Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Abril de 2013

Jaleékena la Biblia ideprovécho hag̃uáicha ñandéve

Jaleékena la Biblia ideprovécho hag̃uáicha ñandéve

“Añetehápe, che pyʼaite guive aguerohory Ñandejára Léi.” (ROM. 7:22, NM)

1-3. ¿Mbaʼépa jahupyty jaleéramo la Biblia ha jajapo heʼíva pype?

“KOʼẼ koʼẽre aagradese Jehovápe chepytyvõ haguére antende hag̃ua Iñeʼẽ.” Péicha heʼi peteĩ ermána ijedáva, oleéma vaʼekue la Biblia kompletoite cuarenta vése rasa ha oleevéta gueteri ohóvo. Peteĩ ermána imitãva omombeʼu avei oikuaaveha Ñandejárape koʼág̃a ha ojeroviaveha hese olee memégui Iñeʼẽ. Upéicha rupi oñemoag̃uive hese ha heʼi: “Arakaʼeve ndavyʼáiva peichaite peve”.

2 Apóstol Pedro ñanemokyreʼỹ opavavépe ‘jaheka meme hag̃ua pe kamby ipuroitéva, oúva Ñandejára Ñeʼẽgui’ (1 Ped. 2:2, NM). Entéro ojapóva upéva ostudia rupi la Biblia ha osegíva heʼíva pype, ipyʼapy potĩ ha oikuaa porã mbaʼépa ojapóta hekovépe. Avei oheka iñamigorã umi ohayhu ha oservíva Ñandejára añeteguápe. Opa koʼã mbaʼére, haʼekuéra ‘oguerohory Ñandejára Léi’ (Rom. 7:22). Péro ikatu ningo jahupyty hetave mbaʼe iporãva. Jahechamína umíva.

3 Jaikuaavévo Jehovápe ha Itaʼýrape, koʼýte jahayhúta chupekuéra ha ñande rapichápe. Jastudia porã rupi la Biblia, jaikuaa Ñandejára koʼẽrõite ohunditaha ko múndo aña ha osalvataha enterove iñeʼẽrendúvape chupe. Avei ikatu ñamombeʼu umi héntepe peteĩ marandu porã ombovyʼaitereíva chupekuéra. Katuete Jehová ñanevendesíta ñañehaʼã haguére ñamboʼe ñande rapichakuérape umi mbaʼe ñaaprendéva Ñandejára Ñeʼẽgui.

ELEE HA EJEPYʼAMONGETA

4. ¿Mbaʼépa heʼise “ejepyʼamongeta” vaʼerãha relee jave la Biblia?

4 Jehová ndoipotái hembiguaikuéra olee pyaʼe pyaʼe Iñeʼẽ. Haʼe heʼi vaʼekue Josuépe: “Arakaʼeve neremboykéi vaʼerã nde jurúgui ko [léi] kuatiañeʼẽme heʼíva guive, ára ha pyharekuépe ejepyʼamongeta [vaʼerã] hese” (Jos. 1:8, ÑÑB; Sal. 1:2). Upéva heʼise relee vaʼerãha la Biblia, ikatu hag̃uáicha ‘rejepyʼamongeta’ hese. Ha rejepyʼamongetáramo relee jave, nepytyvõta rejesareko hag̃ua umi  téxto ou porãtavare ndéve ha nemokyreʼỹtava upe jave. Releévo umi versíkulo ha istória, remonguʼe vaʼerã ne kũ ha ne rembe ku reñeʼẽ vevyimirõguáicha. Péicha hesakã porãta ndéve umi mbaʼe oĩva Ñandejára Ñeʼẽme ha opokóta nde pyʼapýre. ¿Mbaʼérepa iporã upéva? Rentendévo mbaʼépa Jehová nemboʼese, nemomýita resegi hag̃ua umi konsého haʼe omeʼẽva.

5-7. Peteĩ ehémplo rupive, ehechauka mbaʼéichapa ‘jajepyʼamongetáramo’ la Biblia heʼívare ñanepytyvõ: a) ñanderekopotĩ hag̃ua; b) jatrata porã hag̃ua opavavépe; c) jajerovia hag̃ua Jehováre ijetuʼúramo jepe ñane situasión.

5 Relee ha rejepyʼamongetáramo, koʼýte nepytyvõta rehesaʼỹijo jave umi lívro oĩva la Bíbliape hasyvéva rentende hag̃ua. Jahechamína mbohapy ehémplo. Primero: epensami peteĩ mitãrusu osegiha peteĩ prográma olee hag̃ua Ñandejára Ñeʼẽ ha ohupytyha Oseas. Haʼe olee kapítulo 4 versíkulo 11 guive 13 peve, ha opyta ojepyʼamongeta hese (elee Oseas 4:11-13). ¿Mbaʼérepa ojapo upéva? Umi mbaʼe heʼíva pype omomanduʼa ko mitãrusúpe iñirũnguéra kolehiopegua omboligaitereiha chupe hekovai hag̃ua. Ojepyʼamongeta ha opensa: “Jehová ohecha umi mbaʼe vai jajapóva ñaneañoháme jepe. Ha che nambopochyséi chupe”. Ko téxto oipytyvõ ko mitãrusúpe akóinte hekopotĩ hag̃ua.

6 Segundo: peteĩ ermána olee Joel ha ohupyty kapítulo 2 versíkulo 13 (elee Joel 2:13). Olee ha ojepyʼamongetávo hese, opensa mbaʼéichapa haʼe ikatu ohaʼanga Jehovápe. Ohechakuaa Ñandejára ‘oporoporiahuvereko ha ipyʼaporãha, hasy ipochy hag̃ua ha imbaʼeporãha’. Upémarõ odesidi oñehaʼãmbaitetaha anive hag̃ua otrata vai iménape térã ambue hapichápe, ni ndeʼimoʼãveimaha umi mbaʼe omoñeñandu vaítava chupekuéra.

7 Tercero: peteĩ ermáno operde itraváho ha oipyʼapy chupe mbaʼéichapa omantenéta hembireko ha ifamiliakuéra. Oleévo Nahúm 1:7 ha ojepyʼamongetávo hese, ojuhu Jehová ‘ipyʼaporãha umi hese ojeroviáva ndive’ ha ‘ivai jave oporomoʼãha’. Upéva tuicha okonsola chupe. Ipyʼaguapy ohechakuaávo mbaʼéichapa Ñandejára oñangareko ñanderehe. Upéi olee versíkulo 15 ha ojepyʼamongeta jey hese (elee Nahúm 1:15). Ko ermáno ontende tekotevẽha osẽ opredika ijetuʼúramo jepe, ohechauka hag̃ua ojeroviaha Jehováre ipyʼaite guive. Osegíramo jepe oheka itravahorã, osẽ meme avei predikasiónpe éntre semána.

8. Emombeʼumi peteĩ mbaʼe rejuhu vaʼekue relee jave nde Biblia ha nemokyreʼỹetereíva.

8 Koʼã téxto jahecha vaʼekue oñeguenohẽ umi lívro oĩvagui la Bíbliape haʼetéva hasyha ñantende hag̃ua. Péro ñahesaʼỹijóvo ohai vaʼekue Oseas, Joel ha Nahúm, ha jatopa heta mbaʼe ñanemokyreʼỹetereíva, katuete jaleeséta umi ótro versíkulo ha jajepyʼamongetáta hese. Epensamíntena mbaʼeichaitépa nemoarandúta ha nekonsoláta umi mbaʼe ohai vaʼekue koʼã proféta. ¿Ha mbaʼépa jaʼekuaa umi ótro lívrore? Ñandejára Ñeʼẽ haʼete peteĩ mína oĩháme heta diamánte. ¡Tekotevẽ ñambaʼapo jejopy ñaguenohẽ hag̃ua! Upévare, jaleepaite vaʼerã la Biblia jajuhu hag̃ua umi mbaʼe porãita ñanesãmbyhýtava ñande rekovépe ha omombaretétava ñande jerovia.

REÑEHAʼÃ VAʼERÃ RENTENDE PE RELEÉVA

9. ¿Mbaʼépa jajapo vaʼerã ñantende porãve hag̃ua Ñandejára rembipota?

9 Tekotevẽ jalee Ñandejára Ñeʼẽ ára ha ára, péro upéicha avei iñimportanteterei rentende porã ha rehechakuaa umi mbaʼe hypyʼũvéva oĩva pype. Upearã tuicha nepytyvõta umi puvlikasión omeʼẽva ñandéve Jehová organisasión. Umívape jajuhúta informasión omyesakãva opa mbaʼe jaleéva la Bíbliape, por ehémplo heta tapicha rembiasakue, umi lugár, ha heta mbaʼe iñimportánteva yma oiko vaʼekue. Ha sapyʼánte ndereikuaaporãiramo mbaʼéichapa rejapóta peteĩ mbaʼe retopáva Ñandejára Ñeʼẽme, ikatu avei rejerure peteĩ ansiánope térã ambue ermáno ikatupyrývape  tanepytyvõmi rentende hag̃ua. Ikatu hag̃uáicha jahechakuaa mbaʼeichaitépa iñimportánte ñantende porã la Biblia heʼíva, jahechami Apolos ehémplo. Haʼe ningo peteĩ kristiáno síglo primerogua oñehaʼãmbaite vaʼekue ontende porã Ñandejára Ñeʼẽ.

10, 11. a) ¿Mbaʼépa oipytyvõ vaʼekue Apólospe oiko hag̃ua chugui peteĩ mboʼehára ikatupyrýva? b) ¿Mbaʼépa ñaaprende Apólosgui? (Ehecha pe rrekuádro heʼihápe: “¿Remboʼe porãpa umi informasión ipyahuvéva?”.)

10 Apolos haʼe vaʼekue peteĩ kristiáno hudío ‘oikuaa porãva Ñandejára Ñeʼẽ’. Lívro de Hechos heʼi hese: “Espíritu rupive kyreʼỹme oporomboʼe ha oñeʼẽ hekoitépe Jesús rehe. Péro haʼe oikuaa pe vautísmo Juan opredika vaʼekue añónte”. Apolos ndoikuaái Jesús omyesakã hague peteĩ mbaʼe ipyahúva pe vautísmore, upéicha rupi, nomboʼeporãi oikóvo. Mokõi kristiáno, Áquila ha hembireko Priscila, ohendu chupe opredika jave Éfesope; upémarõ haʼekuéra “omyesakã porãve chupe Ñandejára rape” (Hech. 18:24-26, NM). ¿Mbaʼéichapa oipytyvõ upéva Apólospe?

11 Opredika rire Éfesope, Apolos oho Acáyape. La Biblia heʼi hese: “Og̃uahẽvo, tuichaiterei oipytyvõ chupekuéra kyreʼỹme ha hekoitépe, ohechauka rupi opavave renondépe umi hudío ojavyha, ha Ñandejára Ñeʼẽ rupive ohechauka Jesús haʼeha pe Cristo” (Hech. 18:27, 28, NM). Koʼág̃a ikatúma omyesakã hekoitépe pe vautísmo ojapóva kristianokuéra, ha upéicha “tuichaiterei oipytyvõ” umi disípulo ipyahúvape oñakãrapuʼã hag̃ua ohóvo pe añeteguápe. ¿Mbaʼépa ñaaprende Apólosgui? Haʼe ojapo haguéicha, ñande ñañehaʼãmbaite ñantende porã umi mbaʼe jaleéva la Bíbliape. Péro peteĩ ermáno ikatupyrýva omeʼẽrõ ñandéve konsého ñaporomboʼe porãve hag̃ua, jahechauka vaʼerã ñanderekomirĩha jasegívo heʼíva ñandéve ha jaagradese chupe. Upéichamante ñakumpli porãta ñane rembiapo jaservívo Jehovápe.

 EIPORÚKENA UMI MBAʼE REAPRENDÉVA REPOROPYTYVÕ HAG̃UA

12, 13. Ehechauka mbaʼéichapa jaiporukuaa hendaitépe la Biblia ñaipytyvõ hag̃ua umi estudiántepe ikatu hag̃uáicha oñakãrapuʼã.

12 Ojapo haguéicha Priscila, Áquila ha Apolos, ñande ikatu ñaipytyvõ ñande rapichakuérape. Por ehémplo, sapyʼánte reipytyvõ peteĩ estudiántepe ombohovái hag̃ua peteĩ mbaʼe ipohýiva ikatu hag̃uáicha oñakãrapuʼã pe añeteguápe. ¿Mbaʼéichapa reñeñandu upéicha jave? Térã, oiméramo nde peteĩ ansiáno, ikatu remeʼẽ raʼe konsého la Biblia rupive peteĩ ermánope ombohovái hag̃ua peteĩ mbaʼe ijetuʼúva. ¿Mbaʼéichapa reñeñandu upe kristiáno oagradesérõ ndéve? Katuete ñañeñandu porã ha javyʼaiterei jaiporúvo la Biblia ñaipytyvõ hag̃ua ñande rapichápe ha jahechávo okambiaha hikuái tekotevẽhápe. * Jahechamína mbaʼéichapa jahupyty upéva.

13 Heta isrraelíta oiko vaʼekue Elías tiémpope, ndojedesidíri omombaʼeguasútapa Jehovápe, térãpa umi ñandejára guaʼúpe. Umi konsého Elías omeʼẽ vaʼekue chupekuéra, ikatu oipytyvõ peteĩ estudiántepe ojedesidi hag̃ua oservi Ñandejárape pyʼamokõiʼỹre (elee 1 Reyes 18:21). Térã ikatu peteĩ estudiánte ndojedesidíri oservi Jehovápe okyhyje rupi iñamígo térã ihentekuéragui. Upéicha jave ikatu reipytyvõ chupe reiporúvo Isaías 51:12, 13 (elee).

14. ¿Mbaʼépa nepytyvõta nemanduʼa hag̃ua umi téxto reikotevẽvare reipytyvõ hag̃ua nde rapichápe?

14 Jahechaháicha, jalee jave la Biblia jatopa heta mbaʼe ñandekorrehi, ñanemokyreʼỹ ha ñanemombaretéva. Upéicharõ jepe, ikatu reñeporandu: “¿Mbaʼéicha piko aikuaáta mbaʼe textoitépa ikatu aiporu aikotevẽ jave?”. Upearã relee vaʼerã la Biblia káda día ha ejepyʼamongeta Ñandejára opensávare. Upéicha reikuaáta heta mbaʼe Jehová heʼíva ha pe espíritu sánto nepytyvõta nemanduʼa hag̃ua umi téxtore reikotevẽ jave (Mar. 13:11; elee Juan 14:26). *

15. ¿Mbaʼépa nepytyvõta rentende porãve hag̃ua Ñandejára Ñeʼẽ?

15 Ejapókena Salomón ojapo haguéicha ha ejerure Jehovápe tanemoarandu repredika ha rekumpli hag̃ua ne rembiapo kongregasionpegua (2 Crón. 1:7-10). Tekotevẽ avei resegi umi proféta yma guare ehémplo. Haʼekuéra ningo “heta ostudia ha ohesaʼỹijo porã vaʼekue” Ñandejára Ñeʼẽ oikuaa hag̃ua Jehovápe ha mbaʼépa hembipota (1 Ped. 1:10-12, NM). Apóstol Pablo omokyreʼỹ vaʼekue Timotéope oñakãrapuʼã hag̃ua ‘Ñandejára Ñeʼẽ rupive ha oñehekomboʼe porã’ hag̃ua (1 Tim. 4:6, NM). Resegíramo koʼã konsého, ndekatupyrýta reipytyvõ hag̃uáicha nde rapichápe oñemoag̃ui hag̃ua Jehováre ha nde voi remombaretéta nde jerovia.

ÑANDEJÁRA ÑEʼẼ OÑANGAREKO ÑANDEREHE

16. a) ¿Mbaʼéichapa oipytyvõ umi Bereaguápe ‘káda día ohesaʼỹijo porã haguére Ñandejára Ñeʼẽ’? b) ¿Mbaʼérepa iñimportantete koʼág̃a jalee la Biblia káda día?

16 Umi hudío oiko vaʼekue táva Beréape ojepokuaa “káda día ohesaʼỹijo porã Ñandejára Ñeʼẽ”. Pablo opredikárõ guare chupekuéra, ombojoja hikuái haʼe heʼíva umi mbaʼe oikuaávarema voi, ha heta oĩ ohechakuaáva Pablo omboʼeha pe añetegua, ha “oñepyrũ ojerovia” (Hech. 17:10-12, NM). Upéva ohechauka jajeroviaveha Jehováre jaleéramo la Biblia káda día. Jajerovia heʼise “jagueroviaha pyʼamokõiʼỹre oikotaha katuete umi mbaʼe ñahaʼarõva”, ha ñande ñaikotevẽ upéva ikatu hag̃uáicha jajesalva ha jaike Ñandejára múndo pyahúpe (Heb. 11:1, NM).

17, 18. a) ¿Mbaʼéichapa pe jerovia ha pe mborayhu omoʼã pe kristiáno pyʼapy? b) ¿Mbaʼéichapa ñanepytyvõ pe esperánsa?

 17 Pablo omombeʼu mbaʼérepa iñimportantete jajerovia, japorohayhu ha ñamombarete ñane esperánsa: “Ñande jaikóva arakuépe ñapensa vaʼerã hekópe ha ñamoʼã ñande pytiʼa jerovia ha mborayhúpe. Avei ñapensa meme vaʼerã pe salvasión rehe, upéva omoʼãgui ñane akã peteĩ káskoicha” (1 Tes. 5:8, NM). Peteĩ soldádo ningo tekotevẽ omoʼã ikorasõ oñorairõ jave, péicha avei kristianokuéra oñangareko vaʼerã ipyʼapýre ani hag̃ua hoʼa pekádope. ¿Mbaʼépa jaʼekuaa peteĩ kristiáno ojerovia mbaretévare Ñandejára promésare, ha hiʼarive ohayhu Jehovápe ha hapichakuérape? Peichagua ermáno ohechauka oiporuha pe pytiʼamoʼãha iporãvéva, térã oñangarekoha hekoitépe ipyʼapýre, ha ndojapomoʼãi mbaʼeve omomombyrýtava chupe Jehovágui.

18 Pablo heʼi avei ‘ñapensa meme vaʼerãha pe salvasión rehe’, ha upéva ombojoja peteĩ káskore. Pe soldádo nomoʼãiramo iñakã, ndahasymoʼãi iñenemígope ojuka hag̃ua chupe. Péro orekóramo peteĩ kásko iporãva, ojeatakáramo jepe chupe, ndojegolpeavaimoʼãi. Ñande katu jastudiávo Ñandejára Ñeʼẽ, ñamombareteve ñane esperánsa ha koʼýte ñahaʼarõ Jehová ñandesalvataha. Jarekóramo peichagua esperánsa nañahendumoʼãi apostatakuérape ni “umi ñeʼẽrei ojeʼéva Ñandejára kóntrape”, ojoguáva peteĩ kánserpe (2 Tim. 2:16-19, NM). Ñane esperánsa ñanepytyvõta avei ñambohovái hag̃ua umi tapicha oipotávape jajapo umi mbaʼe Jehová ndoguerohorýiva.

ÑANEPYTYVÕ ÑAMBOHOVÁI HAG̃UA KOʼÃ ÁRA PAHA

19, 20. ¿Mbaʼérepa ñamombaʼete Ñandejára Ñeʼẽ, ha mbaʼéichapa jahechauka upéva? (Ehecha pe rrekuádro heʼihápe “Jehová omeʼẽ chéve aikotevẽva guive”.)

19 Oñemohuʼãvo ohóvo koʼã ára paha, koʼýte jajeroviave vaʼerã Ñandejára Ñeʼẽre. Umi konsého oĩva pype ñanepytyvõ ñakambia hag̃ua tekotevẽhápe ha jagueropuʼaka hag̃ua ñande rete rembipota vai. La Biblia ñanekonsola ha ñanemokyreʼỹ rupi, ikatu ñambohovái umi mbaʼe ijetuʼuetéva omoĩva ñandéve Satanás ha imúndo aña. Ha jahejáramo Jehová ñanesãmbyhy Iñeʼẽ rupive, nañasẽmoʼãi pe tape oporoguerahávagui jeikove opaʼỹvape.

20 Ñanemanduʼa vaʼerã Ñandejára oipotaha “opaichagua tapicha ojesalva”. Ñande jaservíva Jehovápe ñaime “opaichagua tapicha” apytépe, ha avei oĩ umi hénte ikatúvape ñaipytyvõ japredika ha ñamboʼe rupi chupekuéra Ñandejára heʼíva. Péro opavave tapicha ojesalvaséva tekotevẽ “oikuaa porã pe añetegua” (1 Tim. 2:4, NM). Upévare, ikatu hag̃uáicha ñambohovái umi mbaʼe oikóva koʼã ára pahápe ha jajesalva, jalee vaʼerã Ñandejára Ñeʼẽ ha jajapo heʼíva pype. Jaleéramo la Biblia káda día jahechauka ñamombaʼetereiha pe Ñeʼẽ añetegua (Juan 17:17).

^ párr. 12 Añetehápe ningo ñande ndajaiporúi la Biblia jajopy térã ñakondena hag̃ua avavépe. Upéva rangue, ñanepasiénsia ha ñanembaʼeporã vaʼerã umi ostudiávandi la Biblia, Jehová ojapoháicha ñanendive (Sal. 103:8).

^ párr. 14 ¿Mbaʼépa ikatu rejapo oiméramo nemanduʼa mbaʼérehepa oñeʼẽ peteĩ téxto, péro nderesarái mbaʼe lívro, kapítulo térã versíkulopepa oĩ? Ikatu reheka pe índisepe oĩva pe Bíbliape, Watchtower Library, térã pe lívro héravape Gran Concordancia de la Traducción del Nuevo Mundo de las Santas Escrituras.