Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Abril de 2013

 TEMBIASAKUE

Cincuenta áñorema rojapo ore prekursorádo Círculo Polar Ártico ypýrupi

Cincuenta áñorema rojapo ore prekursorádo Círculo Polar Ártico ypýrupi

“Ndéve g̃uarã ningo ndahasýi rejapo hag̃ua nde prekursorádo. Nde tuvakuéra Testígo ha nepytyvõ hikuái”. Péicha roʼe peteĩ ore amíga ojapóvape iprekursorádo. Upémarõ heʼi oréve: “¡Pehendumína! Peteĩnte hína ñande Túva”. Ore amíga heʼíva oremboʼe peteĩ mbaʼe iñimportánteva: ñande Ru yvagapegua oñangareko entéro isiérvore ha omombarete chupekuéra. Ha añetehápe umi mbaʼe rohasáva ohechauka upeichaha.

 ORE ronase vaʼekue Ostrobotnia Septentrionálpe, Finlándiape. Roime 10 ermáno ha roiko vaʼekue ore tuvakuérandi igránhape. Oremitãme heta rohasa asy pe segunda gérra mundiál aja. Roimérõ jepe mombyry pe lugár oñeñorãirõhágui, umi mbaʼe vaieta oikóva opyta ore akãme koʼag̃aite peve. Sapyʼánte rohecha pyharekue pytãmba pe ára ojeity jave vómba Oulu ha Kalajókipe, umi táva namombyrýiva ore rógagui. Ore tuvakuéra oremboʼe rokañy hag̃ua rohecháre umi avión de gérra. Upévare, opokoiterei orerehe ore ermáno ypykue hérava Tauno, omombeʼúrõ guare oréve oĩtaha peteĩ múndo pyahu, ndaiporimoʼãihápe inhustísia.

Orekórõ guare 14 áño, Tauno oaprende Ñandejára Ñeʼẽ omboʼéva olee rupi umi puvlikasión ojapóva umi Estudiánte de la Biblia. Upéicha rupi, oñepyrũrõ guare pe segunda gérra mundiál, haʼe ndojapói pe servísio militár. Upémarõ ojegueraha kárselpe ha heta oñemaltrata chupe. Péro upéva omombareteve Táunope akóinte oservi hag̃ua Jehovápe, ha opredika kyreʼỹve hag̃ua osẽ rire kárselgui. Iñehémplo oremomýi roho hag̃ua umi rreunión ojapóvape Testigokuéra peteĩ táva namombyrýivape. Roho avei umi asambleahápe, péro upearã rombaʼapo jejopy vaʼerã ikatu hag̃uáicha rombyaty ore pláta roviaha hag̃ua: romboyvy ore vesinokuéra ao, roñotỹ sevói, ha rombyaty yva. Hetaiterei ningo orerembiapo pe gránhape, ha ndaikatúigui roho oñondive umi aty guasuhápe, roñoturnámante roho hag̃ua.

Iskiérda guive: Matti (túva), Tauno, Saimi, Maria Emilia (sy), Väinö (veveʼi), Aili, ha Annikki, 1935-pe

Opaite mbaʼe roaprendéva Ñandejára ha hembipotágui, orepytyvõ rohayhuve hag̃ua chupe. Upévare roñemeʼẽ Jehovápe ha áño 1947-pe mokõivéva rojevautisa (Upérõ Annikki oreko 15 áño ha Aili 17). Ore ermána Saimi ojevautisa avei upe áñope. Rombostudia peteĩ ore ermána omendámavape, hérava Linnea, ha haʼe ha ifamíliagui oiko avei testígo de Jehová. Rojevautisa rire, roñehaʼãmbaite rojapo jepi ore prekursorádo de vakasión (auxiliár).

ROÑEPYRŨ ROJAPO ORE PREKURSORÁDO

Iskiérda guive: Eeva Kallio, Saimi Mattila-Syrjälä, Aili, Annikki ha Saara Noponen, 1949-pe

Áño 1955-pe rova Kémipe, peteĩ táva opytáva nórte gotyove. Mokõivéva rombaʼapo un diaite. Upéicharõ jepe, rojaposeterei ore prekursorádo, péro rokyhyje ndaikatúirõ g̃uarã roñemantene. Upémarõ rodesidi rombyaty ore pláta roñepyrũ mboyve pe prekursorádo. Ha upérõ guare roñemongeta pe prekursórandi, oremanduʼa hague iñepyrũme. Haʼe heʼíva oréve orepytyvõ rohechakuaa hag̃ua nañadependéi vaʼerãha umi mbaʼe jarekóvare térã ñane hentekuérare jaservi hag̃ua Jehovápe de tiémpo kompléto. Pe iñimportantevéva hína jajerovia ñande Ru yvagaguáre.

Roviahárõ guare aty guasurã Kuópiope 1952-pe. Iskiérda guive: Annikki, Aili, Eeva Kallio

Upérõ g̃uarã rombyatýma ore pláta roñemantene hag̃uáicha dos mésere. Upémarõ, mayo 1957-pe, kyhyjepópe rojerure rojapo hag̃ua ore  prekursorádo dos mése aja Péllope, peteĩ puévlo opytáva Lapóniape, Círculo Polar Ártico amo gotyo. Ohasa umi dos mése, ha ndoropokói ore plátare. Upévare rojerure jey rosegi hag̃ua ótro dos mése, ha ndoroiporúi jey ore pláta. Upéicha rohechakuaa Jehová oñangarekotaha orerehe. Ojapóma 50 áño roñepyrũ hague ore prekursorádo, ¡ha roguereko gueteri ore aórro! Rojepyʼamongetávo umi mbaʼe rohasávare, roñandu ku Jehová orejagarrarõguáicha ore pógui ha heʼíva oréve: ‘Ani pekyhyje, aju poipytyvõvo’ (Is. 41:13).

Ojapóma 50 áño roñepyrũ hague ore prekursorádo, ¡ha roguereko gueteri ore aórro!

Kaisu Reikko ha Aili predikasiónpe

Áño 1958-pe, ore superintendénte de sirkuíto oremokyreʼỹ rojapo hag̃ua ore prekursorádo espesiál táva Sodankyläpe (Laponia). Upe tiémpope oĩ peteĩ Testígonte upe lugárpe, peteĩ ermána oaprende vaʼekue pe añetegua ñaimoʼãʼỹháicha. Imemby oviaha kuri iñirũnguéra eskuelapeguándi Helsínkipe, Finlandia kapitál. Okorrévo hikuái umi kállere, peteĩ ermána ijedáva oñemboja pe mitãʼi rendápe, itapykuéva pe grúpope ha omeʼẽ chupe peteĩ rrevísta Ñemañaha. Pe ermána heʼi chupe omeʼẽ hag̃ua ág̃a isýpe, ha haʼe ojapo upéicha. Pe kuñakarai olee pe rrevísta ha ohechakuaa haʼeha pe añetegua.

Roalkila peteĩ koty opytáva peteĩ aserradéro ári, ha roiporu upe lugár roiko hag̃ua ha ikatu hag̃uáicha rojapo upépe umi rreunión. Ñepyrũrã orembovy; roime ore mokõi, pe ermána upe tavagua ha imembykuña. Rolee oñondivepa umi informasión ojeporúva upe semánape. Upe rire peteĩ karai ostudiáva la Biblia peteĩ testígo de Jehová ndive ou ombaʼapo pe aserradérope. Haʼe ha ifamília oñepyrũ oremoirũ pe rreunionhápe. Tiémpo rire, pe karai ha hembireko ojevautisa, ha pe ermanoháma omoakã ore rreunionkuéra. Heta kuimbaʼe ombaʼapóva pe aserradérope oñepyrũ ostudia la Biblia ha oiko chuguikuéra Testígo. Ohasávo pe tiémpo, pe grúpo tuichave ohóvo ha oiko chugui kongregasión.

ROHASA UMI MBAʼE IJETUʼÚVA

Mombyrymbyry ningo roho ropredika hag̃ua, ha upéva ijetuʼu jepi. Veránope, roguata heta, rorrema kanóa ha roho visiklétape rovisita hag̃ua umi héntepe oĩva ore territóriope. Ideprovechoiterei oréve ore visikléta, roiporu roho hag̃ua asambleahápe ha rovisita hag̃ua ore tuvakuérape, oikóva mombyryeterei ore roimehágui. Inviérnope, roho kolektívope peteĩ puévlope ha upéi ropredika yvýrupi umi ogaháre. Rovisitapa rire umi óga, roguata ótro puévlo peve. Pe niéve iñanambusu  ha ojahoʼipa jepi umi tape. Pyʼỹinte roguata vaʼerã umi trinéo rapykuerére, péro sapyʼánte umíva jepe ojejahoʼipa. Oñepyrũvo pe primavéra, pe niéve hyku ha huʼũmba ha hasyeterei roguata hag̃ua.

Ropredikahápe oñondive peteĩ día roʼyeterei jave

Roʼyeterei rasa ningo, upévare roñemboao aku porã vaʼerã. Por ehémplo, romoĩ vóta, média lána ha rombojoʼave mokõi térã mbohapy média. Ipukúrõ jepe ore vóta, pyʼỹinte oikepa pype niéve, upévare rog̃uahẽvo ogahárupi, roguapy umi eskalérape ronohẽ hag̃ua pe niéve oikepa vaʼekue ore vótape. Ore tapádo ruguái katu iñakỹmba ojávo pe niévere, ha roʼyvérõ, oñekonhela ha iérroicha hatã. Peteĩ kuñakarai heʼi oréve: “Oime vaʼerã pejerovia mbarete Ñandejárare ajeve peju roʼyetereíramo jepe”. Rog̃uahẽ hag̃ua ko kuñakarai rógape, roguata kuri 11 kilómetro rasa.

Sapyʼánte mombyryeterei roho ha ropytámante roke umi hénte rógarupi. Kaʼaruvévo ohóvo, roñepyrũ roheka moõpa ropytáta. Umi hénte ndorekói komodida, upéicharõ jepe, hory ha imbaʼeporãiterei hikuái. Omoĩ oréve roke hag̃ua ha avei tembiʼu. Heta vése roke rréno, álse, térã óso pire ári. Ha sapyʼánte katu oñemoĩ oréve umi mbaʼe iporãva. Por ehémplo, peteĩ kuñakarai oregueraha peteĩ óga tuichávape dos pisohápe. Upépe oĩ peteĩ koty mbohupápe g̃uarã orekóva peteĩ tupa neporãva, isavana morotĩ asy ha ojevordapáva. Roñemongeta jepi umi ogajárandi la Bíbliare pyharepyte peve. Peteĩ vuéltape katu, roke umi ogajárandi peteĩ kotýpe; haʼekuéra peteĩ ládope, ha ore pe ótro ládo. Roñemongeta hendivekuéra koʼẽmbota peve umi mbaʼe omboʼévare la Biblia. Pe karai ha hembireko oñoturna oporandu hag̃ua oréve heta mbaʼe.

UMI MBAʼE ROHUPYTÝVA PREDIKASIÓNPE

Laponia ndahaʼéi peteĩ lugár oñeñemitỹhápe, upéicharõ jepe iporãiterei tahaʼe veráno térã inviérnope. Péro ore roguerohoryve umi hénte oikuaasévape Jehovápe. Umíva apytépe oĩ heta oúva mombyrýgui oity hag̃ua kaʼaguy. Sapyʼánte ore, mokõi kuña michĩ mimíva, roike ropredika umi ogaʼípe oĩháme atyraite kuimbaʼe tuichaicháva omombaʼéva pe mensáhe ha ohejáva umi puvlikasión.

Rohasa heta mbaʼe orembovyʼáva. Peteĩ árape orereja ore kolektívo oñeadelantágui 5 minúto pe rrelo oĩva terminálpe. Upémarõ rodesidi rojagarra ótro oreguerahátava peteĩ puévlo ndoropredikáivape gueteri. Pe primer ógape oñatende orerehe peteĩ kuñataĩ, ha heʼi: “Péina katu peiméma koʼápe, chéko pohaʼarõma voi hína”. ¿Mbaʼéicha rupípa heʼi oréve péicha? Ore rostudia la Biblia iñermána ndive. Ha pe kuñataĩ ojerure raʼe iñermánape heʼi hag̃ua oréve rovisita hag̃ua avei chupe upe díape. Péro ore ndoroikuaái upéva. Roñepyrũ rostudia la Biblia hendive ha upéi ihentekuéra oikóva ag̃ui upégui ostudia avei. Upe rire rombyaty chupekuéra ostudia hag̃ua oñondivepa,  ha oĩ hikuái 12 voi. Ko famíliape heta oĩ ojevautisa vaʼekue.

Áño 1965-pe roñemondo peteĩ kongregasión oĩvape táva Kuusámope, opytáva Círculo Polar Ártico mboyve, ha koʼag̃aite peve roservi upépe. Upe áñope, orembovy pe kongregasiónpe. Ñepyrũrã umi hénte naorerenduséi irrelihiosoiterei rupi ha ndohayhúigui Testigokuérape. Upéicharõ jepe, heta oĩ omombaʼéva la Biblia ha roñemongeta hendivekuéra umi mbaʼe enterovépe oreinteresávare. Saʼi saʼípe roikuaave umi héntepe, ha dos áño rire rupi ndahasyvéima romoñepyrũ hag̃ua estúdio.

AKÓINTE ROPREDIKA

Koʼãva ostudia vaʼekue la Biblia orendive

Koʼág̃a orekangýma ha norosẽvéima ropredika un diaite, péro katuete lénto ropredika káda día. Peteĩ ore sovríno omokyreʼỹ Áilipe oaprende hag̃ua omaneha veíkulo. Upémarõ osegi peteĩ kúrso ha oñemeʼẽ chupe irrehistrorã 1987-pe, orekórõ guare 56 áño. Upéva orepytyvõiterei ore território tuichaitereígui. Avei ojejapo peteĩ Salón del Reino orekóva peteĩ departaménto ha oñemeʼẽ oréve roiko hag̃ua upépe.

Orembovyʼaiterei rohechávo heta hetaveha umi ermáno. Roñepyrũrõ guare ore prekursorádo pe nórte gotyo Finlándiape, oĩ saʼieterei maranduhára ha opyta mombyrymbyry ojuehegui. Koʼág̃a katu oĩ heta kongregasión oñembyatýva peteĩ sirkuítope. Heta vése, umi aty guasuhápe ou umi ermáno oresaluda ha oporandu oréve oremanduʼápa hesekuéra. Umíva apytépe oĩ umi imitã vaʼekue rombostudiárõ guare ifamíliape. ¡Umi semílla roñotỹ vaʼekue yma, heñói rakaʼe ha koʼág̃a katu hiʼáma! (1 Cor. 3:6.)

Okýramo jepe rosẽ vyʼapópe ropredika

Rokumpli 50 áño ore prekursorádope 2008-pe. Roagradese Jehovápe ikatu haguére roñomokyreʼỹ roaguanta hag̃ua ko tembiapo iporãitévape. Roiko vaʼekue umi mbaʼe roikotevẽmívarente, péro arakaʼeve ndofaltái oréve mbaʼeve (Sal. 23:1). Rohechakuaa reiete rokyhyje hague roñepyrũ hag̃ua ore prekursorádo. Rovyʼaiterei rohechávo Jehová oremombarete hague koʼã áño ohasa vaʼekuépe, haʼe voi opromete haguéicha: “Che romokyreʼỹ ha roipytyvõ, che rojoko che pyapy mbaretépe” (Is. 41:10).