Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Abril de 2013

Jaiporúkena la Biblia ideprovécho hag̃ua ñandéve ha ñande rapichápe

Jaiporúkena la Biblia ideprovécho hag̃ua ñandéve ha ñande rapichápe

“Ahechakuaa nde léi oĩha hekoitépe opa mbaʼépe.” (SAL. 119:128, NM)

1. ¿Mbaʼérepa jajerovia vaʼerã ñande pyʼaite guive la Bíbliare?

UMI ansiáno ohecha vove peteĩ estudiánte okumplípa tekotevẽva guive ikatu hag̃uáicha osẽ opredika, oñeporandu vaʼerã: “¿Ohechaukápa ko estudiánte umi mbaʼe heʼíva rupive, ogueroviaha la Biblia haʼeha Ñandejára Ñeʼẽ?”. * Enterove osẽséva opredika maranduháraramo, ha opavave oservíva Jehovápe, katuete oguerovia vaʼerã upéva. ¿Mbaʼérepa? Jajeroviárõ la Bíbliare ha jaiporúramo hekoitépe japredika jave, ñaipytyvõta ñande rapichakuérape oikuaa hag̃ua Jehovápe ha ikatúta avei ojesalva.

2. ¿Mbaʼérepa ‘jasegi vaʼerã umi mbaʼe ñaaprende vaʼekue’?

2 Ohaírõ guare Timotéope, Pablo ohechauka mbaʼeichaitépa iñimportánte Ñandejára Ñeʼẽ. Haʼe heʼi: “Nde reñehekomboʼe vaʼekue hekoitépe reguerovia hag̃ua nde pyʼaite guive, upévare akóinte resegi vaʼerã umi mbaʼe reaprende vaʼekue”. Upérõ Pablo imanduʼa “umi mbaʼe” Ñandejára Ñeʼẽ omboʼévare ha oipytyvõ vaʼekue Timotéope ojerovia hag̃ua pe marandu porãre. Koʼãichagua mboʼepy ñanepytyvõ avei koʼág̃a rupi ha ‘ñanemoarandu jajesalva hag̃ua’ (2 Tim. 3:14, 15, NM). Pyʼỹinte jaiporu Pablo heʼi vaʼekue 2 Timoteo 3:16-pe (elee), jahechauka hag̃ua umi héntepe la Biblia ouha Ñandejáragui. Péro umi mbaʼe heʼíva upépe ñanemboʼe hetaitereive mbaʼe ideprovéchova. Ñahesaʼỹijo porãmína ko versíkulo jahecha hag̃ua “oĩha hekoitépe” opa mbaʼe Jehová omboʼéva, ha koʼýte jajeroviáta hese (Sal. 119:128).

“IDEPROVÉCHO ÑAPOROMBOʼE” HAG̃UA

3-5. a) ¿Mbaʼépa ojapo heta hénte ohendu rire Pédrope Pentekostéspe, ha mbaʼérepa? b) ¿Mbaʼérepa heta tapichágui oiko kristiáno Tesalónicape? c) ¿Mbaʼépa ohecharamo ñande rapichakuéra japredika jave?

3 Jesús heʼi umi Israelguápe: “Amondo pene rendápe profetakuéra, kuimbaʼe iñarandúva ha mboʼeharakuéra”  (Mat. 23:34, NM). Upérõ oñeʼẽ hemimboʼekuérare. Haʼe omboʼéma kuri chupekuéra oiporu hag̃ua Ñandejára Ñeʼẽ opredika jave. Pentekostés áño 33-pe, apóstol Pedro ojapo peteĩ diskúrso Jerusalénpe hetaiterei tapicha renondépe. Haʼe ningo peteĩ ‘mboʼehára’ avei, ha oiporu heta párte oĩva Escrituras Hebréaspe. Ohendúvo mbaʼéichapa omyesakã Ñandejára Ñeʼẽ, heta hénte “oñeñandu vaieterei” hembiapo vai haguére, oñearrepenti ha ojerure Ñandejárape operdona hag̃ua chupekuéra. Upe díape, tres mil tapicha rupi ojevautisa ha oiko chuguikuéra kristiáno (Hech. 2:37-41, NM).

4 Apóstol Pablo, haʼéva avei ótro ‘mboʼehára’, oviaha mombyrymbyry Jerusaléngui opredika hag̃ua pe marandu porã. Por ehémplo, táva Tesalónicape, opredika umi oĩvape peteĩ sinagógape. “Mbohapy sábadore omboʼe ha oipytyvõ chupekuéra ojepyʼamongeta hag̃ua Ñandejára Ñeʼẽre, omyesakã ha ohechauka Ñandejára Ñeʼẽ rupive mbaʼérepa tekotevẽ raʼe Cristo ohasa asy ha opuʼã jey omanóva apytégui.” ¿Mbaʼépa oiko upéi? “Ijapyteguikuéra oĩ oñepyrũva ojerovia”, ha “péicha avei ojapo heta griégo” (Hech. 17:1-4, NM).

5 Koʼág̃a rupi heta tapicha ohecharamo mbaʼeichaitépa Ñandejára rembiguaikuéra ikatupyry oiporu hag̃ua la Biblia. Por ehémplo, Suízape peteĩ ermána olee la Biblia peteĩ karaípe, ha pe karai oporandu chupe: “¿Mbaʼe rrelihiongua piko peẽ?”. Haʼe ombohovái: “Che ha che irũ ningo testígo de Jehová hína”. Upémarõ pe karai heʼi: “Akalkula voi kuri upeichaha. ¿Máva voi piko ótro oúta che rogaitépe olee hag̃ua chéve la Biblia?”.

6, 7. a) ¿Mbaʼéichapa umi omboʼéva kongregasiónpe ikatu oiporu porã la Biblia? b) ¿Mbaʼérepa iñimportanteterei jaiporu porã la Biblia ñaporomboʼe jave?

6 ¿Mbaʼéichapa ikatu jaiporu porãve la Biblia ñaporomboʼe jave? Oiméramo oñemeʼẽ ndéve rejapo hag̃ua diskúrso, relee vaʼerã umi téxto iñimportantevéva. Releénte rangue peteĩ kópia ỹrõ peteĩ aparátogui, térã erénte rangue mbaʼéguipa oñeʼẽ pe téxto, reavri vaʼerã nde Biblia ha relee upégui, ha remokyreʼỹ vaʼerã umi nerendúvape ojapo hag̃ua avei upéicha. Reipytyvõ hag̃ua enterovépe oñemoag̃uive hag̃ua Jehováre, rehechauka vaʼerã mbaʼéichapa ikatu ojejapo heʼíva upe téxtope. Emombeʼu rangue umi tembiasakue igústo reínteva térã remoĩ umi ehémplo hasýva oñentende hag̃ua, reiporuve vaʼerã ne tiémpo remyesakã porã hag̃ua Ñandejára Ñeʼẽ.

7 Péicha avei, reiporu jave umi puvlikasión restudia hag̃ua peteĩ tapichándi, ani rehasa rei umi téxto. Remokyreʼỹ vaʼerã ne estudiántepe olee hag̃ua umíva ha eipytyvõ chupe ontende hag̃ua. Natekotevẽi rehesaʼỹijo pypukueterei umi téma rejaporõguáicha diskúrso, síno reheja vaʼerã pe estudiánte teʼi mbaʼépa ontende. Ere rangue mbaʼépa ojapo térã oguerovia vaʼerã, iporãve rembaʼeporandu chupe ikatu hag̃uáicha opensa ha ohechakuaa pe oĩ porãva. *

IDEPROVÉCHO “ÑAÑEMOÑEʼẼ” HAG̃UA

8. ¿Mbaʼépa Pablo tekotevẽ raʼe ombohovái?

8 Pyʼỹinte ñapensa umi ansiáno añoite ikatuha oñemoñeʼẽ, térã osensura umi oikotevẽvape. Ha añetehápe haʼekuéra oñemoñeʼẽ mbarete vaʼerã “umi opeka memévape” (1 Tim. 5:20, NM; Tito 1:13). Péro iñimportánte avei ñandete voi ñañesensura. Por ehémplo, Pablo hekoporã ha oservi vaʼekue Ñandejárape pyʼapy potĩ reheve (2 Tim. 1:3). Upéicharõ jepe, haʼe ohai: “Ahecha che retépe oĩha ótra léi, oñorairõva Ñandejára Léi ndive oĩva che akãme, ko léi haʼe hína pe pekádo oĩva che retépe ha cheguerekóva ipoguýpe”. Ñahesaʼỹijóvo umi mbaʼe Pablo heʼi vaʼekue upérõ, ñantende porãvéta mbaʼeichaitépa oñehaʼã ogueropuʼaka hag̃ua hete rembipota vai (elee Romanos 7:21-25).

9, 10. a) ¿Mbaʼe mbaʼépa oiméne ijetuʼu raʼe Páblope ogueropuʼaka hag̃ua? b) ¿Mbaʼépa oiméne ojapo ombohovái hag̃ua hete rembipota vai?

 9 ¿Mbaʼe mbaʼépepa ikangy vaʼekue Pablo? Haʼe ningo nomombeʼúi mbaʼépa raʼe umíva, péro ohaírõ guare Timotéope heʼi kuri ‘okopi hague’ Ñandejára puévlore (1 Tim. 1:13, NM). Oiko mboyve chugui kristiáno, opersegi mbarete vaʼekue Jesucristo disipulokuérape ha heʼi voi ‘ipochyeterei hague’ hesekuéra (Hech. 26:11, NM). Ohasávo pe tiémpo ojejokokuaave ha ndaipochyreivéima, upéicharõ jepe, oiméne sapyʼánte ijetuʼu chupe ipuʼaka hag̃ua heʼíva ha opensávare (Hech. 15:36-39). ¿Mbaʼépa oipytyvõ rakaʼe chupe?

10 Ohaírõ guare umi kristiáno Corintoguápe Pablo omombeʼu mbaʼépa ojapo haʼe voi oñesensura hag̃ua (elee 1 Corintios 9:26, 27). Hasýramo jepe chupe, oñemoĩ mbarete hete rembipota vaíre ani hag̃ua ipuʼaka hese. Oiméne oheka umi konsého oĩva Ñandejára Ñeʼẽme, ojerure Jehovápe toipytyvõ chupe ojapo hag̃ua heʼíva upépe, ha oñehaʼãmbaite okambia tekotevẽhápe. * Ñande avei ñañehaʼã jagueropuʼaka ñande rete rembipota vai, ha upévare Pablo ehémplo ideprovechoiterei ñandéve g̃uarã.

11. ¿Mbaʼéichapa ‘jasegi vaʼerã jajesareko ñandejehe’ jahecha hag̃ua jaikópa Ñandejára rapére?

11 Aníkena arakaʼeve jajerovia ñandejehe ha ñaimoʼã natekotevẽveimaha ñañehaʼã ñaime porã hag̃ua Ñandejárandi. Upéva rangue, ‘jasegi vaʼerã jajesareko ñandejehe’ jahecha hag̃ua jaikópa ñaína Ñandejára rapére (2 Cor. 13:5, NM). Jaleévo umi téxto, por ehémplo Colosenses 3:5-10, ñañeporandu vaʼerã: “¿Añehaʼãmbaitépa ambohovái che rete rembipota vai, térãpa añepyrũma apensa ndaivairiha umi mbaʼe Jehovápe ndogustáiva? Aiporu jave Internet, ¿mbaʼépa ajapo osẽramo peteĩ mbaʼe itieʼỹva? ¿Amboty pyaʼépa upéva, térãpa che voi aheka umichagua páhina?”. Jasegíramo umi konsého oĩva la Bíbliape opa mbaʼe jajapóvape, ñanepytyvõta ‘japyta hag̃ua japayhápe ha akóinte ñapensáta hekopete’ (1 Tes. 5:6-8, NM).

IDEPROVÉCHO ‘JAKORREHI’ HAG̃UA HETA MBAʼE

12, 13. a) ¿Mbaʼépa jahupytyse ‘jakorrehi’ jave tekotevẽhápe, ha mbaʼéichapa ikatu jasegi Jesús ehémplo? b) ¿Mbaʼeichagua ñeʼẽpa ndajaiporúi vaʼerã jakorrehi jave heta mbaʼe ñande rapichándi?

12 Pe ñeʼẽ griégo ojetradusíva ‘jakorrehi’ heʼise ñamyatyrõ, ha ñamoĩ porã jey. Sapyʼánte ñande rapicha ontende vai peteĩ mbaʼe jaʼe térã jajapo vaʼekue, upéicha jave tekotevẽ jakorrehi térã ñamyesakã upe oiko vaʼekue. Por ehémplo, umi omoakãva hudiokuéra rrelihión ojeplagea vaʼekue Jesús imbaʼeporã haguére “umi impuésto kovraha ha mbaʼe vai apohándi”. Upémarõ Jesús ombohovái chupekuéra: “Hesãiva noikotevẽi doktór, péro umi hasýva oikotevẽ. Tapeho pejepyʼamongeta mbaʼépa heʼise ko mbaʼe: ‘Aipota peiporiahuvereko pende rapichápe, pejapo rangue sakrifísio’” (Mat. 9:11-13, NM). Haʼe ipyʼaporã ha ipasiénsia opavavére omyesakã hag̃ua Ñandejára heʼíva, upéicha rupi umi hekomirĩva oikuaa Jehová ‘ipyʼaporãha, hasy ipochy hag̃ua, tuicha iporiahuvereko ha nopyrũiha iñeʼẽre’ (Éx. 34:6, ÑÑB). Heta tapicha ou ojerovia pe marandu porãre Jesucristo oñehaʼã rupi ‘okorrehi’ heta mbaʼe.

13 Jesús ehémplo ñanemboʼe mbaʼéichapa ñaipytyvõ vaʼerã ñande rapichápe. Peteĩ ipochýva ikatu heʼi vai guasu: “¡Ñasolusionántema vaʼerã koʼápe la ñane provléma!”. Péro upéva ndahaʼéi oñemboʼéva 2 Timoteo 3:16-pe. La Biblia nomeʼẽi ñandéve permíso japorojaʼo hag̃ua. Umichagua ñeʼẽ “oporokutu kysepeguáicha”, ojapo vai ñande rapicháre ha ndaideprovéchoi avavépe (Prov. 12:18).

14-16. a) ¿Mbaʼépa ikatu ojapo umi ansiáno ‘okorrehi’ hag̃ua umi mbaʼe ermanokuéra iprovléma jave? b) ¿Mbaʼérepa iñimportanteterei tuvakuéra oiporu la Biblia ‘okorrehi’ térã ohekomboʼe jave ifamiliakuérape?

 14 ¿Mbaʼéichapa ikatu jahechauka ñanepasiénsia ha ñandepyʼaporãha ‘jakorrehi’ jave tekotevẽhápe? Por ehémplo, peteĩ matrimónio pyʼỹinte oiko vai, upémarõ ojerure peteĩ ansiánope toipytyvõ chupekuéra anive hag̃ua oiko upéicha. ¿Mbaʼépa ojapóta pe ansiáno? Oladea rangue peteĩme, omeʼẽ vaʼerã chupekuéra konsého oĩva la Bíbliape, ha upearã ikatu oiporu lívro Mbaʼépa ñanepytyvõta javyʼa hag̃ua ñane família ndive, kapítulo 3. Oñemongeta aja hikuái, umi omendáva opensa vaʼerã mbaʼéichapa káda uno osegi porãvéta umi konsého. Tiémpo riremi, pe ansiáno ikatu oporandu mbaʼetekópa oho hese hikuái, ha tekotevẽramo oñemoñeʼẽve vaʼerã chupekuéra.

 15 ¿Mbaʼéichapa tuvakuéra ‘okorrehi’ térã ohekomboʼe vaʼerã ifamíliape ikatu hag̃uáicha oñemoag̃uive hikuái Jehováre? Epensamína tekotevẽha reñemoñeʼẽ ne membykuñáme, térã nde rajy imitãvape ani hag̃ua ojeheʼa peteĩ noipytyvõmoʼãivare chupe. Ñepyrũrã, reikuaa porã vaʼerã mbaʼeichaguápa hína pe amígo térã amíga haʼe oiporavoséva. Upéi, rehechakuaáramo ikatuha operhudika chupe, reñemongeta vaʼerã hendive. Upearã ikatu reiporu pe lívro Lo que los jóvenes preguntan. Respuestas prácticas (volumen 2). Upe rire ikatu rehasave tiémpo hendive ha rejesareko hese pesẽ jave predikasiónpe térã pejediverti jave, reikuaa hag̃ua mbaʼéichapa ojagarra upe konsého remeʼẽ vaʼekue. Nepasiénsia ha retrata porãramo chupe, ne memby térã nde rajy oñandúta reñeinteresaha hese ha rehayhuha chupe. Upéva omomýita ne famíliape osegi hag̃ua umi konsého, ha upéicha ojehekýita umi provléma ikatúvagui ou oiporavo vaíramo iñamigorã.

Pyʼaporãme oiporúramo la Biblia ‘oporokorrehi’ hag̃ua, tuvakuéra oipytyvõ ifamiliakuérape ojehekýi hag̃ua heta provlémagui (Ehecha párrafo 15)

16 Péicha avei ñanepasiénsia ha ñandepyʼaporã vaʼerã ñamokyreʼỹ jave peteĩ hasývape, umi ojepyʼapývape operde haguére  itraváho, térã umi nontendeporãivape peteĩ mbaʼe omboʼéva la Biblia. Añetehápe, tuichaiterei ñanepytyvõ jaiporúramo Ñandejára Ñeʼẽ ‘jakorrehi’ hag̃ua heta mbaʼe.

IDEPROVÉCHO “ÑAPOROHEKOMBOʼE HAG̃UA HEKOITÉPE”

17. ¿Mbaʼérepa jaagradese vaʼerã oĩ jave ñandekorrehíva?

17 “Ndaipóri ovyʼáva ojekorrehi jave, síno hasyeterei enterovépe, péro péicha ñañehekomboʼe rire ñandepyʼaguapy ha ñanderekojoja.” (Heb. 12:11, NM.) Heta kristiáno okakuaapámava imanduʼa itúva ha isy okorrehi hague chupekuéra ha orrekonose upéva ojapo porã hague hesekuéra. Ha jahejárõ Jehová ñandekorrehi umi ansiáno rupive, ñanepytyvõta jaguata hag̃ua pe tape oporoguerahávare jeikove opaʼỹvape (Prov. 4:13).

18, 19. a) ¿Mbaʼéichapa Proverbios 18:13 ñanepytyvõ “ñaporohekomboʼe hag̃ua hekoitépe”? b) ¿Mbaʼépa ojehupyty jepi umi ansiáno ipyʼaporãramo ha ohechaukárõ ohayhuha umi ojavy vaʼekuépe?

18 Ñaipytyvõsérõ ñande rapichápe, ñandekatupyry vaʼerã ñaporohekomboʼe hag̃ua. Jehová omanda kristianokuérape oporokorrehi hag̃ua “hekoitépe” (2 Tim. 3:16, NM). ¿Mbaʼéichapa ikatu jajapo upéva? Jasegi vaʼerã umi konsého oĩva la Bíbliape ñañemoñeʼẽ hag̃ua ñande rapichápe. Por ehémplo, Ñandejára Ñeʼẽ heʼi: “Upe ombohováiva ojapysaka porã mboyve, itavy voi ha katuete oñemotĩ vaʼerã” (Prov. 18:13 ÑÑB). Oñemombeʼúrõ umi ansiánope peteĩ ermáno hoʼa hague peteĩ pekádo ivaietereívape, haʼekuéra oikuaa porã raẽ vaʼerã mbaʼépa pe oikovaʼekue (Deut. 13:14). Upéicharõmante ikatúta ‘oporokorrehi hekoitépe’.

19 La Biblia heʼi avei umi ansiánope oporokorrehi vaʼerãha “pyʼaguapýpe porãnte” (elee 2 Timoteo 2:24-26). Añetehápe ningo peteĩ ermáno ikatu omongyʼa Jehová réra ha omoñeñandu vai ambue tapichápe. Peteĩ ansiáno ipochýramo hese ha upéicha oñemoñeʼẽ chupe, noipytyvõmoʼãi pe ermánope. Péro oñehaʼãramo “imbaʼeporã” Jehová ojapoháicha, omomýita pe ermánope oñearrepenti hag̃ua (Rom. 2:4, NM).

20. ¿Mbaʼe konséhopa osegi vaʼerã umi túva okorrehi jave ifamiliakuérape?

20 Tuvakuéra osegi vaʼerã la Biblia heʼíva ‘omongakuaa ha okorrehi hag̃ua ifamíliape Jehová oipotaháicha’ (Efes. 6:4, NM). Ndokastigái vaʼerã chupekuéra ndoikuaaporãiramo mbaʼépa oiko raʼe. Ha peteĩ oservíva Jehovápe ndovaléi ipochy vai ha ojahéi ifamiliakuérare. Umi ohekomboʼéva mitã, mitãrusu ha mitãkuña, oñehaʼã vaʼerã ohaʼanga Ñandejárape. La Biblia heʼi “Jehová ñanderayhuetereiha ha avei ñandeporiahuverekoha” (Sant. 5:11, NM).

PETEĨ JOPÓI IJOJAHAʼỸVA JEHOVÁ OMEʼẼVA ÑANDÉVE

21, 22. Releévo Salmo 119:97-104, ¿mbaʼe pártepa ohechauka nde reñandúva Ñandejára Ñeʼẽre?

21 Peteĩ kuimbaʼe ijeroviapýva omombeʼu vaʼekue mbaʼérepa ohayhu Jehová Léi (elee Salmo 119:97-104). Haʼe ostudia Ñandejára Ñeʼẽ ha upéicha rupi iñarandu ha ohechakuaa opa mbaʼe hekoitépe ha oĩhaichaite. Osegi rupi umi konsého, ojehekýi umi provléma ohasávagui umi naiñeʼẽrendúiva. Ohesaʼỹijóvo la Biblia ovyʼaiterei ha ohechakuaa ideprovechoha chupe. Haʼe ojedesidi iñeʼẽrendu Jehovápe oikuaágui umi mandáto tuichaiterei oipytyvõ hague chupe.

22 ¿Ndépa remombaʼe Ñandejára Ñeʼẽ? La Biblia nepytyvõta reguerovia hag̃ua Jehová katuete okumplitaha hembipota. Resegíramo umi konsého oĩva pype, ikatúta reñeñangareko ani hag̃ua reʼa umi pekádo oporoguerahávape ñemanóme. Ha ndekatupyrýramo remyesakã hag̃ua Ñandejára Ñeʼẽ, reipytyvõta nde rapichápe akóinte oguata hag̃ua pe tape oporoguerahávape jeikove opaʼỹvape. Upévare, jasegíkena umi konsého ñahesaʼỹijo vaʼekue ha jaiporu la Biblia jaservívo Jehovápe, pe Ñandejára oporohayhúva ha iñaranduetéva.

^ párr. 1 Ehecha lívro Organizados para hacer la voluntad de Jehová, páhina 80.

^ párr. 7 Jesús oporomboʼe jave, oporandúmi: “¿Mbaʼépa peẽ peje?”, ha upéi ohaʼarõ oñembohovái chupe (Mat. 18:12; 21:28; 22:42, NM).

^ párr. 10 Umi kárta Pablo ohai vaʼekue ñanemokyreʼỹ ñambohovái hag̃ua ñande rete rembipota vai (Rom. 6:12; Gál. 5:16-18). Ikatu jaʼe haʼe voi okumpli hague umi mbaʼe heʼíva ótrope ojapo hag̃ua (Rom. 2:21).