“Cristo Jesús [...] oñemeʼẽ ñanderehehápe ikatu hag̃uáicha [...] ñanemopotĩ imbaʼerã. Péicha oikóta ñandehegui peteĩ puévlo imbaʼe teéva, ikyreʼỹva ojapo hag̃ua iporãva.” (TITO 2:13, 14, NM)

1, 2. ¿Mbaʼe priviléhio ijojahaʼỹvapa jareko, ha mbaʼéichapa nde reñeñandu upévare?

HETA tapicha omombaʼeterei oñemeʼẽramo chupekuéra peteĩ prémio ohupyty haguére peteĩ mbaʼe iñimportánteva. Por ehémplo, oĩ ohupytýva pe Premio Nobel oñehaʼã rupi omoingo porã umi grúpo térã tetãnguéra oñorairõvape. Péro tuichaiteve mbaʼe Ñandejára ñandejokuái haguére irrepresentánteramo ñaipytyvõ hag̃ua umi héntepe ikatu hag̃uáicha oñemoĩ porã hendive.

2 Ñande, testígo de Jehová jareko upe priviléhio ijojahaʼỹva. Ñandejára ha Cristo omanda rupi ñandéve, jajerure asy ñande rapichakuérape oñemoĩ porã hag̃ua Jehovándi (2 Cor. 5:20). Ñandejára ojevale ñanderehe ñaipytyvõ hag̃ua umi héntepe ikatu hag̃uáicha oñemoag̃uise hese. Upéicha rupi, hetaiterei tapicha oĩva 235 rasa tetãme oservi Jehovápe hekoitépe ha oreko esperánsa oikovévo opa ára g̃uarã (Tito 2:11). Ñanekyreʼỹgui ñande pyʼaite guive, ñainvita ‘oimeraẽ hoyʼusévape toyʼu pe y oporomoingovévagui, opagaʼỹre mbaʼeve’ (Rev. 22:17, NM). Ñamombaʼeterei rupi ko priviléhio ha ñañemeʼẽmbaitégui ñakumpli hag̃ua ko tembiapo, ikatu ojeʼe ñanderehe ñaimeha peteĩ puévlope “ikyreʼỹva ojapo hag̃ua iporãva” (Tito 2:14). Jahechamína koʼág̃a mbaʼéichapa ñanekyreʼỹramo, ñaipytyvõ ñande rapichakuérape oñemoag̃ui hag̃ua Jehováre. Ñepyrũrã jahecháta mbaʼéichapa jahechaukáta ñanekyreʼỹha japredika jave.

EHAʼANGÁKENA JEHOVÁ HA JESÚSPE NEKYREʼỸVO

3. ¿Mbaʼépa jahupytýta ‘Jehová ikyreʼỹeterei’ rupi?

3 Omombeʼúvo ojehupytýtava Ñandejára Raʼy goviérno rupive, la Biblia heʼi: “Jehová ipuʼakapáva ikyreʼỹeterei ojapo hag̃ua koʼã mbaʼe” (Is. 9:7, NM). Upéva ohechauka ñande Ru yvagagua oipotaitereiha yvyporakuéra ojesalva. Iñehémplo ñanemboʼe tekotevẽha ñanekyreʼỹ ñakumplívo pe tembiapo Haʼe omeʼẽva ñandéve japredika hag̃ua pe marandu porã oñeʼẽva Irréinore. Ñaipytyvõséramo umi héntepe oikuaa hag̃ua Jehovápe, jahechauka  ñaína ñahaʼangaha chupe. Upévare, ¿redesidímapa rejapo opa ikatúva reikuaauka hag̃ua pe marandu porã? (1 Cor. 3:9.)

4. ¿Mbaʼéichapa Jesús ohechauka ikyreʼỹetereiha opredika hag̃ua?

4 Ñapensamíntena avei Jesús rehe. Haʼe ohechauka vaʼekue ikyreʼỹetereiha omombeʼu hag̃ua pe marandu porã ha ombaʼapo meme upe tembiapópe. Oĩramo jepe heta oñemoĩ mbaretéva hese, oñemeʼẽmbaite vaʼekue opredika hag̃ua omano meve (Juan 18:36, 37). Hiʼarive og̃uahẽmbotávo pe tiémpo omanotaha, koʼýte oñehaʼãmbaite oipytyvõ umi héntepe oikuaa hag̃ua Jehovápe.

5. ¿Mbaʼépa ojapo Jesús ohechaukaháicha pe ehémplo haʼe voi omoĩ vaʼekue?

5 Opávo ohóvo áño 32, Jesús omombeʼu ko ehémplo: Peteĩ karai oreko iparraltýpe peteĩ ígo máta 3 áñorema ndahiʼáiva. Upémarõ omanda oñekytĩ hag̃ua, péro pe chokokue heʼi chupe tohaʼarõʼimínte ikatu hag̃uáicha omoavóno jahecha ndahiʼáipa ág̃a (elee Lucas 13:6-9). Ofaltárõ guare seis mése rupi Jesús omano hag̃ua, saʼieterei gueteri oĩ umi omoirũva chupe. Péro ohechauka haguéicha pe ehémplope, upe tiémpo hembývape chupe koʼýte oñemeʼẽmbaite opredika hag̃ua Judea ha Peréape. Ha omano mboyvemi haʼe hasẽ umi hudíore oikuaágui “haʼekuéra ohendu [hague] péro ndojapói” (Mat. 13:15, NM; Luc. 19:41).

6. ¿Mbaʼérepa japredikave vaʼerã koʼág̃a rupi?

6 Hiʼag̃uimbaitéma ningo pe ára oñehunditaha ko múndo oĩva Satanás poguýpe, upévare koʼýte japredikave vaʼerã (elee Daniel 2:41-45). ¡Ajépa tuicha mbaʼe jaservi Jehovápe itestígoramo! Ko yvy ape ári ñande añoite ñamombeʼu umi héntepe oñesolusionataha entéro provléma ombohasa asýva yvyporakuérape. Ndaʼareiete, peteĩ periodísta heʼi avave ndaikatuiha ombohovái ko porandu: “¿Mbaʼérepa umi ivuénova ohasa asy?”. Péro Ñandejára omeʼẽ opavave kristiánope pe rresponsavilida ha pe priviléhio ombohovái hag̃ua la Biblia rupive koʼãichagua porandu entéro ohendusévape. ‘Jaheja vaʼerã pe espíritu sánto tañanemombarete’ jajapo hag̃ua ko tembiapo iñimportantetéva (Rom. 12:11, NM). Ñandejára ñanevendesi rupi, japredikávo kyreʼỹme ikatúta ñaipytyvõ heta hetave tapichápe oikuaa ha ohayhu hag̃ua Jehovápe.

UMI SAKRIFÍSIO JAJAPÓVA OMBOTUICHA JEHOVÁPE

7, 8. ¿Mbaʼéichapa ombotuicha Jehovápe ñaiméramo jajesakrifika hag̃uáicha hesehápe?

7 Oiko haguéicha Pablo rehe, ikatu jahasa asy japredika haguére, por ehémplo, ‘ndajakéi’ térã ‘ndajaguerekói jaʼu vaʼerã’ (2 Cor. 6:5, NM). Umi mbaʼe Pablo ohasa vaʼekue ohechauka sapyʼánte tekotevẽtaha jajesakrifika. Ikatu upéva ñanemomanduʼa umi prekursór rehe, omotenondéva opa mbaʼe ári pe predikasión ha hiʼarive ombaʼapo vaʼerã oñemantene hag̃ua. Ñapensamína avei umi misionéro oñemeʼẽmbaitévare oipytyvõ hag̃ua umi héntepe tetã ambuépe (Filip. 2:17). Ha ¿mbaʼépa jaʼekuaa umi ansiánore? Haʼekuéra heta vése ni ndokarúi térã ndokéi oñatende hag̃ua Jehová ovechakuérare. Avei oĩ umi ermáno ijedáva térã hasykatúva, ojapóva ikatúva guive oho hag̃ua rreunionhápe ha opredika hag̃ua. ¡Ajépa jaguerohoryete koʼã ermánope jahechávo mbaʼeichaitépa ojesakrifika oservívo Jehovápe! Ha umi hénte ojesarekóva hesekuéra opyta omombaʼeve avei ñane rembiapo.

8 Peteĩ karai omondo peteĩ kárta pe diário Boston Target-pe, (Lincolnshire, Reino Unido) ha heʼi: “Umi tapicha ndojeroviavéima ohóvo irrelihión rehe [...]. ¿Mbaʼépa ojapo pe ára pukukue umi pastór? Haʼekuéra ningo ndohói oheka umi héntepe hógape, ojapo haguéicha Cristo [...]. Amalisia umi testígo de Jehová añoite ojepyʼapy hapichakuérare, upévare osẽ oheka chupekuéra ha omomarandu meme pe añetegua”. Ko múndope umi hénte oiko vyʼarã rapykuéri, ñande katu ñaime jajesakrifika hag̃uáicha  jaservívo Jehovápe, ha upéva ombotuicha chupe (Rom. 12:1).

Umi ñanderecháva ñaime jave predikasiónpe oikuaa jaguerahaha pe marandu porã

9. ¿Mbaʼépa ñanemomýita ñanekyreʼỹ hag̃ua jajapóvo iporãva predikasiónpe?

9 Péro, ¿mbaʼépa jajapo vaʼerã haʼetéramo ñaneateʼỹha koʼág̃a ñakumpli hag̃ua pe tembiapo Jehová omeʼẽva ñandéve? Tekotevẽ jajepyʼamongeta umi mbaʼe Ñandejára ojapóvare ñane predikasión rupive (elee Romanos 10:13-15). Ojesalva hag̃ua, umi hénte tekotevẽ ombotuicha Jehová réra, péro avave ndojapomoʼãi upéva ñande ndajapredikáiramo chupekuéra. Ñantendévo koʼã mbaʼe, ñanemomýi vaʼerã akóinte ñanekyreʼỹ hag̃ua jajapóvo iporãva ha ñamombeʼu meme pe marandu porã oñeʼẽva Ñandejára Rréinore.

ÑANDEREKOPORÃRÕ UMI HÉNTE OÑEMOAG̃UISÉTA ÑANDEJÁRARE

Entéronte ohechakuaáta neonrrádo ha rembaʼapo jejopýramo

10. ¿Mbaʼérepa jaʼekuaa ñanderekoporãramo ñande rapichakuéra oñemoag̃uisetaha Jehováre?

10 Iñimportanteterei ningo ñanekyreʼỹ japredikávo, péro nodependéi upévarente umi hénte oñemoag̃ui hag̃ua Ñandejárare. Oĩ ambue mbaʼe tekotevẽva jajapo: jaiko vaʼerã kristiáno teéicha. Pablo ohechauka vaʼekue upéva iñimportanteha ohaírõ guare: “Ni mbaʼevéicharõ ndorojapói mbaʼeve penemoñepysangátava, ani hag̃ua ojetopa mbaʼeve ivaíva ore servísiope” (2 Cor. 6:3, NM). Jajapóramo opa mbaʼe hekopete ha ñane ñeʼẽ ipotĩramo, omoporãve umi mbaʼe ñamboʼéva, ha umi ñanderecháva omombaʼeguasuséta avei Jehovápe (Tito 2:10). Pyʼỹinte ñahendu ojehupytyha heta mbaʼe iporãva umi tapicha ojesareko rupi jaiko lájare.

11. ¿Mbaʼérepa jajepyʼamongeta vaʼerã umi mbaʼe jajapóvare?

11 Umi mbaʼe porã jajapóva ikatu omomýi umi héntepe oñemoag̃ui hag̃ua Jehováre, péro ndajaikóiramo hekópe, ñande rapichakuéra oñemomombyrýta chugui. Upévare, ñaiméramo ñande travahohápe, ñande rógape térã eskuélape, ñañehaʼãmbaite vaʼerã ani hag̃ua avave otopa defékto ñanderehe japredikahápe térã jaiko lájare. Jaikuaáramo peteĩ  mbaʼe ivaiha ha upéicharõ jepe jajapo jey jey, katuete hoʼa vaíta ñandéve (Heb. 10:26, 27). Upéva ñanemomýi vaʼerã ñañemboʼe ha jajepyʼamongeta hag̃ua umi mbaʼe jajapóvare jaikóvo ha jahechakuaa mbaʼépa umíva heʼi ñanderehe. Ko múndo ningo ivai vaive ohóvo, péro umi ipyʼaporãva ohechakuaavéta “mbaʼéichapa [idiferénte] ojuehegui imarangatúva ha iñañáva, pe Ñandejárape omombaʼéva ha pe nomombaʼéiva” (Mal. 3:18). Jahechaháicha, ñanderekoporãrõ ñaipytyvõ ñaína ñande rapichápe oñemoĩ porã hag̃ua Ñandejárandi.

12-14. ¿Mbaʼépa opensa heta tapicha ohechávo ñaaguantaha umi mbaʼe ijetuʼúva? Emoĩ peteĩ ehémplo.

12 Ohaírõ guare umi Corintoguápe, Pablo omombeʼu ohasa asy hague, ombohovái hague umi mbaʼe ijetuʼúva, oñembyepoti ha oñemondo hague chupe kárselpe (elee 2 Corintios 6:4, 5). Jagueropuʼakávo umi mbaʼe ipohyietéva omokangyséva ñande jerovia, umi ñanderecháva ikatu oservise avei Ñandejárape. Jahechamína peteĩ ehémplo: Ndaʼareguasúi, peteĩ puévlope oĩva Angólape heta hénte opuʼã umi testígo de Jehováre ohundi hag̃uáicha chupekuéra. Upearã omongora 2 ermánope ha 30 persónape ohóva jepi rreunionhápe, ha upéi ombyaty umi hénte uperupiguápe ohecha hag̃ua hikuái mbaʼéichapa oñembyepoti chupekuéra huguy peve. Reiete ningo oñemaltrata chupekuéra; umi mitã ha kuñanguéra jepe ndojehejareíri. Umi iñañáva ojapo péicha ikatu hag̃uáicha omongyhyje umi héntepe ani hag̃ua ohendu Testigokuérape. Péro ohecha rire koʼã mbaʼe, heta umi oikóva upe puévlope ojerure oñembostudia hag̃ua chupekuéra. Upe guive oñehendu porãiterei pe predikasión, hetave hénte ostudia la Biblia ha umi ermáno ohupyty heta vendisión.

13 Ko ehémplo ohechauka ñande rapichakuéra ikatuha odesidi oservi Jehovápe ohechávo ñadefendeha la Biblia omboʼéva. ¡Oiméne heta tapicha oñemoĩ porã Jehovándi ohecha rire Pedro ha umi ótro apóstol oaguanta hague ojejopy vaírõ guare chupekuéra! (Hech. 5:17-29.) Ñane tiémpope avei, ikatu ñane kompañerokuéra de traváho térã eskuelapegua, ỹrõ ñane hénte odesidi avei oservi Jehovápe ohechávo jagueropuʼakaha oĩramo oñemoĩva ñanderehe.

14 Koʼág̃arupi heta lugárpe ojepersegi ñane ermanokuérape. Por ehémplo, Arméniape 40 ermáno rupi oĩ kárselpe ndojapói haguére servísio militár, ha ikatu voi amo gotyove hetavépe ojejagarra. Eritréape avei 55 Testígo de Jehovápe ojereko kárselpe, ha ijapytepekuéra oĩ orekóva 60 áño rasáma. Corea del Súrpe katu 700 ermáno rupi oĩ kárselpe ndojapói haguére servísio militár. Ko tetãme ojepersegi Testigokuérape ojapóma 60 áño. Heta tetãme ojepersegi mbarete ñane ermanokuérape, upéicharõ jepe iñeʼẽrendu hikuái Ñandejárape. Jajerurékena Jehovápe koʼã ermáno rembiasakue tombotuicha chupe ha toipytyvõ entéro tapicha ipyʼaporãvape oñemoag̃ui hag̃ua hese (Sal. 76:8-10).

15. Emombeʼu peteĩ ehémplo ohechaukáva ñande rapichakuéra oikuaaseha pe añetegua ohechávo ñaneonrradoha.

15 Heta tapicha oikuaase avei pe añetegua ohechávo ñaneonrradoha (elee 2 Corintios 6:4, 7). Jahechamína peteĩ ehémplo. Peteĩ ermána ojupi kolektívope, ha opagáta jave ipasáhe, peteĩ ikonosída heʼi chupe ani hag̃ua opaga ohótagui ag̃uieterei. Pe ermána heʼi iporãveha opaga ipasáhe ohótarõ jepe pe ótra paráda pevénte. Upéi pe kuñakarai oguejy pe kolektívogui. Upémarõ pe chofér oporandu pe ermánape: “¿Nde piko testígo de Jehová mbaʼe?”. Haʼe heʼi: “Si, ¿mbaʼére piko?”. Pe karai ombohovái: “Ahendu kuri eñemongetárõ guare pe kuñakaraíndi, ha che aikuaa porã umi Testígo ndoporombotavyiha ha iñonrradoha”. Heta mése rire, peteĩ karai oñemboja ko ermána rendápe peteĩ rreunionhápe ha heʼi chupe: “¿Nemanduʼápa cherehe? Che ningo pe  chofér oñeʼẽ vaʼekue nendive pe pasáhere. Ahechávo nde rejapóva, adesidi astudia la Biblia umi testígo de Jehová ndive”. Jahechaháicha ko ehémplope, umi hénte ohechakuaávo ñaneonrradoha, ohenduse pe marandu porã oikuaágui ikatuha ojerovia ñanderehe.

ÑAMBOTUICHÁKENA ÑANDEJÁRAPE ÑANEREMBIAPO PORÃVO

16. ¿Mbaʼérepa jaʼekuaa ñaipytyvõha ñande rapichápe ñanepasiénsia, japorohayhu ha ñanembaʼeporãramo? Emoĩ peteĩ ehémplo.

16 Jahechaukáramo ñanepasiensiaha, japorohayhu ha ñanembaʼeporãha, ñaipytyvõ ñaína ñande rapichakuérape oñemoag̃uise hag̃ua Ñandejárare. Heta tapicha ojesareko ñanderehe, ha ijapytepekuéra oĩ heta oikuaasevéva Jehovápe, hembipota ha ipuévlope. Umi kristiáno tee oiko ha opensa lája tuichaiterei idiferénte umi ótro rrelihiósogui. Umíva ningo heta vése oñemosánto guaʼu, péro añetehápe oporombotavy hikuái. Por ehémplo, heta omoakãva iglésia oñemborríko hoʼupávo ihentekuéragui ipláta ha ojogua hikuái umi óga ha veíkulo porã porã. Peteĩ pastór katu ojogapo voi hymba jaguápe ha omoĩ chupe áire akondisionádo. Jahechaháicha, heta heʼíva ijehe kristianoha ni michĩmi noñeinteresái omboʼe reimi hag̃ua hapichápe (Mat. 10:8). Síno ojapo haguéicha umi saserdóte Israelgua, “plátare oporomboʼe” ha hiʼarive ndahaʼéi la Biblia heʼiháicha (Miq. 3:11). Haʼekuéra hovamokõi ha noipytyvõi avavépe oñemoĩ porã hag̃ua Ñandejára ndive.

17, 18. a) ¿Mbaʼéichapa ñamombaʼeguasu Jehovápe ñanembaʼeporãramo? b) ¿Mbaʼépa ñanemomýi akóinte jajapo hag̃ua iporãva?

17 Péro ñanembaʼeporãrõ ñande rapichándi ha ñamboʼe chupe pe añetegua, katuete ñag̃uahẽta ipyʼapýpe. Por ehémplo, peteĩ prekursór opredika jave ogahárupi og̃uahẽ peteĩ viúda ijedáva rógape, péro ko kuñakarai ndorresivíri chupe. Ipúvo pe tímbre, haʼe oĩ kuri peteĩ eskalérape ha oñehaʼã okambia peteĩ fóko ikosináme. Upémarõ pe ermáno heʼi chupe: “Ndovaléi ningo péicha rejapeligra, ko neañóva”. Upéi pe prekursór okambia chupe ifóko ha oho. Upe rire ko kuñakarai membykariaʼy oikuaa mbaʼépa oiko ha omombaʼeterei upéva, upémarõ oho oheka pe ermánope oagradese hag̃ua chupe. Tiémpo rire oñepyrũ ostudia la Biblia.

18 ¿Mbaʼérepa nde rejedesidi akóinte rejapo umi mbaʼe iporãva? Oime vaʼerã reikuaa porã ñanekyreʼỹramo predikasiónpe ha jajapóramo opa mbaʼe Jehová oipotaháicha, ñambotuichaha chupe ha ñaipytyvõha ñande rapichakuérape ikatu hag̃uáicha ojesalva (elee 1 Corintios 10:31-33). Jahayhúramo Ñandejárape ha avei umi héntepe, katuete ñanekyreʼỹta jajapo hag̃ua iporãva japredika jave pe marandu porã ha jaikóta kristiáno teéicha (Mat. 22:37-39). Ñañemeʼẽmbaitéramo jajapo hag̃ua iporãva, koʼág̃ama voi javyʼaitereíta ha ñañeñandu porãta. Avei jaipotaitereíta og̃uahẽ pe ára entéro yvypóra ohechaukatahápe oserviha ñande Apohare Jehovápe ipyʼaite guive ikatu hag̃uáicha oñembotuicha chupe.