Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Agosto de 2013

Jehová “káda día ohupi ijapére [che] mbaʼepohýi”

Jehová “káda día ohupi ijapére [che] mbaʼepohýi”

Che ningo nacheresãi ha heta mbaʼe ijetuʼu chéve, upéicharõ jepe haʼekuaa Jehová, ñande Ru ñanderayhuetéva akóinte chepytyvõha. Ojapóma 20 áño rasa ajagarra hague che prekursorádo ha ahupytýma heta mbaʼe porã chembovyʼaitereíva.

Anase áño 1956-pe. Péro anase mboyve, che kolúmna vertevrál noñembotypái ha upévare che nérvio sentrál ndopytaporãi (espina bífida). Upéicha rupi ndaikatúi aguata porã ha areko heta ótro mbaʼasy.

Anase mboyve, che tuvakuéra oñepyrũ vaʼekue ostudia la Biblia peteĩ matrimónio misionéro ndive. Chemitãme saʼi oĩ maranduhára Usákospe (Namibia), pe táva anase hague, upévare upe tiémpope rojapo jepi umi rreunión ore família ndive añónte. Arekórõ guare 7 áño ajopera ha oñembokua chéve che rye ikatu hag̃uáicha osẽ upérupi che ty (urostomía), ha arekópe 14 áño añepyrũ cheatáke mante. Pe koléhio ningo mombyry ógagui, ha nacheresãiri haguére aikotevẽ che tuvakuéra oñangareko meme cherehe, upévare ndaikatúi vaʼekue ni amohuʼã che estúdio.

Upéicharõ jepe, adesidi amombarete che jerovia. Upe tiémpope ndaipóri gueteri ñane puvlikasionkuéra afrikáanspe, pe idióma roñeʼẽva ógape, upémarõ aaprende inglés ikatu hag̃uáicha astudia. Arekórõ guare 19 áño oiko chehegui maranduhára ha ajevautisa. Upe rire, cuatro áñore heta cherasy ha aju ndavyʼavéi. Hiʼarive pe lugár roikohápe rojokuaapa ore vesínondi, upévare ijetuʼu chéve asẽ meme apredika atĩgui chuguikuéra.

Arekórõ guare 20 áño rasami, rova Sudáfricape, ha upépe añerreuni ypy peteĩ kongregasiónpe. Avyʼaiterei ningo, péro upe riremínte tekotevẽ jeýma ajopera. Oñembokua jey chéve che rye yképe ikatu hag̃uáicha aha de kuérpo (colostomía).

Tiémpo rire ahendu peteĩ diskúrso opokoitereíva che korasõre. Ojapo peteĩ superintendénte de sirkuíto ha oñeʼẽ pe prekursorádo rehe. Che ningo aikuaa porã nacheresãiriha, péro añandúma heta vése mbaʼéichapa Jehová chepytyvõ ahasa jave umi mbaʼe ipohyivéva. Upémarõ amyenyhẽ pe solisitu ajapo hag̃ua prekursorádo rregulár. Péro umi ansiáno oikuaa che situasión, upévare ñepyrũrã ndohejái ajapo.

Upéicharõ jepe, adesidi ajapo opa ikatúva predikasiónpe. Che sy ha ambue ermanokuéra kongregasiongua chepytyvõ rupi, seis mésere ahupyty umi óra tekotevẽva ojapo umi prekursór rregulár. Upéicha ahechauka aserviseha prekursóraramo ha che mbaʼasy jepe ndachejokoiha. Upéi amyenyhẽ jey pe solisitu ha upépe umi ansiáno cheaseptáma. Añepyrũ ajapo che prekursorádo 1 de septiembre de 1988.

Upe guive ahecha meme Jehová oñangarekoha cherehe. Amboʼe rupi la Biblia ambue tapichápe, napensaguasúi umi mbaʼe ndaikatúivare ahupyty. Upéva rangue, añandu chepytyvõ ha chemoag̃uiveha Jehováre. ¡Hetáma avyʼa ahechávo umi ambostudia vaʼekue ojevautisa ha oservi memeha Jehovápe!

Koʼág̃a peve cherasyháre aiko, péro añandu Jehová ‘káda día ohupiha ijapére che mbaʼepohýi’ (Sal. 68:19, NM). Haʼe chemombarete ambohovái hag̃ua umi mbaʼe ijetuʼúva ha avei hetáma chevendesi.