“Ndepyʼaguasu ha nembaretéke, ha tereho emoñepyrũ pe traváho. Ani ndepyʼaju ni rekyhyje, pórke Ñandejára Jehová [...] oĩ nendive” (1 CRÓN. 28:20, TNM).

PURAHÉI: 38, 34

1, 2. a) ¿Mbaʼe rresponsavilida tuichávapa oñemeʼẽ Salomónpe? b) ¿Mbaʼépa oipyʼapy vaʼekue Davídpe?

JEHOVÁ oiporavo Salomónpe omopuʼã hag̃ua Jerusalén témplo. Upéva ningo peteĩ tembiapo ndetuichapa jepéva ha iñimportantetereíva. Pe óga “ojajaipáta porãgui, ha upéicha rupi entéro tetãrupi ojekuaáta mbaʼeichaitépa iporã”. Péro iñimportanteveha, pe óga oñemopuʼãta “Jehovápe g̃uarã” (1 Crón. 22:1, 5, 9-11, TNM).

2 Rréi David oĩ vaʼekue segúro Ñandejára oipytyvõtaha Salomónpe. Péro Salomón “imitã ha ndoikuaái gueteri heta mbaʼe”. ¿Ipyʼaguasútapa oasepta hag̃ua pe rresponsavilida tuichaitéva? ¿Térãpa orrechasáta imitã ha ndoikuaái rupi heta mbaʼe? Ikatu hag̃uáicha Salomón okumpli porã ko asignasión, tekotevẽ kuri ipyʼaguasu ha oñepyrũ ombaʼapo.

3. ¿Mbaʼépa oaprende Salomón itúagui?

3 Katuete ningo Salomón oaprendéne raʼe itúa ehémplogui. David ipyʼaguasu vaʼekue, por ehémplo imitãrusúrõ guare oñorairõ vaʼekue umi animál salváhendi odefende hag̃ua itúa ovechakuéra (1 Sam. 17:34, 35). Avei ohechauka vaʼekue ipyʼaguasuha  oñorairõrõ guare peteĩ soldádo tuichaitereívandi hérava Goliat. Upérõ Ñandejára oipytyvõ chupe ojuka hag̃ua peteĩ itápe ko gerréro ikatupyryetévape (1 Sam. 17:45, 49, 50).

4. ¿Mbaʼérepa Salomón tekotevẽ kuri ipyʼaguasu?

4 Jahechaháicha, David ipyʼaguasu vaʼekue, upévare oĩ porã kuri omokyreʼỹ Salomónpe ikatu hag̃uáicha pyʼaguasúpe omopuʼã pe témplo (elee 1 Crónicas 28:20). Salomón okyhyjérire noñanimamoʼãi kuri ni omoñepyrũ pe traváho, ha upéva ivaivéta kuri.

5. ¿Mbaʼérepa tekotevẽ ñandepyʼaguasu?

5 Ñande avei ñaikotevẽ Jehová ñanepytyvõ. Péicharõmante ikatúta ñandepyʼaguasu jajapo hag̃ua la haʼe ohaʼarõva ñandehegui. Upévare ñahesaʼỹijóta unos kuánto ehémplo yma guare. Ha jahechakuévo koʼã ehémplo, ñapensa mbaʼéichapa ñande avei ikatu ñandepyʼaguasu ha jajapo Jehová ohaʼarõva ñandehegui.

EHÉMPLO YMA GUARE

6. ¿Mbaʼépa rehecharamo José ojapo vaʼekuére?

6 Jahechamína mbaʼeichaitépa José ipyʼaguasu vaʼekue. Potifar rembireko oñekuaveʼẽrõ guare chupe, haʼe katuete oikuaáne raʼe iprovlemataha orrechasárõ chupe. Upéicharõ jepe ipyʼaguasu ha orrechasa pe kuñakaraípe (Gén. 39:10, 12).

7. Emombeʼu mbaʼéichapa Rahab ohechauka vaʼekue ipyʼaguasuha. (Ehecha pe taʼanga oĩva iñepyrũme).

7 Jahechamína koʼág̃a Rahab ehémplo. Mokõi israelita ohórõ guare ovichea Jericó, Rahab ikatu kuri okyhyje ha noipytyvõi chupekuéra. Péro haʼe ojerovia Jehováre ha ipyʼaguasu, upévare oipytyvõ umi mokõi kuimbaʼépe ikatu hag̃uáicha okañy ha ojesalva (Jos. 2:4, 5, 9, 12-16). Rahab oikuaa vaʼekue Jehová haʼeha pe Dios verdadéro ha omeʼẽtaha ipuévlope upe yvy. Haʼe ndokyhyjéi kuri umi soldádogui ni pe rréi de Jericógui. Síno ipyʼaguasu, ha upéicha rupi ojesalva haʼe ha ihentekuéra (Jos. 6:22, 23).

8. ¿Mbaʼéichapa Jesús ehémplo oipytyvõ umi apóstolpe?

8 Jesús apostolkuéra ipyʼaguasu vaʼekue avei. Haʼekuéra ohecha kuri mbaʼéichapa Jesús ipyʼaguasu, ha osegi hikuái iñehémplo (Mat. 8:28-32; Juan 2:13-17; 18:3-5). Umi saduséo heʼírõ guare chupekuéra anivéma hag̃ua oñeʼẽ avavépe Jesúsre, umi apóstol lomímonte osegi opredika (Hech. 5:17, 18, 27-29).

9. Ohechaukaháicha 2 Timoteo 1:7, ¿mbaʼépa ñaikotevẽ ñandepyʼaguasu hag̃ua?

9 José, Rahab, Jesús ha ijapostolkuéra oĩ vaʼekue desidído ojapotaha la iporãva. Haʼekuéra ipyʼaguasu vaʼekue ojerovia rupi Jehováre, ndahaʼéi ijehénte. Ñande avei sapyʼánte tekotevẽta ñandepyʼaguasu, ha upéicha jave ani jajerovia ñandejehénte, jajerovia guei Jehováre (elee 2 Timoteo 1:7). Jahechamína koʼág̃a mbaʼéichapa ikatu jahechauka ñandepyʼaguasuha ñande rogapýpe ha kongregasiónpe.

MBAʼÉICHA JAVÉPA TEKOTEVẼ ÑANDEPYʼAGUASU

10. ¿Mbaʼérepa mitãrusukuéra ipyʼaguasu vaʼerã?

10 Heta situasiónpe mitãrusukuéra ohechauka vaʼerã ipyʼaguasuha ikatu hag̃uáicha osegi ifiél Jehovápe. Salomón ehémplo ikatu oipytyvõ chupekuéra. Haʼe ipyʼaguasu rupi odesidi porã ha otermina pe témplo. Tuakuéra ningo ogia vaʼerã ifamiliakuérape, upéicharõ jepe mitãrusukuéra odesidi vaʼerã ijeheguiete heta mbaʼe iñimportánteva (Prov. 27:11). Por ehémplo, iñarandu ha ipyʼaguasu vaʼerã odesidi porã hag̃ua mávarepa ojeheʼáta, mbaʼéichapa ojedivertíta, mbaʼépa ojapóta ani hag̃ua hekokyʼa ha arakaʼépa ojevautisáta. Mitãrusukuéra tekotevẽ ipyʼaguasu pórke oñemoĩ hína Satanás kóntrape, ha haʼe oheja vaise hína Jehovápe.

11, 12. a) ¿Mbaʼéichapa Moisés ohechauka vaʼekue ipyʼaguasuha? b) ¿Mbaʼéichapa mitãrusukuéra ikatu osegi Moisés ehémplo?

 11 Mitãrusukuéra opensa vaʼerã mbaʼépa ojapose henonderãme. Péva haʼe peteĩ desisión iñimportánteva. Heta paíspe oñepresiona chupekuéra ikatu hag̃uáicha ijestúdio porã ha oreko peteĩ traváho ogana porãtahápe. Ambue lugárpe katu ivai la pórte, ha mitãrusukuéra opensa oñemeʼẽmbaite vaʼerãha pe traváhope oipytyvõ hag̃ua hogayguakuérape. Oiméramo nde reime koʼãichagua situasiónpe, epensa Moisés ehémplore. Chupe omongakuaa vaʼekue Faraón rajy, ha ikatu kuri oñehaʼã irríko hag̃ua ha oiko hag̃ua chugui peteĩ persóna iñimportánteva. Katuete ningo hogayguakuéra Egiptopegua, iprofesorkuéra ha ikonseherokuéra omboliga meme raʼe chupe ohupyty hag̃ua koʼã mbaʼe. Péro Moisés ipyʼaguasu ha odesidi oservi Ñandejárape. Haʼe oheja umi rrikésa oreko vaʼekue Egíptope ha ojerovia Jehováre (Heb. 11:24-26). Upévare Jehová tuichaiterei ovendesi chupe, ha hetaiteve mbaʼe porã omeʼẽta chupe amo gotyove.

12 Jehová katuete ovendesíta umi mitãrusu ha mitãkuña oñehaʼãvape ombaʼapove iservísiope ha omotenonde Irréino. Añetehápe nombofaltamoʼãi chupekuéra mbaʼeve koʼág̃a ni amo gotyove. Síglo primérope peteĩ mitãrusu hérava Timoteo omotenonde vaʼekue Ñandejára oipotáva, ha nde ikatu avei ejapo upéva * (elee Filipenses 2:19-22).

¿Rehechaukátapa avei ndepyʼaguasuha? (Ehecha párrafo 13-17)

13. ¿Mbaʼépa ohupyty peteĩ ermána ipyʼaguasu rupi?

13 Jahechamína mbaʼépa ohasa vaʼekue peteĩ mitãkuña oikóva Alabámape (Estados Unidos). Haʼe hiʼotĩeterei ha okyhyje kuri omoĩ hag̃ua méta Jehová servísiope. Ko mitãkuña heʼi: “Che ningo chemitã guive cheotĩ. Ijetuʼu vaʼekue voi chéve añeʼẽ hag̃ua ótrope Salón del Réinope. Ha predikasiónpe katu ni ndajaʼeséi, pórke añeʼẽ vaʼerã umi extráñondi”. Ko ermánape oipytyvõ ituakuéra ha ambue ermáno ikatu hag̃uáicha oiko chugui prekursóra rregulár. Haʼe heʼi: “Satanás múndope la iñimportantevéva hína ndeestúdio porã, nefamóso, ndepláta ha hetave mbaʼe. Péro amo ipahápe ndaiporiguasúi la ohupytýva koʼã mbaʼe. Upéva rangue la majoría ohasa asy ha oiko oñekevrantaháre. Che katu avyʼa aservi rupi Jehovápe ha añeñandu porãiterei”.

14. ¿Mbaʼéicha javépa ipyʼaguasu vaʼerã tuakuéra?

14 Tuakuéra ningo tekotevẽ avei ipyʼaguasu. Por ehémplo, ipatrón ikatu pyʼỹinte ojerure chupekuéra ojapo hag̃ua óra éxtra pe día haʼe omboykévape ojapo hag̃ua ijestúdio de família, osẽ hag̃ua opredika térã oho hag̃ua rreunionhápe. Añetehápe ningo ipyʼaguasu vaʼerã oñenega jey jey hag̃ua. Péro péicha omoĩ hína ehémplo porã ifamíliape. Ikatu avei peteĩ túa nopermitíri ifamíliape ojapo peteĩ mbaʼe, péro umi ótro ermáno si oheja ifamíliape ojapo upéva. ¿Mbaʼépa heʼíta umi túa oporandúramo chupe mbaʼérepa oproivi ifamíliagui umi mbaʼe? Ipyʼaguasu vaʼerã ikatu hag̃uáicha oexplika porã umi ótrope la opensáva.

15. ¿Mbaʼéichapa Salmo 37:25 ha Hebreos 13:5 oipytyvõ tuakuérape ipyʼaguasu hag̃ua?

15 Umi sy ha túa ipyʼaguasúva omokyreʼỹ ifamíliape omoĩ hag̃ua méta Jehová servísiope, ha oipytyvõ chupekuéra ohupyty hag̃ua. Ikatu ningo tuakuéra okyhyje omokyreʼỹ hag̃ua ifamíliape oiko hag̃ua chugui prekursór, ova hag̃ua peteĩ lugár oñekotevẽvehápe opredika vaʼerã, ombaʼapo hag̃ua Betélpe térã konstruksión de Salón del Reino ha Salón de Asambléape. ¿Mbaʼérepa? Ikatu opensa ifamiliakuéra oservíramo péicha ndaikatumoʼãiha oñangareko hesekuéra  ijedave vove. Péro tuakuéra iñarandúva, ipyʼaguasu ha ojerovia Jehová okumplitaha ipromesakuéra (elee Salmo 37:25 ha Hebreos 13:5). Péicha haʼekuéra omoĩ ehémplo porã ifamíliape ha oipytyvõ chupekuéra ikatu hag̃uáicha ipyʼaguasu ha ojerovia Jehováre (1 Sam. 1:27, 28; 2 Tim. 3:14, 15).

16. a) ¿Mbaʼépa ojapo tuakuéra oipytyvõ hag̃ua ifamíliape omoĩ hag̃ua méta Jehová servísiope? b) ¿Mbaʼéichapa oipytyvõ upéva umi mitãme?

16 Jahechamína mbaʼéichapa peteĩ matrimónio Estados Unidosgua oipytyvõ vaʼekue ifamiliakuérape omoĩ hag̃ua méta Jehová servísiope. Pe túa heʼi: “Ore familiakuéra oñeʼẽ ha oguatakuaa mboyve, ore roʼéma chupekuéra mbaʼeichaitépa javyʼa ñaipytyvõ jave kongregasiónpe ha jaservívo de prekursór. Koʼág̃a orekóma hikuái umi méta. Upéva tuicha oipytyvõ chupekuéra omotenonde hag̃ua Jehová servísio ha ani hag̃ua hoʼa Satanás ñuhãme”. Ótro ermáno mokõi ifamíliava oskrivi: “Oĩ túa ogasta hetáva ha ojapóva ikatúva guive ifamília ojesareko hag̃ua umi estúdiore, ojededika hag̃ua algún depórtepe térã ambue mbaʼépe. Péro añetehápe iporãve hína tuakuéra omokyreʼỹ ifamíliape omoĩ hag̃ua méta oipytyvõtava chupekuéra oñemoag̃uive hag̃ua Jehováre. Oréve ningo orembovyʼaiterei rohechávo mbaʼéichapa ore família omoĩ méta ha ohupyty umíva”. Tuakuéra oikuaa porã vaʼerã Jehová katuete ovendesitaha chupekuéra oipytyvõramo ifamiliakuérape omotenonde hag̃ua Jehová servísio.

ÑANDEPYʼAGUASÚKENA KONGREGASIÓNPE

17. ¿Mbaʼéicha javépa tekotevẽ ñandepyʼaguasu kongregasiónpe?

17 Kongregasiónpe avei tekotevẽ ñandepyʼaguasu. Por ehémplo, ansianokuéra ipyʼaguasu vaʼerã ohusgáta jave umi opeka vaietereívape. Avei oĩ jave oikotevẽva urhénte doktór rehe. Oĩ avei ojapóva rreunión kárselpe ha ombostudiáva umi oĩvape préso. Umi ermána soltéra avei ipyʼaguasu vaʼerã. Koʼág̃arupi haʼekuéra ikatu ojapo hetave mbaʼe Jehová servísiope. Por ehémplo, ikatu ojapo iprekursorádo, ova umi lugár oñekotevẽvehápe opredika vaʼerã, oipytyvõkuaa pe Departamento Local de Diseño y Construcciónpe, térã ojerurekuaa oho hag̃ua Eskuéla Oñembokatupyryve hag̃ua umi  Opredikávape. Oĩ voi ikatúva oho Escuela de Galaádpe.

18. ¿Mbaʼéichapa umi ermána ijedáva ikatu ohechauka ipyʼaguasuha?

18 Ñande ningo jahayhu ñane ermanakuéra ijedávape ha javyʼa oservi haguére ñanendive kongregasiónpe. Heta vése haʼekuéra ndaikatuvéima ojapo heta mbaʼe Jehová servísiope ymave guaréicha. Upéicharõ jepe haʼekuéra pyʼaguasúpe oipytyvõ kongregasiónpe (elee Tito 2:3-5). Por ehémplo, ikatu peteĩ ansiáno ojerure peteĩ ermána ijedávape oñeʼẽ hag̃ua peteĩ ermána imitãvape omehora hag̃ua oñemonde lája. Péicha jave umi ermána ijedáva ipyʼaguasu vaʼerã ojapo hag̃ua upéva. Péro ndojaʼói vaʼerã pe ermána imitãvape, upéva rangue mborayhúpe oipytyvõ vaʼerã chupe opensa hag̃ua avei umi ermanokuérare odesidíta jave mbaʼéichapa oñemondéta (1 Tim. 2:9, 10). Péicha umi ermána ijedáva ohechauka hína oporohayhuha ha oipytyvõ pe kongregasión imbareteve hag̃ua.

19. a) ¿Mbaʼéichapa kuimbaʼekuéra ojevautisámava ikatu ipyʼaguasuve? b) ¿Mbaʼéichapa Filipenses 2:13 ha 4:13 ikatu oipytyvõ umi kuimbaʼe ojevautisámavape?

19 Umi kuimbaʼe ojevautisámava ipyʼaguasu vaʼerã avei ojapo hag̃ua heta mbaʼe. Haʼekuéra ideprovechoitereíta kongregasiónpe oĩramo dispuésto ohupytývo hetave rresponsavilida (1 Tim. 3:1). Péro sapyʼánte ikatu oduda ojapo hag̃ua upéva. ¿Mbaʼérepa? Ikatu umi mbaʼe vai ojapo vaʼekue ymave ostorva gueteri chupekuéra ha opensa nomereseiha oservi kómo ansiáno térã siérvo ministeriál. Ikatu avei oĩ opensáva ndaikatupyryiha okumpli porã hag̃ua umi rresponsavilida. Oiméramo rehasa hína koʼã situasiónre, ani rejepyʼapy, Jehová katuete nepytyvõta (elee Filipenses 2:13 ha 4:13). Epensamína Moisés ehémplore. Haʼe opensa vaʼekue avei ndaikatumoʼãiha okumpli Jehová omandáva (Éx. 3:11). Péro Jehová oipytyvõ chupe ikatu hag̃uáicha ipyʼaguasu ha okumpli iñasignasión. Upévare, oiméramo rehechakuaa tekotevẽha ndepyʼaguasuve, ejerure Jehovápe tanepytyvõ ha elee la Biblia káda día. Avei tuicha nepytyvõta rejepyʼamongetávo Ñandejára siervokuéra yma guare ehémplore, umi ohechauka vaʼekue ipyʼaguasuha. Rejerurekuaa avei ansianokuérape tanepytyvõ ndekatupyryve hag̃ua, ha ikatu voi reñekuaveʼẽ reipytyvõ hag̃ua tekotevẽhápe. Peẽ ermanokuéra pejevautisámava, pendepyʼaguasúkena ha peñehaʼã pembaʼapove kongregasiónpe.

“JEHOVÁ [...] OĨ NENDIVE”

20, 21. a) ¿Mbaʼépa David heʼi vaʼekue Salomónpe? b) ¿Mbaʼéichapa ñanepytyvõta Jehová?

20 Rréi David omomanduʼa vaʼekue Salomónpe Jehová oipytyvõtaha chupe otermina peve pe témplo (1 Crón. 28:20). Katuete ningo Salomón ojepyʼamongetáne raʼe la itúa heʼívare chupe, ha imitã ha ndaikatupyryguasúiramo jepe, ojapo pe traváho tuichaitéva. Haʼe ohechauka vaʼekue ipyʼaguasuha, ha Jehová oipytyvõ chupe otermina hag̃ua pe témplo porãite siete áño imédiope.

21 Jehová oipytyvõ haguéicha Salomónpe, ñandéve avei ikatu ñanepytyvõ ñandepyʼaguasu ha jajapo hag̃ua la ohaʼarõva ñandehegui, tahaʼe ñande rogapýpe ha kongregasiónpe (Is. 41:10, 13). Pyʼaguasúpe jaservíramo Jehovápe, haʼe ñanevendesíta koʼág̃a ha opa árare. Upévare, jajapókena David heʼi vaʼekue: “Ndepyʼaguasu ha nembaretéke, ha tereho emoñepyrũ pe traváho”.

^ párr. 12 Retopavéta informasión nepytyvõtava remoĩ hag̃ua méta Jehová servísiope, pe artíkulo héravape “Fijémonos metas espirituales para glorificar al Creador”, osẽ vaʼekue La Atalaya 15 de julio de 2004-pe.