Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2017

Jehová katuetei ñanekonsola jahasa asy jave

Jehová katuetei ñanekonsola jahasa asy jave

“Ñandejára omeʼẽva opaichagua konsuélo [...] ñanekonsola opa umi ñande jehasa asýpe” (2 COR. 1:3, 4).

PURAHÉI: 38, 56

1, 2. ¿Mbaʼéichapa Jehová ñanekonsola ñaneprovléma jave, ha mbaʼe promésapa jatopa Iñeʼẽme?

PETEĨ ermáno imitãva opensa 1 Corintios 7:28 heʼívare. Upépe oñeʼẽ umi omendávare ha heʼi heta iprovlemataha hikuái. Ko ermáno oñeʼẽ peteĩ ansiáno omendávandi ijedavéva chugui, ha oporandu chupe: “¿Mbaʼe piko heʼise heta iprovlemataha umi omendáva, ha mbaʼéicha piko ikatu ambohovái umíva peichahágui ajúramo amenda? Pe ansiáno orresponde mboyve chupe la ipregúnta, heʼi opensa hag̃ua avei ko téxtore: “Ñandejára omeʼẽva opaichagua konsuélo. Haʼe ñanekonsola opa umi ñande jehasa asýpe” (2 Cor. 1:3, 4).

2 Ñande ningo jaikuaa Ñande Ru Jehová ñanderayhu ha ñanekonsolaha ñaneprovléma jave. Oime vaʼerã ñanemanduʼa mbaʼéichapa haʼe ñanepytyvõ ha ñandegia Iñeʼẽ rupive. Jehová oipota la iporãvéva ñandéve g̃uarã, oipota haguéicha avei isiervokuéra yma guarépe g̃uarã (elee Jeremías 29:11, 12).

3. ¿Mbaʼe porandúpa ñambohováita ko artíkulope?

 3 Heta vése ifasilve jagueropuʼaka hag̃ua umi provléma jaikuaáramo mbaʼérepa oiko umíva. ¿Mbaʼérepa upéicharõ ikatu ñaneprovléma ñande rogapýpe ha ñane matrimóniope? ¿Mbaʼéichapa umi ehémplo bíblico ha ñane tiempopegua ikatu ñanekonsola? Ñambohovaimína koʼã porandu jaikuaa hag̃ua mbaʼépa ñanepytyvõta jahasa jave umi situasión ijetuʼúva.

UMI OMENDÁVA “HETA IPROVLÉMATA”

4, 5. ¿Mbaʼépa ombohovái jepi umi omendáva?

4 Jehová omoñepyrũrõ guare pe matrimónio heʼi vaʼekue: “Pe kuimbaʼe ohejáta itúa ha isýpe, ha opytáta hembirekóndi, ha mokõivégui oikóta peteĩntema” (Gén. 2:24, TNM). Añetehápe ningo entéronte ñaneimperfékto (Rom. 3:23). Upévare umi omendáva ikatu hína iprovléma imatrimóniope. Por ehémplo, omenda mboyve pe tembireko iñeʼẽrendu vaʼerã kuri ituakuérape, péro la Biblia heʼi iména omoakã vaʼerãha chupe koʼág̃a (1 Cor. 11:3). Ikatu avei ñepyrũrã pe ménape ijetuʼu omoakã hag̃ua hogapy, ha pe tembirekópe katu ndaifasilpái oasepta hag̃ua iména odesidíva, ymave oasepta haguéicha ituakuéra heʼíva. Upéicha avei, umi omenda ramóva ikatu ojoavy isuegrokuérandi ha ou iprovléma upe haguére.

5 Ñapensamína avei mbaʼéichapa oñeñandúne peteĩ matrimónio oikuaávo ifamiliataha hikuái. Katuete ningo ombovyʼa chupekuéra upéva, péro ojepyʼapy avei opytávo. Por ehémplo, ndoikuaái hikuái oho porãtapa hese pe tembireko hyeguasu aja, térãpa hesãita pe mitã. Haʼekuéra oikuaa avei ogasta hetataha. Onase rire pe mitã tekotevẽta ojapo hikuái hetave kámbio. Pe sy oipuruve vaʼerã itiémpo oñangareko hag̃ua imembýre. Upévare, umi omendáva ndaikatumoʼãi ohasa tiémpo oñondive yma ojapo haguéicha. Pe túa katu orekóta hetave rresponsavilida. Haʼe oñehaʼãmbaite vaʼerã ani hag̃ua ombofalta mbaʼeve hembirekópe ni ifamíliape.

6-8. ¿Mbaʼéichapa ikatu oñeñandu umi matrimónio ifamiliaséva péro ndaikatúi?

6 Sapyʼánte umi omendáva ombohovái ambue situasión ijetuʼúva: ifamiliaseterei hikuái, péro ndaikatúi. Pyʼỹinte umi tembireko ndaikatúiva hyeguasu oñeñandu vaieterei (Prov. 13:12). Ymave umi kuñáme g̃uarã iñimportanteterei vaʼekue omenda ha imemby. Por ehémplo, Jacob rembireko hérava Raquel opyta yvýre ohechávo iñermána ikatuha imemby péro haʼe nahániri (Gén. 30:1, 2). Koʼág̃arupi oĩ tetã umi hénte opensaha iñimportantetereiha ñanefamília reta. Umi lugár rupi, oñeporandu jepi ñane ermanokuéra oservívape de misionéro mbaʼérepa naifamíliai. Koʼã ermáno oñehaʼãramo jepe oexplika porã chupekuéra, lomímonte oĩ heʼíva: “¡Maʼẽna anga! Roñemboʼéta penderehe”.

7 Jahechamína mbaʼépa ohasa vaʼekue peteĩ ermána Inglaterragua. Haʼe ningo imembyseterei vaʼekue péro ndaikatúi. Oñemeʼẽrõ guare enkuénta ndaikatumoʼãiha imemby, opyta oñembyasyeterei. Upéi, haʼe ha iména odesidi oadoptataha peteĩ mitã. Upéicharõ jepe pe ermána osegi oñembyasy peteĩ tiémpore. Haʼe heʼi: “Aikuaa porã vaʼekue peteĩ mitã aadoptáva, ndaikatumoʼãiha oñembojoja peteĩ onasévare che retepýgui”.

 8 La Bíbliape heʼi: “Pe kuña ojesalva vaʼerã imemby rupi” (1 Tim. 2:15). Péro upéva ndeʼiséi peteĩ kuña imemby haguére ohupytytaha pe jeikove opaveʼỹva. Upéicharõ, ¿mbaʼépa heʼise ko téxto? Peteĩ sy ningo heta oñehaʼã oñangareko porã hag̃ua imembýre ha hógare. Koʼã mbaʼe ogueraha tiémpo ha oipytyvõ chupe ani hag̃ua oiko ochismosea térã ojokupa hapicha ojapóvare (1 Tim. 5:13). Upéicharõ jepe, haʼe ikatu ohasa umi situasión ijetuʼúva imatrimóniope ha hogapýpe.

¿Mbaʼépa ikatu nekonsola omanóramo ne rembiayhu? (Ehecha párrafo 9 ha 12)

9. ¿Mbaʼépa ikatu ohasa avei umi omendáva?

9 Oĩ avei ótra situasión ijetuʼúva ohasáva umi omendáva. Por ehémplo, ikatu ou omano chugui hembiayhu. Añetehápe umi omendáva nopensái oikotaha hesekuéra upéva, péro sapyʼánte ogueropuʼaka vaʼerã pe ñembyasy guasuete. Umi kristiáno ojeroviaiterei oikove jeytaha umi omanóva, ha pe promésa tuicha okonsola umi operde vaʼekuépe hembiayhu (Juan 5:28, 29). Iñeʼẽme, ñande Ru Jehová ojapo heta promésa ñanekonsoláva jahasa asy jave. Jahechamína koʼág̃a mbaʼéichapa Ñandejára okonsola isiervokuérape ha mbaʼéichapa oipytyvõ chupekuéra.

MBAʼÉPA IKATU ÑANEKONSOLA JAHASA ASY JAVE

10. ¿Mbaʼépa okonsola raʼe Ánape? (Ehecha pe taʼanga oĩva iñepyrũme).

10 Jahechamína la oiko vaʼekue Ánare, Elqaná rembireko. Haʼe ningo imembyseterei vaʼekue, péro ndaikatúi. Iména oreko vaʼekue ótra hembireko hérava Peniná, ha haʼe katu imemby reta (elee 1 Samuel 1:4-7). Hiʼarive Peniná oñembohory hese “káda áño”. Upéva omoñeñandu vaieterei Ánape. ¿Mbaʼépa okonsola raʼe chupe? Haʼe oñemboʼe Jehovápe. Avei oho pe témplope ha oñemboʼe are upépe. Ana ojeroviaiterei Ñandejárare, upévare ojerure chupe imembymínte hag̃ua. Ana oñemboʼe rire, oñeñandu porãvéma ha “trankiloite oho, okaru ha noñekevrantavéima” (1 Sam. 1:12, 17, 18, TNM). Haʼe ojerovia Jehová omeʼẽtaha chupe imembyrã térã okonsolataha chupe iporãveháicha.

11. ¿Mbaʼéichapa pe ñemboʼe ñanekonsola?

11 Ñaneimperfékto rupi ha jaiko haguére Satanás múndo añáme, jasegíta gueteri jahasa heta mbaʼe ijetuʼúva (1 Juan 5:19). Péro nañaiméi ñaneaño, ikatu ñañemboʼe Jehovápe, pórke haʼe hína “Ñandejára omeʼẽva opaichagua konsuélo”. Péicha ojapo vaʼekue Ana. Haʼe omombeʼu Jehovápe mbaʼéichapa oñeñandu ha ojerure asy chupe ajúda. Upéicha avei, jahasa jave umi situasión ijetuʼúva ndahaʼéi ñamombeʼúnte vaʼerã Ñandejárape ñane provléma. Tekotevẽ jajerure asy chupe tañanepytyvõ ha ñamombeʼupaite umi mbaʼe ñandejopýva (Filip. 4:6, 7).

12. ¿Mbaʼérepa Ana ovyʼa ohasáramo jepe heta mbaʼe ijetuʼúva?

12 Ndaikatúiramo ñanefamília térã omanóramo ñandehegui peteĩ jahayhúva, katuete jahasa asyeterei hína. Upéicharõ jepe oĩ heta mbaʼe ikatúva ñanekonsola. Ñapensamína Ánare, oiko vaʼekue Jesús tiémpope. Haʼe ningo omenda vaʼekue, péro siete áño haguépe iména ou omano. La Biblia ndeʼíri avei haʼe imemby hague. ¿Mbaʼépa oipytyvõ raʼe Ánape? Haʼe “arakaʼeve ndofaltáiva pe témplope”. Orekóramo jepe 84 áño, osegi oho pe témplope oñemboʼe ha oadora hag̃ua Jehovápe (Luc. 2:37). Koʼã mbaʼe  okonsola ha oipytyvõ Ánape ovyʼa hag̃ua, ohasáramo jepe umi mbaʼe ijetuʼúva.

13. ¿Mbaʼéichapa ñane amigokuéra ikatu ñanepytyvõ ñane hentekuéra ndojapóiramo upéva?

13 Umi amígo jarekóva kongregasiónpe tuicha avei ñanekonsola (Prov. 18:24). Ñapensamína Paula ehémplore. Haʼe oreko vaʼekue cinco áñonte isy ohejárõ guare Jehovápe. Ko situasión ijetuʼueterei Páulape g̃uarã, upévare ndovyʼavéi. Péro peteĩ prekursóra hérava Ann omokyreʼỹ chupe ha oñeinteresa ipyʼaite guive hese. Paula heʼi: “Ann ndahaʼéiramo jepe che hénte, añandu cherayhu ha oñeinteresaha cherehe. Upéva chepytyvõ asegi hag̃ua aservi Jehovápe”. Upéi Paula sy oñemoag̃ui jey kongregasiónre, ha upéva ombovyʼaiterei Páulape. Ann ovyʼa avei ikatu haguére oipytyvõ Páulape ani hag̃ua oñemomombyry Jehovágui.

14. ¿Mbaʼépa jahupyty ñaporokonsola jave?

14 Jajapo jave umi mbaʼe porã ñande rapichakuéra rehehápe, pyʼỹinte ñanderesarái ñane provlemakuéragui. Por ehémplo, heta ermána, tahaʼe omendáva térã nomendáiva, oikuaa porã okomparti jave pe marandu porã hapichakuérandi ombaʼapoha hína Jehovándi ha ojapoha hembipota. Upéva ombovyʼaiterei chupekuéra. Añetehápe enterovéva ikatu jahechauka ñañeinteresaha ñande  rapichakuérare ñamombeʼúvo pe marandu porã. Avei, ñanembaʼeporã jave ñane ermanokuérandi ñañemoag̃uive hesekuéra (Filip. 2:4). Péicha ojapo vaʼekue apóstol Pablo. Haʼe ningo oñangareko vaʼekue umi ótrore “peteĩ sy omokambu ha omokunuʼũháicha imembýpe”. Avei, haʼe okonsola ha omokyreʼỹ iñermanokuérape “ojapoháicha peteĩ túva ifamiliakuérandi” (elee 1 Tesalonicenses 2:7, 11, 12).

ÑAIPYTYVÕ UMI FAMÍLIAPE

15. ¿Mávapa oreko pe rresponsavilida omboʼe hag̃ua umi mitãme pe añetegua?

15 ¿Mbaʼéichapa ikatu ñaipytyvõ umi família oĩvape kongregasiónpe? Sapyʼánte umi ermáno ipyahúva Jehová organisasiónpe ojerure ótro iñexperiensiavévape ikatu hag̃uáicha oipytyvõ chupe omboʼekuaa hag̃ua la Biblia ifamíliape. Ikatu voi ojerure chupe ostudia hag̃ua hendivekuéra. Upéicharõ jepe, la Biblia ohechauka Jehová omeʼẽha tuakuérape pe rresponsavilida omboʼe hag̃ua ifamíliape (Prov. 23:22; Efes. 6:1-4). Péro oĩramo jepe ótro oipytyvõva chupekuéra upearã, tuakuéra lomímonte osegi vaʼerã omboʼe ifamíliape. Umi sy ha túa ningo tekotevẽterei oñemongeta meme umi mitãndi.

16. ¿Mbaʼe mbaʼépa jareko vaʼerã enkuénta jastudiátarõ peteĩ mitãndi?

16 Peteĩ túa térã sy ojeruréramo ñandéve jastudia hag̃ua ifamíliandi, ñanemanduʼa vaʼerã ñande ndajarekoiha pe autorida orekóva ituakuéra hese. Sapyʼánte ikatu voi ñambostudia peteĩ mitãme ituakuéra ndahaʼéiva Testígo. Tahaʼe haʼeháicha, jastudia jave umi mitãndi iñimportánte oĩ presénte ituakuéra térã ótro ermáno iñakãguapýva. Térã ikatu jajapo upéva peteĩ lugár nañaimemoʼãihápe ñaneaño pe mitãndi ani hag̃ua oñepensa vai ñanderehe. Tiémpo rire, tuakuéra voi ikatu omboʼe ifamíliape Jehová oipotaháicha.

17. ¿Mbaʼéichapa taʼyrakuéra ikatu oipytyvõ hogayguakuérape?

17 Mitãrusukuéra oñehekomboʼéva ohayhu ha iñeʼẽrendu hag̃ua Jehovápe, oipytyvõ ha omokyreʼỹ umi hogayguápe. Haʼekuéra orrespeta ituakuérape ha ombaʼapo oipytyvõ hag̃ua chupekuéra ekonómikamente ha heta hendáicha. Avei, umi mitã osegírõ ifiél Jehovápe omokyreʼỹeterei ifamília kompletoitépe. Pe dilúvio mboyve, Lamec oadora vaʼekue Jehovápe. Haʼe heʼi itaʼýra Noé rehe: “Ko mitã tuicha ombovevýita ñandéve ñande traváho, pórke hetáma ñambaʼapo asy. Péicha oiko ñanderehe Jehová omaldesi haguére ko yvy” (Gén. 5:29, TNM; 8:21). Koʼág̃arupi avei umi mitã oñehaʼãva ojerovia mbarete Jehováre ikatu omoñeñandu porã hogayguakuérape. Haʼekuéra oipytyvõkuaa chupekuéra oaguanta hag̃ua umi situasión ijetuʼúva koʼág̃a ha amo gotyove avei.

18. ¿Mbaʼépa ñanepytyvõ jagueropuʼaka hag̃ua umi situasión ijetuʼúva?

18 Ñane tiémpope, Jehová puévlo orresivi konsuélo pe ñemboʼe rupive, ojepyʼamongeta rupi umi ehémplo oĩvare la Bíbliape ha otopa rupi amígo teete umi ermáno apytépe (elee Salmo 145:18, 19). Ñande ningo jaikuaa Jehová oĩha siémpre dispuésto ñanekonsolávo, ha ikatu avei ñaĩ segúro ñanepytyvõtaha jagueropuʼaka hag̃ua tahaʼe haʼéva provléma oñepresentáva ñandéve koʼág̃a térã tenondeve.