Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Febrero de 2013

Ñañeñangarekókena umi mbaʼe oĩvagui ñande pyʼapýpe

Ñañeñangarekókena umi mbaʼe oĩvagui ñande pyʼapýpe

La Biblia heʼi ndaiporiha “ijapúva ha iñañáva yvypóraicha ipyʼapýpe” (Jer. 17:9). Sapyʼánte jaipotaiterei peteĩ mbaʼe ñande pyʼaite guive. Upéicha jave, ndahasyiete jatopa hag̃ua oimeraẽ mbaʼe jaʼe térã jajapovaʼerã ikatu hag̃uáicha jareko pe jaipotáva.

La Biblia heʼi porã: “Yvypóra korasõgui osẽ umi mbaʼe vai ojaposéva, jejuka, ñemoakãratĩ, tekovai, ñemonda, japu, ha ñeʼẽ vai ótrore” (Mat. 15:19, NM). Umi mbaʼe jarekóva ñane korasõme, térã ñande pyʼapýpe, ikatu ñanetraisiona ha upéi jaʼe guaʼu nañanepohãiha ha jajapómante Ñandejárape ndogustáiva. Ikatu oime ndajahechakuaáiraʼe ivaiha peteĩ mbaʼe jajapo mboyve. ¿Mbaʼépa ñanepytyvõta jaikuaa hag̃ua mbaʼépa oĩ ñande pyʼapýpe jajapo mboyve peteĩ mbaʼe noĩporãiva?

MBAʼÉICHAPA JAIKUAÁTA OĨVA ÑANDE PYʼAPÝPE

¿Mbaʼéichapa la Biblia opoko ñane korasõre jaleéramo káda día?

Jalee la Biblia káda día ha jajepyʼamongeta hese.

Pablo heʼivaʼekue: “Ñandejára Ñeʼẽ oikove ha ipoderosoiterei, haimbeve oimeraẽ espáda haimbe jováivagui ha oike ombojaʼo peve ñane álma ha ñande espíritu”. Umi mbaʼe jajuhúva la Bíbliape “ikatu ohechauka umi mbaʼe ñapensáva ha jaipotáva ñane korasõme” (Heb. 4:12, NM). Jastudia jave la Biblia, ñahesaʼỹijovaʼerã umi mbaʼe jajapóva ha ñapensáva. Jajapóramo upéicha jaikuaáta mbaʼépa jareko ñande pyʼapýpe. Upévare tekotevẽ jalee káda día ha jajepyʼamongeta hese. Péichamante jahecháta opa mbaʼe Jehová ohechaháicha.

Tekotevẽ ñahendu ha jasegi umi konsého oĩva la Bíbliape ñahekomboʼe hag̃ua ñane konsiénsia. Jajapóramo upéicha, jahechakuaáta mbaʼépa oĩ vai ha ndajaikomoʼãi jaʼe upéi jajavynteha voi jajapopa  rire peteĩ mbaʼe noĩporãiva (Rom. 9:1). Avei Ñandejára Ñeʼẽme jatopa heta ehémplo ojehaivaʼekue “ñanerekomboʼe hag̃ua” (1 Cor. 10:11, NM). Ñañatendéramo koʼã tapicha rembiasakuére, ñanepytyvõta ani hag̃ua jajavy. ¿Mbaʼépa ikatu jajapove?

Pe ñemboʼe ñanepytyvõ jaikuaa hag̃ua mbaʼépa jareko ñande pyʼapýpe

Jajerure Jehovápe tañanepytyvõ.

Ñandejára ohesaʼỹijo opa mbaʼe jarekóva ñande pyʼapýpe (1 Crón. 29:17). “Ñanemanduʼáke Ñandejára tuichaveha ñane korasõgui ha oikuaaha opa mbaʼe.” (1 Juan 3:20, NM.) Upévare ndaikatúi ñambotavy chupe. Ñamombeʼúramo Jehovápe ñandepyʼapýva, ñañandúva ha jaipotáva, haʼe ñanepytyvõta jahechakuaa hag̃ua mbaʼépa jareko ñane korasõme. Ikatu avei jajerure chupe tomeʼẽ ñandéve “peteĩ [korasõ] ipotĩva” (Sal. 51:10, ÑÑB). Tekotevẽterei ningo ñañemboʼe jaikuaa hag̃ua mbaʼépa oguerohoryve ñane korasõ.

Umi rreunión ñanepytyvõ ñahesaʼỹijo porã hag̃ua mbaʼépa oĩ ñande pyʼapýpe

Jajapysaka porãkena rreunionhápe.

Jajapóramo upéicha, ikatúta ñahesaʼỹijo hekópe porã mbaʼépa oĩ ñande pyʼapýpe. Añetehápe, ndahaʼéi káda rreuniónpe ojeʼéva peteĩ mbaʼe ipyahúva, upéicharõ jepe tekotevẽ ñañatende porã. Umi rreuniónpe oñemyesakã ñandéve heta mbaʼe la Biblia omboʼéva. Upéi katu umi konsého oñemeʼẽva upépe, ñanepytyvõ jahechakuaa hag̃ua mbaʼéichapa ñaime ha ñakambia hag̃ua tekotevẽhápe. Avei ideprovechoitereíta ñandéve ermanokuéra okomentáva (Prov. 27:17). Péro ndajaháiramo rreunionhápe ha ndajajeheʼái ñane ermanokuéra rehe, jaikóta jajepyʼapyeterei ñandejehénte ha katuete jadesidi vaíta heta mbaʼe (Prov. 18:1). Upévare iporã ñañeporandu: “¿Ajepokuaápa aha káda rreuniónpe ha aiporu umi mbaʼe aaprendéva upépe?” (Heb. 10:24, 25).

¿MBAʼÉPA OJAPOUKASE ÑANDÉVE ÑANE KORASÕ?

Ñane korasõ itraisionéro ha ikatu ñandegueraha vai heta mbaʼépe. Jahechamína cuatro situasión ikatuhápe ñanembotavy: jaiko porãseve, vevída, ñane amigokuéra ha jajapóva jajediverti hag̃ua.

Jaiko porãseve.

Ndaivaíri ningo ñambaʼapo jahupyty hag̃ua ñane remikotevẽ. Péro Jesús heʼivaʼekue ikatuha ñandegueraha vai ñamotenondéramo umi mbaʼeta. Omboʼe hag̃ua upéva, omoĩ peteĩ ehémplo: Peteĩ kuimbaʼe iplataitereívape osẽ porãmba ikosécha ha ndorekovéima moõpa oñongatúta pe kosécha oúva. Upémarõ heʼi oitypataha igalponkuéra ha omopuʼãtaha tuichavéva. Ko karai opensa: “Upépe ambyatypáta che trígo ha opa mbaʼe porã arekóva. Upe rire haʼéta chejupe: ‘Koʼág̃a aguerekóma heta mbaʼe porã iñongatupy, aiporu hag̃ua heta áñore. Ikatúma pyʼaguapýpe akaru, amboyʼu ha avyʼa’”. ¡Ajépa ivyroite! Ko kuimbaʼe iplátava nopensái ikatuha omano upe pyharépe (Luc. 12:16-20, NM).

Ñandeʼedavévo jahávo, ikatu jajepyʼapy ndajarekóirõ g̃uarã pláta ñañemantene hag̃ua ñandetuja vove. Upévare oĩ opensáva ndaivairiha ñambaʼapove jarekóramo jepe rreunión, térã ñamboykéramo ambue ñane rembiapo iñimportánteva Jehová servísiope. Upéva ningo ipeligrosoiterei. Ha oiméramo ñanemitã gueteri, ¿mbaʼépa jajapóta jaikuaáramo iporãveha jaiporupaite ñane tiémpo jaservi hag̃ua Ñandejárape?  ¿Ñapensátapa tekotevẽha ñambaʼapo ha ñambyaty raẽ pláta ha upéi ae jajagarra ñande prekursorádo? Ajépa iporãve vaʼerã koʼag̃aite voi ñañehaʼãramo ñameʼẽ Jehovápe opa ikatúva. Amo ipahápe ni ndajaikuaái jaikovétapa koʼẽrõ.

Vevída.

Proverbios 23:20 heʼi: “Ani rejeheʼa ikaʼúvare”. Oĩramo hoʼusetereíva vevída, ikatu hoʼu pyʼỹi ha heʼi guaʼu ndokaʼuseiha, síno hoʼuha ipyʼaguapy hag̃uánte. Oimérõ ñaikotevẽ vevída ñandepyʼaguapy hag̃ua, jajepyʼamongetáma vaʼerã jaikuaa hag̃ua mbaʼépa jareko ñane korasõme.

Ñane amigokuéra.

Tahaʼe eskuélape, koléhio, ñande traváhope térã japredika jave, ñañemongetámante vaʼerã umi ndahaʼéivandi Testígo. Péro upéva ndeʼiséi jajeheʼavaʼerãha hesekuéra, térã jareko chupekuéra ñane amígoramo. Ikatu ñapensa ipyʼaporãha hikuái ha ndaivairiha jajeheʼa hesekuéra. Péro la Biblia heʼi porã: “Aníke peheja ótro penembotavy. Umi júnta vai ohundi umi mbaʼe porã pejepokuaáva pejapo” (1 Cor. 15:33, NM). Pór ehémplo, ñamoĩʼimíramo mbaʼe kyʼa peteĩ mbaʼyrúpe oĩháme y potĩ, katuete ikyʼátama pe y. Upéicha avei jajeheʼáramo umi naiñeʼẽrendúivare Jehovápe, katuete ñandeperhudikáta ha omokangýta ñande jerovia. Ohasávo pe tiémpo, ñapensáta, ñañemondéta, ñañeʼẽta ha jaikótama haʼekuéraicha.

Jajapóva jajediverti hag̃ua.

Koʼág̃a rupi, pe teknolohía oguenohẽ hetaiterei mbaʼe pyahu ikatúva jaiporu jajediverti hag̃ua, péro oĩ heta umi naiporãiva kristiánope g̃uarã. Pablo heʼivaʼekue ndovaleiha ñañeʼẽ ni mbaʼevéicharõ tekokyʼáre (Efesios 5:3). Péro, ¿mbaʼépa jajapovaʼerã oiméramo ñane korasõ ojerure ñandéve jahecha térã ñahendu hag̃ua umi mbaʼe ivaíva? Ikatu ningo ñapensa opavave ñaikotevẽha tiémpo japytuʼu ha jajediverti hag̃ua, ha jaʼe voi káda uno odesidivaʼerãha mbaʼépa oiporavóta upearã. Upéicharõ jepe, jajapovaʼerã Pablo heʼivaʼekue ha ani jahecha ni ñahendu mbaʼeve ikatúva ñanemongyʼa.

IKATU HÍNA ÑAKAMBIA

Ikatu oime ñanembotavýma ñane korasõ ha jajepokuaa jaʼe vyroreinteha umi mbaʼe vai jajapóva, upéicharõ jepe ikatu gueteri ñakambia (Efes. 4:22-24). Jahechamína mokõi ehémplo.

Miguel * tekotevẽkuri okambia opensáva umi mbaʼetáre. Haʼe omombeʼu: “Che, che rembireko ha che raʼy, roiko peteĩ tetã opavave orekohápe komodida, umi mbaʼe osẽ pyahuvéva ha iporãvéva. Che aimoʼã ikatuha aiporu opa mbaʼe ko múndo oikuaveʼẽva ha natekotevẽmoʼãiha aiko pláta rapykuéri ahupyty hag̃ua umíva. Upe riremínte ahechakuaa aikoha aviaharõguáicha peteĩ tape opaʼỹvare añemeʼẽmbaite rupi ahupyty hag̃ua umi mbaʼerepy aipotáva. Upémarõ ajerure Ñandejárape tachepytyvõmi akambia hag̃ua apensáva ha arekóva che pyʼapýpe. Haʼe Jehovápe rojaposeha opa ikatúva che rogayguakuéra ndive roservi porã hag̃ua chupe. Upéi rodesidi roiko umi mbaʼe roikotevẽmívarente ha rova peteĩ lugár oñekotevẽhápe maranduhára. Tiémpo riremínte oiko orehegui prekursór, ha rohechakuaa natekotevẽiha jareko heta mbaʼe javyʼa ha jaiko hag̃ua pyʼaguapýpe”.

Avei jajepyʼamongetavaʼerã jaikuaa hag̃ua mbaʼe situasiónpepa ñaime. Lee ojapo upéva ha ohecha okambiavaʼerãha iñamigokuéra. Haʼe heʼi: “Che travahohápe tekotevẽ jepi añembyaty heta mbaʼevendeha tetã ambuegua ndive. Aikuaa porã ningo koʼã rreuniónpe oñemoĩha vevída ha oĩha heta hoʼu rasáva, upéicharõ jepe ahase. Sapyʼánte haimetemetéma akaʼu ha upéi che konsiénsia chemyangekói. Ahechakuaa tekotevẽha ajepyʼamongeta porã che situasión rehe. Umi konsého oĩva la Bíbliape ha ansianokuéra omeʼẽva chéve, chepytyvõ aikuaa hag̃ua moõpa oĩ che provléma: aiko ajeheʼaiterei umi ndohayhúivare Jehovápe. Koʼág̃a ajapo negósio teléfono rupive ha añehaʼãmbaite anive hag̃ua ajeheʼa umi mbaʼevendeha rehe”.

Ñañehaʼãvaʼerã jahecha mbaʼépa jareko ñande pyʼapýpe ha ani ñañembotavy ñandejupe voi. Jehová oikuaapa “yvy arigua pyʼapýpe oĩva guive”, upévare jajerurevaʼerã chupe tañanepytyvõ (Sal. 44:21, ÑÑB). Jareko avei la Biblia, haʼetéva peteĩ espého ñanepytyvõva jahecha hag̃ua mbaʼépa jareko ñande pyʼapýpe (Sant. 1:22-25). Hiʼarive, Jehová omeʼẽ ñandéve heta konsého neporãva umi puvlikasión ha rreunionkuéra rupive. Opa koʼã mbaʼe ñanepytyvõta ñañangareko hag̃ua ñande pyʼapýre ha jaikóta Ñandejára oipotaháicha.

^ párr. 18 Oñekambia umi téra.