Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2013

Jehová nomboykéi avavépe ha oĩ ñanerendu hag̃uáicha

Jehová nomboykéi avavépe ha oĩ ñanerendu hag̃uáicha

“Pehaʼangáke Ñandejárape, peẽ itaʼýra haʼe ohayhuetéva.” (EFES. 5:1, NM)

1. a) ¿Mbaʼépa ohesaʼỹijo vaʼerã kristianokuéra? b) ¿Mbaʼéichapa ñanepytyvõta jaikuaavéramo Jehovápe?

¿MBAʼÉPA ou ne akãme repensa jave Jehová rehe? Ikatu nemanduʼa umi mbaʼe porãita haʼe ohechaukávare, por ehémplo: mborayhu, tekojoja, arandu ha puʼaka. Upéicharõ jepe, jaikuaa Ñandejára ohechaukaha hetaiteve mbaʼe porã. Ikatu voi jajapo peteĩ lísta ha katuete jajuhúta 40 ári, ha entéro koʼã mbaʼe porã oñemyesakãma ñane puvlikasionkuérape. Jastudia jave ñaneaño térã ñande rogayguakuéra ndive, jaikuaa jahávo Jehovápe ha ñaaprende chugui hetaiterei mbaʼe ijojahaʼỹva. Upéva ñanepytyvõ ñamombaʼeve hag̃ua ñande Ru yvagayguápe, ha jaguerohoryvévo chupe, koʼýte ñañemoag̃uivéta hese ha ñahaʼangáta chupe (Jos. 23:8; Sal. 73:28).

2. a) Emoĩ peteĩ ehémplo ohechaukáva mbaʼéichapa ikatu jaguerohoryve jahávo umi mbaʼe porãita Jehová ohechaukáva. b) ¿Mbaʼépa ñahesaʼỹijóta?

2 Péro, ¿mbaʼéichapa jahechauka ñamombaʼeha peteĩ mbaʼe? Ñarrekonosévo ovaletereiha. Ha upéva ikatu jaguerohoryve jahávo ára koʼẽre. Ñamoĩmína peteĩ ehémplo: jaʼútaramo peteĩ tembiʼu ndajaikuaáiva, ñepyrũrã ñahetũ, upéi ñatantea ha ñaikumby, ha amo ipahápe ñandete voi japrepara ñandegustámagui. Péicha avei, jaguerohory hag̃ua peteĩ mbaʼe porã Jehová ohechaukáva, tekotevẽ jaikuaa raẽ, jajepyʼamongeta hese, ha upéi ñande voi ñahaʼanga chupe (Efes. 5:1). Ko artíkulo ha umi mokõi oúva ñanepytyvõta jaguerohoryve hag̃ua umi mbaʼe porãita Jehová ohechaukáva, umíva apytépe umi ndajahechakuaaguasúiva jepi. Ñahesaʼỹijóvo umíva, jahecháta 1) mbaʼépa heʼise káda uno, 2) mbaʼéichapa Jehová ohechauka koʼã mbaʼe, ha 3) mbaʼéichapa ñande ikatu ñahaʼanga chupe.

 JEHOVÁ OĨ ÑANERENDU HAG̃UÁICHA

3, 4. a) ¿Mbaʼeichagua persónapa hína peteĩ oĩva ñanerendu hag̃uáicha? b) ¿Mbaʼéichapa Jehová ohechauka oĩha ñanerendu hag̃uáicha?

3 ¿Mbaʼeichagua persónapa hína peteĩ oĩva ñanerendu hag̃uáicha? Jaikuaa hag̃ua upéva tekotevẽ ñahendu chupe, jajesareko hese ha ihestokuérare. Peichagua ndive ndahasýi ñañemongeta hag̃ua, hory ha ikatu ñañemboja hese oimeha óra.

4 ¿Mbaʼéichapa Jehová ohechauka oĩha ñanerendu hag̃uáicha? Haʼe ningo ojapo vaʼekue ko univérso tuichaitéva, upéicharamo jepe heʼi ñandéve ñanerenduha ha ombohovaiha ñane ñemboʼe. Hiʼarive ojapose voi upéva (elee Salmo 145:18 ha Isaías 30:18, 19). Ñañeʼẽkuaa hendive pyʼaguapýpe oimeha óra ha oimeha lugárpe, ha ikatu ñamombeʼu chupe ñande pyʼaite guive ñañandúva, ha haʼe ndaipochymoʼãi ñanderehe (Sal. 65:2; Sant. 1:5). La Biblia oiporu umi ñeʼẽ yvypóra ikatúva ontende ohechauka hag̃ua Jehová oipotaha ñañemboja hese. Por ehémplo, David heʼi vaʼekue: “Ñande Ruete resa omaña hekopotĩva rehe, Haʼe ojapysaka porã imbaʼejerure asy rehe”. Avei heʼi: “Nde po akatúa chejoko porã” (Sal. 34:15, ÑÑB; Sl 63:8, ÑÑB). Proféta Isaías katu ombojoja Jehovápe peteĩ ovecharerekua rehe heʼívo: “Ijyva ári ogueraháta umi ovecharaʼy, ha ipytiʼakuápe oñongatu chupekuéra” (Is. 40:11, ÑÑB). Ñapensamíntena, Jehová oipota ñañemoag̃ui hese ha ñaime hendive ku ovecharaʼy oĩvaicha herekua jyva ári. ¡Ajépa ñanderayhukuaaite! ¿Mbaʼéichapa ikatu ñahaʼanga chupe?

OJEGUEROHORYETEREI PEICHAGUA PERSÓNAPE

5. ¿Mbaʼérepa ansianokuéra oĩ vaʼerã oporohendu hag̃uáicha?

5 Ndaʼaréi oñeporandu heta ermáno oparupiguápe: “¿Mbaʼépa reguerohoryve umi ansiánore?”. Opavave lénto ombohovái ovyʼaha “ndahasýi haguére oñemongeta hag̃ua hendivekuéra ha hory  haguére hikuái”. Añetehápe, opavave kristiáno oporohendukuaa vaʼerã, ha koʼýte umi ansiáno (Is. 32:1, 2). Peteĩ ermána omombeʼu mbaʼérepa iñimportantete ansianokuéra oĩ oporohendu hag̃uáicha. Haʼe heʼi: “Upéichamante jaikuaa porãvéta chupekuéra ha ikatúta ñanepytyvõve hikuái”. ¡Ajépa siertoite upéva! Péro, ¿mbaʼépa ojapo peichagua persóna?

6. ¿Mbaʼépa jajapo vaʼerã ikatu hag̃uáicha ñande rapichakuéra oñemoag̃ui ñanderehe?

6 Tekotevẽ ningo ñañeinteresa ñande pyʼaite guive ñande rapichakuérare ikatu hag̃uáicha oñemoag̃ui ñanderehe. Katuete jahechakuaa peteĩ ansiáno ojepyʼapýramo umi ermánore ha oĩramo ojesakrifika hag̃uáicha hesekuéra, tahaʼe umi imitãvévare jepe (Mar. 10:13-16). Carlos, orekóva 12 áño, heʼi: “Ahecha umi ansiánope oñemboʼy pe Salónpe ha torýpe oporosaluda. Upéva ningo chegustaiterei chuguikuéra”. Peteĩ ansiáno ndahaʼéi heʼínte vaʼerã oĩha oporohendu hag̃uáicha, síno tekotevẽ ohechauka ikatuha ojejerovia hese (1 Juan 3:18). ¿Mbaʼéichapa ojapo vaʼerã hikuái upéva?

7. ¿Mbaʼérepa umi tarhéta de solápa ideprovechoiterei, ha mbaʼépa ñanemboʼe upéva?

7 Ñapensamína ko ehémplore. Peteĩ ermáno oho ótro tetãme asambléa de distrítope ha oukuévo, peteĩ karai ombaʼapóva pe aviónpe ohecha pe ermáno tarhéta de solápare heʼiha “Tou ne Rréino”. Upémarõ heʼi chupe: “Si, tou katu. Ñañeʼẽ vaʼerã ko témare”. Upe rire oñemongeta hikuái ha ko karai oasepta ñande rrevísta. Katuete ñande apytépe oĩma ohasáva koichagua situasión. ¿Mbaʼérepa ideprovécho umi tarhéta de solápa ñañepyrũ hag̃ua ñañemongeta ñande rapichakuérandi? Umi tarhéta haʼete heʼíva umi héntepe: “Eñeʼẽ katu chendive. Eporandu chéve moõpa aha hína”. Pe tarhéta de solápa ohechauka opavavépe ñaimeha ñañeʼẽ hag̃uáicha umi mbaʼe jagueroviávare. Upéicha avei umi ansiáno ohechauka vaʼerã ermanokuérape oĩha oporohendu hag̃uáicha. ¿Mbaʼépa hína umi mbaʼe ojapo vaʼerã hikuái?

8. ¿Mbaʼéichapa ansianokuéra ohechauka oñeinteresaha ipyʼaite guive Jehová ovechakuérare, ha mbaʼéichapa upéva oipytyvõ umi ermánope?

8 Káda tetãme ningo idiferénte umi kostúmbre. Péro opárupi ikatu jahechauka ñañeinteresaha ñane ermanokuérare ñanderorývo, jaipopyhývo térã ñamomaiteívo chupekuéra ñande pyʼaite guive. ¿Mávapa oñepyrũ vaʼerã ojapo upéva? Mateo kuatiañeʼẽ omombeʼu “Jesús oñemboja” hague hemimboʼekuéra rendápe ha oñeʼẽ chupekuéra (Mat. 28:18, NM). Péicha avei umi ansiáno koʼag̃agua oñemboja vaʼerã umi ermáno rendápe ha oñeʼẽ chupekuéra. ¿Mbaʼéichapa upéva oipytyvõ Jehová ovechakuérape? Peteĩ prekursóra orekóva 88 áño heʼi: “Umi ansiáno torýpe chesaludávo Salónpe ha heʼívo chéve umi mbaʼe chemokyreʼỹva, añandu ahayhuveha chupekuéra”. Ótra ermána ijeroviapýva heʼi: “Chéve g̃uarã tuichaiterei mbaʼe peteĩ ansiáno horýramo chéve ag̃uahẽvo rreunionhápe, haʼetérõ jepe vyroreinteha upéva”.

ÑAÑEMBOJAKUAA HENDAPEKUÉRA OIMEHA ÓRA

9, 10. a) ¿Mbaʼe ehémplo iporãvapa omeʼẽ ñandéve Jehová? b) ¿Mbaʼéichapa ansianokuéra ohechauka umi ermáno ikatuha oñemboja hesekuéra?

 9 Nañaiméiramo ñaporohendu hag̃uáicha, ndaiporimoʼãi oñemoag̃uiséva ñanderehe. Jehová “noĩri voi mombyry ñandehegui”, ha upéicha omoĩ ñandéve peteĩ ehémplo iporãva (Hech. 17:27, NM). Umi ansiáno ohechauka oĩha ohendu hag̃uáicha opavavépe omboykévo tiémpo oñemongeta hag̃ua ermanokuéra ndive,  tahaʼe imitãva térã ijedávandi. Upéva ojapokuaa hikuái oñepyrũ mboyve ha opa rire umi rreunión. Peteĩ prekursór heʼi: “Peteĩ ansiáno oporandúrõ chéve mbaʼéichapa aime ha upéi ojapysaka porã cherehe, ahechakuaa cherayhuha”. Ha peteĩ ermána ojapómava haimete 50 áño oservi hague Jehovápe, heʼi: “Añeñandu porãiterei ningo umi ansiáno omboykéramo itiémpo oñemongeta hag̃ua chendive opa rire rreunión, haʼete voi avaleve mbaʼéva”.

10 Jaikuaaháicha, ansianokuéra oreko heta rresponsavilida, upéicharamo jepe omboyke vaʼerã tiémpo oñatende hag̃ua ermanokuérare rreunionhápe.

JEHOVÁ NOMBOYKÉI AVAVÉPE

11, 12. a) ¿Mbaʼépa heʼise ndajaporoporavoiha? b) ¿Mbaʼe ehémplopa omoĩ ñandéve Jehová?

11 Jehová ohechauka avei ndoporoporavoiha (Hech. 10:34). ¿Mbaʼépa heʼise ndajaporoporavoiha? Japorotrata vaʼerãha peteĩchapa ha ndajadespresiái vaʼerãha avavépe. Upévare, ani hag̃ua jaiko jaiporavo ñande rapichakuérape, ñande voi ñapensa vaʼerã entéro omereseha ojetrata peteĩcha. Escrituras Griégaspe pe ñeʼẽ otrata enterovévape peteĩcha, heʼise oguerohoryha opavavépe peteĩchaite. Nañamañamoʼãi ipíntare térã oimépa ipláta heta, síno jahecháta mbaʼeichagua persónapa haʼe.

12 Jahechaháicha, Jehová omoĩ ehémplo iporãva nomboykéivo avavépe. Iñeʼẽme heʼi “otrataha enterovépe peteĩchante” ha ‘ndoporoporavoiha’ (elee Hechos 10:34, 35 ha Deuteronomio 10:17). Upéva ojehechakuaa vaʼekue peteĩ situasión ijetuʼúvape Moisés tiémpope.

Zelofehad rajykuéra ohecha Ñandejára ndoporoporavoiha (Ehecha párrafo 13 ha 14)

13, 14. a) ¿Mbaʼe situasiónpepa ojecha Zelofehad rajykuéra? b) ¿Mbaʼéichapa Jehová ohechauka ndoporoporavoiha?

 13 Israel oike mboyvemi pe Yvy Oñepromete vaʼekuépe, cinco kuñataĩ soltéra oñoermánava ojecha peteĩ provlémape. Haʼekuéra oikuaa ifamília ohupytytaha avei pe yvy oñemeʼẽta vaʼekue itúvape, oñemeʼẽháicha entéro família isrraelítape (Núm. 26:52-55). Péro koʼã kuñataĩ túva, hérava Zelofehad, Manasés trivugua, omano orekoʼỹre família kuimbaʼéva, ha upérõ umi kuimbaʼépe añónte oñemeʼẽ pe yvy (Núm. 26:33). ¿Mbaʼépa oikóta chuguikuéra? ¿Oñemeʼẽtantepa ijyvykuéra rangue umi ótro ihéntepe ha opyta hikuái erensiaʼỹre?

14 Umi cinco kuñataĩ oho Moisés rendápe ha oporandu chupe: “¿Mbaʼérepa ojepeʼáta ore ru réra Manasés trívugui, ndaitaʼýrai haguére?”. Ha ojerure asy hikuái: ‘Pemeʼẽna oréve ore yvyrã ore ru ermanokuéra apytépe’. ¿Mbaʼépa ojapo Moisés? ¿Heʼípa chupekuéra ndaikatuiha ojejapo mbaʼevete oĩma rupi upe  mandáto? Nahániri. Upéva rangue, “oporandu ñande Ruetépe” (Núm. 27:2-5, ÑÑB). ¿Mbaʼépa oiko upe rire? Jehová heʼi chupe: “Añetéko pe heʼíva Zelofehad rajykuéra. Emeʼẽ avei chupekuéra ijyvyrã itúva [ermanokuéra] apytépe ha pe yvy itúva mbaʼe rangue topyta chupekuéra”. Upe guive Jehová omeʼẽ peteĩ mandamiénto pyahu heʼívo Moiséspe: “Oimérõ omanóva taʼyraʼỹre, ijyvy topyta itajýrape” (Núm. 27:6-8; Jos. 17:1-6). Upe guive ko mandáto ou porã enterove kuña isrraelíta ojechávape ko situasiónpe.

15. a) ¿Mbaʼéichapa Jehová otrata isiervokuérape, koʼýte umi oikotevẽvévape? b) ¿Nemanduʼápa ambue ehémplo oĩvare la Bíbliape ohechaukáva Jehová nomboykeiha avavépe?

15 Añetehápe umi mbaʼe odesidívare Jehová ohechauka ipyʼaporã ha ndoporoporavoiha. Haʼe nomboykéi umi kuñataĩ opyta vaʼekuépe tyreʼỹ, síno otrata chupekuéra otrataháicha umi isrraelíta oĩ porãvévape (Sal. 68:5). La Bíbliape oĩ hetave ehémplo peichagua ohechaukáva Jehová otrataha isiervokuérape peteĩchapa (1 Sam. 16:1-13; Hech. 10:30-35, 44-48).

ÑANDE IKATU ÑAHAʼANGA JEHOVÁPE

16. ¿Mbaʼépa jajapo vaʼerã ñahaʼanga porãve hag̃ua Jehovápe?

16 Jahechaháicha, Jehová nomboykéi avavépe. ¿Mbaʼéichapa ikatu ñahaʼanga chupe? Tekotevẽ ñanemanduʼa ñande voi ñapensa vaʼerãha entéro omereseha ojetrata peteĩcha, ani hag̃ua jaiko jaiporavo ñande rapichakuérape. Añetehápe ningo opavave jaʼese ñandejehe ndajadespresiaiha avavépe ha jatrata porãha entérope. Péro sapyʼánte hasy jahechakuaa hag̃ua oimépa upéicha añete. ¿Mbaʼépa ñanepytyvõta jaikuaa hag̃ua oimépa jatrata ñande rapichakuérape peteĩchapa? Por ehémplo, Jesús oikuaasérõ guare mbaʼépa umi hénte opensa hese, oporandu iñamigokuérape: “¿Mbaʼépa heʼi umi hénte pe Yvypóra Raʼy rehe?” (Mat. 16:13, 14, NM). Ikatu jasegi Jesús ehémplo ha ñaporandu peteĩ ñane amígope jatratápa peteĩcha ñande rapichakuérape, tahaʼe iplátava, imboriahúva térã ipire kolór diferéntevape. Péro, ¿mbaʼépa jajapóta ñane amígo heʼíramo ñandéve japoroporavoha jaikóvo? Jajerure vaʼerã Jehovápe tañanepytyvõ ñakambia hag̃ua ñapensa lája ikatu hag̃uáicha ñahaʼanga porãve chupe (Mat. 7:7; Col. 3:10, 11).

17. ¿Mbaʼéichapa jahechauka jatrataha opavavépe peteĩcha?

 17 Kongregasiónpe jahechauka ñahaʼangaseha Jehovápe ñamombaʼévo opavave ñane ermánope ha ñanembaʼeporãvo hendivekuéra. Por ehémplo, ikatu ñainvita ñande rógape opaichagua ermánope, idiferénteramo jepe ñandehegui, tove taimboriahu, taityreʼỹ, iviúdo térã iviúda (elee Gálatas 2:10 ha Santiago 1:27). Avei japredika jave, ñamog̃uahẽ pe marandu porã opavavépe, ñamboykeʼỹre umi tetã ambueguápe. Upévare javyʼaiterei ñane puvlikasionkuéra ojejapo haguére 600 idióma rasápe. ¡Ajépa ojekuaa porãite Ñandejára ndoporoporavoiha!

18. ¿Mbaʼéichapa nde rehechaukáta reguerohoryha umi mbaʼe porã Jehová ohechaukáva?

18 Jahechakuaáramo Jehová oĩha ñanerendu hag̃uáicha ha nomboykeiha avavépe ha jajepyʼamongetáramo koʼã mbaʼére, katuete ñamombaʼevéta chupe. Upéva ñanemomýita avei ñañehaʼãmbaite hag̃ua ñahaʼanga chupe ha jatratáta peteĩchapa ñane ermanokuérape ha umi tapicha japredikávape.

“Ag̃uiete oĩ ñande Ruete mayma ohenóivagui chupe.” (Sal. 145:18, ÑÑB) (Ehecha párrafo 9)

“Jehová pende Jára [...] ndoporoporavói.” (Deut. 10:17, NM) (Ehecha párrafo 17)