UNOS kuánto díama oky ha yvytu atã, péro pe lunes 1 de septiembre de 1919, ikoʼẽ kuarahy porã ha haku lénto. Upe kaʼarúpe haimete 1.000 persóna oñerreuni peteĩ asamblearã peteĩ lugár oĩvape Cedar Point, Ohíope (Estados Unidos). Upe lugár oreko kapasida 2.500 persónape g̃uarã. Pe lunes kaʼarupytũ og̃uahẽve 2.000 persónarupi várkope, trénpe ha áutope. Pe martes katu hetaitereivéntema la hénte, ha ndaijapavéima pe lugárpe. Upémarõ pe asambléa ojejapóntema okápe umi yvyra guýpe.

Umi yvyra guýpe pe sómbra para para ojekuaa umi kuimbaʼe tráhere. Peteĩ yvytu vevyimi katu ou pe lágo Érieguio ha oipeju umi plúma ombojeguáva umi kuña sombréro. Peteĩ ermáno heʼi: “Pe asambléa haʼete voi peteĩ paraíso, pórke pe lugár itrankiloiterei”.

Ndahaʼéi voi iporã ha itrankílonteva pe lugár, síno entéro persóna oĩva upe asambleahápe ovyʼaiterei, ha upéva ojekuaa hovarekuéra. Peteĩ diário upe siudapegua heʼi: “Haʼetéramo jepe umi hénte irrelihiosoitereíva, entéronte ovyʼa ha horyjoa”. Upe okasión omokyreʼỹeterei umi Estudiánte de la Bíbliape, pórke ohasa ramoite hikuái heta mbaʼe ijetuʼúva. Por ehémplo, hetápe ojepersegi pe gérra aja, oĩ kuri provléma gráve kongregasiónpe, oñemboty Betel de Brooklyn, ha heta ermánope oñemoinge kárselpe omotenonde haguére Ñandejára Rréino. Umíva apytépe oĩ kuri 8 ermáno omoakãva umi Estudiánte de la Bíbliape, ha oñekondena chupekuéra a 20 áño de kársel. *

Heta Estudiánte de la Biblia oñedesanima upérõ guare, ha upévare ndopredikavéi. Oĩ katu umi ojapóva opa ikatúva ombohovái hag̃ua pe oposisión, ha osegi opredika. Por ehémplo, peteĩ investigadór omombeʼu heta oñeamenasa hague umi Estudiánte de la Bíbliape, péro haʼe ointerrogárõ guare unos kuántope, haʼekuéra heʼi “osegi vaʼerãha omombeʼu pe marandu porã og̃uahẽ meve pe fin”.

Umi tiémpo ijetuʼuetévape, umi Estudiánte de la Biblia iñeʼẽrendúva “osegi umi instruksión oúva Jesúsgui, [...] ha oñemboʼe meme ojerure hag̃ua gía pe Túape”. Koʼág̃a haʼekuéra oaprovecha pe oportunida oñerreuni jey hag̃ua pe asambléape Cedar Póintpe. Peteĩ ermána omombeʼu heta ermáno oikuaase hague mbaʼéichapa ‘oñepyrũ jeýta ombaʼapo hikuái kongregasiónpe ha opredika jey’. Haʼekuéra ikyreʼỹeterei jey ombaʼapo hag̃ua Jehovápe g̃uarã.

 PETEĨ MBAʼE PYAHU IDEPROVÉCHOTAVA

Pe semána pukukue, entéronte oikuaasejoa mbaʼépa heʼise umi létra “GA” oĩva pe prográma de asambléare, umi tarhéta de vienvenídare, ha heta letréro oĩvare pe lugár de asambléape. Pe viernes oñembohéra “Día de los Colaboradores”, ha ermáno Rutherford omyesakã mbaʼépa heʼise “GA” umi 6.000 persónape. “GA” haʼe kuri umi létra omoñepyrũva peteĩ rrevísta pyahu réra: The Golden Age (La Edad de Oro). Ko rrevísta ojeprepara ojepuru hag̃ua predikasiónpe. *

Oñeʼẽvo umi kristiáno unhídore, ermáno Rutherford heʼi: “Ojerovia rupi, ohechakuaa hikuái pe Mesías goviérno. [...] Haʼekuéra oanunsia ko yvy tuichakuére pe Edad de Oro, ha upe tembiapo haʼe peteĩ priviléhio ha rresponsavilida tuichaitereíva Ñandejára omeʼẽva chupekuéra”.

Pe rrevísta La Edad de Oro apére heʼi pype oñemombeʼuha pe “añetegua, omeʼẽ esperánsa ha segurida” umi héntepe. Ko rrevísta ojepuru oñemoñepyrũ hag̃ua peteĩ método pyahu de predikasión: oñekuaveʼẽ suskripsión de kása en kása. Oñeporandúrõ guare umi oĩvape pe asambleahápe mboýpa opartisipase, umi 6.000 persóna oñemboʼy. Upe rire, “entéro osegíva Jesús pypore kyreʼỹme opurahéi peteĩ kántiko hérava ‘Ore Ruvicha, embou oréve pe lus ha pe añetegua’”. Peteĩ ermáno hérava Milton Morris omombeʼu: “Hatãiterei ropurahéi, haʼete voi umi yvyramáta ovavapáva”.

Umi oĩva pe asambléape raẽvete ojesuskrivise pe rrevístape, upévare opa rire pe sesión, órare oforma fíla hikuái upearã. Peteĩ ermána hérava Mabel Philbrick heʼi: “Rovyʼaiterei ningo roikuaávo roguereko jeymaha traváho rojapo vaʼerã”.

“MÁVAPEPA OÑEMEʼẼ KO TEMBIAPO”

Haimete 7.000 Estudiánte de la Biblia ojeprepara opredika hag̃ua. Pe óha hérava Organization Method (Método de organización) ha pe folléto To Whom the Work Is Entrusted (Mávapepa oñemeʼẽ ko tembiapo) omombeʼu pe séde mundiálpe oñeformataha peteĩ Departaménto de Servísio odirihi hag̃ua pe predikasión. Káda kongregasiónpe oĩta peteĩ Komite de Servísio ha oñenombráta peteĩ direktór oikuaaukátava ermanokuérape umi instruksión. Pe território ojedividíta diferénte seksiónpe, ha káda seksiónpe oĩta 150 a 200 ógarupi. Avei káda jueves pyhare ojejapóta pe Aty Ñanemboʼéva Japredika Hag̃ua, oñemombeʼu hag̃ua umi experiénsia ha oñentrega hag̃ua umi infórme.

Herman Philbrick heʼi: “Pe asambléa rire roho ore rógape ha roñepyrũ rojeprepara roikuaveʼẽ hag̃ua pe suskripsión”. Opárupi rojuhu umi persóna ohenduséva pe marandu porã. Ermána Beulah Covey omombeʼu avei: “Opa rire pe gérra ha heta ojehasa asy rire, umi hénte ohaʼarõitereíma iporãve pe situasión”. Ha Arthur Claus katu oskrivi: “Káda kongregasiónpe umi ermáno ohecharamoiterei mbaʼeichaitépa heta persóna oasepta pe suskripsión”. Dos mésente osẽ ypy guive pe rrevísta La Edad de Oro, ojekolokáma haimete 500.000 ha ojejapo 50.000 suskripsión.

Pe rrevísta Ñemañaha 1 de julio de 1920 osẽ vaʼekue ingléspe, oguenohẽ peteĩ artíkulo hérava “Evangelio del Reino”. Tiémpo rire, ermáno Alexander Macmillan heʼi ko artíkulo omokyreʼỹ hague ermanokuérape “opredika hag̃ua pe marandu porã ko yvy tuichakuére”. Pe artíkulo omokyreʼỹ vaʼekue entéro kristiáno unhídope “opredika hag̃ua opárupi Ñandejára Rréino yvagapegua oñepyrũmbotaitemaha ogoverna ko yvy tuichakuére”. Jaikuaaháicha, umi unhídope la oñenkarga kuri ko tembiapo tuichaitéva. Upéicharõ jepe, koʼág̃arupi hetaiterei persóna omoirũ Cristo ermanokuérape, ha kyreʼỹme opredika hikuái opárupi pe marandu porã, ohaʼarõ aja og̃uahẽ pe edad de oro oĩtava pe Mesías poguýpe.

^ párr. 5 Ehecha lívro Los testigos de Jehová, Proclamadores del Reino de Dios, kapítulo 6, heʼihápe “Un tiempo de prueba (1914-1918)”.

^ párr. 9 Pe rrevísta The Golden Age osẽ castellánope áño 1932-pe, péro oñembohéra Luz y Verdad. Upéi 1938-pe oñembohéra Consolación, ha 1947 guive katu héra ¡Despertad!