Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2017

Jahechaukákena ñañemoĩha Jehová goviérno poguýpe

Jahechaukákena ñañemoĩha Jehová goviérno poguýpe

“Ñandejára Jehová, nde ningo remerese opavave nemombaʼe ha omeʼẽ ndéve tekomimbipa ha podér, nde rejapo rupi opa mbaʼe” (APOC. 4:11).

PURAHÉI: 112, 133

1, 2. ¿Mbaʼéguipa káda uno ñaime vaʼerã segúro? (Ehecha pe taʼanga oĩva iñepyrũme).

JAHECHA haguéicha pe ótro artíkulope, Satanás heʼi Jehová nomereseiha ogoverna yvyporakuérape. Haʼe heʼi Jehová goviérno iñinhustoha ha yvyporakuéra ovyʼavetaha ojapóramo la ojaposéva. Péro, ¿siértopa la Satanás heʼíva? ¿Javyʼavétapa Ñandejára nañanegovernáiramo? ¿Ndépa mbaʼe repensa, revyʼavénepa reikóramo opa ára g̃uarã Jehová reheʼỹ?

2 Ndémante ikatúta rerresponde koʼã porandu. Káda uno jajepyʼamongeta vaʼerã upévare. Péicha jajapóramo jahechakuaáta Jehová goviérno iporãveha ha tekotevẽha jaapoja ñande pyʼaite guive. La Biblia ohechauka mbaʼérepa Jehová añoite omerese ogoverna ko univérso. Jahechamína mbaʼérepa jaʼekuaa upéva.

JEHOVÁ OMERESE VOI OGOVERNA

3. ¿Mbaʼérepa Jehová añoite omerese ogoverna?

3 Jehová añoite ningo omerese ogoverna ko univérso tuichakue pórke haʼe hína pe Todopoderóso ha ñande Apohare (1 Crón. 29:11; Hech. 4:24). Peteĩ visiónpe ojehecha umi 144.000 omoirũva Crístope heʼiha: “Ñandejára Jehová, nde ningo remerese opavave nemombaʼe ha omeʼẽ ndéve  tekomimbipa ha podér, nde rejapo rupi opa mbaʼe, ha nde reipotágui oĩ ha ojejapo vaʼekue opaite mbaʼe” (Apoc. 4:11). Jehová okrea vaʼekue entéro mbaʼe, upévare haʼe añoite omerese ogoverna tahaʼe yvágape térã ko yvy ape ári.

4. ¿Mbaʼérepa jaipuru vai hína pe liverta jadesidi hag̃ua ñañemoĩrõ Jehová goviérnore?

4 Satanás ndokreái mbaʼevete asy, upévare nomereséi ogoverna ko univérso. Haʼe, Adán ha Eva opuʼã vaʼekue Jehováre, ha péicha ohechauka omboykeha igoviérno (Jer. 10:23). Haʼekuéra oreko kuri liverta odesidi ha ojapo hag̃ua la ojaposéva, péro upéva ndeʼiséi orekoha derécho oñemoĩvo Ijapoharére. Jahechaháicha, koʼã rrevélde opuʼãvo Ñandejárare oipuru vai pe liverta orekóva odesidi hag̃ua. Ñande yvyporakuéra ñaikotevẽ Jehová ñanegoverna ha ñandegia.

5. ¿Mbaʼérepa jaʼekuaa opa mbaʼe Jehová odesidíva ihustoha?

5 ¿Mbaʼérepa ikatu avei jaʼe Jehová omereseha ogoverna? Pórke haʼe añoite ogoverna tekojojápe. Haʼe heʼi ijehe: “Che hína Jehová, Upe oporohayhu añetéva, hekojoja ha ihústova ko yvy ape ári. Pórke koʼã mbaʼe chembovyʼa” (Jer. 9:24, TNM). Ndaipóri Jehovaichagua ihústova, upévare haʼe noikotevẽi yvyporakuéra léire odesidi hag̃ua hekoitépe. Haʼe guei omeʼẽ ñandéve Iléi. Pe salmísta heʼi vaʼekue Jehováre: “Ndehústo ha rejapo iporãva, koʼã mbaʼe haʼete voi peteĩ simiénto oguapyhápe ne tróno”. Upéicharõ, entéro umi léi Jehová omeʼẽva ha opa mbaʼe odesidíva oĩ porã (Sal. 89:14, TNM; 119:128). Satanás heʼi Jehová nogovernaporãiha, péro haʼe ndaikatúi ogueru hustísia ko múndope.

6. ¿Mbaʼérepa ikatu jaʼe Jehová añoite omereseha ogoverna?

6 Jehová omerese avei ogoverna pórke haʼe iñarandu ha oikuaa mbaʼéichapa oñangareko vaʼerã ko univérsore. Por ehémplo, haʼe ombokatupyry Itaʼýrape omonguera hag̃ua umi mbaʼasy, doktorkuéra jepe ndaikatúiva omonguera (Mat. 4:23, 24; Mar. 5:25-29). Ñandéve g̃uarã koʼã mbaʼe haʼe peteĩ milágro, péro Jehovápe g̃uarã nahániri. ¿Mbaʼérepa? Pórke haʼe oikuaa porã mbaʼéichapa ombaʼapo ñande rete ha ikatu omonguera oimehaichagua mbaʼasy. Avei Jehová ikatu omoingove jey umi omano vaʼekuépe, térã ojoko umi desástre naturál.

7. ¿Mbaʼérepa jaʼekuaa Jehová arandu tuichaiteveha ko múndo arandúgui?

7 Ko múndo Satanás ogovernáva ndaikatúi ogueru pyʼaguapy peteĩ tetãme, ni ndaikatúi ojapo mbaʼeve umi país oiko porã hag̃ua oñondive. Jehová ningo iñarandueterei, upévare haʼe añoite oikuaa mbaʼéichapa oguerúta pyʼaguapy ko múndope (Is. 2:3, 4; 54:13). Ñande ñañeñandu avei apóstol Pablo oñeñandu haguéicha, haʼe heʼi: “¡Ajépa ipypukuete Ñandejára mbaʼeta, arandu ha mbaʼekuaa! Avave ndaikatúi omyesakã umi mbaʼe haʼe ojapóva ni oikuaa umi hape” (Rom. 11:33).

JEHOVÁ GOVIÉRNO LA IPORÃVÉVA

8. ¿Mbaʼépa reguerohoryve Jehová ogoverna lájagui?

8 Jahechaháicha, la Biblia heʼi Jehová omereseha ogoverna, ha omyesakã mbaʼérepa haʼe añoite ogoverna porã. Ikatu ningo jaʼe ndaiporiha ótro haʼeichagua, pórke Jehová ogoverna mborayhúpe. La Biblia heʼi hese haʼeha peteĩ Dios “oporoporiahuverekóva ha oporombyasýva, ndaipochyreíriva, oporohayhuetereíva ha nopyrũiva iñeʼẽre” (Éx. 34:6, TNM). Ñapensávo koʼã mbaʼére, ñañemoag̃uive Jehováre. Haʼe ñandetrata porãiterei ha  ñanderrespeta. Ñande ningo ikatu ñañehaʼã ñañangareko ñandejehe, péro haʼe ojapo porãitevéta upéva. Satanás heʼi Jehová nomeʼẽseiha isiervokuérape mbaʼeve iporãva, péro haʼe ijapu. Jaikuaaháicha, Jehová omeʼẽ Itaʼýra ohayhuvévape jepe, ikatu hag̃uáicha jaiko opa ára g̃uarã (elee Salmo 84:11 ha Romanos 8:32).

9. ¿Mbaʼéichapa jaikuaa Ñandejára oñeinteresaha peteĩteĩre?

9 Jehová ohayhu entéro isiérvope, péro avei oñeinteresa peteĩteĩre. Ñapensamína mbaʼépa haʼe ojapo vaʼekue yma. Haʼe ningo 300 áñore ojevale umi hués rehe ikatu hag̃uáicha ogia ipuévlope, ha oipytyvõ chupekuéra ogana hag̃ua umi iñenemígope. Péro upe tiémpope avei haʼe ojesareko umi ndoservírivare chupe, por ehémplo Rut rehe. Rut ningo ndahaʼéi vaʼekue israelita, upéicharõ jepe heta ojesakrifika oadora hag̃ua Jehovápe. Upévare Jehová ovendesi Rútpe omeʼẽvo chupe imenarã peteĩ kuimbaʼe imbaʼeporãva, ha avei imembyrã. Péro ndahaʼéi upévante, Jehová avei orrekompensa Rútpe oiporavóvo imembýpe oiko hag̃ua chugui pe Mesías antepasádo. Avei Ñandejára oskrivika hembiasakue la Bíbliape, ha pe lívro bíblicope oñehenói hérarupi. Rut oikove jey vove, ovyʼaitereíta oikuaávo koʼã mbaʼe (Rut 4:13; Mat. 1:5, 16).

10. ¿Mbaʼérepa ikatu jaʼe Jehová ogoverna lája ndaipohyiriha?

10 Jehová ogoverna lája ningo ndaipohýiri. Upévare umi iñeʼẽrendúva chupe oñandu isãsoha ha ovyʼa (2 Cor. 3:17). David heʼi vaʼekue: “Ñandejára oĩ peteĩ lugár iporãiterei ha omimbipávape, upe lugár oĩháme ojehecha mbaʼeichaitépa haʼe ipoderóso ha ovyʼa” (1 Crón. 16:7, 27, TNM). Pe salmísta hérava Etán heʼi avei: “Jehová, ovyʼaite pe puévlo opurahéiva nemombaʼeguasu hag̃ua, haʼekuéra kontinuadoite oiko nde rapére ha nde reguerohory chupekuéra. Haʼekuéra ojerovia nde rérare ha upévare tódo el tiémpo ovyʼa. Ha ndehústo rupi, nde remombaʼe chupekuéra” (Sal. 89:15, 16, TNM).

11. ¿Mbaʼépa ñanepytyvõta jahechakuaa hag̃ua ndaiporiha ótro ogoverna porãvéva Jehovágui?

11 Jajepyʼamongeta meméramo mbaʼeichaitépa Jehová imbaʼeporã, katuete jahechakuaáta ndaiporiha ótro ogoverna porãvéva chugui. Péicha ñañeñandúta avei pe salmístaicha. Haʼe heʼi vaʼekue Ñandejárape: “Che avyʼave un diami jepe aiméramo nde róga korapýpe, aiko rangue mil día ótro lugárpe” (Sal. 84:10, TNM). Jehová ñandeapo porãiterei vaʼekue, upévare oikuaa mbaʼépa añetehápe ñanembovyʼa. Haʼe ipojeraiterei rupi, omeʼẽ rasapa ñandéve umi mbaʼe ñaikotevẽva. Entéro mbaʼe Jehová ojeruréva ñandéve jajapo hag̃ua ningo ñanevenefisiorãnte. Ha tekotevẽramo jepe jajesakrifika hesehápe, katuete javyʼáta ñaneñeʼẽrendúramo chupe (elee Isaías 48:17).

12. ¿Mbaʼépa ñanemomýi vaʼerã ñañemoĩ hag̃ua Jehová goviérno ykére?

12 La Biblia omombeʼu Jesús ogoverna rire Mil Áño oĩtaha opuʼãva Jehová goviérnore (Apoc. 20:7, 8). ¿Mbaʼérepa oĩta ojapóva upéva? Pórke upe tiémpope Satanás oñehaʼãta okonvense entérope opensa hag̃ua ijehénte. Añetehápe haʼe ojapóvante voi upéva. Upérõ ogueroviaukaséta yvyporakuérape natekotevẽiha iñeʼẽrendu Ñandejárape oiko hag̃ua opa ára g̃uarã. Péro upéva japu hína. Upévare iporã ñañeporandumi: “¿Agueroviátapa la Satanás heʼíva?”. Tekotevẽ jahayhu Jehovápe, ñaĩ segúro imbaʼeporãha ha haʼe añoite  omereseha ogoverna ko univérso, péicha ndajagueroviamoʼãi ni michĩmi la Satanás heʼíva. Ñande jaapojase Jehová goviérno añoite, pórke haʼe ogoverna mborayhúpe.

ÑAÑEMOĨKENA ÑANDEJÁRA GOVIÉRNO POGUÝPE

13. ¿Mbaʼéichapa jahechauka ñañemoĩha Ñandejára goviérno ykére?

13 Jahechaháicha, Jehová añoite la ogoverna vaʼerã ha ndaipóri ótro ojapo porãvéva chugui upéva. Añetehápe haʼe omerese ñañemoĩ igoviérno poguýpe. Ñande jahechaukáta jajapoha upéva, ñandefiélramo chupe ha jasegírõ iñehémplo. Ñañehaʼãmbaitérõ jajapo opa mbaʼe Ñandejárape ogustaháicha, jahechaukáta jahayhuha chupe ha jaapojaha igoviérno (elee Efesios 5:1, 2).

14. ¿Mbaʼéichapa umi omoakãva hogapy ha ansianokuéra ikatu osegi Jehová ehémplo?

14 La Biblia ohechauka Jehová siémpre oipuruha ijautorida mborayhúpe. Umi omoakãva hogapy ha ansianokuéra oapojáva Jehová goviérno, ohechaukáta osegiha iñehémplo ndoikóiramo oporotrata vai ni okontrola opa mbaʼe ótro ojapóva. Apóstol Pablo oñehaʼãmbaite osegi Jehová ha Itaʼýra ehémplo (1 Cor. 11:1). Haʼe nomotĩri ni ndojopýi avavépe ojapo hag̃ua la oĩ porãva, síno mborayhúpe omokyreʼỹ chupekuéra ojapo hag̃ua upéva (Rom. 12:1; Efes. 4:1; Filem. 8-10). Péicha Pablo osegi Jehová ehémplo. Ñande avei japorotrata porã jave, jahechauka hína jaapojaha Jehová ogoverna lája.

15. ¿Mbaʼérepa ikatu jaʼe jaapojaha Jehová goviérno jarrespetáramo umi ñanemoakãvape?

15 Jaapoja jave umi ñanemoakãvape ha jarrespeta jave chupekuéra, jahechauka avei ñañemoĩha Jehová goviérno poguýpe. Nañantendeporãiramo jepe umi mbaʼe ojedesidíva térã nañandegustáirõ, lomímonte jarrespeta umi ñanemoakãvape.  Ñande ñapensa lája idiferénte ko múndo opensávagui, pórke ñande jaapoja Jehová goviérno (Efes. 5:22, 23; 6:1-3; Heb. 13:17). Jehová siémpre oipota pe iporãvéva ñandéve g̃uarã, upévare javyʼáta ñaneñeʼẽrendúramo chupe.

16. ¿Mbaʼéichapa umi mbaʼe jadesidívare jahechaukáta jaapojaha Jehová goviérno?

16 Umi mbaʼe jadesidívare ikatu avei jahechauka jaapojaha Jehová goviérno. Haʼe ningo nomoĩri léi opa mbaʼe jajapóvape, upéva rangue omombeʼu ñandéve mbaʼéichapa opensa. Péicha ñanepytyvõ ñantende hag̃ua mbaʼépa jajapo vaʼerã. Por ehémplo, Jehová nomeʼẽi ñandéve peteĩ lísta heʼihápe mbaʼéichapa ñañemonde vaʼerã. Upéva rangue, heʼínte ñanedesénte vaʼerãha pórke ñande Itestígo ha ñamombaʼeguasu vaʼerã chupe (1 Tim. 2:9, 10). Jehová oipota ñapensa mbaʼéichapa oafekta ótrope umi mbaʼe jadesidíva (1 Cor. 10:31-33). Jarekóramo enkuénta haʼe opensa lája jadesidíta jave, jahechaukáta ñamombaʼe ha jaapojaha igoviérno.

Jahechaukákena jaapojaha Jehová goviérno opa mbaʼe jadesidívape ha ñande rogapýpe (Ehecha párrafo 16-18)

17, 18. ¿Mbaʼéichapa umi matrimónio ikatu ohechauka oñemoĩha Jehová goviérno ykére?

17 ¿Mbaʼéichapa umi omendáva ikatu ohechauka oñemoĩha Jehová goviérno ykére? Sapyʼánte umi paréha oñedesepsiona pórke imatrimónio ndahaʼéi la ohaʼarõ haguéicha. Ikatu voi tuicha iprovléma hikuái. Jahasáramo peichagua situasiónre, iporãta ñanemanduʼa mbaʼéichapa Jehová otrata vaʼekue ipuévlo Israélpe. Jehová heʼi vaʼekue ijehe haʼeha peteĩ ména ipuévlope g̃uarã (Is. 54:5; 62:4). Umi israelita heta vése ndojapói la Jehová ohaʼarõva chuguikuéra. Ko situasión ikatu voi ñambojoja peteĩ matrimónio heta iprovlémavare. Péro Jehová ipasiénsia, operdona jey jey ipuévlope ha ndahesaráiri umi promésa ojapo vaʼekuégui chupekuéra (elee Salmo 106:43-45).

18 Umi matrimónio kristiáno ohayhúva Jehovápe oñehaʼãmbaite osegi iñehémplo. Upévare, oúramo iprovléma hikuái, ndohekái exkúsa ojopoi hag̃ua. Haʼekuéra oikuaa Jehová omombaʼeha pe kompromíso ojapo vaʼekue hikuái omendárõ guare, ha oipotaha pe ména ha tembirekógui oiko “peteĩntema”. La Biblia heʼi peteĩ kristiáno ikatuha ojedivorsia ha omenda jey ótrore iména térã hembireko omoakãratĩramo añoite chupe. (Mat. 19:5, 6, 9). Umi omendáva oñehaʼãmbaitéramo osẽ porã hag̃ua imatrimónio, ohechaukáta oapojaha Jehová goviérno.

19. ¿Mbaʼépa jajapo vaʼerã jajavy jave?

19 Entéro ningo ñaneimperfékto ha sapyʼánte jajapo Jehovápe ndogustáiva. Haʼe oikuaa rupi upéva omeʼẽ Itaʼýra ñanderehehápe. Upévare, jajavy jave jajerure vaʼerã Jehovápe tañaneperdona (1 Juan 2:1, 2). Ani ñamboguapyeterei ñandejehe umi mbaʼe vai jajapo vaʼekue, síno ñañehaʼã ñaaprende umívagui. Ñande ñaĩse Jehová ykére, pórke haʼe ñaneperdona ha ñanepytyvõ ikatu hag̃uáicha ñañemoĩ porã jey hendive ha jasegi jaservi chupe (Sal. 103:3).

20. ¿Mbaʼéichapa koʼág̃a ikatu jahechauka jaapojaha Jehová goviérno?

20 Pe múndo pyahúpe entéronte oñemoĩta Jehová goviérno poguýpe ha oaprendéta heta mbaʼe chugui (Is. 11:9). Péro koʼág̃ama voi ikatu ñaaprende mbaʼéichapa haʼe opensa ha mbaʼépa oipota jajapo. Koʼẽrõite ndaiporimoʼãvéima oñeʼẽ vaíva Jehová ogoverna lájare. Upévare, ñaneñeʼẽrendúkena chupe koʼág̃a, jaservi ñande pyʼaite guive ha jasegi iñehémplo opa mbaʼe jajapóvape. Péicha jahechaukáta ñañemoĩha igoviérno ykére.