Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Agosto de 2013

Mbaʼeichagua persóna vaʼerãpa ñande

Mbaʼeichagua persóna vaʼerãpa ñande

“Peñatendéke mbaʼeichagua persónapa peẽ: penderekomarangatu ha pemombaʼeguasu vaʼerã Ñandejárape pende pyʼaite guive.” (2 PED. 3:11, NM)

1, 2. ¿Mbaʼeichagua persóna vaʼerãpa ñande Jehová ñandeguerohory hag̃ua?

KATUETE ningo ñandepyʼapy umi ótro heʼíva ñanderehe. Péro ñandéve g̃uarã iñimportanteve vaʼerã mbaʼépa Jehová opensa ñanderehe. Haʼe hína pe Mburuvicha Tuichavéva ha chugui “osẽ pe tekove ku y osẽháicha yvúgui” (Sal. 36:9, ÑÑB).

2 Apóstol Pedro heʼi vaʼekue “mbaʼeichagua persónapa” oipota Jehová oiko ñandehegui: “Penderekomarangatu ha pemombaʼeguasu vaʼerã Ñandejárape pende pyʼaite guive” (elee 2 Pedro 3:11). Ikatu hag̃uáicha Ñandejára ñandeguerohory, ñanepotĩ vaʼerã opa mbaʼépe, tahaʼe ñapensávape, jajapóvape ha jaadorávo chupe. Avei tekotevẽ jahechauka ‘ñamombaʼeguasuha Ñandejárape ñande pyʼaite guive’ jarrespeta ha ñaneñeʼẽrendúvo chupe. Jahechaháicha, Jehová ñandeguerohory hag̃ua nodependéi umi mbaʼe jajapóvarente, síno haʼe ohecha mbaʼeichagua persónapa ñande. Ñandejára ningo ‘oipyguara opavave pyʼapy’ ha oikuaa oimépa ñanderekomarangatu ha jajapópa ikatúva guive jaservi hag̃ua chupe (1 Crón. 29:17).

3. ¿Mbaʼépa tekotevẽ ñañeporandu?

3 Satanás ndoipotái ñañehaʼã jajapo Jehovápe ogustáva. Haʼe ni ndahesapirĩri ijapu ha ñanembotavy hag̃ua, ojapo voi opa ikatúva ñanemomombyry hag̃ua chugui (Juan 8:44; 2 Cor. 11:13-15). Upévare tekotevẽterei ñañeporandu: “¿Mbaʼéichapa Satanás chembotavyse? ¿Mbaʼépa ajapo vaʼerã ani hag̃ua añemomombyry Jehovágui?”.

¿MBAʼÉICHAPA SATANÁS ÑANEMBOTAVYSE?

4. ¿Mbaʼépa ojapo Satanás oipotágui jaheja Jehovápe?

4 Santiago ohai vaʼekue: “Káda uno ñañemoñuhã, jahejávo umi mbaʼe jajaposéva ñandestira ha  ñanembotavy”. Upe rire heʼive: “Umi mbaʼe jajaposéva oñembohapóramo ñande pyʼapýpe, upéva omoheñói pekádo ha pe pekádo káusare ñamano” (Sant. 1:14, 15, NM). Satanás oipota jaheja Jehovápe, upearã oñehaʼã omoinge umi mbaʼe vai ñande pyʼapýpe, oikuaágui upe rire ikatuha ñandegusta.

5, 6. a) ¿Mbaʼéichapa Satanás oñehaʼã omoinge umi mbaʼe vai ñande pyʼapýpe? b) ¿Mbaʼe ñuhãpa oiporu Satanás omoinge hag̃ua ñane korasõme umi mbaʼe vai, ha ikatúpa jaʼe oiporukuaaha umíva?

5 ¿Mbaʼéichapa Satanás oñehaʼã omoinge umi mbaʼe vai ñande pyʼapýpe? La Biblia heʼi: “Ko múndo kompletoite oĩ pe aña poguýpe” (1 Juan 5:19, NM). Satanás oiporu “umi mbaʼe oĩva [ko múndope]” ñanemoñuhã hag̃ua (elee 1 Juan 2:15, 16). Pe Aña ningo ymaiterei guivéma oprepara ko múndo ikatu hag̃uáicha ñanemoñuhã. Upévare ñañatende porã vaʼerã ani hag̃ua ñanembotavy (Juan 17:15).

6 Satanás oiporu heta ñuhã omoinge hag̃ua ñande pyʼapýpe umi mbaʼe vai. Apóstol Juan ohechakuaa mbohapy mbaʼe oiporúva: 1) “ñande rete rembipota vai”, 2) “ñande resa oipotáva”, ha 3) “jaiko jajechaukase umi mbaʼe jarekóvare”. Satanás oiporupaite vaʼekue koʼã mbaʼe omoñuhã hag̃ua Jesúspe pe desiértope. Haʼe hetaiterei áñoma omoñuhã hague umi héntepe, upévare koʼã árape ivakeanoitereíma oporoity hag̃ua. Hiʼarive oikuaa moõpa ñanekangy ha oiporu umi ñuhã ou porãvétava chupe. Jahechamína mbaʼéichapa omoñuhã Évape ha mbaʼéichapa oityse Ñandejára raʼýpe, ha avei mbaʼépa mokõivéva odesidi. Upe rire jahecháta mbaʼépa ikatu jajapo ani hag̃ua jaʼa iñuhãme.

“ÑANDE RETE REMBIPOTA VAI”

Eva oheja ‘hete rembipota vai’ ipuʼaka hese (Ehecha párrafo 7)

7. ¿Mbaʼéichapa Satanás oiporu Eva “rete rembipota vai” omoñuhã hag̃ua chupe?

7 Opavave ningo jakaru vaʼerã jaikove hag̃ua. Upévare voi Ñandejára ojapo ko Yvy ikatu hag̃uáicha omeʼẽ ñandéve heta hiʼupy. Satanás oikuaa ñande jakaru vaʼerãha, ha ikatu ojevale upévare jajapo hag̃ua Jehovápe ndogustáiva. Jahechamína mbaʼéichapa omoñuhã vaʼekue Évape (elee Génesis 3:1-6). Satanás heʼi vaʼekue Évape ikatuha hoʼu pe yva “oikuaaukáva mbaʼe porã ha mbaʼe vai” ha nomanomoʼãiha. Hiʼarive heʼi chupe hoʼúramo pe yva ojoguataha Ñandejárape (Gén. 2:9, ÑÑB). Péicha Satanás ontendeka Évape natekotevẽiha iñeʼẽrendu Jehovápe oikove hag̃ua. ¡Ajépa ijapuete! ¿Mbaʼépa ojapo Eva? Haʼe ikatu kuri omboykete Satanás heʼíva, ỹrõ osegi opensa hese ha opena hete rembipotáre. Oĩramo jepe hetaiterei yvyramáta pe hardínpe, Eva ndoipeʼái iñakãgui Satanás heʼi vaʼekue pe yvyramáta oĩvare pe hardín mbytépe.  ¿Mbaʼépa oiko upe rire? Eva “oipoʼo hiʼa ha hoʼu”. Satanás omoinge Eva pyʼapýpe peteĩ mbaʼe Ñandejára oproivíva.

Jesús oikuaa porã mbaʼépa iñimportanteve (Ehecha párrafo 8)

8. ¿Mbaʼéichapa Satanás oiporu Jesús “rete rembipota” ha mbaʼérepa nosẽporãi chupe ko ñuhã?

8 Satanás oiporu jey pe ñuhã oity hag̃ua Jesúspe pe desiértope. Ojapóma kuri 40 día ha 40 nóche Jesús ndokaruvéi hague, ha Satanás oikuaa porã iñembyahyietereimaha, upémarõ heʼi chupe: “Ndéramo añete Ñandejára raʼy, ejapóna pan ko itágui” (Luc. 4:1-3, NM). ¿Mbaʼépa ojapo Jesús? Haʼe ikatu kuri ojapo peteĩ milágro ani hag̃ua iñembyahyive, ỹrõ omboykete Satanás heʼíva. Jesús oikuaa porã ndovaleiha oiporu ipodér ijupe g̃uarãnte. Iñembyahyietereírõ jepe, oñehaʼãmbaite ani hag̃ua ojapo peteĩ mbaʼe Jehovápe ndogustáiva. Upévare heʼi: “Ñandejára Ñeʼẽme ojehai: ‘Yvypóra noikotevẽi pan rehe añónte oikove hag̃ua, oikotevẽ guei opaite mbaʼe Jehová heʼívare’” (Mat. 4:4, NM).

“ÑANDE RESA OIPOTÁVA”

9. ¿Mbaʼépa heʼise “ñande resa oipotáva”, ha mbaʼéichapa Satanás oiporu upéva oity hag̃ua Évape?

9 Apóstol Juan imanduʼa avei ótro ñuhãre: “ñande resa oipotáva”. Upéva heʼise ikatuha jaipota peteĩ mbaʼe ñamaña haguénte hese. Satanás oiporu vaʼekue ko ñuhã oity hag̃ua Évape. Haʼe heʼi chupe: “Peʼúramo pe yva pejesapeʼáta”. ‘Pe kuña omaʼẽvo pe yváre, ojuhu iporãha’ ha koʼýte oipotave.

10. ¿Mbaʼéichapa Satanás omoñuhãse avei Jesúspe, ha mbaʼépa ojapo Jesús?

10 ¿Mbaʼéichapa Satanás oiporu ko ñuhã Jesús rehe? “Peteĩ tesapirĩme ohechaukapaite chupe umi goviérno oĩva ko yvy ape ári. Ha pe Aña heʼi chupe: ‘Amoĩta nde poguýpe opa koʼã goviérno ha umi mbaʼe porãita orekóva.’” (Luc. 4:5, 6, NM.) Jesús ningo ndohechái opa koʼã goviérno hesa teérupi, síno Satanás ohechauka chupe peteĩ visión rupive oimoʼãgui Jesús oipotataha koʼã mbaʼe ohecha haguénte. Upévare Satanás heʼi: “Una vemi jepe chemombaʼeguasúramo, ameʼẽmbaitéta ndéve” (Luc. 4:7, NM). Jahechaháicha Satanás oipota Jesús oadora chupe, péro haʼe ndahaʼéi upeichagua persóna, upévare heʼi Satanáspe: “Ñandejára Ñeʼẽme ojehai: ‘Ñandejára Jehovápe readora vaʼerã ha chupe añoite reservi vaʼerã’” (Lucas 4:8, NM).

“JAIKO JAJECHAUKASE UMI MBAʼE JAREKÓVARE”

11. ¿Mbaʼéichapa Satanás ombotavy Évape?

11 Juan heʼi vaʼekue avei ikatuha “jaiko jajechaukase umi mbaʼe jarekóvare”. Adán ha Évante oikórõ guare ko yvy ape ári, ndaikatúi vaʼekue ‘ojechauka umi mbaʼe orekóvare’ ndaipórigui ambue  yvypóra. Upéicharõ jepe haʼekuéra ohechauka oñemombaʼeguasuha. Satanás oipyʼaraʼãrõ guare Évape ontendeka chupe Jehová ojopyetereiha hendivekuéra ha ndohejaiha ojapo heta mbaʼe. Heʼi chupe hoʼuha ára guive pe yva ‘pe yvyramáta oikuaaukávagui mbaʼe porã ha mbaʼe vai’ ‘oikotaha hikuái Ñandejáraicha, oikuaáta mbaʼe porã ha ivaíva’ (Gén. 2:17; 3:5, ÑÑB). Péicha Satanás ontendeka Évape ikatuha ojei Jehová poguýgui. Amalisia Eva oguerovia upe japu naiñumíldei rupi, ha hoʼu pe yva oimoʼãgui nomanomoʼãiha. ¡Ajépa tuichaite ojavy!

12. ¿Mbaʼéichapa avei Satanás oipyʼaraʼã Jesúspe, ha mbaʼépa ojapo Jesús?

12 Jesús ohechauka vaʼekue iñumildeha ha upéicha omoĩ peteĩ ehémplo iporãva, ndojoguaiete voi Évape. Satanás omboliga Jesúspe ojapo hag̃ua avei peteĩ mbaʼe opavavénte ohecharamótava, oikuaágui upéicha Jehová ipochytaha Itaʼýrandi. Péro Jesús oikuaa porã ojapóramo upéva ohechaukataha oñemombaʼeguasuha. Upévare ni ndojeréi heʼi hag̃ua: “Ñandejára Ñeʼẽme ojehai avei: ‘Ndovaléi rejapo mbaʼeve redesafia hag̃ua nde Jára Jehovápe’” (elee Lucas 4:9-12).

¿MBAʼÉPA JAJAPO VAʼERÃ ANI HAG̃UA ÑAÑEMOMOMBYRY JEHOVÁGUI?

13, 14. ¿Mbaʼéichapa Satanás ñanemoñuhãse koʼág̃arupi?

13 Ñane tiémpope, Satanás oiporu avei umi ñuhã oiporu vaʼekue Eva ha Jesús rehe. Por ehémplo oiporu “ñande rete rembipota” oipotágui ñanderekovai, jakaru rasa ha jaʼu rasa vevída. Avei oiporu “ñande resa oipotáva”, por ehémplo pe pornografía oĩvéva Internétpe, ikatu hag̃uáicha ñandereity nañañatendeporãiramo. Satanás oipota avei ñañemombaʼeguasu ha ‘jajechauka umi mbaʼe jarekóvare’, upévare ojapo ikatúva guive ñapensa hag̃ua ñaneimportanteveha ótrogui, jarekose hag̃ua autorida ha ñañehaʼãmbaite hag̃ua ñandepláta heta.

¿Mbaʼe téxtopa ñanepytyvõta jajecha jave koʼã situasiónpe? (Ehecha párrafo 13 ha 14)

14 “Umi mbaʼe oĩva ko múndope” ikatu ñambojoja umi karnáda oiporúvare peteĩ peskadór. Añetehápe umi pira hoʼuseterei upe karnáda, péro ndoikuaái asy oĩha peteĩ pindáre. Satanás oiporu avei umi mbaʼe heta hénte opensáva ñaikotevẽha jaikove hag̃ua ha ñanemboliga jajapo hag̃ua umi mbaʼe Jehovápe ndogustáiva. Koʼã ñuhã ndojekuaaguasúi ha ojejapo ñandestira hag̃uáicha ha péicha ñamoinge ñandepyʼapýpe umi mbaʼe kyʼa. Satanás  oipota ñapensa iñimportanteveha jareko umi mbaʼe ñaikotevẽva térã heta komodida ñaneñeʼẽrendu rangue Jehovápe. ¿Jaʼátapa upe ñuhãme?

15. ¿Mbaʼéichapa Jesús ehémplo ñanepytyvõ ñambohovái porã hag̃ua umi tentasión?

15 Satanás omoñuhã vaʼekue Évape, péro Jesús rehe ndaipuʼakái. Jesús oñeʼẽvo Ñandejára Ñeʼẽre, heʼími: “Ñandejára Ñeʼẽme ojehai”. Ñande avei pyʼỹinte jastudia porãramo la Biblia ha jaikuaa porã umi mbaʼe oĩva pype, ikatúta ñanemanduʼa umi téxto ñanepytyvõtavare ñambohovái porã hag̃ua umi tentasión (Sal. 1:1, 2). Avei jajepyʼamongetáramo Ñandejára siervokuéra yma guarére ikatúta ñahaʼanga chupekuéra (Rom. 15:4). Tekotevẽ jarrespeta Jehovápe ñande pyʼaite guive, jahayhu haʼe ohayhúva ha ndajachaʼéi umi mbaʼe haʼe ndaijaʼéivare, upéicha ñañeñangarekóta heta mbaʼe vaígui (Sal. 97:10).

16, 17. ¿Mbaʼéichapa umi mbaʼe ñapensáva ohechauka mbaʼeichagua persónapa ñande?

16 Apóstol Pablo ñanemokyreʼỹ ‘jaiporu hag̃ua ñane arandu’, térã ñane akã, ani hag̃ua ñapensa ko múndope oñepensaháicha, síno Ñandejáraicha (Rom. 12:1, 2, NM). Pablo ohechakuaa iñimportanteha ñakontrola ñapensáva ha heʼi: “Roity yvýre umi pensamiénto japu ha opa mbaʼe ijyvatéva ha ojokóva umi héntepe oikuaa hag̃ua Ñandejárape; entéro pensamiénto roguereko ore poguýpe peteĩ présoicha, ikatu hag̃uáicha iñeʼẽrendu Crístope” (2 Cor. 10:5, NM). Umi mbaʼe ñapensáva heta vése ohechauka mbaʼeichagua persónapa ñande, upévare ñapensa meme vaʼerã iporãvare (Filip. 4:8).

17 Reiete ningo ñañehaʼãta ñanderekomarangatu jaikóramo ñapensa meme ivaívare ha jajapose. Jehová oipota jahayhu chupe “korasõ [...] potĩ” reheve (1 Tim. 1:5, NM). Péro ani ñanderesarái ñane korasõ itraisioneroha, ha sapyʼánte ndajahechakuaái “umi mbaʼe oĩva ko múndope” ikatuha ñandegueraha vai (Jer. 17:9). Iñimportánte jasegi Pablo konsého: “Pesegíkena pejesareko pendejehe pehecha hag̃ua peñakarama hatãpa pende jeroviáre. Pehechauka memékena mbaʼeichagua persónapa peẽ”. Jastudiávo la Biblia iporã ñañeporandu: “¿Oguerohorýpa Ñandejára umi mbaʼe apensáva ha aipotáva?” (2 Cor. 13:5, NM).

18, 19. ¿Mbaʼérepa ñañehaʼãmbaite vaʼerã oiko hag̃ua ñandehegui peteĩ persóna Jehová oguerohorýva?

18 ¿Mbaʼépa ñanepytyvõta avei ñamboyke hag̃ua “umi mbaʼe oĩva ko múndope”? Jajepyʼamongeta vaʼerã apóstol Juan heʼi vaʼekuére: “Ko múndo ha umi mbaʼe oipotáva, ohasa ohóvo; péro pe ojapóva Ñandejára rembipota opyta opa ára g̃uarã” (1 Juan 2:17, NM). Ko múndo Satanás oprepara vaʼekue haʼete iporã ha hiʼarétava, péro peichaháguinte og̃uahẽta pe ára oñehunditaha. Aníkena jaheja ñanembotavy, umi mbaʼe oĩva ko múndope ndohopukumoʼãi.

19 Apóstol Pedro ñanemokyreʼỹ jaiko hag̃ua Ñandejára oipotaháicha. Haʼe heʼi: “Akóinteke penemanduʼa ha pehaʼarõ Jehová ára. Upe aja ningo umi yvága oñehundíta tatarendýpe, ha umi mbaʼe oĩva yvága ha yvýpe hykupaitéta pe tata akúpe” (2 Ped. 3:12, NM). Koʼẽrõitéma Jehová ohundíta ko múndo aña. Péro oiko mboyve upéva, Satanás osegíta oiporu “umi mbaʼe oĩva ko múndope” oiporu haguéicha Eva ha Jesús rehe. Aníkena jajogua Évape ha ñapensa ñandejehénte. Upéicha jajapóramo jahechaukáta Satanás haʼeha ñande diós. Upéva rangue jasegi vaʼerã Jesús ehémplo ha ñamboyke umi tentasión, ñandestiráramo jepe. Ñañehaʼãmbaitékena ikatu hag̃uáicha oiko ñandehegui peteĩ persóna Jehová oguerohorýva.