Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Marzo de 2013

Enterove ohayhúva Ñandejárape “noñepysangamoʼãi”

Enterove ohayhúva Ñandejárape “noñepysangamoʼãi”

“Ipyʼaguapy umi ohayhúva ne rembipota, ha haʼekuéra noñepysangamoʼãi.” (Sal. 119:165, ÑÑB)

1. ¿Mbaʼéichapa peteĩ kuña ohaʼãva karréra ohechauka noñentregaiha?

IMITÃ guive, Mary Déckerpe ojekuaa vaʼekue iñakuãiterei haguére karrérape. Oikórõ guare peteĩ olimpiáda 1984-pe, opavavénte heʼi haʼe oganataha pe medálla de óro pe karréra de 3.000 métrope. Péro Mary noganái. Oñepysanga peteĩ hapicha odiparávare ijykére ha hoʼa ojegolpea. Hesay hováre osẽmante pe karréragui. Upéicharõ jepe, haʼe noñentregái. Un áño mboyve ohaʼã jey ótra karréra, ha upépe katu oganáma.

2. ¿Mbaʼeichagua karrérapa ñahaʼã ñande kristiáno, ha mbaʼépa jahupytyse?

2 Ñande ñaime avei peteĩ karrérape ha ñañehaʼã vaʼerã ñamohuʼã toiko la oikóva. Ko karrérape natekotevẽi ñaneakuãiterei, péro upéva ndeʼiséi ñañani vaʼerãha mbeguekatu asy, téra japyta japytuʼu mimi. Ko karréra ikatu ñambojoja peteĩ maratón rehe, tekotevẽhápe ñaaguanta ñamohuʼã hag̃ua. Pablo oikuaa Coríntope oñehaʼãha heta kompeténsia, upévare oñeʼẽ peteĩ karrérare ohaírõ guare pe primera kárta umi kristiáno upepeguápe. Haʼe heʼi: “¿Peẽ piko ndapeikuaái peteĩ karrérape enterove odiparaha, péro peteĩmente oñemeʼẽha pe prémio? Pediparána pegana hag̃uáicha pe prémio” (1 Cor. 9:24, NM).

3. ¿Máva mávapa ikatu ohupyty pe jeikove opaʼỹva?

3 La Biblia ñanemokyreʼỹ ñañani hag̃ua ko karrérape (elee 1 Corintios 9:25-27). Pe prémio haʼe hína jeikove opaʼỹva. Umi unhído oikóta yvágape, ha umi ndahaʼéiva unhído katu ko yvy ape ári. Péro ko karréra ndojoguái umi ótrope, enterove og̃uahẽva huʼãme, ogana pe prémio (Mat. 24:13). Umi ndosegíriva pe rreglaménto térã umi nomohuʼãiva pe karréra operde. Hiʼarive ko karrérape añoite ikatu ojehupyty pe jeikove opaʼỹva.

4. ¿Mbaʼérepa heta vése hasy jasegi pe karrérape?

4 Ikatu hag̃uáicha ñamohuʼã pe karréra, tekotevẽ  ñañentrena meme ha ñapensa iñimportantetereiha ñagana, péro upéva heta vése hasy. Koʼag̃aite peve, peteĩ kuimbaʼe añónte omohuʼã vaʼekue ko karréra oñepysangaʼỹre. Upéva hína Jesucristo. Disípulo Santiago heʼi opavave oikóva Cristo pyporére ‘ojavyha heta vése’ (Sant. 3:2, NM). ¡Ajépa añetete upéva! Avave ndaikatúi heʼi ndopekaiha térã ndoúi ni ndohoiha chupe ótro ojavýramo. Sapyʼánte ikatu ñañepysanga, ndajajejokovéi ha jaʼa voi, péro ñapuʼã jey ha jasegi jadipara. Oĩ ermáno hoʼáva, térã ojapo mbaʼe vai ha opyta vaieterei upe rire. Upévare tekotevẽ ótro oipytyvõ chupe oĩ porã jey hag̃ua ha osegi pe karrérape. Jahechaháicha, ikatu hína sapyʼánte, térã heta vése voi, ñañepysanga ha jaʼa (1 Rey. 8:46).

Reʼáramo, reheja vaʼerã ótro nepytyvõ ha epuʼã jey

ANI REHEJA KO KARRÉRA REÑEPYSANGÁRAMO JEPE

5, 6. a) ¿Mbaʼérepa ikatu jaʼe kristianokuéra ‘noñepysangamoʼãiha’, ha mbaʼépa oipytyvõta chupekuéra ‘opuʼã jey’ hag̃ua? b) ¿Mbaʼérepa oĩ nopuʼãvéiva hoʼa rire?

5 Sapyʼánte jaiporu umi ñeʼẽ “oñepysanga”, térã “hoʼa”, ñamombeʼu hag̃ua mbaʼe situasiónpepa oĩ peteĩ ermáno. Ha heta vése la Bíbliape ojeporu koʼã mokõi ñeʼẽ peteĩchaite. Por ehémplo, peteĩ téxto heʼi: “Hekojojáva ikatu hoʼa siete vése jepe, ha opuʼã jeýne katuete; péro iñañávape katu mbaʼe vai omoñepysangáta” (Prov. 24:16, NM).

6 Sapyʼánte umi ojeroviáva Jehováre ou iprovléma térã ojavy, péro haʼe ndohejamoʼãi isiervokuéra oñepysanga ỹrõ hoʼaite, ndaikatumoʼãirõ opuʼã jey. Jaikuaa porã Ñandejára ‘ñanemopuʼã jeytaha katuete’ jaservi hag̃ua chupe ñande pyʼaite guive. Upéva tuichaiterei okonsola opavave ohayhu añetévape Jehovápe. Umi iñañáva katu noñehaʼãséi voi opuʼã jey hag̃ua, ni ndohejái Jehová oipytyvõ chupekuéra ijespíritu ha ipuévlo rupive. ¡Ajépa idiferentete umi ohayhúva Ñandejára léi! “Haʼekuéra noñepysangamoʼãi”, térã ndaipóri oguenohẽtéva chupekuéra pe karréra oporoguerahávagui jeikove opaʼỹvape (elee Salmo 119:165).

7, 8. ¿Mbaʼéicha rupípa Ñandejára ikatu oguerohory jey peteĩ tapicha hoʼa vaʼekuépe?

7 Sapyʼánte peteĩ ermáno ou opekaʼimi ndogueropuʼakáigui umi mbaʼe oipyʼaraʼãva chupe,  ha upéva oikokuaa hese heta vése. Péro ikatu opuʼã ha oñemoĩ porã jey Jehová ndive, oñearrepentíramo ipyʼaite guive ha oñehaʼãmbaite iñeʼẽrendu meme chupe. Upéva jahechakuaa ñahesaʼỹijóramo mbaʼéichapa Jehová otrata vaʼekue Israel yma guarépe (Is. 41:9, 10). Proverbios 24:16 ohechauka ikatuha ‘ñapuʼã jey’ Ñandejára ñandeporiahuvereko rupi (elee Isaías 55:7). Jehová ha Jesucristo voi ohechauka ojeroviaha ñanderehe ñanemokyreʼỹvo ñapuʼã jey hag̃ua (Sal. 86:5; Juan 5:19).

8 Peteĩ odiparáva oñepysanga ha hoʼáramo, ikatu pyaʼe opuʼã jey ha osegi omohuʼã meve pe karréra. Ñande ningo ñañani jahupyty hag̃ua pe jeikove opaʼỹva, ha ndajaikuaái mbaʼe ‘día ha órapa’ opáta ko karréra (Mat. 24:36, NM). Upévare, ñañehaʼãmbaite vaʼerã ani hag̃ua ñañepysanga. Péichamante ikatúta ñañani porã, nañanekaneʼõmoʼãi ha ñamohuʼãta pe karréra. Péro, ¿mbaʼépa jajapo vaʼerã ani hag̃ua ñañepysanga?

MBAʼÉPA IKATU ÑANEMOÑEPYSANGA

9. ¿Mbaʼe mbaʼépa ikatu ñanemoñepysanga?

9 Jahechamína mbaʼe mbaʼépa ikatu ñanemoñepysanga: 1) umi mbaʼe ñanekangyhápe, 2) ñande rete rembipota vai, 3) oĩramo ermáno reiete ñandetrata vaíva, 4) oĩrõ ñanembohasa asýva ha ñandepersegíva, ha 5) ojavy jave ñande rapichakuéra. Oimérõ ñañepysangáma raʼe, ñanemanduʼa vaʼerã Jehová ipasiensiaitereiha. Haʼe ndojapuramoʼãi heʼi hag̃ua ñanderehe nañaneñeʼẽrenduseiha voi.

10, 11. ¿Mbaʼépepa ikangy vaʼekue David?

10 Umi mbaʼe ñanekangyhápe ñambojojakuaa umi ita ikatúvare ojuhu tapére peteĩ ohaʼãva karréra. Ñapensáramo rréi David ha apóstol Pedro rembiasakuére, jahecha mokõi mbaʼe haʼetéva ita: ndajajejokokuaái ha jakyhyje ñande rapichágui.

11 Davídpe ijetuʼu vaʼekue ojejoko hag̃ua. Upéva ojekuaa porã hekovaírõ guare Bat-seba ndive ha ipochyetereírõ guare Nabal rehe. Péro ikangýrõ jepe koʼã mbaʼépe, oñehaʼãmbaite akóinte oĩ porã hag̃ua Jehovándi. Upéi oĩ rupi hapicha oipytyvõva chupe, haʼe opuʼã ha opyta porã jey Ñandejára renondépe (1 Sam. 25:5-13, 32, 33; 2 Sam. 12:1-13).

12. Oñepysangáramo jepe, ¿mbaʼépa ojapo Pedro osegi hag̃ua pe karrérape?

12 Pedro katu okyhyje vaʼekue hapicha yvypóragui, ha ojapóramo jepe Jesús ha Jehová heʼíva, sapyʼánte tuicha ojavy. Por ehémplo, tres vése voi onega opavave rovake oikuaaha Imboʼehárape (Luc. 22:54-62). Tiémpo rire, ojapo peteĩ mbaʼe kristianokuéra ndojapói vaʼerã: otrata iñimportantevévaramo umi ermáno hudío oñesirkunsida vaʼekuépe, ha oapoʼi umi ndahaʼéivape hudío. Péro apóstol Pablo oikuaa porã kongregasiónpe ndovaleiha japoroporavo térã ñamboyke avavépe, ha ohechakuaa Pedro ojapo vaietereiha. Upémarõ, operhudika mboyve ermanokuérape, ojagarra Pédrope ha hovaitépe heʼi chupe naiporãiha upe ojapóva (Gál. 2:11-14). ¿Mbaʼéichapa oñeñandu Pedro? ¿Ohejápa pe karréra openságui Pablo otakysenteha hese ha ipochy oñemoñeʼẽ haguére chupe? Nahániri; haʼe oñemoĩ ojepyʼamongeta umi mbaʼe heʼi vaʼekuére chupe, oñehaʼã ojapo, ha osegi pe karréra oporogueraháva jeikove opaʼỹvape.

13. ¿Mbaʼérepa ikatu ñanemoñepysanga umi mbaʼasy?

13 Sapyʼánte umi mbaʼasy ikatu ñanemoñepysanga. Upéva omokangykuaa ñande jerovia, ha upéi ñanekaneʼõ ha nañambaʼapovéima Jehovápe g̃uarã. Por ehémplo, peteĩ ermána Japongua ou hasy 17 áño ojevautisa haguépe. Ojepyʼapyeterei rupi imbaʼasýre, naikyreʼỹvéi oservi hag̃ua Jehovápe ha ndopredikavéi. Mokõi ansiáno ovisita ha omokyreʼỹ chupe, ha upe rire oñepyrũ jey oho rreunionhápe. Koʼág̃a pe ermána heʼi: “Umi ermáno cherresivi porã aha jeývo Salónpe ha upéva opokoiterei cherehe”. Ko ñane ermána oĩ jeýma pe karrérape.

14, 15. ¿Mbaʼépa pyaʼe jajapo vaʼerã ñandestiráramo umi mbaʼe vai? Emoĩ peteĩ ehémplo.

 14 Ambue mbaʼe ikatúva ñanemoñepysanga térã ñandereity haʼe hína ñande rete rembipota vai. Upévare, jajepyʼaraʼã jave, ñañehaʼãmbaite vaʼerã ani hag̃ua ñapensa térã jajapo umi mbaʼe ñanemongyʼa ha ñanemoĩ vaítava Jehová renondépe. Jesús heʼi vaʼekue jaipeʼa vaʼerãha ñandejehegui oimeraẽ mbaʼe ikatúva ñanemoñepysanga, tahaʼe jepe raʼe peteĩ ñande resa térã ñande po. Upéicharõ, jaipeʼákena ñandejehegui oimeraẽ mbaʼe kyʼa ñapensáva térã jajapóva ha ikatúva ñaneguenohẽ pe karréragui (elee Mateo 5:29, 30).

15 Peteĩ ermáno oñemongakuaa vaʼekue kristiánoicha omombeʼu ogusta hague chupe umi kuimbaʼe imitãrusu guive. Haʼe heʼi: “Heta vése nañeñanduporãi haʼetégui chéve ndachejáiva mamove”. Orekórõ guare 20 áño, oikóma chugui siérvo ministeriál ha prekursór rregulár, péro upéi ou hoʼa. Upévare tekotevẽ kuri ojekorrehi ko ermánope la Biblia rupive, ha umi ansiáno oipytyvõ chupe. ¿Mbaʼéicha rupípa ko ermáno opuʼã ha oñemoĩ porã jey Jehová ndive? Oñemboʼe, ohesaʼỹijo Ñandejára Ñeʼẽ ha oñemeʼẽmbaite oservi hag̃ua ótrope. Tiémpo rire, haʼe heʼi: “Sapyʼapyʼa chestira jey umi mbaʼe vai, péro añehaʼãmbaite ani hag̃ua ipuʼaka cherehe. Aikuaa porã Jehová ndohejamoʼãiha jajepyʼaraʼã ndaikatumoʼãiramo jagueropuʼaka. Upévare apensa Haʼe oikuaaha che ikatuha agueropuʼaka”. Upéi heʼi avei: “Opa mbaʼe tekotevẽva aaguanta koʼág̃a, hekoviapaitéta chéve Ñandejára múndo pyahúpe. ¡Hiʼãiterei ningo ahupyty upéva! Ha og̃uahẽ meve upe ára, añehaʼã meméta ani hag̃ua haʼa jey”. Péicha jahecha ko ermáno ni mbaʼevéicharõ ndohejaseiha pe karréra oporogueraháva jeikove opaʼỹvape.

16, 17. a) ¿Mbaʼépa oipytyvõ peteĩ ermáno opensa vaʼekuépe reiete ojetrata vai hague? b) ¿Mávarepa ñamaña vaʼerã nañañepysangaséiramo?

16 Ikatu avei ñanemoñepysanga oĩramo ermáno reiete ñandetrata vaíva. Por ehémplo, peteĩ kristiáno Franciagua oservíva ansiánoramo peteĩ kongregasiónpe, ou ndovyʼavéi oimoʼãgui reiete ojetrata vai hague chupe. Upévare ndohovéi rreunionhápe ni nosẽvéi opredika. Upéi mokõi ansiáno oho ovisita chupe. Haʼekuéra ohendu haʼe heʼíva ha oñehaʼã ontende mbaʼéichapa oñeñandu. Koʼã ansiáno noñeʼẽjokói pe ermánope omombeʼu aja opensáva umi mbaʼe oiko vaʼekuére. Upe rire omokyreʼỹ chupe oheja hag̃ua Jehová pópe pe oikóva ha heʼi hikuái iñimportanteveha opa mbaʼe ári oñemoĩ porã Jehová ndive. Pe ermáno oñehaʼãmbaite ojapo umi ansiáno heʼíva ha oike jey pe karrérape. Koʼág̃a ombaʼapo meme jeýma kongregasiónpe.

17 Ñande kristiáno ndajaikói vaʼerã jajesareko ñande rapicha yvypóra imperfékto ojapóvare. Upéva rangue, tekotevẽ ñamaña Jesucrístore, Ñandejára oiporavo vaʼekue Omoakã hag̃ua kongregasión. La Biblia heʼi voi hesa ‘ojoguaha tata rendýpe’, ikatúgui ohesaʼỹijo opa mbaʼe oĩhaichaite ha ohecha rupi umi mbaʼe ñande ndajahechamoʼãiva arakaʼeve (Rev. 1:13-16, NM). Jesús oikuaa añetehápepa ñandetrata vai raʼe peteĩ ermáno, térãpa ñandénte ñapensa upeichaha. Haʼe oñenkarga oñesolusiona hag̃ua umi provléma oĩva kongregasiónpe itiempoitépe ha iporãveháicha. Upévare, aníkena jaheja ñanemomombyry Jehovágui umi mbaʼe ojapóva térã odesidíva ñane ermanokuéra.

18. ¿Mbaʼéichapa ikatúta jagueropuʼaka umi mbaʼe ijetuʼúva?

18 Oĩve mokõi mbaʼe ikatúva ñanemoñepysanga: oĩramo ñanembohasa asýva térã ñandepersegíva ha ojavy jave ñande rapichakuéra. Jesús oñeʼẽrõ guare pe chokokuére peteĩ ehémplope, heʼi oĩtaha tapicha oñepysangáva “oiko asy térã ojejopy vaíramo” chupe oguerovia haguére Ñandejára Ñeʼẽ. Ikatu ihénte, umi vesíno térã mburuvichakuéra  oñemoĩ hese ha opersegi chupe, ha ijerovia kangýramo térã ‘ndahapopypukúi’, ndaikatumoʼãi ogueropuʼaka (Mat. 13:21). Péro jajedesidíramo akóinte japyta Jehová ykére, Ñandejára Ñeʼẽ omombaretéta ñande jerovia ha ñaaguantakuaáta opa mbaʼe, peteĩ yvyramáta hapo pypukúvaicha. Ñandejopy jave umi mbaʼe ipohýiva, ñañemboʼe vaʼerã ha jajepyʼamongeta “opa mbaʼe ikatúvare ojeguerohory” (elee Filipenses 4:6-9). Jehová ñanemombarete rupi, ikatúta jagueropuʼaka opa mbaʼe ñandejopýva, ha ndajahejamoʼãi umi mbaʼe ijetuʼúva ñanemoñepysanga.

Aníke reheja mbaʼeve neguenohẽ pe karréragui

19. ¿Mbaʼépa ikatu jajapo ani hag̃ua ñañepysanga oĩramo ñanembopochýva?

19 Ñambyasýramo jepe, heta kristiáno oheja pe karréra ojesareko rupi umi ermáno rembiavýre. Por ehémplo, oĩ oñepysangáva ohechágui ótro ojapoha peteĩ mbaʼe haʼe ni mbaʼevéicharõ ndojapomoʼãiva (1 Cor. 8:12, 13). Oĩramo ñanembopochýva, ¿jaikótapa ñambotuicha upe provléma? La Biblia heʼi kristianokuérape ani hag̃ua oporohusga ni oñemohatã umi mbaʼe heʼívapente, síno oĩ vaʼerãha operdona hag̃uáicha opavavépe (Luc. 6:37). Oĩ jave ojapóva peteĩ mbaʼe nañandegustáiva, ñañeporandu vaʼerã: “¿Apensápa haʼe ojapóva ivaiha che ajapógui ambue hendáicha? Aikuaáramo jepe ermanokuéra iñimperfektoha, ¿asẽtapa pe karréra oporoguerahávagui jeikove opaʼỹvape, peteĩva ojavy haguérente?”. Jahayhúramo Ñandejára Jehovápe, jajedesidíta ñamohuʼã pe karréra ha ndajahejamoʼãi ñandejoko umi mbaʼe ojapóva ñande rapichakuéra.

ANÍKE RESẼ KO KARRÉRAGUI

20, 21. ¿Mbaʼépa nde redesidi rejapo?

20 ¿Ndépa rejedesidíma redipara “pe karréra ipahaite peve”? (2 Tim. 4:7, 8, NM.) Upéicharamo, restudia vaʼerã Ñandejára Ñeʼẽ ha umi puvlikasión oguenohẽva Jehová organisasión. Péicha ikatúta rehesaʼỹijo, rejepyʼamongeta ha reikuaa mbaʼe mbaʼépa ikatu nemoñepysanga. Ejerurékena Ñandejárape ijespíritu sánto; upéva nepytyvõta nembarete hag̃ua. Nemanduʼákena opavave odiparáva ko karrérape ikatuha oñepysanga térã hoʼa, upéicharõ jepe opuʼãkuaa ha oike jey pe karrérape ha og̃uahẽ huʼãme. Ikatu voi umi mbaʼe vai ojapo vaʼekue oipytyvõ chupe anivéma hag̃ua hoʼa.

21 La Biblia ohechauka ndaikatuiha jajekuʼako ñaimérõ pe karrérape, síno tekotevẽha ñañehaʼãmbaite ñagana hag̃ua. Ndahaʼéi ku jajupirõguáicha peteĩ kolektívope ha ñandegueraha ñag̃uahẽ meve ha ñagana pe prémio. Káda uno jadipara vaʼerã jahupyty hag̃ua pe jeikove opaʼỹva. Ha ñañani aja, pe ‘pyʼaguapy’ Ñandejára omeʼẽva tuicha ñanepytyvõta (Sal. 119:165). Jaikuaa porã Jehová ovendesitaha koʼág̃a ha opa árare opavave ohaʼãvape pe karréra omohuʼã meve (Sant. 1:12).