Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Marzo de 2017

¿Mbaʼépa ikatu jajapo ani hag̃ua ñañemomombyry ñane amígogui?

¿Mbaʼépa ikatu jajapo ani hag̃ua ñañemomombyry ñane amígogui?

Ojapóma 50 áño rupi Gianni ha Maurizio oñoamígo hague. Péro peteĩ tiémpore haimete kuri opa pe amista orekóva hikuái. Maurizio omombeʼu: “Ahasárõ guare peteĩ situasión ijetuʼúva, aju vaʼekue ajapo heta mbaʼe vai, ha upéicha rupi haimete roñemomombyryete ojuehegui”. Gianni katu heʼi: “Maurizio ningo pe chemboʼe vaʼekue la Biblia, ha chéve g̃uarã haʼe la che túa espirituál. Péro ni naimoʼãi la ojapo vaʼekue. Añeñandu yvýre, pórke aikuaa porã ndaikatuveimaha roiko oñoamígoramo. Añandu chereja rei hague”.

PE AMISTA jarekóva peteĩ persónandi ikatu ñakompara umi tesórore, ha jaikoséramo oñoamígo tóda la vída ñañehaʼã vaʼerã jakuida ñane amistáre. Péro, ¿mbaʼépa ikatu jajapo oiméramo japerde potaite hína peteĩ amista? La Bíbliape omombeʼu oĩ hague persóna haimete oñemomombyry vaʼekue iñamígogui. Jahechamína mbaʼépa ikatu ñaaprende iñehemplokuéragui.

ÑANE AMÍGO OJAPO JAVE PETEĨ MBAʼE VAI

David ningo haʼe vaʼekue ovecharerekua oiko mboyve chugui rréi, ha oreko vaʼekue heta amígo. Oime vaʼerã katuete ñanemanduʼa peteĩva iñamígore hérava Jonatán (1 Sam. 18:1). Péro avei oreko vaʼekue ambue amígo, por ehémplo peteĩva héra Natán. Ñandejára Ñeʼẽ ndeʼíri arakaʼe guivépa haʼekuéra oñepyrũ kuri oñoamígo, péro jaikuaa David ojerovia hague hese ha okonsidera Natánpe iñamígo. Upévare omombeʼu kuri chupe ojaposeha peteĩ témplo Jehovápe g̃uarã. Koʼã mbaʼe ohechauka porã David omombaʼetereiha Natán opensáva, pórke Natán oheja pe espíritu sánto ogia chupe (2 Sam. 7:2, 3).

 Upéi oiko peteĩ mbaʼe haimete omomombyrýva ojuehegui David ha Natánpe. David ou oñeno Bat-seba ndive ha ojukauka iména Uríaspe (2 Sam. 11:2-21). David omombaʼéramo jepe pe tekojoja ha oservíma Jehovápe heta tiémpore, ou opeka vaieterei. ¿Mbaʼéiko oike David akãme? ¿Ndohechakuaái mbaʼe piko raʼe haʼe tuichaiterei ojavyha? ¿Opensápa raʼe Jehová ndohechamoʼãiha hembiapo vai?

¿Mbaʼépa ojapóta Natán? Ndahaʼéi ningo Natán año la oikuaáva David ojukauka hague Uríaspe, ¿mbaʼére piko upéicharõ haʼémante oho vaʼerã oñeʼẽ hendive? David ningo ojuka peteĩ persóna inoséntepe, upévare Natán ohóramo hendápe ikatu oapeligra hekove ha avei operde iñamista hendive.

Péro Natán haʼe Ñandejára proféta ha okirirĩnteramo, ikonsiénsia omolestáta chupe ha ndaikatumoʼãvéima ojogueraha porã David ndive. David katu oñemomombyry Jehovágui, ha tekotevẽ oñemoĩ porã jey hendive. Añetehápe oikotevẽ Natán rehe, peteĩ amígo oipytyvõtava chupe. Ko proféta omeʼẽ Davídpe Ñandejára mensáhe, ha upearã oipuru peteĩ ehémplo katuete opokótava ikorasõre. Péicha Natán oipytyvõ Davídpe ohechakuaa hag̃ua opeka vaieterei hague, ha tekotevẽha oarregla jey isituasión (2 Sam. 12:1-14).

Ha nde, ¿mbaʼépa rejapóta peteĩ ne amígo oúramo opeka? Ikatu repensa eréramo chupe álgo reperdetaha iñamista, térã retraisionataha chupe remombeʼúramo ansianokuérape. Péro añetehápe haʼekuéra añoite ikatu hína oipytyvõ ne amígope. ¿Mbaʼépa rejapóta ko situasiónpe?

Gianni, ñañeʼẽ hague iñepyrũme, omombeʼu: “Ahechakuaa Maurizio idiferenteha chendive, upéicha rupi adesidi añemongetataha hendive, péro aikuaa avei ijetuʼutaha upéva. Haʼe ningo iñexperiensiave chehegui, ¿mbaʼéiko che haʼéta chupe? Hiʼarive ndaikuaái mbaʼéichapa orreaksionáta. Péro chemanduʼa entéro umi mbaʼe rostudia vaʼekuére, ha upéva chepytyvõ añanima hag̃ua añeʼẽ hendive. Che aikotevẽrõ guare ajúda, Maurizio oñemongeta vaʼekue avei chendive. Che ningo ndaperdeséi iñamista, péro aipytyvõse che amígope pórke avaloraiterei chupe”.

Maurizio omombeʼu: “Gianni isinséro porã chendive, ha siertogua memete la heʼíva chéve. Aikuaa porã ndaikatuiha akulpa chupe ni Jehovápe asufri rupi koʼág̃a adesidi vai haguére. Upévare adesidi aaseptataha pe disiplína, ha tiémpo rire añemoĩ porã jey Jehovándi”.

PETEĨ ÑANE AMÍGO IPROVLÉMA JAVE

David oreko kuri hetave amígo oipytyvõva chupe umi situasión ijetuʼúvape. Por ehémplo peteĩva haʼe kuri Husai. La Biblia ohenói voi chupe “David amígo” (2 Sam. 16:16, TNM; 1 Crón. 27:33). Amalisia Husai haʼe vaʼekue peteĩ ofisiál pe palásiope, upévare haʼe pe rréi amígo ha oñekonfia chupe heta mbaʼe ótro ndoikuaáiva.

David raʼy hérava Absalón oipeʼasérõ guare itúagui la ipuésto pe rréinope, heta israelita oñemoĩ ifavórpe. Hiʼarive ndahaʼéi itaʼýrante la otraisiona vaʼekue Davídpe, síno avei unos kuánto iñamigoite. Péro Husai núnka notraisionái Davídpe. David okañýrõ guare, Husai oho hendápe. Avei oĩ dispuésto oapeligrávo hekove David rehehápe ha ojapo peteĩ mbaʼe ani hag̃ua Absalón osẽ ijidéape. Husai ojapo koʼã mbaʼe ohayhúgui iñamígope, ndahaʼéi ojapo vaʼerãgui reínte pórke ombaʼapo kómo ofisiál pe palásiope (2 Sam. 15:13-17, 32-37; 16:15–17:16).

Kongregasiónpe entéronte jajoayhu oñoermáno teéicha, ha ndahaʼéi jajoayhu vaʼerãgui reínte térã algúno oreko rupi priviléhio. Umi mbaʼe jajapóva ñane ermanokuéra rehehápe, ohechauka jajepyʼapyha hesekuéra ñande pyʼaite guive.

Péicha oñeñandu vaʼekue Federico iñamígo Antonio oipytyvõrõ guare chupe oñemoĩ  porã jey hag̃ua Jehovándi. Haʼe omombeʼu: “Antonio og̃uahẽre kongregasiónpe oiko orehegui oñoamigoite. Mokõivéva vyʼápe roservi kómo siérvo ministeriál, ha upe riremínte oñenombra chupe ansiáno. Antonio ningo che amígo, péro avei peteĩ ehémplo chéve g̃uarã”. Upéi, Federico ou tuichaiterei ojavy. Ha ojeruréramo jepe ajúda oñemoĩ porã jey hag̃ua espirituálmente, ndaikatuvéima oservi kómo prekursór ni siérvo ministeriál. ¿Mbaʼépa ojapo upémarõ Antonio?

Federico iprovlémarõ guare, Antonio ojapysaka porã hese ha omokyreʼỹ chupe

Federico omombeʼu: “Añemeʼẽ enkuénta Antonio chentende porãitereiha. Ojapo opa ikatúva cheapoja hag̃ua ha hiʼãiterei chupe pyaʼe añemoĩ porã jey Jehovándi. Siémpre oĩ che ykére. Pyʼỹi chemomanduʼa iñimportanteha amombarete che jerovia ha ndovaleiha añentrega”. Antonio heʼi: “Ajedesidi ahasavetaha tiémpo Federícondi. Aipota haʼe oñeñandu trankílo omombeʼu hag̃ua chéve oiméramo oĩ álgo omoñeñandu vaíva chupe”. Tiémpo rire, Federico tuicha oñakarapuʼã, ha oiko jey chugui prekursór ha siérvo ministeriál. Antonio omombeʼu: “Koʼág̃a roservíramo jepe diferénte kongregasiónpe, ore amista imbareteve yma guarégui”.

PETEĨ ÑANE AMÍGO OFALLÁRAMO ÑANENDIVE

¿Mbaʼéicha reñeñandúta peteĩ ne amigoite oúramo ofalla nendive reikotevẽve jave hese? Ndaipóri ningo ótra kósa ñanemoñeñandu vaivéva upévagui. ¿Reperdonátapa chupe? ¿Ikatútapa pejogueraha porã jey ymave guaréicha?

Epensamíntena mbaʼépa oiko Jesús omano mboyve. Haʼe ohasa vaʼekue heta tiémpo ijapostolkuérandi, upévare heʼi voi hesekuéra haʼeha iñamígo (Juan 15:15). Péro mbaʼépa oiko ojejagarrárõ guare chupe? Umi apóstol oheja rei Jesúspe ha okañy. Hiʼarive Pedro heʼi kuri arakaʼeve ndohejareimoʼãiha Imboʼehárape, péro nokumplíri iñeʼẽ pórke pe pyharépe voi heʼi ndoikuaaiha Jesúspe (Mat. 26:31-33, 56, 69-75).

 Jesús oikuaáma voi kuri ojechataha haʼeño ohasa aja umi pruéva ijetuʼuetéva. Ha upeichaite oiko, idisipulokuéra oheja rei chupe. Ajépa ñañeñandu vaietéta ojejapóramo ñanderehe upéva. Upéicharõ jepe, unos kuánto día rire Jesús oñeʼẽ jey hendivekuéra. Umi mbaʼe heʼívare ojekuaa noñedesepsionái, noñamargái ni ndaipyʼaroiha. Jesús norreklamái umi disípulope mbaʼérepa oheja rei chupe pe pyhare ojearrestárõ guare, ni ndoikói ombohysýi chupekuéra idefékto.

Upéva rangue, Jesús heʼi Pedro ha umi ótrope haʼe gueteriha iñamígo ha ojeroviaha hesekuéra. Avei oenkarga chupekuéra peteĩ tembiapo iñimportantetereíva. Haʼekuéra ojapo ikatúva guive anivéma hag̃ua ofalla Imboʼehárape, ha avei okumpli porã pe rresponsavilida onkargáva chupekuéra (Hech. 1:8; Col. 1:23). Umi disípulo arakaʼeve ndahesaraivéima pe mborayhu Jesús ohechauka vaʼekue chupekuéra.

Peteĩ ermána hérava Elvira núnka ndahesaraimoʼãi mbaʼéichapa iñamíga Giuliana otrata chupe orekórõ guare hikuái peteĩ provléma. Elvira omombeʼu: “Ambyasyeterei ningo heʼírõ guare chéve omoñeñandu vai hague chupe umi mbaʼe ajapóva hese, upévare haʼe oreko derécho ipochývo. Che apensa kuri chejehénte, ajepyʼapy rangue hese. Haʼe katu ojepreokupa cherehe pórke chénte la ajeperhudikáva ajavy haguére. Opokoiterei cherehe ahechakuaávo haʼe naimanduʼavéi hague umi mbaʼe vai ajapo vaʼekue hese. Siémpre chemanduʼáta upévare. Aagradese Jehovápe omeʼẽ haguére chéve peteĩ amíga nopensáiva ijehénte, síno añetehápe ojepyʼapýva cherehe”.

Upéicharõ, ¿mbaʼépa ikatu rejapo reperdepotaitéramo peteĩ amista? Peteĩ amígo teete oñemongeta porãta upe provlémare ha nomoñeñanduvaimoʼãi hapichápe. Natán ha Husai ojapo haguéicha, oĩta siémpre iñamígo ykére ohasa jave peteĩ provléma ijetuʼúva. Ha Jesús ojapo haguéicha, siémpre oĩta avei dispuésto oporoperdona hag̃uáicha. Eñeporandumína: “¿Che piko peichagua amígo?”.