Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Octubre de 2016

Jajeroviákena Jehová promesakuérare

Jajeroviákena Jehová promesakuérare

“Jerovia heʼise jagueroviaha pyʼamokõiʼỹre oikotaha katuete umi mbaʼe ñahaʼarõva” (HEB. 11:1).

PURAHÉI: 81, 134

1, 2. a) ¿Mbaʼépepa idiferénte umi mbaʼe ñande ñahaʼarõva ha la ohaʼarõva umi hénte? b) ¿Mbaʼépa jahecháta ko artíkulope?

JEHOVÁ opromete ñandéve heta mbaʼe iporãitereíva. Por ehémplo, opromete omopotĩtaha héra ha ojapotaha hembipota yvágape ha ko yvy ape ári (Mat. 6:9, 10). Ndaipóri ningo ótra kósa iñimportantevéva koʼã mbaʼe ñahaʼarõvagui. Haʼe opromete avei omeʼẽtaha ñandéve jeikove opaveʼỹva, tahaʼe yvágape térã ko yvy ape ári. ¡Javyʼaitereíta oñekumpli vove koʼã mbaʼe! (Juan 10:16; 2 Ped. 3:13). Entéro jaservíva Jehovápe ñañatende vaʼerã mbaʼéichapa haʼe osegíta ñandegia ha ñanepytyvõ koʼã ára pahápe.

2 La Biblia heʼi pe fe heʼiseha “jagueroviaha pyʼamokõiʼỹre oikotaha katuete umi mbaʼe ñahaʼarõva” (Heb. 11:1). Umi persóna orekóva fe, ni michĩmi ndodudái oñekumplitaha Jehová promesakuéra. Koʼág̃arupi, heta oĩ ohupytyséva algúna kósa péro noĩri segúro okonsegítapa la ohaʼarõva. Por ehémplo, oĩ oganaséva lotería, péro ndaikatúi oasegura oganataha. Ko artíkulope jahecháta mbaʼéichapa ikatu jajeroviave Jehová promesakuérare, ha avei mbaʼéichapa upéva ikatu ñanepytyvõ.

3. ¿Mbaʼérepa ikatu jajerovia Jehová promesakuérare?

 3 Ñande ningo nañagueronaséi pe fe. Jajeroviaséramo Ñandejárare, jaheja vaʼerã ijespíritu sánto ñandegia (Gál. 5:22). Pe espíritu sánto ñanepytyvõta jaikuaave hag̃ua Jehovápe. Jahechakuaávo haʼeha pe Dios Todopoderóso ha iñaranduetereiha, ndajadudamoʼãi ipromesakuéragui. Jehová oikuaa porã oikotaha katuete la heʼíva. Opromete jave peteĩ mbaʼe, oñeʼẽ hese ku oñekumplimarõguáicha. Upévare heʼi: “¡Umi mbaʼe oikopáma!” (elee Apocalipsis 21:3-6). Aníkena arakaʼeve ñapensa Jehová nokumplimoʼãiha ipromésa. Haʼe ningo núnka nopyrũi iñeʼẽre (Deut. 7:9).

ÑANDEJÁRA SIERVOKUÉRA YMA GUARE OJEROVIA HESE

4. ¿Mbaʼérehepa ojerovia vaʼekue Ñandejára siervokuéra yma guare?

4 Hebreos kapítulo 11 oñeʼẽ 16 kuimbaʼe ha kuña yma guare rehe ojeroviaiterei vaʼekue Jehová promesakuérare. Avei heʼi Ñandejára oguerohory hague heta isiérvope “ojerovia rupi” hese (Heb. 11:39). Koʼãva ohaʼarõ meme kuri pe desendénsia Jehová opromete vaʼekue. Avei oikuaa porã hikuái ko desendénsia ohunditaha Ñandejára enemigokuérape ha ojapotaha ko yvýgui peteĩ paraíso (Gén. 3:15). Koʼã Ñandejára siervokuéra ojerovia avei oñemoingove jeytaha chupekuéra. Péro nopensái vaʼekue ohotaha hikuái yvágape, pórke Jesús ou rire ko yvy ape ári ae heʼi oĩtaha ohóva upépe (Gál. 3:16). Upéva rangue, haʼekuéra oreko esperánsa oikotaha opa árare ko yvy ape ári peteĩ paraísope (Sal. 37:11; Is. 26:19; Os. 13:14).

5, 6. a) ¿Mbaʼe esperánsapa oreko vaʼekue Abrahán ha hogayguakuéra? b) ¿Mbaʼépa ojapo hikuái osegi hag̃ua ojerovia? (Ehecha pe taʼanga oĩva iñepyrũme).

5 Hebreos 11:13 oñeʼẽ koʼã Jehová siérvo iñeʼẽrendúvare, ha heʼi: “Enterove haʼekuéra ojerovia omano meve, noñemeʼẽiramo jepe chupekuéra umi mbaʼe oñepromete vaʼekue. Péro haʼekuéra ohecha umíva mombyry guive, ha orresivi vyʼápe”. Ko téxto ohechauka haʼekuéra orekoha esperánsa oikóvo peteĩ múndo pyahúpe, ha oñeimahina voi oikoha upépe. Peteĩva koʼã Ñandejára siérvo haʼe vaʼekue Abrahán. Jesús heʼi kuri Abrahán ovyʼaiterei hague “ohaʼarõgui” og̃uahẽ pe tiémpo (Juan 8:56). Sara, Isaac, Jacob ha hetave persóna iñeʼẽrendúva ohaʼarõ kuri og̃uahẽ pe día Ñandejára Rréino ogoverna vove ko yvy tuichakuére (Heb. 11:8-11).

6 ¿Mbaʼépa ojapo vaʼekue Abrahán ha hogayguakuéra osegi hag̃ua ojerovia? Haʼekuéra siémpre oñehaʼã oaprendeve Jehovágui. Upe tiémpope, Ñandejára oñekomunika vaʼekue hendivekuéra umi ánhel ha umi visión rupive, térã ojechauka chupekuéra iképe. Posívlemente oaprende avei hikuái umi Ñandejára siérvo ijedavévagui, térã umi kuatiañeʼẽ ymaite guarégui. Abrahán ha ihentekuéra arakaʼeve ndahesarái Ñandejára promesakuéragui. Haʼekuéra oñemotiémpo ojepyʼamongeta hag̃ua umívare. Upévare, ni michĩmi ndodudái Jehová okumplitaha la heʼíva. Ko esperánsa oipytyvõ chupekuéra osegi hag̃ua ifiél ojepersegírõ térã ohasáramo jepe heta provléma.

7. ¿Mbaʼe mbaʼépa omeʼẽ ñandéve Jehová jajeroviave hag̃ua, ha mbaʼépa tekotevẽ jajapo?

7 ¿Mbaʼépa ñanepytyvõta jajeroviave hag̃ua? Jehová omeʼẽ ñandéve la Biblia. Pype jatopa umi mbaʼe oñekumplítava amo gotyove, ha avei ohechauka mbaʼépa jajapo vaʼerã ikatu hag̃uáicha javyʼa. Upévare, iporãta jaleéramo la Biblia káda día ha jasegi umi konsého oĩva pype (Sal. 1:1-3; elee Hechos 17:11). Jehová avei omeʼẽ ñandéve “hiʼupy hiʼoraitépe” pe “tembiguái jeroviaha ha iñarandúva” rupive (Mat. 24:45). Umi Ñandejára siérvo yma guare ojapo haguéicha, ñande avei tekotevẽ jalee meme umi promésa  Jehová ojapo vaʼekue, ha jajepyʼamongeta umívare. Upéva ñanepytyvõta siémpre ñaneñeʼẽrendu hag̃ua chupe, ha jasegi hag̃ua ñahaʼarõ Irréino ogovernátava ko yvy tuichakue.

8. ¿Mbaʼérepa ikatu jaʼe ñañemboʼéramo jajeroviavetaha Jehováre?

8 ¿Mbaʼépa oipytyvõ umi Ñandejára siérvo yma guarépe ojeroviave hag̃ua? Haʼekuéra ojerure vaʼekue ajúda Jehovápe, ha ohecha mbaʼéichapa haʼe ombohovái chupekuéra iñemboʼe (Neh. 1:4, 11; Sal. 34:4, 15, 17; Dan. 9:19-21). Upéicha avei, ñande jajeroviavéta Jehováre jahecháramo haʼe ohenduha ñane ñemboʼe, ha omeʼẽha ñandéve umi mbaʼe ñaikotevẽva hiʼoraitépe (elee 1 Juan 5:14, 15). Upévare, jasegíkena jajerure Jehovápe ijespíritu sánto ikatu hag̃uáicha jajeroviave hese (Luc. 11:9, 13).

9. ¿Mbaʼe mbaʼérehepa ikatu ñañemboʼe?

9 Ñañemboʼe jave Jehovápe, ndahaʼéi jajerurénte vaʼerã chupe umi mbaʼe ñaikotevẽva. Iporãta ñañemboʼéramo káda día jaagradese ha ñambotuicha hag̃ua chupe okrea rupi hetaiterei mbaʼe porã (Sal. 40:5). Avei ñañemboʼe vaʼerã ñane ermanokuéra rehehápe, oĩva ko yvy tuichakuére, por ehémplo “umi oĩvare préso”. Nañanderesarái vaʼerã avei ñañemboʼe hag̃ua umi ermáno omoakãvare kongregasión. Jahecha jave mbaʼéichapa Jehová okontesta ñane orasión, ñañemoag̃uivéta ha jajeroviavéta hese (Heb. 13:3, 7).

ÑANDEJÁRA SIERVOKUÉRA IFIÉL OHASA ASÝRAMO JEPE

10. ¿Mbaʼérepa heta Ñandejára siérvo yma guare ifiél?

10 Hebreos kapítulo 11-pe, Pablo heʼi vaʼekue: “Oĩ kuña orekóva ihénte omano vaʼekue, ha umívape oñemoingove jey; umi ótro kuimbaʼe katu nomboykéi vaʼekue ijerovia ojesalva hag̃uánte, oĩrõ guare oñemboharái vaipáva hesekuéra; ojapo hikuái upéva ohupytységui peteĩ ñemoingove jey iporãvéva” (Heb. 11:35). Heta Ñandejára siérvo ohechauka ifielha ohasáramo jepe heta pruéva. ¿Mbaʼépa oipytyvõ chupekuéra oaguanta hag̃ua? Haʼekuéra oĩ segúro Ñandejára omoingove jeytaha umi omanóvape, ha oikotaha hikuái pára siémpre ko yvy ape ári. Ñapensamína mbaʼépa oiko vaʼekue Nabot ha Zacarías rehe. Chupekuéra ojejapi itápe omano meve, iñeʼẽrendu rupi Jehovápe (1 Rey. 21:3, 15; 2 Crón. 24:20, 21). Daniélpe katu ojepoi peteĩ yvykuápe oĩháme heta león vareʼa, ha mbohapy iñamígope ojepoi peteĩ órno hakuetereívape. Enterovéva koʼã kuimbaʼe oĩ dispuésto omanóvo, ani hag̃ua oadora umi dios fálsope. Okonfia Jehová omeʼẽtaha chupekuéra ijespíritu sánto, ha oipytyvõtaha chupekuéra oaguanta hag̃ua oimehaichagua provléma (Dan. 3:16-18, 20, 28; 6:13, 16, 21-23; Heb. 11:33, 34).

11. ¿Mbaʼe pruévapa ohasa vaʼekue heta proféta?

11 Heta proféta oaguanta avei umi mbaʼe ijetuʼúva. Por ehémplo, oĩ oñembohorýva hesekuéra, térã ojegueraha chupekuéra préso. Umíva apytépe oĩ Micaya ha Jeremías. Avei ambue proféta “oiko vaʼekue okañy kañy desiértore, serrohárupi, itakuárupi ha yvykuápe”, Elías ojapo haguéicha. Upéicharamo jepe, entéro koʼã proféta ifiél, pórke oguerovia “pyʼamokõiʼỹre oikotaha katuete” umi mbaʼe ohaʼarõva (Heb. 11:1, 36-38; 1 Rey. 18:13; 22:24-27; Jer. 20:1, 2; 28:10, 11; 32:2).

12. ¿Mávapa hína pe ehémplo iporãvéva, ha mbaʼépa oipytyvõ chupe oaguanta hag̃ua?

12 Jesús hína pe ehémplo iporãvéva. Haʼe oaguanta pe pruéva ijetuʼuvéva, ha iñeʼẽrendu Jehovápe ipahaite peve. ¿Mbaʼépa oipytyvõ chupe oaguanta hag̃ua? Pablo heʼi vaʼekue: “Oñemoĩgui henondépe peteĩ mbaʼe ombovyʼaitereítava chupe, haʼe oaguanta pe jehasa asy oñemosaingóvo chupe pe yvyra pohýire, notĩri upe haguére ha koʼág̃a  oguapy hína Ñandejára deréchape” (Heb. 12:2). Pablo omokyreʼỹ umi kristiánope osegi hag̃ua Jesús ehémplo (elee Hebreos 12:3). Jesúsre oiko haguéicha, oĩ vaʼekue heta kristiáno omanóva iñeʼẽrendu rupi Jehovápe. Peteĩva umíva apytépe haʼe vaʼekue Antipas (Apoc. 2:13). Koʼã kristiáno orresivíma iprémio, péro umi persóna ifiélva oiko vaʼekue haʼekuéra mboyve, ohaʼarõ gueteri oñemopuʼã chupekuéra oiko hag̃ua ko yvy ape ári (Heb. 11:35). Umi kristiáno unhído omano vaʼekue, oñemoingove jey oiko hag̃ua yvágape Jesús oñepyrũ riremi ogoverna áño 1914-pe. Haʼekuéra ogovernáta Jesús ndive yvyporakuérape (Apoc. 20:4).

KRISTIANOKUÉRA KOʼAG̃AGUA OJEROVIAITEREÍVA JEHOVÁRE

13, 14. ¿Mbaʼe ijetuʼúvapa ohasa vaʼekue ermáno Rudolf Graichen, ha mbaʼépa oipytyvõ chupe osegi hag̃ua ifiél?

13 Koʼág̃arupi oĩ avei hetaiterei testígo de Jehová osegíva Jesús ehémplo. Haʼekuéra ojepyʼamongeta meme Ñandejára promesakuérare ha osegi ifiél, ohasáramo jepe heta mbaʼe ijetuʼúva. Por ehémplo ermáno Rudolf Graichen. Haʼe onase vaʼekue Alemániape áño 1925-pe. Haʼe imanduʼa imitãʼírõ guare, ohechámi vaʼekue hóga parére unos kuánto kuádro ohechaukáva umi rreláto bíblico. Haʼe heʼi: “Peteĩva umi kuádrope ojekuaa  oĩha oñondive peteĩ lóvo ha ovecharaʼy, kavararaʼy ha jaguarete, vakaraʼy ha leonraʼy. Entéronte oĩ pyʼaguapýpe, ha peteĩ mitã ogia chupekuéra” (Is. 11:6-9). Koʼã mbaʼe oipytyvõ Rúdolfpe pyʼỹinte opensa hag̃ua pe paraísore, ha ojeroviave hag̃ua pe promésare. Upéicha rupi, haʼe osegi ifiél Jehovápe, ojepersegírõ jepe heta áñore. Ñepyrũrã umi nazi opersegi vaʼekue chupe, ha upe rire pe goviérno komunísta Alemaniagua.

14 Rudolf tekotevẽ vaʼekue avei oaguanta hetave mbaʼe ijetuʼúva. Por ehémplo, isy omano vaʼekue peteĩ mbaʼasýgui hérava tifus, oĩrõ guare peteĩ kámpo de konsentrasión názipe. Itúa katu ofirma peteĩ dokuménto heʼihápe haʼe ndahaʼeveimaha testígo de Jehová. Péro Rudolf osegi ifiél. Osẽ rire kárselgui, oservi kómo superintendénte de sirkuíto. Upe rire oho Eskuéla de Galaádpe, ha oñeasigna chupe Chílepe. Upépe oservi jey kómo superintendénte de sirkuíto, ha omenda peteĩ misionéra héravare Patsy. Un áño omenda haguépe hikuái ou ifamília, péro ñambyasýramo jepe pe mitãkuñaʼi omano. Tiémpo rire, Patsy omano avei orekórõ guare 43 áñonte. Rudolf osegi oservi Jehovápe, ohasáramo jepe koʼã mbaʼe ijetuʼuetereíva. Ha ijeda ha hasykatúramo jepe, lomímonte ojapo iprekursorádo rregulár ha oservi kómo ansiáno. Ikatu jalee hembiasakue La Atalaya 1 de agosto de 1997-pe, páhina 20 guive 25 peve. [1]

15. Emombeʼu umi ermáno ehémplo ohechaukáva vyʼápe oserviha Jehovápe ojepersegírõ jepe.

15 Ñane tiémpope, oĩ hetaiterei ñane ermáno vyʼápe oservíva Jehovápe, ojepersegi mbaretéramo jepe chupekuéra. Umíva apytépe heta oĩ préso Eritrea, Singapur ha Corea del Súrpe. ¿Mbaʼérepa? Ndoipuruséi rupi árma (Mat. 26:52). Por ehémplo, Isaac, Negede ha Paulos 20 áño árima oĩ hague kárselpe, Eritréape. Upépe ojereko asy ha ndojetrataporãi chupekuéra. Haʼekuéra oĩ rupi upépe, ndaikatúi omenda ni okuida ituakuérare. Upéicharõ jepe, osegi ifiél Jehovápe ha ojerovia meme hese. Umi guárdia oĩva pe kárselpe jepe orrespeta koʼã ermánope. Ikatu rehecha jw.org-pe peteĩ fóto osẽ haguépe hikuái, ha ojekuaahápe ovyʼaha ohasa asýramo jepe.

¿Mbaʼéichapa umi ermáno ñane kongregasiongua ohechauka ojeroviaha Jehováre? (Ehecha párrafo 15 ha 16)

16. ¿Mbaʼépa ojapo umi ojeroviáva Jehováre?

16 Añetehápe ningo la majoría umi Testígo ndosufríri oĩ haguére préso ni oñemaltrata rupi chupekuéra. Péro heta oĩ ohasa asýva pórke imboriahu, oiko rupi desástre naturál térã gérra upe oikohárupi. Avei oĩ ohechaukáva osegiha Abrahán, Isaac, Jacob ha Moisés ehémplo, odesidívo oservi porãve Jehovápe oiko rangue pláta rapykuéri térã oñehaʼã rangue ifamóso. ¿Mbaʼépa oipytyvõ koʼã ñane ermánope vyʼápe oservi hag̃ua Jehovápe? Haʼekuéra ohayhu chupe ha ojerovia ipromesakuérare. Oĩ segúro Jehová katuete omeʼẽtaha umi isiérvo iñeʼẽrendúvape pe oportunida oiko hag̃ua imúndo pyahúpe, upépe ndaiporimoʼãvéima inhustísia (elee Salmo 37:5, 7, 9, 29).

17. ¿Mbaʼépa jajapo vaʼerã jajeroviasevéramo Jehováre, ha mbaʼépa jahecháta pe artíkulo oúvape?

17 Ko artíkulope jahecha pe fe heʼiseha “jagueroviaha pyʼamokõiʼỹre oikotaha katuete umi mbaʼe ñahaʼarõva”. Jajeroviasevéramo Jehováre, jasegi vaʼerã ñañemboʼe chupe ha jajepyʼamongeta ipromesakuérare. Péicha mante ikatúta ñandefiél, jahasáramo jepe oimehaichagua pruéva. Pe artíkulo oúvape jahechavéta mbaʼépa heʼise jajeroviaha Jehováre.

^ [1] (párrafo 14) Ehecha avei peteĩ ermáno Eslovaquiagua rembiasakue, hérava Andrej Hanák. Pe artíkulo héra “Mi esperanza sigue brillante a pesar de las pruebas”, osẽ vaʼekue rrevísta ¡Despertad! 22 de abril de 2002-pe.