Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Noviembre de 2013

 MANDUʼARÃ

“Agueraha che rogami che apére”

“Agueraha che rogami che apére”

ÁÑO 1929-pe ojejapo peteĩ invitasión espesiál ojepredika hag̃ua agosto paha guive septiembre oñepyrũ riremi peve. Mas de 10 mil maranduhára isarambi Estados Unidos tuichakuére ha ojapo pe tembiapo nueve día pukukue. Okoloka hikuái amo 250 mil lívro ha folléto. Umi maranduhára apytépe oĩ 1.000 kolportór (prekursór) rupi. Pe Bulletin * omombeʼu “ni noñeimoʼãi hague” tres vése hetaveha umi prekursór dos áñope rupi (1927-1929).

Opakuévo áño 1929, pe situasión ekonómika ivaipaite. Upe áñope, el 29 de octubre, pe Bolsa de Valores de Nueva York osẽ vai ha operhudika opaichagua komérsio ko yvy jerére. Upéicha oñepyrũ pe Gran Depresión. Hetaiterei vánko oso, umi gránha ndaikatuvéi ombaʼapo, oñembotypa umi fávrika, ha hetaiterei hénte opyta travahoʼỹre. Áño 1933-pe g̃uarã oñembarga 1.000 ógarupi káda día.

¿Mbaʼépa ojapo umi ermáno opredikáva de tiémpo kompléto, ijetuʼúramo jepe pe situasión? Heta oĩ oikóva kása rrodántepe, upéicha rupi ndopagái alkilér ni impuésto ha ikatu osegi ojapo iprekursorádo ogastaʼỹre heta pláta. * Oiko jave aty guasu katu natekotevẽi ni opaga otél. Pe Bulletin og̃uenohẽ 1934-pe umi pláno ojejapo hag̃ua peteĩ kása rrodánte michĩva péro orekóva komodida. Por ehémplo oreko y, kosina, pe tupa ikatu ojepyso ojekéta javénte ha noñeñanduguasúi roʼy pype.

Hetaiterei prekursór oparupigua oñepyrũ ojapo kása rrodánte oiko hag̃ua pype. Victor Blackwell heʼi: “Noé ningo ndorekói vaʼekue experiénsia ojapo hag̃ua peteĩ várko. Péicha avei che arakaʼeve ndajapóiva peteĩ kása rrodánte ni ndaikuaái voi mbaʼéichapa ojejapo vaʼerã”. Upéicharõ jepe, ko ermáno ojapo peteĩ.

Ojehupírõ guare peteĩ kása rrodánte kanóape oñembohasa hag̃ua peteĩ rrío, ama guasu tiémpope, Índiape

Avery ha Lovenia Bristow oreko vaʼekue peteĩ kása rrodánte. Avery heʼi: “Agueraha che rogami che apére, peteĩ tortúga oguerahaháicha ikaparasón”. Ko matrimónio ojapo iprekursorádo Harvey ha Anne Conrow ndive. Haʼekuéra oiko avei peteĩ kása rrodántepe orekopaitéva ijapére peteĩ materiál ojejapóva kartón ha vlékegui. Ha ova jave hikuái katu, okúi okúi ohóvo pe kartón. Avery imanduʼa: “Ndojehecháiva peichagua kása rrodánte upe mboyve ni upe rire”. Péro upéi heʼi Harvey, Anne ha ifamiliakuérare: “Ndaipóri haʼekuéraicha ovyʼakuaáva”. Harvey ohai: “Arakaʼeve ndofaltáiva oréve mbaʼeve. Rohechakuaa Jehová oñangarekoha orerehe mborayhúpe ha upévare ndorojepyʼapýi”. Tiémpo rire haʼe, hembireko ha umi mokõi ifamília oho Eskuéla de Galaádpe ha oñemondo chupekuéra oservi hag̃ua misionéroramo Perúpe.

Giusto ha Vincenza Battaino oservi avei de prekursór ha oreko vaʼekue peteĩ veíkulo Ford A 1929 guare. Oikuaárõ guare hikuái ifamiliataha, odesidi ojapo pe veíkulogui peteĩ kása rrodánte “ojoguáva peteĩ otél iporãitereívape”, ombojojávo umi óga  kárpare oiko haguépe hikuái. Upe rire osegi iñasignasiónpe itajyraʼi ndive opredikávo umi italiáno oikóvape Estados Unídospe.

Opárupi oñehendu porã pe predikasión, péro heta vése umi imboriahúva térã ndaitravahovéiva ndorekói okontrivui hag̃ua umi puvlikasión rehe. Upémarõ, pláta rangue omeʼẽ hikuái heta mbaʼe ideprovéchova. Mokõi prekursóra oipapa umi mbaʼe oñemeʼẽ vaʼekue chupekuéra predikasiónpe, ha ojuhu hikuái 64 kósa diferénte. Haʼete “peteĩ lísta de merkadería orekóva peteĩ almasén”.

Fred Anderson ojuhu peteĩ chokokue oipotáva heta lívro, ha opaga hag̃ua, ko karai omeʼẽ chupe isy lentekue. Ótra gránhape katu pe karai oipota avei umi puvlikasión, péro heʼi: “Nacheléntei ningo alee hag̃ua”. Péro otantea pe lénte omeʼẽ vaʼekue ivesíno ha ohecha porã heseve. Upémarõ omeʼẽ ikontrivusión umi puvlikasión rehe ha pe léntere avei.

Herbert Abbott katu ogueraha voi iveíkulope peteĩ gallineroʼi omoĩ hag̃ua pype umi ryguasu oñemeʼẽva chupe. Orekóvo mbohapy térã cuatro, ogueraha merkádope ovende hag̃ua, ha hepykuére omyenyhẽ itánke de kombustívle. Haʼe omombeʼu: “Sapyʼánte ropyta plataʼỹetére, péro upéva ndaorejokói. Roguerekóramo kombustívle, rosegi ropredika ha rojerovia mbarete Jehováre”.

Koʼã ermáno ogueropuʼaka umi mbaʼe ijetuʼuetéva upe tiémpope ojeroviágui Jehováre ha ojedesidi rupi opredika meme. Por ehémplo, Maxwell ha Emmy Lewis imanduʼa peteĩ díape ojesalva hague peteĩ desgrásiagui. Peteĩ torménta vaírõ guare pe yvytu atã oity peteĩ yvyramáta iveikulokuéra ári ha ombojaʼo mbytetépe, péro haʼekuéra osẽ jepe upégui. Maxwell ohai: “Koʼã mbaʼe ndaorejokói, ni noropensái roñentregávo. Roikuaa porã oĩha heta tembiapo ha rojedesidi rosegitaha”. Oheja rangue iprekursorádo, Maxwell ha Emmy omyatyrõ jey pe kása rrodánte, ha heta ermáno imbaʼeporãva oipytyvõ chupekuéra.

Koʼág̃arupi jahasa avei heta mbaʼe ijetuʼúva, péro kyreʼỹme jaservi Jehovápe, sapyʼánte tekotevẽramo jepe jajesakrifika. Ojapo haguéicha umi prekursór ymave guare, ñande avei jajedesidi japredika memetaha Jehová heʼi peve oñemohuʼãmaha ko tembiapo.

^ párr. 3 Koʼág̃a hérava Ñane Marandu Porã.

^ párr. 5 Upe tiémpope, opavave lénto umi prekursór ndorekói traváho. Oñemeʼẽ chupekuéra varatove umi puvlikasión ha oñemantene hikuái pe kontrivusión umi hénte omeʼẽva rupive.