Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Agosto de 2013

Eliseo ohecha heta kárro hendypáva. ¿Rehechápa nde avei umíva?

Eliseo ohecha heta kárro hendypáva. ¿Rehechápa nde avei umíva?

Pe rréi Siriagua ojukase Ñandejára proféta Eliséope ha opersegi chupe Dotán peve, peteĩ táva imurallapáva opytáva peteĩ sérro ári. Pyhare aja, pe rréi omondo ijehérsito heta kavaju ha kárro de gérra reheve Dotánpe. Pyharevérõ g̃uarã omongorapaitéma hikuái pe táva (2 Rey. 6:13, 14).

Eliseo rembiguái opuʼãvo, ohecha upéva ha tuichaiterei oñemondýi, upévare osẽ heʼi: “Mboʼehára, ¿mbaʼépa jajapóta?”. Eliseo ombohovái chupe: “Ani rekyhyje, hetave hína umi oĩva ñanendive, hendivekuéra oĩvagui”. Upéi oñepyrũ oñemboʼe: “Che Jára, ehesapeʼána chupe tohechami”. La Biblia heʼi ‘Ñandejára ohesapeʼa hague pe tembiguáipe, ha haʼe ohecha pe [sérro] henyhẽha kavaju ha kárro [hendypávagui] Eliseo jerére’ (2 Rey. 6:15-17). ¿Mbaʼépa ikatu ñaaprende Eliseo ohasa vaʼekuégui?

Eliseo ndokyhyjéi umi soldádo síriogui ojerovia rupi Jehováre ha ohechágui orekoha podér osalva hag̃ua chupe. Ñane tiémpope, nañahaʼarõi milágro Jehovágui, péro jaikuaa porã haʼe oñangarekoha ipuévlo rehe. Haʼete ku oĩva “kavaju ha kárro” hendypáva ñande jerére. ¿Jahechaukápa jajeroviaha Jehováre ku jahecharamoguáicha koʼã mbaʼe ha jaguerovia ñande pyʼaite guive haʼe ñandesalvataha? Upéicharõ ni mbaʼevéicharõ ndajakyhyjemoʼãi ha jahecháta Ñandejára ñanevendesiha (Sal. 4:8). Jahechamína koʼág̃a mbaʼépa ikatu ñaaprende ambue mbaʼe Eliseo ohasa vaʼekuégui.

ELISÉOPE OÑEMEʼẼ HEMBIAPORÃ

Peteĩ jey, Eliseo oara jave kokuépe, ou pe proféta Elías ha oity hiʼári ijao joʼaha oiporúva umi proféta. Eliseo oikuaa porã mbaʼépa heʼise upéva, upémarõ ojapo peteĩ karuguasu ojedespedi hag̃ua ituvakuéragui ha upe rire oho oservi Elíaspe hembiguáiramo (1 Rey. 19:16, 19-21). Eliseo ningo ndaipyʼamokõiva ha oñemeʼẽmbaite oservi hag̃ua Ñandejárape ipyʼaite guive. Upévare Jehová oiporu meme chupe ojapo hag̃ua hembipota, ha tiémpo rire, oiko chugui pe proféta opytáva Elías rendaguépe.

Amalisia Eliseo oservi Elíaspe seis áño rupi ‘hembiguáiramo’. Umi áñope haʼe vaʼekue pe oñohẽva y  Elías pópe (2 Rey. 3:11, ÑÑB). ¿Mbaʼépa heʼise upéva? Upe tiémpope umi hénte okaru ipópente, ndoiporúi tembiporu. Upévare ojekarupa rire, pe tembiguái oñohẽ vaʼerã y ipatrón pópe ojepohéi hag̃ua. Jahechaháicha, umi traváho Eliseo ojapóva apytépe oĩ umi haʼetéva naiñimportanteguasúiva. Upéicharõ jepe, chupe g̃uarã umíva tuichaiterei mbaʼe.

Koʼág̃arupi, heta kristiáno oservi de tiémpo kompléto heta hendáicha. Péicha ohechauka ojerovia mbarete ha oñehaʼãha ojapo opa ikatúva Jehovápe g̃uarã. Por ehémplo, oĩ umi ermáno ováva mombyry ihénte ha iñamigokuéragui ombaʼapo hag̃ua Betélpe térã grúpo de konstruksiónpe. Upérupi ojapo hikuái umi tembiapo hetápe g̃uarã haʼetéva traváho naiñimportanteguasúiva, térã oapoʼíva umi ombaʼapóvape. Upéicharõ jepe, haʼekuéra ohechakuaa koʼã traváho iñimportanteha, hiʼarive Jehová omombaʼeterei. ¡Ajépa ñande jaguerohory vaʼerã avei koʼã tembiapo! (Heb. 6:10.)

ELISEO NDOHEJAREÍRI VAʼEKUE HEMBIAPO

Jehová ogueraha mboyve Elíaspe “yvágape peteĩ yvytu ratãme”, omondo chupe Guilgálgui táva Betélpe. Elías ningo ndoipotái kuri Eliseo omoirũ chupe. Upéicharõ jepe, Eliseo heʼi: “Haʼe ndéve ndorohejamoʼãiha neño”. Ha upéi tapérema oho jave hikuái, Elías heʼi jey dos vése Eliséope ohejánte hag̃ua chupe (2 Rey. 2:1-6). Péro haʼe osegi hendive. Odesidi akóinte omoirũtaha Elíaspe, ojapo haguéicha Rut ndohejáirõ guare Noemípe (Rut 1:8, 16, 17). Jahechaháicha, Eliseo omombaʼeterei pe priviléhio Jehová omeʼẽ vaʼekue chupe oservi hag̃ua proféta Elíaspe.

¿Mbaʼéichapa ñande ikatu ñahaʼanga Eliséope? Oñemeʼẽ vove ñandéve peteĩ priviléhio Ñandejára organisasiónpe, ñamombaʼe vaʼerã ha ani ñanderesarái tuichaiterei mbaʼeha ikatu haguére jaservi Jehovápe (Sal. 65:4; 84:10).

“¿MBAʼÉPA REIPOTA AJAPO NDEREHE?”

Tapére Elías heʼi Eliséope: “¿Mbaʼépa reipota ajapo nderehe ajereraha mboyve nde ypýgui?”. Ojapo haguéicha Salomón, Eliseo ndojeruréi mbaʼeta, síno peteĩ mbaʼe oipytyvõtava chupe oservi porãve hag̃ua Jehovápe. Heʼi pe profétape: “Aipota remeʼẽ chéve mokõi [párte] nde espíritu” (1 Rey. 3:5, 9; 2 Rey. 2:9). ¿Mbaʼépa añetehápe pe ojeruréva? Israélpe, pe túva ombojaʼo jave pe erénsia itaʼyrakuérape, omeʼẽ vaʼerã el dóvle itaʼýra ypykuépe (Deut. 21:15-17). Upéicharõ jahecha Eliseo ojerure hague Elíaspe opyta hag̃ua ijeredéroramo. Oiméne haʼe ‘hakateʼỹeterei’ avei Jehováre ha ombaʼapo kyreʼỹse avei Elías ojapo haguéicha (1 Rey. 19:13, 14, ÑÑB).

Upémarõ Elías ombohovái chupe: “Namichĩri pe rejeruréva. Cherecháramo ajererahávo ndehegui, rerekóta; [ndacherecháiramo] noñemeʼẽmoʼãi ndéve” (2 Rey. 2:10). Amalisia Elías ombohováiva ohechauka mokõi mbaʼe: primero, Jehová añoite ikatuha omeʼẽ pe ojeruréva; ha segundo, Eliseo omoirũ vaʼerãha chupe ipahaite peve oipotáramo pe ojeruréva.

PE VISIÓN ELISEO OHECHA VAʼEKUE

¿Mbaʼépa Jehová opensa Eliseo ojerurévare? La Biblia omombeʼu mbaʼépa oiko upéi: “Haʼekuéra oguata ha oñeʼẽ aja oñondive, upeichaháguinte ou sapyʼa peteĩ kárro [hendýva], kavaju [hendýva] reheve avei, oipeʼáva chupekuéra ojuehegui ha Elías ojehupi yvágape peteĩ yvytu ratãme”. Ha Eliseo ohecha upéva. * Upéicharõ jahecha Jehová omeʼẽ hague chupe pe ojeruréva. Eliseo ohecha Elías ohóvo, oñemeʼẽ chupe dos párte ijespíritugui ha opyta profétaramo Elías rekovia (2 Rey. 2:11-14).

Eliseo ojagarra Elías ao joʼaha ha omonde. Péicha opavave ohechakuaáta haʼeha Ñandejára proféta. Ha Jehová oasepta chupe. ¿Mbaʼéicha rupípa jaikuaa upéva? Eliseo ojapo rupi peteĩ milágro ombojaʼórõ guare pe rrío Jordán.

Oiméne Eliseo ipirĩmba ohechárõ guare pe kárro ha umi kavaju hendypáva Elías ojeguerahávo pe yvytu atãme. Koʼã mbaʼe ningo ndoikóiva jepi. Péro upéicha ojekuaa Jehová omeʼẽha chupe umi mbaʼe ojerure vaʼekue. Koʼág̃arupi, Jehová nombohovái ñane ñemboʼe ohechaukávo ñandéve koʼãichagua visión, péro ñande ikatu jahechakuaa haʼe orekoha tuicha podér ojapo hag̃ua hembipota. Jahechávo mbaʼéichapa ovendesi iñorganisasión ko yvy arigua, ñanepytyvõ ‘jahechakuaa’ hag̃ua mbaʼéichapa osegi oñemomýi ikárro yvagaygua (Ezeq. 10:9-13).

 Eliseo ohasa heta mbaʼe ohechaukáva chupe Jehová orekoha tuicha podér. Jehová espíritu rupive, ojapo 16 milágro, dos vése hetave umi Elías ojapo vaʼekuégui. * Eliseo ohecha jey vaʼekue umi kárro de gérra ha kavaju hendypáva táva Dotánpe, umi sírio ojukasérõ guare chupe, oñemombeʼu haguéicha iñepyrũme.

ELISEO OJEROVIA MBARETE JEHOVÁRE

Proféta Eliseo ndojepyʼapýi ohechávo umi enemígo omongoraha chupekuéra Dotánpe. ¿Mbaʼépa oipytyvõ chupe? Haʼe ningo yma guivéma omombaretéma oikóvo ijerovia Jehováre. Ñande avei tekotevẽ jajerovia haʼe ojerovia haguéicha. Upévare, jajerurékena Jehovápe tomeʼẽ ñandéve ijespíritu sánto jajerovia mbarete ha jahechauka hag̃ua ambue mbaʼe porã oúva pe espíritugui (Luc. 11:13; Gál. 5:22, 23).

Umi mbaʼe Eliseo ohecha vaʼekue táva Dotánpe oipytyvõvéntema chupe ojerovia hag̃ua Jehová ha hiʼanhelkuéra oñangarekotaha hese. Pe proféta ohecha Ñandejára orekoha hetaiterei ánhel omongoráva pe táva ha umi enemígope avei. Upérõ guare Eliseo ha hembiguái ojesalva Jehová onsiega rupi umi enemígope (2 Rey. 6:17-23). Ohasávo ko situasión ijetuʼuetéva, ohechauka ojerovia mbareteha Jehováre ipyʼaite guive, ojapóma haguéicha ymave.

Jajeroviákena Jehováre Eliseo ojapo haguéicha (Prov. 3:5, 6). Péicha “Ñandejára ñandeguerohorýta ha ñanevendesíta” (Sal. 67:1, NM). Ndajahecháiramo jepe kárro ni kavaju hendypáva ñande jerére, Jehová oñangareko ipuévlore koʼág̃a ha ojapóta avei upéva pe “jehasa asy guasu” aja (Mat. 24:21, NM; Rev. 7:9, 14). Og̃uahẽ meve upe tiémpo, ñanemanduʼákena akóinte Jehová ‘oñangarekoha ñanderehe ha ñanemoʼãha’ (Sal. 62:8).

^ párr. 16 Elías ndohói vaʼekue yvágape oĩháme Jehová ha umi ánhel. Rejuhuvéta informasión La Atalaya 15 de septiembre de 1997, páhina 15-pe.

^ párr. 19 Ehecha La Atalaya 1 de agosto de 2005, páhina 10.