Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Septiembre de 2013

Jehová ñeʼẽ ñanembopyʼarory

Jehová ñeʼẽ ñanembopyʼarory

“Ne [ñeʼẽ] opytáta che mbaʼerã opa árape g̃uarã.” (SAL. 119:111)

1. a) ¿Mbaʼéichapa heta tapicha ojagarra umi konsého, ha mbaʼérepa? b) ¿Mbaʼépa ojapo jepi umi oñemombaʼeguasúva oñemeʼẽ jave chupekuéra konsého?

YVYPORAKUÉRA ojagarra heta hendáicha umi mandáto oñemeʼẽva chupekuéra. Por ehémplo, oĩ umi naiprovlémaiva ojapo hag̃ua omandáva chupe peteĩ orekóva autorida; péro omeʼẽrõ chupe konsého peteĩ haʼeichagua térã omandaʼivéva chugui, ni mbaʼevéicharõ ndojapomoʼãi. Heta persóna oñembyasy, oñeñandu vai térã otĩ oñemeʼẽ jave chupe konsého. Ótro katu ojapose voi ojeʼéva chupe ha oñehaʼãmbaite osẽ porã hag̃ua. ¿Mbaʼérepa idiferentete ojuehegui umi hénte? Oĩ ningo heta oñemombaʼeguasúva. Peteĩ oñembotuichaséva ikatu nopensái hekópe porã ha upévare nopenái pe konséhore ha omboyke peteĩ mbaʼe ideprovéchotava chupe (Prov. 16:18).

2. ¿Mbaʼérepa ñamombaʼeterei umi konsého oúva la Bíbliagui?

2 Umi kristiáno tee katu ojagarra porã umi konsého oñemeʼẽva chupekuéra, koʼýte ou jave la Bíbliagui. Jehová heʼíva ideprovechoiterei ñandéve ñanemoarandu ha ñanepytyvõ rupi ani hag̃ua jaiko pláta rapykuéri, jaiporu dróga, jaʼu rasa vevída, térã jaʼa tekovaípe (Prov. 20:1; 2 Cor. 7:1; 1 Tes. 4:3-5; 1 Tim. 6:6-11). Hiʼarive ‘ñandepyʼarory’ ñakumpli haguére umi mandáto Jehová omeʼẽva (Is. 65:14).

3. ¿Mbaʼéichapa ñahaʼanga vaʼerã pe salmístape?

3 Ñaime porã hag̃ua ñande Ru yvagaygua ndive, tekotevẽ jasegi meme ikonsehokuéra. Iporãitereíta ñapensáramo pe salmístaicha. Haʼe ohai vaʼekue: “Ne [ñeʼẽ] opytáta che mbaʼerã opa árape g̃uarã, umíva ombohorýgui upe che pyʼa” (Sal. 119:111). ¿Ñanembopyʼarorýpa avei Ñandejára mandamiénto, térãpa  sapyʼánte ñapensa peteĩ kargaha? Ikatu ningo sapyʼánte nañandegustái peteĩ konsého oñemeʼẽva ñandéve, péro ani ñanekangy. Jajerovia vaʼerã ñande pyʼaite guive Ñandejárare jaikuaágui opa mbaʼe haʼe ojeruréva katuete ou porãtaha ñandéve. Jahechamína mbaʼéichapa ikatu jajapo upéva mbohapy hendáicha.

ÑAÑEMBOʼE MEMÉRÕ JAJEROVIAVÉTA JEHOVÁRE

4. ¿Mbaʼépa David nokambiái vaʼekue arakaʼeve?

4 Rréi David ohasáramo jepe heta mbaʼe iporãva, ohasa avei heta mbaʼe ijetuʼúva. Péro oĩ peteĩ mbaʼe arakaʼeve haʼe nokambiáiva: ojerovia vaʼekue ipyʼaite guive Ijapoharére. Haʼe heʼi: “Ñandejára ndéve añemboʼe. [Jehová] nderehe ajerovia” (Sal. 25:1, 2). ¿Mbaʼépa oipytyvõ vaʼekue Davídpe ojerovia mbarete hag̃ua Itúva yvagayguáre?

5, 6. ¿Mbaʼéichapa David oĩ vaʼekue Ñandejárandi ohechaukaháicha la Biblia?

5 Heta hénte oñemboʼe Ñandejárape ojecha vai javénte. ¿Mbaʼépa rejapóta peteĩ ne amígo térã ne hénte nderekáramo oiporuse jave plátante, térã ojevalese javénte nderehe? Katuete reñepyrũta repensa iñinteresadoha. David noñembojái Ñandejárare oikotevẽ javénte, síno ohechauka ohayhu ha ojeroviaha Jehováre oikove aja pukukue, tahaʼe iporã térã ivai jave isituasión (Sal. 40:8).

6 Eñatendemína mbaʼéichapa David ombotuicha ha oagradese Ñandejárape: “[Jehová] ore Jára, herakuã porãite nde réra ko yvy ape ári. Yvága peve og̃uahẽ” (Sal. 8:1). ¿Jahechakuaápa mbaʼeichaitépa David oĩ porã vaʼekue itúva yvagapeguándi? David omombaʼeterei Ñandejára rekomimbipa, ha upéva omomýi chupe ombotuicha hag̃ua Jehovápe “opa árape” (Sal. 35:28).

7. ¿Mbaʼépa jahupyty ñañemboʼévo?

7 David ojapo haguéicha, tekotevẽ avei ñañemboʼe meme Jehovápe ikatu hag̃uáicha jajeroviave hese. La Biblia heʼi: “Peñemoag̃uíkena Ñandejárare, ha haʼe oñemoag̃uíta penderehe” (Sant. 4:8, NM). Ñañemboʼévo Jehovápe ñañemoag̃uive hese ha upéicha avei haʼe omeʼẽ ñandéve espíritu sánto (elee 1 Juan 3:22).

8. ¿Mbaʼérepa ndovaléi jarrepetipa umi mbaʼe jaʼéva káda ñañemboʼe?

8 ¿Ndépa rejepokuaa rerrepeti umi mbaʼe eréva reñemboʼe jave? Oiméramo upéicha, repensa raẽ vaʼerã mbaʼépa erese Jehovápe ha upéi ae eñemboʼe. Epensamína: pyʼỹinte reñeʼẽramo peteĩ ne amígo térã ne héntendi, ¿erétapa chupe peteĩ mbaʼénte káda rejotopa hendive? Rejapórõ upéicha, pyaʼeterei ikueráita ndehegui ha nopenamoʼãi nderehe. Jehová katuete ohendúta isiérvo iñeʼẽrendúvape, upéicharõ jepe ñañatende vaʼerã ani hag̃ua jarrepetipa umi mbaʼe jaʼéva káda ñañemboʼe.

9, 10. a) ¿Mbaʼépa ikatu jaʼe ñañemboʼe jave? b) ¿Mbaʼépa ñanepytyvõta ñañemboʼe hag̃ua Jehovápe ñande pyʼaite guive?

9 Ñañemoag̃uiséramo Ñandejárare, ndajaikomoʼãi jaʼe chupe umi mbaʼe naiñimportanteguasúiva ñañemboʼe jave. Ñañeʼẽramo chupe ñande pyʼaite guive, ñañemoag̃uivéta ha jajeroviavéta hese. ¿Mbaʼépa ikatu jaʼe ñañemboʼe jave? La Biblia heʼi: “Opa árape pemombeʼu Ñandejárape peipotáva, pejapo upéva peñemboʼévo, pejerure asývo, ha peagradese avei chupe” (Filip. 4:6, NM). Añetehápe, ikatu ñañeʼẽ Jehovándi umi mbaʼe jahasáva ha ñañandúvare, avei opa mbaʼe ñanepytyvõtavare ñañemoag̃ui hag̃ua hese.

10 La Bíbliape jatopa mbaʼéichapa oñemboʼe vaʼekue Ñandejára siervokuéra. Ñahesaʼỹijóramo umíva, tuicha ñanepytyvõta (1 Sam. 1:10, 11; Hech. 4:24-31). Sálmope  oĩ heta ñemboʼe ha purahéi ojejapóva Jehovápe. Umívape ojekuaa mbaʼéichapa oñeñandu vaʼekue Jehová siervokuéra, por ehémplo ovyʼa jave térã oñembyasy jave. Jastudiáramo koʼã mbaʼe ikatúta ñañemboʼe Jehovápe ñande pyʼaite guive.

JAJEPYʼAMONGETÁKENA JEHOVÁ ÑEʼẼRE

11. ¿Mbaʼérepa jajepyʼamongeta vaʼerã Ñandejára konséhore?

11 David heʼi: “Jehová ñeʼẽ ijeroviapy, omoarandu oikuaaʼỹvape” (Sal. 19:7, NM). Ñakumpli vaʼerã Jehová mandamiénto ikatu hag̃uáicha ñanearandu. Péro heta vése tekotevẽ jajepyʼamongeta umi konséhore ideprovechove hag̃ua ñandéve. ¿Mbaʼérepa jaʼe upéva? Jajepyʼamongetávo jajepreparáma hína ñambohovái hag̃ua umi mbaʼe ijetuʼúva ikatúva oñepresenta. Por ehémplo, ñanepytyvõta ñambohovái hag̃ua oĩramo ñandejopýva eskuélape térã ñande travahohápe. Ikatúta jarrespeta Ñandejára heʼíva tuguýre, ndajaikemoʼãi polítikape ha jasegíta la Biblia heʼíva jadesidi jave mbaʼéichapa ñañemondéta. Ñantendéramo Ñandejára opensáva koʼã mbaʼére, jahechakuaáta mbaʼe provlémapa ikatu oñepresenta ha jadesidi porãta upéicha jave. Jahechaháicha, jajepyʼamongeta ha jajepreparáramo, jajeíta heta akãrasýgui (Prov. 15:28).

12. ¿Mbaʼe mbaʼérepa jajepyʼamongeta vaʼerã ikatu hag̃uáicha ñakumpli Jehová ñeʼẽ?

12 Ñahaʼarõ aja oñekumpli Ñandejára promesakuéra, ¿jahechaukápa jajeroviaha hese ha iñimportanteveha ñandéve g̃uarã jajapo hembipota? Por ehémplo, ¿añetehápepa jaguerovia Babilonia Guasu koʼẽrõite oñehunditaha? ¿Jaroviápa ñande pyʼaite guive jaikotaha opa ára g̃uarã peteĩ hardín neporãmba jepévape ko yvy ape ári, jarovia haguéicha jaikuaa ypýrõ guare pe añetegua? ¿Jajeroviápa ñande pyʼaite guive oñemoingove jeytaha umi omano vaʼekue? ¿Jasegípa ñanekyreʼỹ japredika hag̃ua pe marandu porã jaiko rangue ñamotenonde umi mbaʼe ñandegustávante? ¿Jaipotápa oñemomarangatu Ñandejára réra ha ñamombaʼe pe derécho haʼe añoite orekóva ñanegoverna hag̃ua? Jajepyʼamongetáramo koʼã porandúre, Jehová ñeʼẽ “opytáta [ñanembaʼerã] opa árape g̃uarã” (Sal. 119:111).

13. ¿Mbaʼérepa umi kristiáno síglo primero guare nontendéi vaʼekue heta mbaʼe? Emoĩ peteĩ ehémplo.

13 Sapyʼánte ikatu nañantendepái peteĩ párte oĩva la Bíbliape neʼĩragui og̃uahẽ pe tiémpo Jehová omyesakã hag̃ua. Jesús heta vése heʼími vaʼekue ijapostolkuérape haʼe ohasa asy ha omanotaha (elee Mateo 12:40; 16:21). Péro haʼekuéra nontendéi mbaʼépa upe heʼiséva. Jesús oikove jey rire, ojechauka idisipulokuérape ha “oipytyvõ chupekuéra ontende porã hag̃ua Ñandejára Ñeʼẽ heʼíva” (Luc. 24:44-46, NM; Hech. 1:3). Upépe ae hesakã chupekuéra Jesús heʼi vaʼekue. Upéicha avei, haʼekuéra nontendéi vaʼekue Ñandejára Rréino ogovernataha yvága guive. Péro oñemeʼẽ rire chupekuéra espíritu sánto Pentekostés áño 33-pe, ontendéma hikuái (Hech. 1:6-8).

14. ¿Mbaʼe ehémplopa oheja ñandéve heta ermáno, jepe noñekumplíri haʼekuéra ohaʼarõva?

14 Upéicha avei, oñepyrũre síglo 20 umi kristiáno tee ontende vai umi mbaʼe oikótava “umi ára pahápe” (2 Tim. 3:1, NM). Por ehémplo, 1914-pe oĩ opensáva ojeguerahatamaha chupekuéra yvágape. Péro ndoikóimaramo umi mbaʼe ohaʼarõva, ohesaʼỹijo porã jey hikuái Ñandejára Ñeʼẽ ha ohechakuaa tekotevẽha ojepredika ha oñemboʼe umi héntepe opárupi ko yvy ape ári (Mar. 13:10). Upévare áño 1922-pe ermáno Joseph F. Rutherford, upérõ omotenondéva umi Estudiánte de la Bíbliape,  ojapo peteĩ diskúrso peteĩ asambléa internasionálpe oiko vaʼekue Cedar Póintpe (Ohio, Estados Unidos), ha heʼi: “¡Péina, pe Rréi ogovernáma! Peẽ peñeʼẽ vaʼerã hérape. Upévare, tapeho peikuaauka, peikuaauka, peikuaauka mávapa pe Rréi ha irréino”. Upe ára guive Jehová siervokuéra koʼag̃aguápe ojekuaa opárupi opredika haguére pe “marandu porã oñeʼẽva Ñandejára Rréinore” (Mat. 4:23; 24:14, NM).

15. ¿Mbaʼéichapa ñanepytyvõ jajepyʼamongetárõ umi mbaʼe Jehová ojapo vaʼekuére ipuévlo rehehápe?

15 Jajepyʼamongetárõ umi mbaʼe Jehová ojapo vaʼekuére ipuévlo rehehápe ymave ha koʼág̃arupi avei, katuete ñanepytyvõta jajerovia mbarete hag̃ua haʼe ojapótavare amo gotyove. Hiʼarive Jehová ñeʼẽ ñanepytyvõ ani hag̃ua jaipeʼa ñane akãgui umi profesía neʼĩrava oñekumpli ha jajeroviave hag̃ua umívare.

JAHECHAUKÁKENA JAJEROVIAHA JEHOVÁRE ÑAMBAʼAPO MEMÉVO

16. ¿Mbaʼépa jahupyty ñambaʼapo meméramo Jehová servísiope?

16 Ñande Apohare ningo kyreʼỹme ombaʼapo meme. Pe salmísta heʼi vaʼekue: “Che Ruete, [...] ¿máva piko ndeichagua?”. Ha upéi heʼi avei: “Nde po imbarete, nde akatúa rehupi yvate” (Sal. 89:8, 13, ÑÑB). Jehová ombaʼapo meme rupi ñanevendesi ha omombaʼe ñañehaʼã jave Irréino rehehápe. Haʼe ohecha hembiguaikuéra, tahaʼe kuña, kuimbaʼe, imitãva térã ijedáva, ‘ndoʼureiriha’ térã ndojekuʼakói opytávo (Prov. 31:27). Upéva rangue, ohaʼanga hikuái Ijapoharépe ha ombaʼapo meme ikatu hag̃uáicha omombarete ijerovia. Haʼekuéra ovyʼaiterei oñemeʼẽmbaitévo iservísiope, ha Jehová katu ipyʼarory ovendesívo hembiapokuéra (elee Salmo 62:12).

17, 18. ¿Mbaʼérepa jaʼekuaa jajeroviavetaha Jehováre ñambaʼapo meméramo chupe g̃uarã? Emoĩ peteĩ ehémplo.

 17 ¿Mbaʼéichapa jajerovia mbareteve Jehováre ñambaʼapo memérõ chupe g̃uarã? Ñapensamína umi isrraelíta ohasa vaʼekuére oikérõ guare pe Yvy Oñepromete vaʼekuépe. Jehová omanda kuri umi saserdóte oguerahávape pe karameg̃ua marangatu oike hag̃ua pe rrío Jordánpe. Péro og̃uahẽvo upépe, otopa hikuái pe rrío osẽmbaha okyeterei haguére pe primavérape. ¿Mbaʼépa ojapo upémarõ umi Israelgua? ¿Odesidípa opyta ohaʼarõ heta semána oguejy peve pe y? Nahániri. Haʼekuéra ojerovia Jehováre ha ojapo heʼíva guive chupekuéra. ¿Mbaʼépa ohupyty hikuái upe haguére? La Biblia omombeʼu: “Umi saserdóte oraháva pe karameg̃ua, oikére pe ýpe, pe rrío ndosyryvéi ha opyta iséko. [...] Umi saserdóte [...] oñemboʼy pe Jordán mbytépe ikãháme, ha upe aja maymáva Israelgua ohasa mboypýri” (Jos. 3:12-17, NM). ¡Mbaʼeichaitépa oiméne ovyʼa raʼe umi isrraelíta ohechávo pe y osyry hatãitéva opytaiteha! Upeichaite, umi isrraelíta ojerovia mbareteve Jehováre iñeʼẽrendu rupi chupe.

¿Rejeroviátapa avei umi isrraelíta Josué tiémpope guare ojerovia haguéicha? (Ehecha párrafo 17 ha 18)

18 Añetehápe ningo Jehová ndojapói umichagua milágro ñanderehehápe koʼág̃arupi, péro haʼe ñanevendesi jahechaukáramo jajeroviaha hese. Ijespíritu rupive ñanembokatupyry japredika hag̃ua pe marandu porã opárupi ko yvy ape ári. Ha Jesucristo, pe Testígo de Jehová tuichavéva, opromete idisipulokuérape oipytyvõtaha chupekuéra okumpli hag̃ua ko tembiapo iñimportantetéva. Oñemoingove jey rire, haʼe heʼi: “Tapeho pemboʼe umi hénte opa tetãyguápe oiko hag̃ua chuguikuéra che disípulo [...] Ha ¡péina!, aiméta penendive opa ára, og̃uahẽ meve huʼãme ko múndo ára paha” (Mat. 28:19, 20, NM). Heta Testígo hiʼotĩva ohechakuaa mbaʼéichapa Ñandejára espíritu ombopyʼaguasu chupekuéra opredika hag̃ua oimehaichagua tapichápe (elee Salmo 119:46 ha 2 Corintios 4:7).

19. Jahasáramo jepe umi mbaʼe ijetuʼúva, ¿mbaʼéichapa Jehová ohecha ñande servísio?

19 Oĩ ermáno hasykatúva ha ijedámava, ha ndaikatúi oservi Jehovápe ojaposeháicha. Péro Jehová “ningo peteĩ Túva oporoporiahuverekóva ha Ñandejára omeʼẽva opaichagua konsuélo”, upévare haʼe ontende umi mbaʼe ohasáva káda uno (2 Cor. 1:3, NM). Chupe g̃uarã iñimportánte umi mbaʼe jajapóva hesehápe. Ha ani ñanderesarái amo ipahápe ojesalvataha opavave ojeroviáva Jesucristo sakrifísiore, ha oñehaʼãmbaitéva ojapo opa ikatúva Jehová servísiope (Heb. 10:39).

20, 21. ¿Mbaʼéichapa ikatu jahechauka jajeroviaha Jehováre?

20 ¿Mbaʼéichapa ñamombaʼeguasu vaʼerã Jehovápe? Jaaprovechapaite vaʼerã ñane tiémpo, ñane mbaretekue ha ñane mbaʼerepy jaservi hag̃ua chupe. Ñande jasegise ‘japredika umi marandu porã’ ñande pyʼaite guive (2 Tim. 4:5, NM). Javyʼa ñaipytyvõ haguére ñande rapichakuérape ikatu hag̃uáicha “oikuaa porã pe añetegua” (1 Tim. 2:4, NM). Añetehápe, ñamombaʼeguasúvo Ñandejárape ñanepytyvõ akóinte ñaime porã hag̃ua hendive (Prov. 10:22). Ha avei jajeroviavéta ñande Apoharére ñande pyʼaite guive (Rom. 8:35-39).

21 Jahecha haguéicha, ndahaʼéi ningo ñanekoʼẽnteva jajerovia Jehová ñeʼẽre, síno tekotevẽ ñañehaʼãmbaite upearã. Upévare, ñamombaretékena ñande jerovia ñañemboʼévo Ñandejárape, jajepyʼamongetávo mbaʼéichapa okumpli hembipota ymave ha mbaʼéichapa okumplíta tenonderãme, ha avei ñambaʼapo memévo chupe g̃uarã. Ñakumplíramo koʼã mbaʼe, Jehová ñeʼẽ “opytáta [ñane mbaʼerã] opa árape g̃uarã”.