“Pehesape vaʼerã umi hénte renondépe, haʼekuéra ohecha hag̃ua umi mbaʼe porã pejapóva ha ombotuicha pende Ru oĩva yvágape” (MAT. 5:16).

PURAHÉI: 77, 59

1. ¿Mbaʼépa ñanembovyʼaiterei?

JAVYʼAITE ningo ñahendu jave Ñandejára siervokuéra ohesapeha ko yvy tuichakuére. Pe áño ohasa vaʼekuépe, Jehová puévlo ojapo kuri mas de 10 millón estúdio bíblico. Avei hetaiterei persóna oñeinteresáva pe añeteguáre oho kuri pe Konmemorasionhápe. Upépe oaprende hikuái Jehová omeʼẽ hague entérope peteĩ rregálo iporãitereíva haʼéva Jesús sakrifísio (1 Juan 4:9).

2, 3. a) ¿Mbaʼépa nañandejokói jasegi hag̃ua jahesape “mbaʼerendýicha”? b) ¿Mbaʼépa jahecháta ko artíkulope?

Umi testígo de Jehová ningo oiko ko yvy tuichakuére, ha asegún pe lugár oikoha oñeʼẽ diferénte idióma. Upéicharõ jepe omombaʼeguasu Jehovápe peteĩ ñeʼẽme (Apoc. 7:9). Marãve ndoikói mbaʼe idiómapa ñañeʼẽ térã moõpa jaiko, enterovéva ikatu jahesape “mbaʼerendýicha [...] ko múndope” (Filip. 2:15).

Jasegi vaʼerã japredika, ñaneunído ha siémpre ñañatende porã vaʼerã, péicha katuete ñambotuicháta Jehovápe. ¿Mbaʼéichapa ikatu jahesape jajapo jave koʼã mbohapy mbaʼe? (Elee Mateo 5:14-16).

 ÑAIPYTYVÕ ÑANDE RAPICHÁPE OADORA HAG̃UA JEHOVÁPE

4, 5. a) Ñande jahesape japredika jave, ¿péro mbaʼéicha javépa jaheja avei omimbi pe lus jarekóva? b) ¿Mbaʼépa jahupytýta ñanderorýramo? (Ehecha pe taʼanga oĩva iñepyrũme).

Japredika ha jajapo jave disípulo, jaheja hína ohesape pe lus jarekóva (Mat. 28:19, 20). Áño 1925-pe, pe artíkulo hérava “Lus ohesapéva pytũmbýpe” heʼi koʼã ára pahápe avave ndaikatuiha ifiél ñande Ruvichápe ndoaprovecháiramo “pe oportunida ohesape hag̃ua pe lus orekóva”. Upéi heʼi: “Peteĩ persóna ikatu ohesape omombeʼúvo pe marandu porã umi héntepe ko yvy ape ári, ha oikóvo pe hesakãháme” (Ñemañaha, 1 de junio de 1925). Ndahaʼéi ningo pe predikasiónte la ombotuicháva Jehovápe, síno avei mbaʼéichapa ñañekomporta japredika jave. Heta persóna ohechakuaa upéva ñanderehe. Ñanderory ha ñaneamávlerõ jasaluda jave chupekuéra, ikatu hína opensa porã hikuái ñanderehe ha avei Jehováre.

Jesús heʼi vaʼekue idisipulokuérape: “Peg̃uahẽvo peteĩ ógape, pesaluda umi hénte oikóva pe ógape” (Mat. 10:12). Umi lugár Jesús opredika haguérupi, umi hénte ojepokuaámi omog̃uahẽ hógape umi extráñope. Péro koʼág̃arupi heta lugárpe umi hénte ndojepokuaavéi ojapo upéva. Pyʼỹinte oĩ inerviósova ha ipochýva voi algún extráño og̃uahẽ jave hógape. Péro ñande ñaneamávleramo, ikatu hína itrankilomie hikuái. Ñanderory ha jasaluda porãrõ umi héntepe japredika jave pe karríto reheve, hetave persóna oñembojáta ojagarra hag̃ua peteĩ puvlikasión. Ikatu voi upéva omomýi chupekuéra oñemongeta hag̃ua ñanendive.

6. ¿Mbaʼépa oipytyvõ peteĩ matrimónio ijedámavape osegi hag̃ua opredika?

Peteĩ matrimónio ijedámava oikóva Inglatérrape ndaikatuvéi kuri opredika ogahárupi pórke hasykatu hikuái. Upémarõ okoloka peteĩ mesa puvlikasión reheve hóga fréntepe. Hogakuéra ypýpe oĩ peteĩ eskuéla, upévare omoĩ hikuái umi puvlikasión ointeresátava umi tuakuéra ogueru ha ogueraháva ifamíliape eskuélape. Unos kuánto sy ha túa ogueraha umi puvlikasión, umíva apytépe pe lívro Mitãrusukuéra oñeporandúva jepi, volúmen 1 ha 2. Peteĩ prekursóra pyʼỹi omoirũ ko matrimóniope opredika hag̃ua. Umi sy ha túa ohechakuaa ko ermána horyetereiha ha pe matrimónio añetehápe oipytyvõseha umi héntepe. Peteĩ túa oñepyrũ voi ostudia la Biblia hendivekuéra.

7. ¿Mbaʼépa ikatu rejapo repredika hag̃ua umi rrefuhiádo oikóvape nde territóriope?

Ndaʼaréi heta persóna tekotevẽ hague oheja hóga ha oho oiko ótro paíspe kómo rrefuhiádo. ¿Mbaʼépa ikatu rejapo repredika hag̃ua umi rrefuhiádo oikóvape nde territóriope? Primero, ikatu reaprende resaluda hag̃ua chupekuéra iñidiómape. Pe aplikasión JW Language rupive ikatu reaprende umi fráse nepytyvõtava oñeinteresa hag̃ua hikuái la erévare ha oñemongeta hag̃ua nendive. Upéi, rehechaukakuaa chupekuéra umi vidéo térã puvlikasión oĩva iñidiómape jw.org-pe (Deut. 10:19).

8, 9. a) ¿Mbaʼéichapa ñanepytyvõ ñane rreunión éntre semanagua? b) ¿Mbaʼéichapa tuakuéra ikatu oipytyvõ ifamíliape okomenta hag̃ua rreunionhápe?

Jehová omeʼẽ ñandéve la ñaikotevẽva guive japredika porã hag̃ua. Por ehémplo, umi mbaʼe ñaaprendéva ñane rreunión héravape Mbaʼéichapa Jaiko ha Japredika vaʼerã ñanepytyvõ ñaĩ hag̃ua preparádo jajapo porãve hag̃ua rrevisíta ha estúdio bíblico.

Umi ou ramóva ñane rreuniónpe  pyʼỹinte oponderaiterei umi mitã okomenta jave. Peẽ tuakuéra ikatu pemboʼe pene famíliape okomenta hag̃ua iñeʼẽtépe. Oĩ persóna oñepyrũva oñemoag̃ui Jehováre ohendu rire mbaʼéichapa umi mitã okomenta ipyʼaite guive (1 Cor. 14:25).

ÑAÑEHAʼÃKENA ÑANEUNIDOVE

10. ¿Mbaʼéichapa pe estúdio de família ñanepytyvõ ñaneunidove hag̃ua ñande rogapýpe?

10 Ñañehaʼãmbaite jave ñaĩ hag̃ua pyʼaguapýpe ha peteĩ ñeʼẽme ñane rogapýpe, ñambotuicha hína Jehovápe. Oiméramo nde peteĩ túa, eñehaʼã ejapo meme pe estúdio de família. Por ehémplo, oĩ família ohecháva pe prográma mensuál JW Broadcasting ha upéi okomenta hikuái mbaʼéichapa ojapóta umi mbaʼe oaprendéva. Péro ani nderesarái umi mbaʼe oikotevẽva mitãnguéra idiferenteha la oikotevẽvagui mitãrusukuéra. Ejapókena ikatúva guive ideprovécho hag̃ua pe estúdio de família káda uno nde rogayguakuérape (Sal. 148:12, 13).

Ñanemokyreʼỹetereíta ñañeinteresáramo umi ermáno ijedávare (Ehecha párrafo 11)

11-13. ¿Mbaʼépa ikatu jajapo ñaneunidove hag̃ua kongregasiónpe?

11 Nemitãitiramo jepe ikatu hína reipytyvõ pe kongregasión iñunidove hag̃ua, ha avei ikatu remokyreʼỹ enterovévape ohesape hag̃ua pe lus orekóva. ¿Mbaʼépa ikatu rejapo? Por ehémplo, iporãta reñeinteresáramo umi ijedávare. Haʼekuéra ikatu omombeʼu ndéve umi experiénsia porã orekóva oservi rupi heta áñorema Jehovápe. Koʼã mbaʼe añetehápe nemokyreʼỹta ndéve ha chupekuéra avei. Tahaʼe imitãva térã ijedáva oñehaʼã vaʼerã orresivi porã umi ou ramóvape Salónpe. Ha upéva ningo ndahasyiete jajapo hag̃ua, tekotevẽnte jasaluda, ñanderory, jaheka peteĩ lugár oguapy hag̃ua ha ñapresenta chupekuéra umi ermánope. Péicha oñeñandúta hikuái hogapeguáicha.

12 Oiméramo remoakã hína pe aty ojejapóva oñesẽ mboyve predikasiónpe, ikatu hína reipytyvõ umi ijedávape ohesape mbarete hag̃ua pe lus orekóva hikuái. Iporã rejeasegura toreko hikuái peteĩ território opyta porãtava chupekuéra. Ejapo arréglo ikatu hag̃uáicha mitãrusukuéra ombaʼapo avei hendivekuéra. Umi ermáno ha ermána ijedáva ha hasykatumíva pyʼỹinte oñedesanima, pórke ndaikatuvéi opredika ymave guaréicha. Péro ohechakuaárõ hikuái  reñangarekoha hesekuéra ha rentendeha la isituasión, oñeñandu porãvéta. Retrata porãramo enterovévape ikyreʼỹta hikuái predikasiónpe, oiméramo jepe ijedáma térã aréma oservi hague Jehovápe (Lev. 19:32).

13 Umi israelita vyʼápe oadora vaʼekue oñondivepa Jehovápe. Pe salmísta ohai vaʼekue: “Ajépa iporã ha igustoite umi ermáno oiko porãrõ oñondivepa peteĩ famíliaicha” (elee Salmo 133:1, 2). Haʼe okompara pe unida pe aséite ojepurúvare oñeunhi hag̃ua. Upéva ningo hyakuã asy ha ombopiroʼy ñande pire. Péicha avei, ñaneamávle ha ñanembaʼeporãramo ñane ermanokuérandi opyta ipiroʼy hikuái, ha pe kongregasión iñunidovéta. ¿Ikatúpa reñehaʼã reikuaa porãve umi ermáno ha ermanakuérape? (2 Cor. 6:11-13).

14. ¿Mbaʼéichapa ikatu jaheja pe lus jarekóva ohesape pe lugár jaikohápe?

14 Ñande ikatu jaheja ñande lus ohesape ñaĩ ñaĩháme. Por ehémplo ñane vesinokuéra ohechávo mbaʼeichaitépa ñanderory ha ñanembaʼeporã ikatu hína oikuaaseve hikuái Jehovágui. Upévare, eñeporandumína: “¿Mbaʼépa opensa chehegui che vesinokuéra? ¿Ipotĩ ha iñordenádopa che róga? ¿Ipínta porãvépa che várrio añangareko porã haguére che rógare? ¿Aipytyvõpa che vesínope oikotevẽ jave?”. Eporandu ermanokuérape mbaʼéichapa pe vuén ehémplo omoĩva hikuái oipytyvõ oñeʼẽ porã hag̃ua hesekuéra ihénte, ivesinokuéra, térã ikompañéro de traváho o de eskuéla (Efes. 5:9).

“PEÑATENDE PORÃKE PEIKÓVO”

15. ¿Mbaʼérepa tekotevẽterei ñañatende porã?

15 Jaipotáramo pe lus jarekóva ohesape porãve ohóvo tekotevẽ ñanemanduʼa mbaʼe tiémpopepa jaiko hína. Jesús ningo heʼi vaʼekue heta vése idisipulokuérape: “Peñatende porãke peikóvo” (Mat. 24:42; 25:13; 26:41). Ñapensáramo heta gueteri ofaltaha oñepyrũ hag̃ua pe “jehasa asy guasu”, ikatu hína jajedeskuida ha nañaimevéi aténto. Upéva oikórõ ñanderehe ndajaaprovechamoʼãi entéro oportunida oñepresentáva ñaipytyvõ hag̃ua ñande rapichápe oikuaa hag̃ua Jehovápe (Mat. 24:21). Oikóramo upéva ñanderehe pe lus jarekóva nomimbimoʼãi, upéva rangue ikangyvéta ohóvo ha ikatu voi oguete.

16, 17. ¿Mbaʼépa ikatu jajapo jasegi hag̃ua ñañatende porã?

16 Amáske ivaive ohóvo la situasión, enterovéva ñañatende porã vaʼerã. Jehová ojapóta hembipota itiempoitépe, ha ndajadudái vaʼerã oikotaha upéva (Mat. 24:42-44). Péro upe aja iporã ñanepasiénsia ha ñaĩ aténto umi mbaʼe oikótavare. Jaleékena Ñandejára Ñeʼẽ káda día ha ñañemboʼe meme (1 Ped. 4:7). Iporãta avei ñañehaʼãramo ñaaprende umi ermáno oservímavagui Jehovápe heta áñore. Upearã ikatu jalee umi ermáno rembiasakue osẽva ñane puvlikasiónpe, por ehémplo pe hérava “Setenta áñorema añakãrama ‘peteĩ hudío ao ruguáire’” osẽ vaʼekue Ñemañaha 15 de abril de 2012-pe, páhina 18-21.

17 Eñehaʼãkena nerembiapo heta Jehová servísiope. Ejapo iporãva ótro rehehápe ha ekomparti ermanokuérandi. Péicha revyʼáta ha rehecháta mbaʼéichapa pyaʼe ohasa la tiémpo (Efes. 5:16). Umi 100 áño ohasa vaʼekuépe Ñandejára siervokuéra heta mbaʼéma ohupyty. Koʼág̃a katu hetaiteve ñanerembiapo yma guarégui. Jehová ñandegia jahupyty hag̃ua heta mbaʼe ni nañapensái vaʼekue jahupytytaha. Añetehápe ñande lus ohesape mbaretevéntema koʼág̃a.

Umi visíta de pastoréo omeʼẽ ñandéve oportunida ñañevenefisia hag̃ua Ñandejára arandúgui (Ehecha párrafo 18, 19)

18, 19. ¿Mbaʼéichapa ansianokuéra ikatu ñanepytyvõ jaservi hag̃ua Jehovápe kyreʼỹme? Emoĩ peteĩ ehémplo.

 18 Ñaneimperféktoramo jepe, Jehová oheja jaservi chupe. Haʼe omeʼẽ ñandéve “kuimbaʼekuéra rregáloramo”. Umíva hína umi ansiáno oĩva kongregasiónpe (elee Efesios 4:8, 11, 12). Umi ansiáno ñandevisita jave, jaaprovecha vaʼerã pe tiémpo ohasáva ñanendive ñaaprende hag̃ua chuguikuéra. Haʼekuéra ningo iñarandu ha omeʼẽ konsého iporãva.

19 Por ehémplo, peteĩ matrimónio Inglaterragua ou kuri iprovléma. Upémarõ ojerure mokõi ansiánope oipytyvõ hag̃ua chupekuéra. Pe tembireko ningo opensa iména nomoakãporãiha hogapy. Pe ména orrekonose nomboʼekuaaiha ha ndojapomemeiha pe estúdio de família. Umi ansiáno oipytyvõ ko matrimóniope opensa hag̃ua Jesús ehémplore. Heʼi pe ménape opensa hag̃ua mbaʼéichapa Jesús oñangareko vaʼekue idisipulokuérare, ha omokyreʼỹ chupe osegi hag̃ua iñehémplo. Avei omokyreʼỹ pe ermánape ipasiénsia hag̃ua iménare, ha oakonseha chupekuéra mbaʼéichapa ikatu ojapo pe estúdio de família mokõivéva ifamíliandi (Efes. 5:21-29). Upéi pe ména oñehaʼãmbaite omoakã porãve hogapy. Umi ansiáno omokyreʼỹ chupe ani hag̃ua oñentrega ha osegi hag̃ua ojerovia Jehová espíriture. Koʼã ansiáno ohechauka oporohayhu ha ipyʼaporãha, ha upéva tuichaiterei oipytyvõ pe famíliape.

20. ¿Mbaʼépa oikóta rehejáramo ohesape pe lus reguerekóva?

20 La Biblia heʼi: “Ovyʼa entéro persóna orrespetáva Jehovápe, umi siémpre oikóva hapére” (Sal. 128:1). Katuete revyʼavéta rehejáramo ohesape pe lus reguerekóva. Emboʼékena ótrope Ñandejára Ñeʼẽ, ejapo ikatúva guive peĩ hag̃ua unído nde rogapýpe ha kongregasiónpe, ha siémpre eñatende porã. Péicha umi ótro ohecháta pe ehémplo porã remoĩva, ha ikatu voi heta oĩ ombotuichasétava avei ñande Ru Jehovápe (Mat. 5:16).