Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Julio de 2013

“Aiméta penendive opa ára”

“Aiméta penendive opa ára”

“¡Péina!, aiméta penendive opa ára, og̃uahẽ meve huʼãme ko múndo ára paha.” (MAT. 28:20, NM)

1. a) Emombeʼu pe ehémplo oñeʼẽva trígo ha ñana vaíre. b) ¿Mbaʼéichapa Jesús omyesakã pe ehémplo?

IMANDUʼÁVO pe Rréinore Jesús omoĩ peteĩ ehémplo oñeʼẽva peteĩ chokokue oñotỹ vaʼekuére trígo ikokuépe, péro upéi ou pe enemígo ha oñotỹ ñana vai pe trígo apytépe. Sapyʼaitérõ g̃uarã pe ñana vai okakuaa pe trígo apytépe, upéicharõ jepe pe chokokue heʼi hembiguaikuérape: “Peheja mokõivéva tokakuaa oñondive pe kosécha tiémpo peve”. Upéicharõ, pe kosécha tiémpope ojehapy pe ñana vai ha pe trígo katu oñembyaty. Upe rire Jesús voi omyesakã ko ehémplo (elee Mateo 13:24-30, 37-43). ¿Mbaʼépa ñanemboʼe upéva? (Ehecha pe rrekuádro heʼihápe “Pe trígo ha pe ñana vai”.)

2. a) ¿Mbaʼépa orrepresenta umi mbaʼe oiko vaʼekue pe kuimbaʼe kokuépe? b) ¿Mbaʼérehepa ñañeʼẽvéta ko artíkulope?

2 Umi mbaʼe oikóva pe kuimbaʼe kokuépe ohechauka mbaʼéichapa ha arakaʼépa Jesús ombyatýta yvyporakuéra apytégui umi tapicha oñembojojáva trígore. Umíva haʼe hína umi kristiáno unhído ogovernátava hendive pe Rréinope. Pe semílla oñepyrũ vaʼekue oñeñotỹ Pentekostés áño 33-pe, ha pe trígo oñembyatypáta hiʼag̃uívo pe ára pahaite, ojesellapa vove umi unhído hembýva ko yvy ape ári, ha upéi oho yvágape (Mat. 24:31; Rev. 7:1-4). Ñamoĩ chupe ñaimeha peteĩ sérro ári. Upe guive ikatu jahechapaite umi mbaʼe oĩva ñande jerére. Péicha avei pe ehémplo Jesús omoĩ vaʼekue ñanepytyvõ jaikuaa hag̃ua umi mbaʼe oikótava peteĩ tiémpo ipukútavare 2.000 áño rupi. ¿Mbaʼéichapa pe ehémplo Jesús omoĩ vaʼekue ñanepytyvõ jahechakuaa hag̃ua umi mbaʼe oikótava tenonderãme? Jesús ehémplo oñeʼẽ peteĩ tiémpore oñeñotỹhápe pe semílla, upéi okakuaáta ha amo gotyove katu oñembyatýta. Ko artíkulope oñeñeʼẽve pe kosécha tiémpore. *

JESÚS OÑANGAREKO PORÃ HESEKUÉRA

3. a) ¿Mbaʼépa oiko primer síglo rire? b) ¿Mbaʼe porandúpa oĩ Mateo 13:28-pe, ha mávapa ojapo? (Ehecha avei pe nóta 2.)

3 Oñepyrũre pe segundo síglo, “osẽ avei pe ñana vai” térã umi kristiáno guaʼu pe “kokuépe” térã ko múndope  (Mat. 13:26, NM). Amo síglo cuártorupi, umi kristiáno ojoguáva pe ñana vaípe hetaitevéma umi kristiáno unhídogui. Ojehechaukaháicha pe ehémplope, umi tembiguái ojerure permíso ipatrónpe omondoro hag̃ua pe ñana vai (Mat. 13:28). * ¿Mbaʼépa heʼi chupekuéra ipatrón?

4. a) ¿Mbaʼépa oñemyesakã Jesús ombohováivare? b) ¿Arakaʼe guivépa ojekuaamiéma ohóvo pe trígo, térã umi kristiáno unhído?

4 Oñeʼẽvo pe trígo ha pe ñana vaíre, Jesús heʼi: “Peheja mokõivéva tokakuaa oñondive pe kosécha tiémpo peve”. Upéva ohechauka primer síglo guive koʼág̃a peve oĩtaha ko yvy ape ári kristiáno unhído oñembojojáva pe trígore. Ha jaʼekuaa upeichaha Jesús heʼi vaʼekuére upe rire idisipulokuérape: “Aiméta penendive opa ára, og̃uahẽ meve huʼãme ko múndo ára paha” (Mat. 28:20, NM). Jahechaháicha, Jesús oñangareko umi kristiáno unhídore ára ha ára ha osegíta gueteri oñangareko hesekuéra oñehundi peve ko múndo aña. Pe ehémplo ohechauka pe ñana vai hetaitereiveha pe trígogui, upéicha rupi ndaikatúi ojekuaa heta áñore máva mávapa rakaʼe umi unhído. Péro 30 áño rupi oñepyrũ mboyve pe kosécha tiémpo, ojekuaamiéma ohóvo pe trígo, térã umi kristiáno unhído. ¿Mbaʼéichapa oiko upéva?

PE MENSAHÉRO ‘OPREPARA PE TAPE’

5. ¿Mbaʼéichapa oñekumpli Malaquías heʼi vaʼekue síglo primérope?

 5 Heta tiémpo Jesús oñeʼẽ mboyve pe trígo ha ñana vaíre, Jehová oiporu Malaquíaspe oprofetisa hag̃ua heta mbaʼe Jesús oprofetisa vaʼekue avei iñehémplope (elee Malaquías 3:1-4). Juan el Bautista haʼe vaʼekue pe “mensahéro” opreparáva pe tape (Mat. 11:10, 11, NM). Ha haʼe og̃uahẽrõ guare año 29-pe, saʼíma ofalta ojehusga hag̃ua Israélpe. Upéi ou Jesús, pe segundo mensahéro.  Haʼe omopotĩ kuri dos vése Jerusalén témplo: Primero, oñepyrũre ipredikasión, ha segundo katu omohuʼãvo ohóvo (Mat. 21:12, 13; Juan 2:14-17). Jahecha upéicharõ Jesús omopotĩ hague pe témplo peteĩ tiémpore.

6. a) ¿Mbaʼéichapa oñekumpli ñane tiémpope Malaquías oprofetisa vaʼekue? b) ¿Arakaʼépa Jesús ou ohecha hag̃ua mbaʼéichapa umi kristiáno omombaʼeguasu Ñandejárape? (Ehecha avei pe nóta 3.)

 6 ¿Mbaʼéichapa oñekumpli ñane tiémpope Malaquías oprofetisa vaʼekue? Áño 1914 mboyve, Charles T. Russell ha umi oipytyvõva chupe ojapo peteĩ tembiapo ojoguáva Juan el Bautista ojapo vaʼekuépe. Haʼekuéra ohesaʼỹijo porã Ñandejára Ñeʼẽ oikuaa hag̃ua mbaʼépa añetehápe oñemboʼe pype. Koʼã Estudiánte de la Biblia omyesakã porã mbaʼérepa Jesús omano ñanderehehápe, ohechauka japuha umi mbaʼe oñemboʼéva pe infiérnore, ha omombeʼu hikuái oñemohuʼãtamaha pe tiémpo oñemeʼẽva umi tetãme. Upéicharõ jepe, oĩ heta grúpo heʼíva osegiha Crístope. Péro ¿mávapepa añetehápe orrepresenta pe trígo? Ojekuaa hag̃ua upéva, Jesús ou áño 1914-pe ohecha hag̃ua mbaʼéichapa umi kristiáno omombaʼeguasu Ñandejárape ha avei ou omopotĩ hag̃ua chupekuéra. Upe tembiapo oñemohuʼã 1919 oñepyrũ rire. *

JESÚS OU OHECHA HA OMOPOTĨ UMI UNHÍDOPE

7. ¿Mbaʼépa Jesús otopa oúrõ guare 1914-pe ohecha mbaʼéichapa umi kristiáno omombaʼeguasu Ñandejárape?

7 ¿Mbaʼépa Jesús otopa oúrõ guare ohecha mbaʼéichapa umi kristiáno omombaʼeguasu Ñandejárape? Otopa peteĩ grúpo oñembohérava Estudiánte de la Biblia, ojapómava 30 áño rasa kyreʼỹme oiporu hague itiémpo ha imbaʼerepy opredika hag̃ua  pe marandu porã. * ¡Ajépa ovyʼaiténe raʼe Jesús ha umi ánhel ohechávo mbaʼeichaitépa imbarete pe trígo! Mbovymíramo jepe hikuái ndohejái pe ñana vai Satanás oñotỹ vaʼekue ojahoʼipa chupekuéra. Péro tekotevẽ kuri avei oñemopotĩ “Levi raʼykuérape”, térã umi unhído (Mal. 3:2, 3, ÑÑB; 1 Ped. 4:17). ¿Mbaʼérepa?

8. ¿Mbaʼe mbaʼépa oiko 1914 rire?

8 Áño 1914 opakuévo, oĩ Estudiánte de la Biblia opytáva ikangy ndohói haguére yvágape. Áño 1915 ha 1916-pe heta hénte oñemoĩ hesekuéra ha ojoko lénto pe predikasión. Ha ivaiveha katu, omano rire ermáno Russell octubre 1916-pe, oĩma ijapytepekuéra voi ojerreveláva. Oĩ vaʼekue 7 ermáno omotenondéva pe Watch Tower Bible and Tract Society, ha 4 umíva apytégui ojerrevela ojeporavórõ guare ermáno Rútherfordpe omoakã hag̃ua pe organisasión. Haʼekuéra omoingo vaise umi ermánope, péro agosto 1917-pe osẽ hikuái Betélgui. Péicha oñemopotĩ Jehová organisasión. Péro oĩ avei Estudiánte de la Biblia oúva ikangy okyhyje rupi hapicha yvypóragui. Upéicharõ jepe, hetave oĩ umi ermáno ohejáva Jesús omopotĩ chupekuéra ha okambia tekotevẽhápe. Upévare Jesús ohechakuaa koʼãva haʼeha kristiáno tee orrepresentáva pe trígo, péro omboyke umi kristiáno guaʼúpe: umi oĩ vaʼekuépe kongregasiónpe ha avei entéro umi heʼívape ijehe kristianoha oĩva rrelihión japúpe (Mal. 3:5; 2 Tim. 2:19). ¿Mbaʼépa oiko upe rire? Jaikuaa hag̃ua upéva, jahechami jey pe ehémplo oñeʼẽva pe trígo ha ñana vaíre.

¿MBAʼÉPA OIKO OÑEPYRŨ RIRE PE KOSÉCHA TIÉMPO?

9, 10. a) ¿Mbaʼépa ñahesaʼỹijóta pe kosécha tiémpo rehe? b) ¿Mbaʼépa oiko tenondete pe kosécha tiémpope?

9 Jesús heʼi: “Pe kosécha tiémpo katu pe múndo ára pahaite oñemoag̃uívo” (Mat. 13:39, NM). Pe kosécha oñepyrũ 1914-pe. Ñahesaʼỹijomi 5 mbaʼe Jesús heʼi vaʼekue oikotaha pe kosécha tiémpope.

 10 Primero: oñembyaty pe ñana. Jesús heʼi: “Pe kosécha tiémpope [...] haʼéta umi omonoʼõvape: ‘Pembyaty raẽ pe ñana ha pejokua pehapy hag̃ua’”. Áño 1914 rire umi ánhel oñepyrũ ‘ombyaty’ umi kristiáno oñembojojávape ñana vaíre ha osepara chupekuéra umi ‘Rréino ñemoñarégui’, térã umi unhídogui (Mat. 13:30, 38, 41, NM).

11. ¿Mbaʼépepa idiferénte umi kristiáno tee umi kristiáno guaʼúgui koʼag̃aite peve?

11 Pe kosécha tiémpope ojekuaa porãve ohóvo pe ñana vai ha pe trígo (Rev. 18:1, 4). Áño 1919-pe g̃uarã ojekuaáma Babilonia Guasu hoʼaha umi kristiáno tee isãsóma rupi chugui. ¿Mbaʼépepa idiferénte umi kristiáno tee umi kristiáno guaʼúgui? Opredika hikuái pe marandu porã. Umi ermáno omotenondéva Estudiánte de la Bíbliape ohechakuaa iñimportanteha káda uno opredika pe marandu porã oñeʼẽva pe Rréinore. Por ehémplo, pe folléto To Whom the Work Is Entrusted (Mávapepa oñemeʼẽ ko tembiapo) oñeguenohẽ vaʼekue 1919-pe, omokyreʼỹ enterove kristiáno unhídope opredika hag̃ua ogahárupi, ha heʼi: “Ko tembiapo ningo haʼete tuichaitereíva, péro ñande Ruvicha mbaʼe hína ha haʼe ñanemombarete ikatu hag̃uáicha jajapo. Peẽ peguereko peteĩ priviléhio tuicháva ikatu haguére pembaʼapo ko tembiapópe”. ¿Mbaʼépa ojapo umi unhído? Upe guive umi Estudiánte de la Biblia ombaʼapo meme pe predikasiónpe, omombeʼu haguéicha pe rrevísta The Watch Tower áño 1922-pe. Sapyʼaitérõ g̃uarã umi kristiáno tee ojekuaa opárupi opredika haguére ogahárupi, ojejapoháicha koʼag̃aite peve.

12. ¿Arakaʼe guivépa oñembyaty pe trígo?

 12 Segundo: oñembyaty pe trígo. Jesús omanda hiʼanhelkuérape: “Pembyaty pe trígo che galpónpe” (Mat. 13:30, NM). Áño 1919 guive oñembyaty umi unhídope pe  kongregasión oñemopotĩ vaʼekuépe. Umi kristiáno unhído oikovéva gueteri ko yvy ape ári hiʼag̃uívo pe ára pahaite, oñembyatypáta oho vove yvágape (Dan. 7:18, 22, 27).

13. ¿Mbaʼépa heʼi Revelación 18:7 pe kuña reko vaíre térã Babilonia Guasúre, oĩhápe avei umi kristiáno guaʼu?

 13 Tercero: oĩ hasẽ soro ha ipyahẽva. ¿Mbaʼépa oikóta umi ánhel ombyaty ha ojokua rire pe ñana vai? Oñeʼẽrõ guare umi oñembojojávare pe ñana vaíre, Jesús heʼi: “Haʼekuéra hasẽ soro ha ipyahẽta ñembyasýgui” (Mat. 13:42, NM). ¿Ikatúpa jaʼe koʼág̃a oikoha upéva? Nahániri. Koʼág̃arupi umi rrelihión heʼíva ijehe kristianoha, oĩva Babilonia Guasúpe heʼi gueteri: “Che ningo peteĩ rréina ha amanda guasu, che ndahaʼéi viúda ha arakaʼeve ndajaheʼomoʼãi” (Rev. 18:7, NM). Péicha jahecha haʼekuéra oñeñanduha ku tuichaiterei omandarõguáicha, opensa oguerekoha ipoguýpe mburuvichakuérape ha heʼi voi ijehe haʼeha “peteĩ rréina”. Koʼág̃arupi umi orrepresentáva pe ñana vaípe oñembotuicha oikóvo ha ndojaheʼói, péro koʼẽrõite upéva okambiáta.

Umi heʼíva ijehe kristianoha ha umi polítiko koʼág̃a ombaʼapo oñondive, péro koʼẽrõitéma ndaʼupeichamoʼãvéima (Ehecha párrafo 13)

14. a) ¿Arakaʼe ha mbaʼérepa umi kristiáno guaʼu “ipyahẽta ñembyasýgui”? b) Ñantende porãvo koʼág̃a Mateo 13:42, ¿mbaʼéichapa jahechakuaa ohoha Salmo 112:10 heʼívare? (Ehecha pe nóta 5.)

14 Pe jehasa asy guasu aja ha oñehundi rire umi rrelihión japu, entéro umi oĩ vaʼekue hendivekuéra pyaʼe ohekáta peteĩ lugár okañy hag̃ua, péro ndotopamoʼãi (Luc. 23:30; Rev. 6:15-17). Upéi ohechakuaáta hikuái katuete oñehunditaha, upévare “hasẽ soro ha ipyahẽta ñembyasýgui”. Jesús heʼi haguéicha pe profesía oñeʼẽvape pe jehasa asy guasúre, upe tiémpo ijetuʼuetévape haʼekuéra “ojepytiʼanupãta ñembyasýgui” (Mat. 24:30, NM; Rev. 1:7). *

15. ¿Mbaʼépa oikóta pe ñana vaígui, ha arakaʼépa?

 15 Cuarto: ojepoíta chupekuéra tatakua rendýpe. ¿Mbaʼépa oikóta pe ñana vai oñembyaty vaʼekuégui? Umi ánhel “opoíta [...] tatakua rendýpe” (Mat. 13:42, NM). Upéva heʼise oñehundietetaha hikuái. Upéicharõ, entéro oĩva rrelihión japúpe oñehundipáta Armagedónpe, oñemohuʼãvo pe jehasa asy guasu (Mal. 4:1).

16, 17. a) ¿Mbaʼéichapa Jesús omohuʼã iprofesía? b) ¿Mbaʼérepa jaʼekuaa Jesús heʼi vaʼekue umi unhídore oñekumplitaha tenonde gotyove?

 16 Quinto: umi hekojojáva, kuarahýicha omimbíta. Jesús omohuʼã iprofesía heʼívo: “Upérõ umi hekojojáva, kuarahýicha omimbíta Itúva Rréinope” (Mat. 13:43, NM). ¿Arakaʼe ha moõpa oikóta upéva? Koʼã mbaʼe oñekumplíta tenonde gotyove. Jesús ohechauka vaʼekue upéva ndoikomoʼãiha koʼág̃a ko yvy ape ári, síno oikotaha amo gotyove yvágape. * Jahechamína mbaʼérepa jaʼe upéva.

17 Primerorã jahecháta hína “arakaʼépa”  oñekumplíta Jesús oprofetisa vaʼekue. Haʼe heʼi: “Upérõ umi hekojojáva, kuarahýicha omimbíta”. Jesús heʼívo “upérõ”, oñeʼẽ hína pe tiémpore ojepoitahápe tatakua rendýpe pe ñana vai. Upéva oikóta og̃uahẽvo huʼãme pe jehasa asy guasu. Upéicharõ pe tiémpope avei umi unhído “kuarahýicha omimbíta”. Segundo, jahecháta “moõpa” oñekumplíta ko profesía. Jesús heʼi umi hekojojáva ‘omimbitaha Itúva Rréinope’. ¿Mbaʼépa heʼise upéva? Opavave unhído oĩva gueteri ko yvy ape ári oñepyrũ rire pe jehasa asy guasu, ojesellapátama upérõ g̃uarã. Upe rire oñembyatýta chupekuéra yvágape, Jesús heʼi haguéicha pe profesía oñeʼẽvape pe jehasa asy guasúre (Mat. 24:31). Upépe haʼekuéra omimbíta “Itúva Rréinope” ha pe Armagedón riremi oĩta Jesús ndive inóviaramo pe “Ovecharaʼy kasamiéntope” (Rev. 19:6-9, NM).

MBAʼÉICHAPA IDEPROVÉCHO ÑANDÉVE UMI MBAʼE OÑEMYESAKÃVA

18, 19. ¿Mbaʼéichapa ideprovécho ñandéve ñantende porãramo pe ehémplo oñeʼẽva pe trígo ha pe ñana vaíre?

18 ¿Mbaʼéichapa ideprovécho ñandéve umi mbaʼe oñemyesakãva Jesús ehémplope? Ñanepytyvõ mbohapy hendáicha. Primero, ñantende porãve umi mbaʼe ipypukúva. Pe ehémplo rupive jahechakuaa mbaʼérepa Jehová oheja oiko umi mbaʼe vai. Ñandejára “ipasiensiaiterei [...] jepe haʼe ipochy umi héntendi”, ha upe aja ombyaty umi “oiporiahuverekóvape”, térã pe trígo (Rom. 9:22-24, NM). * Segundo, omombarete ñande jerovia. Hiʼag̃uivévo pe ára pahaite, ñane enemigokuéra oñemoĩ mbaretevéta ñanderehe, péro “ndaipuʼakamoʼãi” (elee Jeremías 1:19). Ymaite guive Jehová oñangareko umi kristiánore oñembojojáva trígore, péicha avei koʼág̃a oiporu Jesús ha umi ánhelpe oñangareko hag̃ua ñanderehe “opa ára” og̃uahẽ meve huʼãme ko múndo aña (Mat. 28:20, NM).

19 Tercero, pe ehémplo ñanepytyvõ jaikuaa hag̃ua máva mávapa umi oñembojojáva pe trígore. ¿Mbaʼérepa upéva iñimportánte? Jaikuaáramo mávapa umi kristiáno oñembojojáva trígore ikatúta ñambohovái Jesús oporandu vaʼekue oñeʼẽrõ guare umi ára paháre: “¿Mávapa hína pe tembiguái jeroviaha ha iñarandúva?” (Mat. 24:45, NM). Umi mokõi artíkulo ñahesaʼỹijótava upe rire, ombohovái ko porandu.

 

^ párr. 2 Párrafo 2: Nemanduʼa jey hag̃ua mbaʼéichapa oñemyesakã umi ótra párte oĩva ko ehémplope, romokyreʼỹ relee hag̃ua Ñemañaha 15 de marzo de 2010, páhina 19-21, párrafo 1-9, heʼihápe ‘Umi hekojojáva kuarahýicha omimbíta’.

^ párr. 3 Párrafo 3: Jesús apostolkuéra omanombáma kuri, ha umi unhído oĩva ko yvy ape ári noñerrepresentái umi tembiguáire, síno pe trígore. Upévare jaʼekuaa umi tembiguái orrepresentaha umi ánhelpe. Jesús voi heʼi haguéicha pe ehémplope, umi ombyatýva pe ñana vai haʼe hína umi ánhel (Mat. 13:39).

^ párr. 6 Párrafo 6: Kóva haʼe hína peteĩ entendimiénto pyahu. Ymave oñepensa Jesús ou hague 1918-pe ohecha hag̃ua mbaʼéichapa umi kristiáno omombaʼeguasu Ñandejárape.

^ párr. 7 Párrafo 7: Áño 1910 guive 1914 peve umi Estudiánte de la Biblia omosarambi 4.000.000 lívro rupi ha 200.000.000 ári tratádo ha folléto.

^ párr. 14 Párrafo 14: Koʼápe oñekambia ñantende vaʼekue Mateo 13:42-pe. Ymave ñane puvlikasionkuérape ojeʼe umi kristiáno guaʼu yma guivéma ‘hasẽ soro ha ipyahẽha ñembyasýgui’, “pe Rréino ñemoñare” ohechaukágui opavavépe haʼekuéra ijapuha, haʼeha pe “aña ñemoñare” (Mat. 13:38, NM). La Biblia heʼívo “ipyahẽta ñembyasýgui” oñeʼẽ hína umi oñehundítavare (Sal. 112:10).

^ párr. 16 Párrafo 16: Daniel 12:3 heʼi: “Umi iñarandúva [umi kristiáno unhído] omimbíta pe yvága omimbiháicha” (NM). Oĩ aja hikuái ko yvy ape ári, ‘omimbi’ opredika memévo pe marandu porã. Péro Mateo 13:43 ohechauka haʼekuéra omimbitaha kuarahýicha ogoverna vove pe Rréino yvagayguápe. Yma ñapensa vaʼekue koʼã mokõi téxto oñeʼẽha pe predikasión rehe.

^ párr. 18 Párrafo 18: Ehecha lívro Acerquémonos a Jehová, páhina 288 ha 289.