Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Noviembre de 2016

Osẽ hikuái pe rrelihión fálsa poguýgui

Osẽ hikuái pe rrelihión fálsa poguýgui

“Peẽ che puévlo, pesẽke chugui” (APOC. 18:4).

PURAHÉI: 101, 93

1. a) ¿Mbaʼérepa oĩ kuri esperánsa Ñandejára puévlo ojeívo Babilonia Guasu poguýgui? b) ¿Mbaʼépa ñambohováita ko artíkulope?

PE ARTÍKULO ohasa vaʼekuépe jahecha kuri umi kristiáno fiél oĩ hague Babilonia Guasu poguýpe. Péro haʼekuéra ndopytái upépe opa árare. ¿Mbaʼérepa jaʼekuaa upéva? Pórke Ñandejára omanda ipuévlope osẽ hag̃ua chugui, ha haʼe ndojapomoʼãi kuri upéva haʼekuéra ndaikatúirire osẽ pe rrelihión japúgui (elee Apocalipsis 18:4). ¿Arakaʼépa osẽ hikuái Babilonia Guasu poguýgui? Jaikuaa hag̃ua upéva tekotevẽ ñambohovái raẽ koʼã porandu: ¿Mbaʼépa ojedesidi ojapo umi Estudiánte de la Biblia áño 1914 mboyve? ¿Mbaʼeichaite pevépa oñehaʼã hikuái opredika pe primera gérra mundiál aja? ¿Ikatúpa jaʼe oĩ hague hikuái Babilonia poguýpe tekotevẽ haguére ojekorrehi kuri chupekuéra?

“BABILONIA GUASU HOʼÁMA”

2. ¿Mbaʼépa ojapo umi Estudiánte de la Biblia pe primera gérra mundiál mboyve?

2 Heta áño pe primera gérra mundiál mboyve (1914-1918), Charles Taze Russell ha iñirũnguéra ohechakuaa  umi heʼíva ijehe kristianoha, añetehápe nomboʼeiha pe añetegua oĩva la Bíbliape. Upévare haʼekuéra ojei pe rrelihión japúgui. Áño 1879-pe, rrevísta Zionʼs Watch Tower omensiona kuri entéro umi iglésia heʼíva ijehe haʼeha Cristo nóvia, ha upéicharõ jepe oapoja umi goviérnope, añetehápe oĩ Babilonia Guasúpe, oñekomparáva peteĩ kuña rekovaíre (elee Apocalipsis 17:1, 2).

3. ¿Mbaʼépa ojapo umi Estudiánte de la Biblia ohechauka hag̃ua noĩseveimaha pe rrelihión japúpe? (Ehecha pe taʼanga oĩva iñepyrũme).

3 Heta kristiáno iñeʼẽrendúva oikuaa kuri Ñandejára novendesimoʼãveimaha chupekuéra osegínterõ oapoja pe rrelihión japúpe. Upévare heta oĩ ijapytepekuéra omondóva kárta ijiglesiakuépe orrenunsia hag̃ua. Algúno olee voi pe kárta oskrivi vaʼekue, entéro umi ijatývape pe iglésiape. Péro sapyʼánte noñepermitíri chupekuéra ojapo upéva, upémarõ omondo pe kárta káda miémbro oĩvape pe iglésiape. Umi Estudiánte de la Biblia ohechauka porãiterei vaʼekue noĩseveimaha pe rrelihión fálsape. Haʼekuéra ojapórire upéva unos kuánto áño ántes, ikatu kuri ojejuka chupekuéra. Péro 1870-pe g̃uarã, heta goviérno ndoapojavéima umi iglésiape ymave ojapo haguéicha. Upérõ umi hénte ikatúma oñeʼẽ lívremente la Biblia omboʼévare, ha hiʼarive ikatúma avei oopina noĩriramo de akuérdo hendivekuéra.

4. Emyesakã mbaʼépa ojapo umi Estudiánte de la Biblia pe primera gérra mundiál aja.

4 Umi Estudiánte de la Biblia oikuaauka ihéntepe, iñamigokuérape ha entéro umi oĩvape pe iglésiape ndoapojaveimaha pe rrelihión fálsape. Péro, ¿opensápa hikuái ovalemaha la ojapóva? Nahániri. Haʼekuéra oipota ojekuaa ko múndo tuichakuére Babilonia Guasu haʼeteha peteĩ kuña rekovai. Upévare éntre diciembre de 1917 ha oñepyrũre 1918, umi Estudiánte de la Biblia kyreʼỹme omosarambi opárupi 10 millónes de tratádo. Ko tratádo ohechauka porã umi héntepe mbaʼeichaguápa añetehápe umi rrelihión heʼíva ijehe kristianoha. Pýpe oĩ peteĩ artíkulo hérava “Babilonia Guasu hoʼáma”. ¡Umi paʼi ningo okapumoʼã! Upéicharõ jepe umi Estudiánte de la Biblia ndoguevíri. Haʼekuéra oĩ desidído osegi opredika ha ojapo ko téxto heʼíva: “Ore oreñeʼẽrendu vaʼerã Ñandejárape ore ruvicháramo, yvyporakuérape rangue” (Hech. 5:29). ¿Mbaʼépa ohechauka ñandéve koʼã mbaʼe? Umi kristiáno noĩri hague Babilonia Guasu poguýpe pe primera gérra mundiál aja. Upérõ haʼekuéra ojei ohóvo chugui, ha oipytyvõ hína ótrope ojapo hag̃ua avei upéva.

KYREʼỸME OPREDIKA HIKUÁI PE GÉRRA AJA

5. ¿Mbaʼérepa jaʼekuaa umi ermáno opredika hague kyreʼỹme pe primera gérra mundiál aja?

5 Ymave ñapensa kuri Ñandejára novendesíri hague ipuévlope pe primera gérra mundiál aja, pórke ndopredikái hikuái kyreʼỹme. Upévare ñapensa Jehová oheja hague chupekuéra Babilonia Guasu poguýpe peteĩ tiémpore. Péro éntre 1914 ha 1918, oĩ vaʼekue ermáno ha ermána iñeʼẽrendúva ha ojapóva ikatúva guive omombeʼu hag̃ua Ñandejára mensáhe. Ñantende porãve rupi umi mbaʼe ohasa vaʼekue hikuái upe tiémpope, hesakãve avei ñandéve umi mbaʼe la Biblia heʼíva ko témare.

6, 7. a) ¿Mbaʼe mbaʼépa ombohovái umi Estudiánte de la Biblia pe primera gérra mundiál aja? b) ¿Mbaʼérepa jaʼekuaa haʼekuéra opredika kyreʼỹ hague?

 6 Jahecha haguéicha, umi Estudiánte de la Biblia opredika meme vaʼekue pe primera gérra mundiál aja. Péro haʼekuéra ombohovái vaʼerã kuri heta mbaʼe ijetuʼúva. Por ehémplo, ndoipurukuaái vaʼekue la Biblia oñeʼẽ hag̃ua umi héntepe. Upévare, ohejánte hikuái lívro umi persónape ikatu hag̃uáicha ijeheguínte oñehaʼã ontende pe añetegua. Upévare umi goviérno oproivírõ guare pe lívro The Finished Mystery (El misterio terminado) áño 1918-pe, ijetuʼu umi ermánope opredika hag̃ua. Avei, upe áñope oñepyrũ pe grípe españóla. Ko mbaʼasy pyaʼeterei ova, upéicha rupi ijetuʼu umi ermánope oviaha ikatu hag̃uáicha opredika. Upéicharõ jepe, umi Estudiánte de la Biblia ojapo opa ikatúva osegi hag̃ua opredika.

Entéro umi Estudiánte de la Biblia opredika vaʼekue kyreʼỹme (Ehecha párrafo 6 ha 7)

7 Áño 1914-pe, mbovýramo jepe umi Estudiánte de la Biblia, opresenta hikuái pe “Foto-Drama de la Creación”. Pe Foto-Drama ohechauka mbyky mimi fóto ha filmasión ha oñemoĩ sonído peteĩ pelíkulaicha, ohechaukáva yvyporakuéra istória, Adánpe ojekrea guive Cristo goviérno de Mil Áño peve. Upe tiémpope ndojehecháiva mbaʼeve ojoguáva upévape. Primera ves oñepresentárõ guare áño 1914-pe, ohecha mas de 9 millón de persóna. Ñapensamíntena, ko kantida hetave umi testígo de Jehová oĩvagui ko tiémpope. Áño 1916-pe 809.393 persóna oho rreunionhápe Estados Unídospe. Ha áño 1918-pe katu, oasisti 949.444 persóna. Jahechakuaa entónse umi Estudiánte de la Biblia ikyreʼỹeterei hague.

8. ¿Mbaʼépa ojejapo ikatu hag̃uáicha oñemokyreʼỹ umi ermánope pe primera gérra mundiál aja?

8 Pe primera gérra mundiál aja, umi ermáno ombaʼapo jejopy omog̃uahẽ hag̃ua puvlikasión bíblica ha omokyreʼỹ hag̃ua entéro umi Estudiánte de la Bíbliape. Upéva omombarete chupekuéra osegi hag̃ua opredika. Richard H. Barber opredika kyreʼỹ vaʼekue upe tiémpope. Haʼe heʼi: “Roipytyvõ ikatu hag̃uáicha umi superintendénte viahánte  osegi ojapo hembiapo, ha osegi hag̃ua ojepuru pe rrevísta The Watch Tower, inklúso Canadápe ojeproivihápe. Areko avei pe priviléhio arahakávo por korréo unos kuánto ermánope pe lívro The Finished Mystery michiʼĩva, umi autorida oipeʼa rupi chuguikuéra. Ermáno Rutherford ojerure oréve roorganisa hag̃ua asambléa heta siudápe oĩva oéste gotyo Estados Unídospe, ha romondo hag̃ua diskursánte ikatu hag̃uáicha omokyreʼỹ umi ermánope”.

TEKOTEVẼ ONTENDE PORÃVE HIKUÁI LA BIBLIA

9. ¿Mbaʼérepa Ñandejára puévlo tekotevẽ kuri ontende porãve la Biblia heʼíva éntre áño 1914 ha 1919, péro mbaʼépa ndeʼiséi upéva?

9 Éntre áño 1914 ha 1919, oĩ vaʼekue algúna kósa umi Estudiánte de la Biblia tekotevẽva ontende porãve. Por ehémplo haʼekuéra nontendepáiti kuri mbaʼépa heʼise iñeʼẽrendu vaʼerãha hikuái pe goviérnope (Rom. 13:1). Ñandejára puévlo noñemantenéi vaʼekue neutrál tódo el tiémpo pe gérra aja. El 30 de mayo de 1918, pe presidénte Estados Unidosgua ojerure umi héntepe ikatu hag̃uáicha oñemboʼe pe pas rehehápe. Rrevísta The Watch Tower omokyreʼỹ avei umi Estudiánte de la Bíbliape ojapo hag̃ua upéva. Oĩ voi ermáno oapojáva ekonómikamente pe gérra, ha oĩ avei oñepresentáva oho hag̃ua oñorairõ. Jahechaháicha, tekotevẽ kuri ontende porãve hikuái la Biblia heʼíva. Péro koʼã mbaʼe ndeʼiséi Babilonia Guasu oreko hague chupekuéra ipoguýpe. Añetehápe, upe tiémpope saʼíma ofalta kuri ojeiete hag̃ua hikuái pe rrelihión fálsagui.

10. ¿Mbaʼéichapa umi Estudiánte de la Biblia ohechauka orrespetaha pe vída?

10 Añetehápe umi Estudiánte de la Biblia nontendeporãi mbaʼépa heʼise ñañemantene neutrál. Péro haʼekuéra oikuaa porã ivaiha oporojuka. Umi mbovymi ermáno oho vaʼekue gerrahápe ndoipurúi hiʼárma ojuka hag̃ua hapichápe. Upévare koʼãva apytégui oĩ vaʼekue oñemondóva tenondete pe ñorairõhápe ojejuka hag̃uáicha chupekuéra.

11. ¿Mbaʼéichapa orreaksiona raʼe umi autorida umi Estudiánte de la Biblia oñenega rupi oho gerrahápe?

11 Satanás ipochyeterei ohechávo umi ermáno osegiha ifiél Jehovápe. Upévare “oplanea ivaíva ha upearã oipuru pe léi” (Sal. 94:20, TNM). Peteĩ henerál Estados Unidos ehersitopegua hérava James Franklin Bell, heʼi ermáno Rutherford ha Van Ámburghpe pe goviérno oñehaʼã hague onohẽ peteĩ léi pyahu okondena hag̃ua a muérte umi oñenegávape oñorairõ gerrahápe. Haʼe oñeʼẽ kuri umi Estudiánte de la Bíbliare heʼívo upéva. Pe henerál ipochyeterei, ha heʼi ermáno Rútherfordpe ndojeaprovái hague pe léi, pe presidénte ojoko rupínte. Avei heʼi chupe: “Péro roikuaa mbaʼéichapa pojagarráta, ha roĩ desidído rojapotaha upéva”.

12, 13. a) ¿Mbaʼérepa oñekondena 8 ermánope oho hag̃ua heta áñore kárselpe? b) ¿Osegípa hikuái iñeʼẽrendu Jehovápe? Emyesakã.

12 Pe goviérno okumpli la heʼíva ha oheka fórma okastiga hag̃ua umi Estudiánte de la Bíbliape. Upéicha rupi ojearresta ermáno Rutherford, Van Amburgh ha ótro 6 ermánope omoakãva pe Sociedad Watch Tower. Pe hués orekóva ikárgope pe káso heʼi  umi ermáno ipeligrosoveha hetaiterei soldádo alemángui. Heʼi avei haʼekuéra ndorrespetaiha pe goviérnope, pe ehérsitope ni umi ótra iglésiape, upévare omereseha ojekastiga chupekuéra. [1] Umi 8 Estudiánte de la Bíbliape oñekondena oho hag̃ua heta áñore kársel de Atlántape, Georgia. Péro opa rire pe gérra osẽ jey hikuái, ha ojerretira umi kárgo oĩ vaʼekue ikóntrape.

13 Umi 8 ermáno oĩramo jepe kárselpe, ojedesidi ojapotaha Jehová léi heʼíva. Haʼekuéra oskrivi pe presidénte de los Estados Unídospe ikatu hag̃uáicha ojepoi chuguikuéra. Pe kártape haʼekuéra oexplika la Biblia heʼiha ndovaleiha japorojuka. Upévare entéro oñemeʼẽma vaʼekue Ñandejárape, ha upéi oúva naiñeʼẽrenduvéi chupe operdéta ivendisión ha oñehundíta. Haʼekuéra heʼi upéicha rupi umi oservíva Ñandejárape ndaikatuiha oporojuka. Koʼã ermáno ipyʼaguasu vaʼekue oskrivi hag̃ua koʼã mbaʼe pe presidéntepe. Upévare ikatu jaʼe umi ermáno siémpre oĩ hague desidído iñeʼẽrendutaha Jehovápe.

OÑEMOSÃSO ÑANDEJÁRA PUÉVLOPE

14. ¿Mbaʼépa oiko vaʼekue áño 1914 guive prinsípio de 1919 peve según Malaquías 3:1-3?

14 Malaquías 3:1-3 oexplika mbaʼépa oiko kuri umi Estudiánte de la Bíbliare áño 1914 guive prinsípio de 1919 peve (elee Malaquías 3:1-3). Jehová, haʼéva “pe Señór verdadéro”, ha Jesucristo “pe mensahéro del pákto” ou ohecha hag̃ua mbaʼéichapa oĩ Ñandejára renondépe Levi raʼykuéra, orrepresentáva umi unhídope. Upéi, Jehová ontendeka porã rire hembipota isiervokuérape ha omopotĩ rire chupekuéra, oĩma preparádo hikuái orresivi hag̃uáicha peteĩ asignasión pyahu. Upévare, áño 1919-pe Jesús onombra “pe tembiguái jeroviaha ha iñarandúva”, ha oenkarga chupekuéra ogia ha omboʼe hag̃ua Jehová siervokuérape (Mat. 24:45). Péicha oñemosãsóma Ñandejára puévlope Babilonia Guasu poguýgui. Upe guive, haʼekuéra oaprendeve ohóvo umi mbaʼe Ñandejára ojapótava, ha amás día ohayhuve chupe. Katuete oagradesetereíne raʼe hikuái Jehovápe omosãso haguére chupekuéra. [2] (Elee pe nóta).

15. ¿Mbaʼéichapa ikatu jahechauka jaagradesetereiha jajei haguére Babilonia Guasu poguýgui?

15 Javyʼaiterei ningo jajei haguére Babilonia Guasu poguýgui. Satanás oñehaʼã vaʼekue ohundi pe adorasión añeteguáva, péro nosẽi ijidéape. Aníkena ñanderesarái maʼerãpa Jehová ñanemosãso: haʼe oipota ojesalva entéro yvypóra (2 Cor. 6:1). Koʼág̃a peve ningo umi rrelihión japu ombotavy gueteri hetaiterei persóna ipyʼaporãvape, ha oikotevẽ hikuái ñaipytyvõ chupekuéra. Upévare, jajapókena ikatúva guive jasegi hag̃ua umi ermáno ifiélva ehémplo ñaipytyvõvo umi héntepe ikatu hag̃uáicha isãso avei.

^ [1] (párrafo 12) Lívro Faith on the March (La fe en marcha), ojapo vaʼekue A. H. Macmillan, páhina 99.

^ [2] (párrafo 14) Umi mbaʼe ohasa vaʼekue umi judío ojeguerahárõ guare Babilóniape, ha umi mbaʼe ohasáva umi kristiáno oñepyrũ rire pe apostasía, ojojogua heta mbaʼépe. Upéicharõ jepe, ndaikatúi jaʼe umi mbaʼe ohasa vaʼekue umi judío Babilonia poguýpe orrepresentaha umi mbaʼe ohasa vaʼekue umi kristiáno unhído. Upévare ndovaléi ñakompara entéro detálle jahecha hag̃ua mbaʼéichapa oñekumpli umíva, pórke oĩ mimi diferénsia. Por ehémplo, umi judío oĩ kuri Babilonia poguýpe 70 áñore, péro umi kristiáno unhído oĩ Babilonia Guasu poguýpe hetave tiémpore.