Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Julio de 2017

“Penerasẽ umi hasẽva ndive”

“Penerasẽ umi hasẽva ndive”

“Pesegíkena peñomokyreʼỹ ha peñomombarete” (1 TES. 5:11).

PURAHÉI: 121, 75

1, 2. ¿Mbaʼérepa iñimportánte jaikuaa mbaʼéichapa ikatu ñakonsola umi imbaʼembyasývape? (Ehecha pe taʼanga oĩva iñepyrũme).

PETEĨ ermána hérava Susi heʼi: “Omano rire che memby, un áñorupi ropyta yvýre ha haʼetévaicha noroaguantamoʼãiva voi pe sufrimiénto”. Peteĩ ermáno omombeʼu de rrepentete omano hague chugui hembireko, ha haʼe ou hasyete upe haguére. Ñambyasýramo jepe, heta persóna ohasa koʼã mbaʼe ijetuʼuetévare. Kongregasiónpe avei heta ermáno nohaʼarõiete kuri omano chuguikuéra peteĩ persóna ohayhúva Armagedón mboyve. Ikatu voi hína peteĩ jahayhúva omanóma raʼe ñandehegui, térã jaikuaa algúno ohasáva koʼã situasión. Oimérõ upéicha ñañeporandukuaa: ¿Mbaʼépa ikatu okonsola koʼãichagua persónape?

2 Oĩ heʼíva kon el tiémpo ñanderesaraiha umi mbaʼe vai jahasa vaʼekuégui. Péro, ¿siértopa upéva? Peteĩ ermána viúda heʼi: “Chéverõ g̃uarã ndahaʼéi pe tiémpo la osolusionáva entéro mbaʼe, síno mbaʼéichapa jaipuru ñane tiémpo”. Jarekórõ peteĩ erída tekotevẽ ohasa tiémpo okuera hag̃ua, ha jakuida porã vaʼerã hese. Péicha avei, ñañembyasýrõ ñaikotevẽ tiémpo ha konsuélo  ñañeñandu porã jey hag̃ua. ¿Mbaʼéichapa ñaipytyvõkuaa umi persóna omano vaʼekuépe chugui peteĩ ohayhúva?

JEHOVÁ HÍNA “ÑANDEJÁRA OMEʼẼVA OPAICHAGUA KONSUÉLO”

3, 4. ¿Mbaʼérepa jaʼekuaa Jehová ontende porãitereiha mbaʼéichapa ñañeñandu omano jave peteĩ jahayhúva?

3 Ñande Ru Jehová ñanderayhuetéva, ñanekonsola ñaikotevẽve jave (elee 2 Corintios 1:3, 4). Ndaipóri ótro haʼéicha ontende porãva la jahasáva. Ñandejára opromete isiervokuérape: “Che siémpre ameʼẽ peẽme konsuélo” (Is. 51:12, TNM; Sal. 119:50, 52, 76).

4 Ñande “Túva oporoporiahuverekóva” oikuaa porã mbaʼépa heʼise omanoha ñandehegui peteĩ jahayhúva. Chugui ningo omanóma heta isiérvo, por ehémplo Abrahán, Isaac, Jacob, Moisés ha rréi David (Núm. 12:6-8; Mat. 22:31, 32; Hech. 13:22). La Biblia heʼi hiʼãitereimaha Jehovápe omoingove jey chupekuéra (Job 14:14, 15). Og̃uahẽ vove upe tiémpo ovyʼaitereíta hikuái ha hesãita. Jehovágui ningo omano avei Itaʼýra peteĩete. La Biblia heʼi haʼe ohayhueterei hague chupe ha ojepokuaaiterei hague hese (Prov. 8:22, 30). Añetehápe ndaikatumoʼãi ñantende mbaʼeichaite pevépa Jehová oñeñandu vaíne rakaʼe ohechárõ guare Itaʼýra ohayhuetéva hetaite osufri hague omano hag̃ua (Juan 5:20; 10:17).

5, 6. ¿Mbaʼéichapa Jehová ñanekonsola?

5 Ani jaduda Jehová katuete ñanepytyvõtaha. Upévare, siémpre ikatu ñamombeʼupaite chupe umi mbaʼe ñañandúva. ¡Ajépa ñañeñandu porãmie jaikuaávo haʼe ontendeha la jahasáva ha katuete ñanekonsolataha ñaikotevẽ jave! Péro, ¿mbaʼéichapa ojapo upéva?

6 Jehová oporokonsola ijespíritu sánto rupive (Hech. 9:31). Jesús opromete kuri ñande Ru yvagapegua ikatuha omeʼẽ pe espíritu sánto ipoderosoitéva entéro ojerurévape chupe (Luc. 11:13). Susi, ñañeʼẽma hague angete, heʼi: “Hetaiterei vése ningo roñesũ ha rojerure Jehovápe taorekonsolami. Ha káda rojapo upéva, roñandu mbaʼéichapa Ñandejára pyʼaguapy oñangareko ore korasõre ha umi mbaʼe ropensávare” (elee Filipenses 4:6, 7).

JESÚS ONTENDE PORÃ AVEI LA JAHASÁVA

7, 8. ¿Mbaʼérepa ndajadudái Jesús ikatuha ñanekonsola?

7 Jesús oĩrõ guare ko yvy ape ári osegi porãiterei Itúa ehémplo. Upévare haʼe ohayhu umi héntepe, oñemoĩ ilugarpekuéra ha oiporiahuvereko chupekuéra (Juan 5:19). Jehová ombou Jesúspe okonsola hag̃ua “umi oñekevrantávape” ha “umi oñembyasývape” (Is. 61:1, 2, TNM; Luc. 4:17-21). Umi hénte ohechakuaa Jesús ontende porãha la osufríva hikuái, ha ipyʼaite guive oipytyvõseha chupekuéra (Heb. 2:17).

8 Jesús imitãrõ guare, katuete omanóne raʼe chugui ihénte ha iñamigokuéra. Amalisia José, haʼéva itúa anga, omano Jesús imitãrusúpe. * (Elee pe nóta). Jesús ningo ivuenoiterei ha oporohayhukuaa, upévare ijetuʼueténe raʼe chupe ogueropuʼaka hag̃ua umi mbaʼe osufríva haʼe, isy ha iñermanokuéra.

9. ¿Mbaʼéichapa Jesús ohechauka oñemoĩha hapicha lugárpe Lázaro omanórõ guare?

9 Jesús opredika aja ko yvy ape ári  oñemoĩ umi persóna lugárpe ha ontende chupekuéra. Por ehémplo, iñamígo Lázaro omanórõ guare, haʼe oikuaa porã omoingove jeytaha chupe. Péro ohechávo mbaʼéichapa María ha Marta oñembyasy, opokoiterei hese, ha ndaikatúigui ojejoko hasẽ avei (Juan 11:33-36).

10. ¿Mbaʼérepa jaʼekuaa Jesús ombyasyetereiha gueteri ohecha jave jasufri?

10 Jahechaháicha, Jesús ojapo heta mbaʼe porã. Péro, ¿mbaʼéichapa haʼe ñanekonsola koʼág̃arupi? La Biblia ohechauka porã haʼe nokambiaiha. Heʼi voi: “Haʼe ningo peteĩchante ymave, koʼág̃a ha opa ára g̃uarã” (Heb. 13:8). Jesús haʼe pe Mburuvicha Oporomoingovéva, pórke haʼe rupive ñande ikatúta jaiko opa ára g̃uarã. Haʼe avei “ontende mbaʼéichapa oñeñandu umi ohasa asýva ha ikatu oipytyvõ chupekuéra” (Hech. 3:15; Heb. 2:10, 18). Jahechakuaa upéicharõ Jesús ontende porãha koʼag̃aite peve umi mbaʼe jahásava ha ñanekonsola “ñaikotevẽ jave” (elee Hebreos 4:15, 16).

ÑANDEJÁRA ÑEʼẼ ÑANEKONSOLA

11. ¿Mbaʼe téxtopa ndéve nekonsolave?

11 Tuicha ñanekonsola jaleévo mbaʼéichapa Jesús ombyasy Lázaro omanórõ guare, péro Ñandejára Ñeʼẽme oĩ hetave téxto ikatúva ñanepytyvõ. La Biblia heʼi voi: “Opa mbaʼe ojehai vaʼekue yma Ñandejára Ñeʼẽme, ojehai ñanerekomboʼe hag̃ua. Koʼãva omeʼẽ ñandéve esperánsa, ñanepytyvõgui ñaaguanta hag̃ua ha ñanekonsola avei” (Rom. 15:4). Oiméramo omanóma raʼe ñandehegui peteĩ jahayhúva, koʼã téxto ikatu ñanekonsola:

  • “Jehová ni mbaʼevéicharõ ndohejamoʼãi umi osufrívape, haʼe katuete oipytyvõta umi oñekevrantávape ha oñeñandúvape yvýre” (Sal. 34:18, 19, TNM).

  • “Añekevrantaitereírõ guare ha ndaikuaavéi mbaʼépa ajapóta, nde chekonsola ha chembopyʼaguapy” (Sal. 94:19, TNM).

  • “Ñande Ru Ñandejára, ñanderayhu ha imbaʼeporã rupi ñanekonsola opa ára g̃uarã ha omeʼẽ ñandéve esperánsa. Roipotaite Haʼe ha ñande Ruvicha Jesucristo penekonsola ha penemombarete” (2 Tes. 2:16, 17). *

ÑANE ERMANOKUÉRA TUICHA ÑANEKONSOLA

12. ¿Mbaʼéichapa ikatu ñakonsola peteĩ oñembyasývape?

12 Umi ermáno ha ermána ikatu hína okonsola umi oñembyasývape omano haguére chugui peteĩ ohayhúva (elee 1 Tesalonicenses 5:11). Upévare, ¿mbaʼéichapa ikatu ñamombarete ha ñakonsola umi ohasávape ko situasiónre? (Prov. 17:22). Ñanemanduʼa vaʼerã oĩha “tiémpo ñakirirĩ hag̃ua, ha tiémpo ñañeʼẽ hag̃ua” (Ecl. 3:7, TNM). Jahechamína mbaʼépa heʼi mokõi ermána. Dalene haʼéva viúda omombeʼu: “Umi oñembyasýva ningo omombeʼuse pe ojopýva chupe. Upévare iñimportánte ñahendu la heʼíva ha ani ñañeʼẽjoko chupekuéra”. Junia, orekóva iñermáno ojesuisida vaʼekue heʼi: “Ikatu ningo nañantendepái la oñandúva peteĩ persóna oñembyasýva, péro iñimportanteterei ñañehaʼã ñantende mbaʼéichapa oñeñandu”.

13. ¿Mbaʼépa iporã ñanemanduʼa?

13 Iporã ñanemanduʼa káda persóna idiferenteha oñeñandu lája, ha avei ikatu hína ohechauka oñembyasyha de diferénte fórma. Sapyʼánte ijetuʼueterei omombeʼu ótrope mbaʼeichaitépa oñeñandu. Ñandejára Ñeʼẽ heʼi: “Káda uno jaikuaa mbaʼe situasiónpa jahasa hína. Tahaʼe javyʼa térã jahasa  asy jave, ñandémante ñantende pe ñañandúva” (Prov. 14:10, TNM). Peteĩ oñembyasýva omombeʼúrõ jepe mbaʼéichapa oñeñandu, lomímonte umi ohendúva chupe ikatu nontendeporãi la heʼiséva.

14. ¿Mbaʼépa ikatu avei jajapo ñaporokonsola hag̃ua?

14 Sapyʼánte ijetuʼu jaikuaa hag̃ua mbaʼépa jaʼéta peteĩ oñembyasývape. La Biblia heʼi: “Umi iñarandúva heʼíva haʼete peteĩ pohã ñanemongueráva” (Prov. 12:18, TNM). Pe folléto hérava Omano vove peteĩ jahayhúva ñanepytyvõ ikatu hag̃uáicha jaikuaa mbaʼépa jaʼéta péicha jave. * Upéicharõ jepe, heta vése iporãve jasegi ko konsého bíblico: “Penerasẽ umi hasẽva ndive” (Rom. 12:15). Gaby, peteĩ ermána omano vaʼekue chugui iména, omombeʼu: “Che ningo cherasẽ ajedesaoga hag̃ua. Upévare chepytyvõiterei che amigokuéra hasẽ jave chendive, péicha nañeñandúi cheaño”.

15. ¿Mbaʼépa jajapokuaa ijetuʼúramo ñandéve ñakonsola umi oñembyasývape? (Ehecha avei pe rrekuádro “ ¿Mbaʼépa ikatu jaʼe ñaporokonsola hag̃ua?”).

15 ¿Mbaʼépa ikatu jajapo oimérõ ijetuʼu ñandéve jaʼe hag̃ua álgo okonsolátava ñande rapichápe? Ikatu hína ifasilve ñamondóramo chupe peteĩ tarhéta, kárta térã jaskrivi chupe peteĩ mensáhe. Por ehémplo jaskrivikuaa peteĩ téxto bíblico, ñamomanduʼa chupe umi mbaʼe porã ojapo vaʼekue pe persóna omanóva, térã peteĩ rrekuérdo porã jarekóva hendive. Junia heʼi: “Tuicha chepytyvõ arresivi jave peteĩ kartitaʼi chemokyreʼỹva, térã peteĩ ermána cheinvitáramo rohasa hag̃ua tiémpo oñondive. Koʼã mbaʼe ohechauka chéve oĩha la cherayhúva ha ojepyʼapýva cherehe”.

16. ¿Mbaʼépa ikatu avei jajapo ñaporokonsola hag̃ua?

 16 Ñane ñemboʼe ikatu avei okonsola umi ermáno oñembyasývape. Ikatu ñañemboʼe hesekuéra térã hendivekuéra. Péro jaikuaaháicha, sapyʼánte ijetuʼu ñañemboʼe hendivekuéra umícha jave, pórke ikatu jakyhyje ñanerasẽrõ g̃uarã. Ñañemboʼéramo hendivekuéra ñande pyʼaite guive ikatu hína tuichaiterei ñakonsola chupekuéra. Dalene heʼi: “Sapyʼánte umi ermána ou jave chekonsola, ajerure chupekuéra ndaikatuichénepa oñemboʼemi. Oñepyrũvo oñemboʼe hikuái ndaikatúi oñeʼẽ porã, péro ensegidamínte itrankilavéma ha pe orasión opokoiterei cherehe. Haʼekuéra ohechauka ojeroviaitereiha Jehováre, añetehápe oñeinteresaha cherehe ha cherayhuha. Koʼã mbaʼe chepytyvõ ajeroviave hag̃ua”.

JASEGÍKENA ÑAPOROKONSOLA

17-19. ¿Mbaʼérepa iñimportánte jasegi ñaporokonsola?

17 Káda uno ñanediferénte, upévare ndajaikuaái mboy tiémporepa peteĩ persóna osegíta oñembyasy. Ñepyrũrã heta amígo ha pariénte oĩ pe osufrívandi ha okonsola chupe. Péro upe rire enterovéva hembiapopa jeýma vaʼerã, ha hasyvéma oĩ hag̃ua hikuái pe oñembyasývandi. Upéicharõ jepe, oikotevẽ gueteri oñekonsola chupe. Proverbios 17:17 heʼi: “Peteĩ amígo verdadéro nderayhúta tódo el tiémpo, haʼete voi ne ermáno oĩva nde ykére rehasa asy jave” (TNM). Añetehápe iporã ñakonsola pe persóna osufrívape oikotevẽha peve (elee 1 Tesalonicenses 3:7).

18 Ñanemanduʼa vaʼerã pe persóna omanóva chugui peteĩ ohayhúva, ikatuha peichaháguinte oñeñandu vaieterei jey. Upéva ikatu oiko pórke og̃uahẽ peteĩ fécha espesiál, ohendu peteĩ músika, ohecha peteĩ fóto, ohetũ peteĩ mbaʼe ryakuã, ha umícha. Upéicha avei pe viúdo térã viúdape ikatu ijetuʼueterei ojapo jave primera ves peteĩ mbaʼe haʼeño, por ehémplo oho asambleahápe térã Konmemorasionhápe. Peteĩ ermáno heʼi: “Apensa kuri og̃uahẽvo che aniversário de kasamiénto añeñandu vaietereitaha, ha upeichaite oiko. Péro unos kuánto ermáno oprepara peteĩ atyʼi oĩtahápe che amigokuéra ani hag̃ua ahasa upe día cheaño”.

19 Jahechaháicha, umi oñembyasýva oikotevẽ konsuélo ha oñemokyreʼỹ chupekuéra umi fécha espesiálpe. Péro ndahaʼéi upe moméntopente la oikotevẽva hikuái. Junia omombeʼu: “Ndahaʼéiramo jepe peteĩ fécha espesiál, ideprovechoitereínte avei oĩrõ ñandeapojáva ha ohasáva tiémpo ñanendive. Koʼã moménto ningo ñanemokyreʼỹ ha ñanekonsolaiterei”. Jaikuaaháicha, ndaikatúi jajapo mbaʼeve anivéma hag̃ua ñande rapicha osufri térã ponove ojopy chupe pe techagaʼu. Upéicharõ jepe, lomímonte ñakonsolakuaa chupe heta hendáicha (1 Juan 3:18). Gaby heʼi: “Aagradeseterei Jehovápe umi ansiáno chepytyvõ rupi mborayhúpe, ha ndacherejái haguére cheaño ijetuʼuve jave chendive. Upéicha rupi, añandu Jehová cheañuaha tódo el tiémpo mborayhúpe”.

20. ¿Mbaʼéichapa ñanekonsola Jehová promesakuéra?

20 Ñanekonsolaiterei ningo jaikuaávo Jehová, Ñandejára omeʼẽva opaichagua konsuélo, oipeʼaitetaha ñane mbaʼembyasy omoingove jey vove umi omanóvape (Juan 5:28, 29). “Jehová hína umi ehérsito yvagapegua Ruvicha, haʼe ohundíta pe ñemano opa ára g̃uarã, ha omokãta umi hénte resay” (Is. 25:8, TNM). Og̃uahẽ vove upe día, ñanerasẽ rangue umi hasẽva ndive, javyʼáta umi ovyʼáva ndive (Rom. 12:15).

^ párr. 8 La Biblia ohechauka José oikovéiti hague Jesús orekórõ guare 12 áño. Péro noñeʼẽvéima hese, Jesús ojapórõ guare pe primer milágro (ojapórõ guare víno ýgui), ni upe rire. Upéva ohechauka posívlemente José omano hague upe tiémpoperupi. Avei, Jesúspe ojeklavárõ guare pe yvyráre omano mboyvemi, onkarga apóstol Juánpe oñangareko hag̃ua isýre. Haʼe ningo ndojapomoʼãi kuri upéva oikovéitirire itúa anga (Juan 19:26, 27).

^ párr. 11 Heta ermánope okonsola avei koʼã téxto: Salmo 20:1, 2; 31:7; 38:8, 9, 15; 55:22; 121:1, 2; Isaías 57:15; 66:13; Filipenses 4:13, ha 1 Pedro 5:7.

^ párr. 14 Elee avei pe artíkulo hérava “Jesús supo consolar a sus amigos”, osẽ vaʼekue La Atalaya 1 de noviembre de 2010-pe.