Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Agosto de 2013

Aníkena ‘ñandepochy Jehová ndive’

Aníkena ‘ñandepochy Jehová ndive’

“Pe ivýrova ombyai haperã, ha upéi ipochy Jehová ndive ipyʼapýpe.” (PROV. 19:3, NM)

1, 2. ¿Mbaʼérepa jaʼekuaa umi provléma oĩva ko múndope ndouiha Jehovágui? Emoĩ peteĩ ehémplo.

EPENSAMÍNA aréma remenda hague ha vyʼápe reikoha ne rembirekóndi. Péro peteĩ árape reju reg̃uahẽ ha retopa nde róga oĩha sarambikuépe. Ne muevlekuéra oñemopẽmba, umi tembiporu ojejokapa, pe alfómbra katu oñemondoropa. Pe nde rogami rehayhuetéva desástre retopa. ¿Erétapa repensa porãʼỹre: “Mbaʼére piko che rembireko ojapo péicha”? ¿Térãpa eréta: “Máva piko ojapo koʼã mbaʼe”? Nerembojamoʼãi asy ningo ne rembirekóre. ¿Mbaʼérepa? Nde reikuaa porã ne rembireko ni mbaʼevéicharõ ndojapomoʼãiha peichagua sarambi.

2 Koʼág̃arupi avei ñande Yvy oñembyaipa oĩ rupi kontaminasión ha umi hénte iñañaiterei ha hekovai. Jastudia rupi la Biblia jaikuaa porã koʼã provléma ndouiha Ñandejáragui. Haʼe ojapo vaʼekue ko Yvy oiko hag̃ua chugui peteĩ lugár neporãmba jepéva (Gén. 2:8, 15). Jehová ningo oporohayhueterei (1 Juan 4:8). Ñahesaʼỹijo rupi Ñandejára Ñeʼẽ jaikuaa mbaʼérepa añetehápe oĩ hetaite provléma ko yvy ape ári. Jahechakuaa Satanás haʼeha ko “múndo ruvicha” (Juan 14:30, NM; 2 Cor. 4:4).

3. ¿Mbaʼérepa sapyʼánte ikatu nañapensái hekoitépe?

3 Upéicharõ jepe, ndaikatúi ñamboja Satanás rehe opaite mbaʼe ñanembohasa asýva. ¿Mbaʼérepa? Sapyʼánte ñande voi jajavy ha upevakuére tuicha ñaneprovléma (elee Deuteronomio 32:4-6). Péro jaikuaáramo jepe koʼã mbaʼe, ñaneimperfékto rupi ikatu nañapensái hekoitépe ha ñañepyrũ jaha vai (Prov. 14:12). ¿Mbaʼérepa jaʼe upéva? Jajekulpa rangue ñande voi térã ñamboja Satanás rehe ñane provlemakuéra, ikatu ñañepyrũ jakulpa Ñandejárape ha ñandepochy voi hendive (Prov. 19:3).

4, 5. ¿Mbaʼéichapa peteĩ kristiáno ikatu oñepyrũ “ipochy Jehová ndive”?

 4 ¿Ikatu piko añetehápe ‘ñandepochy Jehová ndive’? Ajépa reiete jajapóta upéva (Is. 41:11). Peteĩ poéta heʼi: “Mbykyeterei ningo nde jyva reñemoĩ hag̃ua Ñandejárare”. Ikatu arakaʼeve ndajajekehái Jehovágui. Péro Proverbios 19:3 heʼi pe ivýrova ‘ombyaiha haperã, ha upéi ipochyha Jehová ndive ipyʼapýpe’. Jahechaháicha, peteĩ tapicha ikatu ipochy Ñandejára ndive ipyʼapýpe. Péro sapyʼánte ndajahechakuaái upéva. Por ehémplo, peteĩ ermáno ikatu ipyʼaro Jehovándi, ha upéicha rupi naiñeʼẽrendúi Ñandejára organisasiónpe térã oñemomombyry voi kongregasióngui.

5 ¿Mbaʼéichapa ikatu ñañepyrũ ‘ñandepochy Jehová ndive’? ¿Mbaʼéichapa ikatu jajehekýi ko ñuhãgui? Iñimportánte ñambohovái koʼã porandu ñanepytyvõkuaa rupi ñaime porã hag̃ua Jehovándi.

¿MBAʼÉICHAPA IKATU ÑAÑEPYRŨ ‘ÑANDEPOCHY JEHOVÁ NDIVE’?

6, 7. ¿Mbaʼérepa umi isrraelíta Moisés tiémpope guare oñepyrũ ojekeha Jehovágui?

6 ¿Mbaʼépa ikatu omomýi peteĩ kristiánope oñepyrũ hag̃ua ojekeha Ñandejáragui ipyʼapýpe? Ñahesaʼỹijóta cinco mbaʼe ikatúva ñandegueraha vai ha umi ehémplo oĩva la Bíbliape ohechaukáva mbaʼéichapa yma oĩ vaʼekue hoʼáva ko ñuhãme (1 Cor. 10:11, 12).

Umi ñeʼẽ noporomokyreʼỹiva ikatu ñanemokangy (Ehecha párrafo 7)

7 Umi ñeʼẽ noporomokyreʼỹiva ikatu ñanemokangy (elee Deuteronomio 1:26-28). Jehová oguenohẽ ramoite umi isrraelítape Egipto poguýgui. Ombou kuri umi 10 plága ha upe rire ohundi faraón ha ijehérsitope mar Rójope (Éx. 12:29-32, 51; 14:29-31; Sal. 136:15). Ñandejára puévlo oĩma oike hag̃uáicha pe Yvy Oñepromete vaʼekuépe. Péro upe jave umi isrraelíta oñepyrũ ojekeha Jehovágui. ¿Mbaʼépa ou omokangy ijerovia? Diez kuimbaʼe umi 12 oho vaʼekuégui ovichea pe yvy, omongyhyje chupekuéra (Núm. 14:1-4). ¿Mbaʼépa oiko upevakuére? Ndojehejái oike pe “yvy porãme” opavave isrraelítape oiko vaʼekue upérõ (Deut. 1:34, 35). Ha ñande, ¿jahejátapa ikangy ñande jerovia ojeʼe haguére ñandéve peteĩ mbaʼe noporomokyreʼỹiva? ¿Ñañepyrũtapa jajekeha Jehovágui ñandetrata lájare?

8. ¿Mbaʼérepa umi isrraelíta Isaías tiempopegua okulpa Jehovápe iprovlemakuérare?

8 Umi mbaʼe ipohýiva ha ijetuʼúva ikatu ñanemokangy (elee Isaías 8:21, 22). Isaías tiémpope umi Judagua ojecha peteĩ situasión ijetuʼuetereívape. Umi enemígo omongora chupekuéra. Pe hiʼupy ofaltapa ha oĩma iñembyahýiva. Hiʼarive oñemomombyry hikuái Jehovágui (Amós 8:11). Ojerure rangue Jehovápe oipytyvõ hag̃ua chupekuéra, ko tetã ‘ojahéi huvicha guasúre ha [Ñandejára] rehe’. Jahechaháicha, okulpa hikuái Jehovápe iprovlemakuérare. Ñande avei ñaiméramo peteĩ situasión ijetuʼuetereívape térã oikóramo ñanderehe ỹrõ ñane famíliare peteĩ mbaʼe ivaíva, ikatu hína jaʼa ko ñuhãme ha jaʼe ñande pyʼapýpe: “¿Mbaʼére piko Jehová nachepytyvõi raʼe aikotevẽve jave?”.

9. ¿Mbaʼérepa umi isrraelíta Ezequiel tiémpope guare oñepyrũ opensa vai Jehováre?

9 Ndajaikuaapái umi mbaʼe oikóva. Ezequiel tiémpope, umi isrraelíta opensa Jehová ‘ndahekojojaiha’ ndoikuaapái rupi hikuái umi mbaʼe oikóva (Ezeq. 18:29). Haʼete ku ohusgáva Jehovápe nontendéiramo jepe heta mbaʼe. Opensa voi hikuái oikuaaveha Ñandejáragui ha odesidi mbaʼépa oĩ porã ha mbaʼépa oĩ vai. Sapyʼánte hasy jepi ñantende hag̃ua peteĩ rreláto oĩva la Bíbliape, térã nañantendéi mbaʼérepa oiko ñanderehe heta mbaʼe.  Upéicha jave, ¿ñapensátapa Jehová rape noĩporãiha, térã haʼe ‘ndahekojojaiha’? (Job 35:2.)

10. ¿Mbaʼéichapa peteĩ tapicha ikatu osegi pe ehémplo vai Adán oheja vaʼekue?

10 Jakulpa Jehovápe jajavy ha japeka haguére. Adán, pe kuimbaʼe ypykue, okulpa vaʼekue Ñandejárape haʼe voi opeka haguére (Gén. 3:12). Haʼe ningo oikuaa porã kuri mbaʼépa oikóta hese opekáramo, upéicharõ jepe naiñeʼẽrendúi ha okulpa voi Jehovápe heʼívo omeʼẽ hague chupe peteĩ tembireko ndoikóiva. Upe guive hetaiterei hénte ojapo avei Adán ojapo vaʼekue, okulpa Ñandejárape haʼekuéra voi ojavy haguére. Upévare iporã ñañeporandu: “¿Ikatúpa hína aju aheka defékto Jehová mandátore añeñandu vai rupi ajavy haguére?”.

11. ¿Mbaʼépa ikatu ñaaprende Jonásgui?

11 Ñapensaiterei ñandejehe. Jehová oiporiahuvereko vaʼekue umi Niniveguápe ha operdona chupekuéra, péro Jonás ipochy upévare (Jon. 4:1-3). ¿Mbaʼérepa? Haʼe oprofetisa kuri Nínive oñehunditaha, ha oiméne ndopytavaiséi hapichakuéra renondépe ndoikói haguére heʼi vaʼekue. Oiporiahuvereko rangue umi ninivíta oñarrepenti vaʼekuépe, Jonáspe oipyʼapyve mbaʼépa umi hénte opensáta hese. Ha ñande, ¿jajepyʼapyetereítapa ñandejehe ha ñandepochy Jehovándi nohundíri haguére gueteri ko múndo aña? Oiméramo heta áñorema japredika Jehová ára hiʼag̃uimbaitemaha, ¿ñañepyrũtapa jajekeha Jehovágui oĩ jave oñeʼẽ vaíva ñanderehe jaikuaauka haguére la Biblia heʼíva? (2 Ped. 3:3, 4, 9.)

MBAʼÉPA JAJAPO VAʼERÃ ANI HAG̃UA ÑANDEPOCHY JEHOVÁRE

12, 13. ¿Mbaʼépa jajapo vaʼerã ani hag̃ua ñañepyrũ jaheka defékto Jehová ojapóvare?

12 ¿Mbaʼépa ikatu ñanepytyvõ ñañepyrũramo jahekase defékto Jehová ojapóvare? Ñanemanduʼa vaʼerã ñandevyroitereiha jajapóramo upéva. Pe traduksión ojapóva Sociedad Bíblica Paraguaya heʼi Proverbios 19:3-pe: “Ñande rekotavykue ñandereraha vai, upéi ñandepochyse Ñandejára  ndive”. Upévare, ñahesaʼỹijomína cinco mbaʼe ñanepytyvõtava ani hag̃ua jakulpa Jehovápe nosẽporãi jave ñandéve heta mbaʼe.

13 Jajapókena opa ikatúva ñaime porã hag̃ua Jehová ndive. Ñaime porãramo Ñandejára ndive, arakaʼeve nañandepochymoʼãi hendive. Upearã jajerovia vaʼerã hese ha ani ñapensa ñandevaletereiha ni ñaneimportantetereiha (Prov. 3:7; Ecl. 7:16). Upéicha ndajaikomoʼãi jakulpa Ñandejárape oikóramo ñanderehe peteĩ mbaʼe ivaíva.

14, 15. ¿Mbaʼépa ikatu jajapo ani hag̃ua oguapy ñanderehe umi ñeʼẽ noporomokyreʼỹiva?

14 Aníke reheja oguapy nderehe umi ñeʼẽ noporomokyreʼỹiva. Moisés tiémpope Jehová ohechauka vaʼekue umi isrraelítape ikatuha omoinge chupekuéra pe Yvy Oñepromete vaʼekuépe. Upévare haʼekuéra ikatu kuri ojerovia hese (Sal. 78:43-53). Péro ohendúvo umi 10 kuimbaʼe oguerúvape notísia vaínte, “naimanduʼái hikuái [Ñandejára po] mbarete rehe” (Sal. 78:42, ÑÑB). Jajepyʼamongetáramo Jehová rembiapokuére ha umi mbaʼe ojapóvare ñanderehehápe, katuete ñaĩ porãvéta hendive ha ndajahejamoʼãi umi ñeʼẽ noporomokyreʼỹiva ñanemomombyry chugui (Sal. 77:11, 12).

15 ¿Mbaʼépa ikatu oiko ñapensa vaíramo ñane ermanokuérare? Upéicharõ nañaimeporãmoʼãi avei Jehová ndive (1 Juan 4:20). Heta isrraelítape ndogustái vaʼekue ojeporavo haguére Aarónpe ni pe puésto oñemeʼẽva chupe, upémarõ oñepyrũ ojekeha hikuái. Péro Jehovápe g̃uarã haʼete ku hesete voi oñeñeʼẽ vaíva (Núm. 17:10). Upéicha avei, ñañepyrũramo jajeplagea ha jajekeha umi kuimbaʼe Jehová oiporúvagui omotenonde hag̃ua iñorganisasión ko yvy arigua, añetehápe jajekeha ñaína Jehovágui (Heb. 13:7, 17).

16, 17. ¿Mbaʼéguipa nañanderesaráiri vaʼerã ñaneprovléma jave?

16 Nemanduʼákena Jehová ndorekoiha la kúlpa neprovléma haguére. Umi isrraelíta Isaías tiémpope guare oñemomombyry Jehovágui, upéicharõ jepe haʼe akóinte oipytyvõse chupekuéra (Isa. 1:16-19). Tuicha ñandepyʼaguapy jaikuaávo Jehová oñeinteresaha avei ñanderehe ha ñanepytyvõseha tahaʼe haʼéva umi provléma jahasáva (1 Ped. 5:7). Ñandejára voi opromete ñandéve ñanemombaretetaha ikatu hag̃uáicha jasegi ñaaguanta (1 Cor. 10:13).

17 Jahasa asýramo Job ohasa asy haguéicha, ani ñanderesarái Jehová ndorekoiha la kúlpa. Haʼe ohayhu tekojoja ha ndaijaʼéi umi inhustísiare (Sal. 33:5). Ñapensákena Elihú, Job amígo opensa haguéicha. Haʼe heʼi vaʼekue: “¡Ani peimoʼã [Ñandejára] pe ipuʼakapáva, ojapoha ivaíva térã hekopeguaʼỹ!” (Job 34:10). Ndahaʼéi Jehová káusare ñaneprovlémava; chugui ningo ou “opa mbaʼe porã ha rregálo hekopeguáva” (Sant. 1:13, 17, NM).

18, 19. ¿Mbaʼérepa arakaʼeve nañapensái vaʼerã Jehová ñanembotavytaha? Emoĩ peteĩ ehémplo.

18 Aníkena ñapensa Jehová ñanembotavytaha. Ñandejára ningo perfékto ha umi mbaʼe opensáva ijyvateve ñande ñapensávagui (Is. 55:8, 9). Upévare ñanderekomirĩramo ñarrekonoséta ndajaikuaaiha opa mbaʼe (Rom. 9:20). Nameméi ñantendepa mbaʼérepa oiko jepi peteĩ mbaʼe. Katuete jahechakuaáne añeteha heʼíva la Biblia Proverbios 18:17-pe: “Oñeʼẽ raẽvante heʼívaicha añetegua, ou peve heʼíva ijapuha”.

19 Ñane amígo jajeroviaha ojapóramo peteĩ mbaʼe ñepyrũrã nañantendéiva, ¿jaʼétapa hese ojapoha peteĩ mbaʼe ivaíva? Nahániri, katuete jajeroviáta hese jaikuaa  rupi chupe ymaite guive. Jatratáramo upéicha ñane amigokuérape iñimperféktoramo jepe, koʼýte jajeroviave vaʼerã ñande Ru yvagayguáre, oikuaavéva heta mbaʼe ha iñaranduetevéva ñandehegui.

20, 21. ¿Mbaʼérepa iñimportánte jahechakuaa mávapa pe orekóva la kúlpa?

20 Ehechakuaákena mávapa oreko la kúlpa. Ikatu ñande káusare voi ñaneprovléma hína. Oiméramo upéicha, ñarrekonose vaʼerã upéva (Gál. 6:7). Ñandevyroitereítama jakulpáramo Ñandejárape. ¿Mbaʼérepa? Ñamoĩmína peteĩ ehémplo. Peteĩ áuto ojefavrika ikatu hag̃uáicha hatã oiko. Ñamoĩ chupe pe omaneháva ohoha hatãiterei, ha og̃uahẽvo peteĩ kúrvape ndaikatuvéima ojapo mbaʼeve ha ojevolka. ¿Jakulpátapa pe favrikántepe oiko haguére pe aksidénte? Nahániri, pe omaneháva oreko la kúlpa. Péicha avei Jehová omeʼẽ ñandéve liverta jadesidi hag̃ua mbaʼépa jajapóta, péro avei omeʼẽ heta konsého ñanepytyvõtava jadesidi porã hag̃ua. Ajépa ndaikatúi jakulpa ñande Apoharépe jajavy haguére.

21 Añetehápe ningo naentéroi umi provléma jahupyty jajavy rupi térã jajapógui mbaʼe vai. Heta vése jahasa asy oikógui “umi mbaʼe ñahaʼarõʼỹva” (Ecl. 9:11, NM). Péro ndovaléi ñanderesarái Satanás káusare oikoha heta mbaʼe vai (1 Juan 5:19; Rev. 12:9). Haʼe hína ñane enemígo, ndahaʼéi Jehová (1 Ped. 5:8).

ÑAMOMBAʼÉKENA IKATU HAGUÉRE ÑAIME PORÃ JEHOVÁ NDIVE

Jehová ovendesi Josué ha Calébpe ojerovia haguére hese (Ehecha párrafo 22)

22, 23. ¿Mbaʼérehepa ñanemanduʼa vaʼerã oiméramo umi provléma ñanemokangy?

22 Jahasa jave umi mbaʼe ijetuʼúva, ñanemanduʼa vaʼerã Josué ha Caleb rehe. Koʼã mokõi kuimbaʼe ndojoguái umi 10 iñirũme oho vaʼekue ovichea pe yvy, síno haʼekuéra ogueru notísia iporãva (Núm. 14:6-9). Ohechauka hikuái ojerovia mbareteha. Upéicharõ jepe, ohasa hikuái 40 áño pe desiértore umi ótro isrraelíta ndive. Péro ojeplagea térã oiko rangue oñembyasy openságui upéva iñinhustoha, ojerovia Jehováre ha haʼe ovendesi chupekuéra. Umi ótro isrraelíta omanomba pe desiértore, péro Josué ha Caleb oike pe Yvy Oñepromete vaʼekuépe (Núm. 14:30). Jehová avei ñanevendesíta “nañanekaneʼõiramo” jajapo haguére hembipota (Gál. 6:9, NM; Heb. 6:10).

23 Péro, ¿mbaʼépa rejapo vaʼerã oiméramo nemokangy umi provléma térã oguapy nderehe umi mbaʼe vai nde, ỹrõ nde rapicha ojapo vaʼekue? Epensa vaʼerã umi mbaʼe porãita Jehová ohechaukávare ha pe esperánsa omeʼẽvare ndéve. Iporã reñeporandu: “¿Mbaʼe piko oiko vaʼerãmoʼã chehegui Jehová reheʼỹ?”. Eñemoag̃uíkena akóinte hese ha ani arakaʼeve ndepochy hendive.