Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Junio de 2016

Peteĩ mbaʼe ivaliosovéva pe diamántegui

Peteĩ mbaʼe ivaliosovéva pe diamántegui

Heta héntepe g̃uarã ningo pe diamánte iporã ha ivaliosoiterei. Oĩ voi ovaléva millones de dólares. Péro, ¿oĩpa álgo ivaliosovéva Ñandejárape g̃uarã pe diamánte ha umi ótro tesórogui?

 Peteĩ puvlikadóra no vautisáda hérava Haykanush, oikóva Arméniape, otopa hóga kóstape peteĩ pasapórte, unas kuánta tarhéta de dévito ha heta pláta. Haʼe ensegída oho omombeʼu upéva iménape, haʼéva avei peteĩ puvlikadór no vautisádo.

Upérõ ningo ko paréhape hoʼa vaipaite ekonómikamente ha odeve voi hikuái. Upéicharõ jepe, haʼekuéra odesidi ontrega jeytaha pe pláta ijárape. Upémarõ oho hikuái pe direksión oĩvape pe pasapórtere. Pe pláta jára ha ifamília oñesorprendeterei pe paréha ontregapaitérõ guare chupekuéra umi mbaʼe otopa vaʼekue. Haykanush ha iména oexplika pe famíliape haʼekuéra oñehaʼãmbaiteha iñonrrádo pórke ostudia la Biblia. Avei oaprovecha hikuái omombeʼu hag̃ua mbaʼépa oguerovia umi testígo de Jehová, ha omeʼẽ chupekuéra unas kuánta puvlikasión.

Pe família omeʼẽse pláta Háykanushpe, péro haʼe ndoaseptái. Al ótro día, pe karai rembireko oho jey ovisita ko paréhape, ha oagradese hag̃ua chupekuéra la ojapo vaʼekuére, orregala Háykanushpe peteĩ aníllo de diamánte.

Heta persóna oñesorprende avei ko famíliaicha ohechávo oĩha umi iñonrrádova Haykanush ha iménaicha. Péro, ¿ikatúpa jaʼe Jehová oñesorprende hague? ¿Mbaʼépa haʼe opensa ko paréhare? ¿Ikatúpa jaʼe reiete iñonrrádo hague hikuái?

UMI KUALIDA IVALIOSOVÉVA UMI TESÓROGUI

Ndahasýi ningo ñakontesta hag̃ua koʼã pregúnta. ¿Mbaʼérepa? Pórke Ñandejára siervokuérape g̃uarã iñimportanteve osegi iñehémplo, ohechaukávo umi kualida porãite haʼe orekóva. Jehovápe g̃uarã upéva ivaliosove diamánte, óro térã oimeraẽ kósa materiálgui. Jehová hína la heʼíva mbaʼépa la ivaliosovéva, péro la majoría umi hénte nopensái haʼéicha (Is. 55:8, 9). Upéicharõ jepe, umi oservíva Jehovápe oikuaa porã ikuentaveha osegi iñehémplo.

Avei Ñandejára Ñeʼẽ ñanemokyreʼỹ ñanearandu ha jahechakuaa hag̃ua mbaʼépa iporã ha mbaʼépa ivai. La Biblia heʼi: “Ovyʼa pe persóna oaprendéva umi mbaʼe omoarandúva chupe, ha pe oaprendéva odiferensia hag̃ua mbaʼépa iporã ha ivai. Pe arandu iporãve pe plátagui, pe órogui jepe ovaleve. Upévare ikuentave reñehaʼã nearandu. Umi jóya iporãvéva ndahaʼéi mbaʼevete hovake. Mbaʼeve voi ndaikatúi ñakompara pe arandúre” (Prov. 3:13-15, TNM). Jahechaháicha, Jehovápe g̃uarã ivaliosoiteve koʼã kualida oimeraẽ tesórogui.

Upéicharõ, ¿mbaʼépa Jehová opensa umi iñonrrádovare?

Jehová voi ningo iñonrrádo. La Biblia heʼi hese ‘ndaikatuiha ijapu’ (Tito 1:2). Ha primer síglope, haʼe oskrivika vaʼekue apóstol Páblope ijespíritu sánto rupive: “Peñemboʼe memékena orerehe, rojeroviágui ore konsiénsia ipotĩha, ha hiʼãiterei oréve roiko hekópe opa mbaʼépe” (Heb. 13:18).

Jesús avei iñonrrádo vaʼekue. Por ehémplo, peteĩ jey pe saserdóte prinsipál hérava Caifás heʼi chupe: “Ere porã oréve, ¿nde piko hína pe Cristo, Ñandejára Raʼy?”. Jesús ndaijapúi chupe ha heʼi porã haʼeha pe Mesías. Haʼe omombeʼu porãnte la verda oikuaárõ jepe pe Sanedrín heʼitaha otakyha Ñandejárare, ha ikatuha ojejuka chupe upe haguére (Mat. 26:63-67).

Ha ñande, ¿jasegíta Jesús ehémplo? Ñamoĩ chupe oñepresentaha ñandéve peteĩ oportunida ikatutahápe ñañevenefisia ekonómikamente, péro upearã nañamombeʼupái vaʼerã pe añetegua, térã ñakambiaʼimi vaʼerã pe oiko vaʼekue. ¿Mbaʼépa jajapóta? ¿Jahechaukátapa ñaneonrradoha?

 ¿MBAʼÉREPA IJETUʼU ÑANEONRRÁDO HAG̃UA?

Koʼã ára pahápe ningo ijetuʼuve ñaneonrrádo hag̃ua, pórke la majoría umi hénte ‘ijehénte ojepyʼapy’ ha ‘iplatarayhu’ (2 Tim. 3:2). Ijetuʼu jave pe situasión ekonómika, térã hasy jave oñekonsegi hag̃ua traváho, heta persóna naiprovlemaiete voi omonda ha ombotavy hag̃ua hapichápe, térã ojapo hag̃ua oimeraẽ mbaʼe naiñonrrádoiva. Upéicha rupi, heta oĩ opensáva ndohoporãmoʼãiha chupekuéra ekonómikamente ndojapóiramo umi mbaʼe vai umi ótro ojapóva. Ñambyasýramo jepe, heta kristiáno ou odesidi vai ha “ipokarẽ”, ha opyta vaíma ermanokuéra renondépe (1 Tim. 3:8; Tito 1:7).

Péro la majoría umi kristiáno osegi Jesús ehémplo. Chupekuéra g̃uarã iñimportanteve ohechauka umi kualida porãite Ñandejára orekóva, okonsegi rangue oimeraẽ venefísio térã mbaʼerepy. Upévare, heta mitãrusu oservíva Jehovápe oikéva eskuéla térã koléhiope, ndokopiái ni ndojapói mbaʼeve naiñonrrádoiva inóta porãségui (Prov. 20:23). Añetehápe ningo ñaneonrrádo haguére ndahaʼéi katuete oñemeʼẽtava ñandéve peteĩ rregálo Háykanushpe oñemeʼẽ haguéicha. Upéicharõ jepe, Jehová hína la heʼíva ñaneonrrádo vaʼerãha, ha ñaneñeʼẽrendúramo chupe, ñane konsiénsia ipotĩta ha ndaipóri ótra kósa ivaliosovéva upévagui.

Peteĩ ermáno hérava Gagik omombeʼu mbaʼeichaitépa upéva iñimportánte. Haʼe heʼi: “Oiko mboyve chehegui Testígo, ambaʼapo vaʼekue peteĩ emprésa tuichávape. Che patrón ndopagaséigui pe impuésto, odeklara saʼive upe oganávagui. Che ningo haʼe vaʼekue pe direktór, ha ahámi akoimea pe inspektór del goviérnope ani hag̃ua odeskuvri pe emprésape. Upéicha rupi, entéronte chekuaa nacheonrrádoi haguére. Upéinte aju astudia la Biblia ha ajedesidi ndajapomoʼãveimaha upéva, ojepaga porãrõ jepe chéve. Upémarõ aavri che negosiorã, arrehistra legálmente ha siémpre apagapaite che impuestokuéra” (2 Cor. 8:21).

Gagik omombeʼu: “Che negósiope agana la mita pe ótra emprésape agana vaʼekuégui, ha ijetuʼuvéma chéve amantene hag̃ua che famíliape. Upéicharõ jepe, koʼág̃a avyʼa pórke che konsiénsia ipotĩ Jehová renondépe. Avei amoĩ ehémplo porã umi mokõi che raʼýpe, ha akumplíma umi rrekisíto ikatu hag̃uáicha areko priviléhio kongregasiónpe. Koʼág̃a umi persóna ombaʼapóva chendive ha umi inspektór del goviérno chekuaa cheonrrádo haguére”.

JEHOVÁ ÑANEPYTYVÕ

Jehová ohayhu umi persóna ombotuichávape chupe osegívo iñehémplo. Peichagua persóna ohechauka umi kualida porãite, por ehémplo iñonrrádo (Tito 2:10). Rréi David heʼi vaʼekue: “Che chemitã vaʼekue, ha koʼág̃a katu chetujáma, péro núnka ndahecháiva Ñandejára oheja reíramo peteĩ hembiapo porãvape, ni ifamíliape oikórõ ojerure upérupi hoʼumi vaʼerã” (Sal. 37:25, TNM).

Rut rembiasakue ohechauka siertoha ko téxto heʼíva. Haʼe opytánte kuri isuégra ijedámavandi, ha upéi ova Isrraélpe ikatutahápe oadora pe Dios verdadérope (Rut 1:16, 17). Upépe Rut ohechauka iñonrráda ha iguápa hague okumplívo pe Léi Ñandejára omeʼẽ vaʼekue Israélpe, ha ovenefisiáva umi imboriahúvape. Péicha jahecha Jehová núnka ndohejareíri hague Rut ha Noemíme. Tiémpo rire, David avei okomprova Jehová siémpre oñangarekoha isiervokuérare (Rut 2:2-18). Jehová ndahaʼéi  omeʼẽnteva Rútpe hemikotevẽ, síno oiporavo chupe oiko hag̃ua chugui rréi David ha avei pe Mesías antepasáda (Rut 4:13-17; Mat. 1:5, 16).

Heta kristiánope g̃uarã sapyʼánte ijetuʼu okonsegi hag̃ua peteĩ traváho ikatutahápe ogana ohupytypa hag̃uáicha hemikotevẽ. Upéicharõ jepe, haʼekuéra ombaʼapo jejopy, oiko rangue ojapo álgo noĩporãiva okonsegi hag̃ua la oikotevẽva. Péicha ohechauka hikuái iñimportanteha chupekuéra g̃uarã iñonrrádo, ha ovaloraha umi kualida porãite Jehová orekóva. Ndaipóri ótra kósa ivaliosovéva upévagui (Prov. 12:24; Efes. 4:28).

Ojapo haguéicha Rut, heta ermáno oĩva ko yvy tuichakuére ojerovia Jehová katuete oipytyvõtaha chupekuéra. Haʼekuéra okonfia Ñandejára okumplitaha ipromésa heʼíva: “Arakaʼeve ndorohejamoʼãi ha arakaʼeve noromotyreʼỹmoʼãi” (Heb. 13:5). Jehová heta vésema ohechauka ikatuha oipytyvõ umi iñonrrádovape, ha siémpre ojapotaha upéva. Haʼe katuete omoĩta isiervokuérape opa mbaʼe oikotevẽva (Mat. 6:33).

Jahecha haguéicha, yvyporakuérape g̃uarã pe diamánte ha umi ótro tesóro ivaliosoiterei. Péro ñande Ru yvagaygua ovaloraiteve umívagui umi persóna iñonrrádovape.

Ñaneonrrádoramo, ñane konsiénsia siémpre ipotĩta ha ikatúta japredika avave orreklamaʼỹre ñandéve mbaʼeve