Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha (ojestudiáva)  |  Julio de 2016

Jaagradesékena Jehovápe imbaʼeporãiterei haguére ñanendive

Jaagradesékena Jehovápe imbaʼeporãiterei haguére ñanendive

“Ñandéve akóinte oñemeʼẽ mbaʼeporã ijojahaʼỹva.” (JUAN 1:16)

PURAHÉI: 95, 13

1, 2. a) ¿Mbaʼe ehémplopa Jesús omoĩ vaʼekue? b) ¿Mbaʼéichapa ko ehémplope pe patrón ohechauka imbaʼeporãha?

PETEĨ karai orekóva parralty osẽ pyharevete oheka unos kuánto kuimbaʼe ombaʼapo vaʼerã chupe. Haʼe heʼi chupekuéra mboýpa opagáta, ha haʼekuéra oasepta. Upéi pe karai osẽ jey unas kuánta vése oheka hag̃ua omombaʼapo vaʼerã, pórke heta la traváho. Entérope heʼi opaga porãtaha. Kaʼaruete, umi kuimbaʼe oterminávo itraváho, pe karai ohenói chupekuéra opaga hag̃ua. Oĩ ombaʼapo vaʼekue tódo el día, ha oĩ avei ombaʼapo saʼivéva, por ehémplo una órante. Péro pe karai imbaʼeporã ha opaga entérope peteĩchapa. Upévare, umi kuimbaʼe ombaʼapo vaʼekue un día pytã, oñepyrũ ojekeha. Pe karai omomanduʼa koʼã kuimbaʼépe haʼekuéra oasepta hague pe págo oofrese vaʼekue chupekuéra. Avei haʼe heʼi orekoha derécho opagávo ipersonalkuérape chupe ogustaháicha. Upéi oporandu umi kuimbaʼépe iñenvidióso mbaʼépa hikuái haʼe ipojera haguére umi ótrondi (Mat. 20:1-15).

2 Jesús omombeʼu kuri ko ehémplo omboʼe hag̃ua peteĩ mbaʼe iñimportantetereíva: Ñandejára ohechauka “mbaʼeporã ijojahaʼỹva” (elee 2 Corintios 6:1). [1] Oĩ opensáva umi kuimbaʼe ombaʼapo vaʼekue tódo el día, omerese hague ojepagave chupekuéra.  Péro pe karai ningo imbaʼeporãnte umi ombaʼapo vaʼekuéndi saʼive. Peteĩ mboʼehára heʼi: “Pe palávra ojetradusíva la Bíbliape mbaʼeporã ijojahaʼỹva, heʼise jarresiviha grátis peteĩ mbaʼe nañamereséiramo jepe. Heʼise avei oñemeʼẽha peteĩ persónape peteĩ mbaʼe, péro haʼe nomereséi, ni ndojapói kuri mbaʼeve ohupyty hag̃ua upéva”.

PETEĨ RREGÁLO IJOJAHAʼỸVA

3, 4. a) ¿Mbaʼérepa Jehová imbaʼeporã yvyporakuérandi? b) ¿Mbaʼéichapa ohechauka upéva?

3 La Biblia heʼi Ñandejára mbaʼeporã ijojahaʼỹva haʼeha peteĩ “rregálo” (Efes. 3:7). Ñande ñañehaʼãvéramo jepe, ndaikatumoʼãinte voi ñakumplipa opa mbaʼe Jehová ojeruréva, upévare nañamereséi haʼe imbaʼeporã ñanendive, ñamerese guei ñamano. Rréi Salomón heʼi vaʼekue: “Ndaipóri avave ko yvy apére siémpre ojapo porãva opa mbaʼe” (Ecl. 7:20, TNM). Tiémpo rire, apóstol Pablo heʼi entéronte opekaha ha upévare avave “ndohupytýi Ñandejára rekomimbipa”. Upéi heʼi avei: “Pekádo káusare ñamano” (Rom. 3:23; 6:23a).

4 Jehová ningo ohayhueterei yvyporakuérape. Upévare ombou Itaʼýra peteĩete omano hag̃ua ñanderehehápe. Upéva hína pe pruéva tuichavéva ohechaukáva imbaʼeporãha ñanendive nañamereséiramo jepe (Juan 3:16). Pablo heʼi vaʼekue Jesús rehe: “Koʼág̃a jahecha oñembotuicha ha oñemeʼẽ hague chupe tekomimbipa haʼe omano haguére. Ñandejára imbaʼeporãiterei rupi, haʼe omano opavave rehehápe” (Heb. 2:9). Upéicharõ, pe rregálo Jehová omeʼẽva ñandéve haʼe hína “jeikove opaveʼỹva ñande Ruvicha Cristo Jesús rupive” (Rom. 6:23b).

5, 6. a) ¿Mbaʼépa katuete oiko ñanderehe japeka haguére? b) ¿Mbaʼépa jahupyty Ñandejára imbaʼeporãiterei haguére ñanendive?

5 ¿Mbaʼérepa japeka ha ñamano? La Biblia heʼi: “Peteĩ kuimbaʼe káusare ningo pe ñemano ogoverna”. Ñande ningo enterovéva jaju Adángui, upévare ñaneimperfékto ha ñamano (Rom. 5:12, 14, 17). Upéicharõ jepe, ikatu jadesidi jahejátapa pe pekádo ñanedomina térãpa nahániri. ¿Mbaʼéichapa ikatu jajapo upéva? Jahechauka vaʼerã jajeroviaha Cristo sakrifísiore. Péicha jaheja ñanedomina Ñandejára mbaʼeporã ijojahaʼỹva. La Biblia heʼi: “Umi hénte heta opeka rire, Ñandejára ohechauka chupekuéra mbaʼeporã ijojahaʼỹva. ¿Maʼerãpa upéva? Pe pekádo ha ñemano ogoverna haguéicha, upéicha avei ogoverna hag̃ua Ñandejára mbaʼeporã ijojahaʼỹva, ikatu hag̃uáicha haʼe heʼi umi héntere hekojojaha ha ohupyty hag̃ua hikuái jeikove opaveʼỹva ñande Ruvicha Jesucristo rupive” (Rom. 5:20, 21).

6 Ñande ningo pekadór gueteri, péro ndahaʼéi upe haguérente jahejátamava pe pekádo ñanedomina. Upéva rangue, jajavy jave jajerure Jehovápe ñaneperdona hag̃ua. Pablo heʼi vaʼekue: “Ani peheja pe pekádo ipuʼaka penderehe, peẽ napeiméigui Léi poguýpe, síno mbaʼeporã ijojahaʼỹva poguýpe” (Rom. 6:14). ¿Mbaʼépa jahupyty Ñandejára imbaʼeporãiterei haguére ñanendive? Pablo heʼi: “Ñandejára ohechauka imbaʼeporãitereiha. [...] Upéva ñanerekomboʼe ñamboyke hag̃ua opa mbaʼe oñemoĩva Ñandejára rembipotáre ha ani hag̃ua jaipota umi mbaʼe ko mundopegua. Péicha ñaneakãguapýta, jaikóta hekópe ha ñamombaʼeguasúta Ñandejárape jaikóramo jepe ko múndope” (Tito 2:11, 12).

JEHOVÁ OHECHAUKA “HETA HENDÁICHA” IMBAʼEPORÃITEREIHA

7, 8. ¿Mbaʼépa heʼise Jehová ohechaukaha mbaʼeporã ijojahaʼỹva “heta hendáicha”? (Ehecha umi taʼanga oĩva iñepyrũme.)

7 Apóstol Pedro heʼi vaʼekue: “Ñandejára omeʼẽ káda únope peteĩ rregálo, ha oñemeʼẽ haguéicha peẽme, peiporupaitékena  upéva peservi hag̃ua ótrope. Peẽ ningo tembiguái katupyry, perekóva pende kárgope Ñandejára mbaʼeporã ijojahaʼỹva, haʼe ohechaukáva heta hendáicha” (1 Ped. 4:10). ¿Mbaʼépa heʼise upéva? Upéva heʼise Jehová omeʼẽtaha ñandéve ñaikotevẽva guive ikatu hag̃uáicha ñaaguanta ha ñambohovái umi provléma oñepresentáva ñandéve (1 Ped. 1:6).

8 Jahechaháicha, Jehová imbaʼeporãiterei ñanendive heta hendáicha nañamereséiramo jepe. Apóstol Juan oskrivi vaʼekue: “Haʼe henyhẽ rupi mbaʼeporã ijojahaʼỹva ha añetégui, ñandéve akóinte oñemeʼẽ mbaʼeporã ijojahaʼỹva” (Juan 1:16). Jehová imbaʼeporã rupi ñanendive, jarresivi heta vendisión. Jahechamína unos kuánto.

9. a) ¿Mbaʼéichapa ñanevenefisia Ñandejára mbaʼeporã ijojahaʼỹva? b) ¿Mbaʼéichapa jahechauka Jehovápe jaagraseseha ojapóva ñanderehehápe?

9 Jehová ñaneperdona japeka jave. Jehová imbaʼeporãiterei rupi, operdona umi mbaʼe vai jajapóva. Péro upearã, ñande jahechauka vaʼerã ñañarrepentiha ha ñañehaʼãmbaite anivéma hag̃ua jajapo pe ivaíva (elee 1 Juan 1:8, 9). Pablo omyesakã kuri umi unhído itiempopeguápe mbaʼéichapa Jehová operdona umi pekádo. Oñeʼẽvo Ñandejárare, heʼi: “Haʼe ñaneguenohẽ pytũmby poguýgui ha ñanemoĩ Itaʼýra ohayhuetéva rréinope. Haʼe opaga ñanesãso hag̃ua ha oñeperdona hag̃ua ñande pekádo” (Col. 1:13, 14). Jaagradeséramo Jehovápe ojapo vaʼekuére ñanderehehápe, katuete ñambotuicháta chupe. Ha haʼe ñaneperdona rupi, ikatu jarresivi heta vendisión iporãitereíva.

10. ¿Mbaʼépa jahupyty Ñandejára mbaʼeporã ijojahaʼỹva rupive?

10 Ñaime pyʼaguapýpe Jehovándi ha jaiko iñamígoramo. Ñande ningo ñanaséma imperfékto, upéicha rupi oiko ñandehegui Ñandejára enemígo. Upéicharõ jepe, Pablo heʼi vaʼekue: “Ñande haʼe aja gueteri Ñandejára enemígo, Itaʼýra omano rupi, jaiko porã jey hendive” (Rom. 5:10). Jesús sakrifísio rupive, ikatu ñañemoĩ porã jey Jehovándi. Upéva heʼise ikatuha oiko ñandehegui iñamígo ha ñaime pyʼaguapýpe hendive. ¿Mbaʼéichapa koʼã mbaʼe ohechauka Jehová imbaʼeporãitereiha ñanendive? Pablo heʼi umi kristiáno unhídope: “Ojeʼémarõ ñanderehe ñanderekojojaha jajerovia rupi, jaikókena pyʼaguapýpe Ñandejára ndive, ñande Ruvicha Jesucristo rupive. Jajerovia rupi Jesús rehe ojavri pe tape Ñandejára ohechauka hag̃ua ñandéve mbaʼeporã ijojahaʼỹva, jahupytýmava voi koʼág̃a” (Rom. 5:1, 2). ¡Ajépa javyʼaite ikatu haguére ñaime porã Jehovándi ha jaiko iñamígoramo!

Oikuaauka ñandéve umi marandu porã (Ehecha párrafo 11)

11. ¿Mbaʼéichapa umi unhído oipytyvõ hetápe hekojoja hag̃ua Ñandejára renondépe?

11 Ikatu ñanderekojoja Ñandejára renondépe. Proféta Daniel heʼi vaʼekue umi ára pahápe umi unhído oipytyvõtaha hetápe “ojuhu hag̃ua pe hustísia” (elee Daniel 12:3). ¿Mbaʼéichapa umi unhído ojapo upéva? Haʼekuéra opredika pe marandu porã oñeʼẽva pe Rréinore ha omboʼe umi “ambue ovechakuérape” Jehová Léi (Juan 10:16). Péicha oipytyvõ koʼã persónape hekojoja hag̃ua Ñandejára renondépe. Koʼã mbaʼe ojehupyty avei Ñandejára mbaʼeporã ijojahaʼỹva rupive. Pablo heʼi vaʼekue: “Ñandejára heʼi hesekuéra hekojojaha Cristo Jesús opaga haguére osalva hag̃ua chupekuéra. Péva peteĩ rregálo Ñandejára omeʼẽva imbaʼeporãiterei rupi” (Rom. 3:23, 24).

Ikatu ñañemboʼe chupe (Ehecha párrafo 12)

12. ¿Mbaʼéichapa pe orasión ohechauka Jehová imbaʼeporãitereiha ñanendive?

12 Ikatu ñañemoag̃ui Jehováre pe orasión rupive. Ñandejára imbaʼeporãiterei rupi ikatu ñañemboʼe chupe. Pablo heʼi: “Ñañemoag̃uíkena Ñandejára trónore, haʼe  imbaʼeporãitereígui ñanendive ha ñañemboʼe chupe kyhyjeʼỹre” (Heb. 4:16a). Jesús rupive ikatu ñañemboʼe Jehovápe oimeha óra, ha upéva peteĩ priviléhio ijojahaʼỹva. Pablo heʼi avei: “Haʼe rupive ñande ñañeʼẽ pyʼaguasúpe, ha jajeroviágui hese, kyhyjeʼỹre ikatu ñañemoag̃ui Ñandejárare” (Efes. 3:12).

Ñanepytyvõ ñaikotevẽ jave (Ehecha párrafo 13)

13. ¿Mbaʼéichapa Ñandejára mbaʼeporã ijojahaʼỹva ñanepytyvõ “ñaikotevẽ jave”?

13 Ñanepytyvõ itiempoitépe. Pablo ñanemokyreʼỹ ñañemboʼe hag̃ua Jehovápe ñaikotevẽ jave ajúda. Haʼe heʼi vaʼekue: “Ñandejára ñandeporiahuverekóta ha imbaʼeporãta ñanepytyvõ hag̃ua ñaikotevẽ jave” (Heb. 4:16b). Upévare, ñaneprovléma jave ikatu jajerure Jehovápe ajúda. Haʼe ipyʼaporã rupi ñanepytyvõ, ndahaʼéiramo jepe iñovligasión. Pyʼỹinte ojevale ñane ermanokuérare upearã. Ñandejára okontesta rupi ñane ñemboʼe, ikatu jaʼe: “Jehová chepytyvõ hína, ndakyhyjemoʼãi, ¿mbaʼe piko ojapóta cherehe peteĩ yvypórante?” (Heb. 13:6).

14. ¿Mbaʼépa jahupyty avei Ñandejára mbaʼeporã ijojahaʼỹva rupive?

14 Ñanekonsola. Ñandejára imbaʼeporãiterei rupi ñanendive, ñanekonsola jahasa jave peteĩ mbaʼe ijetuʼuetereíva ha ñanekevrantáva. Ojepersegírõ guare umi kristiáno Tesalonicaguápe, Pablo oskrivi chupekuéra: “Ñande Ru Ñandejára, ñanderayhu ha imbaʼeporã rupi ñanekonsola opa ára g̃uarã ha omeʼẽ ñandéve esperánsa. Roipotaite Haʼe ha ñande Ruvicha Jesucristo penekonsola ha penemombarete” (2 Tes. 2:16, 17). ¡Ajépa javyʼaite Jehová ñanekonsola ha ojepyʼapy haguére ñanderehe!

15. ¿Mbaʼe esperánsapa jareko Jehová imbaʼeporã rupi ñanendive?

15 Jareko esperánsa jaiko hag̃ua opa árare. Ñande ningo pekadór, ha Jehová reheʼỹ ndajarekomoʼãi esperánsa (elee Salmo 49:7, 8). Péro haʼe omeʼẽ ñandéve peteĩ esperánsa iporãitereíva. ¿Mbaʼépa hína upéva? Jesús heʼi vaʼekue: “Che Ru oipota opavave oikuaáva pe Taʼýrape ha ojeroviáva  hese, oikove opa ára g̃uarã” (Juan 6:40). Upéicharõ, Jehová imbaʼeporã rupi, jareko esperánsa jaikove hag̃ua opa árare. Pablo heʼi vaʼekue avei: “Ñandejára ohechauka imbaʼeporãitereiha omeʼẽvo salvasión opaichagua tapichápe” (Tito 2:11).

ANI JAJAPROVECHA JEHOVÁ MBAʼEPORÃ IJOJAHAʼỸVAGUI

16. ¿Mbaʼéichapa heta kristiáno ypykue ojaprovecha kuri Ñandejára mbaʼeporã ijojahaʼỹvagui?

16 Jahecha haguéicha, Ñandejára mbaʼeporã ijojahaʼỹva rupive, jahupyty heta vendisión. Péro ñanemanduʼáke ndovaleiha jajaprovecha upe mbaʼeporãgui jajapo hag̃ua mbaʼe vai. Upéva heʼise naiporãiha ñamoĩ exkúsa ñane rembiapo vai hag̃ua, ñaimoʼãgui Jehová oheja reitanteha opa mbaʼe. Umi kristiáno ypykue tiémpope, oĩ vaʼekue umi “notĩriva hembiapo vai hag̃ua ha heʼíva ikatuha ojapo upéicha Ñandejára imbaʼeporãiterei rupi” (Jud. 4). Amalisia koʼã kristiáno naiñeʼẽrendúiva oimoʼã siémpre ikatuha opeka, pórke opensa Jehová operdonatanteha voi chupekuéra. Hiʼarive omboliga umi ótro ermánope hembiapo vai hag̃ua haʼekuéraicha. Ñane tiémpope avei, oimeraẽ ojapóva péicha ohechauka ndorrespetaiha Ñandejára espíritu sánto, “omeʼẽva mbaʼeporã ijojahaʼỹva” (Heb. 10:29).

17. ¿Mbaʼe adverténsiapa omeʼẽ Pedro?

17 Ñane tiémpope Satanás ogueroviauka heta kristiánope ikatuha opeka, pórke Ñandejára operdonatanteha voi chupekuéra. Añetehápe ningo Jehová oĩ dispuésto operdonávo umi oñarrepentívape. Péro avei oipota ñañehaʼã ani hag̃ua jareko umi deséo ojapoukátava ñandéve umi mbaʼe vai. Jehová oskrivika vaʼekue apóstol Pédrope: “Peñatende porãke ani hag̃ua pejegueraha hendivekuéra tape vaíre, penembotavy rupi umi kuimbaʼe aña; ha péicha pejei pe tape porãgui peẽ pedesidi vaʼekue pesegitaha. Aníke peheja avave penembotavy, síno akóinte pehupyty ñande Ruvicha ha Salvadór Jesucristo mbaʼeporã ijojahaʼỹva, ha peikuaa porãve chupe” (2 Ped. 3:17, 18).

JAVALORÁKENA JEHOVÁ MBAʼEPORÃ IJOJAHAʼỸVA

18. ¿Mbaʼéichapa jahechauka javaloraha Jehová mbaʼeporã ijojahaʼỹva?

18 Jaagradeséramo Jehovápe imbaʼeporã haguére ñanendive, jaipurúta opa mbaʼe omeʼẽva ñambotuicha hag̃ua chupe ha ñaipytyvõ hag̃ua ótrope. ¿Mbaʼéichapa ikatu jajapo upéva? Pablo heʼi vaʼekue: “Ñandejára imbaʼeporã rupi, ombokatupyry káda únope ojapo hag̃ua diferénte tembiapo”. Upéi heʼi: “Ñanembokatupyrýrõ jaservi hag̃ua ótrope, japoroservi vaʼerã; pe oñembokatupyrýva oporomboʼe hag̃ua, omboʼe vaʼerã hapichápe. Pe oñembokatupyrýva oñemoñeʼẽ hag̃ua, tosegi toñemoñeʼẽ hapichápe. [...] Pe oiporiahuverekóva hapichápe, tojapo vyʼápe” (Rom. 12:6-8). ¿Mbaʼépa heʼise koʼã mbaʼe? Jahechaháicha, Jehová imbaʼeporãiterei rupi ñanembokatupyry heta hendáicha. Ha ñande jahechauka vaʼerã javaloraha upéva ñambaʼapo jejopývo predikasiónpe ha ñamboʼévo la Biblia ñande rapichápe. Avei tekotevẽ ñamokyreʼỹ ñane ermanokuérape, ha ñaperdona umi ñaneofendévape.

19. ¿Mbaʼépa jahecháta pe artíkulo oúvape?

19 Jaagradeséramo umi vendisión jarresivíva Jehová imbaʼeporã haguére ñanendive, ñañehaʼãta jaikuaauka “hekoitépe umi marandu porã oñeʼẽva Ñandejára mbaʼeporã ijojahaʼỹvare” (Hech. 20:24). Pe artíkulo oúvape jahecháta mbaʼéichapa ñakumpli porãta ko rresponsavilida.

^ [1] (párrafo 2) Ehecha pe fráse “Mbaʼeporã Ijojahaʼỹva” pe Diksionário oĩvape Ñandejára Ñeʼẽ Mateo – Apocalípsispe, páhina 549.