“Pehechakuaa umi mbaʼe iñimportantevéva.” (FILIP. 1:10, NM)

1, 2. ¿Mbaʼépa oiméne oikuaaseterei rakaʼe Jesús remimboʼekuéra umi ára pahágui, ha mbaʼérepa?

HASÝPE Pedro, Santiago, Juan ha Andrés opyta haʼeño Imboʼehára ndive. Haʼekuéra ndahesaráiri Jesús heʼi hague pe témplo oñehunditaha (Mar. 13:1-4). Upémarõ oporandu chupe hikuái: “¿Arakaʼépa oikóta koʼã mbaʼe? ¿Ha mbaʼépa oikóta ropilla hag̃ua nde reimemaha, ha ko múndo ára pahaite oñemoag̃uimaha?” (Mat. 24:1-3, NM). Jesús omombeʼu chupekuéra oikotaha heta mbaʼe okambiátava tapichakuéra rekove. Avei heʼi umi mbaʼe ohechaukátava jaikomaha pe ára pahápe ha oñehundipotaitemaha Satanás múndo aña. Oiméne haʼekuéra oikuaaseterei mbaʼéichapa oñekumplíta peteĩva umi mbaʼe Imboʼehára heʼi vaʼekue. Jesús omombeʼu rire oĩtaha gérra, ñembyahýi ha heta hetave hénte iñañáva, heʼi oĩtaha avei peteĩ mbaʼe iporãva: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mat. 24:7-14, NM).

2 Umi disípulo hetáma ovyʼa opredikávo Jesús ndive pe “marandu porã oñeʼẽva Ñandejára Rréinore” (Luc. 8:1, NM; 9:1, 2). Ha oiméne upe jave haʼekuéra imanduʼa Imboʼehára heʼírõ guare: “Añetehápe hetaiterei oĩ pe kóga oñemonoʼõ vaʼerã; umi omonoʼõva katu saʼi. Upévare, pejerurékena pe kóga Járape tombou hetave omonoʼõ vaʼerã ikóga” (Luc. 10:2, NM). Péro, ¿mbaʼéichapa opredikáta hikuái pe marandu porã “oparupiete ko yvy ape ári, ojekuaa hag̃ua opa tetãrupi”? ¿Moõgui piko oúta umi mbaʼapohára? ¡Ovyʼaite vaʼerãmoʼã hikuái ohechárire mbaʼeichaite pevépa oñekumpli koʼág̃a Jesús heʼi vaʼekue Mateo 24:14-pe!

3. ¿Mbaʼéichapa oñekumpli ñane tiémpope Lucas 21:34, ha mbaʼépa ñañeporandu vaʼerã?

3 Pe profesía Jesús heʼi vaʼekue oñekumpli hína ñane  tiémpope. Oĩ hetaiterei kuña ha kuimbaʼe ombaʼapóva peteĩ ñeʼẽme omosarambi hag̃ua opárupi ko yvy apére pe marandu porã oñeʼẽva Ñandejára Rréinore (Is. 60:22). Upéicharõ jepe, Jesús ohechauka vaʼekue koʼã ára pahápe heta kristiánope hasytaha ombaʼapo meme hag̃ua predikasiónpe ha oikotaha ‘oñekevranta’ ojesareko rupi ambue mbaʼére (elee Lucas 21:34). Koʼág̃a ñande avei jahecha mbaʼéichapa oiko upéva heta kristiánore. Oĩ umi ombotapykuéva umi mbaʼe iñimportantevéva. Upéva ojekuaa odesidívare, por ehémplo oiporavo jave itravahorã térã umi estúdio ijyvatevéva, omotenondévo umi mbaʼerepy ha oiporuetereívo itiémpo depórte ha vyʼarã rapykuéri. Heta kristiáno katu ou ikaneʼõ ojepyʼapyeterei rupi hemikotevẽre térã ojopýgui chupekuéra heta mbaʼe. Upévare iporã ñañeporandu: “¿Mbaʼéichapa che aime hína? ¿Mbaʼépa iñimportanteve chéve g̃uarã?”. Umi mbaʼe jadesidívare jahechauka ñaína mbaʼépa hína upéva.

4. a) ¿Mbaʼépa Pablo ojerure Jehovápe umi ermáno Filiposgua rehe ha mbaʼérepa? b) ¿Mbaʼépa ñahesaʼỹijóta ko artíkulope ha pe ótro oúvape, ha maʼerãpa?

4 Síglo primérope opavave kristiáno tekotevẽ vaʼekue oñehaʼãmbaite osegi hag̃ua omotenonde umi mbaʼe omoag̃uítava chupekuéra Ñandejárare. Upévare Pablo ojerure Jehovápe toipytyvõmi umi ermáno Filiposguápe ‘ohechakuaa hag̃ua umi mbaʼe iñimportantevéva’ (elee Filipenses 1:9-11). Ha oĩ vaʼekue heta kristiáno ohechaukáva ‘ojepytaso mbarete ha ipyʼaguasuha omombeʼu hag̃ua kyhyjeʼỹme Ñandejára Ñeʼẽ’, Pablo ojapo haguéicha (Filip. 1:12-14, NM). Koʼág̃a avei hetaiterei ermáno opredika kyhyjeʼỹme Ñandejára Ñeʼẽ. Péro, ¿mbaʼépa ñanemokyreʼỹta ñañemeʼẽmbaite hag̃ua pe tembiapo iñimportantetévape? Ñahesaʼỹijo vaʼerã umi mbaʼe ohupytýva koʼág̃a Jehová organisasión. Ko artíkulo ñanepytyvõta jajepyʼamongeta hag̃ua opa mbaʼe haʼe ojapóvare oñekumpli hag̃ua Mateo 24:14. ¿Mbaʼépa ohupytyse Ñandejára organisasión? Ha ¿mbaʼéichapa ñanekyreʼỹvéta ñande ha ñane família jaikuaávo upéva? Pe artíkulo oúvape jahecháta mbaʼépa ñanepytyvõta ikatu hag̃uáicha ñaaguanta ha ñambaʼapo meme Jehová organisasión ndive.

JEHOVÁ ORGANISASIÓN YVAGAGUA OMBAʼAPO MEME

5, 6. a) ¿Mbaʼérepa Jehová oipota jaikuaa mbaʼéichapa ombaʼapo iñorganisasión? b) ¿Mbaʼépa ohecha Ezequiel peteĩ visiónpe?

5 Oĩ heta mbaʼe Jehová nomoĩkái vaʼekue Iñeʼẽme. Por ehémplo, igústo vaʼerãmoʼã ñandéve omombeʼúrire mbaʼeichaitépa ombaʼapo ñane apytuʼũ térã pe arapy. Péro haʼe nomombeʼúi umíva, upéva rangue ohaika Iñeʼẽme opa mbaʼe tekotevẽva jaikuaa ikatu hag̃uáicha ñantende hembipota ha jaiko haʼe ojerurehaichaite (2 Tim. 3:16, 17). Upéicharõ jepe, la Biblia omyesakã hetaiterei mbaʼe ohechaukáva mbaʼéichapa ombaʼapo Ñandejára organisasión yvágape. Ñanemopirĩ ningo jaleévo umi mbaʼe ohai vaʼekue Isaías, Ezequiel, Daniel ha Juan, ojehechaukahápe mbaʼéichapa Jehová omohenda opaite mbaʼe yvágape (Is. 6:1-4; Ezeq. 1:4-14, 22-24; Dan. 7:9-14; Rev. 4:1-11). Haʼete ku Ñandejára oavríva peteĩ kortína ha ohechaukáva ñandéve umi mbaʼe oikóva yvágape. ¿Mbaʼérepa haʼe oipota raʼe ojehai Iñeʼẽme koʼã mbaʼe?

6 Jehová ningo oipota akóinte ñanemanduʼa ñaimeha iñorganisasiónpe. Koʼág̃a ojejapo hína hetaiterei mbaʼe ikatu hag̃uáicha oñekumpli Ñandejára rembipota, ha ndaikatúi voi jahechapa umi mbaʼe ojejapóva. Por ehémplo, proféta Ezequiel ohecha peteĩ kárro tuicháva orrepresentáva Jehová organisasión yvagagua. Ko kárro ikatu oho pyaʼeterei ha sapyʼaitépe okambia hape  (Ezeq. 1:15-21). Umi irruéda ojerévo, mombyrymbyrýma og̃uahẽ. Ezequiel avei ohechaʼimi mbaʼeichaguápa upe Omaneháva pe kárro: “Ahecha peteĩ iérro hendývaicha ha [...] tata hendývaicha ha ojajáiva ijerekue rehe. [...] Péicha ojajái ñande Ruete rekojajaipa ijerekue rehe” (Ezeq. 1:25-28, ÑÑB). Oiméne pe proféta ijurujái opytávo ohecha rire pe visión. Ohecha Jehová oisãmbyhyha hekoitépe iñorganisasión, okontrolaha opaite mbaʼe ojejapóva ijespíritu sánto rupive. ¡Ajépa iporãite pe visión ohechaukáva Jehová organisasión yvagagua ombaʼapo memeha!

7. ¿Mbaʼérepa omombarete ñande jerovia umi mbaʼe Daniel ohecha vaʼekue peteĩ visiónpe?

7 Proféta Daniel ohecha avei heta mbaʼe omombaretéva ñande jerovia. Peteĩ visiónpe ohecha peteĩ “Ikaraietéva”, orrepresentáva Jehovápe, oguapýva peteĩ tróno hendypáva ha irruédavape (Daniel 7:9). Ñandejára oipota Daniel ohecha iñorganisasión ombaʼapo memeha, térã okumpliha ohóvo hembipota. Ko proféta ohecha avei oñemeʼẽha autorida ‘peteĩ ojoguávape yvypórape’, térã Jesúspe, omoakã hag̃ua Jehová organisasión yvy arigua. Jesucristo goviérno ningo perfékto ha noĩmoʼãi sapyʼaiterãnte. La Biblia heʼi: “Ipokatu opa árape g̃uarã, ha haʼe oporosãmbyhyhápe noñehundimoʼãi arakaʼeve” (Daniel 7:13, 14). Koʼã mbaʼe ñanepytyvõ jajerovia hag̃ua Jehováre ha jahechakuaa hag̃ua umi mbaʼe okumplíva. Haʼe omeʼẽ Itaʼýrape “pokatu, tekomimbipa ha oporosãmbyhy hag̃ua”. Jesús katu ohechauka vaʼekue iñeʼẽrenduha ohasáramo jepe heta mbaʼe ijetuʼúva. Jahechaháicha, Jehová ojeroviaiterei Itaʼýrare. Ha ñande avei jajerovia vaʼerã ñane Mburuvicha Jesucrístore.

8. ¿Mbaʼéichapa oñeñandu Ezequiel ha Isaías Jehová ohechauka rire chupekuéra umi visión, ha mbaʼéichapa umíva ñanepytyvõ?

 8 ¿Mbaʼéichapa ñañeñandu vaʼerã jaikuaa porãvévo Ñandejára organisasión yvagagua? Ezequiel oñeñandu haguéicha, katuete ñamombaʼeterei Jehová ojapóva ha ñanderekomirĩve ñantendévo umi mbaʼe (Ezeq. 1:28). Jajepyʼamongetávo Ñandejára organisasión rehe, ñanekyreʼỹve ñambaʼapo hag̃ua, ojapo haguéicha proféta Isaías. Oñemokyreʼỹrõ guare chupe omombeʼu hag̃ua hapichakuérape umi mbaʼe Jehová ojapóva, haʼe ni ndojeréi oasepta hag̃ua upe tembiapo (elee Isaías 6:5, 8). Haʼe oikuaa porã Ñandejára oipytyvõtaha chupe ombohovái hag̃ua oimeraẽ mbaʼe ijetuʼúva. Péicha avei, jaikuaávo mbaʼéichapa ombaʼapo Jehová organisasión yvagagua, jahechauka vaʼerã ñamombaʼeha upéva ha jajapo opa ikatúva jaservi porã hag̃ua chupe. Jehová organisasión ningo ndopytuʼúi ha oñemeʼẽmbaite okumpli hag̃ua Jehová rembipota. ¡Ajépa ñanemokyreʼỹete jaikuaávo upéva!

JEHOVÁ ORGANISASIÓN YVY ARIGUA

9, 10. ¿Mbaʼérepa oĩmante vaʼerã avei ko yvy ape ári Jehová organisasión?

9 Itaʼýra rupive, Jehová omoĩ avei peteĩ organisasión ko yvy ape ári ombaʼapóva iñorganisasión yvagagua ndive. ¿Mbaʼérepa oĩmante vaʼerã ko yvy ape ári peteĩ organisasión ojejapo hag̃ua pe tembiapo heʼíva Mateo 24:14? Jahechamína mbohapy mbaʼe.

10 Primero, Jesús heʼi kuri hemimboʼekuéra og̃uahẽtaha “mombyryvehápe ko yvy tuichakuére” opredika hag̃ua pe marandu porã (Hech. 1:8, NM). Segundo, tekotevẽ ojejapo opa mbaʼe hendápe porã ikatu hag̃uáicha oñeñangareko umi maranduhárare ha oñemeʼẽ chupekuéra tekotevẽva guive omombarete hag̃ua ijerovia (Juan 21:15-17). Tercero, umi ogueraháva pe marandu porã tekotevẽ oñembyaty omombaʼeguasu hag̃ua Jehovápe ha oñehekomboʼe hag̃ua chupekuéra opredika hag̃ua (Heb. 10:24, 25). Koʼã mbaʼe nosẽmoʼãi péicha reínte. Pe predikasión oñeorganisa vaʼerã hekoitépe ikatu hag̃uáicha Jesús remimboʼekuéra osẽ porã.

11. ¿Mbaʼéichapa jahechauka jarrespetaha Ñandejára organisasión odesidíva?

11 ¿Mbaʼéichapa jahechauka jarrespetaha Ñandejára organisasión odesidíva? Jajerovia vaʼerã umi ermáno Jehová ha Jesús omoĩvare omoakã hag̃ua pe predikasión. Añetehápe ningo ko múndope oĩ heta mbaʼe ikatúva ohesarea koʼã kristiánope. Upéicharõ jepe, Ñandejára organisasión ombaʼapóva ko yvy ape ári ojesareko peteĩ mbaʼérente. ¿Mbaʼépa hína upéva?

OJESAREKO “UMI MBAʼE IÑIMPORTANTEVÉVA” REHE

12, 13. ¿Mbaʼéichapa okumpli hembiapokuéra umi ansiáno, ha mbaʼérepa upéva nemokyreʼỹ?

12 Ko Yvy tuichakuére ojeporavo heta ansiáno ikatupyrývape omotenonde hag̃ua pe predikasión umi tetã oikohápe ha omokyreʼỹ hag̃ua ermanokuérape ombaʼapo meme hag̃ua ko tembiapo iñimportantetévape. Upévare, odesidíta jave peteĩ mbaʼe, oñemboʼe hikuái ipyʼaite guive ojerure hag̃ua Ñandejárape toipytyvõ chupekuéra. Avei ohecha hikuái mbaʼépa heʼi Ñandejára Ñeʼẽ, haʼéva “peteĩ mbaʼe rendy” oporogueraháva “tape porãre”, ha ohesapéva chupekuera ‘haperã’ (Sal. 119:105; Mat. 7:7, 8).

13 Ojejapo haguéicha síglo primérope, umi ansiáno omoakãva pe predikasión koʼág̃a rupi, oñemeʼẽmbaite ‘omboʼe meme hag̃ua Ñandejára Ñeʼẽ’ (Hech. 6:4, NM). Haʼekuéra ovyʼaiterei ohechávo pe marandu porã ohoha tenonde gotyo umi lugár  oikohápe ha avei opárupi ko yvy apére (Hech. 21:19, 20). Oiko rangue omoĩ heta mandáto, koʼã ermáno osegi la Biblia heʼíva ha oheja espíritu sánto oisãmbyhy chupekuéra odesidíta jave mbaʼépa tekotevẽ ojejapo oñembaʼapo meme hag̃ua predikasiónpe (elee Hechos 15:28). Ojapóvo péicha, koʼã ansiáno omoĩ ehémplo neporãva kongregasionkuérape (Efes. 4:11, 12).

14, 15. a) ¿Mbaʼe mbaʼépa ojejapo ñane tiémpope oñemotenonde hag̃ua pe predikasión opárupi? b) ¿Mbaʼéichapa reñeñandu ikatu haguére rembaʼapo meme pe predikasiónpe?

14 Ndajahecháiramo jepe, oĩ heta ermáno ombaʼapo meméva oprepara hag̃ua umi informasión ñaikotevẽva ñamombarete hag̃ua ñande jerovia. Ha umíva jahupyty umi puvlikasión, rreunión ha aty guasu rupive. Avei hetaiterei ermáno ombaʼapo jejopy otradusi hag̃ua koʼã informasión 600 idióma rasápe. Upéicha rupi umi hénte ikatu oaprende iñeʼẽtépe “umi mbaʼe iporãitereíva Ñandejára ojapo vaʼekue” (Hech. 2:7-11, NM). Heta ermáno ha ermána imitãva omombaʼapo umi mákina tuichaicháva ojejapoha puvlikasión. Upéi koʼã puvlikasión oñemondo entéro kongregasiónpe, umi lugár mombyryvehápe jepe.

15 Koʼág̃a rupi ojejapo hetaiterei mbaʼe ikatu hag̃uáicha japredika meme ñane kongregasión ndive. Por ehémplo, oĩ umi ermáno ombaʼapóva ojapo hag̃ua Salón del Reino ha Salón de Asambléa, oĩ heta oipytyvõva umi hasyetévape ha umi lugár oiko haguépe yvyryrýi térã torménta. Oĩ avei opreparáva umi aty guasu ha opaichagua eskuéla ombokatupyrýva ermanokuérape. Koʼãichagua tembiapo sapyʼánte ni ndajahechái ojejapo jave. Péro, ¿mbaʼére piko oñembaʼapoite? 1) Ojepredikave hag̃ua pe marandu porã; 2) ikatu hag̃uáicha umi maranduhára ojerovia mbareteve, ha 3) osegi hag̃ua okakuaa pe rrelihión añetegua. Jahechaháicha, Jehová organisasión ko yvy arigua ojesareko meme umi mbaʼe iñimportantevévare.

JASEGÍKENA PE EHÉMPLO OMOĨVA JEHOVÁ ORGANISASIÓN

16. ¿Mbaʼépa ikatu ñahesaʼỹijo ñande ha ñande família?

16 ¿Ñañemotiémpopa pyʼỹinte jajepyʼamongeta hag̃ua umi tembiapo ojejapóvare Jehová organisasiónpe? Oĩ ermáno ohesaʼỹijóva umi mbaʼe ha ojepyʼamongeta hese haʼeño térã ifamília ndive. Jastudiávo umi visión ohecha vaʼekue Isaías, Ezequiel, Daniel ha Juan, ñañandu mbaʼéichapa umíva opoko ñande pyʼapýre. Pe lívro Los testigos de Jehová, proclamadores del Reino de Dios, umi DVD ha ambue puvlikasión oĩva ñane ñeʼẽme, ñanepytyvõ jaikuaa porãve hag̃ua Ñandejára organisasión.

17, 18. a) ¿Mbaʼéichapa nepytyvõ ko artíkulo ñahesaʼỹijo vaʼekue? b) ¿Mbaʼépa ñañeporandu vaʼerã?

17 Tuichaiterei ningo ñanepytyvõ jajepyʼamongetáramo umi mbaʼe Jehová ojapóvare iñorganisasión rupive. Ha ojapoháicha Ñandejára organisasión, ñande avei jajesareko vaʼerã umi mbaʼe iñimportantevévare. Péicha avei ikatúta ñahaʼanga apóstol Páblope. Haʼe ohai: “Ñandejára oreporiahuvereko haguére rosegi rojapo ko tembiapo ha naorekaneʼõi” (2 Cor. 4:1, NM). Pablo omokyreʼỹ vaʼekue iñirũnguérape kóicha: “Akóintekena jajapo iporãva, péicha og̃uahẽ vove pe tiémpo katuete ñamonoʼõta nañanekaneʼõiramo” (Gál. 6:9, NM).

18 ¿Oĩpa peteĩ mbaʼe ñakambia vaʼerã, tahaʼe ñande térã ñane família, ñamotenonde hag̃ua umi mbaʼe iñimportantevéva? ¿Ikatúpa ñañekontenta jarekomívarente térã ñamboyke umi mbaʼe naiñimportánteiva ñambaʼapo meme hag̃ua predikasiónpe? Pe artíkulo oúvape jahecháta cinco mbaʼe ñanepytyvõtava ñambaʼapo meme hag̃ua Jehová organisasióndi.