Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Octubre de 2016

Jahechaukákena jahayhuha umi extranhérope

Jahechaukákena jahayhuha umi extranhérope

“Aníkena penderesarái perresivi porã vaʼerãha pende rapichakuérape” (HEB. 13:2).

PURAHÉI: 124, 79

1, 2. a) ¿Mbaʼe provlémapa ohasa jepi umi ováva hetãgui? (Ehecha pe taʼanga oĩva iñepyrũme). b) ¿Mbaʼépa omomanduʼa kuri apóstol Pablo kristianokuérape? c) ¿Mbaʼe porandúpa ñambohováita ko artíkulope?

OJAPO mas de treinta áño Tamura ova hague Ghánagui Európape [1]. Upe tiémpope ndahaʼéi vaʼekue testígo de Jehová. Haʼe heʼi: “Pyaʼeterei voi apilla la majoría umi hénte noñeinteresaiha cherehe. Iñextráño avei chéve la klíma. Asẽ rire pe aeropuértogui, primera ves che roʼy ha añepyrũma katu cherasẽ”. Tamura nomanehaporãi kuri pe idióma oñeñeʼẽva upe paíspe, upévare otarda mas de un áño otopa hag̃ua peteĩ traváho porã ikatu hag̃uáicha oñemantene. Hiʼarive oñeñandu haʼeño peteĩ, ha ohechagaʼueterei ihentekuérape.

2 ¿Mbaʼéichapa nde reipotáne ndetrata umi persóna rejecháramo koʼãichagua situasiónpe? ¿Ajépa remombaʼéne nderresivi porãramo hikuái pe Salón del Réinope tahaʼe haʼéva ne nasionalida térã nde pire kolór? La Biblia omokyreʼỹ kristianokuérape: “Aníkena penderesarái perresivi porã vaʼerãha  pende rapichakuérape”, térã umi extranhérope (Heb. 13:2). ¿Mbaʼéichapa Jehová ohecha umi extranhérope? ¿Tekotevẽpa hína ñakambia ñapensáva umi extranhérore? ¿Mbaʼépa ikatu jajapo oñeñandu porã hag̃ua umi extranhéro oĩva ñane kongregasiónpe? Jahechamína koʼã mbaʼe.

¿MBAʼÉICHAPA JEHOVÁ OHECHA UMI EXTRANHÉROPE?

3, 4. Jahechaháicha Éxodo 23:9-pe, ¿mbaʼéichapa Jehová oipota ojetrata umi extranhérope, ha mbaʼérepa?

3 Jehová oguenohẽ rire umi israelítape Egíptogui, omeʼẽ chupekuéra heta léi. Koʼãva apytépe oĩ vaʼekue léi ofavoreséva umi ndahaʼéivape israelita (Éx. 12:38, 49; 22:21). Umi extranhéro ohasa vaʼekue heta mbaʼe ijetuʼúva, péro Jehová mborayhúpe otrata chupekuéra. Por ehémplo, omeʼẽ léi opermitíva umi extranhérope omonoʼõ pe kosécha rembyre (Lev. 19:9, 10).

4 Jehová ndahaʼéi omandánteva umi israelítape orrespeta hag̃ua umi extranhérope, síno oipota avei oñemoĩ ilugarpekuéra (elee Éxodo 23:9). Umi israelita oiko mboyve Egíptope, umi egipcio ndaijaʼéima vaʼekue voi hesekuéra idiferénte haguére (Gén. 43:32; 46:34; Éx. 1:11-14). Ñandejára puévlo ningo heta ohasa asy vaʼekue tetã ahénope, upéicha rupi Jehová oipota otrata umi extranhérope “peteĩ israelítaicha” (Lev. 19:33, 34, TNM).

5. ¿Mbaʼépa ñanepytyvõta ñañeinteresa hag̃ua umi extranhérore Jehová ojapoháicha?

5 Ñande ningo jaikuaa porã Jehová nokambiaiha. Koʼag̃aite peve haʼe oñeinteresaiterei umi extranhéro oasistívare rreunionhápe (Deut. 10:17-19; Mal. 3:5, 6). Ñapensamíntena umi mbaʼe ohasáva umi extranhéro. Por ehémplo, ikatu oime nontendeporãi pe idióma térã ojeapoʼi chupekuéra. Upévare, ñanderorýkena hendivekuéra ha ñañehaʼã ñaipytyvõ chupekuéra (1 Ped. 3:8).

¿TEKOTEVẼPA HÍNA ÑAKAMBIA ÑAPENSÁVA UMI EXTRANHÉRORE?

6, 7. ¿Mbaʼéichapa jaikuaa umi kristiáno ypykue ndodespresiái hague umi extranhérope?

6 Umi kristiáno ypykue tekotevẽ kuri oñehaʼã ani hag̃ua odespresia umi ndahaʼéivape judío. Pentekostés áño 33-pe, kristianokuéra oikóva Jerusalénpe imbaʼerechakuaa vaʼekue umi disípulo oúvandi ótro tetãgui (Hech. 2:5, 44-47). Upéva ohechauka ontendeha hikuái mbaʼépa heʼise jarresivi porã ñande rapicha ótro lugarguápe.

7 Upe tiémpope oñepresenta kuri peteĩ provléma. Umi judío ótro lugargua oñeʼẽva griego ipochy oñemboyke haguére iviudakuérape (Hech. 6:1). Upémarõ, umi apóstol oiporavo 7 kuimbaʼe osolusiona hag̃ua ko provléma. Entéro umi kuimbaʼe oreko kuri téra griego, amalisia umi apóstol ojapo upéva ikatu hag̃uáicha umi viúda oñeñandu porã hendivekuéra (Hech. 6:2-6).

8, 9. a) ¿Mbaʼe pregúntapa ñanepytyvõta jahechakuaa hag̃ua noiméipa jaapoʼi umi extranhérope? b) ¿Mbaʼépa ñañehaʼã vaʼerã ñakambiaite? (1 Ped. 1:22)

8 Entérope ningo ñandeafekta ñande kultúra, péro sapyʼánte ndajahechakuaái upéva (Rom. 12:2). Hiʼarive ikatu ñahendu ñane vesíno, ñane kompañéro de eskuéla térã de traváho oapoʼiha umi hénte ótro tetãguápe, térã odespresia chupekuéra ipire kolór diferénte haguére. Upévare iporã ñañeporandumi: “¿Noiméi piko che apensa hína avei haʼekuéraicha? ¿Mbaʼéichapa arreaksiona oĩ jave oñembohorýva che nasionalida térã che kostúmbrere?”.

9 Peteĩ tiémpope, apóstol Pedro omboyke vaʼekue umi ndahaʼéivape judío.  Péro upéi, okambia ohóvo mbeguekatúpe (Hech. 10:28, 34, 35; Gál. 2:11-14). Ñande avei ñañehaʼã vaʼerã ñakambia oimérõ jahechakuaa ñañepyrũha jaapoʼi ñande rapichápe, térã ñanefanatikoitereírõ ñane retãre (elee 1 Pedro 1:22). ¿Mbaʼépa ikatu ñanepytyvõ? Siémpre jaraha vaʼerã enkuénta ñaneimperfektoha, ha tahaʼe haʼéva pe país ñanase hague, ñanemanduʼa vaʼerã avave nomereseiha ojesalva (Rom. 3:9, 10, 21-24). Upévare, ani ñaimoʼã ñaneimportanteveha ótrogui (1 Cor. 4:7). Ñapensa vaʼerã apóstol Pablo opensa haguéicha. Haʼe heʼi vaʼekue umi kristiáno ndahaʼeveimaha “extráño ni arrivéño”, síno haʼeha Ñandejára família (Efes. 2:19). Upévare, jahechakuaárõ ñañepyrũha jadespresia ñande rapichápe, tekotevẽ ñakambiaite, péichamante jahechaukáta ñañemondeha pe “teko pyahúgui” (Col. 3:10, 11).

¿MBAʼÉICHAPA IKATU JAHECHAUKA JAHAYHUHA UMI EXTRANHÉROPE?

10, 11. ¿Mbaʼéichapa Boaz osegi Jehová ehémplo?

10 Boaz haʼe vaʼekue peteĩ karai imbaʼeporãva ha osegíva Jehová ehémplo otrata porãvo umi extranhérope. ¿Mbaʼéichapa ojapo upéva? Ohórõ guare orrevisa ikokue pe kosécha tiémpope, ohecha oĩha upépe peteĩ kuña Moabgua hérava Rut. Ko kuña ombaʼapo jejopy ombyaty hag̃ua umi seváda omohembýva umi kosechadór. Pe Léi Mosáika heʼi haʼe orekoha derécho ojapóvo ko mbaʼe, upéicharõ jepe Rut ojerure raẽ permíso. Boaz omombaʼeterei upéva, ha opermiti avei chupe oraha umi seváda oñembyatýma vaʼekuégui (elee Rut 2:5-7, 15, 16).

11 Boaz añetehápe ojepyʼapy kuri Rut situasiónre, oikuaágui ijetuʼuha peteĩ extranhérape g̃uarã. ¿Mbaʼépa ojapo? Haʼe oinvita Rútpe opyta hag̃ua umi kuñataĩndi ani hag̃ua umi kuimbaʼe ombaʼapóva upépe omolesta chupe. Avei, Boaz oñenkarga ikatu hag̃uáicha Rut oreko y ha hoʼumi vaʼerã, orekoháicha umi ótro ombaʼapóva ikokuépe. Jaʼekuaa Boaz ndoapoʼíri hague ko kuña ótro tetãguápe, omokyreʼỹ guei chupe (Rut 2:8-10, 13, 14).

12. ¿Mbaʼépa ikatu oiko ñanembaʼeporãrõ umi extranhéro ndive?

12 Boaz imbaʼeporã Rut ndive pórke ko kuña imbaʼeporã avei isuégra Noemíndi. Péro ndahaʼéi upévante la Rut ojapóva, haʼe odesidi avei oservi Jehovápe. Boaz imbaʼeporãvo hendive, ohechauka osegiha Jehová ehémplo (Rut 2:12, 20; Prov. 19:17). Ñane tiémpope avei, ñanembaʼeporãrõ opaichagua tapichándi ikatu ñaipytyvõ chupekuéra oikuaa hag̃ua pe añetegua, ha ohechakuaa hag̃ua mbaʼeichaitépa ohayhu chupekuéra Jehová (1 Tim. 2:3, 4).

¿Ñanderory ha jasaluda porãpa umi extranhéro ou ramóvape Salónpe? (Ehecha párrafo 13 ha 14)

13, 14. a) ¿Mbaʼérepa jarresivi porã vaʼerã umi extranhérope oho jave Salónpe? b) Mbaʼéichapa ikatu jajeheʼave umi extranhérore?

13 Iñimportanterei ningo jarresivi porã umi extranhérope oho jave hikuái Salónpe. Sapyʼánte haʼekuéra hiʼotĩ ha ijetuʼu chupekuéra ojeheʼa hag̃ua. Ikatu avei opensa umi persóna ótra rrása térã ótro tetãgua iñimportanteveha chuguikuéra. Upévare, ñande voi tekotevẽ mborayhúpe ñañemboja hendapekuéra ha jahechauka ñañeinteresaha hesekuéra. Ikatu avei jaipuru JW Language oĩramo ñane idiómape, ñaaprende hag̃ua algún salúdo pe persóna idiómape (elee Filipenses 2:3, 4).

14 Sapyʼánte ningo ndajaikuaái ni mbaʼépa jaʼéta ñañemongeta jave peteĩ extranhérondi. ¿Mbaʼépa ikatu jajapo péicha jave? Ñamombeʼukuaa chupe algúna kósa, por ehémplo umi mbaʼe ñandegustáva térã jajapóva jepi. Jajapóramo péicha, ikatu  jahechakuaa hína jajojoguaha heta mbaʼépe. Ñanemanduʼa vaʼerã avei káda kultúra orekoha umi kostúmbre iporãva ha avei umi naiporãmbáiva.

ÑAMOÑEÑANDU PORÃKENA UMI EXTRANHÉROPE

15. ¿Mbaʼépa ñanepytyvõta ñantendeve hag̃ua umi extranhérope?

15 Jaipotáramo umi ótro tetãgua oñeñandu porã ñanendive kongregasiónpe, iporã ñañeporandumi: “Aĩramo ótro paíspe, ¿mbaʼéichapa aipotáta chetrata umi hénte upepegua?” (Mat. 7:12). Ñanepasiénsiakena umi extranhérore, ha jagueraha enkuénta ojeadaptaha ohóvo hikuái ótra kostúmbrere. Ñepyrũrã ikatu voi nañantendepái opensa lája, térã umi mbaʼe ojapóva jepi. Péro ani ñahaʼãrõ ojeadapta hikuái ñande kultúrare, upéva rangue ñañehaʼã vaʼerã jaasepta haʼekuéra idiferenteha ñandehegui (elee Romanos 15:7).

16, 17. a) ¿Mbaʼépa ikatu jajapo ifasilve hag̃ua ñandéve ñañemoag̃ui umi extranhérore? b) ¿Mbaʼéichapa ikatu ñaipytyvõ umi extranhéro oĩvape ñane kongregasiónpe?

16 Ñañemotiémporamo jaikuaave hag̃ua umi extranhéro kultúra térã ipaísgui, ifasilvéta ñandéve ñantende hag̃ua chupekuéra. Jajapo jave ñande estúdio de família, ikatu ñapensa umi extranhéro oĩvare ñane kongregasión térã ñande territóriope, ha ñainvestiga jaikuaave hag̃ua ikultúragui. Avei ikatu ñainvita umi oĩvape ñane kongregasiónpe okaru hag̃ua ñande rógape. Jehová ningo oavri “pe okẽ ikatu hag̃uáicha umi tetã ambuegua ojerovia avei”. Upéicharõ, ¿ñandépa ikatu avei jaavri ñande róga rokẽ “ñane ermanokuéra rehehápe” ha jarresivi porã chupekuéra? (Hech. 14:27; Gál. 6:10; Job 31:32).

¿Jarresivi porãpa umi extranhérope? (Ehecha párrafo 16 ha 17)

17 Jahasáramo tiémpo umi extranhérondi, ñantendevéta chupekuéra ha jahechakuaáta mbaʼeichaitépa oñehaʼã hikuái  ojeadapta ñane kostúmbrere. Avei, ikatu ñañemeʼẽ enkuénta oikotevẽha ajúda oaprende porãve hag̃ua ñane idióma. Iporãta ñaipytyvõramo chupekuéra okonsegi hag̃ua peteĩ óga ha itravahorã, térã ñamombeʼu chupekuéra oĩrõ organisasión ojapóva koʼã mbaʼe. Ñandéve g̃uarã ningo ikatu sonseraiterei, péro chupekuéra g̃uarã tuichaiterei ajúdatama upéva (Prov. 3:27).

18. ¿Máva ehémplopa ikatu osegi umi extranhéro?

18 Umi extranhéro ningo katuete oñehaʼãmbaitéta ojepokuaa ñane kostúmbrere. Rut ojapo vaʼekue upéva. Por ehémplo, haʼe ojerure kuri permíso omonoʼõ hag̃ua pe kosécha rembyre (Rut 2:7). Péicha ohechauka orrespetaha pe kostúmbre ojesegíva upe tetãme. Avei, ensegída oagradese ojetrata porã haguére chupe (Rut 2:13). Umi extranhéro osegíramo Rut ehémplo, katuete umi ermáno ha ambue persóna orrespetavéta chupekuéra.

19. ¿Mbaʼérepa ñañehaʼãmbaite vaʼerã ñamoñeñandu porã hag̃ua umi extranhérope?

19 Ajépa javyʼaite Jehová imbaʼeporãiterei haguére ha oikuaauka entérope umi marandu porã. Heta extranhéro ningo ndorekói kuri oportunida ostudia hag̃ua la Biblia hetãme, térã oho hag̃ua rreunionhápe. Péro koʼág̃a oĩmarõ ñanendive, jajapo vaʼerã ikatúva guive oñeñandu hag̃ua hikuái hogapeguáicha. Ikatu ningo nomeʼẽi ñande posivilida ñaipytyvõ hag̃ua chupekuéra ñande jajaposeháicha. Péro ñanderory ha jatrata porãramo chupekuéra, jahechaukáta mborayhu Jehová ojapoháicha. Ñañehaʼãmbaitékena ikatu hag̃uáicha umi extranhéro oñeñandu porã ñandeapytépe (Efes. 5:1, 2).

^ [1] (párrafo 1) Oñekambia héra.