Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Febrero de 2013

Jehová omeʼẽ ñandéve peteĩ erénsia ijojahaʼỹva

Jehová omeʼẽ ñandéve peteĩ erénsia ijojahaʼỹva

“Koʼã mbaʼe ohupyty Jehová rembiguaikuérape.” (IS. 54:17, NM)

1. ¿Mbaʼépa Jehová omoĩ Iñeʼẽme ohayhúgui yvyporakuérape?

JEHOVÁ ningo “oikove ha opyta opa árare”, ha haʼe heʼi ñandéve mbaʼépa jajapovaʼerã ikatu hag̃uáicha jahupyty pe jeikove opaʼỹva. Umi mbaʼe ñanemboʼéva nokambiamoʼãi arakaʼeve. La Biblia heʼi voi: “Jehová ñeʼẽ opyta opa ára g̃uarã” (1 Ped. 1:23-25, NM). ¡Ajépa javyʼaite Ñandejára ohechauka haguére ñanderayhuetereiha omoĩvo Iñeʼẽme koʼã mbaʼe tekotevẽva jaikuaa!

2. ¿Mbaʼépa Jehová omoĩ Iñeʼẽme hembiguaikuéra oiporu hag̃ua?

2 Ñandejára voi omoĩ herarã ha ohaika Iñeʼẽme hembiguaikuéra oiporu hag̃ua. La Bíbliape ojeporu ypy vaʼekue pe téra “Jehová” oñemombeʼúvo ojejapo hague “yvy ha yvága” (Gén. 2:4). Upe rire, ohaírõ guare umi Diez Mandamiénto peteĩ milágro rupive, Ñandejára omoĩ avei héra heta vése pe itáre. Pór ehémplo, pe primer Mandamiénto heʼi: “Che ningo Jahve [Jehová], pende Ruete” (Éx. 20:1-17, ÑÑB). Jehová, pe Mburuvicha Tuichavéva, oñangareko Iñeʼẽ ha hérare ikatu hag̃uáicha opyta opa árare, Satanás oñehaʼãmbaitéramo jepe ohundi (Sal. 73:28).

3. ¿Mbaʼépa Jehová omoĩ Iñeʼẽme ñanderesapeʼa hag̃ua?

3 Jehová omoĩ avei Iñeʼẽme pe añetegua. ¡Ajépa javyʼaite Ñandejára ñanderesapeʼa haguére la Biblia rupive! (Elee Salmo 43:3, 4.) Ko múndope umi hénte oiko pytũmbýpe rrelihionkuéra omboʼégui heta japu. Péro ñande ñaime hesakãháme Jehová omombeʼu rupi ñandéve pe añetegua (1 Juan 1:6, 7).

OÑEMEʼẼ ÑANDÉVE PETEĨ ERÉNSIA IJOJAHAʼỸVA

4, 5. ¿Mbaʼe priviléhiopa oñemeʼẽ ñandéve áño 1931 guive?

4 Opavave kristiáno oreko peteĩ erénsia ijojahaʼỹva. Peteĩ erénsiape oike heta kostúmbre umi hénte ojepokuaáva osegi heta tiémpore ha ombohasáva iñemoñarekuérape. Jehová omeʼẽ ñandéve heta mbaʼe ñane  erensiarã, pór ehémplo ñantende porã Iñeʼẽ, jaikuaa mávapa Haʼe ha mbaʼépa hembipota. Avei omeʼẽ ñandéve ótro priviléhio iporãitereíva.

Áño 1931-pe, peteĩ aty guasúpe ojeʼe ñañehenoitaha testígo de Jehová

5 Ko priviléhio oñemeʼẽ ñandéve oikórõ guare peteĩ aty guasu Colúmbuspe (Ohio, Estados Unidos), áño 1931-pe. Pe prográma apére oĩ mokõi létra: JW. Peteĩ ermána heʼi: “Umi ermáno okalkulajoa mbaʼépa oiméne heʼise upéva”. Hasýpe, pe domingo 26 de julio oñemyesakã upe ojekuaasetéva: Upe ára guive nañañehenoivéima Estudiánte de la Biblia, síno testígo de Jehová (Jehovahʼs Witnesses ingléspe), peteĩ téra oñeguenohẽva Ñandejára Ñeʼẽgui. Opavavénte ovyʼaiterei (elee Isaías 43:12). Peteĩ ermáno imanduʼa: “Ndacheresaraimoʼãi mbaʼeichaitépa entéro ojepopete ha ijayvujoa”. Ndaipóri ótra rrelihión oiporuséva ko téra porãite. Ñandéve g̃uarã katu peteĩ priviléhio ijojahaʼỹva ikatu haguére jaiporu 80 áñorema Jehová réra.

6. ¿Mbaʼépa omeʼẽ avei ñandéve Jehová ñane erensiarã?

6 La Bíbliape ojehai heta mbaʼe yma oiko hagueichaite ha ideprovechoitereíva. Koʼã mbaʼe haʼe avei peteĩ erénsia ñandéve g̃uarã. Ñapensamína Abrahán, Isaac ha Jacob rehe. Katuete koʼã kuimbaʼe oñemongetáne raʼe ifamiliakuéra ndive, ohecha hag̃ua mbaʼéichapa oikovaʼerã Jehová oguerohory hag̃ua chupekuéra. Oiméne upévare José odipara peteĩ kuña ojopýrõ guare chupe oñeno hag̃ua hendive. Haʼe heʼi voi ndojapomoʼãiha “ivaietéva [Ñandejára] renondépe” (Gén. 39:7-9). Síglo primérope, umi ermáno omboʼe ha ohechaukavaʼekue mbaʼéichapa oikovaʼerã kristianokuéra. Pór ehémplo, apóstol Pablo omombeʼu umi kongregasiónpe mbaʼéichapa ojapovaʼerã pe Séna del Señór (1 Cor. 11:2, 23). Koʼág̃a rupi avei, Ñandejára Ñeʼẽme oĩmbaite ñaikotevẽva guive ñamombaʼeguasu hag̃ua Jehovápe haʼe oipotahaichaite ha “espíritu sánto poguýpe” (elee Juan 4:23, 24). La Biblia ningo oipytyvõkuaa opavavépe, péro ndaipóri ñandéicha omombaʼéva oĩva ipype.

7. ¿Mbaʼe promésapa oĩ avei pe erénsia Jehová omeʼẽvape ñandéve?

7 Jehová ñanepytyvõ avei oikuaaukávo ñandéve ermanokuéra koʼag̃agua ohasáva. Koʼã mbaʼe ningo haʼe avei peteĩ erénsia (Sal. 118:7). Ñane puvlikasionkuérape jatopa heta hetave umi ermáno rembiasakue, ha umíva ohechauka mbaʼéichapa Ñandejára oñangareko opavave hembiguáire, upévare ñande ndajakyhyjéi mbaʼevégui, oĩramo jepe ñandepersegíva. Hiʼarive Jehová opromete peteĩ mbaʼe ñanemokyreʼỹetereíva: “Tahaʼe haʼéva umi opuʼãva nderehe nosẽporãmoʼãi, ha rejurumbotýta opavave oñeʼẽ vaívape nderehe. Koʼã mbaʼe ohupyty Jehová rembiguaikuérape, ha pe hustísia ou chehegui” (Is. 54:17; NM). Upeichaite, oimeraẽ mbaʼe Satanás ojapóva ñanerundi hag̃ua, nosẽporãmoʼãi.

8. ¿Mbaʼépa jahecháta ko artíkulope ha pe ótro oúvape?

 8 Satanás oñehaʼãmbaite ohundi Ñandejára Ñeʼẽ ha Jehová réra, ha ojapo ikatúva guive ani hag̃ua ojekuaa pe añetegua. Péro haʼe ndahaʼéi mbaʼevete asy Jehová rovake, upévare opyta reipa opa mbaʼe vai ojaposéva. Ko artíkulope ha pe ótro oúvape, jahecháta 1) mbaʼépa Jehová ojapo ani hag̃ua oñehundi Iñeʼẽ, 2) mbaʼépa ojapo jaikuaa hag̃ua héra ha 3) mbaʼéichapa oñangareko pe añeteguáre ikatu hag̃uáicha ñantende porã.

JEHOVÁ NDOHEJÁI OÑEHUNDI IÑEʼẼ

9-11. ¿Mbaʼe ehémplopa ohechauka ndaikatuiha oñehundi la Biblia oĩrõ jepe ojaposéva upéva?

9 Jehová ndohejái oñehundi Iñeʼẽ, oĩramo jepe oñehaʼãmbaitéva ojapo upéva. Peteĩ ensiklopédia omombeʼu: “Áño 1229-pe, saserdotekuéra ijatýrõ guare Toulóusepe, oproivi umi héntepe oiporu Biblia oĩva iñeʼẽmekuéra ojepersegi rupi umi alvihénse ha valdensekuérape. Upéi saserdotekuéra ijatýrõ guare áño 1234-pe Tarragónape (España) rréi Jaime I poguýpe, oguenohẽ jey hikuái peichagua mandáto. [...] Pe Iglésia Katólika oñepyrũ avei oproivi koʼãichagua Biblia, Pablo IV oguenohẽrõ guare pe Índice de libros prohibidos áño 1559-pe. Upe índisepe ojeproivi ojejapo térã ojeguereko Biblia oĩva umi idióma oñeʼẽvape umi hénte, pe pápa nomeʼẽiramo permíso” (Enciclopedia Cattolica).

10 Oĩramo jepe heta oñehaʼãvaʼekue ohundi Ñandejára Ñeʼẽ, koʼag̃aite peve ndaikatúi ojejapo upéva. Áño 1382 rupi, John Wyclef ha iñirũnguéra otradusi ypy vaʼekue la Biblia idióma ingléspe. Ótro kuimbaʼe hérava William Tyndale otradusi avei Ñandejára Ñeʼẽ. Chupe ojejukavaʼekue áño 1536-pe. Oñemombeʼu ojejokua hague chupe peteĩ yvyráre ha upe guive heʼi: “¡Ñandejára, ehesapeʼamína pe rréi Inglaterrayguápe!”. Upe rire ojejuvy chupe ha ojehapy.

11 Heta oĩvaʼekue ndoipotáiva ojeguereko la Biblia, upéicharõ jepe ndaikatúi oñehundi. Pór ehémplo, áño 1535-pe, osẽ pe Biblia otradusivaʼekue Miles Coverdale. Haʼe oiporu pe versión ojapovaʼekue Tyndale, pe Nuevo Testamento, ha Génesis guive Crónicas peve pe Antiguo Testaméntogui. Avei oiporu Biblia oĩva latínpe ha ótra versión oĩva alemánpe, otradusivaʼekue Martín Lutero. Ñane tiémpope, heta oĩ oguerohorýva pe Traducción del Nuevo Mundo de las Santas Escrituras. Ko versión ningo oñentende porãiterei, oñembohasa oĩ hagueichaite ojehai ypýrõ guare, ha ndahasýi ojeporu hag̃ua predikasiónpe. ¡Ajépa javyʼaite jaikuaávo Satanás ni yvyporakuéra ndaikatumoʼãiha ohundi Ñandejára Ñeʼẽ!

JEHOVÁ OÑANGAREKO HÉRARE

Tyndale rehe oiko haguéicha, heta kuimbaʼe omano Ñandejára Ñeʼẽ rehehápe

12. ¿Mbaʼérepa ideprovechoiterei pe Traducción del Nuevo Mundo?

12 Ñandejára ndohejái héra ojepeʼa la  Bíbliagui. Upévare pe Traducción del Nuevo Mundo ideprovechoiterei. Umi traduktór ombaʼapóva hese oñemeʼẽmbaite ikatu hag̃uáicha ojapo porã hembiapo. Pe versión oĩva españólpe heʼi iñepyrũmbýpe: “Ko traduksiónpe oñemoĩmbaite jey Ñandejára réra umi lugár oĩvaʼerãháme voi. Pe téra ‘Jehová’ ojeporúva españólpe, oĩ 6.973 vése Escrituras Hebréaspe ha 237 vése Escrituras Griegas Cristiánaspe”. Pe Traducción del Nuevo Mundo ojejapo 116 idiómape, tahaʼe kompletoite térã peteĩ párte, ha oñeimprimíma 178.545.862 rasa.

13. ¿Mbaʼérepa jaʼekuaa Ñandejára réra ojekuaa hague ojejapo ypy guive yvyporakuérape?

13 Ñandejára réra ojeporu ojejapo ypy guive yvyporakuérape. Adán ha Eva oikuaáma vaʼekue, ha la Biblia ohechauka oiporu hague hikuái Jehová réra. Avei pe ama guasu rire, Noé raʼy hérava Cam, ohechaukárõ guare ndorrespetaiha itúvape, Noé heʼi: “Toñemombaʼeguasu [Jehová] Sem Jára, ha Canaán [Cam raʼy] toiko hembiguáiramo” (Gén. 4:1; 9:26, ÑÑB). Ñandejára heʼivaʼekue avei: “Che Jehová. Péicha che réra, ha ndahejamoʼãi che rekomimbipa avavépe”. Avei heʼi: “Che hína [Jehová] opa mbaʼe Jára, ndaipóri ambue. Che añoite hína [Jehová]” (Is. 42:8, NM; Is. 45:5). Jehová ndohejái héra ojepeʼa la Bíbliagui ikatu hag̃uáicha opavave yvypóra oikuaa chupe. ¡Ajépa tuichaite mbaʼe Jehová oheja haguére ñandéve jaiporu héra ha jaiko Itestígoramo! (Sal. 20:5.)

14. ¿Moõpa ojetopa avei Ñandejára réra?

14 Ñandejára réra noĩri la Bíbliape añónte. Pór ehémplo, táva Dhibánpe (Dibón), opytáva 21 kilómetro már Muértogui, kuarahyreike gotyo, ojetopa pe Piedra Moabita. Upe itáre ojehaivaʼekue pe rréi isrraelíta Omrí réra ha omombeʼu mbaʼépa heʼivaʼekue pe rréi Moabgua hérava Mesá, oñorairõramo guare Israel ndive (1 Rey. 16:28; 2 Rey. 1:1; 3:4, 5). Péro ko itáre noñemombeʼúi istória reínte, síno ojehai avei hese pe Tetragrámaton, térã umi cuatro létra evréa orrepresentáva Jehová réra. Koʼã létra ojehaíkuri avei heta vése umi Carta de Lakíspe, ojejuhuvaʼekue Israélpe ñaiʼũ pehenguére.

15. ¿Mbaʼépa pe Septuaginta, ha maʼerãpa ojejapo?

15 Umi kuimbaʼe otradusi ypy vaʼekue la Biblia oipytyvõ avei ani hag̃ua Ñandejára réra opyta tesaráipe. Áño 607-pe Jesús ou mboyve, hudiokuérape ojeguerahavaʼekue Babilóniape ha ojeguereko chupekuéra upépe 70 áño. Péro heta oĩ ndohovéimava upe rire Judá ha Israélpe. Síglo 3-pe Jesús ou mboyve, heta hudío oikóva Egíptope, táva Alejandríape, oikotevẽ Ñandejára Ñeʼẽ griégope, pe idióma ojeporuvéva upe tiémpope. Ha síglo 2-pe Jesús ou mboyve, ojetradusipáma evréogui idióma griégope. Ko traduksiónpe oñembohéra Septuaginta. Ojejuhu heta kópia ojejapovaʼekue ko versióngui ha oĩ pype Jehová réra evréope.

16. ¿Mbaʼéichapa ojeporurakaʼe Ñandejára réra peteĩ lívro osẽvaʼekuépe áño 1640-pe?

16 Ñandejára réra oĩ avei pe lívro héravape Libro de Salmos de la Bahía (Bay Psalm Book), osẽ ypy vaʼekue América del Nórtepe umi kolónia inglésape. Oñeguenohẽ ypýrõ guare ko lívro áño 1640-pe, osẽ pype umi sálmo ojetradusíva evréogui pe inglés oñeñeʼẽvaʼekuépe upe tiémpope. Pór ehémplo, jatopa Ñandejára réra Salmo 1:1 ha 2-pe, heʼihápe ‘ovyʼaiteha pe kuimbaʼe’ ndojapóiva iñañáva ñeʼẽ, “síno Iehovah léi ombopyʼarory chupe”. Pe folléto El nombre divino que durará para siempre, orekove informasión oñeʼẽva Ñandejára rérare.

JEHOVÁ OJAPO TEKOTEVẼVA GUIVE JAIKUAA HAG̃UA PE AÑETEGUA

17, 18. a) ¿Mbaʼépa heʼise pe ñeʼẽ “añetegua”? b) ¿Mbaʼépa heʼise ‘pe añetegua’ oñeñeʼẽha Gálatas 2:14-pe?

17 Ñande ningo vyʼapópe jaservi Jehovápe, pe Ñandejára “añeteguáva” (Sal. 31:5,  ÑÑB). Péro, ¿mbaʼépa heʼise “añetegua”? Heʼise “peteĩ mbaʼe oikóva térã oĩva añetehápe, ndahaʼéi peteĩ mbaʼe ñaimoʼãnteva oikoha térã oĩha”. Idióma evréope, pe ñeʼẽ ojetradusíva “añetegua”, heʼise jeroviapy, ndaijapúiva ha ojehechaukáva añeteha. Ha idióma griégope katu heʼise peteĩ mbaʼe ojeʼéva térã ojejapóva hekopete ha oĩ porãva.

18 Jehová oñangareko pe añeteguáre oĩva Iñeʼẽme ha ñanepytyvõ jaikuaave hag̃ua oĩva pype (2 Juan 1, 2). Upéicha rupi, ohasávo pe tiémpo ñantende porãve jahávo pe añetegua. La Biblia heʼi voi: “Umi hekopotĩva rape poʼi katu haʼete ku koʼẽju resakãicha, hesakã hesakãve ohóvo koʼẽmbaite peve” (Prov. 4:18, ÑÑB). Jesús oñemboʼevaʼekue Itúvape ha heʼi: “Ne ñeʼẽ hína pe añetegua”. Ha ñande katu ñapensa avei haʼe opensa haguéicha (Juan 17:17, NM). Ñandejára Ñeʼẽme oĩ ‘pe añetegua’, térã opaite mbaʼe kristianokuéra ogueroviáva (Gál. 2:14, NM). Pór ehémplo, oñemyesakã Jehová réra, pe derécho haʼe orekóva ñanesãmbyhy hag̃ua, Cristo sakrifísio, pe ñemoingove jey ha Ñandejára Rréino. Jahechamína mbaʼépa ojapo Ñandejára oikuaauka hag̃ua pe añetegua, Satanás oñomiséramo jepe.

JEHOVÁ OJOKO UMI OÑEMOĨVAPE PE AÑETEGUÁRE

19, 20. ¿Mávapa rakaʼe Nemrod, ha mbaʼépa osẽ vai haʼe oikove tiémpope?

19 Pe Ama guasu rire, pyʼỹinte ojeʼémi: “Haʼete Nemrod, peteĩ kasadór imbaretéva oñemoĩva Jehováre” (Gén. 10:9, NM). Nemrod oñemoĩvo Jehováre, añetehápe omombaʼeguasu Satanáspe. Upéicha avei ojapo umi oñemoĩvaʼekue Jesús rehe. Haʼe heʼi voi chupekuéra: “Pende ru ningo pe Aña ha peẽ pejapose haʼe oipotáva. [...] Haʼe omboykevaʼekue pe añetegua” (Juan 8:44, NM).

20 Nemrod orekovaʼekue ipoguýpe Babel ha umi táva oĩva rrío Tigris ha Éufrates paʼũme (Gén. 10:10). Amalisia haʼe voi omopuʼãka Babel ha pe tórre yvate, áño 2269 rupi Jesús ou mboyve. Ñandejára Jehová oipotavaʼekue umi hénte isarambi ko yvy ape ári, péro umi omopuʼãva upe táva heʼijoa: “Ñamopuʼã peteĩ táva guasu ha pype óga yvate og̃uahẽtava yvága peve; tañanererakuã mombyry ha ani ñanesarambi yvy apére”. Péro koʼã tapicha nosẽporãi. Jehová omosarambi opárupi chupekuéra “ombojoavy haguére yvypóra ñeʼẽ” (Gén. 11:1-4, 8, 9). Oimérire Satanás omoñepyrũse peteĩ rrelihión oñemombaʼeguasu hag̃ua chupe, nosẽporãiete. Ymaite guive ningo oĩ ombotuicháva Jehovápe oĩramo jepe oñemoĩva hesekuéra, ha koʼág̃a rupi heta hetavéntema umi omombaʼeguasúva chupe.

21, 22. a) ¿Mbaʼérepa jaʼekuaa umi rrelihión japu ndoapeligraiha voi arakaʼeve pe rrelihión añeteguápe? b) ¿Mbaʼépa ñahesaʼỹijóta pe artíkulo oúvape?

21 Umi rrelihión japu ndoapeligráiva voi arakaʼeve pe rrelihión añeteguápe. ¿Mbaʼérepa ikatu jaʼe upéva? Ñane Mboʼehára Tuichavéva ojapo tekotevẽva guive ojekuaa hag̃ua Iñeʼẽ ha héra, avei akóinte ñanemboʼe pe añetegua (Is. 30:20, 21). Jaservíramo Ñandejárape haʼe oipotaháicha, katuete javyʼaiterei. Upévare, tekotevẽ ñañatende porã ani hag̃ua ñañemomombyry Jehovágui, jajerovia hese ñande pyʼaite guive ha jaheja pe espíritu sánto ñanesãmbyhy.

22 Pe artíkulo oúvape jahecháta mbaʼéichapa oñepyrũ oñemboʼe heta japu ha mbaʼéichapa opyta yvýre koʼã mbaʼe ojegueroviáva ñahesaʼỹijóvo Ñandejára Ñeʼẽ. Avei jahecháta mbaʼeichaitépa Jehová ñanevendesi ñanemboʼe rupi heta mbaʼe iporãitereíva. ¡Ajépa ñamombaʼete koʼã mbaʼe Ñandejára omeʼẽva ñandéve ñane erensiarã!