Ehecha oĩva pype

Ehecha oĩva pype

Jajapóva rupive jahechauka japorohayhu añeteha

Jajapóva rupive jahechauka japorohayhu añeteha

“Aníke ñande jurúpente japorohayhuete guaʼu, síno jahechauka vaʼerã japorohayhu añeteha umi mbaʼe jajapóva rupive” (1 JUAN 3:18).

PURAHÉI: 106, 100

1. ¿Mbaʼeichagua mborayhúpa la tuichavéva, ha mbaʼéichapa ikatu jahechauka? (Ehecha pe taʼanga oĩva iñepyrũme).

PE MBORAYHU ningo ou Ñandejáragui (1 Juan 4:7). La Biblia oñeʼẽ jave pe mborayhu tuichavévare oipuru pe palávra griega agápe. Peichagua mborayhu kristianokuéra ohechauka vaʼerã opavavépe. Péro upéva ndahaʼéi peteĩ mbaʼe ñañandúnteva, síno jahechauka vaʼerã umi mbaʼe jajapóva rupive ñahaʼarõʼỹre mbaʼeve. Péicha japorohayhúramo, jajapóta iporãva ñande rapichakuéra rehehápe, ha katuete javyʼáta ha isentidovéta ñandéve ñande rekove.

2, 3. ¿Mbaʼéichapa Jehová ohechauka ohayhuetereiha yvyporakuérape?

Jehová ojapo mboyve Adán ha Évape ohechaukáma vaʼekue ohayhuha yvyporakuérape. Haʼe okrea ko yvy jaiko hag̃ua pype ha orekopaite umi mbaʼe ñaikotevẽva. Ndahaʼéi upéva añónte, ojapo avei entéro mbaʼe ikatu hag̃uáicha jadisfruta. Jehová ojapo koʼã mbaʼe ñandéve g̃uarã, ndahaʼéi ijupe g̃uarã. Avei omeʼẽ yvyporakuérape pe oportunida oiko hag̃ua opa árare peteĩ paraísope.

Jehová ohechauka vaʼekue mbaʼeichaite pevépa ohayhu  yvyporakuérape, Adán ha Eva opuʼãrõ guare hese. Haʼe ndodudái kuri Adán ha Eva familiare apytépe oĩtaha la ohayhúva chupe, upévare ojapo tekotevẽva guive ikatu hag̃uáicha osalva chupekuéra (Gén. 3:15; 1 Juan 4:10). Jehová opromete ypy guive omboutaha peteĩ ñandesalva vaʼerã, chupe g̃uarã lomímo ke oikómava voi upéva. Ohasa rire 4.000 áño, Ñandejára omeʼẽ Itaʼýra peteĩete yvyporakuéra rehehápe (Juan 3:16). ¡Ajépa jaagradesete Jehovápe ñanderayhueterei haguére!

4. ¿Mbaʼéicha rupípa ñaneimperféktoramo jepe ikatu jahechauka japorohayhu añeteha?

Jehová ñandeapo ijoguahárõ, upéicha rupi ñaneimperféktoramo jepe ikatu avei jahechauka japorohayhu añeteha. Sapyʼánte ningo ijetuʼu jahechauka hag̃ua peichagua mborayhu, upéicharõ jepe ikatu hína jajapo upéva. Por ehémplo, Abel ohechauka vaʼekue ohayhuetereiha Ñandejárape omeʼẽvo chupe umi mbaʼe iporãvéva orekóva (Gén. 4:3, 4). Noé avei ohechauka oporohayhu añeteha pórke osegi opredika hetaiterei áñore nohenduséirõ jepe chupe umi hénte (2 Ped. 2:5). Abrahán katu ohechauka ohayhuveha Ñandejárape opaite mbaʼe ári, pórke oĩ dispuésto omeʼẽvo itaʼýra ohayhuetéva rekove (Sant. 2:21). Ojapo haguéicha koʼã Ñandejára siérvo, ñande avei ikatu jahayhu chupe ñande pyʼaite guive jahasáramo jepe heta mbaʼe ijetuʼúva.

¿MBAʼÉPA HEʼISE JAPOROHAYHU AÑETEHA?

5. ¿Mbaʼéichapa ikatu jahechauka japorohayhu añeteha?

La Biblia heʼi umi mbaʼe jajapóva rupive jahechauka vaʼerãha “japorohayhu añeteha”, ndahaʼéi jaʼénte vaʼerã upéva (1 Juan 3:18). Péro upéva ndeʼiséi umi mbaʼe jaʼéva rupive ndaikatumoʼãiha ñademostra japorohayhuha (1 Tes. 4:18). La heʼiséva hína sapyʼánte tekotevẽtaha umi mbaʼe jajapóva rupive jahechauka japorohayhuha. Por ehémplo, jahecháramo ñane ermáno térã ñane ermána oikotevẽha ao térã tembiʼu, noipytyvõguasumoʼãi jaʼénterõ jahayhuha chupe (Sant. 2:15, 16). Upéicha avei, jahayhu añetéramo Jehovápe ha ñande rapichápe, ndahaʼemoʼãi jajerurétanteva Jehovápe “tombou hetave travahadór omonoʼõ vaʼerã ikóga”, síno ñande voi japredika meméta (Mat. 9:38).

6, 7. a) ¿Mbaʼépa heʼise japorohayhu tovamokõiʼỹre? b) ¿Máva mávapa ohechauka vaʼekue oporohayhu guaʼunteha?

Apóstol Juan heʼi vaʼekue: “Jahechauka vaʼerã japorohayhu añeteha umi mbaʼe jajapóva rupive”. Upéva heʼise japorohayhu vaʼerãha “tovamokõiʼỹre” (Rom. 12:9; 2 Cor. 6:6). Sapyʼánte oĩ hénte oporohayhu guaʼúva ojechauka hag̃uánte. Péro umi ojapóva péicha ohechauka hína hovamokõiha. Peichagua mborayhu ndovaléi mbaʼeverã.

Por ehémplo, Satanás oñeʼẽrõ guare Évape hardín de Edénpe, oipota kuri Eva opensa haʼe oñeinteresa añeteha hese. Péro ndaupeichaiete kuri (Gén. 3:4, 5). Rréi David katu oreko vaʼekue peteĩ iñamigoite hérava Ahitofel. Péro ko kuimbaʼe hovamokõi ha opensa ijehénte, upéicha rupi oñepresentárõ guare chupe peteĩ oportunida, otraisiona kuri Davídpe (2 Sam. 15:31). Koʼág̃arupi avei umi apóstata ha ambue tapicha oñehaʼã ombyai pe unida oĩva kongregasiónpe, haʼekuéra oñeinteresaiterei guaʼu la héntere ha ombojuruheʼẽ chupekuéra. Péro koʼãichagua persóna opensa ijehénte (Rom. 16:17, 18).

8. ¿Mbaʼépa iporã ñañeporandu?

Ivaietereíta ningo jaʼe guaʼúnteramo jahayhuha ñande rapichápe, pórke péicha tuichaiterei ñambotavy hína chupe. Ikatu ningo ñande rapichakuéra ndopillái jahayhu guaʼunteha chupekuéra, péro Jehovápe nañambotavymoʼãi. Jesús heʼi vaʼekue  umi hovamokõiva ojekastiga vaietereitaha (Mat. 24:51). Ñande jaservíva Jehovápe nahiʼãiete ñanderovamokõi. Upévare iporã ñañeporandu: “¿Ahayhu añetépa hína che rapichakuérape, térãpa sapyʼánte cherovamokõi ha apensa chejehénte? Heta hendáicha ningo ikatu jahechauka japorohayhuha tovamokõiʼỹre. Jahechamína koʼág̃a 9 mbaʼe ikatúva jajapo.

JAHECHAUKA JAPOROHAYHUHA UMI MBAʼE JAJAPÓVA RUPIVE

9. ¿Mbaʼépa jajapóta jahayhu añetéramo ñande rapichakuérape?

Ñaipytyvõkena ñande rapichakuérape ndojehecháiramo jepe la jajapóva. Jajapo vaʼerã la ikatúva guive ñane ermanokuéra rehehápe ha natekotevẽi avave oikuaa la jajapóva (elee Mateo 6:1-4). Ananías ha Safira omeʼẽ vaʼekue ikontrivusión ojechauka hag̃uánte. Haʼekuéra oipota enterove oikuaa la ojapóva, ha tuicha voi ijapu heʼívo mboýpa omeʼẽ hikuái. Ñandejára upepete okastiga kuri chupekuéra hovamokõi haguére (Hech. 5:1-10). Jahayhu añetéramo ñane ermanokuérape, vyʼápe ñaipytyvõta chupekuéra ha ndajajapomoʼãi upéva jajechauka hag̃uánte. Ehémplo porã ñandéve g̃uarã umi ermáno oipytyvõva pe Kuérpo Governántepe oprepara hag̃ua umi aliménto espirituál. Haʼekuéra iñumílde ha ndoikói omombeʼu avavépe mbaʼépepa ombaʼapo hína hikuái.

10. ¿Mbaʼéichapa ikatu ñamombaʼe ñande rapichakuérape?

10 Ñamombaʼékena ñande rapichakuérape (elee Romanos 12:10). Jesús ohechauka kuri omombaʼeha ijapostolkuérape ojohéirõ guare chupekuéra ipy (Juan 13:3-5, 12-15). Haʼekuéra orresivi rire espíritu sánto ontende kuri mbaʼépa la Jesús omboʼese vaʼekue (Juan 13:7). Ñande avei jasegi vaʼerã Jesús ehémplo, ñañehaʼã vaʼerã ñaneumílde ha ñamombaʼe ñande rapichakuérape haʼe ojapo haguéicha. Nañapensái vaʼerã ñande estúdio porã haguére ñandevaleveha ótrogui, térã ñaneimportanteveha ñandeplatave rupi, ỹrõ jarekógui priviléhio Jehová servísiope (Rom. 12:3). Aníkena avei ñandepochy jahecháramo ojeguerohoryha peteĩ persónape umi mbaʼe ojapóvare. Upéva rangue, javyʼa vaʼerã hendivekuéra ñapensáramo jepe ñande ñamereseha avei jajeguerohory hendivekuéra upe traváhore.

11. ¿Mbaʼérepa iñimportánte jafelisita ñande rapichakuérape?

11 Jafelisitákena ñane ermanokuérape ñande pyʼaite guive. Jaaprovecha vaʼerã oimeraẽ oportunida jafelisita hag̃ua ñande rapichápe, umi mbaʼe katuete omombaretéta chupe (Efes. 4:29). Péro jajapo vaʼerã upéva ñande pyʼaite guive, ndahaʼéi japyta porã hag̃uánte peteĩ persónandi. Ndovaléi avei japorofelisita guaʼúnte, ni ñakirirĩnte tekotevẽ jave ñameʼẽ konsého (Prov. 29:5). Ñanderovamokõita hína jaguerohorýramo peteĩ persónape ha upéi jatakýramo hese ñaime jave ótrondi. Apóstol Pablo ohechauka vaʼekue oporohayhu añeteha. Peteĩ okasiónpe haʼe ofelisita kuri umi ermáno Corintoguápe umi mbaʼe porã ojapóvare (1 Cor. 11:2). Péro omeʼẽ avei chupekuéra konsého ha pyʼaguapýpe porãnte ontendeka chupekuéra mbaʼépepa tekotevẽ omehora (1 Cor. 11:20-22).

Ñaipytyvõramo umi oikotevẽvape jahechaukáta hína ñanembaʼeporãha ha japorohayhu añeteha (Ehecha párrafo 12)

12. ¿Mbaʼéichapa ikatu jahechauka japororresivi porãha?

12 Japororresivi porãkena. Jehová omanda ñandéve ñanembaʼeporã ha jarresivi porã hag̃ua ñane ermanokuérape (elee 1 Juan 3:17). Péro jajapo vaʼerã upéva ñande pyʼaite guive. Upévare iporã ñañeporandu: “¿Ainvitápa che rógape sólamente che amigokuérape ha umi ermáno orekóvape priviléhio iñimportánteva kongregasiónpe? ¿Chembaʼeporãpa umi ndaikuaaporãivandi  ha avei umi ndaikatumoʼãivandi omyengovia chéve?” (Luc. 14:12-14). Ñamoĩ chupe peteĩ ermáno odesidi vai hague álgo ha oikotevẽ ajúda, térã ñainvita jepi peteĩ persónape ñande rógape, péro núnka ndoagradeséiva ñandéve. ¿Mbaʼépa jajapóta upéicha jave? Jasegi vaʼerã ko konsého oĩva la Bíbliape: “Pejorresivi porãke pejeplageaʼỹre” (1 Ped. 4:9). Katuete ningo javyʼáta jarresivi porãramo ñande rapichakuérape ha jajapóramo upéva ñande pyʼaite guive (Hech. 20:35).

13. a) ¿Mbaʼéicha javépa tekotevẽ ñanepasiénsia? b) ¿Mbaʼéichapa ikatu ñaipytyvõ umi ikangývape?

13 Ñaipytyvõ umi ikangývape. La Biblia heʼi: “Peipytyvõkena umi ikangývape ha penepasiénsiakena enterovére” (1 Tes. 5:14). Jajapóramo péicha, jahechauka hína japorohayhu añeteha. Heta ermáno ikangy vaʼekue ymave, péro upéi ou ojerovia mbarete. Oĩ avei umi oikotevẽva ñanepasiénsia hese ha jasegi ñaipytyvõ chupe. ¿Mbaʼéichapa ikatu jajapo upéva? Ikatu ñamokyreʼỹ chupe la Biblia rupive, ñainvita chupe osẽ hag̃ua ñanendive predikasiónpe térã ñahendu chupe tekotevẽ jave. Ndovaléi ningo jaʼe avavére ikangy térã imbareteha, pórke enterovénte jareko mbaʼépepa ñane kangy ha mbaʼépepa ñanembarete. Apóstol Pablo jepe orrekonose vaʼekue ikangyha heta mbaʼépe (2 Cor. 12:9, 10). Añetehápe, enterovénte ñaikotevẽ ñane ermanokuéra ñanepytyvõ ha ñanemombarete.

14. ¿Mbaʼépa tekotevẽ jajapo jaiko hag̃ua pyʼaguapýpe ermanokuérandi?

14 Jaikókena pyʼaguapýpe ermanokuérandi. Sapyʼánte ningo ikatu jajoavyʼimi térã oĩ nañandetrataporãmbáiva, upéicharõ jepe jajapo vaʼerã ikatúva guive jaiko porã hag̃ua ermanokuérandi (elee Romanos 12:17, 18). Peichahágui ñambopochýramo ñande rapichápe, jajerure vaʼerã perdón. Péro jajerure vaʼerã ñande pyʼaite guive. Por ehémplo, jaʼe rangue: “Ambyasyeténgo reñeñandu vai haguére”, iporãvéta ñarrekonoséramo ñande avei jajavy hague ha jaʼe: “Ambyasyeténgo romoñeñandu vai haguére”. Iñimportanteterei ningo jaiko pyʼaguapýpe enterovéndi, koʼýte ñane matrimóniope. Ivaietereíta hína ména ha tembireko ótro rovakénte ohechaukáramo ojoayhuha ha hogapýpe katu ni noñeʼẽi ojupe térã iñeʼẽ pohýi ha oñomaltrata.

15. ¿Mbaʼéichapa ikatu jahechauka ñaporoperdonaha ñande pyʼaite guive?

15 Ñaperdonákena ñande rapichakuérape. Ikatu ningo peteĩ ñande rapicha ñanembopochy, ha sapyʼánte ni noñemeʼẽi enkuénta la ojapóvare. Upéicha jave, ñaperdonánte vaʼerã ha ñañehaʼã ñañembyesarái la oiko vaʼekuégui. La Biblia heʼi: “Mborayhúpe peñoaguanta oñoermánoicha [...] ha peñehaʼãmbaite akóinte peime hag̃ua peteĩ ñeʼẽme espíritu sánto rupive” (Efes. 4:2, 3). Ñaporoperdonáramo ñande pyʼaite guive, ndajaikomoʼãi siémpre ñanemanduʼa pe oiko vaʼekuére ha nañandepyʼaromoʼãi (1 Cor. 13:4, 5). Japytáramo ñandepyʼaro ñane ermánondi, ñambyaíta hína ñane amista hendive ha Jehovándi (Mat. 6:14, 15). Ñaperdonáramo  ñande pyʼaite guive, ñañemboʼéta avei Jehovápe pe persóna ofalla vaʼekuére ñanendive (Luc. 6:27, 28).

16. Jarresivi jave peteĩ rresponsavilida, ¿mbaʼéichapa ikatu jahechauka japorohayhu añeteha?

16 Jajesakrifikákena ñande rapichakuéra rehehápe. Peteĩ persóna orresivíramo rresponsavilida Jehová organisasiónpe, ikatu hína ohechauka oporohayhu añeteha ojapóramo umi mbaʼe ideprovéchotava hapichápe, ndahaʼéi chupénte (1 Cor. 10:24). Por ehémplo, umi akomodadór oike voive umi lokál de asambléape, ha ikatu hína orreservase ijupe g̃uarã ha ihentekuérape g̃uarã umi lugár iporãvéva. Péro upéva rangue, heta oĩ oguapýnteva umi lugár ndaiporiguasuihápe la oguapyséva, pe seksión otokahápe chupe oñatende. Péicha ohechauka hikuái oporohayhu añeteha ha nopensaiha ijehénte. ¿Mbaʼéichapa ikatu nde avei resegi koʼã ermáno ehémplo?

17. ¿Mbaʼépa ojapo vaʼerã peteĩ persóna opekáva ohechauka hag̃ua oporohayhu añeteha?

17 Ñakonfesákena ñande pekádo ha jahejaite umíva. Oĩ ermáno ha ermána omokañyséva umi mbaʼe vai ojapo vaʼekue pono oñemotĩ térã odesepsiona ótra persónape (Prov. 28:13). Péro umi ojapóva péicha ndohechaukái hína oporohayhuha. Haʼekuéra voi ojeperhudika ha avei umi oĩvape ijerére. Oĩramo oñomíva hembiapo vaikue, pe espíritu sánto ikatu hína ombaʼapo asy kongregasiónpe ha ndaiporivéi pyʼaguapy (Efes. 4:30). Pe opekáva oporohayhu añetéramo, omombeʼúta ansianokuérape la ojapo vaʼekue ha ohejáta oñepytyvõ chupe (Sant. 5:14, 15).

18. ¿Mbaʼérepa iñimportantete jahechauka japorohayhu añeteha?

18 Pe mborayhu ningo haʼe pe kualida iñimportantevéva ohechauka vaʼerã kristianokuéra (1 Cor. 13:13). Japorohayhúramo, ojekuaáta hína ñamoirũha Jesúspe ha jasegiha Jehová ehémplo, pórke chugui voi ou pe mborayhu (Efes. 5:1, 2). Pablo heʼi vaʼekue haʼe ndoporohayhúiramo ndahaʼeiha mbaʼevete (1 Cor. 13:2). Upéicharõ, aníkena jaʼénte japorohayhuha, síno “umi mbaʼe jajapóva rupive” jahechauka japorohayhu añeteha.