

Ermáno ombaʼapóva Comité Regional de Construcciónpe (Tuxedo, Nueva York)

12, 13. a) ¿Mbaʼépa ikatu ñandejoko ani hag̃ua jaiporu ñane mbaretekue ha ñande kapasida pe Rréino rehehápe? b) ¿Mbaʼéichapa Jehová ñanepytyvõta?

12 Ñane mbaretekue ha ñande katupyrykue. Jehová ñanepytyvõ jaiporu jave ñane mbaretekue ha ñande kapasida pe Rréino rehehápe. Haʼe opromete ñanemombaretetaha ñanekangy jave (Is. 40:29-31). Péro sapyʼánte ikatu ñapensa nañandekatupyryiha jajapo hag̃ua peteĩ traváho, térã ótro ojapo porãvetaha ñandehegui. Péicha jave ñanemanduʼa vaʼerã Jehová ikatuha ñanembokatupyryve, ojapo haguéicha Bezalel ha Oholiab rehe (Éx. 31:1-6; ehecha pe taʼanga oĩva iñepyrũme).

13 Jehová oipota ñañehaʼãmbaite jaservi porã hag̃ua chupe (Prov. 3:27). Por ehémplo oñemopuʼã jeýrõ guare pe témplo, haʼe heʼi umi hudío oĩvape Jerusalénpe opensa hag̃ua mbaʼéichapa oipytyvõ hína ojejapo hag̃ua upe traváho (Ageo 1:2-5). Haʼekuéra ndojesarekói umi mbaʼe iñimportantevévare, upéicha rupi ohesarea chupekuéra  heta mbaʼe. Iporã ningo ñañeporandumi: “¿Amotenondépa hína Jehová rembipota? ¿‘Ajepyʼamongeta porãpa’ umi mbaʼe ajapóvare ahecha hag̃ua ikatúpa ambaʼapove pe Rréino rehehápe koʼã ára pahápe?”.

JAJAPO IKATÚVA GUIVE ÑAMEʼẼ HAG̃UA SAKRIFÍSIO JEHOVÁPE

14, 15. a) ¿Mbaʼéichapa ñanemokyreʼỹ umi ermáno imboriahúva ehémplo? b) ¿Mbaʼépa ñañehaʼã vaʼerã jajapo?

14 Heta ermáno oiko umi tetã imboriahúvape ha oĩháme hetaiterei provléma, péro Jehová organisasión oñehaʼã ‘omyengovia’ umi mbaʼe ofaltáva chupekuéra (2 Cor. 8:14, NM). Upéicharõ jepe, koʼã ermáno uperupigua omeʼẽ ikontrivusión. Chupekuéra g̃uarã ningo upéva peteĩ priviléhio. Jehová oguerohoryeterei koʼã ermánope ipojera haguére imboriahúramo jepe (2 Cor. 9:7).

15 Peteĩ tetã imboriahúvape oĩva Áfricape, heta ermáno omboyke peteĩ párte hiʼuértagui ha oiporu pe pláta onohẽva chugui omeʼẽ hag̃ua ikontrivusión pe Rréino rehehápe. Upe tetãme oñekotevẽterei kuri peteĩ Salón del Reino pyahu, ha umi ermáno oipytyvõseterei oñemopuʼã hag̃ua pe Salón. Péro ojedesidi kuri ojejapotaha oñeñemitỹha tiémpope. ¿Ojokópa raʼe upéva umi ermánope? Nahániri. Haʼekuéra de diakue ombaʼapo pe Salón rehe ha pyharekue katu oñemitỹ. ¡Ajépa isakrifikadoite hikuái! Ojogua umi ermáno síglo primeroguápe oiko vaʼekue Macedóniape. Haʼekuéra “imboriahuetereíramo jepe”, ojerure asy ojehejamínte hag̃ua chupekuéra oipytyvõ umi ermáno oikotevẽvape (2 Cor. 8:1-4, NM). Upéicha avei, ñande ñañehaʼã vaʼerã ñameʼẽ Ñandejárape haʼe ‘ñanepytyvõ haguéicha’, tove tañanemboriahu térã ñandepláta (elee  Deuteronomio 16:17).

16. ¿Mbaʼépa jajapo vaʼerã ikatu hag̃uáicha Jehová oguerohory umi sakrifísio jajapóva?

16 Ojejapo haguéicha Israel yma guarépe, koʼág̃a ñande jajapo vaʼerã avei umi sakrifísio voluntário Jehová oguerohorýva. Ha ikatu hag̃uáicha haʼe oasepta umíva nañambotapykuéi vaʼerã umi mbaʼe iñimportantevéva, por ehémplo ñane família ha ñande jerovia. Iporãramo jepe jaiporu ñane tiémpo ha ñane mbaʼerepy ñaipytyvõ hag̃ua ñande rapichápe, ndovaléi jadeskuida ñane família oikotevẽva oñemantene hag̃ua ha omombarete hag̃ua ijerovia. Ani ñanderesarái ndaikatuiha ñameʼẽ peteĩ mbaʼe noĩriva ñande posivilidápe (elee  2 Corintios 8:12). Avei tekotevẽ ñande voi ñamombarete ñande jerovia ani hag̃ua ñañemomombyry Jehovágui (1 Cor. 9:26, 27). Jaikóramo la Biblia heʼiháicha, umi sakrifísio jajapóva ñanembovyʼáta ha ‘Ñandejára oguerohoryetereíta’.

UMI SAKRIFÍSIO ÑAMEʼẼVA JEHOVÁPE TUICHA MBAʼE

17, 18. a) ¿Mbaʼépa ñapensa umi ermáno ojesakrifikávare pe Rréino rehehápe? b) ¿Mbaʼérehepa jajepyʼamongeta vaʼerã enterovéva?

17 Heta ermáno ha ermána ojesakrifika pe Rréino rehehápe, ha jaʼekuaa ojoguaha hikuái ‘pe víno oñeñohẽvape oñekuaveʼẽ hag̃ua Ñandejárape’ (Filip. 2:17, NM). ¡Ajépa jaguerohoryete chupekuéra! Oĩ heta ermáno omotenondéva umi tembiapo ojejapóva pe Rréino rehehápe ha umi hembireko ha ifamiliakuéra ojesakrifika avei hendivekuéra, ha jaagradeseterei chupekuéra upévare.

18 Oĩ heta mbaʼe ikatúva jajapo pe Rréino rehehápe. Upévare, ñañemboʼékena Jehovápe ha jahecha mbaʼépa ikatu jajapove chupe g̃uarã. Koʼág̃ama voi jahupyty heta mbaʼe porã “ha amo gotyove” katu jahupytýta hetave mbaʼe ijojahaʼỹva (Mar. 10:28-30, NM).

^ párr. 2 Ehecha pe artíkulo “Ñameʼẽkena sakrifísio Jehovápe ñande pyʼaite guive”, osẽ vaʼekue Ñemañaha 15 de enero de 2012-pe, páhina 21 guive 25 peve.