Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Mayo de 2016

¿Mbaʼéichapa nde redesidi jepi?

¿Mbaʼéichapa nde redesidi jepi?

“Pesegi vaʼerã pehecha mbaʼépa hína Jehová rembipota.” (EFES. 5:17)

PURAHÉI: 69, 57

1. a) Emombeʼu unos kuánto mandáto oĩva la Bíbliape. b) ¿Mbaʼéichapa ñañevenefisia ñaneñeʼẽrendúramo Jehovápe?

LA Biblia rupive Jehová omeʼẽ ñandéve umi mandáto ohechauka porãva mbaʼépa haʼe oipota jajapo, térã ndoipotái. Por ehémplo, heʼi ñandéve ndovaleiha ñamonda, jakaʼu, jaadora umi imáhen, térã ñanderekovai (1 Cor. 6:9, 10). Ha Ñandejára Raʼy Jesucristo, omeʼẽ vaʼekue avei idisipulokuérape peteĩ mandáto iñimportantetereíva: “Tapeho pemboʼe umi hénte opa tetãyguápe oiko hag̃ua chuguikuéra che disípulo; ha pevautisa Túva, Taʼýra ha espíritu sánto rérape. Ha pemboʼe chupekuéra ojapo hag̃ua opa mbaʼe amanda vaʼekue peẽme. Ha ¡péina!, aiméta penendive opa ára, og̃uahẽ meve huʼãme ko múndo ára paha” (Mat. 28:19, 20). Opa mbaʼe Jehová ha Jesús omandáva ñandéve, katuete ñanevenefisia. Ñandejára Léi ñanemboʼe ñañangareko hag̃ua ñandejehe ha ñane famíliare, ha ñanepytyvõ ikatu hag̃uáicha ñaneresãi ha jaiko vyʼápe. Ha iporãveha katu, jajapóramo opa mbaʼe Jehová omandáva ñandéve, umíva apytépe japredika pe marandu porã, haʼe katuete ñandeguerohory ha ñanevendesíta.

2, 3. a) ¿Mbaʼérepa la Bíbliape ndaipóri rrégla térã mandáto káda situasiónpe g̃uarã? b) ¿Mbaʼépa jahecháta ko artíkulope? (Ehecha pe taʼanga oĩva iñepyrũme.)

 2 Sapyʼánte la Bíbliape ndeʼíri mbaʼépa jajapo vaʼerã káda situasiónpe. Por ehémplo, ndeʼíri ñandéve mbaʼéichapa ñañemonde vaʼerã. Upéva ohechauka Jehová iñaranduha. ¿Mbaʼérepa jaʼe upéva? Pórke ko yvy tuichakuére umi hénte oreko diferénte kostúmbre, oñemonde de diferénte fórma, ha pe móda pyʼỹinte okambia. La Bíbliape heʼírire mbaʼéichapa ñamonde vaʼerã, ñane tiémpope jaipuru vaʼerãmoʼã ao ymaiterei guaréma, koʼág̃a ndojepuruvéimava. Avei la Bíbliape ndaiporiguasúi rrégla oñeʼẽva traváhore, salúre térã umi vyʼarãre. Jehová oheja káda kristiáno ha umi omoakãva hogapy, odesidi koʼã mbaʼépe.

3 Péro, ¿heʼisépa upéva Jehovápe nointeresaiha umi mbaʼe jadesidíva? Jadesidíta jave peteĩ mbaʼe iñimportánteva, péro la Bíbliape ndaipóri peteĩ léi oñeʼẽva upévare, iporã ñañeporandu: “¿Oguerohorýtapa Jehová pe ajaposéva? ¿Mbaʼéichapa ikatu aĩ segúro ogustataha chupe umi mbaʼe adesidíva?”. Ko artíkulo ñanepytyvõta ñarresponde hag̃ua koʼã porandu.

UMI MBAʼE JADESIDÍVA ÑANDEAFEKTA ÑANDÉVE HA AVEI ÓTROPE

4, 5. ¿Mbaʼéichapa umi mbaʼe jadesidíva ñandeafekta ñandéve ha avei ótrope?

4 Heta persóna opensa ikatuha ojapo ojaposéva. Péro ñande nañapensái upéicha, pórke ñambovyʼase Jehovápe. Upévare, jadesidi mboyve peteĩ mbaʼe, tekotevẽ jahecha raẽ mbaʼépa heʼi la Biblia, ha jajapo upépe heʼíva. Por ehémplo, ikatu hag̃uáicha Jehová ñandeguerohory, ñande jarrespeta vaʼerã la Biblia heʼíva pe tuguýre (Gén. 9:4; Hech. 15:28, 29). Avei jajerure vaʼerã Jehovápe tañanepytyvõ jadesidi hag̃ua chupe ogustaháicha.

5 Umi mbaʼe jadesidíva katuete ñandeafekta espirituálmente. Jadesidi porãramo, ñañemoag̃uivéta Jehováre, péro jadesidi vaíramo ñambyaíta ñane amista hendive. Umi mbaʼe jadesidíva ikatu avei oafekta ótrope. Ndajajaposéi ningo mbaʼeve ikatúva omoñepysãnga ñane ermánope, térã omokangýtava ijerovia. Avei ndajajaposéi mbaʼeve oguerútava provléma ermanokuéra apytépe. Jahechaháicha, iñimportanterei hína ñañatende porã jadesidi mboyve (elee Romanos 14:19 ha Gálatas 6:7).

6. ¿Mbaʼépa jajapo vaʼerã jadesidi mboyve peteĩ mbaʼe?

6 ¿Mbaʼéichapa ikatu jadesidi porã la Biblia ndeʼíriramo jepe espesífikamente mbaʼépa jajapo vaʼerã káda situasiónpe? Ñaanalisa porã vaʼerã ñane situasión, ha jajapo rangue umi mbaʼe ñandegustávante, jadesidi vaʼerã Jehovápe ogustaháicha. Péicha ñaiméta segúro haʼe ñanepytyvõtaha ñasẽ porã hag̃ua (elee Salmo 37:5).

¿OGUEROHORÝTAPA JEHOVÁ PE AJAPOSÉVA?

7. La Bíbliape ndaipóri jave peteĩ léi espesífika, ¿mbaʼéichapa ikatu jaikuaa mbaʼépa Jehová oipota jajapo?

7 Péro, ¿mbaʼéichapa ikatu jaikuaa mbaʼépa ogustáta Ñandejárape? Efesios 5:17 heʼi: “Pesegi vaʼerã pehecha mbaʼépa hína Jehová rembipota”. Ndaipóri jave la Bíbliape peteĩ léi espesífika, ñañehaʼã vaʼerã ñantende mbaʼépa haʼe oipota jajapo upe situasiónpe. Upearã tekotevẽ ñañemboʼe  Jehovápe, ha upéi jaasepta pe gía haʼe omeʼẽva ijespíritu sánto rupive.

8. ¿Mbaʼéichapa Jesús odemostra oñemeʼẽ hague enkuénta mbaʼépa Itúa oipota ojapo? Emombeʼu peteĩ ehémplo.

8 Jesús siémpre ohechakuaa vaʼekue mbaʼépa Jehová oipota ojapo. Por ehémplo, la Biblia omombeʼu Jesús dos vése omongaru hague hetaiterei persónape. Upearã oñemboʼe Jehovápe ha upéi ojapo pe milágro (Mat. 14:17-20; 15:34-37). Péro ótra vuéltape, haʼe oĩ aja desiértope iñembyahyieterei, upéicharõ jepe ndojapói peteĩ itágui pan, Satanás oipota haguéicha (elee Mateo 4:2-4). Jesús oikuaa porã Itúape, upévare ndoipurúi ijupe g̃uarãnte pe podér omeʼẽ vaʼekue chupe. Jesús oĩ segúro Itúa omeʼẽtaha chupe hembiʼurã oikotevẽ jave ha siémpre ogiataha chupe.

9, 10. ¿Mbaʼépa ñanepytyvõta jadesidi porã hag̃ua? Emoĩ peteĩ ehémplo.

9 Jasegíramo Jehová gía ikatúta jadesidi porã, Jesús ojapo haguéicha. La Biblia heʼi: “Rekonfia vaʼerã Jehováre nde pyʼaite guive, ha ani rejerovia umi mbaʼe nde repensávare oĩ porãha. Ereko vaʼerã enkuénta Ñandejárape opa mbaʼe rejapóvape, ha haʼe ndegiáta reho hag̃ua tape porãre. Ani rejerovia ndejehénte repenságui ndevaletereiha. Errespeta Jehovápe ha emboyke umi mbaʼe vai” (Prov. 3:5-7, NM). Iñimportánte jastudia la Biblia jaikuaa hag̃ua mbaʼéichapa Jehová opensa. Upéva ñanepytyvõta avei jahechakuaa hag̃ua mbaʼépa jajapo vaʼerã káda situasión oñepresentávape. Avei péicha ifasilvéta ñandéve ñaneñeʼẽrendu hag̃ua chupe (Ezeq. 11:19).

10 Ñapensamína ko ehémplore: Ñamoĩ chupe peteĩ kuñakarai ohoha ombaʼejogua ha peichaháguinte ohecha peteĩ sapatu ogustaitereíva chupe. Péro omaña la iprésiore ha hepyeterei. Upémarõ opensa: “¿Mbaʼépa heʼíne che ména agasta hetáramo?”. Iména noĩriramo jepe hendive, haʼe oikuaáma mbaʼépa opensáta. Ko kuñakarai oikuaa porã iménape, upévare oikuaa mboýpa ikatu ogasta ifamília. Péicha avei, ñande jaikuaa porãvo Jehovápe ñantendéma mbaʼéichapa haʼe opensa, ha mbaʼépa oipota jajapo káda situasiónpe.

¿MBAʼÉICHAPA JAIKUAÁTA JEHOVÁ OPENSA LÁJA?

11. ¿Mbaʼépa iporã ñañeporandu jalee ha jastudia jave la Biblia? (Ehecha pe rrekuádro heʼíva “ Restudia jave la Biblia, eñeporandumi:”.)

11 Jaikuaaséramo mbaʼéichapa Jehová opensa, tekotevẽ ñamboyke tiémpo jajapo hag̃ua ñande estúdio personál. Jalee ha jastudia jave la Biblia, ikatu ñañeporandu: “¿Mbaʼépa chemboʼe koʼã mbaʼe Jehovágui, hapégui ha opensa lájagui?”. Ñapensa vaʼerã David opensa haguéicha. Haʼe heʼi vaʼekue: “Jehová, chemboʼéna mbaʼéichapa aiko vaʼerã nde rapére. Ehechaukána chéve moõrupipa aha vaʼerã. Cherekomboʼéna ha chegueraha tape porãre. Ñandejára, ndéngo siémpre chesalva, tódo el tiémpo che ajerovia nde chepytyvõtaha” (Sal. 25:4, 5, NM). Jalee jave peteĩ rreláto bíblico, iporã ñapensa: “¿Mbaʼéichapa ko informasión chevenefisia chéve ha che famíliape? ¿Mbaʼéicha javépa ideprovéchota chéve? ¿Ikatúpa aipuru che rogapýpe, eskuéla, koléhiope, térã predikasiónpe?”. Jahechakuaávo moõpa ikatu jaipuru pe ñaaprende vaʼekue, ifasilvétama ñandéve jajapo hag̃ua.

12. ¿Mbaʼéichapa ñane puvlikasionkuéra ha umi rreunión ikatu ñanepytyvõ?

 12 Ikatu hag̃uáicha jaikuaa Jehová opensa lája, tekotevẽ avei ñañatende porã umi konsého omeʼẽvare Jehová organisasión la Biblia rupive. Por ehémplo, jadesidíta jave peteĩ mbaʼe iñimportánteva, ikatu jahecha lívro Gía oipurúva testígo de Jehová otopa hag̃ua informasión. Avei iñimportánte ñañatende porã ha japartisipa umi rreuniónpe, ha jajepyʼamongeta umi mbaʼe ñaaprende vaʼekuére. Koʼã mbaʼe ñanemboʼéta ñapensa hag̃ua Jehová opensaháicha. Upéicha ikatúta jadesidi chupe ogustáva ha haʼe ñanevendesíta.

EREKO VAʼERÃ ENKUÉNTA JEHOVÁ OPENSÁVA REDESIDI MBOYVE

13. ¿Mbaʼéichapa ñanepytyvõ jadesidi hag̃ua jaikuaáramo Jehová opensa lája? Emoĩ peteĩ ehémplo.

13 Jarekóramo enkuénta Jehová opensáva, katuete jadesidi porãta. Ñapensamína ko ehémplore: Ñamoĩ chupe jajagarraseha ñande prekursorádo, ha upearã jajapóma heta kámbio ikatu hag̃uáicha hembyve ñandéve tiémpo. Péro nañaiméi segúro javyʼátapa nañandekosahetáiramo ha saʼi ñande pláta. Jaikuaaháicha, la Biblia ndeʼíri jajapo vaʼerãha katuete ñande prekursorádo. Ñande ikatúnte avei jaservi porã Jehovápe kómo puvlikadór. Péro Jesús opromete vaʼekue Jehová ovendesitaha entéro umi ojesakrifikávape pe Rréino rehehápe (elee Lucas 18:29, 30). La Biblia heʼi avei Jehová ovyʼaha jajapóramo opa ikatúva jaservi porã hag̃ua chupe, ha oipotaha javyʼa iservísiope (Sal. 119:108; 2 Cor. 9:7). Ñañemboʼéramo Jehovápe ha jajepyʼamongeta koʼã mbaʼe la Biblia heʼívare, jadesidíta peteĩ mbaʼe ou porãva ñandéve, ha Jehová ñanevendesíta.

14. ¿Mbaʼéichapa ikatu jaikuaa ogustátapa Jehovápe ñañemonde lája?

14 Ñapensamína ótro ehémplore. Ñamoĩ chupe ndegustaha ha reipuruseha umi ao reikuaáva omolestataha algún ermánope. Péro la Biblia ndeʼíri mbaʼeve umi ao ndegustávare. Upéicharõ, ¿mbaʼéichapa reikuaáta mbaʼépa Jehová opensa upe témare? La Biblia heʼi: “Upéicha avei aipota umi kuña oñemoporã jave, toñemonde hekópe ha taiñakãguapy, ani otrensa iñakãrague ni oiporu óro, pérla ni ao hepyetereíva.  Upéva rangue oiko vaʼerã hikuái umi kuña omombaʼeguasúva Ñandejárape oikoháicha, ha péicha umi tembiapo porã rupive haʼekuéra ikatu oñemoporã” (1 Tim. 2:9, 10). Ko konsého oñemeʼẽ enterovévape g̃uarã. Upéva heʼise kuimbaʼekuéra ojapo vaʼerãha avei koʼápe heʼíva. Ñañemondéramo hekópe porã, jahechaukáta ñaneinteresaha umi ótro opensáva. Ñande ningo ndajaipotái ñane ermanokuéra oñeñandu vai térã oñeofende, pórke jahayhu chupekuéra (1 Cor. 10:23, 24; Filip. 3:17). Jajepyʼamongetáramo la Biblia heʼívare ha Jehová opensávare, haʼe oguerohorýta ñane desisión.

15, 16 a) ¿Mbaʼéichapa Jehová oñeñandúta ñapensáramo umi mbaʼe tieʼỹre? b) ¿Mbaʼéichapa ikatu jaikuaa mbaʼe entretenimiéntopa Jehová oguerohorýta? c) ¿Mbaʼépa iporã jareko enkuénta jadesidíta jave peteĩ mbaʼe iñimportánteva?

15 La Biblia heʼi Jehovápe hasyetereiha la majoría umi hénte “tódo el tiémpo opensa haguére ojapo hag̃ua ivaívante voi” (elee Génesis 6:5, 6). Upéva ohechauka Jehová ndoipotaiha ñapensa umi mbaʼe tieʼỹre, ikatúva ñandereity pekádo ivaietereívape. Haʼe oipota ñapensa umi mbaʼe iporã ha ipotĩvare. Santiago oskrivi vaʼekue: “Pe persóna orekóva arandu oúva yvágagui, tenondete hekopotĩ, upéi ipyʼaguapy, noñemohatãi haʼe heʼívapente, ikyreʼỹ iñeʼẽrendu hag̃ua, oiporiahuverekoiterei hapichápe, henyhẽ tembiapo porãgui, otrata enterovépe peteĩchante, ha ndahovamokõiri” (Sant. 3:17). Upéicharõ, ñamboyke vaʼerã umi vyʼarã ikatúva omoinge ñane akãme deséo vai. Ñantende porãramo mbaʼépa Jehovápe ombojeguaru, ifasilvéta ñandéve jaikuaa hag̃ua mbaʼe lívro, pelíkula ha huégopa ikatu jaelehi. Ha natekotevẽmoʼãi ñaporandu ótrope mbaʼépa iporãve jajapo.

16 Pyʼỹinte ningo oĩ mas de una fórma jadesidi hag̃ua peteĩ mbaʼe oĩ porãva ha katuete Jehová oguerohory. Péro jadesidíta jave peteĩ mbaʼe iñimportánteva, iporã jajerure konsého umi ansiáno térã umi ermáno iñexperiensiavévape (Tito 2:3-5; Sant. 5:13-15). Upéva ndeʼiséi jaipotaha umi ótro odesidi ñanderehe, síno ñapensa porã vaʼerã mbaʼépa heʼi la Biblia ha upéi ñandete jadesidi (Heb. 5:14). Apóstol Pablo heʼi vaʼekue: “Káda uno ogueraháta ikárga” (Gál. 6:5).

17. ¿Mbaʼépa jahupyty jadesidíramo Jehovápe ogustaháicha?

17 Jadesidi jave Jehovápe ogustaháicha, ñañemoag̃uive hese, ha haʼe ñandeguerohory ha ñanevendesi (Sant. 4:8). Avei ñande fe imberetevéta. Ha jajepyʼamongetáramo umi mbaʼe jaleévare la Bíbliape, ñantendevéta mbaʼéichapa opensa Jehová. Añetehápe, ñande ningo jasegíta ñaaprende heta mbaʼe Jehovágui (Job 26:14). Ñañehaʼãmbaitéramo koʼág̃ama voi ñaaprendeve Jehovágui, ñanearandúta ha ñandekatupyrýta jadesidi porã hag̃ua (Prov. 2:1-5). Jaikuaaháicha, yvyporakuéra opensáva ha ojaposéva pyʼỹinte okambia, péro Jehová núnka nokambiái. Pe salmísta heʼi vaʼekue: “Jehová odesidíva, osẽ porã katuete ha ndahaʼéi sapyʼaiterãnte. Umi mbaʼe opensáva ojapo ni mbaʼevéicharõ nokambiái” (Sal. 33:11, NM). Upéicharõ, ikatu hag̃uáicha siémpre jadesidi porã, jaikuaa vaʼerã mbaʼéichapa Jehová opensa ha jajapo vaʼerã umi mbaʼe chupe ogustáva.