Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Mayo de 2016

Jaaprovechapaitékena umi informasión ñanemoag̃uíva Jehováre

Jaaprovechapaitékena umi informasión ñanemoag̃uíva Jehováre

‘Che hína [Jehová], nde Jára, nemboʼéva reiko hag̃ua hekoitépe, rohekomboʼe ha ahechauka hína ndéve nde raperã.’ (IS. 48:17, ÑÑB)

PURAHÉI: 117, 114

1, 2. a) ¿Mbaʼépa ñapensa la Bíbliare? b) ¿Mbaʼe pártepa ndegustave la Bíbliagui?

ÑANDE testígo de Jehová jahayhu ha ñamombaʼe la Biblia. Ko lívro ningo ñanekonsola, omeʼẽ ñandéve esperánsa ha heta konsého ikatúva ñanepytyvõ (Rom. 15:4). Ndahaʼéi peteĩ lívro orekóva yvyporakuéra pensamiénto, síno haʼe hína “Ñandejára Ñeʼẽ” (1 Tes. 2:13).

2 Oime vaʼerã jareko hína umi lívro de la Biblia ñandegustavéva. Por ehémplo, hetápe ogusta Mateo, Marcos, Lucas ha Juan, pórke ikatu jahecha umi kualida porãite Jehová orekóva, Jesús ehémplo rupive (Juan 14:9). Ótrope katu ogusta umi lívro profétiko, por ehémplo Apocalipsis, ohechauka rupi “umi mbaʼe oikótava koʼẽrõite” (Apoc. 1:1). Hetápe ogustaiterei avei umi Salmo, pórke okonsola chupekuéra. Ha ótrope katu lívro de Proverbios, ideprovécho rupi chupekuéra umi konsého oĩva upépe. Jahechaháicha, la Biblia haʼe peteĩ lívro enterovépe g̃uarã.

3, 4. a) ¿Mbaʼépa ñapensa ñane puvlikasionkuérare? b) ¿Mbaʼeichagua puvlikasiónpa ojejapo umi ndahaʼéivape g̃uarã testígo de Jehová?

3 Ñande ningo javalora avei umi puvlikasión bíblica, pórke  ojepuru la Biblia ojejapo hag̃ua umíva. Entéro umi lívro, folléto, rrevísta ha ambue puvlikasión haʼe hína peteĩ jopói oúva Jehovágui. Umíva ñanepytyvõ ñañemoag̃ui hag̃ua hese ha ‘ñande jerovia mbarete’ hag̃ua (Tito 2:2).

4 Heta ñane puvlikasionkuéra ojejapo testígo de Jehovápe g̃uarã. Péro oĩ puvlikasión ojejapóva peteĩ grúpo de persónape g̃uarãnte, por ehémplo mitãrusukuéra térã tuakuérape g̃uarã. Heta puvlikasión oñeimprimíva ha umi artíkulo ha vidéo osẽva ñane páhina de Internétpe, ojeprepara umi ndahaʼéivape g̃uarã testígo de Jehová. Koʼã mbaʼe ohechauka porã Jehová okumpliha ipromésa ohekomboʼévo opaichagua héntepe (Is. 25:6).

5. ¿Mbaʼéguipa ñaĩ vaʼerã segúro?

5 La majoría oime vaʼerã jarekoseve tiémpo jalee hag̃ua la Biblia ha ñane puvlikasionkuéra. Péro sapyʼánte nañanetiémpoi jastudiapaite hag̃ua umi informasión osẽva guive. Upéicharõ jepe, ñaĩ segúro Jehová ñandeguerohoryha, pórke ñañehaʼãmbaite ‘jaipuru porã ñane tiémpo’ ikatu hag̃uáicha jalee ha jastudia la Biblia (Efes. 5:15, 16). Péro oĩ peteĩ mbaʼe ikatúva oiko ñanderehe nañañatendéiramo. ¿Mbaʼépa hína upéva?

6. ¿Mbaʼépa nañapensái vaʼerã ikatu hag̃uáicha jaaprovechapaite umi informasión oúva Jehovágui?

6 Ñande nañañatendéiramo, ikatu hína ñapensa oĩha párte la Bíbliape térã algúna puvlikasión bíblica ndahaʼéiva ñandéve g̃uarã. ¿Ñapensápa oĩha algúna párte de la Biblia nañanepytyvõmoʼãiva pe situasión jahasávape? ¿Mbaʼépa jajapo osẽ jave peteĩ puvlikasión peteĩ grúpo de persónape g̃uarã ha ñande nañaiméi upe grúpope? Jalee vai vaínterõ umi informasión térã ndajaleéi voi, jajavyetéta umi konsého ideprovechoitéva. ¿Mbaʼépa jajapo vaʼerã ani hag̃ua oiko ñanderehe upéva? Ani ñanderesarái entéro umi informasión jarresivíva ouha Jehovágui. La Biblia heʼi: ‘Che hína [Jehová], nde Jára, nemboʼéva reiko hag̃ua hekoitépe, rohekomboʼe ha ahechauka hína ndéve nde raperã’ (Is. 48:17, ÑÑB). Ko artíkulope jahecháta mbohapy konsého ñanepytyvõtava jaaprovecha porãve hag̃ua entéro informasión bíblica Jehová omeʼẽva ñandéve.

¿MBAʼÉICHAPA IKATU IDEPROVÉCHO ÑANDÉVE ÑANDE LEKTÚRA DE LA BIBLIA?

7. ¿Mbaʼérepa jalee vaʼerã la Biblia ñaaprende hag̃uáicha?

7 Jalee ñaaprende hag̃uáicha. Jaikuaaháicha, la Bíbliape oĩ párte ojeskrivi vaʼekue peteĩ persónape g̃uarã, térã peteĩ grúpo de persónape g̃uarã. Péro la Biblia heʼi porã: “Opa mbaʼe oĩva Ñandejára Ñeʼẽme [...] ideprovécho” (2 Tim. 3:16). Upévare iñimportánte jalee la Biblia ñaaprende hag̃uáicha. Peteĩ ermáno heʼi: “Alee jave la Biblia areko enkuénta ikatuha aaprende heta mbaʼe peteĩ téxtogui. Upévare añehaʼã apensa mbaʼépa chemboʼe”. Jalee mboyve la Biblia, jajerure vaʼerã Jehovápe tañanemoarandu ha tañanepytyvõ ñantende hag̃ua mbaʼépa ñanemboʼese (Esd. 7:10; elee Santiago 1:5).

¿Jaaprovecha porãpa hína ñande lektúra de la Biblia? (Ehecha párrafo 7)

8, 9. a) ¿Mbaʼe mbaʼépa iporã ñañeporandu jalee jave la Biblia? b) ¿Mbaʼépa ñanemboʼe Jehovágui umi rrekisíto ansianokuérape g̃uarã?

8 Jajapo pregúnta. Jalee jave la Biblia iporã ñañeporandu koʼã mbaʼe: “¿Mbaʼépa chemboʼe Jehovágui? ¿Mbaʼéichapa ikatu ideprovécho chéve ko aleéva? Ha, ¿mbaʼéichapa ikatu aipuru ko informasión aipytyvõ hag̃ua ótrope?”. Ñañeporandúramo koʼã mbaʼe jalee jave la Biblia, ideprovechovéta  ñandéve umi mbaʼe jaleéva. Ñamoĩmína peteĩ ehémplo. La Biblia heʼi mbaʼe mbaʼépa okumpli vaʼerã umi ansiáno (elee 1 Timoteo 3:2-7). La majoría ñande ningo ndahaʼéi ansiáno, upévare ikatu ñapensa pe párte de la Biblia ndahaʼeiha ñandéve g̃uarã, ha nañanepytyvõmoʼãiha. Péro ñañeporandúramo umi mbohapy mbaʼe ñamensionáva, jahechakuaáta mbaʼéichapa umi rrekisíto ikatu ñanepytyvõ enterovévape.

9 “¿Mbaʼépa chemboʼe Jehovágui?” Jehová omoĩka la Bíbliape unos kuánto rrekisíto umi ansiánope g̃uarã, ha ohaʼarõ okumpli hikuái umíva. ¿Mbaʼépa ñanemboʼe upéva? Jehová ohayhuetereiha pe kongregasión. La Biblia heʼi umi ansiáno orrenditaha kuénta Jehovápe otrata lájare pe kongregasiónpe, “haʼe ojogua vaʼekue Itaʼýra ruguýre” (Hech. 20:28). Upéicharõ, Jehová oipota umi ansiáno omoĩ ehémplo kongregasiónpe, ha otrata porã entéro umi ermánope. Avei oipota ñañandu oñangarekoha hikuái ñanderehe (Is. 32:1, 2). Upéicharõ, jaleévo umi rrekisíto okumpli vaʼerã umi ansiáno, ñaaprende Jehová okuida porãitereiha ñanderehe.

10, 11. a) ¿Mbaʼéichapa umi rrekisíto ansianokuérape g̃uarã ikatu ideprovécho enterovévape? b) ¿Mbaʼéichapa ikatu jaipuru umi rrekisíto ñaipytyvõ hag̃ua ótrope?

10 “¿Mbaʼéichapa ikatu ideprovécho chéve ko aleéva?” Oiméramo nde peteĩ ansiáno, remaña vaʼerã jepi umi rrekisítore rehecha hag̃ua tekotevẽpa remehora. Térã oiméramo nde ‘reservise ansiánoramo’, ehecha vaʼerã mbaʼéichapa ikatu rekumpli koʼã rrekisíto, ha eñehaʼãmbaite ejapo umíva (1 Tim. 3:1). Péro entéro kristiáno ikatu ñaaprende heta mbaʼe koʼã rrekisítogui. Por ehémplo, Jehová ndoipotái isiervokuéra oiko oñemohatã haʼekuéra heʼívapente, síno oipota iñakãguapy (Filip. 4:5; 1 Ped. 4:7). Ansianokuéra omoĩ jave ‘ehémplo pe ovecha atýpe’, enterovéva ikatu ‘ojerovia haʼekuéraicha’ (1 Ped. 5:3; Heb. 13:7).

11 “¿Mbaʼéichapa ikatu aipuru ko informasión aipytyvõ hag̃ua ótrope?” Ikatu jaipuru umi rrekisíto ansianokuérape g̃uarã ñaipytyvõ hag̃ua umi estudiánte  de la Bíbliape, térã ambue persóna oikuaasevévape Ñandejáragui. Péicha ikatúta ohecha hikuái testígo de Jehová ansianokuéra idiferenteha umi líder rrelihiósogui heʼíva ijehe kristianoha. Koʼã rrekisíto ikatu avei ñanemomanduʼa mbaʼeichaitépa ansianokuéra ‘ombaʼapo jejopy’ kongregasiónpe ñanepytyvõ hag̃ua (1 Tes. 5:12). Amáske jarrespeta chupekuéra, haʼekuéra ojapo porãvéta hembiapo kongregasiónpe ha ovyʼavéta (Heb. 13:17).

12, 13. a) ¿Mbaʼépa iporã ñañeporandu jastudia jave la Biblia? b) ¿Mbaʼépa ikatu ñaaprende jahekáramo informasión jalee jave peteĩ rreláto? Emoĩ peteĩ ehémplo.

12 Jahekave informasión. Jastudia jave la Biblia, ikatu ñañeporandu:

  • ¿Mávapa oskrivi rakaʼe ko párte?

  • ¿Arakaʼe ha moõpa ojeskrivi raʼe?

  • ¿Mbaʼe suséso iñimportántevapa oiko vaʼekue ojeskrivírõ guare ko lívro?

Jaikuaa rire koʼã mbaʼe, ñaaprendevéta jahávo, ha japilláta hetave mbaʼe ndajaikuaamoʼãiva kuri péicha péichante jaleérire.

13 Jahechamína mbaʼépa ikatu ñaaprende Ezequiel 14:13 ha 14-gui. Upépe heʼi: “Jehová heʼi: ‘Peteĩ tetã hembiapo vaíramo ha opekáramo che kóntrape, che amboúta hiʼári ñembyahýi ha omanombáta yvyporakuéra ha mymbakuéra. Péro ijapytepekuéra oĩrõ Noé, Daniel ha Job, koʼã kuimbaʼe ojesalváta hekojoja rupi’” (NM). Jahekavérõ informasión, jahechakuaáta koʼã mbaʼe ojeskrivi hague áño 612-perupi a.C. Upérõ ojapóma heta áño omano hague Noé ha Job, péro Jehová imanduʼa porã gueteri mbaʼéichapa iñeʼẽrendu kuri hikuái. Avei, upérõ Daniel orekóne raʼe 20 áñorupi, ha Jehová heʼi hese hekojojaha Noé ha Job hekojoja haguéicha. ¿Mbaʼépa ñanemboʼe ko téxto? Jehová orahaitereiha enkuénta ñaneñeʼẽrendúramo chupe, ha ovalora avei pe esfuérso ojapóva umi mitãrusukuéra (Sal. 148:12-14).

JAAPROVECHAPAITÉKE UMI INFORMASIÓN OMOMBARETÉVA ÑANDE FE

14. a) ¿Mbaʼéichapa oipytyvõ mitãrusukuérape umi informasión ojejapóva chupekuéra g̃uarã? b) ¿Mbaʼéichapa entérope ikatu ideprovécho umi informasión oñeguenohẽva mitãrusukuérape g̃uarã? (Ehecha pe taʼanga oĩva iñepyrũme.)

14 Informasión mitãrusukuérape g̃uarã. Ñande ñaaprendéma kuri la Biblia kompletoite ikatuha ideprovécho ñandéve. Péicha avei, entéro ñane puvlikasión ikatu ñanevenefisia. Por ehémplo, umi áño ohasa vaʼekuépe Jehová organisasión oguenohẽ heta informasión mitãrusukuérape g̃uarã. [1] Koʼã informasión oipytyvõ chupekuéra ombohovái porã hag̃ua umi situasión ijetuʼúva ohasáva eskuéla térã koléhiope, ha umi provléma ohasáva okakuaávo ohóvo hikuái. Péro, ¿mbaʼéichapa enterovévape ikatu ideprovécho koʼã artíkulo ha lívro osẽ vaʼekue mitãrusukuérape g̃uarã? Jaleéramo koʼã informasión, jaikuaáta mbaʼe provlémapa ombohovái mitãrusukuéra, ha ikatúta ñaipytyvõ porãve ha ñamokyreʼỹ chupekuéra.

15. ¿Mbaʼérepa umi kristiáno naimitãvéimava oñeinteresa vaʼerã avei umi informasión osẽvare mitãrusukuérape g̃uarã?

15 Heta provléma oñemensionáva umi puvlikasión osẽvape mitãrusukuérape g̃uarã, ndahaʼéi haʼekuérante la ohasáva. Por ehémplo, entéronte jajejokokuaa vaʼerã, ñadefende umi mbaʼe jagueroviáva, ha jagueropuʼaka vaʼerã oĩ jave ñandejopýva jajapo hag̃ua ivaíva. Avei ñamboyke vaʼerã umi júnta vai ha umi vyʼarã ikatúva ñandeperhudika. Umi puvlikasión mitãrusukuérape g̃uarã oñeʼẽ koʼã témare ha hetave mbaʼére. Oiméramo nde nanemitãvéima, lomímonte ikatu reñevenefisia koʼã informasióngui.  ¿Mbaʼérepa? Pórke umi konsého oĩva pype oñeguenohẽ la Bíbliagui ha entérope ikatu ideprovécho.

16. ¿Mbaʼéichapa ideprovécho mitãrusukuérape umi puvlikasión ojejapóva chupekuéra g̃uarã?

16 Umi puvlikasión ojejapóva mitãrusukuérape g̃uarã oipytyvõ chupekuéra ombohovái hag̃ua iprovléma ha avei oñemoag̃uive hag̃ua Jehováre (elee Eclesiastés 12:1, 13). Péro umi informasión ikatu avei ideprovécho umi okakuaapámavape. Por ehémplo, rrevísta ¡Despertad! abril de 2009-pe, osẽ vaʼekue peteĩ artíkulo hérava “Los jóvenes preguntan. ¿Cómo disfrutar la lectura de la Biblia?”. Ko artíkulo omeʼẽ heta suherénsia, ha ou pype peteĩ rrekuádro ikatúva ojerrekorta ñamoĩ hag̃ua ñande Bíbliape. Peteĩ ermána orekóva 24 áño ha haʼéva avei sy, omombeʼu: “Siémpre ijetuʼu vaʼekue chéve alee hag̃ua la Biblia, péro aipuru umi suherénsia osẽ vaʼekue ko artíkulope ha avei pe rrekuádro. Upe rire igústoma chéve alee la Biblia, pórke ahechakuaa mbaʼéichapa káda lívro oñeʼẽ peteĩ téma prinsipál rehe. Avei ifasilve chéve añeimahina hag̃ua ahávo umi mbaʼe aleéva. Añetehápe ningo koʼág̃a adisfrutaiterei alee jave che Biblia”.

17, 18. ¿Mbaʼéichapa ikatu ideprovécho ñandéve umi informasión ojejapóva umi ndahaʼéivape g̃uarã Testígo? Emoĩ peteĩ ehémplo.

17 Informasión ojejapóva umi ndahaʼéivape g̃uarã Testígo. Áño 2008 guive osẽ pe rrevísta Ñemañaha ojestudiáva. Ko rrevísta ojejapo prinsipálmente Testigokuérape g̃uarã. Péro jareko avei rrevísta Ñemañaha umi ndahaʼéivape g̃uarã Testígo. ¿Ikatúpa ideprovécho avei ñandéve umi informasión osẽva pype? Epensamína ko ehémplore. Ñamoĩ chupe ohoha Salónpe peteĩ persóna nde reinvita vaʼekue. Katuete ningo revyʼaiterei upe haguére. Pe diskúrso púvliko aja, ejapysaka porã la ojeʼévare ha eñeporandu mbaʼépa opensáne pe persóna reinvita vaʼekue umi mbaʼe ohendúvare. Upe moméntope nde reñemoĩ ilugárpe ha rehechakuaa iñimportantetereiha pe informasión.

18 Péicha avei oiko jalee jave umi informasión ojejapóva umi ndahaʼéivape g̃uarã Testígo. Por ehémplo, pe rrevísta Ñemañaha púvlikope osẽ umi téma bíblico ndahasýiva ontende hag̃ua umi ndahaʼéiva Testígo. Ha umi artíkulo osẽva ñande páhina de Internétpe, jw.org isensilloiterei avei. Umíva apytépe oĩ umi seksión hérava “Preguntas sobre la Biblia”, ha “Oñeporandu meméva”. Jaleéramo koʼã informasión, ñamombaʼevéta pe añetegua oĩva la Bíbliape. Avei ñandekatupyryvéta jaexplika hag̃ua predikasiónpe umi mbaʼe jagueroviáva. Rrevísta ¡Despertad! avei ñanepytyvõ jajerovia mbareteve añetehápe oexistiha peteĩ Kreadór, ha ñadefende hag̃ua ñane kreénsia (elee 1 Pedro 3:15).

19. ¿Mbaʼéichapa jahechaukáta Jehovápe jaagradeseha entéro informasión omeʼẽvare ñandéve?

19 Añetehápe Jehová omeʼẽ ñandéve hetaiterei konsého ha informasión ñanevenefisiorã (Mat. 5:3). Jasegíkena jalee ha ñañevenefisia entéro mbaʼe osẽvagui ñane puvlikasionkuérape. Péicha jahechaukáta Jehovápe jaagradesetereiha chupe ñanerekomboʼe porã haguére (Is. 48:17).

^ [1] (párrafo 14) Por ehémplo jareko pe lívro Mitãrusukuéra oñeporandúva jepi. Konsého peẽme g̃uarã, volúmen 1, ha Lo que los jóvenes preguntan. Respuestas prácticas, volumen 2. Avei Internétpe jw.org-pe oĩ peteĩ seksión hérava “Los jóvenes preguntan”.