¿Releépa raʼe umi rrevísta Ñemañaha osẽ ramovéva? Ehechamína ikatúpa nemanduʼa koʼã mbaʼére:

¿Mbaʼépa ojapo vaʼerã umi omoakãva kongregasión, tahaʼe superintendénte de sirkuíto térã ansiáno orresivi jave instruksión Ñandejára organisasióngui?

Koʼã ermáno pyaʼe porã osegi vaʼerã umi instruksión. Upévare iporã oñeporandu hikuái: “¿Amokyreʼỹpa umi ermánope iñeʼẽrendu hag̃ua Jehovápe? ¿Añehaʼãpa pyaʼe asegi umi instruksión arresivíva Ñandejára organisasióngui?” (w16.11, páh. 11).

¿Arakaʼe guivépa umi kristiáno verdadéro opyta Babilonia poguýpe?

Upéva oiko kuri umi apóstol omano riremi. Upérõ umi kristiáno guaʼu apytépe oñeforma peteĩ grúpo omoakãva chupekuéra ha oñemombaʼeguasúva. Pe iglésia oñepyrũ ombaʼapo umi governántendi ha oapoja umi kristiáno guaʼúpe. Upéicha rupi saʼi oĩ ohenduséva umi kristiáno ifiélvape. Péro heta tiémpo áño 1914 mboyve umi kristiáno unhído oñepyrũma ojei Babilonia Guasu poguýgui (w16.11, páh. 23-25).

¿Mbaʼérepa iñimportánte Lefèvre dʼÉtaples ojapóva vaʼekue?

Áño 1520 guive Lefèvre otradusi la Biblia idióma francéspe olee hag̃ua opaichagua hénte. Haʼe oñehaʼã oexplika umi versíkulo isensilloveháicha oñentende porãve hag̃ua. Upéi oĩ vaʼekue avei ojapóva upéva, umíva apytépe Martín Lutero, William Tyndale ha Juan Calvino (wp16.6, páh. 10-12).

¿Mbaʼépa heʼise ñapensa meme ñande rete rembipotáre ha ñapensa meme espíritu sánto oguerohorývare? (Rom. 8:6)

Pe opensa meméva hete rembipotáre oñeinteresaiterei pe ogustávare chupe ha manterei oñeʼẽ upévare. Pe opensa meméva espíritu sánto oguerohorývare katu omotenonde Ñandejára servísio, opensa haʼe opensaháicha ha oheja pe espíritu sánto ogia chupe. Ñapensa memérõ ñande rete rembipotáre, ñamanóta. Péro ñapensa memérõ espíritu sánto oguerohorývare, jaikovéta ha ñaiméta pyʼaguapýpe Ñandejára ndive (w16.12, páh. 15-17).

¿Mbaʼépa rejapokuaa ani hag̃ua rejepyʼapyeterei?

Ehecha mbaʼépa la iñimportantevéva, ani rehaʼarõiterei ndejehegui ha umi ótrogui, káda día remboyke vaʼerã tiémpo reime hag̃ua trankílo, edisfruta Jehová kreasióngui, eñehaʼã epukave, ejapo meme ehersísio ha epytuʼu porã (w16.12, páh. 22 ha 23).

¿Mbaʼépa heʼise Enócpe ojegueraha hague “ani hag̃ua ohasa asy omanóvo”? (Heb. 11:5)

Amalisia Jehová oipeʼánte chugui hekove pono omano asy ikontrariokuéra pópe (wp17.1, páh. 12 ha 13).

¿Mbaʼérepa koʼág̃a peve iñimportánte ñaneumílde?

Ñaneumílderamo jaikuaáta moõ pevépa omeʼẽ ñande kapasida ha ñarrekonoséta oĩha heta mbaʼe ikatuʼỹva jajapo. Avei ndovaléi ñañemombaʼeguasu, ha ñanemanduʼa vaʼerã umi mbaʼe jajapóva ikatuha oafekta ótrope (w17.01, páh. 18).

¿Mbaʼérepa jaʼekuaa Ñandejára odirihi hague pe Kuérpo Governánte síglo primeropeguápe odirihiháicha pe Kuérpo Governánte ñane tiempopeguápe?

Pe espíritu sánto rupive haʼekuéra ontende la Biblia. Avei umi ánhel oipytyvõ pe Kuérpo Governántepe ojepredika porã hag̃ua. Ha ojerovia hikuái Ñandejára Ñeʼẽ ikatuha ogia chupekuéra. Koʼã mbaʼe oipytyvõ avei pe Kuérpo Governánte ñane tiempopeguápe (w17.02, páh. 26-28).

¿Mbaʼépa nepytyvõta remombaʼe hag̃ua pe rreskáte?

Rejepyʼamongeta jave ko rregálo porãitére, iporã repensami: mávapa orregala ndéve, mbaʼérepa ojapo upéva, mbaʼe sakrifísiopa ojapo raʼe pe persóna omeʼẽ hag̃ua ndéve pe rregálo, ha mbaʼeichaitépa upéva ideprovécho ndéve (wp17.2, páh. 4 ha 5).

¿Ikatúpa sapyʼánte ñakambia peteĩ mbaʼe jadesidíma vaʼekue?

Iporã ningo siémpre ñakumpli la jaʼéva. Péro sapyʼánte tekotevẽtamante jahecha jey la jadesidíma vaʼekue. Jehová odesidi kuri ohunditaha Nínivepe, péro upéi okambia pórke ohecha umi persóna oñarrepenti hague. Ñande avei sapyʼánte tekotevẽta ñakambia peteĩ mbaʼe jadesidíma vaʼekue okambia jave peteĩ situasión, térã jarresivi rupi informasión pyahu (w17.03, páh. 16 ha 17).

¿Mbaʼérepa ipeligróso pe chísme?

Pórke ñambyaive reíta pe situasión ñamombeʼúvo ótrope. Jaʼéramo algúna kósa ikatúva omoñeñandu vai ñande rapichápe, noipytyvõmoʼãi oñesolusiona hag̃ua upe provléma, ombyaive reíta guei la káva raity (w17.04, páh. 21).