Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2017

Jajesarekókena pe iñimportantevévare

Jajesarekókena pe iñimportantevévare

“Péicha umi hénte oikuaáta, nde nderérava Jehová, nde añoite haʼeha pe Ipoderosovéva ko yvy ape ári” (SAL. 83:18, TNM).

PURAHÉI: 46, 136

1, 2. a) ¿Mbaʼépa iñimportanteve hína opa mbaʼégui? b) ¿Mbaʼéichapa ñanepytyvõta jahechakuaáramo mbaʼépa la iñimportantevéva?

HETA persónape g̃uarã la iñimportantevéva hína pe pláta. Haʼekuéra tódo el tiémpo opensa upévarente voi, ha oñehaʼã ombyatyve térã ojapo opa ikatúva ani hag̃ua operde la orekómava. Ótrope g̃uarã katu la iñimportantevéva hína ifamília, ha oĩ umi ojapóva oimeraẽ mbaʼe hesãi hag̃ua térã okonsegi hag̃ua opa mbaʼe oipotáva.

2 Péro oĩ peteĩ mbaʼe iñimportantevéva opa koʼã mbaʼégui. ¿Mbaʼépa hína upéva? Ojehechauka Jehová añoite omereseha ogoverna. Tekotevẽterei ningo ñañatende ani hag̃ua ñanderesarái iñimportantetereiha upéva. Ñanerembiapoitereíramo térã jajepyʼapýrõ ñane provlemakuérarente, ndajahechakuaamoʼãi mbaʼépa la iñimportantevéva. Péro jaapojáramo Jehová goviérno, ifasilvéta ñambohovái hag̃ua umi provléma oñepresentáva káda día, ha ñañemoag̃uivéta Ñandejárare.

¿MBAʼÉREPA IÑIMPORTANTETE?

3. ¿Mbaʼépa heʼi Satanás Jehová goviérnore?

3 Satanás omoĩ en dúda Jehová omereseha ogoverna. Haʼe  oipota entéro opensa Jehová haʼeha peteĩ governánte korrúpto, ha ndoipotaiha mbaʼeve iporãva yvyporakuérape g̃uarã. Satanás ontendeka entéronte javyʼavetaha jajapóramo jajaposéva (Gén. 3:1-5). Avei haʼe heʼi yvyporakuéra ohasa asýramo, naiñeʼẽrendumoʼãiha Ñandejárape ha omboyketaha chupe (Job 2:4, 5). Upévare, Jehová oheja hína ohasa tiémpo ojekuaa hag̃ua avave ndaikatumoʼãiha osẽ porã omboykéramo igoviérno.

4. ¿Mbaʼérepa tekotevẽ oñemyesakã porã Jehová añoite ogoverna vaʼerãha ko univérso?

4 Jehová ningo oikuaa porã umi mbaʼe Satanás heʼíva ndasiertoiha. Péro, ¿mbaʼérepa upéicharõ omeʼẽ tiémpo chupe ohechauka hag̃ua siértopa la heʼíva? Oñembohovái hag̃ua ko porandu oñemyesakã vaʼerã peteĩ mbaʼe oafektáva enterovépe, tahaʼe umi oĩva yvágape térã ko yvy ape ári (elee Salmo 83:18). Adán ha Eva ndoaseptái vaʼekue Jehová goviérno, ha upe rire heta yvypóra ojapo avei upéva. Upéicha rupi ikatu oĩ opensáva Satanás ndojavýi hague. Noñemyesakãporãi aja ko téma umi yvypóra ha anhelkuérape, ndaikatumoʼãi oĩ pyʼaguapy ha unida. Péro ojehechauka rire Jehová añoite ogoverna vaʼerãha, enterovéva ikatúta jaiko opa ára g̃uarã Ñandejára ñanderayhuetéva poguýpe. Upépe ae oĩta pyʼaguapy ko univérso tuichakuére (Efes. 1:9, 10).

5. ¿Mbaʼéichapa jahechauka ñañemoĩha Jehová goviérno ykére?

5 Koʼẽrõite enterovéva ohecháta Ñandejára goviérno añoite oisãmbyhyha tekojojápe. Satanás ha umi yvypóra goviérno nosẽporãmoʼãi arakaʼeve ha oñehundímante vaʼerã. Ñandejára ogovernáta enterovépe Itaʼýra Jesucristo rupive. Ojekuaa porãtama avei yvyporakuéra ikatuha ifiél Ñandejára goviérnope oimeraẽ situasiónpe (Is. 45:23, 24). ¿Ñaimesépa ñande avei umi persóna ifiélva apytépe? Katuete ningo ñaimeséta ha upearã tekotevẽ ñantende porã ha ñanemanduʼa iñimportantetereiha ojehechauka Jehová añoite ogoverna vaʼerãha.

¿MBAʼÉPA IÑIMPORTANTEVE ÑANDE SALVASIÓNGUI?

6. ¿Mbaʼeichaite pevépa iñimportánte ojehechauka Jehová añoite ogoverna vaʼerãha?

6 Tekotevẽ ningo ojehechauka opavavépe Jehová añoite ogoverna vaʼerãha, ha upéva iñimportanteve hína ñande salvasióngui. Péro upéva ndeʼiséi Jehová noñeinteresaiha ñanderehe ni noimportaiha chupe ñande salvasión. ¿Mbaʼérepa jaʼe upéva?

7, 8. ¿Mbaʼépa yvyporakuéra ohupytýta Ñandejára ohechauka vove haʼe añoite ogoverna vaʼerãha?

7 Jehová ningo ñanderayhueterei, ha ñande javaleterei chupe g̃uarã. Upévare omeʼẽ Itaʼýra peteĩete jahupyty hag̃ua jeikove opaveʼỹva (Juan 3:16; 1 Juan 4:9). Jehová nokumplíriramo ipromésa, amo ipahápe siértota la heʼíva Satanás ha umi oĩva hendive. Haʼe ningo heʼi Ñandejára ijapuha, nogovernaporãiha ha nomeʼẽiha yvyporakuérape umi mbaʼe ombovyʼa vaʼerã chupekuéra. Entéro oñemoĩva Jehová kóntrape, oñembohory hína ipromesakuérare, ha haʼete heʼíva: “Haʼe ningo opromete vaʼekue outaha, ¿moõ piko oĩ upéicharõ? Ñande rukuéra ypykue ningo oikove ha omanomba jeýma, péro upe tiémpo guive koʼág̃a peve mbaʼevete nokambiái” (2 Ped. 3:3, 4). Ñandejára ningo katuete okumplíta ipromésa. Ojehechauka vove enterovépe haʼe añoite ogoverna vaʼerãha, umi yvypóra iñeʼẽrendúva ojesalváta (elee Isaías 55:10, 11). Jehová  goviérno ningo oñemopyenda mborayhúpe. Upévare ikatu ñaĩ segúro haʼe siémpre ohayhutaha ha omombaʼetaha umi persóna ifiélvape chupe (Éx. 34:6).

8 Jahechaháicha, iñimportanteterei ojehechauka Jehová añoite omereseha ogoverna. Péro upéva ndeʼiséi vyroreiha ñande salvasión. Jehová oñeinteresa káda únore. Upéicharõ jepe, ani ñanderesarái mbaʼépa hína la iñimportantevéva: jaapoja Ñandejára goviérno.

JOB OKAMBIA OPENSA LÁJA

9. ¿Mbaʼépa heʼi Satanás Job rehe? (Ehecha pe taʼanga oĩva iñepyrũme).

9 ¿Mbaʼépa ñapensa Jehová ogoverna lájare? Iñimportánte jahecha upéva hekopete. Lívro de Job ojehai vaʼekue ymaitereíma, oĩ voi umi lívro bíblico ojehai ypy vaʼekue apytépe. Pype jatopa Satanás heʼi hague Job ohasa asýramo omboyketaha Ñandejárape. Upémarõ ojerure Jehovápe ombosufri hag̃ua Jóbpe. Jaikuaaháicha, haʼe ndojapói upéva, péro opermiti Satanás ombohasa asy ko kuimbaʼépe, heʼívo: “Opaite mbaʼe orekóva oĩ nde pópe” (elee Job 1:7-12). Upe riremínte, Job operdepa ikosakuéra ha isiervokuérape. Avei omano chugui umi 10 ifamília. Satanás ojapo koʼã mbaʼe haʼeramoguáicha Ñandejára la kulpávle (Job 1:13-19). Upéi, Satanás ombou Jóbpe peteĩ mbaʼasy ombosufrietereíva chupe ha oporombojeguarúva (Job 2:7). Ha amo ipahápe Job rembireko ha mbohapy iñamígo guaʼu oñepyrũ heʼi heta mbaʼe omoñeñandu vaíva ha omokangýva Jóbpe (Job 2:9; 3:11; 16:2).

10. a) ¿Mbaʼéichapa Job ohechauka ifielha Jehovápe? b) ¿Mbaʼérepa tekotevẽ kuri ojekorrehi Jóbpe?

10 ¿Siértopa la Satanás heʼi vaʼekue? Nahániri. Haʼe tuichaiterei ojavy, pórke Job nomboykéi Ñandejárape (Job 27:5). Péro Job hesarái sapyʼami mbaʼépa hína la iñimportantevéva ha opensa ijehénte. Oñepyrũ heʼi haʼe ndojapói hague mbaʼeve ivaíva, ha oexihi voi oñemombeʼu hag̃ua chupe mbaʼérepa ohasa asy (Job 7:20; 13:24). Katuete ningo ñantende Job oñeñandu lája. Péro Jehová ohechakuaa tekotevẽha okorrehi Job opensa lája. ¿Mbaʼéichapa ojapo upéva?

11, 12. a) ¿Mbaʼéichapa Jehová oipytyvõ Jóbpe? b) ¿Mbaʼéichapa Job ojagarra umi konsého?

11 Lívro de Jóbpe kapítulo 38 guive 41 peve jatopa mbaʼépa Jehová heʼi vaʼekue Jóbpe. Jehová nomombeʼúi chupe mbaʼérepa osufri. Péro ohechauka chupe haʼe michĩetereiha hovake. Haʼe omboʼe Jóbpe oĩha heta mbaʼe iñimportantevéva iprovlemakuéragui  (elee Job 38:18-21). Umi mbaʼe Jehová heʼíva Jóbpe oipytyvõ chupe okambia hag̃ua opensa lája.

12 ¿Ikatúpa jaʼe Jehová ndorekói hague enkuénta umi mbaʼe Job ohasa vaʼekue ajeve oñeʼẽ chupe upéicha? Nahániri, pórke Job noñeñanduvaíri upe haguére. Haʼe ontende ha omombaʼe Jehová konsého. Ha heʼi voi katu: “Ambyasyeterei la haʼe vaʼekue ha atĩ apytávo. Koʼág̃a aguapy yvýpe tanimbu apytépe, ahechauka hag̃ua añarrepentiha” (Job 42:1-6, TNM). Upe mboyve, peteĩ kuimbaʼe imitãva hérava Elihú oipytyvõma kuri Jóbpe okambia hag̃ua opensa lája (Job 32:5-10). Job ohendu kuri pe konsého Jehová omeʼẽva chupe mborayhúpe, ha okorrehi la opensáva. Upéi Jehová oikuaauka oguerohoryha Jóbpe ifiél haguére (Job 42:7, 8).

13. ¿Mbaʼéichapa Jehová konsého oipytyvõne raʼe Jóbpe opa rire jepe umi mbaʼe ombosufríva chupe?

13 Jehová konsého osegi oipytyvõ Jóbpe ohasa riréma jepe umi mbaʼe ombosufri vaʼekue chupe. La Biblia heʼi: “Jehová tuichave ovendesi Jóbpe yma guarégui”. “Avei hembireko imemby jey, 7 kuimbaʼe ha mbohapy kuña” (Job 42:12-14, TNM). Job ohayhueterei koʼã ifamiliakuérape, upéicharõ jepe katuete ohechagaʼúne raʼe umi omano vaʼekuépe. Avei, oime vaʼerã ndahesaráiri umi mbaʼe vaiete oiko vaʼekuégui hese ha ifamíliare. Ndajaikuaái ningo oimépa Job ontende raʼe mbaʼérepa ohasa upe situasiónre, péro oiméne katuete oñeporandúmi vaʼekue tekotevẽpa raʼe osufri peichaite peve. Oimérire Job opensa raʼe koʼã mbaʼére, katuete imanduʼáta Jehová heʼi vaʼekuére. Upéva okonsola ha oipytyvõne chupe opensa hag̃ua hekoitépe (Sal. 94:19).

¿Ikatúpa jahechakuaa mbaʼépa la iñimportantevéva ñaneprovlémaramo jepe? (Ehecha párrafo 14)

14. ¿Mbaʼépa ikatu ñaaprende Job ohasa vaʼekuégui?

14 Jajepyʼamongetáramo umi mbaʼe Job ohasa vaʼekuére ñapensáta hekoitépe ha ñanekonsoláta. Jehová oskrivika vaʼekue avei lívro de Job “ñanerekomboʼe hag̃ua. Koʼãva omeʼẽ ñandéve esperánsa, ñanepytyvõgui ñaaguanta hag̃ua ha ñanekonsola avei” (Rom. 15:4). Ko lívrope jaleéva ñanemboʼe ndajaikói vaʼerãha ñapensaiterei ñane provlémarente, ñañemotiémpo vaʼerã guei jajepyʼamongeta hag̃ua la iñimportantevévare: Jehová añoite omereseha ogoverna. Job ojapo haguéicha, ñande avei ikatu jahechauka ñañemoĩha Jehová goviérno ykére ñandefiélvo chupe jahasa asýramo jepe.

15. ¿Mbaʼépa jahupytýta jasegírõ ñandefiél ijetuʼúramo jepe ñanendive?

15 Job rembiasakue tuicha ñanekonsola  pórke ohechauka porã umi provléma jahasáva ndahaʼeiha oúva ñandéve Jehová ipochy rupi ñanderehe. Umi provléma omeʼẽ guei ñandéve peteĩ oportunida jahechauka hag̃ua ñañemoĩha Jehová goviérno ykére (Prov. 27:11). Ñaaguantáramo fiélmente ñambovyʼáta Jehovápe ha jajeroviavéta oikotaha katuete umi mbaʼe ñahaʼarõva (elee Romanos 5:3-5). Job rembiasakue “ohechauka Jehová ñanderayhuetereiha ha avei ñandeporiahuverekoha” (Sant. 5:11). Jahechaukáramo umi mbaʼe jajapóvare ñamombaʼeha Ñandejára goviérno, haʼe ñanevendesíta. Jarahárõ enkuénta upéva, ñanepasiénsiata ñaaguanta hag̃ua opa mbaʼe ha javyʼáta (Col. 1:11).

AKÓINTEKENA JAJESAREKO PE IÑIMPORTANTEVÉVARE

16. ¿Mbaʼérepa siémpre ñanemanduʼa vaʼerã pe iñimportantevévare?

16 Jaikuaaháicha, sapyʼánte hasy jareko hag̃ua enkuénta mbaʼépa la iñimportantevéva, koʼýte jahasáramo umi situasión ijetuʼúva. Umi provléma michĩva jepe haʼete la tuichaitereíva ñapensaitereírõ hese. Upévare tekotevẽ ñanemanduʼa meme mbaʼeichaitépa iñimportánte jahechauka ñamombaʼeha Jehová goviérno, tahaʼe haʼéva la situasión jahasáva.

17. ¿Mbaʼérepa jaʼekuaa ñambaʼapo jejopýramo Jehová servísiope ñanepytyvõha ani hag̃ua ñanderesarái pe iñimportantevévagui?

17 Ñambaʼapo jejopýramo Jehová servísiope ñanepytyvõta ani hag̃ua ñanderesarái mbaʼépa la iñimportantevéva. Por ehémplo, peteĩ ermána hérava Renee iderráme kuri, hete rasy meme ha hiʼarive ou ikánser. Oĩ jave ospitálrupi opredika umi ombaʼapóvape upépe, umi ótro hasývape ha umi oúvape de visíta. Peteĩ jey, oñeinternárõ guare dos semána imédia, opredika 80 óra. Renee oikuaárõ jepe omanotamaha oreko enkuénta la iñimportantevéva. Haʼe oapoja Ñandejára goviérno ha upéva ombopyʼaguapy chupe.

18. ¿Mbaʼépa oiko peteĩ ermána opensa meme rupi Jehová goviérnore?

18 Ñande avei ikatu jahechauka ñamombaʼeha Jehová goviérno ñambohovái jave káda día umi provléma michĩva jepe. Peteĩ ermána hérava Jennifer areterei opyta peteĩ aeropuértope. Oĩ voi upépe 3 día ohaʼarõ hag̃ua pe avión oraha vaʼerã chupe hógape, pórke umi avión ndaikatúi osẽ umi orário oreko vaʼekuépe. Jennifer katu ikaneʼõma ha oñeñandu haʼeñoite. Haʼe ikatu kuri oñepyrũ oñesenti. Péro upéva rangue, haʼe ojerure Jehovápe toipytyvõmi chupe ikatu hag̃uáicha opredika oĩ aja upépe. Amo ipahápe haʼe opredika heta héntepe ha oheja heta puvlikasión. Jennifer heʼi: “Ijetuʼúramo jepe chendive kuri, añandu Jehová chevendesi hague ha chemombareteha ahechauka hag̃ua amombaʼeha héra”.

19. ¿Mbaʼépa ohechauka ñande haʼeha kristiáno tee?

19 Ñandejára siervokuéra ontende porã mbaʼeichaitépa iñimportánte ojehechauka Jehová añoite omereseha ogoverna. Ha upéva ohechauka haʼeha hikuái kristiáno tee. Upéicharõ, jajapo vaʼerã tekotevẽva guive jaapoja hag̃ua Jehová goviérno.

20. ¿Mbaʼéichapa Jehová oñeñandu ñamotenonde jave igoviérno?

20 Ñañehaʼãkena jahechauka Jehová añoite omereseha ogoverna. Haʼe ningo omombaʼeterei ñaaguanta ha ñandefiél jave chupe (Sal. 18:25). Pe artíkulo oúvape jahechavéta mbaʼérepa ñamotenonde vaʼerã Jehová goviérno opa mbaʼe ári, ha mbaʼéichapa ikatu jahechauka upéva.