Aporandu Izak Maráispe: “¿Eikuaa piko mboy áñopa areko?”. Haʼe heʼi chéve: “Si, aikuaa”. Upérõ che aiko kuri Colorádope, ha ko ermáno cherenói Páttersongui, Nueva York. Aexplika mboyve peẽme maʼerãpa cherenói kuri, amombeʼu raẽta mbaʼépa oiko upe mboyve.

ANASE vaʼekue el 10 de diciembre de 1936, Wichítape, peteĩ puévlo oĩva Kánsaspe, Estados Unidos. Roĩ éntre 4 ermáno, ha che haʼe vaʼekue pe ijypykue. Che túa héra William ha che sy katu Jean. Mokõivéva oservi vaʼekue fiélmente Jehovápe. Che túa oservi kómo siérvo de kompañía. Péicha oñehenói vaʼekue pe odirihíva pe kongregasión. Che sy oaprende pe añetegua isýgui, hérava Emma Wagner. Che avuéla omboʼe vaʼekue la Biblia heta persónape, umíva apytépe Gertrude Steélepe. Ko ermána oservi kuri kómo misionéra heta áñore Puerto Rícope. * Pehechaháicha areko kuri heta ehémplo porã asegi hag̃ua.

CHEMANDUʼA UMI EHÉMPLO PORÃRE

Che túa oofresérõ guare umi rrevísta kállepe

Peteĩ sábado kaʼarupytũ, arekórõ guare 5 áño, che túa ha che roñemoĩ ropredika kállepe umi hénte ohasávape, ha roofrese rrevísta Ñemañaha ha Consolación (koʼág̃a hérava ¡Despertad!). Upérõ, ore retã oñorairõ kuri pe segunda gérra mundiál. Péro che túa ndopartisipái pe gérrape. Ropredika aja, ou sapyʼa peteĩ doktór tuichaite kaʼúre ha heʼi papápe ipyʼamirĩha ha omoĩnteha exkúsa ani hag̃ua oho gerrahápe. Pe doktór ombojapaite lénto la hova che túa rováre, ha heʼi chupe: “¡Chenupãna, ne mbaʼe pyʼaju reikóva!”. Che tuichaiterei añemondýi, péro añesorprende ahechávo mbaʼéichapa papa ipyʼaguasu. Haʼe osegínte oofrese umi rrevísta umi hénte oĩvape upépe. Upéi ou peteĩ soldádo, ha pe doktór osapukái chupe: “¡Erahamína koʼágui ko mbaʼe pyʼajúpe!”. Pe soldádo ohechakuaa pe doktór okaʼu guasuha, ha upévare heʼi chupe: “Eho chamígo nde rógape ejera”. Upéi pe doktór ha pe soldádo osẽ oho. Aagradeseterei ningo Jehovápe ombopyʼaguasu haguére che túape. Papa oreko vaʼekue mokõi pelukería Wichítape, ha pe doktór haʼe vaʼekue ikliénte.

Rohokuévo che tuakuérandi peteĩ asambléape, Wichítape, áño 1940-pe

Arekórõ guare 8 áño, che tuakuéra ovende ore róga ha inegosiokuéra, ha upéi ojapo peteĩ kása rrodánte michĩva. Upe rire rova Colorádope, Grand Junction ypýpe, roservi hag̃ua umi lugár oñekotevẽhápe  opredika vaʼerãre. Che tuakuéra oñepyrũ iprekursorádo ha ombaʼapo mimi jepi kokuépe ha gránhape. Iguápo rupi hikuái Jehová servísiope, ha haʼe ovendesígui chupekuéra, kon el tiémpo omoñepyrũ hikuái peteĩ kongregasión. El 20 de junio de 1948, papa chevautisa peteĩ arróyo osyrývape peteĩ montáñagui. Upe díape ojevautisa vaʼekue avei chendive unos kuánto oaseptáva la verda. Umíva apytépe Billie Nichols ha hembireko. Tiémpo rire, haʼekuéra oservi kómo superintendénte de sirkuíto. Upéi ifamília ha hembireko ojapo avei upéva.

Roguereko vaʼekue heta amígo iguápova Jehová servísiope, por ehémplo Don ha Earlene Steele, Dave ha Julia Steele, ha Si ha Martha Steele. Rohasa porãiterei ningo hendivekuéra roñemongeta jave la Bíbliare. Iñehemplokuéra tuichaiterei chepytyvõ ahechakuaa hag̃ua ñamotenondéramo pe Rréino, añetehápe isentído ñande rekove ha javyʼa.

AVA JEY

Arekórõ guare 19 áño, peteĩ ore amígo hérava Bud Hasty oporandu chéve ndahaséipa aservi hendive kómo prekursór sur gotyo, Estados Unídospe. Pe superintendénte de sirkuíto ojerure oréve rova hag̃ua Rústonpe, Luisiana. Upe siudápe oĩ kuri heta Testígo inaktívo. Haʼe heʼi oréve rojapo hag̃ua umi rreunión káda semána, ndohóiramo jepe avave. Ñepyrũrã, roheka peteĩ lugár ha roorganisapaite ikatu hag̃uáicha rojapo umi rreunión. Káda semána roñerreuni, péro peteĩ tiémpore ore mokõinte la roasistíva. Roñoturna rojapo hag̃ua umi párte, ha peteĩva ojapo jave la ipárte, pe ótro ombohovái vaʼerã káda porandu. Ha oĩ jave demostrasión katu, mokõivéva rojupi platafórmape. Kon el tiémpo, peteĩ ermána ijedáva oñepyrũ oasisti. Ha tiémpo rire, unos kuánto estudiánte ha inaktívo oñepyrũ avei oñerreuni, ha upéi katu oñeformáma peteĩ kongregasión.

Peteĩ jey, Bud ha che rojotopa peteĩ pastór protestántendi, ha haʼe oñepyrũ oñeʼẽ umi téxto che ndaikuaaporãivare. Upéva chemoñeñandu vai, ha apensa tekotevẽha astudia porãve mbaʼérepa aguerovia umi mbaʼe oĩva la Bíbliape. Upévare, peteĩ semánare, astudia pyharekue tárde peve, ikatu hag̃uáicha hesakã chéve umi mbaʼe oporandu vaʼekue pe pastór. Añetehápe, koʼã mbaʼe chepytyvõ añemoag̃uive hag̃ua Jehováre, ha hiʼãitereíma kuri chéve ajotopa jey peteĩ pastórndi añeʼẽ hag̃ua hendive umi mbaʼe aaprendévare.

Upe riremínte, pe superintendénte de sirkuíto ojerure chéve ava hag̃ua El Dorádope, Arkansas, ikatu hag̃uáicha aipytyvõ pe kongregasión oĩva pe lugárpe. Aservi aja upépe, pyʼỹi aviaha jey vaʼerã Colorádope añepresenta hag̃ua pe ofisína de rreklutamiéntope. Peteĩ vuéltape, roviaha jeýma hína kuri Colorádope unos kuánto prekursórndi, ha Téxaspe rojumi roñeaksidenta,  ha la che veíkulo oñembyaipaite. Upémarõ, rohenói peteĩ ermánope ha haʼe ou orepiári. Pe ermáno oregueraha hógape, ha upéi rreunionhápe. Rreunión aja, oñeanunsia roñeaksidenta hague, ha upe rire umi ermáno omeʼẽ oréve platami. Upéi pe ermáno oho vaʼekue orepiári, ovende che veíkulo 25 dólar rehe.

Hasýpe roviaha jey Wichítape. Upépe oiko peteĩ família haʼéva ore amigoite. Ermáno McCartney oservi de prekursór, ha ore rohenói chupe Doc. Haʼe ningo mokõi itaʼýra, Frank ha Francis, haʼéva oñoermáno hemélo. Koʼág̃a peve mokõivéva che amigoite. Haʼekuéra ovende chéve hiʼáuto itujámava 25 dólar rehe, kavalete pe présio avende hague che veíkulo. Upérõ, primera ves ahechakuaa amotenonde jave pe Rréino, Jehová katuete omeʼẽha chéve aikotevẽva. Ko vuéltape, família McCartney opresenta chéve peteĩ ermána ijukyetereíva ha ohayhúva Jehovápe, hérava Bethel Crane. Isy Ruth oikóva Wéllingtonpe, Kansas, ikyreʼỹeterei vaʼekue Jehová servísiope, ha osegi oservi de prekursóra oreko peve 90 áño rupi. Bethel ha che romenda 1958-pe, ohasa mboyve un áño rojokuaa hague, ha upe guive roñepyrũ roservi de prekursór El Dorádope.

RORRESIVI UMI INVITASIÓN OREMBOVYʼAITEREÍVA

Ore rosegise umi ehémplo porã oñemoĩ vaʼekue oréve oremitãme. Upévare rodesidi roaseptataha oimeraẽ invitasión ojapóva oréve Jehová organisasión. Roñeasigna kómo prekursór espesiál Walnut Rídgepe, Arkansas. Upéi áño 1962-pe, rorresivi peteĩ invitasión roho hag̃ua Galaádpe, pe kláse número 37-pe, ha upéva orembovyʼaiterei. Ha rovyʼavéntema roikuaávo oñeinvita hague avei Don Steélepe oho hag̃ua pe mísma klásepe. Rojegradua rire, Bethel ha che roñeasigna Nairóbipe, Kenia. Rombyasyeterei ningo rohejáta haguére Nueva York, péro roñeñandu porãiterei rog̃uahẽ rire Nairobi aeropuértope, pórke upépe rohecha oreraʼarõmaha umi ermáno orerresivi hag̃ua.

Ropredikárõ guare Mary ha Chris Kanaiya ndive, Nairóbipe

Pyaʼe voi rojepokuaa roiko Kéniape, ha igustoiterei kuri ropredika upépe. Pe lugárpe, Chris ha Mary Kanaiya ostudia la Biblia orendive. Ko paréha haʼe vaʼekue umi primeroite ojevautisáva ore estudiantekuéra apytépe, ha koʼág̃a peve oservi hikuái de tiémpo kompléto Kéniape. Un áño haguépe, roñeasigna Kampálape, Uganda. Ore haʼe vaʼekue umi primer misionéro oservíva upe tetãme. Rovyʼaiterei ningo upe tiémpope, pórke heta persóna ipyʼaporã ha ostudiase voi la Biblia. Kon el tiémpo, umíva ojevautisa. Péro tres áño y médio rova haguépe Áfricape, che rembireko hyeguasu, ha roho jey Estados Unídospe. Rombyasyeterei ningo rováta haguére Áfricagui. Amo ipahápe ijetuʼuve jey oréve roheja África, pórke rohayhu umi hénte upepeguápe, ha hiʼãite kuri oréve algún día roho jey upépe.

RORRESIVI PETEĨ ASIGNASIÓN PYAHU

Rova Colorádope, che tuakuéra oiko haguépe. Upe riremínte, onaséma ore família, ha rombohéra chupe Kimberly. Un áño cinco mése haʼe onase haguépe, onase avei Stephany. Rovaloraiterei ningo pe asignasión pyahu roguerekóva romongakuaávo ore famíliape. Heta roñehaʼã kuri romboʼe porã hag̃ua chupekuéra umi mbaʼe oĩva la Bíbliape. Roñehaʼã rosegi umi ehémplo porã oñemoĩ vaʼekue oréve. Roikuaa porã umi ehémplo tuichaiterei ikatuha oipytyvõ umi mitãme, péro roikuaa avei upéva ndogarantiriha haʼekuéra oservitaha katuete Jehovápe. Upe tiémpope, aikuaa che ermána ha che ermáno menór oheja hague Jehovápe, ha ambyasyeterei upéva. Péro hiʼãiterei chéve algún día osegi hikuái umi ehémplo porã oñemoĩ vaʼekue chupekuéra.

Heta rohasa porã romongakuaávo ore família, ha siémpre roñehaʼã vaʼekue rojapo oñondive entéro  mbaʼe. Roimégui Aspen ypýpe, roñehaʼã roeskiakuaa ikatu hag̃uáicha rojapo jepi upéva en família. Roeskia jave ore famíliandi, roguereko kuri heta oportunida roñemongeta hag̃ua hendivekuéra. Sapyʼánte roakampa avei, ha upéicha jave roñemongeta kyreʼỹ hendivekuéra rojepeʼe aja pyharekue. Ore família imitãramo jepe, oporandu jepi oréve: “¿Mbaʼépa rojapóta rokakuaapa vove?” ha “¿Mbaʼeichagua persónapa iporãta roelehi ore menarã?”. Roñehaʼãmbaite romboʼe ore famíliape ohayhu hag̃ua Jehovápe. Siémpre romokyreʼỹ chupekuéra omoĩ hag̃ua kómo méta oservi de tiémpo kompléto, ha omenda hag̃ua avei peteĩ oguerekóvare upe méta. Avei roipytyvõ ore famíliape ohechakuaa hag̃ua iporãveha nomendái imitãiterei reheve, ha roʼémi chupekuéra: “Pemboty rire 23 áño, ikatúma pemenda”.

Che ha che rembireko roñehaʼã rosegi ore tuakuéra ehémplo. Upévare, rogerreapaite ikatu hag̃uáicha roho meme rreunionhápe ha ropredika ore famíliandi. Avei rojapo jepi arréglo ikatu hag̃uáicha umi oservíva de tiémpo kompléto opyta ógape, ha péicha rohasa hag̃ua tiémpo hendivekuéra. Romombeʼu jepi ore famíliape umi mbaʼe porã rohasa vaʼekue roservírõ guare kómo misionéro. Hiʼãiterei kuri oréve algún día locuatrovéa roviaha Áfricape. Ore família opensa meme vaʼekue upévare.

Katuetei rojapo ore estúdio de família. Péicha jave roñensaja jepi umi situasión ikatúva oñepresenta ore famíliape ijeskuélape, ha mbaʼéichapa ikatu okontesta hikuái umi pregúnta ojejapóva chupekuéra. Haʼekuéra ovyʼa oaprendévo heta mbaʼe, ha ipyʼaguasuve ombohovái hag̃ua umichagua situasión. Upéicharõ jepe, okakuaávo ohóvo, sapyʼánte ndojaposéi pe estúdio de família. Peteĩ jey, ndojaposéi jeýma hikuái pe estúdio ha ndaikuaái mbaʼépa ajapóta. Upémarõ haʼe chupekuéra oho hag̃ua ikotýpe ha ndororekomoʼãiha pe estúdio. Haʼekuéra oñemondýi, hasẽ soro ha heʼi oréve ostudiaseha. Upérõ rohechakuaa roipytyvõha hína ore famíliape ohayhu hag̃ua Jehovápe. Ohasávo pe tiémpo, che rajykuéra ostudiasevéma Ñandejára Ñeʼẽ, ha oñeñandu porã omombeʼu jave oréve umi mbaʼe opensáva ha oñandúva. Oĩ vése haʼekuéra heʼi haguépe oréve noĩriha de akuérdo peteĩ púnto omboʼévare la Biblia, ha péicha jave ijetuʼu orendive. Upéicharõ jepe, koʼã situasión orepytyvõ rontende hag̃ua mbaʼéichapa oñeñandu hikuái, ha péicha ifasilve oréve romboʼe hag̃ua chupekuéra mbaʼéichapa opensa Jehová.

ROJADAPTA AMEDIDA OKAMBIA ORE SITUACIÓN

Roimoʼãʼỹre ningo ore família okakuaapa jeýma. Che ha che rembireko rojapo ikatúva guive ohayhu hag̃ua hikuái Jehovápe, ha iñorganisasión tuicha orepytyvõ upearã. Rovyʼaiterei rohechávo mokõivéva oñepyrũha oservi kómo prekursóra omohuʼãvo ikoléhio. Haʼekuéra oaprende ombaʼapo ijehegui oñemantene hag̃ua Jehová servísiope. Upéi ova Clévelandpe, Tennessee, mokõi ermána ndive, oservi hag̃ua hikuái peteĩ lugár oĩvehápe nesesida. Rohechagaʼueterei kuri chupekuéra, péro rovyʼa avei oipuru haguére itiémpo Ñandejára servísiope. Ore katu rojagarra jey ore prekursorádo, ha upéicha rupi areko kuri pe oportunida aservívo kómo superintendénte de sirkuíto sustitúto, ha aapoja umi tembiapo ojejapóva jepi oĩta jave asambléa.

Che rajykuéra ova mboyve Ténnesseepe, oviaha kuri Lóndrespe, ha ovisita pe Betel oĩva upe lugárpe. Upérõ Stephany oreko 19 áño, ha oikuaa peteĩ vetelíta héravape Paul Norton. Tiémpo rire, oviaha jeýrõ guare hikuái Lóndrespe, Kimberly oikuaa Brian Llewéllynpe, ombaʼapóva Paul ndive. Stephany orekópe 23 áño omenda Paul rehe. Un áño haguépe, Kimberly orekórõ guare 25 áño, omenda Brian rehe. Roakonseha haguéicha chupekuéra, ohaʼarõ raẽ omboty 23 áño omenda hag̃ua hikuái. Rovyʼaiterei mokõivéva oelehi porã haguére imenarã.

Paul, Stephany, Kimberly ha Brian ndive, Betel de Maláuipe, áño 2002-pe

Che rajykuéra heʼi ore ehémplo ha ijavuelokuéra ehémplo oipytyvõiterei hague chupekuéra omotenonde hag̃ua “Ñandejára Rréino”, sapyʼánte ivaírõ jepe la pórte (Mat. 6:33). Abril de 1998-pe, Paul ha Stephany oñeinvita oho hag̃ua Galaádpe, pe kláse número 105-pe, ha upéi oñasigna chupekuéra oservi hag̃ua Maláuipe, África. Upérõ, Brian ha Kimberly oike avei ombaʼapo Betel de Lóndrespe, ha upéi ojeguerova chupekuéra Betel de Maláuipe. Oremoñeñandu porãiterei kuri rohechávo mbaʼéichapa ore família oipuru porã itiémpo imitã aja.

RORRESIVI ÓTRA INVITASIÓN OREMBOVYʼAITEREÍVA

Enero 2001-pe, cherenói kuri ermáno Marais, amombeʼu haguéicha kuri peẽme ñepyrũrã. Haʼe ombaʼapo kómo superintendénte Departamento de Traducciónpe.  Ermáno Marais heʼi chéve ojepreparaha peteĩ kúrso oipytyvõtava umi traduktór oparupiguápe ontende porãve hag̃ua umi informasión oĩva ingléspe. Arekóramo jepe 64 áño, haʼekuéra chembokatupyryse ikatu hag̃uáicha oiko chehegui peteĩva umi instruktór. Che ha che rembireko roñemboʼe Jehovápe, ha avei roporandu ore sykuérape mbaʼépa opensa upévare. Haʼekuéra ijedámarõ jepe ha oikotevẽ orerehe, oipota roasepta upe asignasión. Upémarõ ahenói jey pe ermánope, ha haʼe chupe rovyʼaitereiha orereko haguére enkuénta ha roaseptaha pe asignasión porãite.

Upéi, mama oikuaa orekoha kánser. Che haʼe chupe ikatuha apyta ha aipytyvõ che ermána Líndape rokuida hag̃ua hese. Péro haʼe ndoipotaiete upéva, ha heʼi voi katu chéve: “Añeñandu vaivéta ningo che memby nderehóirõ”. Ha Linda upéichante avei opensa. Roagradeseterei ningo chupekuéra ojesakrifika haguére orerehehápe, ha avei umi ermáno oikóvape upe sónape. Un día rosẽ rire roviaha hag̃uáicha Centro Educacional de la Wachtower oĩva Páttersonpe, Linda orerenói omombeʼu hag̃ua oréve mama omano hague. Upémarõ roñehaʼã roñekonsentra ore asignasión pyahúpe, oipota haguéicha mama.

Ñepyrurã roñeasigna Betel de Maláuipe ameʼẽ hag̃ua pe kúrso, ha upéva koʼýte orembovyʼa pórke upépe oservi che rajykuéra imenakuérandi. Roñeemosionaiterei ningo rojotopa jeýrõ guare hendivekuéra. Upe rire, ameʼẽ pe kúrso Zimbábuepe ha upéi Zámbiape. Tres áño imédiore ameʼẽ pe kúrso, ha upéi ojejerure oréve roho jey hag̃ua Maláuipe. Upépe askrivi umi mbaʼe ohasa vaʼekue umi ermáno ojepersegírõ guare chupekuéra noñentremetéi haguére polítikape. *

Ropredika aja ore nietakuérandi

Rombyasyeterei ningo rova jey haguére Áfricagui, año 2005-pe. Roho jey ore rógape Básaltpe, Colorado, ha upépe rosegi ore prekursorádo. Áño 2006-pe, Brian ha Kimberly ova ore róga ykére ha omongakuaa upépe mokõi ifamília hérava Mackenzie ha Elizabeth. Paul ha Stephany katu oĩ gueteri Maláuipe. Upépe Paul oservi kómo miémbro del Comité de Sucursal. Koʼág̃a aguerekóma haimete 80 áño, ha avyʼa ahechávo umi ermáno imitãvéva okumpli porãha umi rresponsavilida ymave che areko vaʼekue. Ymaite guive roñehaʼã rosegi umi ehémplo porã, ha rohechakuaa upéva ideprovechoiterei hague ore famíliape ha ore nietakuérape. Añetehápe ningo heta mbaʼe porãma rorresivi koʼág̃a peve, ha upéva orembovyʼaiterei.

^ párr. 5 Reikuaave hag̃ua umi mbaʼe porã ohupytýva família Steele oservírõ guare kómo misionéro, ikatu rehecha La Atalaya 1 de febrero de 1957, páh. 76-79 ha del 15 de agosto de 1971, páh. 506-511.

^ párr. 30 Por ehémplo, ikatu elee ermáno Trophim Nsomba rembiasakue osẽ vaʼekue Ñemañaha 15 de abril del 2015-pe, páhina 14-18.