Rojerurese peẽme ermanokuéra: Ani peheja avave penderesarea pyaʼeterei.(2 TES. 2:1, 2, NM)

1, 2. ¿Mbaʼérepa heta hetave umi oporombotavýva, ha mbaʼéichapa heta vése isarambi umi japu? (Ehecha pe taʼanga oĩva iñepyrũme.)

KOʼÁG̃ARUPI heta hetave oĩ oporombotavýva ha ijapuetereíva. La Biblia ningo heʼi voi Satanás orekoha ko múndo ipoguýpe ha haʼe oporombotavykuaaitereiha (1 Tim. 2:14; 1 Juan 5:19). Ko múndo oñehundi potaitéma ha Satanás “orrenegaiterei hína oikuaágui mbykypaitemaha itiémpo” (Rev. 12:12, NM). Upévare umi ojapóva haʼe oipotáva ijapuve rei ha koʼýte ohesarease Ñandejára siervokuérape.

2 Heta vése télepe, diáriope ha Internétpe oñeñeʼẽ rei testígo de Jehováre ha umi mbaʼe ogueroviávare. Por ehémplo oĩ umi derechoite oñeʼẽ vaíva hesekuéra, térã ombohasáva informasión oheja vai hag̃uáicha chupekuéra. Heta hénte ogueroviaite koʼã japu ha oĩ voi ipochyetéva opytávo.

3. ¿Mbaʼépa ñanepytyvõta ani hag̃ua avave ñanembotavy?

3 Ñandejára Ñeʼẽ “ideprovécho [...] japorokorrehi” hag̃ua ha ñanepytyvõ ani hag̃ua Satanás ñanembotavy (2 Tim. 3:16, NM). Apóstol Pablo ohechauka vaʼekue heta kristiáno Tesalonicagua oguerovia hague heta japu. Upévare haʼe heʼi porã kuri chupekuéra: “Ani peheja avave penderesarea pyaʼeterei” (2 Tes. 2:1, 2, NM). ¿Mbaʼépa ikatu ñaaprende Pablo heʼi vaʼekuégui? ¿Mbaʼéichapa upéva ikatu ñanepytyvõ koʼág̃a?

KONSÉHO ITIEMPOITÉPE

4. a) ¿Mbaʼépa apóstol Pablo heʼi umi kristiáno Tesalonicaguápe “Jehová ára” rehe? b) ¿Mbaʼéichapa oñemeʼẽ ñandéve konsého koʼág̃arupi?

4 Pablo oskrivírõ guare pe primera kárta umi Tesalonicaguápe, oñeʼẽ “Jehová ára” rehe. Haʼe ndoipotái  umi ermáno oĩ “pytũmbýpe”, síno oipota oĩ preparádo. Upévare heʼi oñatende vaʼerãha hikuái, haʼe rupi umi ‘oporohesapéva’. Pablo heʼi avei: “Japyta guei japayhápe ha akóinte ñapensa hekopete” (elee  1 Tesalonicenses 5:1-6). Ñande ningo ñahaʼarõ oñehundi Babilonia Guasu, térã entéro rrelihión japu. Ha oiko vove upéva, oñepyrũta Jehová ára guasu. Koʼág̃arupi ñantende porãve mbaʼéichapa Jehová okumplíta hembipota. Kongregasión rupive akóinte oñemeʼẽ ñandéve konsého itiempoitépe ñanepytyvõva ñañatende porã hag̃ua. Jasegíramo koʼã konsého ikatúta jaservi Jehovápe heʼi haguéicha Pablo: “Peiporu pene arandu peservi hag̃ua chupe” (Rom. 12:1, NM).

Umi kárta Pablo oskrivi vaʼekuépe oĩ heta konsého ideprovéchova kristianokuérape (Ehecha párrafo 4 ha 5)

5, 6. a) ¿Mbaʼérehepa Pablo oñeʼẽ pe segunda kárta oskrivi vaʼekuépe umi kristiáno Tesalonicaguápe? b) ¿Mbaʼépa koʼẽrõite Ñandejára ojapóta Jesús rupive? c) ¿Mbaʼépa iporã ñañeporandu?

5 Pablo oguerahauka riremi pe primera kárta umi Tesalonicaguápe, oskrivi avei chupekuéra pe segunda kárta. Upépe oñeʼẽ pe jehasa asy oútavare ág̃a Jesús okastiga vove “umi ndoikuaáivape Ñandejárape ha umi naiñeʼẽrendúivape umi marandu porãme” (2 Tes. 1:6-8, NM). Kapítulo 2-pe oñemombeʼu heta ermáno kongregasiongua ‘oñekevrantaiterei’ hague oimoʼãgui Jehová ára og̃uahẽtamaha katuete (elee  2 Tesalonicenses 2:1, 2). Umi kristiáno ypykue nontendeporãi vaʼekue mbaʼéichapa oñekumplíta Ñandejára rembipota. Por ehémplo Pablo heʼi voi umi profesíare: “Ñande ningo ndajaikuaái opa mbaʼe, ha ndajaprofetisái opa mbaʼe; péro ág̃a jaikuaa ha japrofetisa vove opa mbaʼe, pe ikompletoʼỹva opáta” (1 Cor. 13:9, 10, NM). Upéicharõ jepe, umi kristiáno síglo primérope guare omombarete ijerovia osegi rupi umi konsého oúva Ñandejáragui ha omeʼẽ vaʼekue chupekuéra Pablo, Pedro ha umi ótro unhído iñeʼẽrendúva upe tiémpope guare.

6 Ikatu hag̃uáicha okorrehi umi ermáno opensáva, apóstol Pablo oprofetisa Jehová ára og̃uahẽ mboyve oĩtaha apostasía ha ou vaʼerãha “pe kuimbaʼe aña”. * Upéi itiempoitépe, Jesús ohundíta umi  ogueroviávape pe kuimbaʼe añáme, “ha ni hendague ndopytamoʼãi”. Pablo heʼi mbaʼérepa oñekondena chupekuéra: “Ndogueroviái ha ndohayhúi rupi pe añetegua” (2 Tes. 2:3, 8-10, NM). Upévare iporã ñañeporandu: “¿Añetehápepa ahayhu pe añetegua? ¿Astudia memépa ko rrevísta ha umi ótra puvlikasión omeʼẽva Jehová organisasión ikatu hag̃uáicha aikuaa umi entendimiénto pyahu?”.

JAIPORAVO PORÃKENA ÑANE IRŨRÃ

7, 8. a) ¿Mbaʼeichagua ñuhãpa ombohovái umi kristiáno ypykue? b) ¿Mbaʼépa ñande ñambohovái avei koʼág̃a?

7 Umi kristiáno oñeñangareko vaʼerã kuri umi apóstatagui ha opa mbaʼe haʼekuéra omboʼévagui. Péro oĩ avei ótro ñuhã ombohovái vaʼerã hikuái. Apóstol Pablo oskrivi vaʼekue Timotéope: “Pe platarayhu omoheñói opaichagua mbaʼe vai. Ha ohupytységui umi mbaʼe, heta oĩ ohejáva ijerovia ha oikéva heta akãrasýpe” (1 Tim. 6:10, NM). Avei ipeligrosoiterei “yvypóra rembipota vai” (Gál. 5:19-21, NM).

8 Pablo oavisa porã umi kristiáno Tesalonicaguápe oñeñangareko hag̃ua umi ‘apóstol japúgui’. Pe kongregasiónpe voi oĩta omboʼéva “pe añetegua hekopeʼỹ, ogueraha hag̃ua hapykuéri umi disípulope” (2 Cor. 11:4, 13, NM; Hech. 20:30, NM). Upe rire Jesús oguerohory pe kongregasión oĩvape Éfesope nopermitíri haguére oĩ ijapytepekuéra ‘umi kuimbaʼe aña’. Umi ermáno iñeʼẽrendúva oprova “ijapuha” koʼã kuimbaʼe, ohechauka hikuái haʼeha apóstol japu (Rev. 2:2, NM). Pe segunda kárta oskrivi vaʼekuépe umi Tesalonicaguápe, apóstol Pablo heʼi: “Koʼág̃a ore roʼe peẽme ermanokuéra, ñande Ruvicha Jesucristo rérape, ani hag̃ua pejeheʼa umi ermáno oikóvare hekopeʼỹ”. Upe rire haʼe oñeʼẽ umi “nombaʼaposéiva” rehe (2 Tes. 3:6, 10, NM). Koʼã ermánope oñeakonseha ani hag̃ua ojeheʼa umi iñateʼỹvare, ha koʼytevéntema oñemomombyry vaʼerãha umi oñepyrũvagui opuʼã kongregasiónre. Haʼekuéra ojeheʼáramo koʼãichaguáre ikatu tuicha ojeperhudika. Ha koʼág̃a avei ipeligrosoiterei umi apóstata (Prov. 13:20).

9. ¿Mbaʼérepa ñañatende vaʼerã oĩramo oñeʼẽséva ñandéve umi mbaʼe la Biblia nomyesakãivare térã oñeʼẽ vaiséva Jehová organisasiónre?

9 Koʼẽrõitéma og̃uahẽta pe jehasa asy guasu ha oñehundíta ko múndo aña, upévare koʼág̃a iñimportantevéntema umi konsého oñemeʼẽ vaʼekue umi kristiáno ypykuépe. Ani ‘jarresivi Ñandejára mbaʼeporã ijojahaʼỹva ha upéi ndajajapói chugui mbaʼeve’. Upéva oikóramo ñanderehe japerdéta pe oportunida jaikove hag̃ua opa ára g̃uarã, tahaʼe yvágape térã ko yvy ape ári (2 Cor. 6:1, NM). Aníkena jajedeskuida oĩramo ohóva ñane rreunionhápe ha oñeʼẽse ñandéve umi mbaʼe la Biblia nomyesakãivare térã oñeʼẽ vai Jehová organisasiónre (2 Tes. 3:13-15).

“PEÑAKARAMA HATÃ UMI MBAʼE PEAPRENDE VAʼEKUÉRE”

10. ¿Mbaʼe enseñánsarepa oñakarama hatã vaʼerã umi kristiáno Tesalonicagua?

10 Pablo omokyreʼỹ umi ermánope ojepytaso mbarete ha ‘oñakarama hatã’ hag̃ua umi mbaʼe oaprende vaʼekuére (elee  2 Tesalonicenses 2:15). ¿Mbaʼépa hína ‘umi mbaʼe oaprende vaʼekue’ hikuái? Ndahaʼéi umi rrelihión japu omboʼéva, síno Jesús omboʼéva, ha avei umi mensáhe Ñandejára omeʼẽ vaʼekue, apóstol Pablo ha ambue kuimbaʼe rupive. Heta mbaʼe Jehová heʼi vaʼekue chupekuéra  opyta la Bíbliape. Pablo heʼi umi ermáno Corintoguápe: “Poguerohory penemanduʼa haguére cherehe opa mbaʼépe, ha akóinte pejapo rupi hekoitépe umi mbaʼe pomboʼe vaʼekue” (1 Cor. 11:2, NM). Umi mbaʼe omboʼe vaʼekue hikuái ningo ou Jehová ha Jesúsgui, upévare ikatu ojejerovia umi enseñánsare.

11. ¿Mbaʼéichapa ikatu ñañemomombyry Jehovágui?

11 Pablo oskrivírõ guare umi evréope, ohechauka peteĩ kristiánogui ikatuha ikangy ijerovia ha hoʼa (elee  Hebreos 2:1; 3:12). Ñepyrũrã haʼe heʼi ikatuha “jajei tape porãgui” ha avei ikatuha ‘ñañemomombyry’ Jehovágui. Ñapensamína ko ehémplore. Ñamoĩ chupe ñaimeha peteĩ kanóape ha mbeguekatúpe pe y ñandegueraháma, jahechakuaaʼỹre ñañemomombyrýma pe oríllagui. Péro ikatu avei ñande voi ñarrema ñañemomombyry hag̃ua pe oríllagui. Ko ehémplo ohechauka porã ikatuha ñañemomombyry Jehovágui jagueroviáramo umi japu, térã jahejáramo ikangy ñande jerovia.

12. ¿Mbaʼe mbaʼépa ikatu ñanemokangy koʼág̃arupi?

12 Oiméne oĩ rakaʼe ermáno Tesalónicape mbeguekatúpe oñemomombyry vaʼekue Ñandejáragui. ¿Ikatúpa oiko avei upéva ñanderehe? Koʼág̃arupi oĩ hetaiterei mbaʼe ikatúva hoʼupa ñane tiémpo. Por ehémplo, umi rred sosiál, jalee ha ñarresponde korréo elektróniko ha ñañemoĩ jaikuaapaite oikóva guive depórtepe. Koʼã mbaʼe ikatu ñanderesarea ha jaju nañanekyreʼỹvéi jaservi hag̃ua Jehovápe. Avei upéva káusare, ikatu saʼive jastudia la Biblia, ndajahaguasuvéi rreunionhápe ni predikasiónpe, ha nañañemboʼevéi Jehovápe ñande pyʼaite guive. ¿Mbaʼépa jajapo vaʼerã ani hag̃ua oiko ñanderehe koʼã mbaʼe?

MBAʼÉICHAPA IKATU ÑAÑEÑANGAREKO

13. a) ¿Mbaʼépa ojeprofetisa vaʼekue oikotaha “umi ára pahápe”? b) ¿Mbaʼépa ñanepytyvõta ñande jerovia imbarete hag̃ua?

13 Ñande jerovia akóinte imbarete hag̃ua, tekotevẽ ñanemanduʼa meme mbaʼe tiémpopepa jaiko ha ipeligrosoitereiha jajeheʼa umi ndogueroviáiva rehe jaikomaha “umi ára pahápe”. Pedro heʼi vaʼekue ñane tiémpore: “Aipota peikuaa umi ára pahápe outaha umi hénte oñembohorýva umi mbaʼe porãre, ha ojapóta umi mbaʼe vai ogustáva chupekuéra. Ha heʼíta hikuái: ‘Haʼe ningo opromete vaʼekue outaha, ¿moõ piko oĩ upéicharõ? Ñande rukuéra ypykue ningo oikove ha omanomba jeýma, péro upe tiémpo guive koʼág̃a peve mbaʼevete nokambiái’” (2 Ped. 3:3, 4, NM). Ani hag̃ua ñanderesarái jaikomaha “umi ára pahápe”, tekotevẽ jalee ha jastudia la Biblia káda día. Pe apostasía ymaitereíma oñepyrũ hague ha koʼág̃a peve oĩ. “Pe kuimbaʼe aña” oñemoĩ gueteri oikóvo Ñandejára siervokuérare. Upévare akóinte ñanemanduʼa vaʼerã Jehová ára hiʼag̃uimbaitemaha (Sof. 1:7).

Jajeprepara porãramo japredika hag̃ua avave nañanderesareamoʼãi (Ehecha párrafo 14 ha 15)

14. ¿Mbaʼéichapa ñandeprotehe pe predikasión?

14 Ani hag̃ua ñanderesarea umi japu ha ñanemanduʼa meme hag̃ua Jehová ára hiʼag̃uimbaitemaha, tekotevẽ akóinte japredika pe marandu porã. Jesucristo, pe omoakãva kongregasión, heʼi idisipulokuérape omboʼe hag̃ua umi hénte oparupiguápe umi mbaʼe haʼekuéra oaprende vaʼekue chugui. Ko tembiapo ningo oprotehéta chupekuéra (Mat. 28:19, 20). Ha ñande, ¿mbaʼéichapa jajapo vaʼerã Jesús omanda vaʼekue? Tekotevẽ ningo ñanekyreʼỹ. Ñapensamína umi ermáno Tesalonicagua rehe. ¿Mbaʼéichapa ojapo hikuái ko tembiapo? Katuete ikyreʼỹne raʼe opredika hag̃ua, ndojapoichéne hikuái ko  tembiapo okumpli hag̃uánte. Pablo heʼi vaʼekue chupekuéra: “Aníkena pembogue pe espíritu rata. Aníkena peapoʼi umi profesía” (1 Tes. 5:19, 20, NM). ¡Ajépa umi profesía jastudiáva ha ñamombeʼúva umi héntepe japredika jave, ñanemokyreʼỹeterei!

15. ¿Mbaʼe mbaʼépa ikatu jajapo avei jastudia jave ñane famíliandi?

15 Enterovéva ñaipytyvõse ñane familiakuérape oiko hag̃ua chuguikuéra maranduhára katupyry. Upévare, oĩ ermáno ha ermána ojepreparáva jepi opredika hag̃ua ojapo jave pe estúdio de família. Ñande avei ikatu jajapo upéva ñane famíliandi. Por ehémplo, ikatu jahecha mbaʼérehepa ñañeʼẽta javisita jeývo pe ñanerendu porã vaʼekuépe, mbaʼe témapa ikatu ointeresa chupe ha mbaʼe órapa opyta porãvéta javisita hag̃ua. Oĩ avei ermáno ojapo jave pe estúdio de família oiporúva peteĩ párte pe tiémpogui ojeprepara hag̃ua rreunionrã ha okomenta hag̃ua. ¿Ikatu piko ñande jajapo avei upéicha? Ñakomentávo rreunionhápe ñande jerovia imbaretevéta ha ndajahejamoʼãi umi japu ñanderesarea (Sal. 35:18). Jahechaháicha, pe estúdio de família ñandeprotehe ani hag̃ua jaiko ñañeʼẽ umi mbaʼe la Biblia nomyesakãivare ha ani hag̃ua ñandepyʼamokõi.

16. ¿Mbaʼépa oipytyvõ umi unhídope ani hag̃ua umi japu ohesarea chupekuéra?

16 Ohasávo pe tiémpo Jehová ovendesi ipuévlope omyesakãvo chupekuéra umi profesía oĩva la Bíbliape. Jajepyʼamongetárõ koʼã profesíare, jajeroviavéta pe esperánsa ijojahaʼỹvare. Umi unhído ningo ohóta yvágape ha omoirũta upépe Crístope. Ko esperánsa oipytyvõ chupekuéra ikatu hag̃uáicha iñarandu ha ani hag̃ua umi japu ohesarea chupekuéra. Pablo heʼi umi unhídore: “Peẽme katu ermanokuéra, Jehová penderayhu, ha ore katuete roagradese Ñandejárape penderehe, haʼe pendeporavóma haguére [...]. Peẽ ningo penemarangatúma ijespíritu rupive ha peguerovia pe añetegua” (2 Tes. 2:13, NM).

17. ¿Mbaʼéichapa ñanemombarete heʼíva 2 Tesalonicenses 3:1-5?

17 Opavave orekóva esperánsa oiko hag̃ua opa árare ko yvy ape ári, oñatende porã vaʼerã avei ani hag̃ua oguerovia umi japu. Oiméramo nde reguereko ko esperánsa, katuete nemombaretéta Pablo heʼi vaʼekue umi kristiáno unhído Tesalonicaguápe (elee  2 Tesalonicenses 3:1-5). ¡Ajépa ñanemokyreʼỹete jaleéva upépe! Umi kárta Pablo oskrivi vaʼekue umi Tesalonicaguápe ñandeavisa ani hag̃ua jaiko ñañeʼẽ umi mbaʼe la Biblia nomyesakãivare térã ikatúvare ñanembopyʼamokõi. ¡Ajépa ou porãite ñandéve umi mbaʼe heʼíva pype!

^ párr. 6 Hechos 20:29, 30-pe, Pablo heʼi umi kongregasióngui osẽtaha “kuimbaʼe omboʼétava pe añetegua hekopeʼỹ, ogueraha hag̃ua hapykuéri umi disípulope”. Ohasávo pe tiémpo pe kongregasión ojedividi dos grúpope: umi omoakãva ha umi hénte oĩva ipoguýpe. Síglo 3-pe, ojehecha porãma “pe kuimbaʼe aña” haʼeha umi omoakãva umi rrelihión heʼíva ijehe kristianoha (ehecha La Atalaya 1 de febrero de 1990, páhina 10 guive 14 peve).