Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2013

Ansianokuéra, pemokyreʼỹkena umi “ikaneʼõvape”

Ansianokuéra, pemokyreʼỹkena umi “ikaneʼõvape”

Ángela, * peteĩ ermána soltéra orekóva 30 áño ári, ojepyʼapy hína. Ohaʼarõ og̃uahẽ umi ansiáno ikongregasiongua ha oikuaase mbaʼépa heʼíta chupe hikuái. Añetehápe ningo ko ermána ofalta mimi kuri rreunionhápe, péro ikaneʼõiterei jepi ombaʼapógui un diaite oñangarekóvo heta hénte ijedávare. Hiʼarive, ojepyʼapyeterei isy hasykatúvare.

Oiméramo nde revisitáta Ángelape, ¿mbaʼéichapa remokyreʼỹta ko ermána “ikaneʼõvape”? (Jer. 31:25, ÑÑB.) ¿Mbaʼéichapa rejepreparáta reho mboyve pe visíta de pastoréo omokyreʼỹ hag̃ua chupe?

EPENSA ERMANOKUÉRA SITUASIÓN REHE

Opavave ningo sapyʼánte ñanekaneʼõ ñambaʼapo rupi térã jaguerekógui rresponsavilida kongregasiónpe. Proféta Daniel nontendéirõ guare peteĩ visión, heʼi: “Añeñanduʼi” (Dan. 8:27). Upe rire, pe ánhel Gabriel ou oipytyvõ Daniélpe. Omyesakã ko profétape mbaʼépa heʼise pe ohecha vaʼekue, ha heʼi Jehová ohendu hague iñemboʼe ha ‘ohayhuetereiha’ chupe (Dan. 9:21-23, ÑÑB). Tiémpo rire, ambue ánhel omombarete avei ko proféta ikaneʼõvape (Dan. 10:19).

Revisita mboyve peteĩ ermánope, epensa raẽ umi mbaʼe ohasávare

Upéicha avei, reho mboyve remokyreʼỹ peteĩ ermáno ikaneʼõva térã ikangývape, repensa raẽ vaʼerã hese. ¿Mbaʼe provlémapa ombohovái ha mbaʼéichapa umíva omokaneʼõ chupe? ¿Mbaʼe iporãvapa ohechauka ko ermáno? Richard, peteĩ ermáno haʼéva ansiáno ojapóma 20 rasa, heʼi: “Añehaʼã ahechakuaa umi mbaʼe porã ohechaukáva umi ermáno. Ndahasýi amokyreʼỹ hag̃ua ermanokuérape ajepyʼamongetárõ umi mbaʼe  ohasávare aha mboyve avisita chupekuéra”. Oiméramo ótro ansiáno nemoirũta, ikatu peñemongeta pe ermáno situasión rehe.

EÑEHAʼÃKENA ERMANOKUÉRA OÑEÑANDU PORÃ HAG̃UA

Sapyʼánte ñatĩ ñañeʼẽ hag̃ua umi mbaʼe ñañandúvare. Upévare ikatu hasy peteĩ ermánope omombeʼu hag̃ua hemiandu ovisita jave chupe umi ansiáno. ¿Mbaʼépa ikatu rejapo upéicha jave? Nderory vaʼerã ha eiporu umi ñeʼẽ oporomokyreʼỹva. Michael, ojapómava 40 áño rasa ansiáno hague, omombeʼu omoñepyrũha pe visíta heʼívo: “Ansianokuéra ningo roguereko heta tembiapo orembovyʼaitereíva, umíva apytépe roho ermanokuéra rógape roikuaa porãve hag̃ua chupekuéra. Upévare ajusetereíma kuri”.

Peñepyrũ hag̃ua peñemongeta ikatu peñemboʼe. Apóstol Pablo oñemboʼe jave, imanduʼámi mbaʼeichaitépa umi ermáno ojerovia Ñandejárare, oporohayhu ha oaguantakuaa (1 Tes. 1:2, 3). Nemanduʼávo ne ñemboʼépe umi mbaʼe porã ojapóvare pe ermáno, pejeprepara hína ikatu hag̃uáicha peñemongeta porã ha remokyreʼỹ chupe. Avei, umi mbaʼe eréva ikatu ombopyʼaguapy pe ermánope. Ray, peteĩ ermáno oservíva ansiánoramo heta áñorema, heʼi: “Sapyʼánte ñanderesarái umi mbaʼe porã jahupytývagui Jehová servísiope, upévare ñanekyreʼỹeterei oĩramo ñanemomanduʼa jeýva umívare”.

EIPORÚKENA LA BIBLIA REPOROMOKYREʼỸ HAG̃UA

Pablo ojapo haguéicha, nde avei ikatu remeʼẽ “peteĩ rregálo oúva Ñandejáragui”, térã remokyreʼỹ ermanokuérape reiporúvo peteĩ téxto jepe (Rom. 1:11, NM). Por ehémplo, peteĩ oñedeprimíva ikatu oñandu ndovaleiha mbaʼeverã. Péicha opensa vaʼekue peteĩ salmísta, ha heʼi: “Ajogua umi mbaʼyru ichaʼĩmbávape”. Péro oñeñandúramo jepe upéicha, heʼi avei: “Ndacheresaráiri ne rembipotágui” (Sal. 119:83; 119:176, NM).  Remyesakã mbykymi rire mbaʼépa heʼise koʼã versíkulo, ikatu ere pe ermánope reikuaaha avei haʼe ndahesarairiha Ñandejára rembipotágui.

¿Mbaʼéichapa reipytyvõta peteĩ ermána naikyreʼỹvéivape Jehová servísiope térã oñemomombyry vaʼekue kongregasióngui? Pe ehémplo jatopáva Lucas 15:8-10-pe ikatu opoko ikorasõre. Upépe oñemombeʼu peteĩ kuña oreko hague 10 monéda de pláta ha okañy chugui peteĩ. Ikatu oime oiporu kuri pe monéda ojapo hag̃ua peteĩ kollár hepýva orekóva heta monéda. Remyesakãvo chupe pe ehémplo, reñehaʼãmbaite vaʼerã pe ermána tohechakuaa haʼe iñimportantetereiha ermanokuérape g̃uarã. Upe rire ikatu ere chupe Jehová oñeinteresaha hese haʼégui peteĩ ijovecha.

Ermanokuérape igústo jepi omombeʼu mbaʼépa opensa peteĩ téxtore. Upévare, ehejákena haʼekuéra avei toñeʼẽ. Relee rire peteĩ téxto ou porãtava pe ermánope, eiporavo peteĩ párte ha eporandu chupe mbaʼépa opensa. Por ehémplo, ikatu relee 2 Corintios 4:16 ha upe rire eporandu: “¿Reñandúmavapa Jehová nemombarete hague resegi hag̃ua reservi chupe?”. Peichagua porandu penepytyvõta ‘peñomokyreʼỹ hag̃ua’ (Rom. 1:12, NM).

Ermanokuérape igústo jepi omombeʼu mbaʼépa opensa peteĩ téxtore

Ikatu avei remokyreʼỹ peteĩ ermánope reñeʼẽramo chupe peteĩ Ñandejára rembiguái yma guarére, ohasa vaʼekue avei haʼe ohasáva hína. Por ehémplo, oĩ ermáno ndovyʼavéiva. Péicha jave ikatu peñeʼẽ Ana térã Epafrodito rehe. Koʼã Jehová siérvo oñedeprimi vaʼekue, upéicharõ jepe, akóinte iñimportánte Ñandejárape g̃uarã (1 Sam. 1:9-11, 20; Filip. 2:25-30). Jahechaháicha, iporãta pehesaʼỹijóramo umichagua ehémplo oĩva la Bíbliape.

EÑEINTERESA MEMÉKENA ERMANOKUÉRARE

Pe visíta rire jepe ikatu rehechauka reñeinteresaha umi ermánore (Hech. 15:36). Por ehémplo, reho mboyve hógagui, ikatu reinvita chupe pepredika hag̃ua oñondive. Jahechamína mbaʼépa ojapo Bernard, peteĩ ermáno heta áñorema oservíva ansiánoramo. Ohecha jeývo peteĩ ermáno ovisita vaʼekuépe, oñemboja hendápe ha imanduʼa peteĩ konsého omeʼẽ vaʼekuére chupe ha oporandu: “¿Mbaʼetekópa reho hese hína?”. Reñeinteresáramo umi ermánore, rehechakuaáta noiméipa oikotevẽ reipytyvõve chupekuéra.

Koʼág̃a koʼýte umi ermáno tekotevẽ oñandu ñañangarekoha hesekuéra, ñantende ha jahayhuha chupekuéra (1 Tes. 5:11). Upéicharõ, rejapo mboyve peteĩ visíta de pastoréo, repensa vaʼerã umi mbaʼe ohasávare hikuái. Ejerure Jehovápe tanepytyvõ ha eiporavo porã umi téxto reiporútava. Upéichamante rejuhúta umi ñeʼẽ ikatúva omokyreʼỹ pe “ikaneʼõvape”.

^ párr. 2 Oñekambia umi téra.