Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Enero de 2013

Jaservi Jehovápe jajekulpaʼỹre mbaʼevére

Jaservi Jehovápe jajekulpaʼỹre mbaʼevére

“Cheresarái umi mbaʼe tapykuépe opytavaʼekuégui, ha añehaʼãmbaite ahupyty umi mbaʼe oĩva che renonderãme.” (FILIP. 3:13, NM)

1-3. a) ¿Mbaʼéichapa ojekuaa ñandestorvaha peteĩ mbaʼe jajapovaʼekue, ha mbaʼérepa upéva ikatu ojapo vai ñanderehe? b) ¿Mbaʼépa ñanemboʼe apóstol Pablo ehémplo?

PETEĨ poéta hérava John G. Whittier, heʼi peteĩ tapicha ikatuha ohechauka heta hendáicha oñembyasyha, péro ñambyasyeteve oĩramo heʼi térã ohaíva: “Tuichaite idiferénte vaʼerãmoʼã”. Heta vése jaʼe péicha ñambyasy jave peteĩ mbaʼe jadesidivaʼekue, ha ñapensávo iporãvéne hague jajapórire heta mbaʼe ambue hendáicha. Oĩ oñembyasýva ostorva rupi chupe peteĩ mbaʼe ojapovaʼekue térã ndojapoivaʼekue. ¿Mbaʼépa nde rembyasy?

2 Heta tapicha ou ojavy térã opeka vai. Ótro katu ndojapóiramo jepe ivaietereíva, oñeporandu oimépa odesidi porã raʼe. Oĩ heta nopensaguasúiva umi mbaʼe ojapovaʼekuére ha ojesarekónteva henonderãre. Péro oĩ avei umi ombyasýva odesidivaʼekue ha opensa: “Mbaʼére piko ndajapóiraʼe péicha, térã amóicha” (Sal. 51:3). Ha nde, ¿reservisépa Jehovápe koʼág̃a guive rembyasyʼỹre mbaʼeve? ¿Mbaʼe ehémplopa ikatu ñanepytyvõ? Ñahesaʼỹijomína apóstol Pablo ehémplo.

3 Pablo ningo ojapovaʼekue heta mbaʼe ivaietereíva, péro upe rire odesidi porã ha okambia. Ha ombyasýramo jepe ojapovaʼekue, oñehaʼãmbaite iñeʼẽrendu Ñandejárape ha oservi chupe vyʼapópe. Jahechamína mbaʼéichapa ojapo upéva.

PABLO REMBIASAKUE

4. ¿Mbaʼe mbaʼépa ojapovaʼekue Pablo?

4 Pablo ningo fariseovaʼekue imitãrusúpe ha ojapo heta mbaʼe ombyasýva upe rire. Pór ehémplo, omoakã umi opersegi ha omaltratávape Cristo remimboʼekuérape. Ñandejára Ñeʼẽ omombeʼu mbaʼépa ojapo Pablo ojejuka riremi Estébanpe: “Saulo [térã Pablo] oñepyrũ opersegi mbarete pe kongregasión. Ojasurúntema hogakuérape ha ombotyryryhápe oguenohẽ  kuimbaʼe ha kuñanguérape ogueraha hag̃ua kárselpe” (Hech. 8:3, NM). Heʼiháicha pe mboʼehára William Barclay, pe ñeʼẽ griégo ojetradusíva “opersegi mbarete”, heʼise “otrata vaieterei ha ipyʼahatãha hapichándi”, ojapoháicha “peteĩ mymba ñarõ oñemboharái vaipáva iprésare”. Saulo ifanatikoiterei irrelihión rehe, ha oimoʼã Ñandejára voi oiporuha chupekuéra ohundi hag̃ua umi kristiánope. Upévare “oamenasa [...] ñande Ruvicha disipulokuérape ha ojukapase voi chupekuéra”, ha oñemoĩ opersegi mbarete “tahaʼe kuña térã kuimbaʼépe” (Hech. 9:1, 2; 22:4, NM). *

5. ¿Mbaʼéicha rupípa Saulo ndopersegivéi Cristo remimboʼekuérape ha oñepyrũ opredika?

5 Saulo ohosékuri Damáscope oguenohẽ hag̃ua Cristo remimboʼekuérape hogaitégui voi ha ogueraha chupekuéra Sanedrín renondépe ikatu hag̃uáicha ojehusga. Péro Jesús, pe omoakãva kongregasión kristiána, ndohejái ojapo upéva (Efes. 5:23). Ohokuévo Damáscope, osẽ ohapejoko chupe. Peteĩ mbaʼerendy omimbipa sapyʼa Sáulore ha opyta ndohechavéi. Upéi Jesús omondo chupe upe távape ha heʼi ohaʼarõ hag̃ua upépe oikuaa peve mbaʼépa ojapovaʼerã. La Biblia omombeʼu mbaʼépa oiko upe rire (Hech. 9:3-22).

6, 7. ¿Mbaʼérepa jaʼekuaa Pablo ndahesaráiri hague umi mbaʼe vai ojapovaʼekuégui?

6 Pablo tuichaiterei okambia oiko rire chugui kristiáno. Mbaretépe opersegi rangue Jesús remimboʼekuérape, kyreʼỹme oñepyrũ odefende umi mbaʼe oaprende ramóva. Ha upéi ohai: “Katuete peẽ pehendúneraʼe mbaʼépa che ajapovaʼekue aĩrõ guare hudiokuéra rrelihiónpe, mbaʼéichapa apersegi vaipaite Ñandejára kongregasión ha añehaʼãmbaite ahundi” (Gál. 1:13, NM). Tiémpo riremínte imanduʼa jey umi mbaʼe ojapovaʼekuére, ohaírõ guare umi ermáno Corinto ha Filiposguápe, ha avei Timotéope (elee 1 Corintios 15:9; Filip. 3:6; 1 Tim. 1:13). Pablo ningo oiméne otĩetéraʼe omombeʼúvo umi mbaʼe ojapovaʼekue, péro oikuaa avei ndaikatuiha oiko mbaʼeveʼỹrõguáichante. Haʼe ndahesaráiri ojapo hague heta mbaʼe ivaietereíva (Hech. 26:9-11).

7 Pe mboʼehára Frederic W. Farrar omombeʼu mbaʼéichapa Saulo “oporopersegi mbarete” vaʼekue. Omombeʼu heta ojahéi hague umi kristiánore ha omaltrata chupekuéra. Jahechakuaáramo koʼã mbaʼe ojapovaʼekue “ikatu ñantende mbaʼeichaitépa oiméne Pablo oñeñandu vai hembiapokuére, ha avei jahecha ijetuʼuetereíne hague chupe iñenemigokuéra otaky jave hese”. Ovisitávo umi kongregasión katu oiméne oĩ ermáno haʼe ndoikuaáiva ha heʼíva chupe: “¡Nde piko raʼe la hetaite orembohasa asy vaʼekue!” (Hech. 9:21).

8. ¿Mbaʼéichapa Pablo ohechauka omombaʼeha Jehová ha Jesús ohayhu ha oiporiahuvereko haguére chupe, ha mbaʼépa ñaaprende chugui?

8 Upéicharõ jepe, Pablo ohechakuaa oikoha chugui apóstol Ñandejára ipyʼaporã rupínte hendive. Haʼe imanduʼa 90 vése rupi umi 14 kuatiañeʼẽ ohaivaʼekuépe Jehová imbaʼeporãha, hetave vése umi ótro kuimbaʼe ohaivaʼekuégui la Biblia (elee 1 Corintios 15:10). Oagradeseterei Ñandejárape oiporiahuvereko haguére chupe, ha ohechaukase oiporu porãha pe oportunida orekóva. Pablo ombaʼapo hetave vaʼekue Jehová servísiope entéro umi ótro apóstolgui. Hembiasakue ñanemboʼe peteĩ mbaʼe ñanemokyreʼỹetereíva, koʼýte oiméramo ñapensa Ñandejára noperdonamoʼãiha ñane rembiapo vai: Jahechaukáramo  jajeroviaha Jesús sakrifísio rehe, ñamombeʼu Jehovápe jajapovaʼekue ha ñakambia jaiko lája, Jehová katuete ñaneperdonáta, ivaietereíramo jepe ñande pekádo (elee 1 Timoteo 1:15, 16). Ymave Pablo heta oñemoĩ Jesús rehe, péro upéi ohai: “Ñandejára Raʼy [...] ningo cherayhu ha oñemeʼẽ cherehehápe” (Gál. 2:20, NM; Hech. 9:5). Jahechaháicha, Pablo vyʼapópe oservi Ñandejárape ha ndohejái umi mbaʼe vai ojapovaʼekue omoñeñandu vai chupe. ¿Reñeñandúpa avei haʼéicha?

Ombyasýramo jepe ojapovaʼekue, Pablo oñehaʼãmbaite oservi Jehovápe vyʼapópe

¿NDESTORVÁPA UMI MBAʼE REJAPOVAʼEKUE?

9, 10. a) ¿Mbaʼérepa heta ermáno oñembyasy? b) ¿Mbaʼérepa naiporãi ñapensa meme umi mbaʼe vai jajapovaʼekuére?

9 Ikatu oime rejapóraʼe peteĩ mbaʼe upéi rembyasýva. Pór ehémplo, reperde heta tiémpo ha reñemeʼẽmbaite rejapo hag̃ua peteĩ mbaʼe, péro upe rire rehechakuaa rejavy hague. Ikatu oime reperhudikarakaʼe peteĩ nde rapichápe, térã oĩ ótra kósa opytáva ndestorva. ¿Mbaʼépa ikatu rejapo reñeñandúramo upéicha?

10 Oĩ umi oikóva ojepyʼapyháre, opensa meméva umi mbaʼe vai ojapovaʼekuére ha péicha haʼe voi ojeperhudika. Péro, ¿osolusionátapa iprovléma ndoipeʼáiramo iñakãgui koʼã mbaʼe? Nahániri. Haʼete peteĩ opensáva ohotaha mombyry oñemyatymóiramo órare peteĩ kyhápe. Ohasáramo heta tiémpo péicha, katuete ikaneʼõta. Upévare, oiko rangue opensa meme hembiapo vaikuére, iporãvéta ojapóramo peteĩ mbaʼe oipytyvõtava chupe. Pór ehémplo, oiméramo iprovléma ótrondi, ojapovaʼerã tekotevẽva opyta porã jey hag̃ua hendive. Avei oñehaʼãmbaitevaʼerã anive hag̃ua ojapo umi mbaʼe ogueraha vai vaʼekue chupe. Térã tekotevẽ oñemombareténtema ogueropuʼaka hag̃ua upe provléma. Añetehápe ningo mbaʼeve ndajahupytýi jajepyʼapyeterei haguére. Upéicha jaikóramo, ndajajapomoʼãi mbaʼeve ideprovéchova ha ndaikatumoʼãi jaservi porã Jehovápe.

11. a) ¿Mbaʼépa ikatu jajapo Jehová ñandeporiahuvereko ha imbaʼeporã hag̃ua ñanendive? b) ¿Mbaʼépa ñanepytyvõta ani hag̃ua jajepyʼapyeterei umi mbaʼe vai jajapovaʼekuére?

 11 Oĩ ermáno opensaitereíva umi mbaʼe vai ojapovaʼekuére ha oimoʼã Jehová ndohayhumoʼãveimaha chupe. Ikatu opensa nomereseiha Ñandejára operdona chupe ivaietereígui ojapóva téra heta vése voi ojapo rupi. Upéicharamo jepe, umichagua ermáno ikatu oñearrepenti, okambia ha ojerure Jehovápe toperdonami chupe, tahaʼe haʼéva ipekádo (Hech. 3:19). Jehová ikatu oiporiahuvereko chupe ha imbaʼeporã hendive, ojapo haguéicha heta tapichándi. Haʼe ningo ipyʼaporã umi hekomirĩva ha oñembyasývandi ipyʼaite guive. Upéicha otratavaʼekue Jóbpe. Haʼe heʼi: “Ñembyasýpe [...] aguapy yvytimbo ha tanimbúpe” (Job 42:6). Jehová voi ñanepytyvõ ani hag̃ua jajepyʼapyeterei, heʼívo: “Hembiapo vai omokañýva, ndohoichéne tenonde; omombeʼu ha ohejávape katu ojeporiahuverekóne” (Prov. 28:13; Sant. 5:14-16). Upéicharõ, ñamombeʼu Ñandejárape ñane rembiapo vai, jajerure chupe tañaneperdona ha ñakambia tekotevẽhápe (2 Cor. 7:10, 11). Jajapóramo upéicha, haʼe ñandeporiahuverekóta ha ‘oheja reíta’ ñandéve ñande pekádo (Is. 55:7).

12. a) ¿Mbaʼépa jajapovaʼerã anive hag̃ua ñandestorva ñane rembiapo vaikue, ohechaukaháicha David ehémplo? b) ¿Mbaʼépa heʼise Jehová ombyasyha ojapóta vaʼekue, ha mbaʼérepa iporã ñantende upéva? (Ehecha pe rrekuádro.)

12 Jehová ikatu avei ñanepytyvõ pe ñemboʼe rupive. David oñemboʼevaʼekue chupe ha omombeʼu mbaʼéichapa oñeñandu. Ha umi mbaʼe heʼíva Jehovápe ojehai Sálmope (elee Salmo 32:1-5). Ñepyrũrã David oguerokirirĩ hembiapo vaikue ha ohechakuaa upéva ojapo vaiha hese. Amalisia nomombeʼúi rupi ipekádo heta ohasa asy, ndovyʼavéi ha hasy. ¿Mbaʼépa ojapo David ikatu hag̃uáicha Jehová operdona chupe ha oñeñandu porã jey hag̃ua? Oñemboʼe chupe ha omombeʼupaite hembiapo vai. Ñandejára ohendu iñemboʼe ha upéi omombarete chupe ojapo hag̃ua umi mbaʼe oĩ porãva. Péicha avei, remombeʼuvaʼerã Jehovápe ne remiandu, ha haʼe katuete nerendúta. Ha rejapovaʼerã tekotevẽva guive rekorrehi hag̃ua ne situasión oiméramo ndejopy gueteri umi mbaʼe vai rejapovaʼekue. Ha upe rire rejeroviavaʼerã Jehová katuete neperdonataha, opromete haguéicha (Sal. 86:5).

EJESAREKO NE RENONDERÃRE

13, 14. a) ¿Mbaʼe rehépa jajesarekovaʼerã koʼág̃a? b) ¿Mbaʼépa ñañeporanduvaʼerã jahechakuaa hag̃ua mbaʼépa jajapoñaína jaikóvo?

13 Ojeʼe ningo umi mbaʼe jahasavaʼekue ñanepytyvõha ñantende hag̃ua heta mbaʼe, péro ndaikatumoʼãi ñasẽ porã ñamañánterõ tapykue gotyo, síno tekotevẽ jajesareko ñane renonderãre. Upéicharõ jepe, jaiko rangue jajepyʼapy yma guarére, jajesarekovaʼerã umi mbaʼe jajapóvare koʼág̃a ha ñamaña ñane renonderãre. Iporã ñañeporandu: “¿Ambyasýtapa amo gotyove umi  mbaʼe adesidíva koʼág̃a? ¿Apensátapa iporãvéne hague ajapórire umi mbaʼe ambue hendáicha? ¿Ajapópa ikatúva guive aservi porã hag̃ua Jehovápe koʼág̃a, ani hag̃ua ambyasy upe rire ndajapói haguére hetave mbaʼe?”.

14 Hiʼag̃uivévo ohóvo pe jehasa asy guasu, nahiʼãi ñañembyasy ha jaʼe: “¿Oimépa ikatúraʼe ajapo hetave mbaʼe Jehová servísiope? ¿Mbaʼére piko ndajapóikuri che prekursorádo ijárõ guare chéve? ¿Mbaʼére piko nañehaʼãirakaʼe oiko hag̃ua chehegui siérvo ministeriál? ¿Ajapópa raʼe ikatúva guive akambia hag̃ua tekotevẽhápe ha aiko Jehová ojerureháicha? ¿Oimépa Jehová oipotáta aiko imúndo pyahúpe?”. Koʼã porandu ñanepytyvõta jahecha hag̃ua jajapópa jaikóvo opa ikatúva Jehovápe g̃uarã. Peichaʼỹrõ, ikatu hína jaiko jepiveguáichante ha akóinte jajapóta umi mbaʼe upéi ñambyasýtava (2 Tim. 2:15).

ANÍKE REMBYASY ARAKAʼEVE RESERVI HAGUÉRE JEHOVÁPE

15, 16. a) ¿Mbaʼépa omboyke heta ermáno ikatu hag̃uáicha oiporupaite itiémpo Jehová servísiope? b) ¿Mbaʼérepa nañambyasyivaʼerã ñamboyke haguére heta mbaʼe Jehová rehehápe?

15 ¿Remboyképa heta mbaʼe ikatu hag̃uáicha reiporupaite ne tiémpo Jehová servísiope? Ikatu oime reheja peteĩ estúdio ijyvatéva, térã peteĩ traváho iporãva reiko hag̃ua reikotevẽmívarente, ha upéicha ne tiempove Ñandejárape g̃uarã. Ikatu avei neremendái térã ndereguerekói família ikatu hag̃uáicha reservi Betélpe, superintendénteramo, misionéro térã grúpo de konstruksión internasionálpe. ¿Mbaʼéichapa reñeñandu reservi rire péicha Jehovápe heta áñore? ¿Rembyasýpa redesidi haguére upéva? ¿Repensápa reiete remboyke hague heta mbaʼe, térã ndahaʼéi hague itiémpo? Aníkena repensa upéicha arakaʼeve.

16 Oiméne katuete redesidirakaʼe reiporupaite ne tiémpo iservísiope rehayhúgui Jehovápe ha reipytyvõségui umi tapicha oservisévape chupe. Ani reimoʼã oho porãvéne hague ndéve reiporavórire ambue mbaʼe. Revyʼavaʼerã reikuaágui rejapo hague pe iporãvéva, reñemeʼẽmbaite haguére Jehová servísiope. Haʼe katu ndahesaraimoʼãi umi mbaʼe rejapóvagui hesehápe. Ág̃a rehupyty vove pe ‘jeikove añeteguáva’, térã ñandeperfékto vove ha jaiko opa ára g̃uarã, Jehová omeʼẽta ñandéve opa mbaʼe ñaikotevẽva ha umi ñaimoʼãʼỹva jepe (Sal. 145:16; 1 Tim. 6:19).

MBAʼÉICHAPA JASERVÍTA JEHOVÁPE JAJEKULPAʼỸRE MBAʼEVÉRE

17, 18. a) ¿Mbaʼépa ojapovaʼekue Pablo anive hag̃ua ojekulpa hembiapo vaikuére? b) ¿Mbaʼéichapa nepytyvõ apóstol Pablo rembiasakue?

17 ¿Mbaʼépa ojapo Pablo anive hag̃ua ojekulpa umi mbaʼe vai ojapovaʼekuére? Haʼe voi omombeʼu mbaʼépa oipytyvõ chupe: “Cheresarái umi mbaʼe tapykuépe opytavaʼekuégui, ha añehaʼãmbaite ahupyty umi mbaʼe oĩva che renonderãme” (elee Filipenses 3:13, 14). Pablo noñemoĩri opensa umi mbaʼe vai ojapovaʼekuére oĩrõ guare hudiokuéra rrelihiónpe. Upéva rangue, oiporupaite itiémpo ha oñemeʼẽmbaite ojapo hag̃ua tekotevẽva ikatu hag̃uáicha ohupyty pe jeikove opaveʼỹva.

18 ¿Mbaʼépa ñaaprende Pablo heʼívagui? Naiporãiha jajepyʼapyeterei jajapovaʼekuére. Umi mbaʼe ningo nañakambiamoʼãvéima. Upéva rangue jajesarekovaʼerã ñane renonderãre. Ikatu ningo nañanderesarái umi mbaʼe vai jajapovaʼekuégui, péro ndovaléi japyta ñañembyasy umi mbaʼére. Jahejavaʼerã tapykuépe jahasavaʼekue, jaservi koʼág̃a Jehovápe ñande pyʼaite guive ha jajesareko umi mbaʼe porãite ñaneraʼarõvare.

^ párr. 4 La Biblia omombeʼu Saulo heta vése omaltrata hague avei kuñanguérape. Upéva ohechauka umi kristiána primer síglo guare ombaʼapo meme hague predikasiónpe, ojapoháicha avei koʼág̃arupi ermanakuéra (Sal. 68:11).