Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Noviembre de 2016

¿Ñamombaʼépa hína Ñandejára Ñeʼẽ?

¿Ñamombaʼépa hína Ñandejára Ñeʼẽ?

“Pehendúrõ guare Ñandejára Ñeʼẽ [...] peguerovia añetehápe haʼeha Ñandejára Ñeʼẽ” (1 TES. 2:13).

PURAHÉI: 114, 113

1-3. a) ¿Mbaʼérepa oime vaʼerã Evodia ha Síntique ojodiskuti? b) ¿Mbaʼépa ñanepytyvõta jajehekýi hag̃ua koʼãichagua provlémagui? (Ehecha pe taʼanga oĩva iñepyrũme).

ÑANDE ningo javaloraiterei la Biblia, pórke jaikuaa haʼeha Ñandejára Ñeʼẽ. La Bíbliape jatopa heta konsého ikatúva ñanepytyvõ jajehekýi hag̃ua umi provlémagui, ha avei ohechauka ñandéve jajavy jave. ¿Mbaʼépa jajapo jalee jave koʼã konsého? Ñanemanduʼamína mokõi kristiána unhída oiko vaʼekuére síglo primérope, hérava Evodia ha Síntique. La Biblia heʼi haʼekuéra ojodiskuti hague, péro nomombeʼúi mbaʼérepa. Upéicharõ jepe, ñañeimahinamína mbaʼépa ikatu raʼe oiko upérõ.

2 Ikatu oime Evodia oinvita raʼe hógape unos kuánto ermáno ha ermánape hoʼumi hag̃ua álgo ha ohasa porã hag̃ua hikuái, péro noinvitái Síntiquepe. Upéi Síntique oñentera umi ermáno ovyʼaiterei hague. Oime vaʼerã haʼe opensa: “Ni ndagueroviaséi ningo Evodia ndacheinvitái hague. Che aimoʼã kuri haʼe che amigaiteha”. Síntique ipochyeterei, ha opensa  voi Evodia ndohayhúi ha omboykeha chupe. Upémarõ haʼe oinvita avei hógape okaru hag̃ua umi ermáno Evodia oinvita vaʼekuépe, péro noinvitái chupe. Ko provléma ikatu voi oipeʼa pe pyʼaguapy kongregasióngui. La Biblia heʼi Pablo oñemoñeʼẽ hague koʼã mokõi ermánape oiko porã jey hag̃ua. Oiméne ohendu raʼe hikuái ikonsého, ha vyʼápe osegi oservi Jehovápe (Filip. 4:2, 3).

3 Koʼág̃arupi avei ikatu jajoavyʼimi peteĩ ermáno térã ermána ñane kongregasionguándi. Péro jasegíramo umi konsého oĩva la Bíbliape ikatu jajogueraha porã jey, térã jajehekyiete voi koʼãichagua provlémagui. Jajapóramo la Biblia heʼíva, jahechauka hína ñamombaʼeha Ñandejára Ñeʼẽ (Sal. 27:11).

LA BIBLIA ÑANEPYTYVÕ JAJEJOKOKUAA HAG̃UA

4, 5. ¿Mbaʼe konséhopa omeʼẽ la Biblia jajejokokuaa hag̃ua?

4 Heta vése ningo ijetuʼu jajejokokuaa hag̃ua. Sapyʼánte oĩ ñaneofendéva térã reiete ñandetrata vaíva. Por ehémplo, ikatu oĩ ojapóva upéva jaju haguére ótro tetãgui térã ñande pire kolór diferénte haguére. Upéicha jave ikatu ñañeñandu vai térã ñandepochy. Ha katuete ñañeñandu vaivétantema oimérõ peteĩ ermáno la ojapóva upéva ñanderehe. ¿Mbaʼe konsého bíblico ikatu ñanepytyvõ péicha jave?

5 Ñañeñandu vai térã ñandepochýramo ningo ikatu jaʼe térã jajapo peteĩ mbaʼe upe rire ñambyasýva. Jehová oikuaa ijetuʼuha jajejokokuaa hag̃ua. Upévare, Iñeʼẽme ohechauka mbaʼépa jajapokuaa ikatu hag̃uáicha ñandepyʼaguapy. Haʼe heʼi: “Ani pyaʼeterei ndepochy”. Ñapensamíntena mboy provlémaguipa jajehekýita nañandepochyreíriramo ha jasegírõ ko konsého (elee Proverbios 16:32; Eclesiastés 7:9). La Biblia heʼi avei ñaporoperdona vaʼerãha. Jesús heʼi vaʼekue voi nañaperdonáirõ ñande rapichápe, Jehová nañaneperdonamoʼãiha (Mat. 6:14, 15). Upévare iporã ñañeporandu: “¿Ahechakuaápa tekotevẽha chepasiensiave? ¿Ijetuʼúpa chéve aporoperdona hag̃ua?”.

6. ¿Mbaʼépa ikatu oiko nañakontroláirõ umi mbaʼe ñañandúva?

6 Nañakontroláirõ umi mbaʼe ñañandúva, ikatu ñandepochy ñande rapicháre térã jaju ndajachaʼevéi hese. Ñande káusare umi ermáno opensakuaa avei upéicha. Ñañehaʼãramo jepe ani hag̃ua ojekuaa ñanderehe ñandepochyha térã ñandepyʼaroha, lomímonte voi umi ótro oñemeʼẽta enkuénta. Ha ikatu voi umi ermáno oñemomombyry ñandehegui (Prov. 26:24-26). Umi ansiáno ñanepytyvõkuaa la Biblia rupive jaipeʼa hag̃ua ñande pyʼapýgui koʼã mbaʼe vai, ha ñaporoperdona hag̃ua (Lev. 19:17, 18; Rom. 3:11-18). Jasegíramo umi konsého oñemeʼẽva ñandéve, jajapo hína Ñandejára Ñeʼẽ heʼíva.

JEHOVÁ ÑANDEGIA

7, 8. a) ¿Mbaʼéichapa Jehová odirihi ipuévlope? b) ¿Mbaʼe mbaʼépa heʼi la Biblia jajapo vaʼerãha, ha mbaʼérepa?

7 Jehová odirihi ipuévlope ha ohekomboʼe chupekuéra. Upearã onombra Crístope omoakã hag̃ua kongregasión, ha Cristo onombra pe tembiguái jeroviaha ha iñarandúvape ohekomboʼe ha ogia hag̃ua Ñandejára siervokuérape (Mat. 24:45-47; Efes. 5:23). Ojapo haguéicha pe Kuérpo Governánte síglo primeropegua, ko tembiguái omombaʼe avei la Biblia pórke orrekonose haʼeha Ñandejára Ñeʼẽ  (elee 1 Tesalonicenses 2:13). Jahechamína mbaʼe mbaʼépa la Biblia heʼi ñandéve jajapo vaʼerãha.

8 La Biblia heʼi ñandéve jaha meme vaʼerãha rreunionhápe (Heb. 10:24, 25). Ñanemokyreʼỹ jarovia hag̃ua pe añeteguánte (1 Cor. 1:10). Ñamotenonde hag̃ua “Ñandejára Rréino” (Mat. 6:33). Omanda ñandéve japredika hag̃ua de kása en kása térã mamo oĩháme hénte (Mat. 28:19, 20; Hech. 5:42; 17:17; 20:20). Heʼi umi ansiánope ani hag̃ua opermiti mbaʼeve omongyʼa pe kongregasión (1 Cor. 5:1-5, 13; 1 Tim. 5:19-21). Ha avei ñanemboʼe ikatu hag̃uáicha ñanepotĩ ha ñamboyke umi pensamiénto térã kostúmbre Jehovápe ombojeguarúva (2 Cor. 7:1).

9. ¿Mávapepa Jesús oipuru ikatu hag̃uáicha ñantende la Biblia?

9 Oĩ opensáva natekotevẽiha avave oexplika chupe umi mbaʼe omboʼéva la Biblia. Péro 1919 guive, Jesús ojevale pe tembiguái jeroviaha ha iñarandúvare ikatu hag̃uáicha oipytyvõ isegidorkuérape ontende hag̃ua la Biblia ha osegi hag̃ua upépe heʼíva. Jajapóramo Ñandejára Ñeʼẽ heʼíva, ñaipytyvõta pe kongregasión ipotĩ hag̃ua, oiko hag̃ua pyʼaguapýpe ha peteĩ ñeʼẽme. Upévare iporã ñañeporandu: “¿Ahechaukápa cheñeʼẽrenduha Jesúspe ajapóvo pe tembiguái jeroviaha heʼíva?”.

JEHOVÁ KÁRRO SELESTIÁL PYAʼETEREI OKUʼE

10. ¿Mbaʼépa heʼi Ezequiel Jehová organisasión selestiál rehe?

10 La Biblia ohechauka Ñandejára organisasión ojedirihi porãha yvágape. Por ehémplo, Ezequiel ohecha vaʼekue peteĩ visiónpe Jehová ohoha peteĩ kárrope, ha pe kárro okuʼe pyaʼetereiha haʼe ohoseha gotyo (Ezeq. 1:4-28). Pe kárro orrepresenta Ñandejára organisasión, pe párte oĩva yvágape, ha pyaʼeterei okuʼe haʼe odirihiha gotyo. Pe kárro okuʼe lája ojekuaa avei umi mbaʼe oikóvare Jehová organisasiónpe, pe párte oĩva ko yvy ape ári. Umi 10 áño ohasa vaʼekuépe ningo hetaiterei kámbioma oiko. Ñanemanduʼa vaʼerã Jehová ojapoha umi kámbio. Koʼẽrõitéma Jesús ha umi ánhel ohundíta ko múndo aña. Upépe oñembotuicháta Jehová réra ha ojekuaa porãta haʼe añoite ogoverna vaʼerãha enterovévape.

Jaagradesete ningo umi voluntário ombaʼapo pohýivape konstruksiónpe (Ehecha párrafo 11)

11, 12. ¿Mbaʼépa ojapo Ñandejára organisasión koʼã ára pahápe?

11 Jahechamína mbaʼépa ojapo Jehová organisasión koʼã ára pahápe, por ehémplo konstruksiónpe. Hetaiterei ermáno ombaʼapo jejopy ojejapo hag̃ua pe séde pyahu Wárwickpe, Nueva York. Oĩ avei heta voluntário ombaʼapóva oñemopuʼã hag̃ua Salón del Reino ha sukursál opa hendárupi. Pe Departamento Mundial de Diseño y Construcción oorganisa  koʼã tembiapo. Jaagradeseterei ningo entéro umi onemeʼẽmbaitévape koʼãichagua traváhope. Ha Jehová siervokuéra ko yvy tuichakuére oapoja ikatumiháicha ekonómikamente oñemopuʼã hag̃ua koʼã edifísio. Añetehápe Ñandejára ovendesi ipuévlope ohechauka haguére iñumílde ha ifielha (Luc. 21:1-4).

12 Ñanerekomboʼe. Jehová omboʼeseterei voi ipuévlope (Is. 2:2, 3). Upévare oforma heta eskuéla ohekomboʼe hag̃ua isiervokuérape. Por ehémplo, oĩ pe Eskuéla Prekursorkuérape g̃uarã, Eskuéla Oñembokatupyryve hag̃ua umi Opredikávape, Eskuéla Bíblica de Galaad, Eskuéla umi Betelíta Pyahúpe g̃uarã, Eskuéla Superintendénte ha Hembirekópe g̃uarã, Eskuéla Ansianokuérape g̃uarã, Eskuéla del Ministério del Reino, ha Eskuéla umi oĩvape Komite de Sukursálpe ha Hembirekópe g̃uarã. Ñande sítio jw.org-pe oĩ disponívle la Biblia ha umi puvlikasión hetaiterei idiómape. Pe sítiope jatopa avei umi seksión mitãnguéra ha matrimóniope g̃uarã. Avei oĩ peteĩ párte ikatuhápe jalee umi notísia. ¿Jaipurúpa hína ñande sítio predikasiónpe ha jajapo jave ñande estúdio de família?

ÑANDEFIÉL JEHOVÁPE HA JAAPOJA IÑORGANISASIÓN

13. ¿Mbaʼe ojapo vaʼerã entéro kristiáno?

13 Javyʼaiterei ñaime rupi Jehová puévlope ha jaikuaa haguére umi mbaʼe haʼe ojeruréva ñandehegui. Ñande ningo jaikuaáma mbaʼépa Ñandejára oguerohory, upévare ñaneñeʼẽrendu vaʼerã chupe ha jajapo iporãva. Oĩramo jepe heta persóna hembiapo vaíva, Jehová oipota ñanediferénte. Haʼe heʼi: “Pemboykete umi mbaʼe ivaíva, penembojeguaru vaʼerã umíva” (Sal. 97:10, TNM). Arakaʼeve ndajajoguaséi “umi heʼívape oĩ porãha pe oĩ vaíva, ha oĩ vaiha umi mbaʼe iporãva” (Is. 5:20, TNM). Ñande ñambovyʼase Ñandejárape, upévare jadesidi ñanepotĩtaha opa mbaʼépe (1 Cor. 6:9-11). Jahayhu rupi Jehovápe ha ñaneñeʼẽrenduségui chupe, jajapo haʼe heʼíva ñande rogapýpe, kongregasiónpe, ñande traváhope, eskuélape ha opa hendápe (Prov. 15:3). Jahechamína koʼág̃a mbaʼéicha javépa ikatu jahechauka ñaneñeʼẽrenduha Ñandejárape.

14. ¿Mbaʼéichapa sy ha túa ohechauka vaʼerã iñeʼẽrenduha Jehovápe?

14 Ñamongakuaa lája ñane família. La Biblia rupive, Jehová omboʼe tuakuérape mbaʼéichapa omongakuaa vaʼerã ifamíliape. Umi kristiáno oñatende vaʼerã ani hag̃ua ova hesekuéra ko múndo opensa lája (Efes. 2:2). Por ehémplo oĩ lugár umi kuimbaʼe opensaha kuñanguéra la omboʼe vaʼerã umi mitãme. Péro la Biblia heʼi porã túa ha sy ojapo vaʼerãha upéva (Efes. 6:4). Tuakuéra ohayhúva Jehovápe oñehaʼã ikatu hag̃uáicha ifamília oiko Jehová amígoramo, Samuel haʼe haguéicha (1 Sam. 3:19).

15. ¿Mbaʼéichapa jahechauka ñandefielha Jehovápe jadesidi jave umi mbaʼe iñimportánteva?

15 Jadesidíta jave. Jadesidíta jave umi mbaʼe iñimportánteva jahecha vaʼerã mbaʼépa opensa Jehová. Péicha jajapóramo jahechaukáta ñandefielha chupe. La Biblia ha iñorganisasión ñanepytyvõkuaa jadesidi porã hag̃ua. Koʼág̃arupi oĩ sy ha túa ombaʼapóva ótro tetãme ha upéi ou ifamília. Péro odesidi omondo ipaíspe pe mitã onase ramóvape, ikatu hag̃uáicha ihentekuéra omongakuaa chupe. Péicha pe sy ha túa opytánte osegi hag̃ua ombaʼapo ha oganave pláta. Añetehápe  ko situasiónpe tuakuéra odesidi vaʼerã, péro oñeporandu vaʼerã mbaʼépa Jehová opensa pe odesidívare (elee Romanos 14:12). Iporã jahecha raẽ mbaʼépa heʼi la Biblia jadesidi mboyve peteĩ mbaʼe iñimportánteva oafektátava ñane famíliape térã ñande traváho. Jaikuaaháicha, ñande ndaikatúi jadesidi porã ñandejehegui reínte, ñaikotevẽterei Ñande Ru yvagapeguáre (Jer. 10:23).

16. ¿Mbaʼépa tekotevẽ kuri odesidi peteĩ sy onasérõ guare imemby, ha mbaʼépa oipytyvõ chupe odesidi porã hag̃ua?

16 Peteĩ paréha ova rire ótro tetãme, ou ifamília hikuái upépe. Upémarõ haʼekuéra odesidi omondotaha pe mitãme oiko hag̃ua ijavuelokuérandi. Upe tiémpope, pe kuñakarai oñepyrũ ostudia la Biblia, ha oñemeʼẽ enkuénta haʼe orekoha pe rresponsavilida omboʼévo ifamíliape Jehová rape (Sal. 127:3; Prov. 22:6). Ko sy oñemboʼe Jehovápe oaprende haguéicha la Bíbliape, ha ojerure chupe ajúda ikatu hag̃uáicha odesidi porã (Sal. 62:7, 8). Avei oñeʼẽ pe ermána omboʼévandi chupe la Biblia, ha ambue ermanokuéra ikongregasiongua ndive. Péro iñamígo ha iparientekuéra ojopy chupe omondo hag̃ua pe mitã ijavuelokuéra ndive, upéicharõ jepe haʼe odesidi ndojapomoʼãiha upéva. Iména ohecharamoiterei mbaʼeichaitépa umi ermáno kongregasiongua oipytyvõ hembireko ha ifamíliape, upévare oñepyrũ avei ostudia la Biblia ha oho rreunionhápe. ¡Mbaʼeichaitépa oiméne ovyʼa raʼe pe sy ohechávo Jehová ombohovái hague iñorasión!

17. ¿Mbaʼe instruksiónpa iporã jasegi jastudia jave la Biblia peteĩ persónandi?

17 Jasegi jave umi instruksión. Jasegíramo umi instruksión oúva Ñandejára organisasióngui, jahechaukáta ñandefielha chupe. Por ehémplo, ñañepyrũramo jastudia peteĩ persónandi pe lívro ¿Mbaʼépa ñanemboʼe la Biblia?, iporãta káda estúdio rire ñamboʼérõ mbykymi chupe Jehová organisasióngui. Upearã ikatu jaipuru pe vidéo ¿Mbaʼéichapa rojapo ore rreunionkuéra?, ha pe folléto ¿Mávapa umi ojapóva Jehová rembipota koʼág̃arupi? Upéi, jastudiapaite rire pe lívro, iporãta ñaipytyvõramo chupe imbareteve hag̃ua ijerovia. Upearã jastudia vaʼerã hendive pe lívro ‘Jaikókena Ñandejára mborayhúpe’, ojevautisámarõ jepe (Col. 2:7). ¿Jasegípa hína koʼã instruksión oñemeʼẽva ñandéve?

18, 19. ¿Mbaʼérepa jaagradese vaʼerã Jehovápe?

18 Ajépa hetaite mbaʼére jaagradese vaʼerã Jehovápe. “Haʼe rupi ningo jaikove, jakuʼe ha jaiko” (Hech. 17:27, 28). Avei omeʼẽ ñandéve Iñeʼẽ, la Biblia. Ha ojapo haguéicha umi kristiáno Tesalonicagua, ñamombaʼeterei ko rregálo porãite jahechakuaágui haʼeha peteĩ mensáhe oúva Ñandejáragui (1 Tes. 2:13).

19 La Biblia ñanepytyvõ ñañemoag̃ui hag̃ua Jehováre, ha péicha haʼe oñemoag̃ui avei ñanderehe (Sant. 4:8). Jaagradeseterei chupe opermiti haguére ñaime iñorganisasiónpe. Katuete ñañeñandu pe salmísta oñeñandu haguéicha. Haʼe heʼi: “Peagradese Jehovápe pórke haʼe ivuenoiterei. Haʼe siémpre oporohayhu ha ndofallái avavéndi” (Sal. 136:1, TNM). Salmo 136-pe, 26 vése voi ojerrepeti pe fráse “haʼe siémpre oporohayhu ha ndofallái avavéndi”. Upéicharõ, ñandefiélramo Jehovápe ha jajapóramo iñorganisasión heʼíva, jaikóta opa ára g̃uarã ha haʼe siémpre oĩta ñande ykére.