Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Mayo de 2017

¿Javyʼavétapa jaikóramo sensillove?

¿Javyʼavétapa jaikóramo sensillove?

DANIEL HA MÍRIAM omenda kuri septiémbrepe áño 2000-pe, ha oiko porãiterei hikuái Barcelónape, España. Daniel heʼi: “Mokõivéante rogana porã, upévare ikatu roho umi restauránte de lúhope, roviaha ótro tetãme ha romonde ao porã ha hepýva. Avei rosẽ meme predikasiónpe”. Péro upéi okambia la isituasionkuéra.

Áño 2006-pe Daniel oho peteĩ asambleahápe, upépe ohendu peteĩ diskúrso opokoitereíva hese. Pe diskursánte oporandu: “¿Ñaimépa dispuésto jajapóvo ikatúva guive ñaipytyvõ hag̃ua umi héntepe ohupyty hag̃ua pe jeikove opaveʼỹva? Koʼã hénte ningo haʼete ku ojegueraháva hína ‘ojejuka hag̃ua’” (Prov. 24:11, TNM). Pe diskúrsope heʼi káda uno jarekoha pe rresponsavilida ñamombeʼúvo umi héntepe pe mensáhe oĩva la Bíbliape, pórke hekovekuéra odepende upévare (Hech. 20:26, 27). Daniel heʼi: “Haʼeténte voi Jehová mbaʼe oñeʼẽva chéve”. Pe diskúrsope heʼi avei javyʼaitevetaha ñambaʼapovéramo Jehová servísiope. Daniel oikuaa porã siertoha upéva, pórke Míriam ojapóma kuri oikóvo iprekursorádo ha ovyʼaiterei.

Daniel heʼi: “Ahechakuaa tekotevẽha ajapo tuicha kámbio che rekovépe”. Upe guive Daniel saʼivéma ombaʼapo, omoñepyrũ iprekursorádo ha opensáma voi mbaʼeichaitépa ovyʼáta haʼe ha Míriam ohóramo oservi oĩvehápe nesesida.

RORRESIVI PETEĨ NOTÍSIA IPORÃITEREÍVA

Mayo 2007-pe Daniel ha Míriam oheja itraváho ha ova Panamápe, peteĩ tetã oikuaámava voi hikuái. Haʼekuéra opredika vaʼerã Bocas del Tórope, haʼéva unas kuánta ísla oĩva mar del Caríbepe. La majoría oikóva umi íslare ningo indíhena oñehenóiva ngabe. Daniel ha Míriam oaorra kuri ova mboyve, ha okalkula ikatutaha opyta Panamápe 8 méserupi.

Haʼekuéra oipuru várko ha visikléta oviaha hag̃ua umi íslape. Koʼag̃aite peve imanduʼa gueteri hikuái primera ves oviahárõ guare visikléta ári 32 kilómetrorupi umi sérrore hakuve jave. Upérõ Daniel haimete odesmaja ikaneʼõitereígui. Péro umi família ngabe otopáva ohohárupi ningo horyeterei, koʼýte Daniel ha Míriam oñepyrũmarõ heʼi algúna palávra iñidiomakuérape. Un tiémpo riremi orekóma hikuái 23 estúdio.

¿Mbaʼépa oiko raʼe opa potámarõ chuguikuéra ipláta? Daniel heʼi: “Oreresay pororopa ningo ropensa haguérente voi roho jeýma vaʼerãha Espáñape. Rombyasy rohejáta haguére ore estudiantekuérape”. Péro un mes rire orresivi hikuái peteĩ notísia iporãitereíva. Míriam heʼi: “Roñeinvita roservi hag̃ua kómo prekursór espesiál. Rovyʼaiterei ikatúta haguére ropyta ore asignasiónpe”.

ROVYʼAITEREI

Heta kámbio ningo oĩ Ñandejára organisasiónpe, upévare áño 2015-pe ojejerure Daniel ha Míriampe oheja hag̃ua iprekursorádo espesiál. ¿Mbaʼépa ojapo hikuái koʼág̃a? Haʼekuéra ojerovia pe promésa oĩvare Salmo 37:5-pe: “Eheja Jehová pópe opa mbaʼe redesidítava. Ejerovia hese ha haʼe katuete nepytyvõta” (TNM). Daniel ha Míriam otopa peteĩ traváho oipytyvõva chupekuéra osegi hag̃ua ojapo iprekursorádo rregulár. Koʼág̃a oservi hikuái peteĩ kongregasión oĩva Veráguaspe, Panamá.

Daniel heʼi: “Rosẽ mboyve Espáñagui ndoroikuaái kuri ikatútapa roiko sensillomínte. Péro koʼág̃a rohechakuaa ndofaltaiha oréve mbaʼeve iñimportánteva”. ¿Mbaʼépa la ombovyʼavéva Daniel ha Míriampe? Haʼekuéra heʼi: “Roipytyvõ ningo umi persóna iñumíldevape oikuaa hag̃ua Jehovápe, añetehápe ndaipóri mbaʼeve orembovyʼave vaʼerã upévagui”.