Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Octubre de 2013

¿Jajapópa Jesús heʼi vaʼekue iñemboʼépe?

¿Jajapópa Jesús heʼi vaʼekue iñemboʼépe?

“Che Ru, [...] embotuichána nde raʼýpe, nde raʼy nembotuicha hag̃ua avei.” (JUAN 17:1, NM)

1, 2. ¿Mbaʼépa omoñepyrũ Jesús ojapo rire pe Páskua áño 33-pe ijapostolkuéra iñeʼẽrendúva ndive?

JESÚS ha ijapostolkuéra ojapo kuri pe Páskua 14 de nisán áño 33 pyharépe. Haʼekuéra ogueromanduʼa ijypykuéra isãso hague Egíptogui. Péro umi disípulo iñeʼẽrendúva ohupyty potaite hína peteĩ liverta tuichavéva: pe salvasión “opaite ára g̃uarã”. Pe ótro díape (14 de nisán gueteri kalendário hudíope), Jesús enemigokuéra ojukáta chupe. Ivaietereíramo jepe upéva, isakrifísio rupive ojehupytýta peteĩ mbaʼe iporãitereíva: yvyporakuéra ikatúta isãso pekádo ha ñemano poguýgui (Heb. 9:12-14, NM).

2 Jesús oipota umi disípulo akóinte imanduʼa mbaʼéichapa Ñandejára ohechauka ohayhuha chupekuéra. Upévare omoñepyrũ peteĩ mbaʼe ojegueromanduʼa vaʼerã káda áño ha ojejapóva pe Páskua rekovia. ¿Mbaʼéichapa ojapo upéva? Ombojaʼo peteĩ pán ilevaduraʼỹva, ombohasa umi 11 apóstol iñeʼẽrendúvape ha heʼi: “Kóva orrepresenta che rete, oñemeʼẽtava penderehehápe. Pesegíkena pejapo kóva penemanduʼávo cherehe”. Upéi ombohasa avei chupekuéra peteĩ kópa de víno tínto ha heʼi: “Ko kópa orrepresenta pe kompromíso pyahu ojejapóva che ruguy rupive, oñeñohẽtava penderehehápe” (Luc. 22:19, 20, NM).

3. a) ¿Mbaʼe kompromísopa oñepyrũ Jesús omano rire? b) ¿Mbaʼépa ñañeporandu vaʼerã?

3 Upérõ oñemohuʼã potaitéma pe kompromíso Jehová ojapo vaʼekue Israel ndive pe Léi rupive. Upéva rendaguépe Jehová ojapóta peteĩ kompromíso pyahu Jesús disipulokuéra unhído ndive. Jesús ndoipotái ko tetã pyahu osẽ vai pe Israel yma guare osẽ vai haguéicha. Umi isrraelíta nomombaʼeguasúi Jehovápe peteĩ ñeʼẽme ha omongyʼa héra marangatu (Juan 7:45-49; Hech. 23:6-9). Jesús oipota isegidorkuéra  oiko peteĩ ñeʼẽme ikatu hag̃uáicha Ñandejára réra oñembotuicha. Upémarõ oñemboʼe Itúvape. Ndaipóri ótro ñemboʼe iporãvéva ojehai vaʼekue, ha ñandéve g̃uarã tuichaiterei priviléhio ikatu haguére jalee (Juan 17:1-26; ehecha pe taʼanga oĩva iñepyrũme). Ñahesaʼỹijo aja pe ñemboʼe ñañeporandumi: “¿Ombohováipa Ñandejára Itaʼýra ñemboʼe? ¿Ajapópa Jesús heʼi vaʼekue iñemboʼépe?”.

MBAʼÉPA IÑIMPORTANTEVE JESÚSPE G̃UARÃ

4, 5. a) ¿Mbaʼépa ñaaprende umi mbaʼe Jesús heʼívagui oñepyrũvo iñemboʼe? b) ¿Mbaʼéichapa Jehová ombohovái Jesús ojerure vaʼekue?

4 Jesús oñemongeta idisipulokuérandi pyharepyte peve, ha omombeʼu chupekuéra heta mbaʼe iñimportantetereíva Ñandejáragui. Upe rire omaña yvága gotyo ha heʼi: “Che Ru, og̃uahẽma pe óra, embotuichána nde raʼýpe, nde raʼy nembotuicha hag̃ua avei. Nde remoĩ ipoguýpe opavave yvypóra, ikatu hag̃uáicha haʼe omeʼẽ jeikove opaveʼỹva opa umi chupe remeʼẽ vaʼekuépe. [...] Che rombotuicha ko yvy ape ári ha amohuʼã pe tembiapo remeʼẽ vaʼekue chéve. Upévare che Ru, chegueraha jeýna yvágape aĩ hag̃ua nde ykére, aime haguéicha oĩ mboyve ko múndo” (Juan 17:1-5, NM).

5 ¿Jahechakuaápa hína mbaʼépa iñimportanteve vaʼekue Jesúspe g̃uarã? Haʼe oipota opa mbaʼe ári oñembotuicha Itúvape omereseháicha. Jesús ojeruréva oñepyrũre iñemboʼe ojogua avei oñepyrũ lája pe padrenuéstro: “Ore Ru, toñemomarangatu nde réra” (Luc. 11:2, NM). Upe rire Jesús opensa umi mbaʼe oikotevẽvare idisipulokuéra, ha ojapose ikatúva guive omeʼẽ hag̃ua chupekuéra “jeikove opaveʼỹva”. Péro umi mbaʼe haʼe oipotáva ojerure omohuʼãnguévo iñemboʼe ha heʼi: “Che Ru, chegueraha jeýna yvágape aĩ hag̃ua nde ykére, aime haguéicha oĩ mboyve ko múndo”. ¿Mbaʼéichapa Jehová ombohovái iñemboʼe? Omeʼẽ chupe peteĩ mbaʼe tuichavéva haʼe ojerure vaʼekuégui: “Peteĩ téra iporãvéva umi ánhel réragui” (Heb. 1:4, NM).

JAIKUAA VAʼERÃ ‘ÑANDEJÁRA TEETÉPE’

6. a) ¿Mbaʼépa ojapo vaʼerã umi apóstol ohupyty hag̃ua pe jeikove opaveʼỹva? b) ¿Mbaʼérepa jaʼekuaa ohupyty hague hikuái pe oipotaitéva?

6 Jesús oñemboʼérõ guare heʼi avei mbaʼépa jajapo vaʼerã ñande yvypóra imperfékto jahupyty hag̃ua pe jeikove opaveʼỹva (elee Juan 17:3). Heʼi tekotevẽha ‘jaikuaa porãve jahávo’ Ñandejára ha Crístope. Upéva heʼise jaikuaa vaʼerãha ikatúva entéro chuguikuéra, avei jajapo vaʼerãha umi mbaʼe ñaaprendéva. Umi apóstol oñepyrũma vaʼekue ojapo upéicha, upévare Jesús heʼi Itúvape: “Amombeʼu chupekuéra nde ere vaʼekue chéve, ha oguerovia hikuái” (Juan 17:8, NM). Péro koʼã kuimbaʼe ohupytyséramo pe jeikove opaveʼỹva, tekotevẽ ojepyʼamongeta meme Ñandejára Ñeʼẽre ha koʼẽ koʼẽre osegi umi konsého omohuʼã meve hekove ko yvy ape ári. ¿Ohupytýpa raʼe hikuái pe oipotaitéva? Ohupyty. La Biblia heʼi herakuéra ojehai hague umi 12 itáre omopyendáva Jerusalén Pyahu yvagaygua (Rev. 21:14).

7. ¿Mbaʼépa heʼise jaikuaaha Ñandejárape, ha mbaʼérepa upéva iñimportanteterei?

7 Jahupytyséramo jeikove opaveʼỹva, ‘tekotevẽ jaikuaa porãve jahávo’ Ñandejárape. Ko fráse ikatu avei ojetradusi “jasegi vaʼerã jaikuaave”. Jahechaháicha, jaikuaa Ñandejárape ndeʼiséi jaikuaanteha umi mbaʼe ojapótava ni umi mbaʼe porã haʼe ohechaukáva. Heʼise ñaime porãha hendive ha jahayhuha chupe ñande pyʼaite  guive. Avei jahechauka vaʼerã jahayhuha ñane ermanokuérape. La Biblia heʼi voi: “Pe ndoporohayhúiva ndoikuaái Ñandejárape” (1 Juan 4:8, NM). Jaikuaa Jehovápe heʼise avei ñaneñeʼẽrenduha chupe (elee 1 Juan 2:3-5). ¡Ajépa tuichaite mbaʼe ikatu haguére jaikuaa Jehovápe ha ñaime ñane ermanokuéra ndive! Upéicharõ jepe, ñañatende vaʼerã ani oiko ñanderehe Judas Iscariote rehe oiko vaʼekue. Haʼe ningo oĩ porã kuri Jehová ha Jesús ndive, péro upe rire otraisiona chupekuéra. Ñañehaʼã vaʼerã akóinte ñaime porã Jehová ndive, péicharõmante jahupytýta pe jeikove opaʼỹva (Mat. 24:13).

“NDE RÉRA [...] REHEHÁPE”

8, 9. a) ¿Mbaʼépa iñimportanteve Jesúspe g̃uarã oĩrõ guare ko yvy ape ári? b) ¿Mbaʼe kostúmbrepa Jesús orrechasa vaʼekue?

8 Jalee rire pe ñemboʼe oĩva Juan kapítulo 17-pe, katuete jahechakuaa Jesús ohayhueterei hague ijapostolkuérape ha avei umi hénte oikótavape upe rire idisípuloramo (Juan 17:20). Péro ñantende vaʼerã Jesús ndoúi hague ñandesalva hag̃uánte. Oñepyrũ guive opredika ha omohuʼã meve upe tembiapo ko yvy ape ári, ombaʼapo meme omomarangatu ha ombotuicha hag̃ua Ñandejára réra. Por ehémplo, omombeʼúrõ guare Nazaret sinagógape maʼerãpa ou ko yvy ape ári, olee Isaías kuatiañeʼẽ ha heʼi: “Jehová espíritu oĩ che ári, haʼe cheporavo amombeʼu hag̃ua marandu porã imboriahúvape”. Oleérõ guare ko párte oime vaʼerã Jesús opronunsia porã Itúva réra (Luc. 4:16-21, NM).

9 Heta tiémpo Jesús ou mboyve ko yvy ape ári, umi omoakãva hudiokuéra rrelihión omboʼe umi héntepe ani hag̃ua oiporu Ñandejára réra. Katuete Jesús orrechasa upe kostúmbre Ñandejára Ñeʼẽ nomboʼéiva. Haʼe heʼi umi ndaijaʼéivape hese: “Che aju che Túva rérape, péro peẽ ndacherresivíri, ótro oúramo ijehegui reínte katu perresivíta chupe” (Juan 5:43, NM). Ha omano mboyvemi ohechauka jey mbaʼépa pe iñimportantevéva chupe g̃uarã ojerurévo Itúvape: “Che Ru, embotuicha  nde réra” (Juan 12:28, NM). Ajeve voi oñeʼẽ heta vése Jehová rérare ko ñemboʼe ñahesaʼỹijóvape.

10, 11. a) ¿Mbaʼépa ojapo Jesús oikuaauka hag̃ua Itúva réra idisipulokuérape? b) ¿Maʼerãpa ñambaʼapo meme vaʼerã koʼág̃arupi?

10 Jesús heʼi oñemboʼévo: “Umi hénte oĩ vaʼekue ko múndope ha remeʼẽva chéve, umívape aikuaauka nde réra. Haʼekuéra nembaʼe vaʼekue ha remeʼẽ chéve, ha ojapo hikuái nde eréva”. Upéi heʼi avei: “Che ahejáta ko múndo ha aháta ne rendápe, péro haʼekuéra oĩ gueteri ko múndope. Upévare che Ru marangatu, eñatendemíkena hesekuéra nde réra remeʼẽ vaʼekue chéve rehehápe. Péicha oiko hag̃ua chuguikuéra peteĩnte, ñande peteĩnteháicha avei” (Juan 17:6, 11, NM).

11 Jesús ndahaʼéi omombeʼúnteva idisipulokuérape mbaʼéichapa héra Itúva, síno oipytyvõ chupekuéra ontende hag̃ua mbaʼépa orrepresenta Ñandejára réra. Por ehémplo omombeʼu mbaʼeichagua persónapa haʼe ha mbaʼéichapa otrata hembiguaikuérape (Éx. 34:5-7). Koʼág̃a katu yvága guive Jesús ñanepytyvõ jaikuaauka hag̃ua avei Jehová réra opárupi ko yvy apére. ¿Maʼerãpa? Ikatu hag̃uáicha hetave hénte oikuaa Ñandejárape ko múndo aña oñehundi mboyve. Ha og̃uahẽ vove upe tiémpo, Jehová osalváta Itestigokuéra iñeʼẽrendúvape ha ombotuichavéta héra (Ezeq. 36:23).

“PE MÚNDO OGUEROVIA HAG̃UA”

12. ¿Mbaʼe mbaʼépa jajapo vaʼerã ñakumpli hag̃ua pe tembiapo Jesús omoñepyrũ vaʼekue?

12 Jesús oikuaa idisipulokuéra ikangyha heta mbaʼépe, upévare oñehaʼãmbaite omboʼe chupekuéra ikatu hag̃uáicha imbarete hikuái. Péichamante haʼekuéra ikatúta osegi ojapo pe tembiapo Jesús omoñepyrũ vaʼekue. Haʼe heʼi Jehovápe: “Nde chembou haguéicha ko múndope, che avei amondo chupekuéra ko múndope”. Iñemboʼépe heʼi mbohapy mbaʼe oipytyvõtava umi disípulope ojapo hag̃ua upe tembiapo iñimportantetéva. Primero, ojerure ani hag̃ua hemimboʼekuéra ojeheʼa ko múndo kyʼaite oĩvare Satanás poguýpe. Segundo, oipota ojapo hikuái Ñandejára Ñeʼẽ heʼíva ha tahekopotĩ hikuái. Tercero, ojerure heta vése idisipulokuéra ojoayhu hag̃ua haʼe ha Itúva ojoayhuháicha. Upévare iporã ñañeporandu: “¿Ajapópa ikatúva guive akumpli hag̃ua koʼã mbohapy mbaʼe Jesús ojerure vaʼekue?”. Jesús oikuaa porã isegidorkuéra ojapóramo haʼe heʼíva, hetave hénte ‘ogueroviataha [Jehová] ombou hague’ chupe (elee Juan 17:15-21).

Umi kristiáno síglo primero guare oiko peteĩ ñeʼẽme oheja rupi espíritu sánto oisãmbyhy chupekuéra (Ehecha párrafo 13)

13. ¿Mbaʼéichapa Jehová ombohovái Jesús ñemboʼe síglo primérope?

13 ¿Ombohováipa Jehová pe ñemboʼe Jesús ojapo vaʼekue? Lívro de Hechos ohechauka ombohovái hague. Ñapensamína: Umi kristiáno apytépe oĩ hudío ha hudioʼỹva, ipláta ha imboriahúva, tembiguái ha umi tembiguái jára. Añetehápe ndahasyiete kuri ojeiko vaipa hag̃ua pe kongregasión síglo primeroguápe. Upéicharõ jepe, opavavénte oiko peteĩ ñeʼẽme, upévare oñembojoja voi chupekuéra ñande retére ha Jesús katu pe akã (Efes. 4:15, 16). Satanás múndope ojeiko vaipa, upévare umi kristiáno ohupytýva ndahaʼéi vyrorei. Jehová añoite ikatu ojapo upéva ijespíritu sánto rupive (1 Cor. 3:5-7).

Jehová puévlo oiko peteĩ ñeʼẽme (Ehecha párrafo 14)

14. ¿Mbaʼéichapa Jehová ombohovái Jesús ñemboʼe ñane tiémpope?

14 Ñambyasýramo jepe, kristianokuéra oñepyrũ ojedividi umi apóstol omanomba rire. Ha ojeprofetisa haguéicha, umi apóstata oñepyrũ omboʼe heta japu ha upéicha rupi oñepyrũ avei heta grúpo rrelihióso (Hech. 20:29, 30). Péro áño  1919-pe Jesús omosãso umi kristiáno unhídope pe rrelihión japúgui ha oipytyvõ chupekuéra “ojogueraha porã hag̃ua” (Col. 3:14, NM). Pe predikasión rupive koʼã kristiáno oipytyvõ avei ‘ambue ovechakuérape’ oĩva 7 millón rasa, ikatu hag̃uáicha oservi Jehovápe peteĩ ñeʼẽme hendivekuéra. Koʼãva ou “opa tetã, trívu ha puévlogui ha [oñeʼẽ] opaichagua idióma” (Juan 10:16, NM; Rev. 7:9, NM). Jahechaháicha, Jehová ombohovái porãiterei Jesús ñemboʼe heʼíva: “Ko múndo oikuaáta nde chembou hague, ha rehayhuha chupekuéra, chéve cherayhuháicha” (Juan 17:23, NM).

JESÚS OMOHUʼÃ IÑEMBOʼE

15. ¿Mbaʼépa ojerure Jesús umi unhído rehehápe?

15 Jesús oñepyrũ mboyve oñemboʼe Itúvape pe 14 de nisán, ombotuicha kuri ijapostolkuérape. Haʼe ojapo peteĩ kompromíso hendivekuéra oprometévo ogovernataha hendive Irréinope (Luc. 22:28-30; Juan 17:22). Upe rire oñemboʼe entéro umi kristiáno haʼétavare unhído, heʼívo: “Che Ru, aipota umi remeʼẽ vaʼekue chéve oĩ avei chendive pe che aĩháme, ohecha hag̃ua hikuái nde chembotuichaha, cherayhúgui ko múndo oñepyrũ mboyve guive” (Juan 17:24, NM). Oenvidia rangue chupekuéra, umi ambue ovechakuéra ovyʼaiterei iñirũnguéra unhído reheve, ha upéva ohechauka avei umi kristiáno tee koʼag̃agua oikoha oñondive peteĩ ñeʼẽme.

16, 17. a) Omohuʼãvo iñemboʼe, ¿mbaʼépa heʼi Jesús osegitaha ojapo? b) ¿Mbaʼépa ñañehaʼã vaʼerã jajapo?

16 Umi hénte oĩva opaichagua rrelihión poguýpe ndoroviaséi Jehová orekoha peteĩ puévlo oservíva chupe peteĩ ñeʼẽme ha oikuaa porãva chupe. Upéva oiko vaʼekue avei síglo primérope, upévare Jesús omohuʼã iñemboʼe kóicha: “Che Ru akóinte nderekojojáva, ko múndo nandekuaái, che katu roikuaa, ha koʼãva oikuaa nde chembou hague. Che aikuaauka chupekuéra nde réra ha aikuaaukáta gueteri, ikatu hag̃uáicha haʼekuéra oporohayhu nde cherayhu haguéicha ha che aime hag̃ua hendivekuéra” (Juan 17:25, 26, NM).

17 Ndaipóri heʼi vaʼerã Jesús ndojapói hague umi mbaʼe ojerure vaʼekue iñemboʼépe. Haʼe omoakã pe kongregasión kristiána ha ñanepytyvõ meme jaikuaauka hag̃ua Itúva réra ha hembipota. Jajapo memékena haʼe heʼíva, jahechaukákena ñaneñeʼẽrenduha chupe japredika ha ñaipytyvõvo ñande rapichakuérape oiko hag̃ua chuguikuéra Jesús disípulo (Mat. 28:19, 20; Hech. 10:42). Ñañehaʼãkena akóinte jaiko hag̃ua peteĩ ñeʼẽme ñane ermanokuéra ndive. Péicha jajapóta Jesús heʼi vaʼekue iñemboʼépe, ñambotuicháta Jehová réra ha javyʼáta opa árare.