Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Marzo de 2013

¿Añetehápe piko Josefo ohai rakaʼe?

¿Añetehápe piko Josefo ohai rakaʼe?

Flavio Josefo, peteĩ istoriadór síglo primérope guare ilívro XX héravape Antigüedades Judías, omombeʼu ojejuka hague Santiago Jesús ermánope. Haʼe heʼi: “[Anán, pe saserdóte ruvicha] oporombyaty vaʼekue sanedrínpe ojapo hag̃ua huísio Jesús térã Cristo ermánope, hérava Jacobo [térã Santiago]”. Heta oĩ heʼíva añetehápe oiko hague Josefo omombeʼúva. Upéicharõ jepe, oĩ ndogueroviapáiva ambue mbaʼe heʼíva Jesús rehe upe lívrope. Por ehémplo pe Testimonium Flavianum heʼíva:

“Upe tiémpope oiko vaʼekue peteĩ kuimbaʼe iñaranduetereíva hérava Jesús. Ndajaikuaái voi opyta porãpa jaʼe hese haʼeha yvypóra, haʼe ningo ojapo vaʼekue heta milágro ha omboʼe umi ohenduse ha oguerohorývape haʼe omboʼéva. Oñemoag̃ui vaʼekue hese heta hudío ha tetã ambuegua. Haʼe vaʼekue Cristo. Umi hudío ruvichakuéra oñeʼẽ vai rupi hese, Pilato ojukauka chupe kurusúre. Akóinte oĩ vaʼekue ohayhúva chupe pórke tres día haguépe oñemoingove jey ha ou hemimboʼekuéra rendápe. Umi proféta omombeʼúma vaʼekue voi oikotaha upéva ha hetave mbaʼe porã Jesús rehe. Upe guive ha koʼag̃aite peve oĩ omoirũva Crístope.” (Antigüedades Judías, libro XVIII, kap. III, seksión 3, otradusi vaʼekue Luis Farré.)

Síglo 16 paha guive oĩ odefendéva Josefo ohai vaʼekue ha ótro katu heʼi ndahaʼeichéne hague Josefo upe téxto ohaíva. Peteĩ istoriadór ha mboʼehára katupyry Franciagua hérava Serge Bardet, oñehaʼã osolusiona ko provléma ipukúmava 400 áño rasa. Heta oinvestiga rire, oguenohẽ peteĩ lívro hérava Le Testimonium Flavianum —Examen historique considérations historiographiques (El Testimonium Flavianum. Examen histórico y factores historiográficos).

Josefo ndahaʼéi vaʼekue eskritór ojeroviáva Cristo rehe, síno peteĩ istoriadór hudío. Péro hetápe ndogustái haʼe heʼi haguére Jesús rehe: “Haʼe vaʼekue Cristo”. Peteĩ infórmepe Bardet omombeʼu: “Pe eskritór heʼívo ‘Haʼe vaʼekue Cristo’, ohai pe gramátika griégape oĩháicha”. Bardet heʼi umi hudío omoirũ vaʼekue Jesúspe “nopensaiha Josefo ndoiporuichéne hague pe ñeʼẽ Christos”, ha oimérire oiporu upe ñeʼẽ, ohechauka “umi ndogueroviapáiva upe téxto tuichaiterei ojavyha ndohechakuaáivo upéva”.

¿Ikatu piko oime ótro eskritór ohai raʼe upe téxto pe lívrope ha ohaʼangánte Josefo ohai lája? Bardet ohechakuaa ijetuʼuetereitaha ojejapo upéva. Tekotevẽma ningo upe eskritór “ikatupyryeterei oñeʼẽ hag̃ua umi mbaʼe yma guare rehe” térã “oikuaa porãiterei mbaʼéichapa Josefo oskrivi ha ojapo haʼeichaite”.

¿Mbaʼére piko upéicharõ ndojegueroviaséi Josefo ohai hague upe téxto? Bardet heʼi: “Heta oĩ ndohechakuaaséiva añeteha pe Testimonium heʼíva ha oñeporandu heta mbaʼe upe téxto heʼívare”. Bardet heʼi umi investigadór ombojereha ko téxto, péro ndahaʼéi katuete oikuaa hag̃ua añetehápepa Josefo ohai, síno ndogueroviaséiguinte Jesús haʼeha pe Cristo.

Bardet heta oinvestiga rire omombeʼu kuri mbaʼépa opensa pe Testimonium Flavianum rehe. Ndajaikuaái ningo umi ótro istoriadór okambiátapa umi mbaʼe opensáva upe téxtore ohecha rire Bardet ohesaʼỹijo vaʼekue. Péro oĩ peteĩ istoriadór hérava Pierre Geoltrain ojapo vaʼekue upéicha. Haʼe akóinte opensa vaʼekue pe Testimonium haʼeha peteĩ téxto oñemoĩnte vaʼekue upe lívrope ha oñembohory voi umi ogueroviávare upépe heʼíva. Péro omombeʼu tuicha okambiaha opensáva ohecha rire Bardet heʼi vaʼekue. Pierre Geoltrain heʼi: “Avave ndaikatúi heʼívo japuneha Josefo ohai hague upe téxto”.

Testígo de Jehová katu jaguereko ambue mbaʼe ohechauka porãva ñandéve Jesús añetehápe haʼeha pe Cristo. ¿Mbaʼépa hína upéva? La Biblia (2 Tim. 3:16).