Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2017

¿Jajegiápa ñande rapichakuéra píntarente?

¿Jajegiápa ñande rapichakuéra píntarente?

DON ningo peteĩ testígo de Jehová Canadagua oñehaʼãmbaitéva opredika umi hénte oikóvape kállere. Imanduʼávo peteĩva koʼã persónare, Don omombeʼu: “Ahecháva jepi kállere heta hénte ikyʼaitereíva, ha Peter haʼe vaʼekue peichagua. Haʼe ijarhél ha orrechasa umi imbaʼeporãsévape hendive, upévare avave voi noñemoag̃uiséi hese”. Upéicharõ jepe, 14 áño rasáre Don oñehaʼã iñamávle Peter ndive.

Peteĩ jey, Peter oporandu Dónpe: “¿Mbaʼére piko nde rejepyʼapy cherehe? Avavépe ningo ndoúi ni ndohói la ojehúva chéve. ¿Mbaʼére upéicharõ nde eñeinteresaite cherehe?”. Don oñehaʼã oikekuaa Péterpe ha oipuru mbohapy téxto bíblico ikatúva opoko hese. Primero, oporandu chupe oikuaápa Ñandejára orekoha héra, ha upéi ojerure chupe olee hag̃ua Salmo 83:18 la Bibliaitégui voi. Upéi, Don ohechauka hag̃uáicha Péterpe mbaʼérepa oñeinteresa hese, ojerure chupe olee hag̃ua Romanos 10:13, 14 heʼihápe “opavave ohenóiva Jehová réra” ojesalvataha. Ipahaitépe Don olee Mateo 9:36, heʼíva: “Jesús omañávo umi héntere ombyasyeterei chupekuéra, ohechágui mbaʼéichapa oiko asyeterei ha isarambipa hikuái umi ovecha herekuaʼỹvaicha”. Upe rire ojerure Péterpe haʼete voi olee hag̃ua ko téxto. Haʼe ojapo upéva, ha hesay hováre oporandu: “¿Che piko hína peteĩva koʼã ovecha?”.

Peter oñepyrũ okambia. Haʼe ojahu, orrekorta porã ivárva ha omonde umi ao Don ogueru vaʼekue chupe. Upe guive, Peter osegíma ipotĩ ha oñatende ipíntare.

Peter oskrivi meme vaʼekue peteĩ kuadérnope umi mbaʼe ojehúva chupe. Umi mbaʼe oanotáva ningo ñepyrũrã itríste, péro umi mbaʼe oskrivíva ipahaitépe idiferéntema. Por ehémplo, haʼe oskrivi vaʼekue: “Kostedía aaprende Ñandejára réra. Koʼág̃a añemboʼe jave ikatúma añeʼẽ Jehovándi. Avyʼaiterei aikuaa rupi héra. Don heʼi chéve Jehová ikatuha che amígo ha cherendutaha oimeha óra, tahaʼe haʼéva la amombeʼúva chupe”.

 Ipahaitépe, Peter oskrivi vaʼekue iñermanokuérape, ha heʼi:

“Nañeñanduporãiete ningo hína kostedía. Amalisiamínte chetujaitereíma ahávo. Péro kóva haʼéramo jepe che último día, aikuaa porã ahecha jeytaha che amígope (Don) ág̃a Paraísope. Peleéramo hína la askrivi vaʼekue, heʼise naimeveimaha penendive. Péro che velóriope pehecháramo peteĩ kuimbaʼe idiferénteva umi ótrogui, peñemongeta hendive, ha ikatúramo peleemi ko livroʼi hovy (haʼe oñeʼẽ pe lívro orresivi vaʼekuére unos kuánto áño ántes, hérava La verdad que lleva a vida eterna, ojepuru vaʼekue ojestudia hag̃ua la Biblia). * Ko lívro heʼi ahecha jeytaha che amígope pe Paraísope. Che ningo aguerovia upéva che korasõ mbytete guive. Pene ermáno penderayhuetéva, Peter”.

Oñeñotỹ rire Péterpe, peteĩ iñermána hérava Ummi omombeʼu: “Ojapo dos áñorupi Peter oñekomunika hague chendive. Heta tiémpo rire ahechakuaa jey hese ovyʼaha, hiʼarive opuka voi”. Ummi heʼi Dónpe: “Aleéta pe lívro, pórke oĩramo peteĩ mbaʼe opoko vaʼekue che ermáno korasõre, iporãmante vaʼerã”. Ummi avei oasepta peteĩ testígo de Jehová oho hendápe ostudia hag̃ua pe lívro ¿Mbaʼépa añetehápe omboʼe la Biblia?

Ñande avei ndajajegiaséi ñande rapichakuéra píntarente, upéva rangue jahechaukase jahayhuha ñande pyʼaite guive enterovépe, ha ñanepasiénsia hesekuéra (1 Tim. 2:​3, 4). Jahecha haguéicha, Peter naipintaporãi vaʼekue péro ipyʼaporã. Péicha avei ndajajegiáiramo ñande rapichakuéra píntare, ikatúta ñamokyreʼỹ chupekuéra okambia hag̃ua. Ñande ningo jaikuaa Ñandejára ohechaha “umi hénte korasõme oĩva”, ha oipytyvõtaha umi añetehápe oñemoag̃uisévape hese (1 Sam. 16:​7, TNM; Juan 6:44).

^ párr. 7 Ojapo testígo de Jehová. Ko lívro noñeimprimivéima.