“Ejerovia Jehováre nde pyʼaite guive, ha ani ndejehe añónte.” (PROV. 3:5, NM)

1, 2. a) ¿Mbaʼéichapa heta hénte oñeñandu odesidíta jave? b) ¿Mbaʼépa repensa umi mbaʼe redesidi vaʼekuére?

KÁDA día ningo jadesidi vaʼerã heta mbaʼe. ¿Ndépa mbaʼe repensa upévare? Heta oĩ ndoipotáiva ótra persóna odesidi hese, ha oĩramo ojapóva upéva ipochy voi oimoʼãgui ndojerrespetaiha chupe. Oĩ katu umi tapicha okyhyjéva odesidi hag̃ua umi mbaʼe iñimportánteva, upévare oheka jepi konsého livrokuérape, térã opaga hepy hepy umi konsehérope odesidi porãségui.

2 Katuete ñande nañapensái koʼãichagua hénte opensaháicha, péro jahechakuaa jepi oĩha heta mbaʼe ndaikatúiva ñandénte jadesidi ni ñakontrola. Upéicharamo jepe, jaikuaa oĩha avei heta mbaʼe ikatúva jadesidi jaipotaháicha ha ñandegustaháicha (Gál. 6:5). Péro oiméne jahechakuaa naentéroi umi mbaʼe jadesidíva osẽ porã hague térã ideprovechoha ñandéve.

3. a) ¿Mbaʼépa ñanepytyvõta jadesidi porã hag̃ua? b) ¿Mbaʼérepa sapyʼánte ijetuʼu ñandéve jadesidi hag̃ua?

3 Ñande jaservíva Jehovápe javyʼaiterei haʼe omeʼẽ haguére ñandéve heta konsého ñanepytyvõva jaikuaa hag̃ua mbaʼépa iporãve jajapo. Jasegíramo umi konsého, jadesidíta Ñandejárape ogustaháicha ha katuete osẽ porãta ñandéve opa mbaʼe. Péro sapyʼánte la Biblia nomyesakãi mbaʼépa jajapo vaʼerã, upévare ijetuʼu ñandéve jadesidi hag̃ua. ¿Mbaʼépa ikatu jajapo upéicha jave? Por ehémplo, opavave ningo jaikuaa ndovaleiha ñamonda (Efes. 4:28). Péro oĩ heta heʼíva nañamondaiha hína sonseraitereíramo upe jagueraháva, térã ndaivairiha ñamonda oiméramo ñaikotevẽterei. ¿Mbaʼépa ñanepytyvõta ikatu hag̃uáicha jadesidi porã nañantendeporãiramo mbaʼépa ikatu jajapo peteĩ situasiónpe? ¿Mbaʼérehepa jajesegi vaʼerã?

 ÑANEAKÃGUAPY VAʼERÃ

4. ¿Mbaʼe konséhopa oiméne oñemeʼẽma raʼe ñandéve jadesidi mboyve?

4 Jaʼéramo peteĩ ermánope jadesidi vaʼerãha peteĩ mbaʼe iñimportantetereíva, katuete heʼíta ñandéve tekotevẽha ñapensa porã raẽ, ha añetehápe upéva peteĩ konsého ideprovéchova. Ñandejára Ñeʼẽ heʼi voi mbaʼépa oikóta ñanderehe jajapuráramo jadesidi hag̃ua: “Umi itarováva rembiapokue opa reíta, upévare haʼe imboriahu vaʼerã” (Prov. 21:5, ÑÑB). Péro, ¿mbaʼépa heʼise jadesidiha akãguapýpe porã? Tekotevẽramo jepe ñapensa porã ha ñantendepaite peteĩ situasión, upéva ndeʼiséi katuete ñaneakãguapymaha (Rom. 12:3; 1 Ped. 4:7).

5. ¿Mbaʼérepa ndaipóri ikatúva heʼi iñakãguapymaha onase guive?

5 Jaikuaaháicha ndaipóri ikatúva heʼi iñakãguapymaha onase guive. Opavave ñaneimperfékto ha japeka, upévare ijetuʼu ñakontrola hag̃ua ñane pensamiénto (Sal. 51:5; Rom. 3:23). Hiʼarive hetápe Satanás ñandeguereko kuri pytũmbýpe ha ndajaikuaái vaʼekue Jehovápe ni hembipota (2 Cor. 4:4; Tito 3:3). Upévare jadesidíramo ñandéve iporãveháichante ñañembotavy hína ñandejupe voi, jepe heta ñapensa kuri jadesidi hag̃ua (Prov. 14:12).

6. ¿Mbaʼépa ñanepytyvõta ñaneakãguapy hag̃ua?

6 Ñande ningo ñaneimperfékto, péro Jehová ñande Ru yvagaygua perfékto opaite mbaʼépe (Deut. 32:4). Haʼe ñanepytyvõ ñakambia hag̃ua ñapensa lája ha ñaneakãguapy hag̃ua (elee 2 Timoteo 1:7). Upéicha rupi ñañehaʼãmbaite ikatu hag̃uáicha ñapensa, jajepyʼamongeta ha jajapo hekópe porã entéro mbaʼe. Péro upearã ñakontrola vaʼerã umi mbaʼe ñapensáva ha ñañandúva, ha ñahaʼanga Jehovápe opa mbaʼépe.

7, 8. Ehechauka peteĩ ehémplo rupive ikatuha jadesidi porã ijetuʼúramo jepe ñane situasión.

7 Jahechamína peteĩ ehémplo. Heta oĩ ohóva ombaʼapo ótro paíspe ha omondóva hetãme ifamília onaseramóva ikatu hag̃uáicha oñangareko hese ijavuelokuéra. Upe aja haʼekuéra opyta ombaʼapo oganave hag̃ua pláta. * Jahechamína mbaʼépa oiko peteĩ kuñakarai imitãvare. Haʼe ou imemby ombaʼapo aja ótro tetãme, ha upérõ g̃uarã oñepyrũ avei ostudia la Biblia ha oñakãrapuʼã ohóvo. Iñamigokuéra ha ihénte ojopy chupe ha iménape omondo hag̃ua imemby hetãme ikatu hag̃uáicha ijavuelokuéra omongakuaa chupe. Péro ko kuñakarai ostudia rupi la Biblia ohechakuaa Ñandejára omeʼẽha chupe pe rresponsavilida omongakuaa hag̃ua imemby (Sal. 127:3; Efes. 6:4). ¿Osegítapa pe kostúmbre hetápe g̃uarã oĩ porãva? ¿Térãpa ojapóta la Biblia heʼíva ijetuʼúramo jepe omantene hag̃ua avei ifamíliape ha oĩrõ jepe heta otakýva hesekuéra? ¿Mbaʼépa nde rejapóne reimérire ko kuñakarai lugárpe?

8 Ko situasión ojopyeterei pe kuñakaraípe, upémarõ oñemboʼe ipyʼaite guive ha ojerure Jehovápe toipytyvõmi chupe ikatu hag̃uáicha oikuaa mbaʼépa ojapóta. Upéi oñeʼẽ pe ermána ombostudiáva ndive chupe ha avei ambue ermanokuéra kongregasionguándi, ha ohechakuaa mbaʼépa Jehová opensa upe situasión rehe. Avei opensa ojapo vaitaha imembýre okakuaáramo mombyry chuguikuéra. La Biblia oipytyvõ chupe ohechakuaa hag̃ua naiporãiha omondo imembyʼípe hetãme. Iména ohechakuaa rire mbaʼéichapa umi ermáno oipytyvõ chupekuéra ha itaʼyraʼi okakuaa porãitereiha, oñepyrũ  avei ostudia la Biblia ha oho rreunionhápe.

9, 10. ¿Mbaʼépa heʼise ñaneakãguapyha, ha mbaʼéichapa ikatu jahupyty upéva?

9 Pe kuñakarai ohasa vaʼekue ohechauka ñaneakãguapýramo ndajajapomoʼãiha umi mbaʼe ñandévente térã ñande rapichakuérape g̃uarãnte oĩ porãva. Ñane ménte ha ñane korasõ ikatu ñambojoja peteĩ rrelo oñadelanta térã ojatrasávare. Jajeroviáramo peichagua rrelóre, ikatu hína tuicha ñaneprovléma (Jer. 17:9). Upévare jasegi vaʼerã umi konsého Jehová omeʼẽva ha arakaʼeve ndofalláiva (elee Isaías 55:8, 9).

10 Ndareíri ningo la Biblia heʼi: “Ejerovia Jehováre nde pyʼaite guive, ha ani ndejehe añónte. Nemanduʼáke hese opa mbaʼe rejapóvape, ha haʼe omyesakãta ndéve nde rape” (Prov. 3:5, 6, NM). Ñapensamína, ñepyrũrã ko téxto heʼi ndajajeroviái vaʼerã ‘ñandejehe añónte’, ha upéi heʼi ñanemanduʼa vaʼerãha Jehováre ‘opa mbaʼe jajapóvape’. Añetehápe, Jehová ndojavýiva arakaʼeve. Upévare, jadesidi mboyve jajapótava iporã jahecha mbaʼépa heʼi la Biblia jaikuaa hag̃ua mbaʼépa opensa Jehová. Upéicharõ, ñaneakãguapy heʼise ñapensaha Ñandejára opensaháicha.

JAIPORU MEMÉKE ÑANE AKÃ

11. ¿Mbaʼépa jajapo vaʼerã ikatu hag̃uáicha jadesidi porã?

11 Heta vése hasy jadesidi porã hag̃ua ha upéi jajapo upe jadesidi vaʼekue, koʼýte umi ojevautisa ramóva térã umi oñakãrapuʼãva ohóvo. La Biblia heʼi koʼãichagua persóna ojoguaha mitãme. Jaikuaaháicha, peteĩ mitã mbeguekatúpe oaprende oguata. Upéicha avei, peteĩ oservi ramóva Jehovápe mbeguekatúpe oaprende odesidi porã hag̃ua. Ani ñanderesarái apóstol Pablo heʼi hague umi tapicha iñakãguapýva ‘oiporu memeha iñakã ha upévare ikatupyry oikuaa hag̃ua mbaʼépa iporã ha mbaʼépa ivai’. Umi ñeʼẽ “oiporu meme” ha “ikatupyry” ohechauka tekotevẽha ñañehaʼã mante, ha upéva ojapo vaʼerã opavave oservi ramóva Jehovápe (elee Hebreos 5:13, 14).

Jadesidi porãramo káda día, jaiporu porãta ñane akã jadesidi hag̃ua umi mbaʼe tuichavéva (Ehecha párrafo 11)

12. Emoĩ peteĩ ehémplo ohechaukáva mbaʼérepa iñimportánte jajepyʼamongeta raẽ jadesidi porã hag̃ua.

 12 Jahecháma haguéicha, káda día jadesidi vaʼerã heta mbaʼe, tahaʼe iñimportánteva térã naiñimportanteguasúiva. Peteĩ estúdio ojejapo vaʼekue ohechauka haimete la mita umi mbaʼe jajapóvagui jadesidiha jahechakuaaʼỹre. Por ehémplo, oiméne káda pyhareve redesidi vaʼerã mbaʼépa remondéta, ha ikatu ni nderejeréi voi rejapo hag̃ua upéva, koʼýte rejapurárõ. Péro iñimportánte rejepyʼamongeta rehecha hag̃ua reñemondépa hína peteĩ kristiáno teéicha (2 Cor. 6:3, 4). Rejoguáta jave nde aorã oiméne repensa mbaʼeichaguápa ojeporuve, ¿péro remañápa avei iprésiore ha oimépa idesénte? Jadesidi porãramo koʼã situasiónpe jahechauka hína jaiporuha ñane akã, ha upéva ñanepytyvõta avei jadesidi porã hag̃ua umi mbaʼe iñimportantevéva (Luc. 16:10; 1 Cor. 10:31).

ÑAÑEHAʼÃKENA JAJAPO PE IPORÃVA

13. ¿Mbaʼépa ñanepytyvõta ñakumpli hag̃ua upe jadesidi vaʼekue?

13 Opavave ningo jaikuaa ikatuha jadesidi peteĩ mbaʼe, péro heta vése hasyetereiha upe rire jajapo pe jadesidíva. Por ehémplo, heta opitáva ohejase pe sigarríllo ha odesidi ojapo upéva, péro upe riremi hoʼa jey ko vísiope. ¿Mbaʼérepa? Ndojedesidiporãigui. Tekotevẽ ningo jadesidi ñande pyʼaite guive jajapotaha peteĩ mbaʼe ha upéi ñañehaʼãmbaite ñakumpli upe jaʼe vaʼekue. ¿Mbaʼépa ñanepytyvõta ñandedesidído ha ñakumpli hag̃ua upe jaʼe vaʼekue? Jajerure vaʼerã Jehovápe tañanepytyvõ (elee Filipenses 2:13).

14. ¿Mbaʼépa oipytyvõ Páblope okumpli hag̃ua umi mbaʼe odesidíva?

14 Apóstol Pablo oikuaa porã vaʼekue hasyha ñakumpli upe jadesidi vaʼekue. Haʼe heʼi: “Chéngo ajapose iporãva péro ndaikatúi ajapo”. Pablo oikuaa mbaʼépa tekotevẽ ojapo, upéicharõ jepe sapyʼánte ijetuʼueterei chupe okumpli hag̃ua. Haʼe orrekonose: “Añetehápe, che pyʼaite guive aguerohory Ñandejára Léi, péro ahecha che retépe oĩha ótra léi, oñorairõva Ñandejára Léi ndive oĩva che akãme, ko léi haʼe hína pe pekádo oĩva che retépe ha cheguerekóva ipoguýpe”. ¿Ikatúpa jaʼe Pablo naipohãvéima hague? Nahániri, upe rire haʼe heʼi: “¡Aagradese Ñandejárape, ñande Ruvicha Jesucristo rupive!” (Rom. 7:18, 22-25, NM). Ha umi ermáno Filiposguápe ohai: “Opa mbaʼerã chembarete Ñandejára omeʼẽgui chéve podér” (Filip. 4:13, NM).

15. ¿Mbaʼérepa iñimportánte ñandedesidído?

15 Jahechaháicha, tekotevẽ ñandedesidído ikatu hag̃uáicha Ñandejára ñandeguerohory. Por ehémplo, Elías oĩrõ guare mónte Carmélope heʼi vaʼekue umi oadorávape Baálpe ha umi isrraelíta naiñeʼẽrendúivape: “Arakaʼe pevépa peñembopyʼamokõita. [Jehováramo] pe Jára tee, peiko hapykuéri; ha oiméramo Baal, tapeho hapykuéri” (1 Rey. 18:21, ÑÑB). Umi isrraelíta oikuaa porã mbaʼépa ojapo vaʼerã, péro ipyʼamokõi hikuái, ndojoguaiete voi Josuépe. Heta áño upe mboyve, haʼe omoĩ vaʼekue peteĩ ehémplo porã heʼírõ guare: “Napemombaʼeguasuséiramo [Jehovápe] katu, koʼág̃a peje vaʼerã mbaʼeichagua ñandejárapepa pemombaʼeguasúta [...]. Che ha maymáva cherogaygua romombaʼeguasúta [Jehovápe]” (Jos. 24:15). ¿Mbaʼépa Josué ohupyty idesidído haguére? Haʼe ha umi omoirũva chupe oike pe Yvy Oñepromete vaʼekuépe, “upe yvy osyryhápe kamby ha eíra” (Jos. 5:6, ÑÑB).

 REDESIDI PORÃRAMO JEHOVÁ NEVENDESÍTA

16, 17. Emombeʼu peteĩ ehémplo ohechaukáva mbaʼépa jahupytýta jadesidíramo ñamotenonde meme Jehovápe.

16 Ñapensamína ko situasión rehe: Peteĩ ermáno omendáva ojevautisa ramo ha oreko mbohapy ifamília michĩva gueteri. Peteĩ díape, ikompañéro de traváho oinvita chupe oho hag̃ua hikuái ombaʼapo ótra emprésa ojepaga porãvehápe ha omeʼẽva hetave venefísio. Ñane ermáno ojepyʼamongeta porã ha ojerure Jehovápe toipytyvõmi chupe odesidi hag̃ua. Haʼe imanduʼa oiporavo hague upe traváho orekóva, ndojepagaporãiramo jepe, ikatu hag̃uáicha oho rreunionhápe ha osẽ opredika ifamíliandi fin de semanakue. Ko ermáno opensa porã ha ohechakuaa odesidíramo okambia itraváho nahembymoʼãveimaha chupe tiémpo opredika ha oho hag̃ua rreuniónpe ifamíliandi. ¿Mbaʼépa nde rejapóne rejecháramo koichagua situasiónpe?

17 Pe ermáno okalkula mbaʼépa ohupytýta omotenondéramo Jehovápe ha mbaʼépa ohupytýta ogana porãvéramo. Upémarõ odesidi osegínte ombaʼapo pe emprésape oĩháme voi. ¿Ombyasýpa upe rire odesidi haguére upéva? Nahániri. Haʼe opensa ikuentaveha ohupyty umi mbaʼe porã Jehová omeʼẽva chupe ha ifamíliape, oreko rangue peteĩ traváho ojepaga porãvehápe. Tiémpo riremi haʼe ha hembireko ovyʼaiterei itajýra ypykue, orekóva 10 áño, omombeʼu haguére ohayhuetereiha chupekuéra, umi ermánope ha Jehovápe. Avei heʼi oñemeʼẽseha Jehovápe ha ojevautisa. Oiméne ko mitãkuña ohechakuaa itúva omotenonde memeha Ñandejárape, ha upéva opokoiterei hese.

Redesidi porãramo revyʼáta Jehová siervokuéra apytépe (Ehecha párrafo 18)

18. ¿Mbaʼérepa iñimportantete káda día jadesidi Jehová oipotaháicha?

18 Moisés oisãmbyhy vaʼekue umi isrraelítape pe desiértore, upéicha avei Jesucristo heta tiémporema oipytyvõ Ñandejára siervokuérape oikokuaa hag̃ua Satanás múndope. Avei ohundi potaitéma ko múndo aña omoinge hag̃ua Jehová puévlope pe múndo pyahúpe oĩtahápe tekojoja, ojapo haguéicha Josué omoingérõ guare umi isrraelítape pe Yvy Oñepromete vaʼekuépe (2 Ped. 3:13). Ani jajevy ha ñapensa yma guaréicha, ni jasegi jey umi kostúmbre jaheja vaʼekue ha jaiko jahupytyse umi mbaʼe naiporãiva. Upéva rangue ñañehaʼã vaʼerã ñantende porã mbaʼéichapa Jehová oipota jaiko (Rom. 12:2; 2 Cor. 13:5). Upéicharõ, jahechaukákena umi mbaʼe jadesidívare káda día ñamereseha jahupyty umi mbaʼe porã Jehová omeʼẽva opa ára g̃uarã (elee Hebreos 10:38, 39).

^ párr. 7 Heta avei omondo ifamíliape hetãme ijavuelokuéra ojechauka hag̃ua pe mitã reheve ihénte ha iñamigokuérape.