Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Diciembre de 2013

Mbaʼéichapa ikatu jagueropuʼaka omanóramo ñane rembiayhu

Mbaʼéichapa ikatu jagueropuʼaka omanóramo ñane rembiayhu

LA Biblia heʼi porã ména ‘ohayhu vaʼerãha hembirekópe haʼe voi ojehayhuháicha’, ha avei tembireko ‘orrespeta vaʼerãha iménape ipyʼaite guive’. ‘Oiko mokõivégui peteĩnte’ ha upévare káda uno okumpli vaʼerã oñehaʼarõva chugui (Efes. 5:33, NM; Gén. 2:23, 24). Ohasávo pe tiémpo oñemoag̃uive ojuehe ha ojoayhuve. Haʼekuéra ojogueraha porã ha umi mbaʼe oñandúva imbareteve, haʼete mokõi yvyramáta okakuaáva ojoykére ha umi hapo oñakarama hatãva ojuehe.

Peteĩ matrimóniope katuete mokõivéva opensa arakaʼeve ndojeimoʼãiha ojuehegui. Péro, ¿mbaʼépa oiko peteĩva omanóramo? Pe matrimónio opa rei, ha pe viúdo térã viúda opyta oñembyasyeterei ha oñeñandu haʼeño. Ikatu voi ipochy térã opensa hembiayhu omanoha ikúlpare. Peteĩ kuñakarai ojapómava 58 áño omenda hague hérava Daniela, heʼi oikuaaha heta viúdo ha viúdape. * Péro upéi omano avei iména, ha upépe haʼe orrekonose: “Koʼág̃a ae antende mbaʼéichapa oñeñandu umi omanóva hembiayhu. Oiko rire ñanderehémante jaikuaa upéva”.

MBAʼEMBYASY HAʼETÉVA NDOPAMOʼÃIVA

Umi ostudiáva ko téma heʼi pe ména térã tembireko opytáva haʼeño oñeñandu vaietereiha, ha ndaiporiha sufrimiénto oñembojojáva upévare. Ha heta viúdo ha viúda opensa upeichaha.  Peteĩ kuñakarai hérava Mili opyta viúda 25 áño omenda haguépe. Ojapómarõ jepe heta tiémpo iména omano hague, haʼe heʼi ndopytaporãveiha upe guive, haʼete ku opytáva “lisiáda”.

Ótra kuñakarai hérava Susan opensa vaʼekue umi viúda hasẽva iménare heta áñore ojejapontemaha. Péro upéi haʼe avei opyta viúda 38 áño omenda haguépe. Upéva ojapóma 20 áño rasa, ha Susan omombeʼu: “Káda día apensa hese”. Avei pyʼỹinte hasẽ ohechagaʼuetereígui iménape.

La Biblia ohechauka avei umi viúdo térã viúda opytaha osufri heta tiémpore. Por ehémplo Sara omanórõ guare, “Abrahán ombyasy ha ojaheʼo hese” (Gén. 23:1, 2). Haʼe ningo oguerovia ipyʼaite guive umi omanóva oikove jeytaha, upéicharõ jepe, ombyasyeterei rasa hembiayhu omanórõ guare (Heb. 11:17-19). Jacob avei oñembyasy heta tiémpore hembireko Raquel omano rire. Ha akóinte mborayhúpe imanduʼa hese ifamiliakuérape (Gén. 44:27; 48:7).

¿Mbaʼépa ñaaprende koʼã ehémplo oĩvagui la Bíbliape? Umi viúdo ha viúda ikatuha oñembyasy heta tiémpore. Upévare ndovaléi ñapensa hasẽ térã oñembyasyha hikuái ikangy haguérente, síno ñañehaʼã vaʼerã ñantende tuichaiterei mbaʼeha pe operdéva hikuái. Katuete ningo pe viúdo térã viúda oikotevẽta ontende ha oipytyvõ vaʼerã chupe.

REMBOHOVÁI VAʼERÃ SAʼI SAʼÍPE

Pe viúdo térã viúda ndahaʼéi opytánteva soltéro jey. Heta tiémpo omenda rire, pe ména oikuaa mbaʼéichapa okonsola ha omokyreʼỹ vaʼerã hembirekópe oñeñandu vai jave. Ha pe ména omanóramo, hembireko operde pe ohayhuetéva ha okonsoláva chupe. Avei ohasávo pe tiémpo, pe tembireko oikuaáma mbaʼéichapa iména ovyʼa ha oñeñandu porãvéta hendive. Pe ménape ogusta hembireko ojáramo hendápe ha oñeʼẽ vevyimi ombopyʼaguapy hag̃ua chupe. Avei ovyʼa ohechávo mbaʼéichapa oñeinteresa umi mbaʼe chupe ogustávare térã oikotevẽvare. Hembireko omanóramo, pe ména oñandueterei iporeʼỹ. Upéicha rupi umi viúdo ha viúda okyhyje henonderãgui ha heta vése ndoikuaái mbaʼépa ojapóta. ¿Mbaʼe konséhopa ikatu oipytyvõ chupekuéra ipyʼaguapy ha oñeñandu porãve hag̃ua?

Jehová ikatu nepytyvõ rembohovái hag̃ua rehóvo saʼi saʼípe ne mbaʼembyasy

La Biblia heʼi: “Ani pejepyʼapyeterei koʼẽrõ g̃uarãre, koʼẽrõko oĩta voi hína ambue jepyʼapy. Káda día ñambohovái vaʼerã voi heta mbaʼe vai” (Mat. 6:34, NM). Ko téxtope Jesús oñeʼẽ vaʼekue ñane remikotevẽre, upéicharõ jepe, ko konsého oipytyvõma heta héntepe ogueropuʼaka hag̃ua imbaʼembyasy. Peteĩ viúdo hérava Charles ohai hembireko omano riremi: “Ahechagaʼu gueteri Moníquepe. Sapyʼánte haʼete pe situasión ipohyivéva chéve. Péro aikuaa upéva peichatanteha voi, ha ohasávo pe tiémpo ojehasavetaha chehegui che mbaʼembyasy”.

Charles oheja ‘ohasa pe tiémpo’. ¿Mbaʼéichapa ojapo upéva? Haʼe heʼi: “Jehová chepytyvõ rupi ambohovái ahávo saʼi saʼípe”. Añetehápe ningo ndahaʼéi Charles ikoʼẽnteva noñembyasyvéi, síno haʼe oñehaʼãmbaite ani hag̃ua ojahoʼi chupe pe mbaʼembyasy. Oiméramo omano raʼe ne ména  térã ne rembireko, reñehaʼã vaʼerã avei rembohovái rehóvo saʼi saʼípe ne mbaʼembyasy, ha epensa pe ótro día ikatuha hína rehasa peteĩ mbaʼe iporãva.

Pe ñemano ningo ndahaʼéi vaʼekue Jehová rembipota, síno upéva “pe Aña rembiapokue” hína (1 Juan 3:8, NM; Rom. 6:23). Satanás oiporu pe ñemano ha oipota umi hénte okyhyje pe ñemanógui, upéicha oheja chupekuéra esperansaʼỹre ha oiko hembiguáiramo (Heb. 2:14, 15). Haʼe oipotaiterei umi hénte ipyʼatarova ha opensa ndaikatumoʼãiha voi oiko vyʼápe, ni Ñandejára múndo pyahúpe. Upéicharõ, oiméramo reñeñandu vaieterei omano rire ne rembiayhu, reikuaa vaʼerã upéva oikoha nderehe pe pekádo ha Satanás kúlpare (Rom. 5:12). Jehová omyatyrõta opa mbaʼe Satanás ombyai vaʼekue, ha oipeʼaitéta pe árma ivaivéva haʼe oiporúva: pe ñemano. Koʼág̃ama voi oĩma heta viúdo ha viúda ndokyhyjevéiva ko ñuhã Satanás oiporúvagui.

Oĩta tuicha kámbio ág̃a oikove jey rire umi omano vaʼekue. Epensamíntena opuʼã jeytaha ñande tuvakuéra, avuélo ha umi ñande ypykue ha saʼi saʼípe ohupytytaha perfeksión ifamília ha inietokuéraicha avei. Avave ndohasaʼasymoʼãvéima ituja térã ig̃uaig̃ui haguére. Ha oiméne umi imitãvéva ohechátama ambue hendáicha umi ijypykuérape, ndahaʼevéima koʼag̃aguáicha. Koʼã mbaʼe okambiátava, tuichaiterei oipytyvõta yvyporakuérape oĩ porã hag̃ua.

 Ikatu oime ñañeporandu heta mbaʼe umi oikove jeýtavare. Por ehémplo ikatu jaikuaase mbaʼépa oikóne umi omenda vaʼekuégui heta vése. Umi saduséo oporandu vaʼekue mbaʼépa oikóta peteĩ kuñágui, iména ypykue omano vaʼekue, upéi pe segundo ha umi upe riregua avei (Luc. 20:27-33). ¿Mbaʼépa oikóta opuʼã jey rire hikuái? Añetehápe ndajaikuaái, péro ndovaléi avei jajepyʼapy ni jakalkula rei koʼã mbaʼére. Upéva rangue jajerovia vaʼerã Jehováre. Ha oĩ peteĩ mbaʼe jaikuaa porãva: oimeraẽ mbaʼe Jehová ojapótava katuete oĩ porãta ha ñahaʼarõ vaʼerã kyhyjeʼỹre.

PETEĨ ESPERÁNSA ÑANEKONSOLÁVA

La Biblia omyesakã porãiterei umi jahayhúva omano vaʼekue katuete oikove jeytaha. Ha pype avei jajuhu heta rreláto ohechaukáva oĩ hague omanóva oikove jeýva, ha umíva ohechauka porã “opavave umi oĩva pe sepultúrape ohendutaha [Jesús ñeʼẽ] ha osẽta” (Juan 5:28, 29, NM). Oiméne ovyʼaitéta opavave orresivíva umi opuʼãvape omanóva apytégui, ha ni ndajaʼeséi mbaʼeichaitépa ovyʼáta umi oikove jeýva.

Upe tiémpope yvyporakuéra ovyʼaitereíta arakaʼeve oikoʼỹ haguéicha. Hetaiterei omano vaʼekue oikove jeýta (Mar. 5:39-42; Rev. 20:13). Tuicha okonsoláta umi ihentemanóvape ojepyʼamongetáramo ko milágro oikótavare koʼẽrõite.

Ndaiporimoʼãi oñembyasýva oikove jey vove umi omano vaʼekue. Isaías 25:8-pe heʼi ‘Ñandejára oipeʼataha ñemano’ ha noñemanomoʼãveimaha arakaʼeve. Upéva heʼise ndaiporimoʼãveimaha oñembyasýva ihentemano haguére. Pe profesía heʼi avei Ñandejára ‘omokãtaha tesay’ opárupi ko yvy ape ári. Oiméramo koʼág̃a reñembyasy hína omano haguére ne ména térã ne rembireko, katuete revyʼavéta repensávo oikove jeytaha umi omano vaʼekue.

Ndaipóri yvypóra ontendepaitéva umi mbaʼe Jehová ojapótava pe múndo pyahúpe. Haʼe voi heʼi: “Yvága oĩháicha yvate yvýgui, péicha che rape ijyvateve pende rapégui ha che remiandu pene remiandúgui” (Is. 55:9). Jesús opromete vaʼekue umi omanóva oikove jeytaha, ha upéva  ñanepytyvõ jajerovia hag̃ua Jehováre, Abrahán ojapo haguéicha. Upévare opavave kristiáno tekotevẽ ñaneñeʼẽrendu Ñandejárape ikatu hag̃uáicha ‘ñamerese jaiko pe múndo oútavape’ umi oikove jeýva ndive (Luc. 20:35, NM).

MBAʼÉREPA JAJEROVIA PE ESPERÁNSARE

Reiko rangue rejepyʼapy, reñehaʼã vaʼerã rejerovia mbarete pe esperánsare. Yvyporakuéra ningo ndorekói esperánsa ijeheguínte, péro Jehová oikuaveʼẽ ñandéve heta mbaʼe ijojahaʼỹva. Jaikuaa porã haʼe katuete omeʼẽtaha ñandéve jaipotáva ha ñaikotevẽva, ndajaikuaáiramo jepe mbaʼeichaitépa ojapóta upéva. Apóstol Pablo ohai: “Oñemeʼẽ rire ñandéve pe ñahaʼarõva, ndaikatuvéima ñahenói chupe esperánsa. Añetehápe jarresivíramo pe ñahaʼarõva, ¿jasegíta piko ñahaʼarõ upéva? Péro noñemeʼẽiramo ñandéve pe ñahaʼarõva, jasegi ñahaʼarõ meme ha ñaaguanta” (Rom. 8:24, 25, NM). Reaguanta hag̃ua tekotevẽ rejerovia nde pyʼaite guive Jehová promesakuérare. Ha reaguantáramo, amo gotyove Jehová “ohupytykáne ndéve opa mbaʼe nde pyʼaite guive reipotáva”. Haʼe omeʼẽ yvyporakuérape ‘opa mbaʼe oikotevẽva’ (Sal. 37:4; 145:16).

Rejerovia vaʼerã Jehová okumplitaha oprometéva

Jesús omano mboyvemi, ijapostolkuéra ojepyʼapyeterei. Péro haʼe okonsola chupekuéra: “Ani pejepyʼapyeterei, pejerovia Ñandejárare ha pejerovia avei cherehe”. Upéi heʼi avei: “Ndapohejamoʼãi tyreʼỹ. Aju jeýta pene rendápe” (Juan 14:1-4, 18, 27, NM). Heta síglorema Jesús heʼi vaʼekue oipytyvõ umi unhídope oreko hag̃ua esperánsa ha ikatu hag̃uáicha oaguanta. Péicha avei, opavave ojotopase jeýva umi ihénte omano vaʼekuéndi, ndovaléi ojedesespera. Ikatu jajerovia Jehová ha Itaʼýra katuete ñanekonsolataha.

^ párr. 3 Oñekambia umi téra.