Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Noviembre de 2017

Mbaʼéicha ikatu rejepokuaa ne kongregasión pyahúre

Mbaʼéicha ikatu rejepokuaa ne kongregasión pyahúre

ALLEN heʼi: “Avárõ guare ko kongregasiónpe ningo ndahaʼéi la igustopa vaʼekue chéve. Ndaikuaái kuri ikatútapa añeamiga ermanokuérare ha ovyʼátapa hikuái chereheve”. * Allen ojepokuaa hína ohóvo peteĩ kongregasiónre opytáva mas de 1.400 kilómetro haʼe oiko haguégui.

Nde avei ikatu nderevyʼapái oimérõ reva raʼe de kongregasión. ¿Mbaʼépa nepytyvõta reñakostumbra hag̃ua ne kongregasión pyahúre? ¿Mbaʼépa rejapo vaʼerã oimérõ ko situasión ijetuʼuve ndéve pe repensa vaʼekuégui? Ha oimérõ jepe ndahaʼéi nde la reváva, ¿mbaʼéichapa ikatu reipytyvõ umi ova ramóvape ne kongregasiónpe ojepokuaa pyaʼeve hag̃ua?

¿MBAʼÉICHAPA IKATU REJEPOKUAA HA REVYʼA?

Ñapensamína ko ehémplore: Peteĩ plánta ojeguerova jave hendágui ningo hogue kangypaite, pórke retransplanta hag̃ua reikytĩmante vaʼerã umi hapo iñasarambipáva. Upéi reñotỹmírente, upe plánta ensegída voi oñepyrũma hapo pyahu. Upéicha avei, reváramo ótra kongregasiónpe katuete pe situasión nemokangyséta. Ne kongregasionkuépe lomímo ke reñembohapóva kuri, pórke upépe neamígo heta vaʼekue ha reguerekopáma organisádo umi mbaʼe rejapóva guive. Koʼág̃a reñembohapo jey vaʼerã ikatu hag̃uáicha revyʼa ne kongregasión pyahúpe. ¿Mbaʼépa nepytyvõta rejapo hag̃ua upéva? Umi konsého oĩva la Bíbliape ideprovechoitereíta ndéve. Jahechamína umíva.

Umi oleéva Ñandejára Ñeʼẽ káda día “ojogua peteĩ yvyramáta oñeñotỹvape arróyo ykére, hiʼáva itiempoitépe ha siémpre hogue vérde asýva. Ha opa mbaʼe ojapóva osẽ porã chupe” (Sal. 1:1-3, TNM).

Peteĩ yvyramáta ningo oikotevẽ meme ýre okakuaa porã hag̃ua. Upéicha avei, peteĩ kristiáno olee meme vaʼerã Ñandejára Ñeʼẽ ikatu hag̃uáicha osegi ojerovia. Upévare relee vaʼerã la Biblia káda día, ha ani refalta rreunionhápe. Iporãta rerekóramo avei káda semána nde estúdio de família ha pe estúdio rejapóva neañoháme. Entéro mbaʼe rejapo vaʼekue ne kongregasionkuépe reñemoag̃uive hag̃ua Jehováre, rejapo vaʼerã avei ne kongregasión pyahúpe.

“Pe ombohasáva hapichápe un váso y, orresivíta avei ajúda” (Prov. 11:25, TNM).

Nde ningo revyʼa ha rejepokuaa pyaʼevéta reñepyrũramo ensegída repredika. Peteĩ ansiáno hérava Kevin heʼi: “Rováre pe kongregasión pyahúpe che ha che rembireko rojapóma voi ore prekursorádo auxiliár, upéva orepytyvõiterei vaʼekue. Upéicha rupi pyaʼe voi roju roikuaa ermanokuérape, umi prekursórpe ha pe território”. Peteĩ ermáno hérava Roger katu ova kuri mas de 1.600 kilómetro pe lugár oiko haguégui. Haʼe heʼi: “Pyʼỹi resẽramo predikasiónpe, nepytyvõitereíta rejepokuaa hag̃ua ne kongregasión pyahúre. Avei iporãta reikuaaukáramo umi ansiánope ikatutaha rejapo oimeraẽ mbaʼe oñekotevẽva, por ehémplo ikatutaha remopotĩ Salón del Reino, rejapo rrempláso rreunionhápe, térã regueraha algúnope salónpe. Umi ermáno ha ermána ohecháramo naneprovlemaiha reipytyvõ hag̃ua oñekotevẽhápe, pyaʼeve ndeaseptáta hikuái”.

“Peavrína tuicha porã pene korasõ” (2 Cor. 6:13).

Iñimportanteterei ningo jahechauka jahayhuha hetave ermánope. Melissa, iména ha imembykuña ovárõ guare ótra kongregasiónpe, haʼekuéra oñehaʼãmbaite oñeamiga umi ermánore. Melissa heʼi: “Roñehaʼã rojeheʼa umi ermánore rreunión oñepyrũ mboyve ha avei opa rire. Upévare roreko tiémpo roñemongeta  hag̃ua hendivekuéra ha ndahaʼéi rosaludánteva térã rojedespedínteva chuguikuéra”. Koʼã mbaʼe oipytyvõ avei pe famíliape pyaʼe oikuaa hag̃ua umi ermáno réra. Avei, oinvita chupekuéra hógape ha péicha oñeamigave hesekuéra. Ko ermána heʼi: “Romeʼẽ ojupe ore número de teléfono, péicha umi ermáno ikatu oreinvita rojapo hag̃ua aktivida kongregasiónpe, térã roñembyaty hag̃uánte”.

Ijetuʼúramo ndéve reñemongeta hag̃ua ótrondi, ¿mbaʼépa ikatu rejapo? Reho vaʼerã hese mbeguekatu. Por ehémplo, iporãta repukami oimérõ jepe ñepyrũrã ijetuʼu ndéve rejapo hag̃ua upéva. Nderorýramo, oĩvéta la oñemoag̃uiséva nderehe. Ndareíri la Biblia heʼi: “Peteĩ persóna ovyʼáramo nderecha jave, upéva nembovyʼa avei” (Prov. 15:30, TNM). Raquel ova kuri mombyry pe lugár okakuaa haguégui. Haʼe heʼi: “Che ningo siémpre cheotĩva. Sapyʼánte añehaʼãmbaite vaʼerã ikatu hag̃uáicha añemongeta umi ermáno ha ermánandi oĩva che kongregasión pyahúpe. Upearã, aheka álgien oguapýva Salónpe ha noñeʼẽiva avavéndi. Akalkula oime vaʼerãha hiʼotĩnte avei chéicha”. ¿Mbaʼérepa nereñehaʼãi reñemongeta diferénte persónandi rreunión oñepyrũ mboyve térã opa rire?

¿Ha oiméramo upéva ndahaʼéi ne situasión? Ikatu oime revyʼa guei reikuaáta haguére hetave persónape. Péro kon el tiémpo ikatu reju nanekyreʼỹvéi. Oikóramo upéva, tekotevẽta reñehaʼãmbaite resegi hag̃ua reñeamiga hetave ermánore.

Umi plánta ojeguerova jave opyta ikangy, péro upéi hoky jey ha hapo mbarete

TEKOTEVẼ OHASA TIÉMPO REJEPOKUAA HAG̃UA

Oĩ plánta ojerova ramóme, pyaʼe voi hapo pyahu jeýmava. Ótro katu ndaupéichai. Kristianokuérare oiko avei upéva, oĩ pyaʼe ojepokuaáva ikongregasión pyahúre, ha oĩ la nahániriva. Oimérõ ohasáma raʼe un tiémpo ha ijetuʼu gueteri ndéve rejepokuaa hag̃ua upe lugár reva haguépe, koʼã téxto bíblico ikatu nepytyvõ:

“Akóintekena jajapo iporãva, péicha og̃uahẽ vove pe tiémpo katuete ñamonoʼõta nañanekaneʼõiramo” (Gál. 6:9).

Eheja tohasa hetave tiémpo pe rekalkula vaʼekuégui rejepokuaa hag̃ua ne kongregasión pyahúre. Por ehémplo, umi misionéro oasisti vaʼekue Eskuéla de Galaádpe ha oñemondóva ótro tetãme, oñehaʼã opyta upépe un vuén tiémpo oviaha jey mboyve hetãme. Upéicha rupi ikatu oñeamiga umi ermánore ha ojepokuaa pyaʼeve umi kostúmbre orekóvare hikuái.

Alejandro ningo peteĩ ermáno ovámava heta vése de kongregasión. Haʼe omombeʼu ñaikotevẽtanteha voi tiémpo jajepokuaa hag̃ua, ha ndaikatumoʼãiha ñamboapura upéva. Alejandro heʼi: “Pe última ves rova rire, che rembireko heʼi chéve entéro iñamigokuéra oĩha pe ótra kongregasiónpe”. Upémarõ, Alejandro omomanduʼa chupe haʼe heʼi hague kuri la mísma kósa pe anteve ovárõ guare hikuái. Upérõ, 2 áño pukukue hembireko ohechauka vaʼekue oñeinteresaha umi ótrore ha upéicha rupi heta ermáno ndoikuaáivape kuri ñepyrũrã, upéi opyta iñamigoite.

“Ani eiko ere: ‘Yma ningo opa mbaʼe iporãve vaʼekue’. Erérõ péicha nderehechaukái nearanduha” (Ecl. 7:10, TNM).

Aníkena rekompara ne kongregasionkue ko ne kongregasión pyahúre. Por ehémplo, ikatu ningo koʼág̃a umi ermáno iñotĩve térã idirektove heʼi jave ndéve algúna kósa. Tahaʼe haʼeháicha eñehaʼã vaʼerã ehecha umi mbaʼe porã ojapóva hikuái. Katuete ningo ndéve ndegustáta avei ojejapóramo upéicha nderehe. Sapyʼánte umi ermáno ováva de kongregasión ohechakuaa tekotevẽha oñeporandu: “¿Añetehápe piko ahayhu “enterove ermánope?” (1 Ped. 2:17).

 “Pejerure jey jeýkena, ha oñemeʼẽta peẽme” (Luc. 11:9).

Reñemboʼe meme vaʼerã ha ejerure Jehovápe tanepytyvõ. Peteĩ ansiáno hérava David heʼi: “Ani rejapose upéva ne añónte. Jaikuaaháicha, heta mbaʼe Jehová rupivémante ikatúta osẽ porã ñandéve”. Raquel, pe ajeʼi ñañeʼẽ hague heʼi: “Che ména ha che roñeñandúramo oreaño kongregasiónpe, roñemboʼe Jehovápe ha direktoite roʼe chupe kóicha: ‘Por favór, eikuaaukamína oréve noiméipa rojapo hína peteĩ mbaʼe noipytyvõiva hína ermanokuérape oñemoag̃ui hag̃ua orerehe’. Upéi, roñehaʼã rohasave tiémpo ermanokuérandi”.

Tuakuéra, oiméramo ne famíliape ijetuʼu hína ojepokuaa hag̃ua pe kongregasión pyahúpe, eñemotiémpokena eñemboʼe hag̃ua hendivekuéra ko mbaʼére. Eipytyvõ chupekuéra otopa hag̃ua iñamigorã kongregasiónpe. Upearã rejapokuaa arréglo peime hag̃ua ermanokuérandi.

ÑAIPYTYVÕKENA UMI OVA RAMÓVAPE OJEPOKUAA PYAʼE HAG̃UA

¿Mbaʼépa ikatu jajapo umi ova ramóva oñeñandu porã hag̃ua? Eñehaʼã eñeamiga hesekuéra og̃uahẽmírente voi. Upearã, ikatu epensa mbaʼépa nde reipotáne umi ótro ojapo nderehehápe ndepyahúramo peteĩ kongregasiónpe, ha ejapo upéva (Mat. 7:12). ¿Ikatúpa hína reinvita chupekuéra pende estúdio de famíliape, térã ohecha hag̃ua penendive pe prográma mensuál JW Broadcasting? ¿Ikatúne piko rejapo arréglo umi ermánondi pesẽ hag̃ua pepredika oñondive? Reinvitáramo chupekuéra peʼu hag̃ua álgo, katuete haʼekuéra ndahesaraimoʼãi nembaʼeporã hague hendivekuéra. ¿Mbaʼe mbaʼépa ikatu rejapove?

Carlos heʼi: “Rova ramórõ guare ore kongregasión pyahúpe, peteĩ ermána ombohasa oréve peteĩ lísta ohechaukáva moõpa ikatu roñemu varatove. Añetehápe upéva ideprovechoiterei kuri oréve”. Umi ermáno oúramo peteĩ lugár hakuhágui térã roʼyhágui, omombaʼetereíta jaʼéramo chupekuéra mbaʼéichapa oñemonde vaʼerã, oimérõ pe jaikohápe haku, roʼy térã okyeterei. Avei, tuichaiterei oipytyvõta umi ermánope opredika hag̃ua ñañeʼẽramo chupekuéra pe lugár jaikoháre, mbaʼépa ogusta umi héntepe ha mbaʼe kreénsiapa oreko hikuái.

NAÑAMBYASYMOʼÃI ÑAÑEHAʼÃ HAGUÉRE

Allen, ñañeʼẽ hague oñepyrũre ko artíkulo, ojapóma mas de un áño oĩ hague ikongregasión pyahúpe. Haʼe heʼi: “Ñepyrũrã añehaʼã vaʼekue aikuaa porãve umi ermánope, ijetuʼúramo jepe chéve. Péro koʼág̃a avyʼaitereíma, pórke añandu haʼeramoguáicha hikuái che família”. Allen oñemeʼẽ enkuénta ovárõ guare de kongregasión ndoperdéi hague iñamigokuérape. Upéva rangue okonsegive katu iñamigorã, ha moõ jaikuaapa noiméipa enterovéva hikuái haʼéta iñamígo para siémpre.

^ párr. 2 Oĩ téra oñekambiáva.