Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Mayo de 2017

“¿Ndépa cherayhuve koʼã mbaʼégui?”

“¿Ndépa cherayhuve koʼã mbaʼégui?”

“Simón Juan raʼy, ¿ndépa cherayhuve koʼã mbaʼégui?” (JUAN 21:15).

PURAHÉI: 128, 45

1, 2. ¿Mbaʼépa oaprende vaʼekue Pedro?

PETEĨ pyharépe, siete Jesús disípulo opeska hína mar de Galiléape, péro nonohẽi mbaʼevete. Upéi koʼẽmba rire, Jesús omaña hína hesekuéra pe y kósta guive. Upérõ g̃uarã Jesús orresusitáma kuri. Haʼe heʼi idisipulokuérape: “Peitýna pende rred pe kanóa derécha gotyo ha penohẽta”. Haʼekuéra ojapo la Jesús heʼíva, ha “ndaikatuvéima oguenohẽ hetaitereígui umi pira” (Juan 21:1-6).

2 Jesús oservi idisipulokuérape pira ha pan, ha péicha omorambosa chupekuéra. Upéi ojere oporandu Simón Pédrope: “Simón Juan raʼy, ¿ndépa cherayhuve koʼã mbaʼégui?”. Jesús oikuaa porã Pédrope ogustaitereiha pe péska. Upévare oikuaase oimépa Pedro ohayhuve pe péska, térãpa chupe ha umi mbaʼe haʼe omboʼéva. Pedro orresponde Jesúspe: “Si che Ruvicha, nde reikuaa rohayhuha” (Juan 21:15). Pedro oaprende vaʼekue peteĩ mbaʼe iñimportantetereíva: ohayhu vaʼerãha Jesúspe opa mbaʼe ári. Upe día guive haʼe ohechauka ohayhuha  Jesúspe, pórke ombaʼapo jejopy predikasiónpe ha oñemeʼẽmbaite pe kongregasión rehehápe.

3. ¿Mbaʼérepa entéro jaservíva Jehovápe tekotevẽ ñañatende porã?

3 ¿Mbaʼépa ikatu ñaaprende Jesús heʼi vaʼekuégui Pédrope? Tekotevẽha ñañatende porã ani hag̃ua jaju ndajahayhuvéi Jesúspe. Jesús oikuaa vaʼekue ko múndope ñambohovaitaha heta situasión ijetuʼúva ha ñandepyʼapýva. Haʼe omoĩ vaʼekue pe ehémplo oñeʼẽva peteĩ chokokuére, ha heʼi oĩha umi “ohendúva pe marandu Rréino rehegua” ha ñepyrũrã ikyreʼỹha. Péro upéi ou “ojepyʼapyeterei hemikotevẽ ko mundopeguáre ha pe platarayhu ombotavy” chupekuéra ha ojahoʼipa “Ñandejára ñeʼẽ”, ha upevakuére naikyreʼỹvéi (Mat. 13:19-22; Mar. 4:19). Jaikuaaháicha, káda día oĩ heta mbaʼe ñandepyʼapýva. Péro ñañatende vaʼerã ani hag̃ua umíva káusare jaju ñambotapykue Jehová servísio. Jesús heʼi vaʼekue idisipulokuérape: “Peñatendéke ani hag̃ua arakaʼeve peñekevranta peikógui pekarurasa, pemokõrasa térã pejepyʼapyetereígui pene remikotevẽre” (Luc. 21:34).

4. ¿Mbaʼéichapa ikatu jaikuaa jahayhúpa hína Jesúspe? (Ehecha pe taʼanga oĩva iñepyrũme).

4 Pedro ojapo haguéicha, ñande avei ikatu jahechauka jahayhuha Jesúspe ñamotenondévo pe predikasión. ¿Mbaʼéichapa ikatu jaikuaa jajapópa hína upéva? Iporã ñañeporandumi: “¿Mbaʼépa la ahayhuvéva térã iñimportantevéva chéve g̃uarã? ¿Avyʼápa aservi rupi Jehovápe, térãpa avyʼave ajapóramo ótra kósa?”. Ñarresponde hag̃ua koʼã porandu, jahechami mbohapy mbaʼe ikatúva omokangy pe mborayhu ñañandúva Jesúsre. Umíva apytépe pe traváho, umi vyʼarã ha umi mbaʼerepy.

ANÍKENA ÑAMOTENONDE PE TRAVÁHO

5. ¿Mbaʼe rresponsavilidápa Jehová omeʼẽ umi omoakãvape hogapy?

5 Pedro ningo ndohói vaʼekue opeska ojediverti hag̃uánte, síno ojapo upéva omoĩ hag̃ua hogayguakuérape hemikotevẽ. Ñane tiémpope avei, Jehová omeʼẽ umi omoakãvape hogapy pe rresponsavilida omantene hag̃ua ifamíliape (1 Tim. 5:8). Upearã ombaʼapo jejopy vaʼerã hikuái. Péro jaikógui koʼã ára pahápe umi traváho ijetuʼueterei ha ñandepyʼapy.

6. ¿Mbaʼépa ohasa jepi umi ombaʼapóva?

6 Pyʼỹinte ningo oĩ heta ombaʼaposéva, péro la traváho oĩva ndohupytýi enterovépe. Upéicha rupi umi hénte ojapo opa ikatúva okonsegi hag̃ua traváho. Avei oĩ ombaʼapóva óra éxtra, ojepagaʼíramo jepe chupekuéra. Umi emprésa oñehaʼã oprodusi hetave, saʼivéramo jepe koʼág̃a la ipersonalkuéra. Upévare umi ombaʼapóva ou ikaneʼõiterei, ojestresa ha hasypa. Heta avei oĩ okyhyjéva operdérõ g̃uarã itraváho, upévare ojapómante opa mbaʼe ojeruréva chupekuéra ipatrón.

7, 8. a) ¿Mávapepa ñamombaʼeve vaʼerã? b) ¿Mbaʼépa ojapo peteĩ ermáno Tailandiagua, ha mbaʼépa ohupyty?

7 Ñande jaservíva Jehovápe jaikuaa siémpre ñamombaʼeve vaʼerãha chupe, ótrope rangue, umíva apytépe ñane patrón (Luc. 10:27). Ñande traváho ñanepytyvõ jahupyty hag̃ua ñane remikotevẽ ha jaapoja hag̃ua pe predikasión. Péro nañañatendéiramo, ikatu hína ñande traváho káusare ndajaserviporãvéi Ñandejárape. Jahechamína mbaʼépa ikatu ñaaprende peteĩ ermánogui oikóva Tailándiape. Haʼe omombeʼu: “Chegustaiterei vaʼekue la che traváho, pórke upépe amyatyrõ umi komputadóra. Péro upéva hoʼueterei chehegui  che tiémpo, upéicha rupi ndaserviporãvéi Jehovápe. Upéi añemeʼẽ enkuénta tekotevẽha akambia che traváho ikatu hag̃uáicha amotenonde Ñandejára Rréino”. ¿Mbaʼépa ojapo vaʼekue ko ermáno?

8 Haʼe heʼi: “Un áñorupi apensa mbaʼépa okonvenive chéve ajapo, ha adesidi avendetaha eládo kállere. Ñepyrurã ndohupytýi chéve la aganáva ha upéva chemokangy. Ajotopa jave umi che kompañerokue ndive, oñembohory cherehe hikuái ha oporandu mbaʼérepa apensa iporãveha avende eládo amyatyrõ rangue komputadóra áire akondisionádo guýpe. Ajerure Jehovápe tachepytyvõ agueropuʼaka hag̃ua koʼã mbaʼe, péicha ikatúta chetiempove iservísiope. Upe riremínte oho porãmiéma chéve. Aikuaavéma mbaʼépa ogusta che klientekuérape ha chevakeanovéma la eládo apópe. Upe guive, avendepaite la eládo ajapóva káda día. Añetehápe koʼág̃a aganave ymave guarégui, hiʼarive amyatyrõrõ guare komputadóra chekaneʼõháre aiko ha ajepyʼapyeterei. Péro koʼág̃a avyʼave, ha la iñimportantevéva añemoag̃uive Jehováre” (elee Mateo 5:3, 6).

9. ¿Mbaʼéichapa ikatu jaikuaa noiméipa ñamotenonde hína ñande traváho?

9 Jehová ovyʼa ñambaʼapo jejopýramo, ha upéva ñanemoñeñandu porãiterei (Prov. 12:14). Péro ñañatende vaʼerã ani hag̃ua jaju ñamotenondeve ñande traváho Jehovápe rangue. Jesús heʼi vaʼekue: “Pemotenonde meméke Ñandejára Rréino ha ihustísia, ha opa koʼã mbaʼe oñemeʼẽta avei peẽme” (Mat. 6:33). Péro, ¿mbaʼéichapa ikatu jaikuaa noiméipa ñamotenondeterei hína ñande traváho? Iporãta ñañeporandúramo: “¿Chekyreʼỹpa che travahohápe, péro chekaigue apredika ha aha hag̃ua rreunionhápe?”. Jajepyʼamongetáramo ko porandúre, jahechakuaáta mbaʼépa añetehápe jahayhu.

10. ¿Mbaʼépa omboʼe vaʼekue Jesús ñamotenonde vaʼerãha?

10 Jesús ñanemboʼe vaʼekue mbaʼépa iporã ñamotenonde. Peteĩ jey, haʼe oho kuri ovisita María ha Mártape. Marta oñepyrũ oñekosina imbohupápe g̃uarã. Upe aja katu María oguapy Jesús ypýpe ha ojapysaka umi mbaʼe omboʼévare. Upévare Marta ojeplagea iñermána noipytyvõi haguére chupe. Péro Jesús heʼi Mártape: “María [...] oiporavo pe iporãvéva ha ndojepeʼamoʼãi chugui” (Luc. 10:38-42). Péicha Jesús omboʼe peteĩ mbaʼe iñimportantetereíva. Haʼe heʼívo María oiporavo hague “pe iporãvéva”, ñanemboʼe siémpre ñamotenonde vaʼerãha ñane amista Jehovándi, ñamotenonde rangue ñane remikotevẽ. Péichamante jahechaukáta jahayhuha Jesúspe.

ANÍKENA ÑAMOTENONDE UMI VYʼARÃ

11. Asegún la Biblia, ¿iporãpa japytuʼu?

11 Entéronte ñanerembiapo heta, upévare tekotevẽ jepi japytuʼu. La Biblia heʼi: “Ahechakuaa ndaiporiha ótra kósa iporãvéva kóvagui: jakaru, jaʼu vevída ha jadisfruta ñande travahokuégui” (Ecl. 2:24, TNM). Jesús ohechakuaa vaʼekue idisipulokuéra tekotevẽha opytuʼu. Por ehémplo, peteĩ jey heta opredika rire hikuái, Jesús heʼi chupekuéra: “Jahána ndaiporihápe avave pepytuʼumi hag̃ua” (Mar. 6:31, 32).

12. ¿Mbaʼéichapa jahecha vaʼerã umi vyʼarã? Emoĩ peteĩ ehémplo.

12 Iporã ningo ñamboyke tiémpo jajediverti ha jahasa porã hag̃ua. Péro ñañatende vaʼerã ani hag̃ua jaju ñamotenonde koʼã mbaʼe. Síglo primérope, oĩ vaʼekue heta  opensa vaʼekue kóicha: “Jakaru ha ñamokõ katu, cháke koʼẽrõ ñamanóta” (1 Cor. 15:32). Koʼág̃arupi avei heta persóna opensa upéicha. Por ehémplo, peteĩ mitãrusu oikóva Európape oñepyrũ vaʼekue oho meme rreunionhápe, péro upéi ndohovéi pórke omotenonde umi vyʼarã. Tiémpo rire, oñemeʼẽ enkuénta upéva káusare oike hague heta akãrasýpe. Upéi, oñepyrũ jey ostudia la Biblia, ha kon el tiémpo osẽma opredika. Ojevautisa rire, haʼe heʼi: “Ambyasyeterei ningo ymavéma ndahechakuaái hague Jehová servísio la ñanembovyʼaveha, ndahaʼéi umi diversión oĩva ko múndope”.

13. a) ¿Mbaʼérepa naiporãi ñamotenonde umi diversión? Emoĩ peteĩ ehémplo. b) ¿Mbaʼéichapa ikatu jaikuaa noiméipa ñamotenonde hína umi vyʼarã?

13 Entéro ñamboyke tiémpo japytuʼu hag̃ua, jaikuaágui péichamante ikatutaha ñanembarete jey. Péro, ¿mboy tiémpopa iporã jaipuru jajediverti hag̃ua? Jaikuaa hag̃ua upéva, ñapensami ko mbaʼére. Hetápe ningo ogustaiterei umi mbaʼe heʼẽ. Péro ñande jaikuaa jaʼuetereíramo koʼã mbaʼe, katuete ñanembohasytaha. Upéicha rupi jaʼu tembiʼu iñaliméntova ikatu hag̃uáicha ñaneresãi. Péicha avei, jaipurúramo heta tiémpo jajediverti hag̃ua, ikatu hína mbeguekatúpe ñañemomombyry Jehovágui. ¿Mbaʼépa ñanepytyvõta jaikuaa hag̃ua noiméipa ñamotenonde hína umi vyʼarã? Por ehémplo, ikatu ñaanota mboy órapa jaipuru káda semána japredika hag̃ua, jaha hag̃ua rreunionhápe, jajapo hag̃ua ñande estúdio personál ha ñande estúdio de família. Ikatu avei ñaanota mboy tiémpopa jaipuru jajapo hag̃ua depórte, jahecha hag̃ua téle, térã jahuga hag̃ua umi videohuégo. Upéi, iporãta ñakomparáramo mbaʼépa la hoʼuvéva ñane tiémpo. Jahechakuaáramo tekotevẽha ñakambia, pyaʼe jajapo vaʼerã upéva (elee Efesios 5:15, 16).

14. ¿Mbaʼépa ñanepytyvõta jaiporavo porã hag̃ua umi vyʼarã?

14 Jehová oheja káda uno odesidi mbaʼéichapa ojedivertíta, ha umi omoakãva hogapy ikatu oiporavo umi vyʼarã ifamiliakuérape g̃uarã. La Biblia rupive Jehová omeʼẽ ñandéve heta konsého ohechaukáva mbaʼéichapa haʼe opensa. Koʼã konsého ñanepytyvõ jadesidi porã hag̃ua. * Umi vyʼarã iporãva haʼe “peteĩ rregálo oúva Ñandejáragui” (Ecl. 3:12, 13, TNM). Añetehápe naentéroi odesidi peteĩchapa mbaʼéichapa ojedivertíta (Gál. 6:4, 5). Péro tahaʼe haʼéva pe jaiporavóva, tekotevẽ ñañatende porã. Jesús heʼi vaʼekue: “Cháke ne mbaʼerepy oĩháme, upépe avei oĩta ne korasõ” (Mat. 6:21). Jahayhúramo Jesúspe, jahechaukáta pe Rréino iñimportanteveha ñandéve g̃uarã. ¿Mbaʼéichapa ojekuaáta upéva ñanderehe? Umi mbaʼe ñapensávare, jaʼévare ha jajapóvare (Filip. 1:9, 10).

ANÍKENA ÑAMOTENONDE UMI MBAʼEREPY

15, 16. a) ¿Mbaʼéichapa umi mbaʼerepy ikatu ñanemoñuhã? b) ¿Mbaʼe konséhopa omeʼẽ Jesús?

15 Heta persóna oipotaiterei umi mbaʼe osẽ ramovéva, tahaʼe ao, komputadóra, selulár ha umícha. Upévare oñehaʼãmbaite okonsegi hag̃ua umíva. Koʼãichagua héntepe pe pláta ha umi mbaʼerepy la iñimportantevéva. Péro, ¿mbaʼépa omotenonde vaʼerã Jehová siervokuéra? Iporã ñañeporandumi koʼã mbaʼe: “¿Aikópa apensaiterei umi áuto último modélore ha umi ao oĩvare a la móda, térãpa  aipuruve che tiémpo ajeprepara hag̃ua rreunionrã? ¿Cherembiapoitereípa ha upévare saʼíma chetiémpo añemboʼe ha alee hag̃ua la Biblia?”. Nañañatendéiramo, ikatu hína jahayhuve umi mbaʼerepy, jahayhu rangue Jesúspe. Upévare iporã jajepyʼamongeta haʼe heʼi vaʼekuére: “Peñatende porãke ha ani pendetaryrýi mbaʼevére” (Luc. 12:15). ¿Mbaʼérepa Jesús heʼi vaʼekue upéva?

16 Jesús heʼi vaʼekue: “Avave ndaikatúi ombaʼapo tembiguáiramo mokõi patrónpe g̃uarã”. Upéi heʼi avei: “Peẽ ndaikatúi peiko Ñandejára rembiguáirõ ha avei peiko pláta rapykuéri”. Jaikóramo umi mbaʼerepy rapykuéri, ndaikatumoʼãi jaservi Jehovápe ñande pyʼaite guive. ¿Mbaʼérepa? Pórke pe persóna ojapóva upéva “peteĩme ohayhúta ha pe ótrore ndaijaʼemoʼãi”, térã “peteĩre ojepokuaavéta ha pe ótrope omboykéta” (Mat. 6:24). Ñande ningo ñaneimperfékto, upéicha rupi ñañehaʼã vaʼerã ñamboyke “ñande rete rembipota vai”. Upéva heʼise avei ndajaikói vaʼerãha umi mbaʼerepy rapykuéri (Efes. 2:3).

17. a) ¿Mbaʼérepa oĩ heta ndohecháiva hekópe porã umi mbaʼerepy? b) ¿Mbaʼépa ñanepytyvõta ani hag̃ua jahayhu umi mbaʼerepy?

17 Heta persóna omotenonde rupi umi mbaʼe oipotáva ha chupekuéra ogustáva, ndohechái hekópe porã umi mbaʼerepy (elee 1 Corintios 2:14). Avei ndohechakuaái mbaʼépa iporã ha mbaʼépa ivai (Heb. 5:11-14). Koʼãichagua persóna kon el tiémpo oipota potave umi mbaʼerepy, ha amáske oreko noñekontentái (Ecl. 5:10). Péro oĩ hína peteĩ mbaʼe ikatúva jajapo ani hag̃ua ova ñanderehe umi hénte opensa lája. Por ehémplo, jalee meméramo la Biblia ñanepytyvõta ani hag̃ua jahayhu umi mbaʼerepy (1 Ped. 2:2). Jesús ojepyʼamongeta vaʼekue Jehová arandúre, upéicha rupi omboyke umi tentasión omoĩ vaʼekue chupe Satanás (Mat. 4:8-10). Ani hag̃ua jaju ñamotenonde umi mbaʼerepy, jasegi vaʼerã umi konsého omeʼẽva ñandéve Jehová. Péicha jajapóramo, jahechaukáta jahayhuveha Jesúspe jahayhu rangue umi mbaʼerepy.

¿Mbaʼépa iñimportanteve ndéve g̃uarã? (Ehecha párrafo 18)

18. ¿Mbaʼépa nde redesidi rejapotaha?

18 Jesús oporandu vaʼekue Pédrope: “¿Ndépa cherayhuve koʼã mbaʼégui?”. Upérõ haʼe omboʼese chupe siémpre omotenonde vaʼerãha Jehová servísio. Pedro réra heʼise “Ita Pedáso”. Chupe ningo mbaʼeve ndojokói ojapo hag̃ua Ñandejára rembipota (Hech. 4:5-20). Ñande avei jaipota imbarete pe mborayhu ñañandúva Jesús rehe. Upévare, ñañatende vaʼerã ani hag̃ua ñamotenonde pe traváho, umi vyʼarã ha umi mbaʼerepy. Jajapóramo upéicha, ikatúta jaʼe Pedro heʼi haguéicha: “Che Ruvicha, nde reikuaa rohayhuha”.

^ párr. 14 Ehecha pe artíkulo hérava “Jaiporavo porãpa umi vyʼarã?”, osẽ vaʼekue Ñemañaha 15 de octubre de 2011-pe, páhina 9-12, párrafo 6-15.