Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Marzo de 2017

 TEMBIASAKUE

Tuicha chepytyvõ ajeheʼa haguére umi iñarandúvare

Tuicha chepytyvõ ajeheʼa haguére umi iñarandúvare

CHEMANDUʼA peteĩ pyhareve roʼyetereírõ guare, aĩ kuri peteĩ puévlo héravape Brookings, Dakota del Súrpe (Estados Unidos). Pe klíma chemomanduʼa og̃uahẽmbotaitemaha pe inviérno, ha roʼyeterei upe gotyo, ojoka voi ñande pire. Upe pyhareve roĩ unas kuánta persóna peteĩ gránhape, ha oreratãmoʼã pe okápe umi animál oñemboyʼuha renondépe, henyhẽtéva y roʼysãgui. Tamombeʼumína peẽme unas kuánta kósa pentende porãve hag̃ua mbaʼépa ajapo hína kuri upépe.

CHE HENTEKUÉRA

Che tio Alfred ha che túa

Anase el 7 de marzo de 1936, roĩ éntre 4 ermáno ha che la ipahague. Roiko kuri peteĩ granhaʼípe éste gotyo Dakota del Súrpe. Entéronte rombaʼapo ore gránhape, péro ndahaʼéi upéva la iñimportantevéva oréve g̃uarã, pórke mama ha papa haʼe testígo de Jehová. Haʼekuéra ojevautisa áño 1934-pe, ha siémpre omotenonde Ñandejára Rréino opa mbaʼe ári. Upérõ roñerreuni peteĩ kongregasión michĩvape Cóndepe (Dakota del Sur). Che túa Clarence ha che tio Alfred haʼe vaʼekue siérvo de kompañía, koʼág̃a oñehenóiva koordinadór del kuérpo de ansiáno.

Ógape rojepokuaa ndorofaltái rreunionhápe ha rosẽ meme ropredika de kása en kása roñeʼẽ hag̃ua umi héntepe umi esperánsa porãitére oĩva la Bíbliape. Mama ha papa oremboʼe heta mbaʼe, tahaʼe umi mbaʼe heʼíva ha ojapóva rupive. Añetehápe upéva chepytyvõiterei chéve ha che ermanokuérape. Chehegui ha che ermána Dórothygui oiko puvlikadór rorekórõ guare 6 áño. Áño 1943-pe añematrikula Eskuéla Jaipurukuaa Hag̃ua la Bíbliape, upérõ oñepyrũ ramo ojereko rreunionhápe ko Eskuéla.

Aservírõ guare de prekursór 1952-pe

Umi asambléa iñimportanteterei oréve g̃uarã. Chemanduʼa pe ojejapo vaʼekue 1949-pe Sioux Fállspe (Dakota del Sur). Ermáno Grant Suiter haʼe kuri pe diskursánte prinsipál. Idiskúrso héra:  “¡Tardevéma hína la nde repensávagui!”. Haʼe heʼi kuri umi kristiáno oipuru porã vaʼerãha itiémpo omombeʼu hag̃ua pe marandu porã oñeʼẽva Ñandejára Rréinore ogovernámava hína yvágape. La heʼi vaʼekue chemokyreʼỹeterei añemeʼẽ hag̃ua Jehovápe. Pe sigiénte asambléa de sirkuíto ojejapo Broókingspe. Upépe che aformáma kuri fíla ajevautisa hag̃ua pe gránha roʼysãme amombeʼu hague peẽme iñepyrũme. Pe animál oñemboyʼuha ningo de metál, ha ojepuru rojevautisa hag̃ua pype haʼerõguáicha peteĩ pisína. Upérõ rojevautisa éntre 4, el 12 de noviembre de 1949.

Upe guive amoĩ kómo méta pe prekursorádo, ha oiko chehegui prekursór el 1 de enero de 1952, arekópe 15 áño. Proverbios 13:20 heʼi: “Pe oiko meméva umi iñarandúvandi iñarandúta avei” (TNM). Ahechakuaa siertoiteha ko téxto pórke che famíliape oĩ heta oapojáva che desisión. Por ehémplo, che tio Julius orekóva upérõ 60 áño, haʼe kuri che kompañéro de prekursorádo. Ijedavéramo jepe chehegui, rohasa porãiterei oñondive pe predikasiónpe. Añetehápe aaprende heta mbaʼe chugui. Upe riremínte che ermána Dorothy ojagarráma avei iprekursorádo.

UMI SUPERINTENDÉNTE DE SIRKUÍTO CHEPYTYVÕ

Chemanduʼa mama ha papa siémpre oinvitámi hague umi superintendénte de sirkuítope opyta hag̃ua orendive ógape. Jesse ha Lynn Cantwell chepytyvõiterei vaʼekue ha chemokyreʼỹ ajapo hag̃ua pe servísio de tiémpo kompléto. Koʼã mbaʼe chemomýi avei kuri ajagarra hag̃ua che prekursorádo. Haʼekuéra oñeinteresa cherehe ha ohasa tiémpo chendive, péicha rupi chekyreʼỹve amoĩ hag̃ua méta espirituál. Sapyʼánte ovisita jave hikuái peteĩ kongregasión opytáva ag̃ui, cheinvita apredika hag̃ua hendivekuéra. Ahasa haguére tiémpo koʼã ermánondi, chekyreʼỹ ha chembareteve.

Upéi, ótro superintendénte de sirkuíto ovisita ore kongregasión. Ermáno Bud Miller ha hembireko Joan. Upérõ che areko 18 áño ha añehenói ajapo hag̃ua servísio militár. Pe komite del goviérno oipota ajapo peteĩ traváho ahechakuaáva noĩriha de akuérdo Cristo omandávandi, ha aaseptáramo ajeheʼáta hína polítikare. Péro che apredikase pe marandu porã oñeʼẽva Ñandejára Rréinore (Juan 15:19). Upévare ajerure ojehecha jey hag̃ua  che káso, ha cherecha hag̃ua hikuái kómo minístro rrelihióso.

Ermáno Miller heʼi ikatuha chemoirũ añerreuníta vove pe komiténdi. Haʼe ningo naiñotĩri ni ndokyhyjéi oñeʼẽ hag̃ua oimehaichagua renondépe. Avei oikuaa porã la Biblia omboʼéva. Añetehápe tuicha chepyʼaguasu aikuaávo ermáno Miller oĩtaha chendive. Áño 1954-pe, pe komité orrekonose che haʼeha peteĩ minístro rrelihióso. Upe guive arekovéma liverta ambaʼapove hag̃ua Jehová servísiope.

Ajeko hína peteĩ kamionétare ojepurúva pe gránhape, añepyrũmíre ambaʼapo Betélpe

Upe riremínte añeinvita aservi hag̃ua Betélpe, upérõ hérava Hacienda Watchtower de Staten Island (Nueva York). Aservi upépe 3 áñorupi, ha ahasa heta mbaʼe porã ambaʼapóvo umi ermáno ha ermána iñarandúvandi.

ASERVI BETÉLPE

Rrádio WBBR-pe ermáno Franz ndive

Pe hacienda de Staten Íslandpe, oĩ pe estasión de rrádio WBBR. Testígo de Jehová oipuru ko rrádio 1924 guive 1957 peve. Upépe rombaʼapo mas o ménos 15 térã 20 betelíta, la majoría oremitã ha ndaoreexperiensiaguasúi. Péro ermáno Eldon Woodworth, haʼe vaʼekue peteĩ ermáno unhído ijedáva ha iñarandúva. Haʼe oretrata itaʼýraicha ha orepytyvõ oreakãguapyve hag̃ua rohóvo. Sapyʼánte rojoavy jave, ijetuʼu chupe osegi hag̃ua ipasiénsia orerehe, péicha jave haʼe heʼínte: “Ñamañáramo la oĩvare, ñanesorprende mbaʼéichapa Ñandejára ohupyty heta mbaʼe”.

Harry Peterson ikyreʼỹeterei vaʼekue predikasiónpe

Ermáno Frederick Franz oĩ vaʼekue avei orendive ha orepytyvõ heta mbaʼépe. Haʼe iñarandu ha oikuaa heta mbaʼe la Bíbliagui, ha avei oñeinteresa orerehe. Ótro ermáno ombaʼapóva kosináme hérava Harry Peterson oĩ avei orendive. La ijapellído tee hína Papargyropoulos, péro oréve ifasilve roʼe chupe Peterson. Ko ermáno haʼe vaʼekue avei unhído ha ikyreʼỹeterei predikasiónpe. Haʼe iguápo la itraváhope Betélpe, péro núnka ndodeskuidái pe predikasión. Okoloka vaʼekue hetaiterei rrevísta káda mes. Haʼe oreko avei heta konosimiénto bíblico ha ombohovái jepi oréve heta mbaʼe roporandúva chupe.

AAPRENDE UMI ERMÁNA IÑARANDÚVAGUI

Pe hacienda térã pe gránhape oñeñoty yva ha verdúra. Upéi roprepara ikatu hag̃uáicha roenlata ojepuru hag̃ua Betélpe. Káda áño roprepara 45.000 láta orekóva haimete 1 lítro. Avyʼa ikatu haguére ambaʼapo upe traváhope ermána Etta Huth ndive,  peteĩ ermána iñarandúva. Haʼe oprepara pe konservánte oñekotevẽva oñemantene areve hag̃ua umi prodúkto enlatádo. Ore traváho heta jave, ou unas kuánta ermána oikóva ag̃ui orepytyvõ hag̃ua, ha Etta oñenkarga hesekuéra. Pe traváho ojapóva ermána Etta ningo iñimportánte, péro haʼe siémpre ohechauka orrespetaha umi ermáno oñenkargávape pe gránhare. Añetehápe ermána Etta omoĩ peteĩ ehémplo porã enterovépe g̃uarã.

Che ha Angela, ermána Etta Huth ndive

Angela Romano haʼe vaʼekue peteĩ ermána imitãva oúva ombaʼapo orendive. Etta oipytyvõ vaʼekue chupe oikuaa hag̃ua Jehovápe. Péicha aikuaa kuri ótra persóna iñarandúvape. Angela ha che romenda abril de 1958-pe, ha ojapóma 58 áño vyʼápe roservi hague Jehovápe oñondive. Heta áñorema Angie ohechauka iñeʼẽrenduha Jehovápe, ha upéva omombarete ore matrimónio. Aikuaa porã siémpre ikatuha ajerovia hese, tahaʼe haʼéva pe provléma rohasáva.

ROÑEASIGNA KÓMO MISIONÉRO HA SUPERINTENDÉNTE DE SIRKUÍTO

Áño 1957-pe, oñevendérõ guare pe estasión de rrádio WBBR, che aservi sapyʼami Betel de Broóklynpe amenda peve Angie rehe. Upéi roservi oñondive kómo prekursór 3 áñore Staten Íslandpe. Upe tiémpope ambaʼapo sapyʼami umi ojogua vaʼekuépe g̃uarã pe rrádio, péro upérõ hérama WPOW.

Angie ha che roñehaʼã roiko sensillomínte, ikatu hag̃uáicha roservi oĩháme nesesida. Péicha rupi, oñepyrũre áño 1961 roĩ dispuésto roasepta hag̃uáicha peteĩ invitasión roservi hag̃ua kómo prekursór espesiál Falls Cítype (Nebraska, Estados Unidos). Rog̃uahẽmírente upe lugárpe, rorresivi pe invitasión roasisti hag̃ua Eskuéla del Ministério del Rréinope. Upe tiémpope pe kúrso ojejapo South Lánsingpe (Nueva York) ha ipuku 1 mes. Heta mbaʼe roaprende pe klásepe ha heta rovyʼa, ha roipurusetereíma Nebráskape umi mbaʼe roaprendéva pe kúrsope. Péro roñesorprende rorresivírõ guare peteĩ asignasión pyahu: roñeinvita roservi hag̃ua kómo misionéro Cambóyape. Ko país iporãitéva opyta Ásiape, suréste gotyo. Upépe rohecha umi paisáhe neporãva, rohendu ha rotantea heta mbaʼe ipyahúva oréve g̃uarã. Ore ningo romombeʼuseterei pe marandu porã oñeʼẽva Ñandejára Rréinore umi hénte upepeguápe.

Péro peichaháguinte pe situasión polítika okambia Cambóyape ha rovámante Vietnam del Súrpe. Roĩ rire upépe 2 áño, aju cherasyete ha roho jeýmante Estados Unídospe. Tiémpo rire ajerrekupera porã ha rojapo jey pe servísio de tiémpo kompléto.

Che ha Angela 1975-pe, roñentrevista mboyve télepe

Marzo de 1965-pe, añepyrũ aservi kómo superintendénte de sirkuíto ha rovisita heta kongregasión. Angie ha che heta rovyʼa roservívo pe sirkuíto ha distrítope 33 áñore. Avei aipytyvõ oñeorganisa hag̃ua heta asambléa. Añetehápe avyʼa upe servísiope pórke siémpre chegustaitereíva umi asambléa. Unos kuánto áñore rovisita umi kongregasión oĩva Nueva Yórkpe ha pe siuda jerére. Heta asambléa ojejapo kuri pe Estadio de los Yánkeespe.

ROHO JEY BETÉLPE HA ASERVI UMI ESKUÉLA TEOKRÁTIKAPE

Umi áño ohasa vaʼekuépe, Angie ha che rorresivi heta asignasión pyahu ha ijetuʼúva. Por ehémplo, áño 1995-pe cheasigna hikuái aservi hag̃ua kómo  instruktór pe Eskuéla de Entrenamiénto Ministeriálpe. Upéi, 3 áño rire roñeinvita Betélpe. Upéva chembovyʼaiterei pórke 40 áño rire aha jey pe lugár añepyrũ haguépe che servísio de tiémpo kompléto. Peteĩ tiémpore ambaʼapo Departaménto de Servísiope, ha avei aservi kómo instruktór unas kuánta eskuélape. Áño 2007-pe, Kuérpo Governánte odesidi pe Departamento de Escuelas Teocráticas osupervisataha umi eskuéla ojejapóva guive Betélpe. Che aservi kuri unos kuánto áñore kómo superintendénte upe departaméntope.

Koʼã áño ohasa ramovévape, ojejapóma heta kámbio umi eskuélape. Por ehémplo, 2008-pe oñepyrũ pe Eskuéla Ansianokuérape g̃uarã. Ohasa rire 2 áño, 12.000 ansiáno oho Betel de Brooklyn ha Páttersonpe oñembokatupyry hag̃ua chupekuéra. Koʼág̃a ojejapóma upe eskuéla diferénte lugárpe, ha 2010 guive pe Eskuéla de Entrenamiénto Ministeriál hérama Eskuéla Vívlika umi kuimbaʼe Soltérope g̃uarã. Avei oñepyrũ pe Eskuéla Vívlika umi Omendávape G̃uarã.

Septiembre de 2014 guive koʼã mokõi eskuélagui ojejapo peteĩnte, ha héra Eskuéla Oñembokatupyryve hag̃ua umi Opredikávape. Upépe ikatúma oho umi ermáno ha ermána nomendáiva ha umi matrimónio. Entéronte ovyʼajoa oikuaa rire ko eskuéla ojejapotaha heta tetãme. Añetehápe iporãiterei hetave ermáno ikatúta haguére oho ko eskuélape, ha avyʼaiterei aikuaa haguére umi ermáno oaprovechasévape pe instruksión omeʼẽva Jehová organisasión.

Apensa jave umi mbaʼe ahasa vaʼekue ajevautisa guive pe gránhape koʼág̃a peve, aagradese Jehovápe omeʼẽ haguére chéve heta persóna iñarandúva. Haʼekuéra chepytyvõ aservi ha aikuaa porãve hag̃ua chupe. Oĩ vaʼekue ijapytepekuéra imitãvéva chehegui ha avei umi ijedáva. Orekóramo jepe hikuái diferénte kultúra, ohayhu Jehovápe ipyʼaite guive. Añetehápe avyʼaiterei areko haguére heta amígo iñarandúva oservíva Jehovápe. Chuguikuéra aaprende heta mbaʼe porã.

Avyʼa aikuaa haguére umi estudiánte oparupiguápe